མི་ཚེའི་དམ་བཅའ་དྲན་སྐུལ་སོགས་ཉམས་མགུར་ཚན་པ་བཞི།
[ཟླ་ཚེས། 2018-03-30 09:34:55][རྩོམ་པ་པོ། བཟོ་སྦྱིན་པ་ཚུལ་ཁྲིམས།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
༼བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག་གི་དམ་བཅའ་ཉམས་མགུར་སོགས་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༣པ་ལ་སྤྱན་འབུལ་ཞུ་སྐབས།༽
༄༅།།ཚན་པ་དང་པོ། དེ་རིང་ནས་མི་གསར་པའི་མི་ཚེའི་དམ་བཅའ་དྲན་སྐུལ་བཞུགས་སྭོ།།
རྣམ་ཤེས་འཁྱམས་པོ་ཁམས་གསུམ་འཁོར་བ་འཁོར།།
འཁོར་བའི་སེམས་ཅན་ཉོན་མོངས་དུག་ལྔ་འཁྲུལ།།
འཁྲུལ་བའི་སྡིག་སྒྲིབ་སྡུག་བསྔལ་རང་བཞིན་ང་།།
ང་ཡི་འཁོར་བ་འདི་ལ་བློ་ཡི་ཟློག།
དལ་འབྱོར་རྙེད་དཀའ་བསམ་ནས་ངེས་འབྱུང་སྐྱེས།།
འཆི་བ་མི་རྟག་བསམ་ནས་ངེས་འབྱུང་སྐྱེས།།
ལས་དང་རྒྱུ་འབྲས་བསམ་ནས་ངེས་འབྱུང་སྐྱེས།།
འཁོར་བའི་ཉེས་དམིགས་བསམ་ནས་ངེས་འབྱུང་སྐྱེས།།
སྟོང་གསུམ་ཕྱི་སྣོད་འཇིག་རྟེན་མི་རྟག་པ།།
ཁམས་གསུམ་ནང་བཅུད་སེམས་ཅན་མི་རྟག་པ།།
སྲིད་གསུམ་སྣང་སྲིད་འཁོར་བ་མི་རྟག་པ།།
དུས་གསུམ་སྐྱེ་རྒས་ན་འཆི་མི་རྟག་པ།།
མ་ཡེངས་མི་རྟག་སྐད་ཅིག་ཡང་ཡང་སྒོམ།།
མ་བརྗེད་སྐྱབས་འགྲོ་རྩེ་གཅིག་ཡང་ཡང་སྒོམ།།
མ་བཅོས་རྐྱང་འདེད་ཉག་གཅིག་ཡང་ཡང་སྒོམ།།
མ་ལུས་སེམས་ཅན་ཆབས་ཅིག་ཡང་ཡང་སྒོམ།།
སྐུ་གསུམ་བླ་མའི་ཐུགས་རྗེས་དགོངས་སུ་གསོལ།།
དུས་གསུམ་སངས་རྒྱས་ཐུགས་རྗེས་དགོངས་སུ་གསོལ།།
རྟེན་གསུམ་བོན་གྱི་ཐུགས་རྗེས་དགོངས་སུ་གསོལ།།
བསླབ་གསུམ་སེམས་དཔའི་ཐུགས་རྗེས་དགོངས་སུ་གསོལ།།
བསླུ་མེད་སྐྱབས་གནས་དཀོན་མཆོག་དགོངས་སུ་གསོལ།།
ནུས་མེད་ཉམས་ཆུང་བདག་སོགས་གསན་དུ་གསོལ།།
བདག་མེད་སྟོང་ངོར་འཕྲོད་པར་མཛད་དུ་གསོལ།།
སྐྱེ་མེད་ཡེ་སྟོང་དངོས་གྲུབ་བསྩལ་དུ་གསོལ།།
སྟོང་གསུམ་སྣང་སྲིད་འདོད་ཡོན་མཆོད་པའི་རྫས།།
ཐམས་ཅད་མཆོད་པར་མ་གྱུར་གང་ཡང་མེད།།
གཟུགས་སྒྲ་དྲི་རོ་རེག་བྱ་བོན་རྣམས་ཀུན།།
མཐོང་ཐོས་དྲན་རིག་རྟག་ཏུ་མཆོད་པ་འབུལ།།
ཁམས་གསུམ་སེམས་ཅན་མ་ལུས་ཐམས་ཅད་ཀུན།།
སྐུ་གསུམ་དགོངས་པས་མ་ཁྱབ་གང་ཡང་མེད།།
སྒོ་གསུམ་རྣམ་དག་མོས་གུས་ཕྱག་འཚལ་གསོལ།།
འཁོར་འདས་མ་ལུས་ཆབས་ཅིག་སྐྱབས་སུ་གསོལ།།
ལྷད་མེད་རྣམ་དག་སྣང་སྲིད་མཆོད་པ་འདི།།
སེར་སྣ་སྙན་གྲགས་མ་དག་དྲི་མ་མེད།།
ཟད་མེད་ཏིང་འཛིན་མཆོད་སྦྱིན་རྒྱ་ཆེན་འདི།།
འདོད་དགུ་གང་འདོད་ཚིམ་པར་བཞེས་སུ་གསོལ།།
བླ་མ་ཡི་དམ་མཁའ་འགྲོའི་ཐུགས་རྗེས་གཟིགས།།
སངས་རྒྱས་བོན་དང་སེམས་དཔའ་བྱིན་གྱིས་རློབས།།
བདེར་གཤེགས་རིག་འཛིན་ཕོ་མོས་དངོས་གྲུབ་སྩོལ།།
བོན་སྐྱོང་བསྟན་སྲུང་དཀར་ཕྱོགས་ལམ་སྣ་དྲང།།
སྐྱབས་གསུམ་གནས་བཞི་དད་གུས་སྤྱི་བོར་ཁུར།།
སྒོ་གསུམ་རྣམ་དག་དགེ་བཅུའི་ཕྱོགས་སུ་གཞོལ།།
དུག་གསུམ་དུག་ལྔའི་སྡིག་བཅུ་ནད་བཞིན་འཛེམ།།
ཁམས་གསུམ་སེམས་ཅན་སྙིང་རྗེས་སྙིང་དཀྱིལ་ཉར།
སྒོ་གསུམ་དགེ་བཅུའི་མཐུན་རྐྱེན་སྡོང་གྲོགས་མཛོད།
དུས་གསུམ་སྡིག་བཅུའི་མི་མཐུན་རྐྱེན་ངན་ཟློག།
ཁམས་གསུམ་འཁོར་བའི་ཉོན་མོངས་དུག་ལྔ་ཞི།།
སྐུ་གསུམ་ཐིག་ལེ་ཉག་གཅིག་དོན་རྟོགས་ཤོག།
ཉམས་བཤགས་སྒྲིབ་བྱང་དམ་བསྐང་དབང་བཞི་བསྐུར།།
མཆོག་ཐུན་དངོས་གྲུབ་མྱུར་བར་བསྩལ་དུ་གསོལ།།
བསམ་དོན་ཡིད་བཞིན་བདག་རྒྱུད་བྱིན་གྱི་རློབས།།
དོན་གཉིས་ལྷུན་གྲུབ་ཀུན་བཟང་རྒྱལ་ས་གནང་།།
ཕྱི་ནང་གསང་བའི་འགལ་རྐྱེན་བར་ཆད་སོལ།།
མ་རིག་འཁྲུལ་བའི་བློ་མུན་སེལ་བར་མཛོད།།
སྡུག་བསྔལ་འཁོར་བའི་ནད་གདོན་ཐམས་ཅད་འཇོམས།།
བྱད་ཁ་རྦོད་གཏོང་དགྲ་བགེགས་རྡུལ་དུ་རློགས།།
མི་ཁ་བྲ་མཆུ་མེད་བརླག་ཟློག་གྱུར་ཅིག།
བསྐལ་སྲིད་ཚེ་རབས་ལན་ཆགས་བྱང་གྱུར་ཅིག།
རྟོག་ཡིད་འཁྲུལ་བའི་བག་ཆགས་གྲོལ་གྱུར་ཅིག།
དམིགས་མེད་བཏང་སྙོམས་མཉམ་ཉིད་གནས་གྱུར་ཅིག།
གཞི་རུ་མདོ་སྔགས་སེམས་གསུམ་ཉམས་སུ་ལེན།།
ལམ་དུ་སྤང་བསྒྱུར་གྲོལ་གསུམ་ལམ་འཁྱེར་བྱེད།།
འབྲས་བུ་སྐུ་གསུམ་སངས་རྒྱས་རྗེས་སུ་འབྲངས།།
སྐྱོ་ཤས་ངེས་འབྱུང་རང་སེམས་གསར་བ་རྙེད།།
དེ་རིང་ང་ཡིས་བསམ་བློ་གསར་པ་རྙེད།།
དེ་རིང་ང་ཡིས་མི་རྟག་གསར་པ་རྙེད།།
དེ་རིང་ང་ཡིས་ཕུགས་འདུན་གསར་པ་རྙེད།།
དེ་རིང་ང་ཡིས་དམ་བཅའ་གསར་པ་རྙེད།།
ད་ནས་ཕན་ཆད་ལྟ་སྤྱོད་གསར་པ་ཡིན།།
ད་ནས་ཕན་ཆད་སྦྱོང་བསྩོན་གསར་པ་ཡིན།།
ད་ནས་ཕན་ཆད་ཉམས་ལེན་གསར་པ་ཡིན།།
ད་ནས་ཕན་ཆད་འཚོ་གནས་གསར་པ་ཡིན།།
ཉམས་ཆུང་ནུས་མེད་དབེན་ཁུང་ཁེར་འདུག་དགོས།།
ཅོལ་ཆུང་ཤེས་མེད་བློ་ཁ་མ་ཡང་དགོས།།
མི་ཆུང་འབྱོར་མེད་ཕོར་ཁ་ཡར་བཟེད་དགོས།།
སེམས་ཆུང་བསམ་མེད་བསམ་ཤེས་ཡར་ལྟ་དགོས།།
ཕ་གཞིས་ཡུལ་མཁར་འཁོར་བའི་བཙོན་ར་སྤོང་།།
ཕ་སྤུན་གཉན་ཉེ་བརྩེ་བའི་འཆིང་ཐག་སྤོང་།།
ཕ་ཡུལ་ཟང་ཟིང་སྡེ་འབངས་ཆགས་ཞེན་སྤོང་།།
ཕ་བཟང་བུ་ཡིས་སྡུག་བསྔལ་གཞི་རྩ་སྤོང་།།
མ་བརྗེད་བླ་མ་དཀོན་མཆོག་ཡི་དམ་བྱེད།།
མ་ལུས་ཁམས་གསུམ་སེམས་ཅན་ཕ་མ་བྱེད།།
མ་དག་ཉོན་མོངས་སྡིག་སྒྲིབ་བྱི་དོར་བྱེད།།
མ་ཤེས་རང་ངོ་རང་གིས་ཤེས་པར་བྱེད།།
བུ་ངའི་ཕུགས་གཏད་སྐྱབས་གནས་དཀོན་མཆོག་ཡིན།།
བུ་ངའི་ཕུགས་ནོར་སྒོ་གསུམ་དགེ་བཅུ་ཡིན།།
བུ་ངའི་ཕུགས་བསམ་སྦྱོར་དངོས་རྗེས་གསུམ་ཡིན།།
བུ་ངའི་ཕུགས་འདུན་གནས་ལུགས་རང་གྲོལ་ཡིན།།
སྐུ་གསུམ་ཀུན་འདུན་བླ་མར་སྐྱབས་སུ་གསོལ།།
དུས་གསུམ་རྫོགས་པའི་སངས་རྒྱས་སྐྱབས་སུ་གསོལ།།
རྟེན་གསུམ་སྐུ་གསུང་ཐུགས་རྟེན་སྐྱབས་སུ་གསོལ།།
བསླབ་གསུམ་གཡུང་དྲུང་སེམས་དཔའ་སྐྱབས་སུ་གསོལ།།
གུས་པས་དགེ་ཚོགས་གནས་བཞིར་མཆོད་པ་འབུལ།།
གུས་པས་སྡིག་ཚོགས་གནས་བཞིར་བཤགས་པ་འབུལ།།
གུས་པས་སྒོ་གསུམ་གནས་བཞིར་མཆོད་པ་འབུལ།།
གུས་པས་དུག་གསུམ་གནས་བཞིར་བཤགས་པ་འབུལ།།
ཨ་མའི་བུ་གཅེས་དགེ་བཅུ་འགྲུབ་པར་བྱེད།།
