ཁྱུང་ཡུལ་ཀོ་རྒྱལ་དགོན་གྱི་གསར་གནས།

[ཟླ་ཚེས། 2016-10-28 08:46:14][རྩོམ་པ་པོ། མཛད་སྒོ་གོ་སྒྲིག་ཚོགས་ཆུང་།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

311.jpg
དཔལ་གཤེན་བསྟན་ཀོ་རྒྱལ་དགོན་བདེ་ཆེན་ཀུན་གྲགས་གླིང་གི་ཚོགས་ཆེན་འདུ་ཁང་ཆེན་མོ་༼དབལ་ཁྱུང་འགྲོ་འདྲེན་གསས་ཁང་༽ལེགས་གྲུབ་བྱུང་ནས་སྒོ་འབྱེད་ཀྱི་མཛད་སྒོ་དང་འབྲེལ། སྐབས་གསུམ་པའི་དགེ་བཤེས་མཛད་སྒོ། ཞི་ཁྲོའི་སྨན་སྒྲུབ། སྐབས་དྲུག་པའི་ཚད་མའི་རིགས་སྒྲ། རྒྱལ་བ་སྨན་རིའི་ཕྱག་སྲོལ་ཇི་བཞིན་གྱི་བཤད་སྒྲུབ་འདུས་སྡེ་དབུ་བརྙེས་ནས་ལོ་ངོ་བཅུ་འཁོར་བའི་མཛད་སྒོ་སོགས་ཀྱི་གནས་བསྡུས།
1.jpg
DSC_01 - .jpg
ས་བསླང་མཛད་བཞིན་པ།

    སྤྱི་ལོ་ 2016 ལོའི་ 9 པའི་ཚེས་ 21 ཉིན་ཞི་ཁྲོའི་སྨན་སྒྲུབ་ཆེན་མོའི་སྣ་སེལ་དུ་རྣམ་དག་པདྨ་ཀློང་ཡངས་བཅའ་བཟོ་བྱས། 9 པའི་ཚེས་ 22 ཉིན་ཞོག་ཀ་འདུས་སྡེ་སེར་ཕྲེང་ལ་ཕེབས་ནས་ས་བསླང་མཛད་དེ་ 9 པའི་ 24 བར་ཉིན་གསུམ་རིང་རྣམ་དག་དང་ཀློང་རྒྱས། འབུམ་དང་ཁམས་ཆེན་ཀློག་འདོན། ས་ཙྪ་གདབ་པ་སོགས་སྣ་སེལ་གྱི་རིམ་འགྲོ་རྒྱས་པར་སྤེལ།

DSC_02.jpg
རྒྱལ་ཐོ་རྒྱབ་སྐབས་ཀྱི་པར་རིས།

   9 པའི་ཚེས་ 25 ནས་ཞི་ཁྲོའི་སྨན་སྒྲུབ་ཆེན་མོའི་དབུ་བཟུང་སྟེ་ 10 པའི་ཚེས་ 2 བར་ཉིན་བརྒྱད་རིང་ཞི་ཁྲོའི་སྨན་གྱི་ཁྲོལ་བུའི་སྒྲུབ་བ་དང་། ཕྱེ་མའི་སྒྲུབ་བ་ཐོན་པར་བྱས། ཟླ་ 10 པའི་ཚེས་ 2 ཀྱི་ཕྱི་དྲོར་དགོན་འདིའི་དབུ་བླ་དབྲ་ཁྱུང་མཁྱེན་རབ་རྒྱ་མཚོ་རིན་པོ་ཆེས་འདིར་འཚོགས་སེར་སྐྱ་ཡོངས་ལ་སྔོན་འགྲོའི་བཀའ་དབང་གནང་། དགོང་མོ་ཁྱུང་ཡུལ་རྩེ་དྲུག་དགོན་དང་། གཡུང་དྲུང་དཔལ་རི། སྟེང་ཆེན་དགོན། མཐོང་གྲོལ་རི་ཁྲོད། ག་ཤེལ་ཤ་འདྲ་དགོན་སོགས་ཀྱི་རིགས་པ་སྨྲ་བའི་ཁྱུ་ཚོགས་གདན་འདྲེན་ཞུས།

