སྲུང་བཞི་དཔྱད་པ་ཀོང་ཙེ་འཕྲུལ་རྒྱལ་འབེལ་གཏམ་ཞེས་བྱ་བ་བཞུགས་སོ།།

　　[ནང་དོན་གནད་བསྡུས] སྲུང་བཞི་ཞེས་པ་ནི་སྒང་པ་ཞང་བོད་ཀྱི་ཡ་ཐོག་གདོད་མའི་རིག་གནས་ཀྱི་གཙོ་རྙིང་ཡ་གྱལ་ཏེ་ཡ་ཐོག་སྲིད་པའི་བོན་ལུགས་ཀྱི་རིག་གནས་ཤིག་ཡིན་ལ། ཕྱིས་སུ་སྟོན་པ་གཤེན་རབ་མི་བོས་སྲོལ་བཏོན་པའི་གཡུང་དྲུང་བོན་ལུགས་ཀྱི་རིག་གནས་ཞིག་ཀྱང་གྲུབ། བོད་ཀྱི་མཁས་པ་ལ་ལས་བཤད་པ་ལྟར་ན། སྲུང་བཞི་ཞེས་པ་ནི་ཞང་བོད་ཡ་ཐོག་མི་རིགས་རྣམས་ཀྱི་ས་མཚམས་སྲུང་བའི་བརྡ་དར་དང་། ཡང་ན་དམག་འཐབ་པའི་ཚེ་ཕྱར་བའི་དམག་དར་ལྟ་བུ་ཡིན་པར་བཤད། འོན་ཀྱང་ཡ་ཐོག་སྲིད་པའི་བོན་དང་གཡུང་དྲུང་བོན་ལུགས་ཀྱི་དཔྱད་གཞི་ཡིག་ཆ་ཚད་ལྡན་ནང་དུ་དེ་ལྟ་བུའི་བཤད་སྒྲོས་མ་མཐོང་། ཁམས་ཉག་རོང་སོགས་བོད་ཀྱི་ཡུལ་གྲུ་འགའ་ཞིག་ལ། བོད་ཀྱི་ལོ་སར་བཅུ་གསུམ་ཞེས་བཏང་སྲོལ་འདུག། དེའི་སྐབས་སུ་ཡུལ་རི་གཞི་བདག་དང་། ཁང་སྟེང་གསས་མཁར་དང་། ཆུ་ལེན་འགྲོ་སའི་ཀླུ་ཁང་སོགས་ལ་སྲུང་བཞི་ཞེས་པ་དེ་འཛུགས་སྲོལ་འདུག། དེ་ལས་གཞན་པའི་གཏོ་ཆོག་དང་ཀླུ་ཆོག་སྣང་སྲིད་ཞི་བ་འདོན་པའི་སྐབས་སུ་ཡང་སྲུང་བཞི་བྱས་སྲོལ་ཡང་ཡོད། འོག་ཏུ་བོན་ལུགས་ཀྱི་ཚད་ལྡན་ཡིག་ཆའི་དཔྱད་གཞི་ལྟར་སྲུང་བཞིའི་ལོ་རྒྱུས་དང་དགོས་དོན་ཉུང་ཙམ་དཔྱད་གཞིའི་ཚུལ་དུ་འགོད་པར་བྱའོ། །

　　[གནད་ཚིག] སྲུང་བཞི། རླུང་རྟ། རྒྱལ་ཆེན་བཞི། པུ་ཐོ། གསས་མཁར།

སྲུང་བཞི་ཞེས་པའི་ཐ་སྙད་ལ་དཔྱད་པ།

　　སྤྱིར་སྲུང་བཞི་ཞེས་པ་ནི་ཞང་ཞུང་དང་བོད་ཡུལ་དུ་དར་བའི་རིག་གནས་ཞིག་ཡིན། དེ་དང་རིགས་འདྲ་བ་རྒྱ་ནག་སོགས་ལ་ཡང་ཡོད་པར་བཤད། དེ་ཡང་སྲུང་བཞི་ཞེས་པའི་དོན་ལ། རྒྱལ་བུ་རྒྱལ་སར་ཕྱུང་བའི་མདོ་ལས། ལོའི་ལྷ་དང་། ཟླ་བའི་ལྷ་དང་། ཞག་གི་ལྷ་དང་། ཟ་མའི་ལྷ་དང་། དུས་ཚོད་ཀྱི་ལྷ་དང་། སྲུང་བཞིའི་ལྷ་དང་།1 ཞེས་པའི་སྲུང་བཞི་ནི་དུས་ཚིགས་བཞི་ལ་གོ་འདུག། ཡང་དེ་ཉིད་ལས། ལོ་བསྐོར་བཅུ་གཉིས་དང་། སྤར་ཁམས་བརྒྱད་དང་། སྨེ་བ་གླིང་དགུ་དང་། ཕྱོགས་ཀྱི་སྲུང་བཞི་དང་། ལོའི་ལྷ་དང་། ཟླ་བའི་ལྷ་དང་། ཞག་གི་ལྷ་དང་། ཟ་མའི་ལྷ་དང་། ཤིང་གི་ལྷ་མོ་ལ་སོགས།2 ཞེས་པའི་སྲུང་བཞི་ནི་ཤར་བྱང་ནུབ་ལྷོ་སྟེ་ཕྱོགས་བཞི་སྲུང་བ་བཞི་ལ་གོ། ཡང་། སྒོ་བཞི་གང་ལ་སྤྱི་རུ་རྒྱུག །ལོགས་བཞི་འབུར་བཞི་རྟ་བབས་བཞི། །སྒོ་རྒྱན་མཆོད་རྟེན་སྒོ་སྲུང་བཞི། །ནང་སྒོ་རང་རང་སྒོ་བས་བསྲུང་། །ཕྱི་སྒོ་རྒྱལ་ཆེན་བཞི་ཡིས་བསྲུང་། །ཡུལ་སྲུང་བོན་འཕགས་སྤྱན་མི་བཟང་། །རྣམ་སྲས་དག་དང་བཞི་ཡི་བསྲུང་། །3ཞེས་པའི་སྲུང་བཞི་ནི་སྒོ་སྲུང་རྒྱལ་ཆེན་བཞི་ལ་གོ། ཀོང་ཙེ་འཕྲུལ་རྒྱལ་གྱིས་མཛད་པའི་སྲུང་བཞི་ཞེས་པའི་ནང་དུ་སྲུང་བཞི་ནི། ཤར་སྟག་དང་ཤིང་གི་ཁམས། བྱང་རུས་སྦལ་དང་ཆུ་ཡི་ཁམས། ནུབ་བྱ་དམར་པོ་དང་ལྕགས་ཀྱི་ཁམས། ལྷོ་གཡུ་འབྲུག་དང་མེ་ཡི་ཁམས་ལ་གོ།4 དེ་ལྟར་གཞུང་དོན་མི་འདྲ་བ་འགའ་ཡོད་པའི་སྲུང་བཞི་ཞེས་པའི་གོ་དོན་ཡང་མི་འདྲ་བར་མངོན།

སྲུང་བཞི་ཞེས་པའི་བྱུང་ཚུལ་ལ་དཔྱད་པ།

　　ཀོང་ཙེ་འཕྲུལ་རྒྱལ་གྱིས་མཛད་པའི་སྲུང་བཞི་ཞེས་པའི་གཞུང་དོན་ལྟར་ན། ཡེ་མཁྱེན་ཕྱྭ་ཡི་རྒྱལ་པོའི་སྐུ་རིང་ལ། གཤེན་རབ་ལྷའི་སྲས་ཤིག་བྱུང་བ་དེས་འགྲོ་བ་སེམས་ཅན་ཡོངས་ལ་བྱམས་སེམས་བསྐྱེད་དེ་འགྲོ་བའི་སྐྱབས་གནས་ཀྱི་ཆེད་དུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལས་གསེར་གྱི་རུས་སྦལ་སེར་པོ་ཞིག་སྤྲུལ། དེའི་མགོ་བོ་ལྷོ་ལ་མཇུག་མ་བྱང་། གཞོག་གཡས་ཤར་ལ་གཡོན་པ་ནུབ་ཏུ་སྐོར། རྐང་ལག་བཞི་ནི་མཚམས་བཞིར་བརྐྱངས། ཤར་ཕྱོགས་ཤིང་གི་བསྐལ་པ་དར། དེ་ལ་ལོ་སྐོར་བཅུ་གཉིས་ལས་སྟག་དང་ཡོས་གཉིས་ཀ་གནས། སྤར་ཁ་ཟིན་དང་། གཟར་སྐར་ཤིང་གི་ཁམས་ལ་སོགས་ཆགས། ཤར་ཕྱོགས་ས་བདག་ཀླུ་གཉན་སོགས་ཀྱིས་ཕྲག་དོག་དང་ཀོ་ལོང་བྱེད་པ་ལ། ཀོང་ཙེ་འཕྲུལ་རྒྱལ་སྐུ་ཡི་སྤྲུལ་པ་ལས། རྒྱ་སྟག་ཁྲ་བོ་ཤར་དུ་འཛུགས་པས་ཤར་ཕྱོགས་ཤིང་གི་གདུག་པ་སྲུང་བ་དང་། ཤིང་དགྲ་ལྕགས་ཀྱིས་ཆོད་པ། ཤར་ཕྱོགས་ཤིང་ཁམས་གཟའ་སྐར་གྱི་གནོད་པ་ཐམས་ཅད་སྲུང་བ་དང་། ཐམས་ཅད་ཞི་བདེ་བཏང་སྙོམས་ཀྱི་ངང་དུ་ཐུགས་ཞི་བ་བྱང་ཆུབ་ཀྱི་སེམས་དང་ལྡན་པའོ། །

　　བྱང་ཕྱོགས་ཆུ་ཡི་བསྐལ་པ་དར། དེ་ལ་ལོ་སྐོར་བཅུ་གཉིས་ལས་བྱི་བ་དང་ཕག་གཉིས་ཀ་གནས། སྤར་ཁ་ཁམས་དང་། གཟར་སྐར་ཆུ་ཡི་ཁམས་ལ་སོགས་ཆགས། བྱང་ཕྱོགས་ས་བདག་ཀླུ་གཉན་སོགས་ཀྱིས་ཕྲག་དོག་དང་ཀོ་ལོང་བྱེད་པ་ལ། ཀོང་ཙེ་འཕྲུལ་རྒྱལ་ཕྲིན་ལས་ཀྱི་སྤྲུལ་པ་ལས། གསེར་གྱི་རུས་སྦལ་སེར་པོ་བྱང་དུ་འཛུགས་པས་བྱང་ཕྱོགས་ཆུ་ཁམས་ཀྱི་གདུག་པ་སྲུང་བ་དང་། ཆུ་དགྲ་ས་ཡིས་ཆོད། བྱང་ཕྱོགས་ཆུ་ཁམས་གཟའ་སྐར་གྱི་གནོད་པ་ཐམས་ཅད་སྲུང་བ་དང་། ཐམས་ཅད་ཞི་བདེ་བཏང་སྙོམས་ཀྱི་ངང་དུ་ཐུགས་ཞི་བ་བྱང་ཆུབ་ཀྱི་སེམས་དང་ལྡན་པའོ། །