ཨ་མའི་བུ་གཅེས་སྡིག་བཅུ་དག་པར་བྱེད།།
ཨ་མའི་བུ་གཅེས་ཚོགས་གཉིས་རྫོགས་པར་བྱེད།།
ཨ་མའི་བུ་གཅེས་སྒྲིབ་གཉིས་བཤགས་པར་བྱེད།།
དམིགས་མེད་རྣམ་དག་མགྲོན་བཞིར་མཆོད་སྦྱིན་འབུལ།།
ཟད་མེད་དགོས་འདོད་ཀུན་འབྱུང་མཆོད་སྦྱིན་འབུལ།།
གྲངས་མེད་སྟོང་ཁམས་སྲིད་གསུམ་མཆོད་སྦྱིན་འབུལ།།
ཟག་མེད་སྟོང་ཉིད་སྙིང་རྗེས་མཆོད་སྦྱིན་འབུལ།།
ཕ་མས་བུ་ལ་བྱམས་སྐྱོང་དྲིན་ལན་འཇལ།།
ཕ་མའི་བུ་ངས་བརྩེ་བས་དྲིན་ལན་འཇལ།།
ཕ་མའི་བུ་ངས་བྱམས་པས་དྲིན་ལན་འཇལ།།
ཕ་མའི་བུ་ངས་དགེ་བས་དྲིན་ལན་འཇལ།།
གྲངས་མེད་ཕ་མར་དཔག་མེད་དགེ་བས་འཇལ།།
གྲངས་མེད་སངས་རྒྱས་ཚད་མེད་དགེ་བས་འཇལ།།
གྲངས་མེད་སངས་རྒྱས་དམིགས་མེད་དགེ་བས་འཇལ།།
གྲངས་མེད་སངས་རྒྱས་ཟག་མེད་དགེ་བས་འཇལ།།
ཁམས་གསུམ་སེམས་ཅན་ང་ཡི་ཕ་མ་ཡིན།།
དུས་གསུམ་སངས་རྒྱས་ང་ཡི་བླ་མ་ཡིན།།
དུས་གསུམ་སངས་རྒྱས་ང་ཡི་ཡི་དམ་ཡིན།།
དུས་གསུམ་སངས་རྒྱས་ང་ཡི་སྐྱབས་གནས་ཡིན།།
སྐྱེ་མེད་སྟོང་ཉིད་ང་ཡི་སེམས་ཉིད་ཡིན།།
འགག་མེད་ཡེ་ཤེས་ང་ཡི་རང་རིག་ཡིན།།
གཉིས་མེད་སྟོང་གསལ་ང་ཡི་རང་ངོ་ཡིན།།
མཐའ་མེད་ཀློང་ཡངས་ང་ཡི་དོན་དམ་ཡིན།།
བདག་ཅག་དགེ་བྱེད་བར་ཆད་ཐམས་ཅད་ཟློག།
བདག་ཅག་རྐྱེན་ངན་བར་ཆད་ཐམས་ཅད་ཟློག།
བདག་ཅག་བྱད་ཁ་བར་ཆད་ཐམས་ཅད་ཟློག།
བདག་ཅག་ནད་གདོན་བགེགས་རིགས་ཐམས་ཅད་ཟློག།
ཀུན་སློང་ཉོན་མོངས་བརྒྱད་ཁྲི་བཞི་སྟོང་བཤགས།།
ཀུན་སྤྱོད་མཚམས་མེད་ལྔ་ཡི་ཉེས་ལྟུང་བཤགས།།
ཀུན་ལ་གྲངས་མེད་ཆགས་ཉམས་ཐམས་ཅད་བཤགས།།
ཀུན་ཏུ་སྒོ་གསུམ་གནོང་འགྱོད་མཐོལ་ལོ་བཤགས།།
བདག་གཞན་བསྐལ་བ་གྲངས་མེད་བསགས་པའི་དགེ།
བདག་གཞན་སྡང་དགྲ་གནོད་བགེགས་ཕ་མར་བསྔོ།།
བདག་གཞན་ཤི་གསོན་ཁ་ལག་འབྲེལ་ཚད་བསྔོ།།
བདག་གཞན་ཁམས་གསུམ་སེམས་ཅན་ཡོངས་སུ་བསྔོ།།
བསྟན་པའི་སྙིང་པོ་གཡུང་དྲུང་བོན་དར་སྨོན།།
བསྟན་པར་ལོག་ལྟ་བར་ཆད་བཟློག་པར་སྨོན།།
བསྟན་འཛིན་སྐྱེས་མཆོག་འགྲོ་དོན་མཐར་ཕྱིན་སྨོན།།
བསྟན་སྦྱིན་འབྲེལ་ཚད་འདི་ཕྱིའི་བདེ་སྐྱིད་སྨོན།།
འདུལ་བ་ཁྲིམས་ཀྱི་ཚུལ་ཁྲིམས་མཐར་ཕྱིན་ཤོག།
གསང་བ་སྔགས་ཀྱི་དམ་ཚིགས་མཐར་ཕྱིན་ཤོག།
རྫོགས་པ་ཆེན་པོའི་ཉམས་ལེན་མཐར་ཕྱིན་ཤོག།
མདོ་སྔགས་རྫོགས་གསུམ་ས་ལམ་མཐར་ཕྱིན་ཤོག།
སྐྱེ་འགྲོ་ནད་མུག་མེད་པའི་བཀྲ་ཤིས་ཤོག།
རྩི་ཏོག་སད་སེར་མེད་པའི་བཀྲ་ཤིས་ཤོག།
འབྱུང་བའི་གནོད་འཚེ་མེད་པའི་བཀྲ་ཤིས་ཤོག།
འཁོར་བའི་སྡུག་བསྔལ་མེད་པའི་བཀྲ་ཤིས་ཤོག།
འགྲོ་ཁམས་བདེ་སྐྱིད་ལྡན་པའི་བདེ་ལེགས་ཤོག།
འགྲོ་ཁམས་སྡུག་བསྔལ་བྲལ་བའི་བདེ་ལེགས་ཤོག།
འགྲོ་ཁམས་ཉོན་མོངས་གྲོལ་བའི་བདེ་ལེགས་ཤོག།
འགྲོ་ཁམས་དོན་དམ་རྟོགས་པའི་བདེ་ལེགས་ཤོག།
༈ ཅེས་པ་འདི་ནི་༢༠༡༣ལོ་ལུང་ནག་དབུ་རི་བླ་མ་བསྟན་པ་དབང་རྒྱལ་རིན་པོ་ཆེ་མཆོག་གིས་མི་ཚེའི་ལམ་བསྟན་དང་རྒྱབ་སྐྱོར་ཚད་མེད་གནང་བ་དང་གྲོགས་མཆོག་དད་སྦྱིན་རྣམ་པས་མཐུན་རྐྱེན་རྒྱབ་སྐྱོར་གནང་བ། གཉིས་པ་རང་དགོན་གྱིས་མོས་མཐུན་དང་ཡིད་རང་གནང་བ། གསུམ་པ་གཤེན་སྲས་ནོར་བུ་དབང་རྒྱལ་རིན་པོ་ཆེ་མཆོག་གིས་སྦྱིན་བདག་ལྷག་བསམ་དཀར་བ་ཞིག་བཀོད་བསྒྲིགས་གནང་བ་དང་གཞན་གང་སྤྱིའི་ཐད་ཐུགས་ཁུར་གཟབ་བཞེས་གནང་བ། བཞི་པ་སྦྱིན་བདག་རྔ་ལ་ནོར་བུ་དབང་འདུས་མཆོག་གིས་གུས་རང་ལ་ཟས་གོས་སྡོད་གསུམ་ཐད་ལ་བཀའ་ངལ་མེད་པ་དང་ཐུགས་རྒྱ་ཆེན་པོའི་སྒོ་ནས་བསམ་གཞིག་ཐོག་སྦྱིན་བདག་གནང་བ་བཅས་བཀའ་དྲིན་ཚད་དུ་མེད་པའོ། ལྔ་པ་གཡུང་དྲུང་བོན་གྱི་བླ་སྤྲུལ་ཆེ་ཁག་མདུན་དུ་གུས་རང་མ་ཤི་བར་དུ་ཕ་ཡུལ་འཁོར་བ་རྒྱབ་ཏུ་སྤང་ནས་རྣམ་དཀར་དགེ་བཅུ་དོན་དུ་ལེན་རྒྱུའི་དམ་བཅའ་ཕུལ་བ་བཞིན་དེ་རིང་ནས་འགོ་བཟུང་ཏེ་མི་གསར་པ་ཞིག་བྱེད་རྒྱུའི་དམ་བཅའ་མི་ཚེའི་དྲན་སྐུལ་ཞེས་པ་འདི་བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག་ནས་བྲིས་པའོ།། དགེ་ལེགས་སུ་གྱུར་ཅིག།
༼གཤེན་སྲས་ནོར་བུ་དབང་རྒྱལ་རིན་པོ་ཆེ་དང་སྦྱིན་བདག་ནོར་བུ་དབང་འདུས་སྤུ་ལ་བ་བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག་གསུམ་བླ་སློབ་ལྷན་དུ།༽
༄༅།།ཚན་པ་གཉིས་པ། མི་ཚེའི་ཉམས་མྱོང་ཁ་རི་ཁ་ཐུག་བཞུགས་སྭོ།།
དང་པོ་འཁོར་བའི་སྡུག་བསྔལ་གནས་སུ་སྐྱེས།།
གཉིས་པ་འཁོར་བའི་ཉོན་མོངས་སྣ་ཚོགས་བསགས།།
གསུམ་པ་འཁོར་བར་མི་རྟག་རྒྱུད་ལ་ཤར།།
བཞི་པ་འཁོར་བར་ཞེན་ལོག་རྒྱབ་ཏུ་སྤང་།།
དང་པོ་རྒྱུ་ནོར་ཡོད་དགུ་ཐམས་ཅད་དགའ།།
གཉིས་པ་རྒྱུ་ནོར་བཙལ་རྩོལ་སྣ་ཚོགས་བསགས།།
གསུམ་པ་རྒྱུ་ནོར་མི་རྟག་སེམས་ལ་ཤར།།
བཞི་པ་རྒྱུ་ནོར་ཞེན་ལོག་ཆགས་འཛིན་བྲལ།།
དང་པོ་འཁྲུལ་བས་རྣམ་གཡེང་རྩེད་འཇོ་རོལ།།
གཉིས་པ་འཁྲུལ་བས་བག་ཆགས་སྣ་ཚོགས་བསགས།།
གསུམ་པ་འཁྲུལ་སྣང་རྨི་ལམ་སྒྱུ་མར་གྲོལ།།
བཞི་པ་འཁྲུལ་སྣང་རང་ངོ་རང་གིས་ཤེས།།
དང་པོ་ཉོན་མོངས་དུག་ལྔའི་དབང་དུ་འཁྲུལ།།
གཉིས་པ་ཉོན་མོངས་རང་ཤར་རང་གིས་རྟོགས།།
གསུམ་པ་ཉོན་མོངས་རང་རིག་རང་གྲོལ་ངང་།།
བཞི་པ་ཉོན་མོངས་ཡེ་ཤེས་གྲོགས་སུ་གྱུར།།
ཚེ་སྟོད་མཐོ་དུས་བླ་མིང་མ་གཏོགས་པར།།
དོན་དངོས་མཚན་ཉིད་ཚང་པའི་བླ་སྤྲུལ་མིན།།
ཚེ་སྨད་དམན་སར་ཁེར་རྐྱང་མ་གཏོགས་པར།།
མ་ཡིན་ཡིན་མདོག་བླ་མ་བྱེད་སེམས་མེད།།
ཚེ་སྟོད་བླ་མའི་གྲལ་འཁོད་མ་གཏོགས་པར།།
དོན་དངོས་ཐོབ་ཐང་ཡོད་པའི་བླ་སྤྲུལ་མིན།།
ཚེ་སྨད་ཉམ་ཆུང་རང་གནས་མ་གཏོགས་པར།།
མ་ཡིན་ཡིན་མདོག་གཞན་མགོ་སྐོར་སེམས་མེད།།
ཚེ་སྟོད་བླ་མིང་ང་བོ་མ་གཏོགས་པར།།
དོན་དངོས་མིང་དོན་མཚུངས་པའི་བླ་སྤྲུལ་མིན།།
ཚེ་སྨད་དོན་དམ་ཉམས་ལེན་མ་གཏོགས་པར།།
མ་ཡིན་ཡིན་མདོག་རང་མགོ་འཁོར་སེམས་མེད།།
མི་བུ་ཕལ་པ་དཀྱུས་མ་མ་གཏོགས་པར།།
རིག་རུས་མཆེད་ཁུངས་ཡོད་པའི་བླ་སྤྲུལ་མིན།།
ཁ་རི་ཁ་ཐུག་དྲང་བདེན་མ་གཏོགས་པར།།
