རབ་ལེགས་གཡུང་དྲུང་གླིང་གི་ཁོར་ཡུག

རབ་ལེགས་གཡུང་དྲུང་གླིང་ངམ་དཔལ་གཤེན་བསྟན་རྣམ་རྒྱལ་ཀུན་གྲགས་གླིང་ནི། བོད་རྒྱལ་མུ་ཁྲི་བཙན་པོའི་སྐབས་བོད་ལ་འདུལ་བའི་བསྟན་པ་དར་སའི་གནས་ཁྱད་པར་ཅན་ཡིན་པར་བརྟེན་བོན་གྱི་སྐྱབས་མགོན་ཟླ་བ་རྒྱལ་མཚན་གྱིས་སྤྱི་ལོ་༡༨༣༤ལོར་ཕྱག་བཏབ་གནང་མཛད། ཡོངས་འཛིན་འདུལ་བ་བློ་གྲོས་ནས་ཀུན་གསལ་བློ་གྲོས་བར་སློབ་དཔོན་ཁྲི་རབས་བཅོ་ལྔ་ཙམ་བྱོན་ཏེ་བོན་གྱི་མདོ་སྔགས་སེམས་གསུམ་གྱི་བསྟན་པ་རྒྱས་པར་འཕེལ། གཡང་དྲུང་བོན་གྱི་གདན་ས་གོང་འོག་གསུམ་དུ་གྲགས་པའི་གདན་ས་འོག་མ་ཅེས་པ་ཡིན། སྐྱབས་མགོན་ཟླ་བ་རྒྱལ་མཚན་གྱིས་དགོན་དེ་ཕྱག་བཏབ་གནང་ནས་མཁན་པོ་གནང་བ་དང་། ཀུན་མཁྱེན་ཉི་མ་བསྟན་འཛིན་（སྤྱི་ལོ་༡༨༡༣ལོར་འཁྲུངས）གྱིས་སློབ་དཔོན་མཛད་སྐབས་མཚན་ཉིད་བཤད་གྲྭའང་བཙུགས་གནང་ནས་ཁམས་དང་། མདོ་སྨད། དབུས་གཙང་སོགས་ནས་གྲྭ་རྒྱུན་འདུས་ཏེ་གཡུང་དྲུང་བོན་གྱི་བསྟན་པའི་མེ་རོ་སྤར་སའི་གནས་ཁྱད་པར་ཅན་ནོ།།