　　ནུབ་ཕྱོགས་ལྕགས་ཀྱི་བསྐལ་པ་དར། དེ་ལ་ལོ་སྐོར་བཅུ་གཉིས་ལས་བྱ་དང་སྤྲེལ་གཉིས་ཀ་གནས། སྤར་ཁ་དྭ་དང་། གཟར་སྐར་ལྕགས་ཀྱི་ཁམས་ལ་སོགས་ཆགས། ནུབ་ཕྱོགས་ས་བདག་ཀླུ་གཉན་སོགས་ཀྱིས་ཕྲག་དོག་དང་ཀོ་ལོང་བྱེད་པ་ལ། ཀོང་ཙེ་འཕྲུལ་རྒྱལ་ཐུགས་ཀྱི་སྤྲུལ་པ་ལས། མེ་ཡི་བྱ་ཁྱུང་དམར་པོ་ནུབ་ཏུ་འཛུགས་པས་ནུབ་ཕྱོགས་ལྕགས་ཁམས་ཀྱི་གདུག་པ་སྲུང་བ་དང་། ལྕགས་དགྲ་མེ་ཡིས་ཆོད། ནུབ་ཕྱོགས་ལྕགས་ཁམས་གཟའ་སྐར་གྱི་གནོད་པ་ཐམས་ཅད་སྲུང་བ་དང་། ཐམས་ཅད་ཞི་བདེ་བཏང་སྙོམས་ཀྱི་ངང་དུ་ཐུགས་ཞི་བ་བྱང་ཆུབ་ཀྱི་སེམས་དང་ལྡན་པའོ། །

　　ལྷོ་ཕྱོགས་མེ་ཡི་བསྐལ་པ་དར། དེ་ལ་ལོ་སྐོར་བཅུ་གཉིས་ལས་རྟ་དང་སྦྲུལ་གཉིས་ཀ་གནས། སྤར་ཁ་ལི་དང་། གཟར་སྐར་མེ་ཡི་ཁམས་ལ་སོགས་ཆགས། ལྷོ་ཕྱོགས་ས་བདག་ཀླུ་གཉན་སོགས་ཀྱིས་ཕྲག་དོག་དང་ཀོ་ལོང་བྱེད་པ་ལ། ཀོང་ཙེ་འཕྲུལ་རྒྱལ་གསུང་གི་སྤྲུལ་པ་ལས། གཡུ་འབྲུག་སྔོན་པོ་ལྷོ་རུ་འཛུགས་པས་ལྷོ་ཕྱོགས་མེ་ཁམས་ཀྱི་གདུག་པ་སྲུང་བ་དང་། མེ་དགྲ་ཆུ་ཡིས་ཆོད། ལྷོ་ཕྱོགས་མེ་ཁམས་གཟའ་སྐར་གྱི་གནོད་པ་ཐམས་ཅད་སྲུང་བ་དང་། ཐམས་ཅད་ཞི་བདེ་བཏང་སྙོམས་ཀྱི་ངང་དུ་ཐུགས་ཞི་བ་བྱང་ཆུབ་ཀྱི་སེམས་དང་ལྡན་པའོ། །

　　གསེར་གྱི་རུས་སྦལ་སེར་པོ་ཡི་རྐང་ལག་བཞི་ནི་མཚམས་བཞིར་བརྐྱངས་པ་ལ། མཚམས་བཞི་ས་ཁམས་སྤྲུལ་པ་སྲིད། མཚམས་བཞི་ལ་ལོ་སྐོར་བཅུ་གཉིས་ལས་ཁྱི་འབྲུག་གླང་ལུག་བཞི་དང་།སྤར་ཁ་ཁད་ཁོན་གིང་ཟོན་དང་། གཟར་སྐར་ས་ཡི་ཁམས་ལ་སོགས་ཆགས། མཚམས་བཞིའི་ས་བདག་ཀླུ་གཉན་སོགས་ཀྱིས་ཕྲག་དོག་དང་ཀོ་ལོང་བྱེད་པ་ལ། ཀོང་ཙེ་འཕྲུལ་རྒྱལ་ཡོན་ཏན་གྱི་སྤྲུལ་པ་ལས། ཤིང་གི་བྱ་ཁྱུང་ལྗང་གུ་མཚམས་བཞིར་འཛུགས་པས་མཚམས་བཞི་ས་ཁམས་ཀྱི་གདུག་པ་སྲུང་བ་དང་། ས་དགྲ་ཤིང་གིས་ཆོད།མཚམས་བཞི་དང་དབུས་ས་ཁམས་གཟའ་སྐར་གྱི་གནོད་པ་ཐམས་ཅད་སྲུང་བ་དང་། ཐམས་ཅད་ཞི་བདེ་བཏང་སྙོམས་ཀྱི་ངང་དུ་ཐུགས་ཞི་བ་བྱང་ཆུབ་ཀྱི་སེམས་དང་ལྡན་པའོ། །5ཤར་ལ་སྟག་དཀར་པོ། བྱང་ལ་རུས་སྦལ་སེར་པོ། ནུབ་ལ་བྱ་ཁྱུང་དམར་པོ། ལྷོ་རུ་གཡུ་འབྲུག་སྔོན་པོའི་གཟུགས་རིས་བཞི་འཇོག་པ་ལ་སྲུང་བཞི་དང་། མཚམས་བཞི་ལ་བྱ་ཁྱུང་སྔོན་པོའི་གཟུགས་རིས་བཞི་དང་། དབུས་ལ་བྱ་བྱུང་སྔོན་པོའི་གཟུགས་རིས་འཇོག་པ་དང་འཇོག་པའི་དགོས་པ་བཅས་བསྟན་ཡོད། དེ་དང་དོན་མཐུན་པ་ནི། དྲི་མེད་གཟི་བརྗིད་ལས། ཕྱོགས་ཀྱི་སྲུང་བཞི་མཚམས་ཀྱི་ལྷ། །ཀླུ་ཆེན་བརྒྱད་པོ་ཆུ་ཀླུང་བདག །སྲིད་པའི་གཉན་ཆེན་འཁོར་དང་བཅས། །ས་བདག་ཀླུ་གཉན་གཏོད་འཁོར་ལ། །བྱིན་གྱིས་བརླབས་པའི་མཆོད་ཡོན་འབུལ། །དཀར་པོ་དགེ་བའི་ལས་ལ་བསྐུལ། །བརྟེན་པའི་གཞི་གནས་མཆོད་པས་བསླང་། །ཞེས་སོ། །གཞན་ཡང་། ཕྱོགས་བཞི་མཚམས་བརྒྱད་ཀྱི་སྤར་ཁ་བཅོས་ཐབས་ལས། སངས་པོ་འབུམ་ཁྲི་སྤྲུལ་པ་ལས། མ་ཧ་གསེར་གྱི་རུས་སྦལ་ཞིག་སྲིད། དེའི་མགོ་བོ་ལྷོ་ལ་མཇུག་མ་བྱང་། གཞོག་གཡས་ཤར་ལ་གཡོན་པ་ནུབ་ཏུ་སྐོར། རྐང་ལག་བཞི་ནི་མཚམས་བཞིར་བརྐྱངས་པ་དང་། ཕྱོགས་བཞི་མཚམས་བཞི་སྲུང་བ་བཞི་དང་ལོ་སྐོར་སྤར་ཁ་ཁམས་སོགས་གོང་དང་འདྲ།6 འདིའི་སྐབས་སུ་ཤིང་གི་བྱང་བུ་ལ་གཟུགས་བརྙན་དེ་དག་བྲིས་ཏེ་བཙུགས་དགོས་པར་བསྟན་འདུག། བསྲུང་བཞི་དང་ཤེལ་ཚིགས་ནང་དུ་བྱུང་ཚུལ་སོགས་འདྲ་ཡང་། བདག་དང་ཡོན་བདག་གི་ས་རྐོ་རྡོ་བསློག་ཤིང་བཅད་དང་། ཁང་ལས་བག་མ་བསུ་བཅལ་དང་། སྟོན་མོ་ལྟད་མོ་དམག་འགྲོ་དང་། གཤིན་ལས་སྤུར་བསྲེགས་རོ་འདྲེན་དང་། །དྲག་ལས་སྦྱིན་བསྲེག་ཟོར་འཕེན་སོགས། །བྱ་བ་ཞི་དྲག་ཅི་བྱས་ཡང་། །རྐོ་ལོང་འཕྲག་དོག་མ་བྱེད་ཅིང་། །གལ་ཏེ་རྐོ་ལོང་འཕྲག་དོག་ན། །གཤེན་རབ་སྐུ་ཡི་སྤྲུལ་པ་ལས། །ལྕགས་ཀྱི་དབལ་སྟག་དཀར་པོ་འདིས། །ཤར་ཕྱོགས་ཤིང་གི་གདུག་པ་བསྲུང་། །གཏུབ་གཅོད་ལྕགས་ཀྱི་སྟ་རེ་ཡིས། །ཤར་ཕྱོགས་ཤིང་དགྲ་ལྕགས་ཀྱིས་ཐུལ། །ཞེས་གསུངས་པ་བཞིན་དུ། བྱང་ཕྱོགས་ལ་དེ་དང་འདྲ་བ་བྱུང་ན་གཤེན་རབ་ཡོན་ཏན་གྱི་སྤྲུལ་པ་ལས། །ས་ཡི་རུས་སྦལ་སེར་པོ་ཡིས། །བྱང་ཕྱོགས་ཆུ་ཡི་གདུག་པ་བསྲུང་། །བྱང་ཕྱོགས་ཆུ་དགྲ་ས་ཡིས་ཐུལ། །ནུབ་ཕྱོགས་ལ་དེ་དང་འདྲ་བ་བྱུང་ན་གཤེན་རབ་ཐུགས་ཀྱི་སྤྲུལ་པ་ལས། །མེ་ཡི་བྱ་ཁྱུང་དམར་པོ་ཡིས། །ནུབ་ཕྱོགས་ལྕགས་ཀྱི་གདུག་པ་བསྲུང་། །བསྲེག་བྱེ་དབལ་གྱི་མེ་ཆེ་ཡིས། །ནུབ་ཕྱོགས་ལྕགས་དགྲ་མེ་ཡིས་ཐུལ། །ལྷོ་ཕྱོགས་ལ་དེ་དང་འདྲ་བ་བྱུང་ན་གཤེན་རབ་གསུང་གི་སྤྲུལ་པ་ལས། །ཆུ་ཡི་གཡུ་འབྲུག་སྔོན་པོ་ཡིས། །ལྷོ་ཕྱོགས་མེ་ཁམས་གདུག་པ་བསྲུང་། །བསིལ་བྱེད་ཆུ་ཡི་ཞགས་པ་ཡིས། །ལྷོ་ཕྱོགས་མེ་དགྲ་ཆུ་ཡིས་ཐུལ། །མཚམས་བཞི་ལ་དེ་དང་འདྲ་བ་བྱུང་ན་གཤེན་རབ་ཕྲིན་ལས་ཀྱི་སྤྲུལ་པ་ལས། །ཤིང་གི་བྱ་ཁྱུང་ལྗང་གུ་ཡིས། །མཚམས་བཞི་ས་ཡི་རུས་སྦལ་བསྲུང་། །ས་ཡི་གདུག་པ་ཤིང་གིས་ཐུལ། ཞེས་བར་དུ་བསྟན་ཡོད། དེའི་མཇུག་ཏུ། ཤར་ཤིང་སྟག་ཁྲ་བོ་དང་། ལྷོ་གཡུ་འབྲུག་སྔོན་པོ། ནུབ་རྨ་བྱ་དམར་པོ། བྱང་རུས་སྦལ་སེར་པོ་ལ་ཤེལ་ཚིགས་མཆོད་པ་འབུལ་ཚུལ་བཅས་བསྟན་ཡོད།7 འདིའི་སྐབས་སུ་ནུབ་བྱ་དེ་རྨ་བྱ་དམར་པོ་ཡིན་པར་བསྟན་ཡོད། གཞུང་གཞན་དག་ཏུ་བྱ་ཁྱུང་དམར་པོ་ཡིན་པར་བཤད་འདུག།