མ་ཡིན་ཡིན་མདོག་མང་པོ་དྲན་སེམས་མེད།།
ཁ་རི་ཁ་ཐུག་བསམ་སྦྱོར་མ་གཏོགས་པར།།
འཇིག་རྟེན་འཁོར་བའི་འཆར་གཞི་ང་ལ་མེད།།
ཚེ་དང་དགེ་བ་མཉམ་སྐྱེལ་མ་གཏོགས་པར།།
མི་ཁོམ་འཁོར་བའི་བྱ་བ་ང་ལ་མེད།།
མི་བུ་རིན་ཆེན་རང་ཉིད་མ་གཏོགས་པར།།
ཉོན་མོངས་འཁོར་བའི་གཞི་རྩ་ང་ལ་མེད།།
འཁྱམ་པོ་ཁེར་རྐྱང་གཅིག་པུ་མ་གཏོགས་པར།།
འཁོར་དང་བྲན་གཡོག་མང་པོ་ང་ལ་མེད།།
བསླུ་མེད་སྐྱབས་གནས་དཀོན་མཆོག་མ་གཏོགས་པར།།
གཞན་ཡང་འདི་ཕྱིའི་སྐྱབས་བཅོལ་ང་ལ་མེད།།
བསླུ་མེད་ནོར་བུ་དགེ་སྦྱོར་མ་གཏོགས་པར།།
གཞན་ཡང་རིན་ཆེན་རྒྱུ་ནོར་ང་ལ་མེད།།
བསླུ་མེད་གྲོགས་མཆོག་རང་རིག་མ་གཏོགས་པར།།
གཞན་ཡང་གཏན་གྲོགས་བཟང་པོ་ང་ལ་མེད།།
བསླུ་མེད་མཐར་ཐུག་དོན་དམ་མ་གཏོགས་པར།།
གཞན་ཡང་བསམ་རྒྱུ་དྲན་རྒྱུ་ང་ལ་མེད།།
ལུས་ཀྱི་དགེ་སྦྱོར་སྒྲིབ་སྦྱོང་མ་གཏོགས་པར།།
གཞན་གྱིས་སྡིག་པའི་བྱ་བྱེད་ང་ལ་མེད།།
ངག་གི་དྲང་བདེན་སྐད་ཆ་མ་གཏོགས་པར།།
གཞན་གྱི་ཚིག་རྩུབ་འཁྲུལ་གཏམ་ང་ལ་མེད།།
ཡིད་ལ་བཏང་སྙོམས་གནས་པ་མ་གཏོགས་པར།།
གཞན་གྱི་བག་ཆགས་འཁྲུལ་སྣང་ང་ལ་མེད།།
སངས་རྒྱས་གོང་མའི་རྗེས་བསྙེགས་མ་གཏོགས་པར།།
གཞན་གྱི་བསམ་དྲན་མང་པོ་ང་ལ་མེད།།
མཆོག་གསུམ་གནས་གཞིར་སྐྱབས་འགྲོ་མ་གཏོགས་པར།།
གཞན་ལ་བློ་གཏད་རེ་ལྟོས་ང་ལ་མེད།།
སྒོ་གསུམ་རྩེ་གཅིག་དད་མོས་མ་གཏོགས་པར།།
སྐད་གཅིག་དཀོན་མཆོག་ལོག་ལྟ་ང་ལ་མེད།།
རང་སེམས་རིག་པ་རྐྱང་འདེད་མ་གཏོགས་པར།།
སྤང་བསྒྱུར་ལམ་རིམ་དགོས་པ་ང་ལ་མེད།།
དོན་དམ་བདག་མེད་སྟོང་པ་མ་གཏོགས་པར།།
ཀུན་གཞིའི་ཉོན་མོངས་བག་ཆགས་ང་ལ་མེད།།
རིས་སུ་མ་ཆད་སྙིང་རྗེ་མ་གཏོགས་པར།།
ཁམས་གསུམ་སེམས་ཅན་བདག་ཕྱོགས་ང་ལ་མེད།།
དམིགས་པ་མེད་པའི་བསྔོ་བ་མ་གཏོགས་པར།།
བདག་གཞན་ཁྱད་པར་བསྔོ་སྨོན་ང་ལ་མེད།།
ཅི་དྲན་གང་བྱས་དགེ་སྦྱོར་མ་གཏོགས་པར།།
དོན་མེད་རྣམ་གཡེང་འཁྲུལ་བ་ང་ལ་མེད།།
རྐྱེན་ཆགས་ན་ཚ་དགེ་སྐུལ་མ་གཏོགས་པར།།
སྣང་བ་མ་དག་སྡུག་བསྔལ་ང་ལ་མེད།།
སྣང་བ་སྣ་ཚོགས་རྣམ་དག་མ་གཏོགས་པར།།
སེམས་ལ་དགའ་སྡུག་བསམ་པ་ང་ལ་མེད།།
ཡིད་ལ་དྲན་ཤར་རྟོགས་གྲོལ་མ་གཏོགས་པར།།
བློ་རྟོག་བག་ཆགས་འཁྲུལ་བ་ང་ལ་མེད།།
ཁྱད་པར་འཕགས་པའི་ནོར་བདུན་མ་གཏོགས་པར།།
འཇིག་རྟེན་འཁོར་བའི་རྟེན་གཞི་ང་ལ་མེད།།
དམ་པ་མཉེས་པའི་ནོར་དྲུག་མ་གཏོགས་པར།།
ཉོན་མོངས་འཁོར་བའི་ཡོ་བྱེད་ང་ལ་མེད།།
ནམ་ལང་བྱ་འཕུར་ལྟ་བུ་མ་གཏོགས་པར།།
ཁ་ཕོར་ཙམ་ཞིག་མདུན་འཁྱེར་ང་ལ་མེད།།
རོགས་མེད་རྒྱུ་མེད་ཆགས་མེད་མ་གཏོགས་པར།།
ཁབ་སྐུད་ཙམ་ཞིག་རྒྱབ་ལུས་ང་ལ་མེད།།
ཁ་ཟས་རྒྱབ་གོས་གང་འབྱོར་མ་གཏོགས་པར།།
བཟང་ངན་ཡག་བཙོག་གདམ་ཀ་ང་ལ་མེད།།
རྒྱག་ལྟོགས་ལོང་ག་མཐོ་དམའ་མ་གཏོགས་པར།།
ཟས་ནོར་ཉར་ཚགས་གསོག་འཇོག་ང་ལ་མེད།།
ཆས་དྲུག་ཁ་འདོན་ཕྲེང་བ་མ་གཏོགས་པར།།
གཞན་གྱི་དགོས་མཁོའི་ཡོ་བྱེད་ང་ལ་མེད།།
ཆབ་ཏོག་ཤིག་འབྲེད་བེར་ག་མ་གཏོགས་པར།།
གཞན་གྱི་མཁོ་བའི་ཅ་ལག་ང་ལ་མེད།།
དལ་འབྱོར་སྟོང་ལོག་མ་སོང་མ་གཏོགས་པར།།
གཞན་གྱི་ཐོབ་ཐང་མཚན་སྙན་ང་ལ་མེད།།
རང་ཉམས་འཚམ་ཚོད་ཏན་ཏིག་མ་གཏོགས་པར།།
གཞན་གྱི་འཇོན་ཐང་སྣེ་གཅིག་ང་ལ་མེད།།
སྤྱི་ཚོགས་མཐོང་ཐོས་ཉམས་མྱོང་མ་གཏོགས་པར།།
འཇིག་རྟེན་ཤེས་བྱ་ཡོན་ཏན་ང་ལ་མེད།།
ཡུལ་མི་རེ་བཞིན་ཆ་རྒྱུས་མ་གཏོགས་པར།།
རིམ་བཞིན་མཆོག་དམན་གསལ་བཤད་ང་ལ་མེད།།
རང་ཚུགས་རང་རྐྱ་རང་ཐུབ་མ་གཏོགས་པར།།
ངོ་དགའ་ལྐོག་དཀྲུག་མེད་མཁན་ཧ་ལམ་མེད།།
རང་རྒྱུད་གྱོང་ཁེངས་རང་ཐུལ་མ་གཏོགས་པར།།
བོན་ཅན་ཐ་སྙད་མགོ་འཁོར་སྙིང་པོ་མེད།།
མཐོ་དམའ་དར་རྒུད་མང་པོ་མ་གཏོགས་པར།།
ཁྲིམས་རར་ཉི་མ་གཅིག་ལ་ཚུད་མྱོང་མེད།།
སྐྱིད་སྡུག་མང་པོ་མཐོང་མྱོང་མ་གཏོགས་པར།།
སྤྱི་ཚོགས་སྒྱུ་མར་རང་མགོ་འཁོར་མྱོང་མེད།།
ཐར་པའི་ལམ་བསྟན་རྩ་བླ་མ་གཏོགས་པར།།
མ་རིག་རང་ངོ་སྤྲོད་མཁན་སུ་ཡང་མེད།།
དྲིན་ཅན་རྩ་བའི་བླ་མ་མ་གཏོགས་པར།།
རེ་ས་སྐྱབས་ས་གཞན་ཞིག་སུ་ཡང་མེད།།
སྒོ་གསུམ་གུས་པས་སྐྱབས་གསོལ་མ་གཏོགས་པར།།
དུས་བབ་འཕོ་འགྱུར་ལྟ་བ་ལོག་མྱོང་མེད།།
སྐུ་ཚེའི་ཞབས་བརྟན་གང་འགྲུབ་མ་གཏོགས་པར།།
བླ་སློབ་བར་ལ་དམ་ཚིག་ཉམས་ཆག་མེད།།
བསམ་དཀར་ལྷད་མེད་ཕ་མ་མ་གཏོགས་པར།།
བརྩེ་སེམས་གཅེས་སྤྲས་ཡོད་མཁན་སུ་ཡང་མེད།།
དགའ་སྡུག་ཡོད་མཁན་ཕ་མ་མ་གཏོགས་པར།།
གཞན་སུས་ཤ་ཚ་ཡ་ང་བྱེད་མཁན་མེད།།
ཕ་མའི་ཞབས་ཞུ་གང་འགྲུབ་མ་གཏོགས་པར།།
ཁ་ངན་ཚིག་ངན་སེམས་པ་གསོད་མྱོང་མེད།།
ཕ་མའི་དྲིན་ལན་དགེ་བ་མ་གཏོགས་པར།།
དེ་མིན་ཐབས་ཤེས་ཡོད་དགུའི་འཇལ་ཐབས་མེད།།
སྤུན་ཉེ་ཕར་ལ་དུང་བ་མ་གཏོགས་པར།།
སྤུན་གྲོགས་ཚུར་ལ་བརྩེ་བ་འོས་འཚམས་མེད།།
སྤུན་མཆེད་གཉེན་ཉེ་ཕར་སེམས་མ་གཏོགས་པར།།
མཐོ་བསྟོད་དམའ་སྨད་མེད་པའི་གཉེན་ཉེ་མེད།།
འདི་ཕྱིའི་སློབ་སྟོན་བསམ་དཀར་མ་གཏོགས་པར།།
བློ་ངན་ཇུས་ངན་སེམས་རྩ་དཀྲུག་མྱོང་མེད།།
མིག་ལྟོས་བཟང་པོར་ཡར་ལྟ་མ་གཏོགས་པར།།
ཉེ་འབྲེལ་རྐང་པ་མར་ལ་འཐེན་མྱོང་མེད།།
བཙན་པོ་དབང་ཡོད་གདོང་བཏུགས་མ་གཏོགས་པར།།
མ་རབས་ཁོག་སྒོམ་ལྐོག་ལས་བྱེད་མྱོང་མེད།།
ཡ་རབས་ཚུལ་མཐུན་དྲང་བདེན་མ་གཏོགས་པར།།
ཟེར་ཚད་རྣ་ཉན་ཁ་རྒྱུག་བྱེད་མྱོང་མེད།།
སྤྱི་སེམས་བསམ་དཀར་སེམས་བཟང་མ་གཏོགས་པར།།
སྒེར་སེམས་ཕྱི་མའི་ས་ལམ་དགག་ས་མེད།།
ནུས་ཤུགས་གང་ཡོད་ཕན་ཐོག་མ་གཏོགས་པར།།
སྡེ་དགོན་ཡུལ་གསུམ་གནོད་པ་སྐྱེལ་མྱོང་མེད།།
ཕར་སེམས་སྡེ་དགོན་ལྷག་བསམ་མ་གཏོགས་པར།།
ཚུར་ལ་དབང་ཡོད་ཐུབ་ཚོད་མ་བྱས་མེད།།
ཕ་ཡུལ་སྡེ་དགོན་སྤྱི་ཕན་མ་གཏོགས་པར།།
ཉིན་གཅིག་རང་ཡུལ་ཞབས་འདྲེན་ཞུ་མྱོང་མེད།།
མཐོ་དུས་དམན་ས་བཟུང་བ་མ་གཏོགས་པར།།
རང་འོག་སྙོམས་ཆུང་སུ་ལ་སྡང་མྱོང་མེད།།
དམའ་དུས་སྣང་བ་མགོ་མཐོ་མ་གཏོགས་པར།།