DSC_03.jpg
འཆམ་རར་རྒྱལ་ཆེན་འཆམ་བཞིན་པའི་པར།

    10 པའི་ཚེས་ 3 ནས་ཚེས་ 12 བར་ཉིན་བཅུའི་རིང་དགེ་བཤེས་མཛད་སྒོ་དང་། ཚད་མའི་རིགས་སྒྲ། ཞི་ཁྲོའི་སྨན་གྱི་ཕྱྭ་ཚེ་སྒྲུབ་བ་དང་། དངོས་གྲུབ་སྒྲུབ་བ་སོགས་ལྷན་དུ་སྤེལ། དེའང་ཚེས་ 3 ཉིན་རལ་པ་དྲང་སྲོང་ཁྲི་གཙུག་བསྟན་པ་རབ་གསལ་དང་། ཨ་ཁུ་དྲང་སྲོང་ཁྲི་ལྡེ་རྣམ་རྒྱལ་ཉི་མ་རྣམ་གཉིས་ཀྱིས་སྔོན་འགྲོའི་བཤད་པ་དང་བཀྲ་ཤིས་གསོལ། ཕྱི་དྲོ་སྟེང་ཆེན་དགོན་བཤད་གྲྭ་བ་དམ་བཅའ་དང་། རྩེ་དྲུག་དགོན་བཤད་གྲྭ་བས་རྩོད་པ་མཛད། དེ་ཉིན་དགེ་བཤེས་རྒྱལ་བ་བསྟན་འཛིན་མཆོག་དང་། དགེ་བཤེས་བཟོད་པ་འགྱུར་མེད་མཆོག དགེ་བཤེས་བསྟན་འཛིན་སྐལ་བཟང་མཆོག དགེ་བཤེས་བློ་གྲོས་རབ་གསལ་མཆོག དགེ་བཤེས་འཕགས་མཆོག་སེམས་དཔའ་མཆོག དགེ་བཤེས་ཚུལ་ཁྲིམས་མཐར་ཕྱིནམཆོག དགེ་བཤེས་ཚུལ་ཁྲིམས་རྒྱལ་མཚན་མཆོག དགེ་བཤེས་བསྟན་འཛིན་སྦྱིན་པ་མཆོག དགེ་བཤེས་བསྟན་འཛིན་ཡེ་ཤེས་མཆོག དགེ་བཤེས་ཤེས་རབ་བསྟན་འཛིན་མཆོག དགེ་བཤེས་རྣམ་དག་ཚུལ་ཁྲིམས་མཆོག དགེ་བཤེས་ཤེས་རབ་རྣམ་རྒྱལ་མཆོག་བཅས་སེར་ཕྲེང་གིས་གདན་འདྲེན་ཞུས་ཤིང་། ཉིན་གཞུང་དགེ་བཤེས་བཀྲ་ཤིས་དང་། ཕྱི་དྲོ་དམ་བཅའ་སོགས་སྤྱན་འབུལ་ཞུས། དགོང་མོ་བཤད་སྒྲུབ་འདུས་སྡེའི་ལོ་ངོ་བཅུ་འཁོར་བའི་མཛད་སྒོའི་ཚུལ་དུ་དགེ་བཤེས་རྣམ་པས་མ་འོངས་པར་བཤད་སྒྲུབ་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གྱི་ཕྱག་ལས་གང་འདྲ་དགོས་པ་བརྗོད་གཞི་བྱས་ཏེ། བགྲོ་གླེང་ཕྱག་ཚོད་གསུམ་རིང་ལྷུག་པོར་གནང་།

DSC_04.jpg
ཁྲི་འཛིན་བླ་མ་རིན་པོ་ཆེ་འཚོགས་མགོན་དུ་བཞུགས་པའི་སྐབས།

   ཚེས་ 4 ཉིན་འབྲིང་རྒྱུད་དྲང་སྲོང་གཙུག་ཕུད་མཆོག་སྒྲུབ་ནམ་མཁའ་དང་། འབྲིང་རྒྱུད་དྲང་སྲོང་བསམ་གཏན་ཚུལ་ཁྲིམས་རྣམ་དག་རྣམ་གཉིས་ཀྱིས་སྔོན་འགྲོའི་བཤད་པ་དང་བཀྲ་ཤིས་གསོལ། དྲོ་གཞུང་༼དབལ་ཁྱུང་འགྲོ་འདྲེན་གསས་ཁང་༽སྒོ་འབྱེད་མཛད། ཕྱི་དྲོ་རྩེ་དྲུག་དགོན་བཤད་གྲྭ་བ་དམ་བཅའ་དང་། ཀོ་རྒྱལ་དགོན་བཤད་གྲྭ་བས་རྩོད་པ་མཛད།