སྲུང་བཞིའི་དབྱེ་བ་ལ་དཔྱད་པ།

　　དེང་སང་མི་མང་པོ་ཞིག་གིས་སྲུང་བཞི་དང་དར་ཅོག། ཀླུང་དར་རམ་ཀླུང་རྟ་སོགས་ཀྱི་དབྱེ་བ་དེ་ཙམ་འབྱེད་མི་ཤེས་པ་མང་བས་དེ་དག་གཅིག་ཏུ་འདོད་མཁན་མང་འདུག། སྤྱིར་སྲུང་བཞི་ནི་ཡ་ཐོག་ཞང་ཞུང་བོན་ལུགས་སུ་གྲགས་པའི་ལུགས་སྲོལ་ཞིག་ཡིན། སྲུང་བཞི་ཞེས་པ་ནི་གོང་དུ་བསྟན་པའི་སྲུང་བཞིའི་གཟུགས་བརྙན་དང་ཤིང་སྟག་པ་བྱ་ཝང་དཀར་པོ་སྤུས་བརྒྱན་པ་ལ་གོ། དེ་ལ་དར་ཅོག་ཡིན་མིན་གཉིས་རེ་ཡོད། སྲུང་བཞི་ལ་དར་ཅོག་གྱིས་བརྒྱན་པ་ལ་སྲུང་བཞི་དར་ཅོག་ཅན་ཞེས་འབོད་ན་གོ་བདེ་བ་དང་། ཀླུང་དར་རམ་ཀླུང་རྟ་དང་དར་ཅོག་གཉིས་ལ་ཁྱད་པར་ཡོད། ཀླུང་དར་རམ་ཀླུང་རྟ་ནི་དར་ཅོག་གི་བྱེ་བྲག་ཅིག་ཡིན་ཡང་། དར་ཅོག་ཡིན་ན་ཀླུང་དར་རམ་ཀླུང་རྟ་དང་སྲུང་བཞི་ཡིན་པའི་ངེས་པ་མེད། ཀླུང་དར་རམ་ཀླུང་རྟ་ལ་ཀླུང་རྟའི་ནང་གི་སེང་འབྲུག་སྟག་གཡག་དང་རྟ་མཆོག་སོགས་ཀྱི་གཟུགས་བརྙན་ཡོད་པའི་དར་ཅོག་ལ་གོ། དར་ཅོག་ལ་རིགས་མི་འདྲ་བ་མང་པོ་ཡོད། གཙོ་བོ་གསོན་པོ་བྱ་ལ་ལམ་འགྲོའི་ཆེད་སོགས་ཀྱི་དོན་དུ་ཚེ་སྒྲུབ། སྨན་ལྷ། རྒྱལ་མཚན་རྩེ་མོ། བཀྲ་ཤིས་བརྩེགས་པ། གདུགས་དཀར་སོགས་ས་གཙང་སར་འཛུགས་པའི་དར་ཅོག་དང་། ཤི་བོའི་ཆེད་དུ་སྙིང་པོ་རྣམ་གསུམ། ཡིག་བརྒྱ། ཐར་མདོ། པདྨ་འཕྲུལ་མདོ། སྡིག་བཤགས་སོགས་དུར་ཁྲོད་ནང་དུ་འཛུགས་རྒྱུའི་དར་ཅོག་སྟེ་རིགས་གཉིས་སུ་དབྱེ་རུ་ཡོད། ཀླུང་དར་རམ་ཀླུང་རྟ་ནི་རི་རྩེ་དང་གཞི་བདག་སོགས་ལ་འཛུགས་རྒྱུའི་དར་ཅོག་གོ། རླུང་རྟ་དེ་ལ་རིགས་མི་འདྲ་བ་གཉིས་སོགས་ཡོད་ཚུལ་ཤེས་ན་ལེགས་སོ། །

　　སྐབས་སུ་བབ་པའི་གླེང་བྱ་སྲུང་བཞིའི་དབྱེ་བ་གསལ་བོ་བསྟན་པའི་ཚད་ལྡན་ཡིག་ཆ་ཞིག་མ་མཐོང་ཡང་། རང་གིས་མཐོང་ཡུལ་དུ་གྱུར་བ་ཚད་ལྡན་ཡིག་ཆ་ནི་གཉན་ཆེན་བཞི་ཡི་སྲུང་བཞིའི་སྐོར་ཡིན། དེའི་ནང་དུ་ས་བདག་སྲུང་བཞི།8 ཞེས་པའི་ཐ་སྙད་ཅིག་བྱུང་འདུག།དེ་ལ་བརྟག་ན་ས་བདག། ཀླུ། གཉན། གཏོད། གཞི་བདག་སོགས་ལ་སྲུང་བཞི་རེ་རེ་ཡོད་པར་སྣང་། གཉན་ཆེན་བཞི་ཡི་སྲུང་བཞི་ནི་གཏོ་ཡི་བདག་པོ་ཆེན་པོ་གཙུག་ལག་སྲིད་པའི་ལྷ་ཆེན་བཞིའི་རྣམ་སྤྲུལ། ནམ་ཟླ་དུས་བཞི་གཏོ་ཡི་བདག་པོ་ཀོང་ཙེ་འཕྲུལ་རྒྱལ་གྱིས་གཏོ་བྱེད་པའི་ཚེ། ཤར་ཕྱོགས་གཉན་ཆེན་ཤིང་གི་ལྷ། སྟག་ཆེན་སྐྱ་བོ་སྟོན་པ་ནི་དཔྱིད་ཟླ་གསུམ་གྱི་ཉེས་པ་ཞི་བ་དང་། ལྷོ་ཕྱོགས་གཉན་ཆེན་མེ་ཡི་ལྷ། གཡུ་འབྲུག་གཟུགས་སུ་སྟོན་པ་ནི་དབྱར་ཟླ་གསུམ་གྱི་ཉེས་པ་ཞི་བ་དང་། ནུབ་ཕྱོགས་གཉན་ཆེན་ལྕགས་ཀྱི་ལྷ། བྱ་དམར་གཟུགས་སུ་སྟོན་པ་ནི་སྟོན་ཟླ་གསུམ་གྱི་ཉེས་པ་ཞི་བ་དང་། བྱང་ཕྱོགས་གཉན་ཆེན་ཆུ་ཡི་ལྷ། རུས་སྦལ་གཟུགས་སུ་སྟོན་པ་ནི་དགུན་ཟླ་གསུམ་གྱི་ཉེས་པ་ཞི་བ་དང་། གཏོ་གླུད་དེ་དག་ལ་འཕེན་དར་དང་དར་མཚོན་བྱ་སྤུ་བལ་མཚོན་རྒྱང་བུ་སོགས་མཐུན་རྫས་འབུལ་ན་གཉན་ཆེན་བཞི་དང་འགལ་འཁྲུལ་ཞི་བ་དང་། ལོ་ཀག། ཟླ་ཀག། ཞག་ཀག་སོགས་མི་མཐུན་པའི་ཕྱོགས་ཐམས་ཅད་ཞི་བ་དང་མཐུན་རྐྱེན་ཕུན་སུམ་ཚོགས་པ་སོགས་ཕན་ཡོན་དགོས་པ་བཅས་བསྟན་ཡོད།9

སྲུང་བཞིའི་ལྷ་བཞིའི་ཁྱད་བོན་ལ་དཔྱད་པ།

　　དགེ་བསྙེན་ཐེག་པའི་མདོ་ལས། མཚལ་སྟག་གཡུའི་བྱ་རོག་ཅན། །གཡུ་འབྲུག་མཚལ་གྱི་ཟེ་བ་ཅན། །རུས་སྦལ་གསེར་གྱི་གྲངས་འབྲུམ་ཅན། །བྱ་མར་མེའི་འདབ་གཤོག་ཅན། །ཞེས་པའི་ཕྱོགས་བཞིར་སྲུང་བཞི་དེ་ནི་ཤར་མཚལ་སྟག་གམ་སྐུ་མདོག་དམར་པོའི་སྟག་ལ་གཡུ་མདོག་གི་བྱ་རོག་གཤོག་པ་ཅན་དང་། ལྷོ་གཡུ་འབྲུག་དམར་པོ་ཟེ་བ་ཅན། བྱང་རུས་སྦལ་གསེར་གྱི་གྲང་འབྲུམ་ནད་ལྟ་བུའི་ཤུན་ཡོད་པ།10 ནུབ་བྱ་རིགས་མེའི་གཤོག་པ་ཅན་དང་བཞི་ཡོད་པ་དེ་ས་བདག་གི་རིགས་དང་ས་ལ་དབང་བར་བཞེད།11 ལ་ལས་བཤད་རྒྱུ་ལ་ནི(三星堆)ནང་ན་ཡོད་པའི་(四大神兽)ལྷ་གཟན་བཞི་དང་འདྲ་བར་བཤད། དེའི་སྐོར་ལ་ཞིབ་འཇུག་བྱེད་རྒྱུ་གལ་ཆེ་སྙམ།

སྲུང་བཞི་འཛུགས་ཡུལ་སྐོར་ལ་དཔྱད་པ།

　　ཁམས་ཉག་རོང་སོགས་བོད་ཀྱི་ཡུལ་གྲུ་འགའ་ཞིག་ལ། བོད་ཀྱི་ལོ་སར་དང་། ཡང་ན་ཡུལ་སྲོལ་དུས་སྟོན་བཅུ་གསུམ་ཞེས་བཏང་སྲོལ་ཆགས་འདུག། དེའི་སྐབས་སུ་ཡུལ་རི་གཞི་བདག་དང་། ཁང་སྟེང་ལ་བཙས་སམ་གསས་མཁར་དང་། ཆུ་ལེན་འགྲོ་སའི་ཀླུ་ཁང་སོགས་ལ་སྲུང་བཞི་ཞེས་པ་དེ་བཙུགས་སྲོལ་འདུག། དེ་ལས་གཞན་པའི་གཏོ་ཆོག་དང་ཀླུ་ཆོག་སྣང་སྲིད་ཞི་བ་འདོན་པའི་སྐབས་སུ་ཡང་སྲུང་བཞི་འཛུགས་སྲོལ་ཡང་ཡོད། སྲུང་བཞི་དེ་དག་འཛུགས་ས་དེ་ནི་ས་གཙང་ཞིང་བདེ་བའི་གནས་དང་། ཡང་ན་ཁང་སྟེང་སོགས་ལ་བཙས། ཡང་ན་རི་རྩེ་དང་གཞི་བདག་ཡོད་སར་འཇུགས་སྲོལ་ཡོད། མདོ་དྲི་མེད་གཟི་བརྗིད་ལས། སྲུང་བཞིའི་དབེན་གནས་བཅུ་དྲུག་ལ་སོགས་ཏེ། ནགས་ཚལ་དང་། མེ་ཏོག་དང་། ལུ་མ་དང་། རྫིང་བཀྲ་བ་དང་། བྲག་ཕུག་དང་། བསྒྲུབ་གནས་ཕུན་སུམ་ཚོགས་པ་མང་དུ་ཡོད་པའོ། །ཞེས་པའི་སྐབས་སུ་སྲུང་བཞི་འཛུགས་ས་ལ་དབེན་གནས་བཅུ་དྲུག་ཅེས་དངོས་སུ་བསྟན་ཡང་། དབེན་གནས་བཅུ་དྲུག་གྲངས་སུ་བགྲང་མེད་དོ། །

ཉག་རོང་ཡེ་ཤེས་དགོན་པའི་དགུན་གཏོ་སྐབས་ཕྱི་མཚམས་སྲུང་བཞི། པར་ལེན་མཁན་དགེ་བཤེས་གཡུང་དྲུང་ཉི་མས།