མགོ་ཚུགས་ལུས་ཚུགས་ཉིན་གཅིག་ཤོར་མྱོང་མེད།།
སྔོན་ལས་འཕྲལ་རྐྱེན་བར་ཆད་མ་གཏོགས་པར།།
ཡོན་བདག་རྒྱུ་ནོར་ཆུད་གཟོན་བཏང་མྱོང་མེད།།
དཀའ་ངལ་ཚད་མེད་རང་ཁུར་མ་གཏོགས་པར།།
རྐྱེན་རྩ་གཏད་མེད་ཐ་ཆད་སྨད་མྱོང་མེད།།
དཀོར་ཟས་བསྟན་བཞགས་མཆོད་སྦྱིན་མ་གཏོགས་པར།།
ཁྲེལ་མེད་བག་མེད་ལོངས་སྤྱོད་བྱེད་མྱོང་མེད།།
སྐབས་སྟུན་སྤྱོད་ཚུལ་མཆོག་དམན་མ་གཏོགས་པར།།
རང་སེམས་དོན་དམ་ཉིན་གཅིག་འབོར་མྱོང་མེད།།
དཀོན་མཆོག་མཆོད་པ་ལྷད་མེད་མ་གཏོགས་པར།།
ང་རྒྱལ་སྙན་གྲགས་དགེ་ཚོགས་བསགས་མྱོང་མེད།།
རིགས་དྲུག་སྦྱིན་པ་ཕངས་མེད་མ་གཏོགས་པར།།
སེར་སྣ་འཇུར་གེགས་སྦྱིན་པ་གཏོང་མྱོང་མེད།།
སེམས་ཉིད་དམར་ཐག་ཆོད་པ་མ་གཏོགས་པར།།
རྨོངས་པའི་རྣམ་རྟོག་འཛིན་པ་བཅིངས་མྱོང་མེད།།
དྲང་བདེན་ཁུང་ཡོད་ལུང་ཡོད་མ་གཏོགས་པར།།
མ་རྟོགས་དཀོན་མཆོག་སྐུར་པ་འདེབས་མྱོང་མེད།།
འབྲེལ་ཚད་ལོག་ལྟ་མ་སྐྱེ་མ་གཏོགས་པར།།
ཁ་ལག་འབྲེལ་ཚད་འགོ་སྐོར་བཏང་མྱོང་མེད།།
གཡོ་རྫུན་འུར་ཤོབ་མ་ཡིན་མ་གཏོག་པར།།
ལན་ཆགས་དྲི་མ་མ་དག་གོས་མྱོང་མེད།།
མི་ཚེ་གང་ནུས་གཞན་དོན་མ་གཏོགས་པར།།
རང་དོན་རང་ཉམས་རིག་གནས་སྦྱོང་མྱོང་མེད།།
ཉམས་ཆུང་ནུས་མེད་རོགས་སྐྱོར་མ་གཏོགས་པར།།
ཉམས་ཆེན་དབང་ཡོད་རྒྱུ་ངོ་བསྟོད་མྱོང་མེད།།
ནུས་ཤུགས་ཡོད་རྒུའི་བསྟན་དོན་མ་གཏོགས་པར།།
བདག་དོན་ཟ་ཉལ་ཁོ་ན་བསམ་མྱོང་མེད།།
སེམས་སྐྱེད་སྐུ་རིམ་ཞབས་བརྟན་མ་གཏོགས་པར།།
བསྟན་འཛིན་གར་བཞུགས་སྐྱེས་མཆོག་བརྗེད་མྱོང་མེད།།
ཕ་ཡུལ་ཆགས་སྡང་སྤང་གཡོལ་མ་གཏོགས་པར།།
རང་ཡུལ་རྒྱབ་གཏོད་ཞེ་ལ་བསམ་མྱོང་མེད།།
བཟང་པོ་རང་བསྟོད་མ་ཡིན་མ་གཏོགས་པར།།
ངན་པ་ཡུལ་ལ་མ་ཆགས་བྲོས་མྱོང་མེད།།
བློ་ཕུགས་དགོན་གནས་རི་ཁྲོད་མ་གཏོགས་པར།།
གྲོང་དཀྱིལ་ན་ཤི་དུར་ས་བསམ་མྱོང་མེད།།
བསམ་བཟང་སྦྱིན་བདག་གསོས་དྲིན་མ་གཏོགས་པར།།
ཉིན་ཟས་ཙམ་ཞིག་རང་ལ་འཁྱེར་རྒྱུ་མེད།།
སྐྱིད་དུས་མཉམ་ཟ་མཉམ་འགྲོ་མ་གཏོགས་པར།།
སྡུག་དུས་དཀའ་སྡུག་མཉམ་མྱོང་བྱེད་མཁན་མེད།།
ཚུར་ལ་རེ་དུས་དགའ་ཉམས་མ་གཏོགས་པར།།
ཕར་ལ་རེ་དུས་ཁྲོ་ཉམས་མེད་མཁན་མེད།།
རང་ཆེ་རང་རྒྱལ་རང་བསྟོད་མ་གཏོགས་པར།།
རང་དཔེ་གཞན་ལེན་བསམ་གཞིག་བྱེད་མཁན་མེད།།
རང་ཕྱོགས་འུར་བསྟོད་ཡར་མཐོ་མ་གཏོགས་པར།།
གཞན་ཕྱོགས་ལྐོག་བཤད་དམའ་འབེབས་མེད་མཁན་མེད།།
རང་ཕྱོགས་སྐྱོན་རྣམས་སྦས་གསང་མ་གཏོགས་པར།།
གཞན་ཕྱོགས་སྐྱོན་བརྗོད་དབྱེན་སྦྱོར་མེད་མཁན་མེད།།
རང་ཕྱོགས་མ་ཡིན་ཡིན་ཚུལ་མ་གཏོགས་པར།།
གཞན་ཕྱོགས་མ་འདོད་རྣམ་འགྱུར་མེད་མཁན་མེད།།
ཁ་རི་ཁ་ཐུག་གསལ་བཤད་མ་གཏོགས་པར།།
སྙན་ངག་མངོན་བརྗོད་གབ་ཚིག་ངས་མ་ཤེས།།
ཁ་གསལ་གཏིང་གསལ་དྲང་གཏམ་མ་གཏོགསས་པར།།
གོ་བ་མེད་པའི་བརྡ་ཚིག་ངས་མ་ཤེས།།
གཞན་གྱིས་དགེ་མཚན་གསང་བ་མ་གཏོགས་པར།།
སྐྱོན་བརྗོད་སྐུར་འདེབས་ཁ་སྣོན་མེད་མཁན་མེད།།
རང་གི་དགེ་ལ་རང་བསྟོད་མ་གཏོགས་པར།།
ཉེས་སྐྱོན་གང་ཡོད་གསང་བ་མེད་མཁན་མེད།།
མཐོ་དུས་ཀུན་གྱིས་ངོ་བསྟོད་མ་གཏོགས་པར།།
དམའ་དུས་ཀུན་གྱིས་དགའ་མཁན་ཧ་ལམ་མེད།།
རྒྱུ་ངོ་ཡར་གདན་མར་གདན་མ་གཏོགས་པར།།
རྒྱུ་མེད་སྒོ་ནས་འབོད་དུས་ཨ་ལེན་མེད།།
རྒྱུ་དབང་ཡོད་དུས་ཀུན་གྲོགས་མ་གཏོགས་པར།།
རྒྱུ་དབང་མེད་དུས་གཏན་གྲོགས་སུ་ཞིག་མེད།།
རྒྱུ་དབང་ཡོད་དུས་གུས་བཀུར་མ་གཏོགས་པར།།
རྒྱུ་དབང་མེད་དུས་ཉེ་གྲོགས་མཐོང་འདོད་མེད།།
གནས་ལུགས་སྟོང་གསལ་ཟུང་འཇུག་མ་གཏོགས་པར།།
ཉོན་མོངས་བརྒྱད་ཁྲི་བཞི་སྟོང་གཞན་ཞིག་མེད།།
གཏད་མེད་རིག་པ་སྟོང་གཟུགས་མ་གཏོགས་པར།།
བྱིང་རྨུགས་འཕྲོ་རྒོད་སྣང་སེམས་གཞན་ཞིག་མེད།།
ཉོན་མོངས་དུག་ལྔ་ཡེ་ལྔ་མ་གཏོགས་པར།།
དུག་ལྔ་ཡེ་ལྔ་སོ་སོར་སྤང་ལེན་མེད།།
སངས་རྒྱས་སེམས་ཅན་གྲོལ་འཁྲུལ་མ་གཏོགས་པར།།
དང་པོ་སངས་རྒྱས་སེམས་ཅན་གཉིས་སུ་མེད།།
ལྟ་བ་གཅིག་ཆོད་བདག་པོ་མ་གཏོགས་པར།།
མ་རྟོགས་སེམས་ལ་རྣ་ལམ་འགྲོ་མཁན་མེད།།
རིག་པ་གཅེར་མཐོང་བདག་ཉིད་མ་གཏོགས་པར།།
སྐལ་མེད་སེམས་ཅན་གོ་བརྡ་འཕྲོད་མཁན་མེད།།
ཉོན་མོངས་དུག་ལྔ་དགེ་སྐུལ་མ་གཏོགས་པར།།
མི་དགེ་སྡིག་བཅུ་དགེ་བཅུའི་གྲོགས་སུ་གྱུར།།
རྐྱེན་ངན་བར་ཆད་གྲོགས་ཤར་མ་གཏོགས་པར།།
འགལ་རྐྱེན་ཐམས་ཅད་མཐུན་རྐྱེན་གྲོགས་སུ་གྱུར།།
ཁ་རི་ཁ་ཐུག་གསལ་བཤད་མ་གཏོགས་པར།།
སྙན་ངག་མངོན་བརྗོད་གབ་ཚིག་ངས་མ་ཤེས།།
ཁ་གསལ་གཏིང་གསལ་དྲང་གཏམ་མ་གཏོགསས་པར།།
གོ་བ་མེད་པའི་བརྡ་ཚིག་ངས་མ་ཤེས།།
རྒྱལ་གཅེས་ཁྲིམས་སྲུང་བརྟན་པོ་མ་གཏོགས་པར།།
མི་ངན་མཉམ་རྒྱུག་ཁྲིམས་འགལ་ངས་མ་ཤེས།།
སྦྱིན་བདག་གནང་བའི་ཟས་གོས་མ་གཏོགས་པར།།
རྒྱལ་དམངས་དཔལ་འབྱོར་གཡོ་ལེན་ངས་མ་ཤེས།།
ཐེག་ཆེན་མདོ་སྔགས་ཟུང་འབྲེལ་མ་གཏོགས་པར།།
ཡུལ་ཆོས་མི་འདྲ་མང་པོ་ངས་མ་ཤེས།།
རང་རྐྱ་རང་ཐུབ་རང་ལུགས་མ་གཏོགས་པར།།
གྲུབ་མཐའ་གསར་རྙིང་སྒྲོ་འདོགས་ངས་མ་ཤེས།།
འཚམ་ཚོད་རང་ཚོད་རང་བཟུང་མ་གཏོགས་པར།།
མི་ཚེ་སྟོང་ཟད་ཆུད་གཟོན་ངས་མ་ཤེས།།
རང་ཚོད་ཏིག་པོས་རང་བཟུང་མ་གཏོགས་པར།།
གདིང་ཚོད་མེད་པའི་ཡ་ཡུག་ངས་མ་ཤེས།།
རྣ་བས་ཐོས་ཚད་བཏང་སྙོམས་མ་གཏོགས་པར།།
གོ་ཚད་ཉན་བཤད་འཆལ་གཏམ་ངས་མ་ཤེས།།
མིག་ལམ་མཐོང་ཚད་འཛིན་མེད་མ་གཏོགས་པར།།
རིག་ཚད་མཉམ་འགྲོགས་་ཡིད་གཏད་ངས་མ་ཤེས།།
གཞན་ཕན་ལྷག་བསམ་རྣམ་དག་མ་གཏོགས་པར།།
སེམས་ཅན་གནོད་སེམས་འཚེ་བ་ངས་མ་ཤེས།།
བསམ་སྦྱོར་བཟང་པོ་ཡར་ལྟོས་མ་གཏོགས་པར།།
བསམ་ངན་ཁོག་ནག་མ་རབས་ངས་མ་ཤེས།།
དམ་པའི་ལྷ་ཆོས་དགེ་བསྐུར་མ་གཏོགས་པ།།
མི་ཆོས་ཁ་ཏ་བསླབ་བྱ་ངས་མ་ཤེས།།
རང་དཔེ་རང་ལེན་དྲང་བདེན་མ་གཏོགས་པ།།
རང་ཁེ་གཞན་ཕམ་བྱ་བ་ངས་མ་ཤེས།།
ཐེ་ཚོམ་རེ་དོག་མེད་པ་མ་གཏོགས་པར།།
ལེགས་ཉེས་དབྱེ་འབྱེད་བླང་དོར་ངས་མ་ཤེས།།