DSC_05.jpg
རིགས་སྒྲའི་སྐབས་ཀྱི་འཆད་རའི་རྣམ་པ།

   ཚེས་ 5 ཉིན་དགུང་སར་དྲང་སྲོང་མཁྱེན་བརྩེ་བློ་གསལ་དོན་ལྡན་དང་། ཨ་རོལ་དྲང་སྲོང་ཕུན་ཚོགས་ཚུལ་ཁྲིམས་རྒྱ་མཚོ་རྣམ་གཉིས་ཀྱིས་སྔོན་འགྲོའི་བཤད་པ་དང་བཀྲ་ཤིས་གསོལ། ཕྱི་དྲོ་ཀོ་རྒྱལ་དགོན་བཤད་གྲྭ་བ་དམ་བཅའ་དང་། རི་ཁྲོད་དགོན་བཤད་གྲྭ་བས་རྩོད་པ་མཛད།

DSC_06.jpg
དགེ་བའི་བཤེས་གཉེན་རྣམ་པ་སེར་ཕྲེང་གིས་གདན་འདྲེན་ཞུ་བཞིན་པ།

   ཚེས་ 6 ཉིན་བོན་རྒྱུད་དྲང་སྲོང་ཚུལ་ཁྲིམས་འགྱུར་མེད་རྒྱལ་མཚན་དང་། ཚབ་ཤུ་དྲང་སྲོང་གཙུག་གཤེན་ཚུལ་ཁྲིམས་དབང་རྒྱལ་རྣམ་གཉིས་ཀྱིས་སྔོན་འགྲོའི་བཤད་པ་དང་བཀྲ་ཤིས་གསོལ། ཕྱི་དྲོ་རི་ཁྲོད་དགོན་བཤད་གྲྭ་བ་དམ་བཅའ་དང་། སྟེང་ཆེན་དགོན་བཤད་གྲྭ་བས་རྩོད་པ་མཛད།

DSC_07.jpg
དགེ་བའི་བཤེས་གཉེན་རྣམ་པར་གཤེན་རབ་མཆོད་ལྔའི་མཆོད་པ་འབུལ་བཞིན་པ།

   ཚེས་ 7 ཕྱྭ་ག་དྲང་སྲོང་བརྩོན་འགྲུས་མཐར་ཕྱིན་དྲི་མེད་དང་། ཤོ་ས་དྲང་སྲོང་ཤེས་རབ་ཁྲི་གཙུག་རྒྱལ་པོ་རྣམ་གཉིས་ཀྱིས་སྔོན་འགྲོའི་བཤད་པ་དང་བཀྲ་ཤིས་གསོལ། ཕྱི་དྲོ་ཤ་འདྲ་དགོན་བཤད་གྲྭ་བ་དམ་བཅའ་དང་། ཀོ་རྒྱལ་དགོན་བཤད་གྲྭ་བས་རྩོད་པ་མཛད།

DSC_08.jpg
མཚན་མོའི་བགྲོ་གླེང་གི་ཟུར་གཅིག

   ཚེས་ 8 ཉིན་ནས་ཚེས་ 12 བར་ཉིན་ལྔའི་རིང་ཉིན་རེ་བཀའ་རམས་པ་གཉིས་རེས་དམ་བཅའ་གསུང་ཞིང་དངོས་གཞི་དམ་བཅའ་བཞུགས། དགོང་མོར་རིགས་སྒྲ་གྲོལ་བའི་དྲན་རྟེན་སྐུ་པར་རྒྱག་སྟེ་བསྟན་འབར་སྨོན་ལམ་གསུངས་ནས་ཚོགས་གྲོལ།

DSC_09.jpg
རིགས་སྒྲའི་སྐབས་ཀྱི་དམ་བཅའ་བ་དང་རྩོད་པ་བའི་ཉམས།

   ཚེས་ 13 ཉིན་མ་མཆོག་སྲིད་པ་རྒྱལ་མོར་གཏང་རག་ཚོགས་མཆོད་རྒྱས་འབུལ་ཞུས།

DSC_10.jpg
སྨན་སྒྲུབ་འཚོགས་གཞུང་དང་དགེ་བཤེས་དམ་བཅའི་རྣམ་པ།
DSC_15.jpg
བླ་མ་རྣམ་པ་སེར་ཕྲེང་གིས་ཕེབས་བསུ་ཞུ་བཞིན་པ།