　　བོན་གསང་སྔགས་ལུགས་ལ། ཕྱི་མཚམས་དང་ནང་མཚམས། གསང་མཚམས་གསུམ་ཕྱེས་པའི་ཕྱི་མཚམས་སྐབས་སུ་གསང་སྔགས་སྒྲུབ་ཁང་གི་ཕྱིའི་སྒོ་བཞིའམ་ཕྱོགས་བཞི་ལ་པུ་ཐོ་བཞི་བྱས། དེ་ཤིང་སྟག་པའི་ལོ་འདབ་ལ་བྱ་ཝང་དཀར་པོའི་སྤུ་ཡིས་བརྒྱན་པ་བཞི་ལ་ཤིང་བྱང་སྟེང་དུ་རྒྱལ་ཆེན་བཞིའི་གཟུགས་བརྙན་བྲིས་པ་དེ་བཏབས་ནས་པུ་ཐོ་སྟེང་དུ་བཙུགས་པའམ་སྒོ་བཞིར་འཛུགས་པ་དེ་ལ་སྲུང་བཞི་ཞེས་བྱའོ། །དེ་ནི་སྒོ་སྲུང་རྒྱ་ཆེན་བཞི་རུ་མཚོན། ཕྱིའི་སྒོ་བཞི་ནི་རྒྱལ་ཆེན་བཞི་ཡིས་བསྲུང་ཞེས་པའི་དོན་ནོ། ཕྱི་སྒོ་སྲུང་བའི་རྒྱལ་ཆེན་སྡེ་བཞི་ནི། ཤར་དྲི་ཟའི་རྒྱལ་པོ་ཡུལ་འཁོར་སྲུང་། བྱང་གནོས་སྦྱིན་རྒྱལ་པོ་རྣམ་ཐོས་སྲས། ནུབ་ཀླུ་དབང་རྒྱལ་པོ་སྤྱན་མི་བཟང་། ལྷོ་གཤིན་རྗེ་རྒྱལ་པོ་འཕགས་སྤྱན་པོ་དང་བཞི་ཡིས་བསྲུང་ཚུལ་བསྟན་ཡོད།12 ནང་མཚམས་ཀྱི་སྐབས་སུ་ནང་སྒོ་ལ་སྒོ་སྲུང་ཁྲོ་བོ་བཞི་སྟེ། ཤར་སྒོ་སྲུང་མཛད་མི་དཀར་སེང་མགོ་ཅན། ལྷོ་ཕྱོགས་སྒོ་སྲུང་མི་དམར་ཕག་མགོ་ཅན། ནུབ་ཕྱོགས་སྒོ་སྲུང་མི་སྔོན་འབྲུག་མགོ་ཅན། བྱང་ཕྱོགས་སྒོ་སྲུང་མི་ནག་དོམ་མགོ་ཅན་དང་བཞི་འབྲི་སྟེ་འཛུགས་སྲོལ་ཡོད་པ་ནི། དྲི་མེད་གཟི་བརྗིད་ལས། དེ་ནི་ནང་སྒོ་རང་རང་སྒོ་བས་བསྲུང་།13 ཞེས་པའི་དོན་ཡང་དེ་ཡིན་ནོ། །

སྲུང་བཞི་འཛུགས་ཡུལ་ལ་བཙས་སམ་གསས་མཁར་ལ་དཔྱད་པ།

　　སྤྱིར་གསས་མཁར་ཞེས་པ་དེ་བོན་སྒོ་དང་ལ་བཙས་དང་ལྷ་ཁང་སོགས་ལ་གོ་སར་མང་དུ་མཆིས་ཀྱང་སྐབས་འདིར་བོད་ཡུལ་དུ་གྲགས་པའི་གསས་མཁར་རམ་ལ་བཙས་ཀྱི་འབྱུང་ཁུངས་ལ་བཤད་སྲོལ་མི་འདྲ་བ་འགའ་འདུག། སྤྱིར་གསས་མཁར་ཞེས་པའི་གསས་ནི་ཞང་སྐད་ཡིན། བོད་སྐད་དུ་ལྷ་ཞེས་ཟེར། མདོར་བསྡུས་པ་ལྷ་མཁར་ཞེས་པའི་དོན་ཡིན། འདིའི་སྐབས་སུ་གསས་མཁར་ལ་རྒྱུད་གསང་བ་དོན་འདུས་སོགས་ལས་པུ་ཐོ་ཟེར་བ་སྣང༌། པུ་ཞེས་པ་ཟངས་སམ་ཁ་དོག་དམར་པོ་ལ་ཟེར། ཐོ་ནི་ས་རྡོ་ལྕགས་ཟངས་སོགས་ལས་བྱས་པའི་ཐོ་ལ་ཟེར། ས་རྡོ་སོགས་ཀྱི་ཐོ་ལ་ཚོན་དམར་པོས་ཁ་དོག་བསྒྱུར་བ་ལ་པུ་ཐོ་ཟེར། པུ་ཐོ་ནི་གསང་བ་འདུས་པ་དང་སྟག་ལ་མེ་འབར་སོགས་ཀྱིས་ཡི་དམ་ལ་བསྙེན་བསྒྲུབ་བྱས་ཚེ་སྒྲུབ་ཁང་གི་ཕྱི་ནང་ལ་ཟངས་ཐོ་དང་རྒྱལ་ཐོ། པུ་ཐོ་བཅས་ལ་རྒྱལ་ཆེན་སྡེ་བཞིའི་གཟུགས་བྲིས་ཏེ་རྒྱན་སྲོལ་བྱུང༌། དེ་ནས་རིམ་བཞིན་དུ་ཞང་བོད་གྲུབ་ཐོབ་ཐམས་ཅད་ཀྱིས་བསྙེན་བསྒྲུབ་བྱས་ཚེ་མཚམས་ཁང་གི་ཕྱི་རོལ་ཏུ་ཐོ་བཞི་བཙུགས་སྲོལ་ཆགས། ཐོ་བཞི་དེ་ཡང་ས་རྡོས་བརྩིགས་པའི་ཐོའི་སྟེང་དུ་ཤིང་ཟངས་གསེར་སོགས་ལ་རྒྱལ་ཆེན་སྡེ་བཞི་བྲིས་ནས་བཙུགས་དགོས། ཐོ་བཞིས་རྒྱལ་ཆེན་སྡེ་བཞི་མཚོན། ཐོ་བཞི་ལ་དར་དཔྱང་བརྒྱན་པ་དང༌། བསང་མཆོད་འབུལ་ཚུལ་གསང་སྔགས་ཀྱི་ཆོ་ག་ལས་གསལ། འདིར་ཁྱད་པར་ཤེས་དགོས་པ་ཞིག་ལ། གསང་སྔགས་བསྙེན་བསྒྲུབ་ལས་གསུམ་བྱེད་ཚེ་ཕྱོགས་བཞི་ལ་ཐོ་བཞི་འཛུགས་པ་ལ་ཐོ་བཞི་ཟེར་བ་དང་། དེའི་སྟེང་དུ་ཤིང་སྟག་པ་ལ་བྱ་ཝང་གི་སྤུས་བརྒྱན་པ་ལ་སྒོ་སྲུང་བཞིའི་གཟུགས་བརྙན་བཏབས་པ་ལ་སྲུང་བཞི་ཟེར། །དེ་དང་ཡ་ཐོག་བོན་དུ་གྲགས་པའི་སྲུང་བཞི་གཉིས་ལ་ཁྱད་པར་ཅུང་ཙམ་ཡོད་ཚུལ་ཤེས་ན་ལེགས་སོ། །

　　སྔོན་བྱོན་བླ་མ་གྲུབ་ཐོབ་ཐམས་ཅད་དབེན་པའི་རི་དང་ས་གཙང་ས། རི་མཐོ་པོའི་རྩེ་ལ་བསྙེན་མཚམས་བྱེད་སྐབས་ཐོ་བཞི་བཙུགས་ནས་བསང་མཆོད་འབུལ་བའི་སྲོལ་ལ་བརྟེན་ནས་ལ་བཙས་བརྩིགས་སྲོལ་ཆགས་ཟེར། ལ་བཙས་ལ་འབྲི་ཚུལ་མི་འདྲ་བ་འགའ་དང་། ལ་ལས་ཞང་སྐད་རེད་ཟེར་བ་དང་། ལ་ལས་བོད་སྐད་རེད་ཟེར་བ་སོགས་ཀྱི་རྣམ་བཞག་ནི་ཁོ་བོས་བྲིས་པའི་ལ་བཙས་དཔྱད་ཡིག་ནང་དུ་གསལ་ལོ། །ཁམས་ཕྱོགས་ལ་བཤད་སྒྲོས་འདི་ལྟ་ཞིག་ཆགས་འདུག། ཁང་སྟེང་ལ་བཙས་མེད་ན། སྐྱོབ་པའི་ལྷ་ཡི་རྟེན་མེད། ཅེས་པའི་ལ་བཙས་དེ་ལ་ལྷ་གནས་པའི་མཁར་ཁང་ལྟ་བུ་ཡིན་པས་ལྷ་མཁར་རམ་གསས་མཁར་རམ་གསས་ཁང་ཟེར་སྲོལ་ཡང་ཆགས་སོ། །དེ་ལས་གཞན་པའི་བཤད་སྲོལ་འགའ་ཞིག་མཆིས་ཀྱང་འདིར་མ་བཀོད། འདིའི་སྐོར་ལ་མདོ་སྨད་མཁས་དབང་ཚེ་རིང་ཐར་ལགས་ཀྱིས་ཞིབ་འཇུག་ལན་མང་བྱེད་པ་ཐམས་ཅད་ཀྲུང་གོའི་བོད་ཀྱི་ཤེས་རིག་ཞེས་པའི་དེབ་ཐེར་ནང་ཏུ་བཀོད་འདུག་གོ །

