ཤར་རྫའི་རི་ཁྲོད་ནས་གདུང་མཆོད་ཕུལ་བ།
[ཟླ་ཚེས། 2017-09-24 20:17:53][རྩོམ་པ་པོ། ཤར་རྫའི་རི་ཁྲོད།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
ཨེ་མ་ཧོ།
རབ་འབྱམས་ཕྱོགས་བཅུའི་རྒྱལ་བ་སྲས་བཅས་ཀྱི།།
མཁྱེན་བརྩེ་ཡེ་ཤེས་ངོ་བོ་གཅིག་བསྡུས་པའི།།
ཟབ་རྒྱས་གཤེན་བསྟན་སྤེལ་བའི་འཕྲིན་ལས་ཅན།།
ལུང་རྟོགས་བསྟན་པའི་ཉི་མ་རྟག་འཆར་ཤོག །
བདེ་ལྡན་དག་པའི་རང་བཞིན་ཡེ་གྲོལ་ཡེ་གསལ་མུ་མེད་ལྷ་ལམ་དབྱིངས།།
བརྒྱུད་ལྡན་རྒྱལ་བ་དངོས་བྱོན་ལྷུན་རྫོགས་ལྷུན་པོའི་བཅུ་དྲུག་ཆས་བཞད་ཀྱི།།
ལས་ལྡན་དག་པའི་སྙིང་དཀྱིལ་གུར་ཏིག་གུར་ཁང་ཀུ་དཱའི་ཚལ་ཆེན་དབུས།།
སུམ་ལྡན་བླ་མ་གཡུང་དྲུང་འཆང་ཆེན་འཆང་བཞིན་ཚེ་རབས་ཀུན་ཏུ་བསྙེན།།
སྐྱབས་གཅིག་འགྲོ་བའི་མགོན་པོ་ཞྭ་དཀར་བསྟན་པའི་བདག་པོ་སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ ༧ ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དགུང་གྲངས་གྱ་དགུ་བཞེས་པ་སྤྱི་ལོ་༢༠༡༧ལོའི་ཟླ་བ་༩ཚེས་༡༤ཉིན་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་དགོངས་པ་བོན་དབྱིངས་སུ་མངོན་པར་ཐིམ་པའི་གནས་ཚུལ་ཐོས་འཕྲལ། ཕྱིན་ཉིན་ནས་བཟུང་ཉིན་གསུམ་གྱི་རིང་དུ་ངེད་ཤར་རྫའི་རི་ཁྲོད་བཤད་སྒྲུབ་སྒོམ་པའི་འདུས་སྡེ་ཡོངས་ཀྱིས་སྐྱོ་གདུང་དྲག་པོའི་ངང་ནས་མྱ་ངན་ཞུ་བ་དང་། སྐྱབས་ཀྱི་བླ་མའི་ཐུགས་དགོངས་རྫོགས་ཕྱིར་བླ་མའི་མཆོད་པ་དང་མཉམ་མེད་བླ་མའི་བླ་སྒྲུབ་སོགས་དགེ་སྒྲུབ་གང་ཆེ་བགྱིད་བཞིན་ལགས་ན་རྗེ་བླ་མའི་ཐུགས་བསྐྱེད་བྱིན་རླབས་སྤྲིན་དཔུང་མུ་མེད་དུ་སྤྲོས་པས་གང་དང་དབྱེ་རུ་མ་མཆིས་པའི་བསྟན་འཛིན་གྱི་སྐྱེས་མཆོག་ཉི་མ་གཞོན་ནུ་མཁའ་རུ་གསལ་བའི་སྨོན་འདུན་ཡང་ཡང་ཞུ་བ་བཅས།
1929—2017
དོན་ངོ་མ་གསེར་གྱི་ཀ་ཆེན་ཞིག་འགྱེལ་སོང་།
གདུང་སེམས་མཉམ་བསྐྱེད།། ཐུགས་གསོ་མཉམ་བསྐང་།།
དཀའ་སྡུག་མཉམ་ཁུར།། སྐྱོ་གདུང་མཉམ་ཡོད།།
དོན་ངོ་མ་གསེར་གྱི་སྒྲོན་མེ་ཞིག་གཟིམས་སོང་།།
མི་རྟག་ཚུལ་བསྟན་དགོངས་པ་མྱ་ངན་འདས།།
བདེ་ཆེན་དབྱིངས་གཤེགས་མཛད་ལ་ཕྱག་འཚལ་ལོ།།
གང་ལ་གང་འདོད་འབྱོར་བའི་ཚད་མའི་རྣམ་རྒྱལ་མཆོག་ཆེན་གྱི།།
གཡུང་དྲུང་བསྟན་པའི་སྲོག་འཛིན་སྐྱེས་བུ་ཁྱེད་ཀྱིས་ཐུཊ་བསྐྱེད་ཀྱིས།།
བདེ་ལེགས་མ་ལུས་འདོད་འབྱུང་འཁྲུལ་མེད་རྒྱལ་བསྟན་རིན་པོ་ཆེ།།
ནུབ་མེད་སྲིད་མཐའི་དབར་དུ་དར་རྒྱས་ལྷག་གེར་བརྟན་པར་ཤོག།
ཤར་རྫའི་རི་ཁྲོད་བཤད་སྒྲུབ་འདུས་སྡེ་ནས།
༢༠༡༧/༩/༢༠ཉིན།