མཆོག་དམན་ཁྱད་པར་མེད་པ་མ་གཏོགས་པར།།
བཟང་ངན་ཡག་བཙོག་བསམ་པ་ངས་མ་ཤེས།།
ཉམས་མྱོང་བྱང་ཚད་ཤེས་བྱ་མ་གཏོགས་པར།།
ད་ལྟའི་རིག་གནས་ཚན་རིག་ངས་མ་ཤེས།།
ཕྱི་མར་གར་འགྲོ་གདེང་ཚོད་མ་གཏོགས་པར།།
འཁོར་འདས་ཐ་སྙད་མཚན་ཉིད་ངས་མ་ཤེས།།
མེས་པོའི་སྲོལ་བཟང་དྭངས་མ་མ་གཏོགས་པར།།
དེང་རབས་ཨ་གསར་ཆས་སྒྱུར་ངས་མ་ཤེས།།
མེས་པོའི་ཁ་ཟས་གཙང་མ་མ་གཏོགས་པར།།
དེང་རབས་ཟས་རིགས་སྦྱོར་སྡེབ་ངས་མཤེས།།
མེས་པོའི་སྐད་ཡིག་གཙང་མ་མ་གཏོགས་པར།།
དེང་དུས་སྐད་ཡིག་སྣ་ཚོགས་ངས་མ་ཤེས།།
མེས་པོའི་དགེ་བྱེད་འདུག་སྟངས་མ་གཏོགས་པར།།
དེང་དུས་མི་ཚོགས་མཉམ་རྒྱུག་ངས་མ་ཤེས།།
ཕྱི་མའི་དོན་ཆེན་སྒྲུབ་པ་མ་གཏོགས་པར།།
འདི་ཕྱི་གཉིས་དོན་མཉམ་སྒྲུབ་ངས་མ་ཤེས།།
ལྷ་ཆོས་རྣམ་དཀར་དགེ་བཅུ་མ་གཏོགས་པར།།
མི་ཆོས་ལྷ་ཆོས་གཉིས་བདེན་ངས་མ་ཤེས།།
རྩ་བའི་དམ་པ་རྣམ་གསུམ་མ་གཏོགས་པར།།
སྔོན་འགྲོ་དངོས་གཞི་མང་པོ་ངས་མ་ཤེས།།
ལས་དང་རྒྱུ་འབྲས་གཞིར་བཟུང་མ་གཏོགས་པར།།
དགེ་སྡིག་སྤང་ལེན་མང་པོ་ངས་མ་ཤེས།།
འདུལ་ཁྲིམས་དྲི་མེད་རྣམ་དག་མ་གཏོགས་པར།།
ཕྱི་ཚུལ་ནང་ཁྲིམས་མང་པོ་ངས་མ་ཤེས།།
ཕྱི་སྟོང་ནང་སྟོང་དོན་སྟོང་མ་གཏོགས་པར།།
ཕར་ཕྱིན་ས་ལམ་མང་པོ་ངས་མ་ཤེས།།
སྟོང་ཉིད་སྙིང་རྗེ་ཟུང་འབྲེལ་མ་གཏོགས་པར།།
གསང་སྔགས་ལམ་རིམ་མང་པོ་ངས་མ་ཤེས།།
ཏིང་འཛིན་མཉམ་བཞགས་བཏང་སྙོམས་མ་གཏོགས་པར།།
བསྐྱེད་རྫོགས་སྒོམ་སྒྲུབ་མང་པོ་ངས་མ་ཤེས།།
ལྟ་མེད་སྒོམ་མེད་ཡེངས་མེད་མ་གཏོགས་པར།།
བཅས་བཅོས་སྤྲོས་བསྡུ་དགག་སྒྲུབ་ངས་མ་ཤེས།།
སྣང་ཤར་རྟོགས་གྲོལ་དུས་མཉམ་མ་གཏོགས་པར།།
སྐྱེ་འགག་རྟག་ཆད་འགྲོ་འོང་ངས་མ་ཤེས།།
འཁོར་འདས་དབྱེར་མེད་མཉམ་ཉིད་མ་གཏོགས་པར།།
མཚན་ཉིད་རྣམ་དབྱེ་མང་པོ་ངས་མ་ཤེས།།
མཐར་ཐུག་ཡང་རྩེ་བླ་མེད་མ་གཏོགས་པར།།
ཕྱི་ནང་ཐིག་རིམ་མང་པོ་ངས་མ་ཤེས།།
ཟ་ཉལ་འགྲོ་འདུག་གཤིས་གོམས་མ་གཏོགས་པར།།
དུས་ཚོད་ཚད་བཟུང་ཉམས་ལེན་ངས་མ་ཤེས།།
སྤྱོད་ལམ་སྣ་ཚོགས་དོན་དམ་མ་གཏོགས་པར།།
ལེགས་ཉེས་དབྱེ་འབྱེད་ཉམས་ལེན་ངས་མ་ཤེས།།
མཉམ་བཞག་ནམ་མཁའ་ལྟ་བུ་མ་གཏོགས་པར།།
རྩད་གཅོད་ཞིབ་འཇུག་ཉམས་ལེན་ངས་མ་ཤེས།།
གཡོ་མེད་གོམས་པ་ཀློང་གྱུར་མ་གཏོགས་པར།།
རྟོག་དཔྱོད་བརྟག་དཔྱད་ཉམས་ལེན་ངས་མ་ཤེས།།
རང་སེམས་རིག་པ་རྐྱང་འདེད་མ་གཏོགས་པར།།
ཁ་ཉམས་བློ་བསྡུར་ཉམས་ལེན་ངས་མ་ཤེས།།
རང་རིག་ལྟ་བ་གཅིག་ཆོད་མ་གཏོགས་པར།།
དཔེ་ལྟ་ཚིག་འགྲེལ་ཉམས་ལེན་ངས་མ་ཤེས།།
སེམས་ཉིད་སྟོང་ཉིད་ངང་ཉིད་མ་གཏོགས་པར།།
བློ་བཅོས་རྟོག་བཟོ་ཉམས་ལེན་ངས་མ་ཤེས།།
རང་རིག་རང་ཤར་རང་གྲོལ་མ་གཏོགས་པར།།
ནམ་འཆར་བསམ་སྒུག་ཉམས་ལེན་ངས་མ་ཤེས།།
ཇི་ལྟ་ཇི་མ་ཇི་བཞིན་མ་གཏོགས་པར།།
ལྟ་བྱ་ལྟ་བྱེད་ཉམས་ལེན་ངས་མ་ཤེས།།
ངང་མ་ངང་བཞིན་ངང་ཉིད་མ་གཏོགས་པར།།
སྒོམ་བྱ་སྒོམ་བྱེད་ཉམས་ལེན་ངས་མ་ཤེས།།
གང་དྲན་གང་ཤར་གང་སྣང་མ་གཏོགས་པར།།
སྤྱོད་བྱ་སྤྱོད་བྱེད་ཉམས་ལེན་ངས་མ་ཤེས།།
མ་བཅོས་གནས་ལུགས་རང་བབ་མ་གཏོགས་པར།།
རྟོགས་དགའ་འཁྲུལ་སྡུག་ཉམས་ལེན་ངས་མ་ཤེས།།
ལྟ་མེད་ནམ་མཁའ་ལྟ་བུ་མ་གཏོགས་པར།།
མཐའ་དབུས་ཕྱོགས་མཚམས་ཡོད་པ་ངས་མ་ཤེས།།
སྒོམ་མེད་ཉི་མ་ལྟ་བུ་མ་གཏོགས་པར།།
ཕྱི་ནང་གསལ་སྒྲིབ་ཡོད་པ་ངས་མ་ཤེས།།
སྤྱོད་མེད་་རི་རྒྱལ་ལྟ་བུ་མ་གཏོགས་པར།།
གཡོ་འགུལ་འགྲོ་རྒྱུག་ཡོད་པ་ངས་མ་ཤེས།།
འགག་མེད་ཆུ་བོའི་རྒྱུན་བཞིན་མ་གཏོགས་པར།།
སྟོང་གསལ་སྐྱེ་འགག་ཡོད་པ་ངས་མ་ཤེས།།
འབྱུང་ཁམས་དཔེ་འདྲ་བཞག་པ་མ་གཏོགས་པར།།
དངོས་སུ་དངོས་པོ་གྲུབ་པ་ངས་མ་ཤེས།།
ནམ་མཁའ་གཡའ་དག་ལྟ་བུ་མ་གཏོགས་པར།།
སྟོང་ཉིད་འཕོ་འགྱུར་ཡོད་པ་ངས་མ་ཤེས།།
མ་རྟོགས་གཉིས་འཛིན་རྣམ་རྟོག་མ་གཏོགས་པར།།
དགྲ་བདུད་བགེགས་རིགས་གཞན་ཞིག་ངས་མ་ཤེས།།
མ་རིག་འཁོར་བ་འཁྱམ་པ་མ་གཏོགས་པར།།
ཁམས་གསུམ་རིགས་དྲུག་གཞན་ཞིག་ངས་མ་ཤེས།།
ཡེ་གྲོལ་དྲི་མེད་ཀུན་བཟང་མ་གཏོགས་པར།།
དག་པའི་སངས་རྒྱས་གཞན་ཞིག་ངས་མ་ཤེས།།
རང་སེམས་སྐུ་གསུམ་སངས་རྒྱས་མ་གཏོགས་པར།།
སངས་རྒྱས་ཟེར་བ་གཞན་ཞིག་ངས་མ་ཤེས།།
རྟོག་མེད་རྣམ་དག་དྲི་བྲལ་མ་གཏོགས་པར།།
ཉོན་མོངས་ཤེས་བྱའི་སྒྲིབ་པ་ངས་མ་ཤེས།།
རང་རྒྱུད་གཞན་ཕན་དོན་གཉེར་མ་གཏོགས་པར།།
བདག་དོན་གཞན་དོན་མང་པོ་ངས་མ་ཤེས།།
རང་སེམས་སྐུ་གསུམ་བདག་ཉིད་མ་གཏོགས་པར།།
སངས་རྒྱས་ཟེར་བ་གཞན་ཞིག་ངས་མ་ཤེས།།
སྟོང་གསལ་དབྱེར་མེད་ཉག་གཅིག་མ་གཏོགས་པར།།
བརྒྱད་ཁྲི་བཞི་སྟོང་རྣམ་དབྱེ་ངས་མ་ཤེས་།།
སྟོང་ཉིད་ལྟ་བ་གཅིག་ཆོད་མ་གཏོགས་པར།།
ཕྱི་ནང་གསང་གསུམ་རྣམ་གཞག་ངས་མ་ཤེས།།
རང་བྱུང་རིག་པ་གཅེར་མཐོང་མ་གཏོགས་པར།།
སྒོ་བཞི་མཛོད་ལྔའི་ཐེག་རིམ་ངས་མ་ཤེས།།
ཉོན་མོངས་དུག་ལྔ་ཡེ་ལྔ་མ་གཏོགས་པར།།
དུག་དང་ཡེ་ཤེས་སྤང་ལེན་ངས་མ་ཤེས།།
ལྷ་འདྲེ་གཉིས་མེད་རང་སེམས་མ་གཏོགས་པར།།
ལྷ་འདྲེ་རེ་དོག་གཉིས་འཛིན་ངས་མ་ཤེས།།
ཡེ་སྟོང་རྩ་བྲལ་ཟང་ཐལ་མ་གཏོགས་པར།།
སྣང་སྲིད་ཕྱི་ནང་འཁོར་འདས་ངས་མ་ཤེས།།
གཞི་མེད་ཀ་དག་དྲི་བྲལ་མ་གཏོགས་པར།།
བྱིང་རྨུགས་འཕྲོ་རྒོད་གོལ་སར་ངས་མ་ཤེས།།
སྣང་བ་རྨི་ལམ་སྒྱུ་མར་མ་གཏོགས་པར།།
སྣང་བ་སྣ་ཚོགས་བདེན་འཛིན་ངས་མ་ཤེས་།།
རྣམ་རྟོག་བག་ཆགས་འཁྲུལ་བ་མ་གཏོགས་པར།།
བག་ཆགས་འཁྲུལ་སྣང་བདེན་འཛིན་ངས་མ་ཤེས་།།
བོན་ཅན་བོན་ཉིད་སྟོང་པ་མ་གཏོགས་པར།།
ཡུལ་དང་ཡུལ་ཅན་གཉིས་སུ་ངས་མ་ཤེས།།
ཆགས་མེད་ཞེན་མེད་འཛིན་མེད་མ་གཏོགས་པར།།
རྣམ་རྟོག་འཁྲུལ་བའི་གཟུང་འཛིན་ངས་མ་ཤེས།།
གཞི་གནས་རང་བྱུང་ཡེ་ཤེས་མ་གཏོགས་པར།།
ཀ་དག་ཁྲིག་ཆོད་གཞན་ཞིག་ངས་མ་ཤེས།།
དབྱིངས་རིག་འདུ་འབྲལ་མེད་པ་མ་གཏོགས་པར།།
ལྷུན་གྲུབ་ཐོད་རྒལ་གཞན་ཞིག་ངས་མ་ཤེས།།
རྟེན་མེད་གཏད་མེད་ཧ་རེ་མ་གཏོགས་པར།།
རྟེན་གཞི་གཏད་སོ་ཡོད་པ་ངས་མ་ཤེས།།