སྲུང་བཞིའི་རྒྱུ་རྐྱེན་སྐོར་ལ་དཔྱད་པ།

　　ཡི་དམ་ལྷ་ལ་བསྙེན་བསྒྲུབ་ལས་གསུམ་བྱེད་སྐབས་ཕྱི་མཚམས་སྲུང་བ་རྒྱལ་ཆེན་སྡེ་བཞིའི་ཚབ་ཏུ་སྲུང་བཞི་འཛུགས་སྲོལ་ཡོད། དེ་ལྟར་ན་སྲུང་བཞི་ཟེར་དོན་ནི་ཕྱོགས་བཞི་སྲུང་བའི་སྒོ་བཞིའི་ཚབ་ཏུ་བྱེད་པས་སོ། །དེ་ལ་ཁ་ཅིག་གིས་འབྲུག་ཁྱུང་སྟག་སེང་བཞི་ལ་བཤད་སྲོལ་ཡང་ཡོད་སྐད། འོན་ཀྱང་དེའི་སྐོར་ཚད་ལྡན་ཡིག་ཆ་ཞིག་མ་མཐོང་། སྐབས་འདིར་བོད་མི་རྣམས་ཀྱི་ཁང་སྟེང་གསས་མཁར་རམ་ལ་བཙས་ལ་སྲུང་བཞིས་བརྒྱན་པ་འདི་ནི་གནའ་སྔ་མོ་ནས་བོད་རང་ས་ལ་ཡོད་པའི་ལུགས་སྲོལ་ཞིག་ཡིན། སྲུང་བཞིའི་རྒྱུ་དང་ཕན་ཡོན་ནི། བོན་གཞུང་འཐོར་མ་ལས། ཀྱེ། དེ་རིང་བཀྲ་ཤིས་ལྷ་ཡི་ཉི་མ་ལ། །གཉན་ཤིང་སྟག་པ་ལོ་རྒྱན་འདིར། །བྱང་ཝང་དཀར་པོ་སྤུ་ཡིས་བརྒྱན་པ་འདི། །ནམ་མཁའི་ལྷ་ལ་རྒྱན་དུ་བཙུགས། །བར་སྣང་གཉན་ལ་རྒྱན་དུ་བཙུགས། །ས་གཞི་ས་བདག་རྣམས་ལ་རྒྱན་དུ་བཙུགས། །འོག་གི་ཀླུ་ལ་རྒྱན་དུ་བཙུགས། །ཡུལ་རིའི་གཞི་བདག་རྣམས་ལ་རྒྱན་དུ་བཙུགས། །དེ་རིང་བརྒྱན་པའི་འོག་ཏུ་མི་མ་ཤི། །མི་ཡི་འོག་ཏུ་ཁལ་མ་ལོག །ཡུལ་རིའི་གཞི་བདག་གཉེན་པོ་ངོ་སོ་བསྟོད། །རྒྱན་བཙུག་ཡག་པའི་ལྷ་རྒྱལ་ལོ། །ཞིང་རྨོག་ལོ་ཏོག་ཡག་པར་མཛོད། །རྩེ་མོ་སད་དང་སེར་བ་མ་ཁྱེར་ཅིག །རྩ་བ་འབག་དང་འབུས་མ་ཟ་ཅིག །སད་དང་སེར་བ་མི་འོང་བའི་ཁ་ཁོག་ཅིག །ལོ་བསྐོར་གཅིག་ལ་ལྷ་རྒྱལ་ལོ། །14ཞེས་བྱ་ཝང་དཀར་པོ་སྤུ་ཡིས་བརྒྱན་དགོས་ཀྱང་། དེང་སང་བྱ་ཝང་ནི་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་ཡིན་པས་བྱ་ཝང་སྤུར་ཡང་དཀོན་པོ་འདུག། དེའི་ཚབ་ཏུ་ཤིང་སྟག་པ་ལ་དར་དཀར་དང་དར་ཚོན་དམར་པོས་བརྒྱན་དེ་འཛུགས་སྲོལ་ཆགས་སོང་ངོ་།།

རོ་བག་སོགས་ཀྱི་སྲུང་བཞི་ལ་དཔྱད་པ།

　　གཡུང་དྲུང་གླིང་གི་མཁན་ཆེན་བསྟན་འཛིན་དབང་གི་རྒྱལ་པོས་མཁོ་སྤྲོད་གནང་བའི་མན་ངག་གཏོ་སྒྲོ་དང་ཀླུ་ཆོག་སྐོར་ནང་དུ་རོ་བག་སོགས་ཀྱི་སྲུང་བཞི་ཞེས་པའི་དཔེ་ཆ་རྙིང་པ་ཞིག་གི་ནང་དུ་སྲུང་བཞི་སྐོར་བསྟན་འདུག། དཔེ་ཆ་དེ་འདིར་དཔྱད་གཞི་འགོད་དགོས་དོན་ནི། གཙོ་བོ་གསུངས་པ་པོའམ་རྩོམ་པ་པོ་སུ་ཡི་སྐོར་དང་། བན་བོན་གང་ཞིག་གི་ཡིག་ཆ་ཡིན་མིན་དང་། གཙོ་རྙིང་བསྟན་བྱ་བཅས་ཡིན། དཔེ་ཆ་དེའི་ནང་དུ་ང་ནི་མཁྱེན་རབ་འཇམ་དཔལ་སྐུ་ཟེར་བ་དང་། བདག་ཉིད་འཇམ་དཔལ་འགྲོ་བའི་མགོན་ཞེས་འཇམ་དཔལ་གྱི་ཐ་སྙད་དེ་མཐོང་མ་ཐག་ཏུ་རྗེ་བཙུན་འཇམ་པའི་དབྱངས་ལ་ངོས་འཛིན་གནང་བ་དེ་ནི་ནོར་འཁྲུལ་ཆེན་པོ་ཞིག་རེད་འདུག། འཇམ་དཔལ་དེ་བོན་ལུགས་ལ་ཀོང་ཙེ་འཕྲུལ་གྱི་རྒྱལ་པོ་ལ་གོ་དུས་ཀྱང་ཡོད་ཚུལ་གཞན་དུ་གསལ་ལོ། །སྐབས་སུ་བབ་པའི་གཏམ་ནི། རོ་བག་སོགས་ཀྱི་སྲུང་བཞི་ཞེས་པའི་དཔེ་རྙིང་ནང་དུ་མཁྱེན་རབ་འཇམ་དཔལ་སྤྲུལ་པའི་སྐུ་འགྲོ་བ་སེམས་ཅན་གྱི་དོན་དུ་སྐལ་སྲིད་འབྱུང་བ་གཏན་ལ་ཕབ། ལོ་ཟླ་ཞག་དུས་རྩིས་ལ་བཟུང་། དུར་ལ་བབ་པའི་པུར་དེ་ཕྱོགས་བཞི་འདྲེན་པ་བཅོས་ཐབས་བསྟན་ཡོད། དཔེ་རྙིང་མ་དཔེ་ལྟར་ན།

རོ་བག་སོག་ཀྱི་བསྲུང་བཞི་བཞུགས་སོ། །

　　༄༅།། བསྲུང་བཞི་འབུལ་ཚུལ་བཞུགས་སོ། །ཧཱུྃ། ང་ནི་མཁྱེན་རབ་འཇམ་དཔལ་སྐུ། །འགྲོ་བ་སེམས་ཅན་དོན་ལ་བྱོན། །སྐལ་སྲིད་འབྱུང་བ་གཏན་ལ་ཕབ། ལོ་ཟླ་ཞག་དུས་རྩིས་ལ་བཟུང་། དེ་རིང་ཞག་དུས་གཟའ་སྐར་བཟང་། །དུར་ལ་བབ་པའི་རོ་པུར་འདི། །ཤར་གྱི་ཕྱོགས་སུ་འདྲེན་པ་ན། །ཤར་ཕྱོགས་ཤིང་གི་བསྐལ་པ་སྲིད། ཤིང་ཁམས་རྒྱལ་པོ་བཙུན་མོ་སྲས་དང་བཅས། །ལོ་ཟླ་ཞག་དུས་རྩིས་ལ་དབང་བའི་ས་བདག་དང་། །གཟའ་དང་སྐར་མ་གཡེན་ཁམས་སྡེ་བརྒྱད་རྣམས། །བརྔན་ཆ་གཏོར་མ་ཤེལ་ཚིགས་འབྲུ་སྣས་བཅོས། །ཕྲག་དོག་ཀོ་ལོང་མ་བྱེད་ཅིག །གལ་ཏེ་ཀོ་ལོང་བྱེད་པ་ན། །བདག་ཉིད་འཇམ་དཔལ་སྤྲུལ་པའི་སྐུ། །འགྲོ་བ་སེམས་ཅན་དོན་ལ་བྱོན། །སྐུ་ཡི་སྤྲུལ་པ་སྟག་ཏུ་འབྱུང་། །ལྕགས་ཀྱི་དབལ་སྟག་དཀར་པོ་ལ། །ཁྲོ་ཆུ་ཁོལ་མའི་མཆེ་སྡེར་ཅན། ཤར་གྱི་ཕྱོགས་སུ་སྲུང་བཙུགས་པས། །ཤར་གྱི་ཕྱོགས་སུ་གནས་པ་ཡི། །ས་བདག་ཀླུ་གཉན་འཁོར་བཅས་རྣམས། །ཞལ་གཡོན༼གཡོལ༽་དང་ནི་སྤྱན་བསྒྲིབ་ཅིག །ཤིང་དགྲ་གནམ་ལྕགས་སྟ་རེས་ཆོད། སྟག་དང་སྟ་རེ་ཤར་དུ་བཞག་གོ། ཧཱུྃ། བདག་ཉིད་འཇམ་དཔལ་འགྲོ་བའི་མགོན། །འགྲོ་བ་སེམས་ཅན་དོན་ལ་བྱོན། །དེ་རིང་ཤི་བའི་རོ་པུར་འདི། །༼ལྷོ་ཡི་ཕྱོགས་སུ་འདྲེན་པ་ན། ༽ལྷོ་ན་མེ་ཡི་བསྐལ་པ་སྲིད། །མེ་ཁམས་རྒྱལ་པོ་བཙུན་མོ་སྲས་༼དང་༽བཅས། །ལོ་ཟླ་ཞག་དུས་རྩིས་ལ་དབང་བའི་ས་བདག་དང་། །གཟའ་དང་སྐར་མ་གཡེན་ཁམས་སྡེ་བརྒྱད་རྣམས། །བརྔན་ཆ་གཏོར་མ་ཤེལ་ཚིག༼ཚིགས༽འབྲུ་སྣས་བཅོས། །ཕྲག་དོག་ཀོ་ལོང་མ་མཛད་ཅིག །གལ་ཏེ་ཀོ་ལོང་བྱེད་པ་ན། །བདག་ཉིད་འཇམ་དཔལ་སྤྲུལ་པའི་སྐུ། །འགྲོ་བ་སེམས་ཅན་དོན་ལ་བྱོན། །གསུང་གི་སྤྲུལ་པ་འབྲུག་ཏུ་བྱུང་། །གཡུ་འབྲུག་ཆུ་རླུང་གཡོག་པ་ཅན། །ལྷོ་ཡི་ཕྱོགས་སུ་སྲུང་བཙུགས་པས། །ལྷོ་ཡི་ཕྱོགས་སུ་གནས་པ་ཡི། །ས་བདག་ཀླུ་གཉན་འཁོར་བཅས་རྣམས། །གཟའ་དང་སྐར་མ་ཐམས་ཅད་རྣམས། །ཞལ་གཡོལ་སྤྱན་སྒྲིབ་སྐུ་ཟུར་ཅིག །བདུད་རྩི་ཆུ་ཡི་བུམ་པ་འདིས། །མེ་དགྲ་སོད་ལ་མེ་བདུད་ཟློག།འབྲུག་དང་ཆུ་ལྷོར་བཞག་གོ ། ཧཱུྃ། བདག་ཉིད་འཇམ་དཔལ་འགྲོ་བའི་མགོན། །འགྲོ་བ་སེམས་ཅན་དོན་ལ་བྱོན། །དེ་རིང་ཤི་བའི་རོ་པུར་འདི། །ནུབ་ཀྱི་ཕྱོགས་སུ་འདྲེན་པ་ན།ནུབ་ན་ལྕག༼ལྕགས༽ཀྱི་སྲིད་པ་ཆག། ལྕགས་ཁམས་རྒྱལ་པོ་བཙུན་མོ་སྲས་འཁོར་བཅས། །ལོ་ཟླ་ཞག་དུས་རྩིས་ལ་དབང་བའི་ས་བདག་དང་། །གཟའ་དང་སྐར་མ་གཡེན་ཁམས་སྡེ་བརྒྱད་རྣམས། །བརྔན་ཆ་གཏོར་མ་ཤེལ་ཚིག་འབྲུ་སྣས་བཅོས། །འཕྲག༼ཕྲག༽་དོག་ཀོ་ལོང་མ་བྱེད་ཅིག །གལ་ཏེ་གནོད་འགལ་བྱེད་པ་ན། །འཇམ་དཔལ་ཡོན་ཏན་སྤྲུལ་པའི་སྐུ། །བྱ་དམར་མེ་ཡི་གཤོག་པ་ཅན། །ནུབ་ཀྱི་ཕྱོགས་སུ་བསྲུང་གཙུགས༼བཙུགས༽་པས། །ནུབ་ཀྱི་ཕྱོགས་སུ་གནས་པ་ཡི། །ས་བདག་ཀླུ་གཉེན༼གཉན༽་སྡེ་བརྒྱད་རྣམས། །ཞལ་གཡོལ་༼དང་ནི༽སྤྱན་སྒྲིབ་ཅིག །ཚ་དབལ་མེ་ཡི་དྲོ་མདངས་འདིས། །ནུབ་ཕྱོགས་ལྕགས་ཀྱི་གནོད་པ་ཟློག།བྱ་དང་མེ་ནུབ་ཏུ་བཞག་གོ ། ཧཱུྃ། བདག་ཉིད་འཇམ་དཔལ་འགྲོ་བས༼བའི༽མགོན། །འགྲོ་བ་སེམས་ཅན་དོན་ལ་བྱོན། །དེ་རིང་ཤི་བའི་རོ་པུར་འདི། །བྱང་གི་ཕྱོགས་སུ་འདྲེན་པ་ན། བྱང་དུ་ཆུ་ཡི་བསྐལ་བའི༼པ༽་དར། །ཆུ་ཁམས་རྒྱལ་པོ་བཙུན་མོ་སྲས་བཅས་ལ། །ལོ་ཟླ་ཞག་དུས་རྩིས་ལ་དབང་བའི་ས་བདག་དང་། །གཟའ་དང་སྐར་མ་གཡེན་ཁམས་སྡེ་བརྒྱད་རྣམས། །བརྔན་ཆ་གཏོར་མ་ཤེལ་ཚིག༼ཚིགས༽་འབྲུ་སྣས་བཅོས། །འཕྲག་དོག་ཀོ་ལོང་མ་བྱེད་ཅིག །གལ་ཏེ་ཀོ་ལོང་བྱེད་པ་ན། །འཇམ་དཔལ་ཕྲིན་ལས་སྤྲུལ་པ་ལས། །རུས་སྦལ་གཡུ་ཡི་གྲོག་བུམ་ཅན། །བྱང་གིས༼གི༽་ཕྱོགས་སུ་སྲུང་བཙུག༼བཙུགས༽པས། །བྱང་ཕྱོགས་ས་བདག་ཀླུ་གཉེན༼གཉན༽་རྣམས། །ཞལ་གཡོར༼གཡོལ༽དང་ནི་སྤྱན་བསྒྲིབས་ཅིག༼སྒྲིབས་ཤིག༽ །མཉེན་བརྗིད་ས་ཡི༼ཡིས༽་ཆུ་དགྲ་ཟློག། ༈ རུས་སྦལ་དང་ས་སེར་བྱང་དུ་བཞག་གོ ། ཀྱཻ། དེ་རིང་ནས་ས་བདག་ཀླུ་གཉེན༼གཉན༽་རྣམས། །ལོ་ཟླ་ཞག་ལ་རྒྱུ་བ་ཡི། །གནས་ཤིང་རྒྱུ་བ་ཁྱེད་རྣམས་ལ། །བརྔན་ཆ་གཏོར་མ་ཤེལ་ཚིག༼ཚིགས༽་འབྲུ་ཡིས་བཅོས། །གསེར་སྐྱེམས་ཕུད་རྒོད་མཆོད་པ་དང་། །རང་མཐུན་བརྔན་ཡོན་འདི་བཞེས་ལ། །དེ་རིང་ཤི་བའི་རོ་པུར་འདི། །ཕྱོགས་བཞི་མཚམས་བརྒྱད་གར་འདྲེན་ཡང་། །གནོད་འགལ་གདུག་རྩུབ་ཞི་ནས་ཀྱང་། །ཕྲག་དོག་གནོད་འགལ་མ་བྱེད་ཅིག །བཅོལ་པའི་ཕྲིན་ལས་སྒྲུབས༼འགྲུབ༽་པར་མཛོད། །ཅེས་རྒྱ་ནག་གཏོ་མཛོད་ནས་གསུང་པའི་མི་རུང་བའི་བྱ་བ་ཀུན་རུང་བར་བྱ་བའི་གདམ་ངག་འདི། བྲུབ་ཆོ་ཀུན་འདུས་ཆེན་པོའི་གཏོང་། ཞེས་པ་དཔེ་ཆ་འདི་རྩོམ་པ་པོ་སུ་ཡི་གསལ་ཁ་ཅན་ཞིག་མི་འདུག། བྲུབ་ཆོ་ཀུན་འདུས་ཆེན་པོ་བྱ་བ་དེའི་དོན་ཅི་ཞིག་ཡིན་པ་མི་གསལ། ལྷག་པར་དུ་འཇམ་དཔལ་འགྲོ་བའི་མགོན་དེ་བན་བོན་གཉིས་ཀ་ལ་བཤད་སྲོལ་ཡོད་པའི་མི་སྣ་ཞིག་རེད། བན་དེས་རྗེ་བཙུན་འཇམ་པའི་དབྱངས་ལ་གོ་འདུག། བོན་པོས་རྒྱ་ནག་ཀོང་ཙེ་འཕྲུལ་རྒྱལ་དང་ལེགས་ཏང་རྨང་པོ་ལ་གོ་དུས་ཀྱང་ཡོད། འདིའི་སྐབས་ཀྱི་འཇམ་དཔལ་འགྲོ་བའི་མགོན་ནི་ཀོང་ཙེ་འཕྲུལ་རྒྱལ་ལ་གོ་བ་ལེན་དགོས་མིན་དཔྱད་རྒྱུ་གལ་ཆེའོ། །