   ཚེས་ 14 ཉིན་གྲྭ་ས་གཡུང་དྲུང་གླིང་གི་ཁྲི་འཛིན་མཁན་རིན་པོ་ཆེ་བསམ་གཏན་འགྱུར་མེད་མཆོག་དང་། རྩེ་དྲུག་དགོན་དབུ་བླ་བསྟན་འཛིན་འོད་ཟེར་རིན་པོ་ཆེ། གཡུང་དྲུང་དཔལ་རི་དགོན་དབུ་བླ་ཚུལ་ཁྲིམས་མཐར་ཕྱིན་རིན་པོ་ཆེ། སྟེང་ཆེན་དགོན་བླ་མ་རྒྱལ་བ་བསྟན་འཛིན་རིན་པོ་ཆེ། སྨོན་རྒྱལ་བླ་བྲང་གི་བླ་མ་ནམ་མཁའ་མཐོང་གྲོལ་རིན་པོ་ཆེ། ཀ་ལེགས་དགོན་གྱི་དབུ་བླ་ཚེ་དབང་སྟོབས་རྒྱལ་རིན་པོ་ཆེ། རེ་ནེ་དགོན་དབུ་བླ་གཙུག་ཕུད་ཚུལ་ཁྲིམས་རིན་པོ་ཆེ། དར་རྒྱས་དགོན་གྱི་བླ་མ་བསྟན་འཛིན་རྣམ་དག་རིན་པོ་ཆེ། ཤ་འདྲ་དགོན་གྱི་བླ་མ་བསྟན་འཛིན་ཡེ་ཤེས་རིན་པོ་ཆེ་སོགས་ཆིབས་བསུ་དང་སེར་ཕྲེང་གིས་གདན་འདྲེན་ཞུས་ནས་གཡུང་གླིང་མཁན་རིན་པོ་ཆེ་གསེར་ཁྲིར་མངའ་གསོལ་དང་མཎྜལ་སྐུ་གསུང་ཐུགས་རྟེན་དང་མཆོད་པ་རྣམ་ལྔ་འབུལ་བའི་ཆོ་ག་རྒྱས་པར་སྤེལ།

DSC_16.jpg
བླ་མ་རྣམ་པར་གཤེན་རབ་མཆོད་ལྔའི་མཆོད་པ་འབུལ་བཞིན་པ།
DSC_11.jpg
སྨན་སྒྲུབ་སྐབས་ཀྱི་སེར་ཕྲེང་དགོན་གྱི་མཐའ་རུ་ཕེབས་བཞིན་པ།

   ཕྱི་དྲོར་སྐྱེས་མཆོག་རྣམས་ཀྱིས་གནས་ཁང་གསར་རྙིང་ཀུན་ལ་མངའ་དབུལ་བཀྲ་ཤིས་གཏེར་མཛོད་ཀྱི་སྒོ་ནས་རབ་གནས་མཛད། འདུས་པ་རྒྱ་མཚོས་གར་འཆམ་གྱི་གཟིགས་སྟོན་བཤམ། དེའི་ནང་མོར་བླ་མ་མཆོག་གིས་འདུས་པ་རྒྱ་མཚོར་ཞི་ཁྲོའི་ནང་དབང་བསྐུར་མཛད།

DSC_12.jpg
བླ་མ་རྣམ་པ་སྔ་སྲོལ་ལྟར་གྱི་ཆིབས་བསུ་ཞུ་བཞིན་པ།
DSC_14.jpg
བླ་མ་རྣམ་པ་དེང་དུས་ལྟར་གྱི་ཆིབས་བསུ་ཞུ་བཞིན་པ།