གཞི་མེད་དངོས་མེད་ས་ལེ་མ་གཏོགས་པར།།
གཞི་རྩ་དངོས་པོ་ཡོད་པ་ངས་མ་ཤེས།།
རྟོགས་དང་མ་རྟོགས་ཁྱད་པར་མ་གཏོགས་པར།།
སངས་རྒྱས་སེམས་ཅན་གཉིས་སུ་ངས་མ་ཤེས།།
གྲོལ་འཁྲུལ་གཉིས་ཀྱི་ཁྱད་པར་མ་གཏོགས་པར།།
གཞི་ལ་འཁོར་འདས་གཉིས་སུ་ངས་མ་ཤེས།།
སེམས་ཉིད་རྫོགས་པ་ཆེན་པོ་མ་གཏོགས་པར།།
འཁོར་འདས་རྫོགས་རིམ་གཞན་ཞིག་ངས་མ་ཤེས།།
གསལ་སྟོང་ཐེག་ལེ་ཉག་གཅིག་མ་གཏོགས་པར།།
ཀུན་ཏུ་བཟང་པོ་གཞན་ཞིག་ངས་མ་ཤེས།།
སེམས་ཉིད་སྟོང་ཉིད་ངང་ཉིད་མ་གཏོགས་པར།།
དབྱིངས་ཉིད་ཡངས་དོག་ཡོད་པ་ངས་མ་ཤེས།།
རང་བྱུང་རང་བཞིན་རང་གསལ་མ་གཏོགས་པར།།
རང་རིག་གསལ་སྒྲིབ་ཡོད་པ་ངས་མ་ཤེས།།
དབྱིངས་ཆེན་འབྱམས་ཡས་སྤྲོས་བྲལ་མ་གཏོགས་པར།།
ཕྱི་ནང་བར་མཚམས་ཡོད་པ་ངས་མ་ཤེས།།
རང་རིག་ཡེ་ཤེས་རང་གསལ་མ་གཏོགས་པར།།
གསལ་སྒྲིབ་འཆར་འགྲིབ་ཡོད་པ་ངས་མ་ཤེས།།
ཉོན་མོངས་དུག་ལྔ་ཡེ་ཤེས་མ་གཏོགས་པར།།
ཉོན་མོངས་གང་ཤར་ཡེ་ཤེས་རང་ངོ་ཤེས།།
རོལ་རྩལ་སྣ་ཚོགས་རིག་རྩལ་མ་གཏོགས་པར།།
རོལ་རྩལ་ཤར་བཞིན་རིག་པའི་རང་མདང་དྭངས།།
རང་སྣང་གང་ཤར་རང་སེམས་སྟོང་པ་ལ།།
སྣང་བ་སྣ་ཚོགས་གང་ཤར་རྗེས་འཛིན་མེད།།
རྣམ་རྟོག་དྲི་མེད་རང་རིག་རང་གསལ་ལ།།
བློ་རྟོག་སྣ་ཚོགས་བག་ཆགས་གཞི་རྩ་མེད།།
ཐུགས་ཉིད་སྤྲོས་བྲལ་ནམ་མཁའ་ལྟ་བུ་ལ།།
སེམས་དང་སེམས་བྱུང་ངོ་བོ་གཉིས་སུ་མེད།།
རིག་པའི་རྩལ་ཤར་རང་བྱུང་ལྷུན་གྲུབ་ལ།།
ཡུལ་དང་ཡུལ་ཅན་བསམ་ཡུལ་གཉིས་སུ་མེད།།
གནས་ལུགས་དོན་དམ་སྟོང་ཉིད་བདག་པོ་ལ།།
ནོར་སྐྱོན་གོལ་བའི་འཁྲུལ་ལྷད་ཞུགས་ས་མེད།།
སེམས་རིག་དབྱེར་མེད་རིག་སྟོང་ཟང་ཐལ་ལ།།
ཉོན་མོངས་དུག་ལྔའི་སྡིག་ལྷད་ཞུགས་ས་མེད།།
ཀ་དག་དྲི་མེད་རང་བྱུང་ཡེ་ཤེས་ལ།།
མ་རིག་བག་ཆགས་དྲི་མ་གོས་ས་མེད།།
གསལ་སྟོང་ཟུང་འཇུག་ཐིག་ལེ་ཉག་གཅིག་ལ།།
སྐྱོན་ཡོན་གྲོལ་འཁྲུལ་བཟང་ངན་རྩ་བ་མེད།།
རྩོལ་བྲལ་འབད་མེད་ལྷུན་གྱིས་གྲུབ་པ་ལ།།
བརྩལ་བའི་སྙིང་པོ་གང་ཡང་རྙེད་རྒྱུ་མེད།།
ལྟས་པས་མ་མཐོང་བཙལ་བས་མ་རྙེད་ལ།།
མ་བསམ་རང་བབ་གཏད་མེད་ཧར་གྱིས་མཐོང་།།
ཇི་བཞིན་ལྟ་བའི་རང་ཚུགས་ཐུབ་པ་ལ།།
དགེ་སྡིག་དཀར་ནག་ས་བོན་འཇོག་ས་མེད།།
ནམ་མཁའ་སྟོང་པ་གཟུགས་རིས་མི་ཆགས་བཞིན།།
ཉི་མའི་འོད་ལམ་མུན་པ་མི་འཐིབ་འདྲ།།
འདྲིས་ཆེན་རང་སེམས་རང་ངོ་ཤེས་མཁན་མེད།
ཐག་ཉེ་རང་སེམས་རང་ངོ་རིག་མཁན་མེད།།
ཤེས་ཤེས་གསལ་གསལ་རང་ངོ་ཤེས་མཁན་མེད།།
རིག་རིག་ཤེས་ཤེས་རང་ངོ་རིག་མཁན་མེད།།
འདྲིས་ཆེན་མ་ཤེས་རང་སེམས་མ་ཤེས་འཁྲུལ།།
ཐག་ཉེ་མ་རིག་རང་སེམས་མ་རིག་འཁྲུལ།།
ཤེས་ཤེས་གསལ་གསལ་མ་ཤེས་འཁོར་བར་འཁྲུལ།།
རིག་རིག་ཤེས་ཤེས་མ་རིག་ཉོན་མོངས་འཁྲུལ།།
གནས་ལུགས་དོན་དམ་རིག་སྟོང་ཟང་ཐལ་འདི།།
རིག་གནས་ཚན་རིག་སུ་མཁས་ཤེས་མཁན་མེད།།
མ་རྟོགས་སེམས་ཅན་སྣང་ཡུལ་བློ་ཡུལ་མེད།།
རྟོགས་པའི་རྣལ་འབྱོར་ཉམས་ལ་གསལ་སྒྲིབ་མེད།།
སྲིད་གསུམ་འཁོར་འདས་དབྱེར་མེད་དོན་རྟོགས་ནས།།
ཁམས་གསུམ་རིགས་དྲུག་རང་སེམས་དོན་རྟོགས་ཤོག།
སྟོང་གསུམ་འཇིག་རྟེན་འཁོར་བའི་གནས་སྟོང་ནས།།
སྐུ་གསུམ་སངས་རྒྱས་རྒྱལ་སར་འཁོད་པར་ཤོག །
༈ ཅེས་པ་འདི་ནི་མི་ཚེའི་ལམ་བུ་ཉམས་མྱོང་ཁ་རི་ཁ་ཐུག་ཞེས་པ་སྤུ་ལ་བ་བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག་ནས་བྲིས་པའོ།། །།བཀྲ་ཤིས་ལེགས་སོ།།
༼རྩོམ་པ་པོ། བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག༽
༄༅།།ཚན་པ་གསུམ་པ། ལྟ་སྒོམ་སྤྱོད་གསུམ་མ་བཅོས་ཀ་དག་རང་རིག་ཀ་ལིའིགླུ་ཆུང་བཞུགས་སྭོ།།
ལྟ་བ་ལྟ་མེད་སྟོང་པའི་རང་ཞལ་མཇལ།།
མཇལ་བཞིན་སྟོང་པས་སྟོང་པའི་རང་ངོ་ཤེས།།
ཤེས་བཞིན་སྟོང་པའི་རང་ཞལ་ཉམས་སུ་ལྟ།།
ལྟ་ཡུལ་ལྟ་མཁན་གཉིས་མེད་སྟོང་གསལ་ངང་།།
སྒོམ་པ་ཡེངས་མེད་རང་རིག་རང་གསལ་རང་།།
རང་གསལ་རིག་པ་རང་ཤར་རང་ངོ་ཤེས།།
ཤེས་བཞིན་རང་གསལ་རང་ཞལ་ཉམས་སུ་སྒོམ།།
སྒོམ་ཡུལ་སྒོམ་མཁན་གཉིས་མེད་གསལ་སྟོང་ངང་།།
སྤྱོད་པ་འཆལ་མེད་དགག་སྒྲུབ་མེད་པའི་སྩལ།།
སྩལ་ཤར་སྟོང་གསལ་གཉིས་མེད་རང་ངོ་ཤེས།།
ཤེས་བཞིན་སྩལ་ཤར་རང་ཞལ་ཉམས་སུ་སྤྱོད།།
སྤྱོད་ཡུལ་སྤྱོད་མཁན་གཉིས་མེད་གཉུག་མའི་ངང་།།
ཀ་དག་གཉུག་མའིརང་ཞལ་ཨེ་མ་རྨད།།
ཁ་དོག་དངོས་མེད་རང་བཞིན་ལྷུན་གྱིས་གྲུབ།།
ག་དུས་ཤར་གྲོལ་དུས་མཉམ་ངང་ལ་གནས།།
ང་བདག་འཛིན་མེད་རང་ཤར་རང་གྲོལ་དུ།།
ཅ་ཟིང་འཁྲུལ་མེད་གང་སྣང་གང་ཤར་ཀུན།།
ཆ་ཡོད་བཞིན་དུ་སྟོང་རིག་མ་བུ་འཕྲད།།
ཇ་ཆུ་དཔེ་བཞིན་སྟོང་གསལ་དབྱེར་མེད་དུ།།
ཉ་གང་དུང་ཟླ་ཆུ་ཤར་གཟུགས་བཞིན་དྭངས།།
ཏ་ལེར་རིག་སྟོང་ཟང་ཐལ་ཧ་རེར་གསལ།།
ཐ་གྲུ་སྟེང་འོག་ཕྱོགས་མཚམས་ཕྱི་ནང་མེད།།
ད་ལྟ་རང་སེམས་ནམ་མཁར་གཡའ་དག་བཞིན།།
ན་བུན་ལྟ་བུའི་མ་རིག་མུན་པ་སངས།།
པ་ཏྲ་ལྟ་བུའི་གཟུགས་རིས་མཚན་གཞི་མེད།།
ཕ་མཐའ་མེད་པ་ནམ་མཁའ་ལྟ་བུ་བཞིན།།
བ་མོ་འཁྱགས་རྡུལ་ཆུས་ནང་ཆུ་ཐིམ་འདྲ།།
མ་བཅོས་ཉོན་མོངས་མ་སྤོང་ཡེ་ཤེས་གྲོལ།།
ཙ་བ་རང་སེམས་རང་ངོ་ཤེས་པའི་དུས།།
ཚ་གྲང་སྡུག་བསྔལ་སྐྱེ་འཆིའི་འཇིགས་པ་མེད།།
ཛ་ལང་ངན་ཤོར་སྣང་རྟོག་བག་ཆགས་འགྲིབ།།
ཝ་ལེར་རང་ཞལ་སྟོང་གསལ་ཉག་གཅིག་ཤར།།
ཞ་གབ་བག་ལ་མ་ཉལ་རྣལ་འབྱོར་པ།།
ཟ་ཉལ་འགྲོ་འདུག་ཡེངས་མེད་གོམས་པའི་དུས།།
འ་ཅག་རང་ངོ་ཟེར་བ་འདི་རང་ཡིན།།
ཡ་ཐོག་དཔག་མེད་ད་ལྟའི་དུས་འདིར་བར།།
ར་སྤྲོད་མ་རྙེད་རང་ངོ་མ་ཤེས་འཁྲུལ།།
ལ་འུར་ད་རེས་བརྩོལ་མེད་རང་ཞལ་འདི།།
ཤ་ཁྲག་གཟུགས་མེད་རང་བྱུང་ཡེ་ཤེས་ཡིན།།
ས་སྟེང་བཙལ་མེད་སྟོང་གཟུགས་དྭངས་གསལ་འདི།།
ཧ་ཧ་སྟོང་ཧར་གསལ་སིང་ས་ལེར་ངང་།།
ཨ་དཀར་རང་རིག་སྐུ་གསུམ་ངོ་བོ་ཉིད།།
ཀ་དག་དྲི་མེད་སེམས་ཉིད་རང་བཞིན་དབྱིངས།།
ཨ་དཀར་སྐྱེ་མེད་ཐིག་ལེ་ཉག་གཅིག་ཤར།།
ཐིག་ནི་སྐྱེ་མེད་སྟོང་པ་བོན་སྐུ་ཉིད།།
ལེ་ནི་འགག་མེད་གསལ་བ་རྫོགས་སྐུ་ཉིད།།