སྣང་བརྒྱད་སྲུང་བཞི་སྐོར་བསྟན་པའི་གཞུང་བཀོད་པ། སྣང་བརྒྱད་ལས་སྲུང་བཞི་བཞུགས་སོ། །

　　འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་དཔལ་ཐུགས་ཀྱི་སྤྲུལ་པ་ལས། །མ་ཧཱ་གསེར་གྱི་རུས་སྦལ་སྲིད། །དེའི་མགོ་བོ་ལྷོ་ལ་མཇུག་མ་བྱང་། །གཡས་པ་ཤར་ལ་གཡོན་པ་ནུབ། །རྐང་ལག་མཚམས་བཞིར་བསྐྱངས་པ་ལས། །ཤར་ན་ཤིང་གི་བསྐལ་པ་དར། །ཤར་ཤིང་ཁམས་རྒྱལ་པོ་སྤར་ཁ་ཟིན། །ལོ་ཡི་རྒྱལ་པོ་སྟག་ཡོས་གཉིས། །གཟའ་དང་སྐར་མ་ཤིང་གི་ཁམས། །ཤར་ཕྱོགས་ས་བདག་ཀླུ་གཉན་དང་། །ཀོ་ལོང་ཕྲག་དོག་བྱེད་པ་རྣམས། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་ལ་སྙན་གསོན་དང་། །མིའུ་ཤི་བའི་རོ་སྤུར་འདི། །ངས་ཤར་གྱི་ཕྱོགས་སུ་འདྲེན་ཡང་སྲིད། །ཤར་གྱི་ཕྱོགས་སུ་འདྲེན་པ་ན། །ཀོ་ལོང་ཕྲག་དོག་མ་བྱེད་ཅིག །གལ་ཏེ་ཀོ་ལོང་ཕྲག་དོག་བྱེད་པ་ན། །འཇམ་དཔལ་སྐུ་ཡི་སྤྲུལ་པ་ལས། །ལྕགས་ཀྱི་དབལ་སྟག་དཀར་པོ་འདིས། །ཤར་ཕྱོགས་ཤིང་གི་གདུག་པ་འཇོམས། །ཤར་ཕྱོགས་ཤིང་དགྲ་སྟྭ་རིས་བཅད། །ཤར་ཤིང་ཁམས་རྒྱལ་པོ་བཙུན་མོ་སྲས་འཁོར་དང་བཅས་པ་ཞལ་གཡོལ་སྤྱན་སྒྲིབ་ཅིག ཏདྱ་ཐཱ། ཨ་ལི་ཀ་ལི་མཉྫི་ཏི་ཡེ་སྭཱ་ཧཱ། ཀྱཻ྅། ལྷོ་ན་མེ་ཡི་བསྐལ་པ་དར། །ལྷོ་མེ་ཁམས་རྒྱལ་པོ་སྤར་ཁ་ལི། །ལོ་ཡི་རྒྱལ་པོ་རྟ་སྦྲུལ་གཉིས། །གཟའ་དང་སྐར་མ་མེ་ཡི་ཁམས། །ལྷོ་ཕྱོགས་ས་བདག་ཀླུ་གཉན་རྣམས། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་ལ་སྙན་གསོན་དང་། །མིའུ་ཤི་བའི་རོ་སྤུར་འདི། །ངས་ལྷོ་ཡི་ཕྱོགས་སུ་འདྲེན་ཡང་སྲིད། །ལྷོ་ཡི་ཕྱོགས་སུ་འདྲེན་པ་ན། །ཀོ་ལོང་ཕྲག་དོག་མ་བྱེད་ཅིག །གལ་ཏེ་ཀོ་ལོང་ཕྲག་དོག་བྱེད་པ་ན། །འཇམ་དཔལ་ཐུགས་ཀྱི་སྤྲུལ་པ་ལས། །ཆུ་ཡི་གཡུ་འབྲུག་སྔོན་མོ་འདིས། །ལྷོ་ཕྱོགས་མེ་ཡི་གདུག་པ་སྲུང་། །ལྷོ་ཕྱོགས་མེ་དགྲ་ཆུ་ཡིས་གསོད། །ལྷོ་མེ་ཁམས་རྒྱལ་པོ་བཙུན་མོ་སྲས་འཁོར་དང་བཅས་པ་ཞལ་གཡོལ་སྤྱན་སྒྲིབ་ཅིག །ཏདྱ་ཐཱ། ཨ་ལི་ཀ་ལི་མཉྫུ་ཏི་ཡེ་སྭཱ་ཧཱ། ཀྱཻ྅། ནུབ་ན་ལྕགས་ཀྱི་བསྐལ་པ་དར། །