   ཚེས་ 15 ཉིན་གོང་ནས་ཆིབས་བསུ་ཞུས་པའི་བླ་མ་རིན་པོ་ཆེ་རྣམ་པ་དགུ་དང་། རི་ཁྲོད་དགོན་གྱི་དབུ་བླ་འཆི་མེད་རྣམ་རྒྱལ་རིན་པོ་ཆེ་དང་། ནག་རུ་དགོན་གྱི་དབུ་བླ་བསམ་གཏན་དགེ་ལེགས་རིན་པོ་ཆེ། ངེད་ཀོ་རྒྱལ་དགོན་དབུ་བླ་མཁྱེན་རབ་རྒྱ་མཚོ་རིན་པོ་ཆེ། སྒྲུབ་མཁན་དགེ་ལེགས་ཚུལ་ཁྲིམས་རིན་པོ་ཆེ་ ། དགེ་བཤེས་བློ་གྲོས་རབ་རྒྱས་རིན་པོ་ཆེ། རྒྱེལ་རི་དགོན་གྱི་དབུ་བླ་ཡེ་ཤེས་ཐབས་མཁས་རིན་པོ་ཆེ། སྤུངས་རི་དགོན་གྱི་དབུ་བླ་བློ་གྲོས་གཙུག་ཕུད་རིན་པོ་ཆེ་རྣམ་པས་དད་ལྡན་དམངས་ལ་ཉིན་ཧྲིལ་པོར་གཤར་དབང་གནང་།

DSC_18.jpg
བླ་མ་རྣམ་པས་དད་ལྡན་དམངས་ལ་གཤར་དབང་གནང་བཞིན་པ།

   ཚེས་ 16 ཉིན་བཀའ་རམས་པ་རྣམ་པ་བཅུ་ལ་དགེ་བཤེས་ཀྱི་མཚན་གསོལ་ཕྱག་ཁྱེར་བསྩལ་ཁྲི་བཞེངས་བྱས་མཇལ་ཁ་གནང་།

DSC_19.jpg
དད་ལྡན་དམངས་ཀྱིས་རེ་བའི་ཁེངས་བཞིན་ཐག་རིང་ནས་རུ་བསྟར་སྒྲིག་སྟེ་བཀའ་དབང་ཞུ་བའི་ངང་སྒྲུག་བྱེད་བཞིན་པའི་ཟུར་གཅིག

   ཚེས་ 17 སྨན་སྒྲུབ་ཆེན་མོའི་ཕྱྭ་ཚེ་བཀྲ་ཤིས་གསོལ། དད་སྦྱིན་ཁག་ལ་ལེགས་གསོལ་མཚོན་བྱེད་གནང་ཞིང་། གྲྭ་ཚང་ལ་སྐུ་འགྱེད་དང་སྨན་སྒྲུབ་ཕུལ།

DSC_20.jpg
འདི་གའི་དཔོན་སློབ་ཀྱིས་བཀའ་རམས་པ་བཅུ་ལ་མཚན་རྟགས་གནང་བཞིན་པ།

   ཚེས་ 18 ཉིན་གསར་དུ་ཕེབས་པའི་དགེ་བའི་བཤེས་གཉེན་རྣམ་པ་བཅུ་ཡིས་གཏང་རག་ཐུགས་སྤྲོ་རྒྱས་གཏོང་གནང་།

DSC_21.jpg
འདི་གའི་དཔོན་སློབ་ཀྱིས་བཀའ་རམས་པ་བཅུ་ལ་མཚན་རྟགས་གནང་བཞིན་པ།
DSC_22.jpg
མཚན་རྟགས་བཞེས་ཟིན་པའི་དགེ་བའི་བཤེས་གཉེན་རྣམ་པ་འཚོགས་གཞུང་དུ་བཞུགས་པའི་སྐུ་པར།
DSC_23.jpg
འདི་དགོན་གྱི་མཁན་སློབ་རྣམ་དང་གསར་དུ་བྱོན་པའི་དགེ་བའི་བཤེས་གཉེན་རྣམ་པ།

   དེ་ལྟར་ཉིན་གྲངས་ 28 རིང་གོ་སྒྲིག་ཚོགས་ཆུང་གིས་བཀོད་སྒྲིག་གནང་སྟེ་དགོན་ཞབས་ལས་བྱེད་དང་མང་ཚོགས། འབྲེལ་ཡོད་སྲིད་གཞུང་ཚན་པ་ཁག་སོགས་ཀྱིས་རྒྱབ་སྐྱོར་འོག་གཏན་ལྷིང་ཞི་བདེ་མཐུན་སྒྲིལ་ལེགས་པོ་བྱུང་སྟེ་དགའ་དད་སྤྲོ་བའི་ངང་ནས་མཛད་སྒོ་མཇུག་སྒྲིལ་སོང་། ཐ་ཚན་མུ་ཙུག་སྨར་རོ།།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།