ཉག་ནི་གཉིས་མེད་སྟོང་གསལ་སྤྲུལ་སྐུ་ཉིད།།
གཅིག་ནི་བདག་མེད་ངོ་བོ་ཉིད་སྐུ་ཉིད།།
༈ ཅེས་པ་འདི་ནི་བལ་ཡུལ་ཁྲི་བརྟན་ནོར་བུ་རྩེའི་སྒྲུབ་ཐོན་པ་འཆི་མེད་ལྷུན་གྲུབ་ཀྱིས་འདི་འདྲ་ཞིག་འབྲི་དགོས་ཞེས་ཡང་ཡང་ཡིག་འཕྲིན་བསྐུར་ངོར་ཟློག་མ་ཕོད་པར། སྤུ་ལའི་སྤྲང་འཁྱམས་མཚམས་མིང་པ་བཟོ་སྦྱིན་པ་ཚུལ་ཁྲིམས་སམ་གཡུང་དྲུང་བསྟན་མཆོག་གིས་༢༠༡༥ལོ་ཟླ་བ་༧པའི་༢༧ཉིན་རྒྱལ་ཕུར་འགྲུབ་སྦྱོར་ཉིན་རྟན་འབྲེལ་ཁྱད་དུ། གཉུག་མའི་གནས་ལུགས་མ་བཅོས་རང་བབ་ཇི་བཞིན་ཉིད་དུ་རིག་རྩལ་མ་འགག་པའི་ངང་ནས་འདི་བྲིས་པ་དགེ། བཀྲ་ཤིས་པར་གྱུར་ཅིག། གུས་རང་རིག་གནས་ཀྱི་ཆུ་ཚད་དམན་པས་ཡིག་ཉོབ་འདི་ལ་ཆད་ལྷག་དང་ཡིག་ནོར་མང་བས་གཟིགས་པ་པོ་རྣམ་པས་ཚིག་དོན་ནོར་བཅོས་ཡོད་པར་ཞུ།།
མ་ལུས་སྡིག་བཤགས་སྒྲིབ་པ་ཀུན་འཇོམས་གཞུགས་སྭོ།།
དང་པོ་སྐྱབས་སུ་འགྲོ་བ་ནི།།
མ་ལུས་གནས་བཞིས་བདག་ལ་དགོངས་སུ་གསོལ།།
མ་བཞིན་དཔོན་གསས་བདག་ལ་དགོངས་སུ་གསོལ།།
མ་དངོས་སངས་རྒྱས་བདག་ལ་དགོངས་སུ་གསོལ།།
མ་བཅོས་བོན་གྱིས་བདག་ལ་དགོངས་སུ་གསོལ།།
མ་འབོར་སེམས་དཔས་བདག་ལ་དགོངས་སུ་གསོལ།།
མ་སྒྲིབ་བདེར་གཤེགས་བདག་ལ་དགོངས་སུ་གསོལ།།
མ་སྲིང་རིག་འཛིན་བདག་ལ་དགོངས་སུ་གསོལ།།
མ་བྲལ་ཡི་དམ་བདག་ལ་དགོངས་སུ་གསོལ།།
མ་རྒྱུད་ལྷ་ཚོགས་བདག་ལ་དགོངས་སུ་གསོལ།།
མ་གཡེལ་བསྟན་སྲུང་བདག་ལ་དགོངས་སུ་གསོལ།།
མ་གཅིག་སྲིད་རྒྱལ་བདག་ལ་དགོངས་སུ་གསོལ།།
མ་མཐོང་མེད་པར་བདག་ལ་དགོངས་སུ་གསོལ།།
མ་ཐོས་མེད་པར་བདག་ལ་དགོངས་སུ་གསོལ།།
མ་མཁྱེན་མེད་པར་བདག་ལ་དགོངས་སུ་གསོལ།།
མ་ཚང་མེད་པར་བདག་ལ་དགོངས་སུ་གསོལ།།
མ་མཇལ་མེད་པར་བདག་ལ་དགོངས་སུ་གསོལ།།
མ་དད་མེད་པར་བདག་ལ་དགོངས་སུ་གསོལ།།
མ་ཁྱབ་མེད་པར་བདག་ལ་དགོངས་སུ་གསོལ།།
མ་རྟོགས་ཡེ་ཤེས་བདག་ལ་དགོངས་སུ་གསོལ།།
མ་ནུས་ཉམས་ཐག་བདག་ལ་དགོངས་སུ་གསོལ།།
གཉིས་པ་ཉོན་མོངས་དུག་ལྔའི་བཤགས་པ་ནི།།
མ་ཤེས་མ་རིག་མ་རྟོགས་མ་ལུས་བཤགས།།
མ་ཤེས་ཁམས་གསུམ་འཁོར་བའི་ཉེས་ལྟུང་བཤགས།།
མ་རིག་སེམས་ཅན་སྡིག་བསགས་ཉེས་ལྟུང་བཤགས།།
མ་རྟོགས་རང་སེམས་སངས་རྒྱས་མ་གྲོལ་བཤགས།།
མ་ལུས་ཉོན་མོངས་དུག་ལྔའི་སྡིག་སྒྲིབ་བཤགས།།
མ་བྱམས་ཞེ་སྡང་ཁོང་ཁྲོ་བཟོད་མེད་བཤགས།།
མ་ངོམས་འདོད་ཆགས་མ་བྱིན་ལོག་གཡེམ་བཤགས།།
མ་རིག་གཏི་མུག་མགོ་འཁོར་རྨོངས་པ་བཤགས།།
མ་གཅོམ་ང་རྒྱལ་སྤོབ་སེམས་ཁེངས་དྲེགས་བཤགས།།
མ་བཟོད་ཕྲག་དོག་རུ་ང་འཁོན་འཛིན་བཤགས།།
མ་དག་དུག་ལྔའི་བག་ཆགས་སྡིག་སྒྲིབ་བཤགས།།
མ་ལུས་ཉོན་མོངས་བརྒྱད་ཁྲི་བཞི་སྟོང་བཤགས།།
མ་བྱམས་ཞེ་སྡང་དབང་གིས་སྲོག་བཅད་བཤགས།།
མ་བྱམས་རང་གིས་སེམས་ཅན་བསད་པ་བཤགས།།
མ་བྱམས་གཞན་གྱིས་བསད་པ་ཡི་རང་བཤགས།།
མ་བྱམས་ཞེ་སྡང་དབང་གིས་སྡིག་སྒྲིབ་བཤགས།།
མ་ངོམས་འདོད་ཆགས་དབང་གིས་སེར་སྣ་བཤགས།།
མ་ངོམས་རང་གིས་མ་བྱིན་རྐུ་འཕྲོག་བཤགས།།
མ་ངོམས་འདོད་གཡེམ་མི་གཙང་སྤྱད་པ་བཤགས།།
མ་ངོམས་འདོད་ཆགས་དབང་གིས་སྡིག་སྒྲིབ་བཤགས།།
མ་རིག་གཏི་མུག་དབང་གིས་རྨོངས་འཐིབས་བཤགས།།
མ་རིག་རང་སེམས་འཁོར་བར་འཁྲུལ་པ་བཤགས།།
མ་རིག་རང་རིག་ཡེ་ཤེས་མ་ཤེས་བཤགས།།
མ་རིག་གཏི་མུག་དབང་གིས་སྡིག་སྒྲིབ་བཤགས།།
མ་གཅོམ་ང་རྒྱལ་དབང་གིས་ཁེངས་དྲེགས་བཤགས།།
མ་གཅོམ་དབང་ཡོད་ཆེ་བཙན་སྙན་གྲགས་བཤགས།།
མ་བཅོམ་རང་ཆེ་གཞན་སྨད་ཁྱད་གསོད་བཤགས།།
མ་གཅོམ་ང་རྒྱལ་དབང་གིས་སྡིག་སྒྲིབ་བཤགས།།
མ་བཟོད་ཕྲག་དོག་གཞན་ལ་སྐྱེས་པ་བཤགས།།
མ་བཟོད་བདེ་སྐྱིད་ཡོན་ཏན་འགྲན་པ་བཤགས།།
མ་འདོད་གཞན་གྱིས་བསོད་ནམས་དམོད་པ་བཤགས།།
མ་བཟོད་ཕྲག་དོག་དབང་གིས་སྡིག་སྒྲིབ་བཤགས།།
མ་རྟོགས་ཉོན་མོངས་དབང་གིས་དུག་ལྔ་བཤགས།།
མ་རྟོགས་འཁོར་འདས་གྲོལ་འཁྲུལ་མ་ཤེས་བཤགས།།
མ་རྟོགས་བདེ་སྡུག་དགེ་སྡིག་མ་ཤེས་བཤགས།།
མ་རྟོགས་དུག་ལྔའི་དབང་གིས་སྡིག་སྒྲིབ་བཤགས།།
གསུམ་པ་མི་དགེ་བ་བཅུ་ཡི་བཤགས་པ་ནི།།
མ་གནོང་མི་དགེ་བཅུ་ཡི་སྡིག་སྒྲིབ་བཤགས།།
མ་བྱང་ལུས་ཀྱི་སྒྲིབ་པ་ལུས་ཀྱིས་བཤགས།།
མ་བྱིན་སྲོག་གཅོད་མི་ཚངས་སྤྱད་པ་བཤགས།།
མ་གདམས་ངག་གི་སྒྲིབ་པ་ངག་གིས་བཤགས།།
མ་རབས་རྫུན་ཕྲ་ཚིག་རྩུབ་ངག་འཆལ་བཤགས།།
མ་འགྱོད་ཡིད་ཀྱི་སྒྲིབ་པ་ཡིད་ཀྱིས་བཤགས།།
མ་ཐུལ་མངན་སེམས་གནོད་སེམས་ལོག་ལྟ་བཤགས།།
བཞི་པ་མཚམས་མེད་པ་ཡི་བཤགས་པ་ནི།།
མ་དག་མཚམས་མེད་པ་ཡི་སྡིག་སྒྲིབ་བཤགས།།
མ་ཞེད་སློབ་མས་སློབ་དཔོན་བསད་པ་བཤགས།།
མ་འཚེར་གྲོགས་པོས་གྲོགས་མོ་བསད་པ་བཤགས།།
མ་གཅེས་ཕྲུག་གུས་ཕ་མ་བསད་པ་བཤགས།།
མ་སྐྲག་ནག་མོས་སྐྱེས་པ་བསད་པ་བཤགས།།
མ་དགའ་ཁྱིམ་པས་དགེ་བྱེད་བསད་པ་བཤགས།།
མ་མིན་ལྐོག་ནོར་མིང་ཕྲུག་བསད་པ་བཤགས།།
མ་ཐ་བླ་གྲྭས་གང་ཟག་བསད་པ་བཤགས།།
མ་མངལ་གྲྭ་ཇོས་བུ་ཕྲུག་བསད་པ་བཤགས།།
མ་བརྩེ་གཉེན་ཉེ་ནང་དམེ་བསད་པ་བཤགས།།
མ་རྩིས་མཆེད་གྲོགས་ཕན་ཚུན་བསད་པ་བཤགས།།
མ་འཆམས་བཟའ་མི་ཕན་ཚུན་བསད་པ་བཤགས།།
མ་ཁྲེལ་མནའ་ཤག་ཕན་ཚུན་བསད་པ་བཤགས།།
མ་འབྲི་སྒོ་ཟོག་དྲིན་ཆེན་བསད་པ་བཤགས།།
མ་སྐྱོང་རི་སྐྱེས་སྲོག་ཆགས་བསད་པ་བཤགས།།
མ་དྲོས་ཉ་སྦལ་ཆུ་གནས་བསད་པ་བཤགས།།
མ་བསྡད་གནམ་ལ་འཕུར་དགུ་བསད་པ་བཤགས།།
མ་འདྲ་ས་ལ་འཛུལ་བཅུ་བསད་པ་བཤགས།།
མ་ནུས་བར་ལ་འགྲིམས་དགུ་བསད་པ་བཤགས།།
མ་གཟབ་སྣང་མེད་འབུ་སྲིན་བསད་པ་བཤགས།།
མ་ཤེས་མ་ཚོར་ཐམས་ཅད་བསད་པ་བཤགས།།
མ་གྱུར་སེམས་ཅན་ཉེས་མེད་བསད་པ་བཤགས།།
མ་དང་ཟླ་གྲོགས་གསོན་སེམས་བསད་པ་བཤགས།།
མ་ལེགས་རྐྱེན་ངན་རང་སྲོག་བཅད་པ་བཤགས།།
ལྔ་པ་ལྗི་བ་བཞི་ཡི་བཤགས་པ་ནི།།
མ་དད་རྩ་བའི་བླ་མའི་ཐུགས་དཀྲུགས་བཤགས།།
མ་རབས་སྡིག་ཆེན་གྲོགས་སུ་བསྟེན་པ་བཤགས།།
མ་གུས་དགེ་བྱེད་བར་ཆད་གཏོང་བ་བཤགས།།
མ་ལག་ཁས་བླངས་ལས་ལ་ལྡོག་པ་བཤགས།།