　　ནུབ་ལྕགས་ཁམས་རྒྱལ་པོ་སྤར་ཁ་དྭ། །ལོ་ཡི་རྒྱལ་པོ་བྱ་སྤྲེལ་གཉིས། །གཟའ་དང་སྐར་མ་ལྕགས་ཀྱི་ཁམས། །ནུབ་ཕྱོགས་ས་བདག་ཀླུ་གཉན་རྣམས། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་ལ་སྙན་གསོན་དང་། །མིའུ་ཤི་བའི་རོ་སྤུར་འདི། །ངས་ནུབ་ཀྱི་ཕྱོགས་སུ་འདྲེན་ཡང་སྲིད། །ནུབ་ཀྱི་ཕྱོགས་སུ་འདྲེན་པ་ན། །ཀོ་ལོང་ཕྲག་དོག་མ་བྱེད་ཅིག ། གལ་ཏེ་ཀོ་ལོང་ཕྲག་དོག་བྱེད་པ་ན། །འཇམ་དཔལ་གསུང་གི་སྤྲུལ་པ་ལས། །མེ་ཡི་བྱ་ཁྱུང་དམར་པོ་འདིས། །ནུབ་ཕྱོགས་ལྕགས་ཀྱི་གདུག་པ་སྲུང་། །ནུབ་ཕྱོགས་ལྕགས་དགྲ་མེ་ཡིས་གསོད། །ནུབ་ལྕགས་ཁམས་རྒྱལ་པོ་བཙུན་མོ་སྲས་འཁོར་དང་བཅས་པ་ཞལ་གཡོལ་སྤྱན་སྒྲིབ་ཅིག ཏདྱ་ཐཱ། ཨ་ལི་ཀ་ལི་མཉྫུ་ཏི་ཡེ་སྭཱ་ཧཱ། ཀྱཻ྅། བྱང་ན་ཆུ་ཡི་བསྐལ་པ་དར། །བྱང་ཆུ་ཁམས་རྒྱལ་པོ་སྤར་ཁ་ཁམས། །ལོ་ཡི་རྒྱལ་པོ་བྱི་ཕག་གཉིས། །གཟའ་དང་སྐར་མ་ཆུ་ཡི་ཁམས། །བྱང་ཕྱོགས་ས་བདག་ཀླུ་གཉན་རྣམས། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་ལ་སྙན་གསོན་དང་། །མིའུ་ཤི་བའི་རོ་སྤུར་འདི། །ངས་བྱང་གི་ཕྱོགས་སུ་འདྲེན་ཡང་སྲིད། །བྱང་གི་ཕྱོགས་སུ་འདྲེན་པ་ན། །ཀོ་ལོང་ཕྲག་དོག་མ་བྱེད་ཅིག །གལ་ཏེ་ཀོ་ལོང་ཕྲག་དོག་བྱེད་པ་ན། །འཇམ་དཔལ་ཡོན་ཏན་སྤྲུལ་པ་ལས། །ས་ཡི་རུས་སྦལ་སེར་པོ་འདིས། །བྱང་ཕྱོགས་ཆུ་ཡི་གདུག་པ་སྲུང་། །བྱང་ཕྱོགས་ཆུ་དགྲ་ས་ཡིས་ཆོད། །བྱང་ཆུ་ཁམས་རྒྱལ་པོ་བཙུན་མོ་སྲས་འཁོར་དང་བཅས་པ་ཞལ་གཡོལ་སྤྱན་སྒྲིབ་ཅིག ཏདྱ་ཐཱ། ཨ་ལི་ཀ་ལི་མཉྫུ་ཏི་ཡེ་སྭཱ་ཧཱ། ཀྱཻ྅། རྐང་ལག་མཚམས་བཞིར་བསྐྱངས་པ་ལས། །མཚམས་བཞིར་ས་ཡི་བསྐལ་པ་དར། །ས་ཁམས་སྤར་ཁ་ཁེན་ཁོན་གིང་ཟོན་བཞི། །ལོ་ཡི་རྒྱལ་པོ་ཁྱི་འབྲུག་གླང་ལུག་བཞི། །གཟའ་དང་སྐར་མ་ས་ཡི་ཁམས། །མཚམས་བཞིར་ས་བདག་ཀླུ་གཉན་རྣམས། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་ལ་སྙན་གསོན་དང་། །མིའུ་ཤི་བའི་རོ་སྤུར་འདི། །ངས་མཚམས་བཞིའི་ཕྱོགས་སུ་འདྲེན་ཡང་སྲིད། །མཚམས་བཞིའི་ཕྱོགས་སུ་འདྲེན་པ་ན། །ཀོ་ལོང་ཕྲག་དོག་མ་བྱེད་ཅིག །གལ་ཏེ་ཀོ་ལོང་གདུག་རྩུབ་བྱེད་པ་ན། །འཇམ་དཔལ་ཕྲིན་ལས་སྤྲུལ་པ་ལས། །ཤིང་གི་བྱ་ཁྱུང་རྒྱལ་པོ་འདིས། །མཚམས་བཞིར་ས་ཡི་གདུག་པ་སྲུང་། །མཚམས་བཞིར་ས་ཁམས་རྒྱལ་པོ་བཙུན་མོ་སྲས་འཁོར་དང་བཅས་པ་ཞལ་གཡོལ་སྤྱན་སྒྲིབ་ཅིག ཏདྱ་ཐཱ། ཨ་ལི་ཀ་ལི་མཉྫུ་ཏི་ཡེ་སྭཱ་ཧཱ། མངྒ་ལཾ། བཀྲ་ཤིས་བདེ་ལེགས་ལྡན་པར་མཛོད། དགེའོ། །15ཞེས་པའི་སྲུང་བཞི་དེ་རྩོམ་པ་པོ་མི་གསལ་ཡང་། བན་དེ་དཔེ་ཚོགས་ནང་དུ་ཐོན་འདུག། དེའི་ནང་གི་སྲུང་བཞི་དང་བོན་པོའི་སྲུང་བཞི་ཤར་དབལ་སྟག་སྐྱ་བོ། ལྷོ་གཡུ་འབྲུག་སྔོན་པོ། ནུབ་བྱ་ཁྱུང་དམར་པོ། བྱང་རུས་སྦལ་སེར་པོ་སོགས་ཡིན་པ་འདྲ་བ་མ་ཟད། ལོ་ཁམས་དང་སྤར་ཁ་བཅོས་ཐབས་སོགས་ཀྱང་འདྲ་འདུག། སྲུང་བཞིའི་སྐོར་དེ་རྒྱ་གར་སངས་རྒྱས་ཆོས་ལུགས་ནང་དུ་ཡོད་མེད་སྐོར་ལ་ད་དུང་དཔྱད་དགོས་པ་སྣང་ངོ་། །

ཏའོ་ཅོའོ་ཆོས་ལུགས་ནང་ཕྱོགས་བཞིའི་ལྷ་གཟན་བཞི(四大神兽)ལ་དཔྱད་པ།

　　རྒྱ་ནག་ཡུལ་དུ་དར་ཁྱབ་ཆེ་བའི་ཏའོ་ཅོའོ་ཆོས་ལུགས་ནང་། ཕྱོགས་བཞིའི་ལྷ་སྲིན་ནམ་ལྷ་གཟན་བཞི་རུ་གྲགས་པ་ནི། འབྲུག་སྔོན། སྟག་དཀར། བྱ་རོག་དམར་པོ། རུས་སྦལ་གཟི་བྱིན་བཅས་ལ་གོ་ཞིང་། དེ་དག་ལ་“ཕྱོགས་བཞིའི་རྣམ་པ” ཡང་ན“ལྷ་གཟན་བཞི” ཟེར། དང་པོ། གཡུ་འབྲུག་སྔོན་པོ་ནི། ཤར་ཕྱོགས་ཀྱི་ལྷ་ཡིན་པ་དང་། དཔྱིད་ཀའི་རྟགས་སུ་བརྩི། འབྱུང་བ་ལྔ་ལས་ཤིང་གི་ཁོངས་སུ་གཏོགས། དེ་ལ་སྐར་ཆུང་ཉེར་བརྒྱད་ཀྱི་ནང་ཚན་ཤར་ཕྱོགས་སྐར་ཆུང་བདུན་གྱི་སྤྱི་མིང་དུ་གྲགས། ཏའོ་ཅོའོ་ཆོས་ལུགས་ནང་“དཔྱིད་ཀྱི་ལྷ་དཔོན”ཞེས་འབོད།

　　གཉིས་པ། དབལ་སྟག་དཀར་པོ་ནི། ནུབ་ཕྱོགས་ཀྱི་ལྷ་ཡིན་པ་དང་། སྟོན་ཀའི་རྟགས་སུ་བརྩི། འབྱུང་བ་ལྔ་ལས་ལྕགས་ཀྱི་ཁོངས་སུ་གཏོགས། དེ་ལ་སྐར་ཆུང་ཉེར་བརྒྱད་ཀྱི་ནང་ཚན་ནུབ་ཕྱོགས་སྐར་ཆུང་བདུན་གྱི་སྤྱི་མིང་དུ་གྲགས། ཏའོ་ཅོའོ་ཆོས་ལུགས་ནང་“ལྟ་ཞིབ་དམག་དཔོན” ཞེས་འབོད།

　　གསུམ་པ། མེ་བྱ་དམར་པོ་ནི། ལྷོ་ཕྱོགས་ཀྱི་ལྷ་ཡིན་པ་དང་། དབྱར་ཀའི་རྟགས་སུ་བརྩི། འབྱུང་བ་ལྔ་ལས་མེ་ཡི་ཁོངས་སུ་གཏོགས། དེ་ལ་སྐར་ཆུང་ཉེར་བརྒྱད་ཀྱི་ནང་ཚན་ལྷོ་ཕྱོགས་སྐར་ཆུང་བདུན་གྱི་སྤྱི་མིང་དུ་གྲགས། ཏའོ་ཅོའོ་ཆོས་ལུགས་ནང“འོད་གསལ་ལྷ་དཔོན”ཞེས་འབོད།

　　བཞི་པ། རུས་སྦལ་གཟི་བྱིན་ནི། བྱང་ཕྱོགས་ཀྱི་ལྷ་ཡིན་པ་དང་། དགུན་ཀའི་རྟགས་སུ་བརྩི། འབྱུང་བ་ལྔ་ལས་ཆུ་ཡི་ཁོངས་སུ་གཏོགས། དེ་ལ་སྐར་ཆུང་ཉེར་བརྒྱད་ཀྱི་ནང་ཚན་བྱང་ཕྱོགས་སྐར་ཆུང་བདུན་གྱི་སྤྱི་མིང་དུ་གྲགས། ཏའོ་ཅོའོ་ཆོས་ལུགས་ནང“འཛིན་སྲུང་ལྷ་དཔོན” ཞེས་པའི་མིང་འབོད།

　　རྒྱ་ནག་གི་ལོ་རྒྱུས་རིག་གནས་ནང་། ལྷ་གཟན་བཞི་ནི་ཏའོ་ཇའོ་ཆོས་ལུགས་ཀྱི་ཡིད་ཆེས་ཀྱི་མཚོན་རྟགས་སུ་གྱུར་ཡོད། གཡུ་འབྲུགཛ སྟག་དཀར། བྱ་དམར། རུས་སྦལ་བཅས་བཞི་ནི་ཤར་ནུབ་ལྷོ་བྱང་བཞི་མཚོན་པ་དང་། གནམ་ས་བར་གྱི་ཕྱི་ནང་དྲང་བདེན་གྱི་མཐུན་སྦྱོར་དང་དངོས་པོ་ཡོངས་རྫོགས་འཕེལ་རྒྱས་ཀྱི་དོན་སྙིང་བཀོད་ཡོད། གཡུ་འབྲུག་གིས་ཤར་ཕྱོགས་མཚོན་པ་དང་། གསོན་པོའི་རྒྱུན་འཛིན། འཕེལ་རྒྱས། དཔྱིད་ཀ་དང་འབྱུང་ལྔ་ལས་ཤིང་ཁམས་བཅས་མཚོན་ཡོད། སྟག་དཀར་གྱིས་ནུབ་ཕྱོགས་མཚོན་པ་དང་། གསོད་པ། ཁྲིམས་དང་དྲང་བདེན། སྟོན་ཀ་དང་འབྱུང་ལྔ་ལས་ལྕགས་ཁམས་བཅས་མཚོན་ཡོད། བྱ་དམར་པོས་ལྷོ་ཕྱོགས་མཚོན་པ་དང་། བརྩེ་བ་དང་སྤྱོད་པའི་ནུས་པ། དབྱར་ཀ་དང་འབྱུང་ལྔ་ལས་མེ་བཅས་མཚོན་ཡོད། རུས་སྦྲུལ་གྱིས་བྱང་ཕྱོགས་མཚོན་པ་དང་། གཏིང་ཟབ། ཤེས་རབ། དགུན་ཁ་དང་འབྱུང་ལྔ་ལས་ཆུ་བཅས་མཚོན་ཡོད།

