སྐྱབས་རྗེ་༧རྒྱལ་བ་སྨན་རི་བས་བཀའ་དབང་ཟབ་མོ་དབུ་འཛུགས་གནང་བ།

གཤེན་གྱི་འབྱུང་ལྡན་ ༣༠༡ བོད་ཆུ་སྦྲུལ་ལོའི་བོད་ཟླ་བརྒྱད་པ་ཕྱི་མའི་ཚེས་བཅོ་ལྔ་སྟེ། ཕྱི་ལོ་༢༠༡༣ཟླ་༡༠ཚེས་༡༨ཉིན་ནས་༧གསང་གསུམ་བོན་གྱི་མཛོད་འཛིན་ཡོངས་ཀྱི་རྩ་བའི་བླ་མ། ༧རྗེ་རྒྱལ་བ་མཉམ་མེད་ཆེན་པོའི་ཞལ་ཚབ་ཆེན་མོ། ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གསུམ་པ་མཚན་བརྗོད་པར་དཀའ་བ་དོན་གྱི་སླད་དུ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་གིས་བོན་ཕྱི་ནང་གསུམ་གྱི་བཀའ་དབང་ཟབ་མོ་དབུ་འཛུགས་གནང་ཡོད་པ་རེད།

དེ་ཡང་༧དཔལ་གཤེན་བསྟན་སྨན་རིའི་གླིང་གི་བཀའ་དབང་གོ་སྒྲིག་ཚོགས་ཆུང་གི་གསལ་བསྒྲགས་སྔོན་སོང་བཞིན་གོང་ཕྱི་ཟླའི་ཚེས་ ༡༨ ཉིན་གྱི་སྔ་དྲོའི་ཕྱག་ཚོད་དགུ་དང་ཕྱེད་ཀ་ནས་༧སྐྱབས་རྗེ་༧རྒྱལ་བ་སྨན་རི་བ་མཆོག་སྨན་རིའི་བླ་བྲང་ནས་གདན་ཞུས་ཀྱིས་བཀའ་དབང་དབུ་འཛུགས་ཞུས་ཡོད་པ་དང་།

དད་ལྡན་དབང་ཞུ་བ་སྨན་རིའི་བཤད་སྒྲུབ་མཁན་སློབ་རྣམ་གཉིས་དབུས་པའི་བླ་སྤྲུལ་དགེ་བཤེས་རྣམས་དང་། བྱ་དུར་སྐུ་ངོ་བསོད་ནམས་བཟང་པོ། གཡུང་དྲུང་བོན་གྱི་སྤྱི་འཐུས་དགེ་བཤེས་སྨོན་ལམ་མཐར་ཕྱིན། དེ་བཞིན་བོད་ཕྱི་ནང་གཉིས་དང་། རྒྱལ་ཁབ་འདྲ་མིན་གྱི་དད་ལྡན་སྐྱ་སེར་ཉིས་སྟོང་ཙམ་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་གི་ཚོགས་ཁང་ཆེན་མོར་འདུ་ཕེབས་ཀྱིས། ཕྱི་རྒྱུད་ཀྱི་བཀའ་དབང་ཟབ་མོ་རྣམ་དག་པད་མ་ཀློང་ཡངས་ནས་དབུ་འཛུགས་གནང་ཡོད་པ་དང་།

སང་ཉིན་ནས་མུ་མཐུད་དུ་ཟླ་བ་གཅིག་གི་རིང་ལ་ཕྱི་རྒྱུད་སོགས་ཀྱི་བཀའ་དབང་ཟབ་མོ་གནང་འཆར་ཡོད་པ་བཅས་ཀྱི་གནས་ཚུལ་སྟབས་བསྡུས་ཙམ་དུ་ཁྲི་གཡུང་བས།།