　　གོང་དུ་བོན་ལུགས་ཀྱི་སྲུང་བཞི་བསྟན་པ་དང་མི་འདྲ་ས་ནི། བོན་ལུགས་ཤར་ཤིང་གི་ལྷ་དབལ་སྟག་སྐྱ་བོ། ཏའོ་ཅོའོ་ཆོས་ལུགས་ཤིང་གི་ལྷ་གཡུ་འབྲུག། བོན་ལུགས་ལྷོ་མེ་ཡི་ལྷ་གཡུ་འབྲུག་སྔོན་པོ། ཏའོ་ཅོའོ་ཆོས་ལུགས་ལྷོ་མེ་ཡི་ལྷ་མེ་བྱ་དམར་པོ། བོན་ལུགས་ནུབ་ལྕགས་ཀྱི་ལྷ་མེ་བྱ་དམར་པོ། ཏའོ་ཅོའོ་ཆོས་ལུགས་ནུབ་ལྕགས་ཀྱི་ལྷ་སྟག་དཀར་པོ། བོན་ལུགས་དང་ཏའོ་ཅོའོ་ཆོས་ལུགས་གཉིས་ཀ་ལ། བྱང་ཕྱོགས་ཆུ་ཡི་ལྷ་རུས་སྦལ་འདྲ། དེ་བཞིན་དུ་དུས་བཞིའི་རྟགས་སུ་བརྩི་ཚུལ་འདྲ་བ་སོགས་ལ་དཔྱད་རྒྱུ་མང་པོ་ཡོད་འདུག 

མཇུག་བསྡུ་བ།

　　བོད་ལུགས་ཀྱི་སྲུང་བཞི་ཞེས་པ་ནི། སྒང་པ་ཞང་བོད་མཐོ་སྒང་རང་ས་ནས་དར་བའི་མི་རིགས་ཤིག་གི་རིག་གནས་ཞིག་དང་ཆོས་ལུགས་ཤིག་ཀྱང་ཡིན། དེ་ནི་ཁོར་ཡུག་མི་གཙང་བ་དང་མ་དག་པ་ཐམས་ཅད་དག་པ་དང་གཙང་ཞིང་སྲུང་སྐྱོབ་བྱེད་པ་དང་། མི་རོ་རྟ་རོ་ཁྱི་རོ་སོགས་མི་རུང་བའི་རྣམ་པ་རྣམས་རུང་བ་དང་དག་པ་བྱེད་པ། བག་མ་སོགས་འཁོར་བའི་ལས་དོན་སྒྲུབ་པ་ལ་ས་བདག་ཀླུ་གཉན་སོགས་མི་མིན་གྱི་གནོད་པ་ཐམས་ཅད་ཞི་ཐབས་དང་། འགྲོ་བ་ཡོངས་འདྲ་མཉམ་ཡིན་པ་བཅས་མཚོན་དོན་ཡིན། དེ་ཡང་ཤར་སྟག་སྐྱ་བོ་དང་། ལྷོ་གཡུ་འབྲུག་སྔོན་པོ། ནུབ་བྱ་ཁྱུང་དམར་པོ། ལྷོ་རུས་སྦལ་སེར་པོ་བཞི་ནི་ཤིང་མེ་ལྕགས་ཆུ་བཞི་དང་། ལོ་ཟླ་ཞག་དུས་སྐར་མ་ཁམས་བཅས་མཚོན། དེ་ལས་གཞན་པའི་དབུས་སམ་མཚམས་བཞི་ལ་བྱ་ཁྱུང་ལྗང་གུ་ནི་འབྱུང་བ་ལྔ་ལས་ས་དང་། དུས་གསུམ་ཆ་སྙོམས་པ་མཚོན། དེ་ལས་དམིགས་སུ་བཀར་ནས་འཆད་ན། རྒྱ་སྟག་སྐྱ་བོ་ནི་ངན་པ་སྤང་བ་དང་། གདོན་བགེགས་ཞི་བ། དཔའ་བོ། མཐུ་སྟོབས། དྲང་བདེན། ཕུན་སུམ་ཚོགས་པ་བཅས་མཚོན། གཡུ་འབྲུག་སྔོན་པོ་ནི་སྙན་གྲགས། དབང་ཆ། མཐོང་རྒྱ་ཆེ་བ། གོ་གནས། ཤེས་རབ། བསོད་ནམས་ཆེ་བ། དབང་བསྒྱུར་དང་སྲུང་སྐྱོབ་བཅས་མཚོན། ནུབ་བྱ་ཁྱུང་དམར་པོ་ནི་དམིགས་ཡུལ་མཐོ་བ། རང་དབང་། ལྟ་རྒྱ་ཆེ་བ། བཀྲ་ཤིས་པ། བདེ་སྐྱིད། ཤུགས་ཆེན་པོའི་མཐུ་དང་འཇིགས་སྣང་མེད་པའི་དཔའ་བོ་བཅས་མཚོན། རུས་སྦལ་སེར་པོ་ནི་ཚེ་རིང་བ། ནད་མེད་པ། འཚོ་བ་ཕུན་སུམ་ཚོགས་པ། བརྟན་ཆ་ཆེ་བ། འགྱུར་བ་མེད་པ། མཐུན་སྒྲིལ་དང་ཞི་བདེ་བཅས་མཚོན། བྱ་ཁྱུང་ལྗང་གུ་ནི་ངན་པ་ལས་གྲོལ་ཐབས་མཁས་པ་དང་། མིག་རྒྱང་རིང་བ། ཕུགས་བསམ་ཆེ་བ། གསོན་ཤུགས་དང་སེམས་རྒྱ་ཆེ་བ་སོགས་མཚོན། དེ་དག་ནི་མི་རིགས་ཤིག་གི་རང་གཤིས་དང་རང་བཞིན་ཡང་མཚོན་ཡོད་དོ། །

ཅེས་སེང་སྤྲུལ་རིག་འཛིན་ཉི་མས་སྤྱི་ལོ༢༠༢༦ལོའི་བོད་ཟླ༡༢པའི་ཚེས༡༠ཉིན་སྦྱར་བའོ། །

　　དཔྱད་མཆན།

　　1 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༡༨༣

　　2. 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༢༠༩

　　3. 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༢༣༥

　　4. 《ཀོང་ཙེ་འཕྲུལ་རྒྱལ་གྱིས་མཛད་པའི་སྲུང་བཞི》 ཀོང་ཙེ་འཕྲུལ་རྒྱལ་གྱིས་མཛད་པ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས༡

　　5. 《ཀོང་ཙེ་འཕྲུལ་རྒྱལ་གྱིས་མཛད་པའི་སྲུང་བཞི》 ཀོང་ཙེ་འཕྲུལ་རྒྱལ་གྱིས་མཛད་པ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས༡-༤

　　6. 《ཕྱོགས་བཞི་མཚམས་བརྒྱད་ཀྱི་སྤར་ཁ་ལོ་གཟའ་སྐར་ས་བདག་གི་ཕྱོགས་སྲུང་བཅོས》 ཀོང་ཙེ་འཕྲུལ་རྒྱལ་གྱིས་མཛད་པ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས༡-༣

　　7. སོག་སྡེ་བསྟན་པའི་ཉི་མས་བསྒྲིགས་པའི་《གཡུང་དྲུང་བོན་གྱི་བརྟེན་འགྱུར་ཆེན་མོ》 ལས་གླེགས་བམ༤༧པ།《བསྲུང་བཞི་དང་ཤེལ་ཚིགས》 རྩོམ་པ་པོ་མི་གསལས། ༡༩༩༨ ལོར་བོད་ལྗོངས་མི་རིགས་དཔེ་སྐྲུན་ཁང་ནས་དཔར་བསྐྲུན་བྱེད། ཤོག་ངོས༩༨༧-༩༩༤

　　8. 《གཉན་ཆེན་བཞི་ཡི་སྲུང་བཞི》 མཛད་པ་པོ་མི་གསལ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས། ༢

　　9. 《གཉན་ཆེན་བཞི་ཡི་སྲུང་བཞི》 མཛད་པ་པོ་མི་གསལ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས། ༡-༤

　　10. རུས་སྦལ་གྱི་ཤུན་པ་དེས་མཛེ་ནད་དང་འབྲུམ་ནད་སོགས་ལ་ཕན་པར་བཤད།

　　11. 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་བཅུ་པ། དྲི་མེད་གཟི་བརྗིད་ག་དུམ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་དགེ་བསྙེན་ཐེག་པ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༢༩༥

　　12. 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༢༣༥

　　13. 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར། ཤོག་ངོས༢༣༥

　　14. རྩོམ་པ་པོ་མི་གསལ། ཡིག་རྙིང་བྲིས་མ། སེང་སྤྲུལ་རིག་འཛིན་ཉི་མའི་ལག་ཏུ་ཡོད།

　　15. བསྟན་འཛིན་ནོར་བུས་བསྒྲིགས་པའི 《གཤིན་ལས་ལ་དགོས་གལ་ཆེའི་སྐོར་དང་ཉེར་མཁོའི་བཅོས་ཕྲན་འགའའི་ཕྱག་ལེན་བྱ་ཚུལ་ཕན་བདེའི་གྲུ་ཆར་ཞེས་བྱ་བ་བཞུགས་སོ》 སྐྱོ་བྲག་དཔལ་སེང་འབའ་རྒྱུད་དཔེ་ཚོགས་ཁང་།

　　དཔྱད་གཞིའི་ཡིག་ཆ།

　　༡ 《ཀྲུང་ཧྭའི་བཀའ་བསྟན་ཆེན་མོ་ལས་སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》 པོད་དགུ་པ། 《འདུས་པ་རིན་པོ་ཆེའི་རྒྱུད་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་རྒྱལ་བུ་རྒྱལ་སར་ཕྱུང་བའི་མདོ》 སྟོན་པ་གཤེན་རབ་མི་བོས་གསུང་། བློ་ལྡན་སྙིང་པོའི་སྙན་རྒྱུད། སི་ཁྲོན་མི་རིགས་དཔེ་སྐྲུན་ཁང་ནས་༢༠༢༡ལོའི་ཟླ༥པར་ཐེངས་དང་པོ་དཔར།

　　༢ 《ཀོང་ཙེ་འཕྲུལ་རྒྱལ་གྱིས་མཛད་པའི་སྲུང་བཞི》 ཀོང་ཙེ་འཕྲུལ་རྒྱལ་གྱིས་མཛད་པ། བྲིས་མ། སེང་སྤྲུལ་ལག་ཏུ་ཡོད།

　　༣ 《ཕྱོགས་བཞི་མཚམས་བརྒྱད་ཀྱི་སྤར་ཁ་ལོ་གཟའ་སྐར་ས་བདག་གི་ཕྱོགས་སྲུང་བཅོས》 ཀོང་ཙེ་འཕྲུལ་རྒྱལ་གྱིས་མཛད་པ། བྲིས་མ། སེང་སྤྲུལ་ལག་ཏུ་ཡོད།

　　༤ སོག་སྡེ་བསྟན་པའི་ཉི་མས་བསྒྲིགས་པའི་《གཡུང་དྲུང་བོན་གྱི་བརྟེན་འགྱུར་ཆེན་མོ》 ལས་གླེགས་བམ༤༧པ།《བསྲུང་བཞི་དང་ཤེལ་ཚིགས》 རྩོམ་པ་པོ་མི་གསལས། ༡༩༩༨ ལོར་བོད་ལྗོངས་མི་རིགས་དཔེ་སྐྲུན་ཁང་ནས་དཔར་བསྐྲུན་བྱེད།

　　༥ 《གཉན་ཆེན་བཞི་ཡི་སྲུང་བཞི》 མཛད་པ་པོ་མི་གསལ། བྲིས་མ། སེང་སྤྲུལ་ལག་ཏུ་ཡོད། ཤོག་ངོས། ༢

　　༦ 《རོ་བག་སོག་ཀྱི་བསྲུང་བཞི》 མཛད་པ་པོ་མི་གསལ། བྲིས་མ། སེང་སྤྲུལ་ལག་ཏུ་ཡོད།

　　༧ གནའ་ཡིག་འཐོར་མ། མཛད་པ་པོ་མི་གསལ། བྲིས་མ། སེང་སྤྲུལ་ལག་ཏུ་ཡོད།