དྲུག་པ་ལོགས་པ་བརྒྱད་བཤགས་པ་ནི།།
མ་བསྡད་རི་རྩེར་ཀི་སྒྲ་བཏབ་པ་བཤགས།།
མ་གི་ཆུ་བོ་གལ་བསྒྱུར་གྲམ་སྐམ་བཤགས།།
མ་དྲོས་རྒྱ་མཚོའི་གཏིང་དཀྲུགས་དུག་སྦྱོར་བཤགས།།
མ་དྲིས་བླང་བྱའི་ལུང་ལོགས་བསྟན་པ་བཤགས།།
མ་སྡེ་ཡུལ་ལུང་འཐབ་རྩོད་སློང་བ་བཤགས།།
མ་སྲིང་མངལ་དུ་སྦྱོར་བ་སྤྱད་པ་བཤགས།།
མ་དང་ཕ་སོགས་སློབ་དཔོན་མངན་བརྗོད་བཤགས།།
བདུན་པ་འཁྲུལ་པ་དགུའི་བཤགས་པ་ནི།།
མ་གྲོལ་རྨི་ལམ་སྒྱུ་མར་འཁྲུལ་བ་བཤགས།།
མ་གྲོལ་རྣམ་པར་རྟོག་པ་འཁྲུལ་བ་བཤགས།།
མ་གྲོལ་རྒྱུན་གྱི་གཡེངས་བས་འཁྲུལ་བ་བཤགས།།
མ་གྲོལ་བག་ཆགས་མཚན་འཛིན་འཁྲུལ་བ་བཤགས།།
མ་གྲོལ་གཞན་ལ་འཚེ་བ་འཁྲུལ་བ་བཤགས།།
མ་གྲོལ་ཡུལ་གདུང་བག་ཆགས་འཁྲུལ་བ་བཤགས།།
མ་གྲོལ་འཁོར་བར་གདུང་བ་འཁྲུལ་བ་བཤགས།།
མ་གྲོལ་ལས་ཀྱི་རྐྱེན་དངོས་འཁྲུལ་བ་བཤགས།།
བརྒྱད་པ་ལྟ་བ་ལོག་ལྟའི་བཤགས་པ་ནི།།
མ་འོངས་ཡིད་ལ་ལས་འབྲས་ལོག་ལྟ་བཤགས།།
མ་འོངས་ཡིད་ལ་དཀོན་མཆོག་ལོག་ལྟ་བཤགས།།
མ་འོངས་ཡིད་ལ་བདེན་པར་ལོག་ལྟ་བཤགས།།
དགུ་པ་ལོགས་པར་འདོད་པའི་བཤགས་་པ་ནི།།
མ་འོངས་བླ་མའི་དཀོར་ནོར་རློམས་འདོད་བཤགས།།
མ་འོངས་འཁོར་བར་འདབ་ཆེའི་རེ་འདོད་བཤགས།།
མ་འོངས་ཕྱོགས་འཛིན་སློབ་བུ་མང་འདོད་བཤགས།།
མ་འོངས་ཁེ་གྲགས་གཏམ་སྙན་ཁྱབ་འདོད་བཤགས།།
མ་འོངས་ཚེ་འདིའི་ཆེ་ཐབས་བསམ་འདོད་བཤགས།།
བཅུ་པ་ལོག་སྡེ་ལྔ་ཡི་བཤགས་པ་ནི།།
མ་དག་གཡུང་དྲུང་བོན་བསྟན་བཤིགས་པ་བཤགས།།
མ་དག་སྟོང་གསུམ་རྔ་ཐོག་དཀོར་འབག་བཤགས།།
མ་དག་དུས་གསུམ་གཤེན་རབ་སྨད་པ་བཤགས།།
མ་དག་ཕྲིན་ལས་ཟབ་མོ་ལྡོག་པ་བཤགས།།
མ་དག་དགེ་བའི་ལས་ལ་བར་གཅོད་བཤགས།།
བཅུ་གཅིག་ལོག་གཡེམ་སྤྱད་པའི་བཤགས་པ་ནི།།
མ་རབས་བགྲོད་བྱ་མིན་པར་ལོག་གཡེམ་བཤགས།།
མ་རབས་ཡན་ལག་མིན་པར་ལོག་གཡེམ་བཤགས།།
མ་རབས་བདག་མོ་བྱི་བྱས་ལོག་གཡེམ་བཤགས།།
མ་རབས་རང་གི་སྦྲུམ་མ་ལོག་གཡེམ་བཤགས།།
མ་རབས་དུས་མིན་ལོག་གཡེམ་སྤྱད་པ་བཤགས།།
མ་རབས་གནས་མིན་ལོག་གཡེམ་སྤྱད་པ་བཤགས།།
མ་རབས་ཚུལ་མིན་ལོག་གཡེམ་སྤྱད་པ་བཤགས།།
མ་རབས་བཙན་ཤེད་ལོག་གཡེམ་སྤྱད་པ་བཤགས།།
མ་རབས་དམ་ཉམས་ལོག་གཡེམ་སྤྱད་པ་བཤགས།།
བཅུ་གཉིས་མདོ་སྡོམ་ཉམས་བཤགས་ནི།།
མ་སྡོམ་དགེ་བསྙེན་གཏན་ཁྲིམས་སྣ་ལྔ་བཤགས།།
མ་སྡོམ་གཙང་ཁྲིམས་ཉི་ཤུ་རྩ་ལྔ་བཤགས།།
མ་སྡོམ་དྲང་སྲོང་ཉིས་བརྒྱ་ལྔ་བཅུ་བཤགས།།
མ་སྡོམ་མོ་ཁྲིམས་སུམ་བརྒྱ་དྲུག་ཅུ་བཤགས།།
མ་སྡོམ་འདུལ་ཁྲིམས་ཕོ་མོ་ཉམས་ཆག་བཤགས།།
མ་སྡོམ་མདོ་སྡོམ་འདུལ་ཁྲིམས་ཉམས་ཆག་བཤགས།།
མ་སྡོམ་རྩ་བའི་དམ་ཚིག་ཉམས་ཆག་བཤགས།།
མ་སྡོམ་ཡན་ལག་དམ་ཚིག་ཉམས་ཆག་བཤགས།།
མ་སྡོམ་ཉིང་ལག་དམ་ཚིག་ཉམས་ཆག་བཤགས།།
མ་སྡོམ་ཕྱི་ཚུལ་ནང་ཁྲིམས་ཉམས་ཆག་བཤགས།།
མ་སྡོམ་དགེ་བསྙེན་དྲང་སྲོང་ཐེག་ཉམས་བཤགས།།
བཅུ་གསུམ་སྔགས་སྡོམ་ཉམས་བཤགས་ནི།།
མ་ཤེས་ཕྱག་མཆོད་ལུས་ཀྱི་ཉམས་ཆག་བཤགས།།
མ་ཤེས་འཛབ་བསྙེན་ངག་གི་ཉམས་ཆག་བཤགས།།
མ་ཤེས་སྐྱེད་རྫོགས་ཡིད་ཀྱི་ཉམས་ཆག་བཤགས།།
མ་ཤེས་ཞི་ཁྲོ་རང་སེམས་མ་རྟོགས་བཤགས།།
མ་ཤེས་སྟོང་ཉིད་སྙིང་རྗེ་མ་རྟོགས་བཤགས།།
མ་ཤེས་དབྱིངས་བསྒྲལ་རྣམ་ཤེས་བོར་བ་བཤགས།།
མ་ཤེས་བཏང་བཞག་ཚོད་འཛིན་གོ་ལྡོག་བཤགས།།
མ་ཤེས་ལྷག་ཆད་ནོར་འཁྲུལ་ཀློག་རྫུན་བཤགས།།
མ་ཤེས་བུག་རལ་ཟགས་གསུམ་ཤོར་བ་བཤགས།།
མ་ཤེས་གསང་སྔགས་ལམ་རིམ་མ་རྟོགས་བཤགས།།
མ་ཤེས་གསང་སྔགས་དམ་ཚིག་ཉམས་པ་བཤགས།།
མ་ཤེས་སྦྱོར་དངོས་རྗེས་གསུམ་ཉམས་ཆག་བཤགས།།
མ་ཤེས་ཨ་དཀར་ཡེ་ཤེས་ཐེག་ཉམས་བཤགས།།
བཅུ་བཞི་སེམས་སྡོམ་ཉམས་བཤགས་ནི།།
མ་རྟོགས་ལྟ་བའི་དུས་སུ་འཁྲུལ་སྐྱོན་བཤགས།།
མ་རྟོགས་སྒོམ་པའི་དུས་སུ་གོལ་སྐྱོན་བཤགས།།
མ་རྟོགས་སྤྱོད་པའི་དུས་སུ་ཤོར་སྐྱོན་བཤགས།།
མ་རྟོགས་ལྟ་ཐོག་རང་ངོ་མ་ཤེས་བཤགས།།
མ་རྟོགས་སྒོམ་ཐོག་རང་ཚུགས་མ་ཐོབ་བཤགས།།
མ་རྟོགས་སྤྱོད་ཐོག་རང་རྒྱུད་མ་ཐུལ་བཤགས།།
མ་རྟོགས་ལྟ་བའི་སྐབས་སུ་སྤང་ལེན་བཤགས།།
མ་རྟོགས་སྒོམ་པའི་སྐབས་སུ་རེ་དོགས་བཤགས།།
མ་རྟོགས་སྤྱོད་པའི་སྐབས་སུ་དགག་སྒྲུབ་བཤགས།།
མ་རྟོགས་ལྟ་སྒོམ་སྤྱོད་གསུམ་ནོར་སྐྱོན་བཤགས།།
མ་རྟོགས་ཡང་རྩེ་བླ་མེད་ཐེག་ཉམས་བཤགས།།
བཅོ་ལྔ་འཇིག་རྟེན་འཁོར་བའི་ཉེས་བཤགས་ནི།།
མ་སྲིང་མཁའ་འགྲོ་གནས་བཞིར་གནོང་འགྱོད་བཤགས།།
མ་ལུས་ཕྱི་ནང་ལྷ་ཚོགས་གནོང་འགྱོད་བཤགས།།
མ་རྩ་སྦྱོར་དངོས་རྗེས་གསུམ་མ་ཤེས་བཤགས།།
མ་མོས་སྐྱབས་གནས་དཀོན་མཆོག་མ་དད་བཤགས།།
མ་བཟོད་ལྷག་བསམ་ཤེས་རབ་མེད་པར་བཤགས།།
མ་དྲན་བྱམས་སྙིང་བསྔོ་སྨོན་མ་བྱས་བཤགས།།
མ་རིག་བླ་མིང་སེམས་ཅན་འགྲོ་འདྲེན་བཤགས།།
མ་ནུས་སྔགས་པས་གཤེད་ཕྲལ་བྱས་མདོག་བཤགས།།
མ་ཤེས་སྒྲུབ་གཤེན་ཐོ་ཅོའི་འུར་འདོན་བཤགས།།
མ་དག་བྲིས་ནོར་ཆད་ལྷག་བཅོས་པ་བཤགས།།
མ་གསལ་བསྐྱེད་རྫོགས་སྒོམ་སྒྲུབ་འཁྲུལ་བ་བཤགས།།
མ་གྲོལ་སྒོམ་ཆེན་འཁོར་བར་འཁྱམ་པ་བཤགས།།
མ་སྡོམ་འདུལ་ཁྲིམས་གཙང་མ་མ་སྲུང་བཤགས།།
མ་ཐུལ་གཅོད་པས་གཉན་ས་བདག་འཛིན་བཤགས།།
མ་བརྟགས་སྨན་ལོག་སྲོག་ཉེས་སྡིག་པ་བཤགས།།
མ་ཤེས་མོ་མས་འོལ་ཚོད་ལོག་བཤད་བཤགས།།
མ་བབ་ལྷ་པས་རྫུན་མགོ་སྐོར་བ་བཤགས།།
མ་བདེན་སྒྲུང་བཤད་དགའ་སྐྱོ་ཆགས་སྡང་བཤགས།།
མ་མཁས་བཀའ་ལུང་བཟོ་བཅོས་བྱས་པ་བཤགས།།
མ་རྟོགས་དཀོན་མཆོག་ལོག་ལྟ་སྐུར་འདེབས་བཤགས།།
མ་རིག་རྨོངས་དད་རྣམ་རྟོག་འཛིན་པ་བཤགས།།
མ་མིན་ཚོང་བརྒྱབ་མགོ་སྐོར་བཏང་པ་བཤགས།།
མ་ངོམས་བཟོ་པས་ཨོ་ཟོབ་བཟོས་པ་བཤགས།།
མ་ཚོར་རྐུ་བརྒྱབ་མ་བྱིན་བླངས་པ་བཤགས།།
མ་རུང་ཇག་བརྒྱབ་མི་རྒྱུ་འཕྲོག་བཅོམ་བཤགས།།
མ་དྲང་ཡོ་འཁྱོག་དཔོན་ངན་སྡིག་བསགས་་བཤགས།།
མ་རབས་ཧམ་སེམས་ང་རྒྱལ་ཁེངས་དྲེགས་བཤགས།།
མ་རབས་ཆེ་བཙན་དམན་ལ་ཐུབ་ཚོད་བཤགས།།
མ་རབས་ཕུང་དཀྲུགས་གོང་ལ་དབྱེན་སྦྱོར་བཤགས།།
མ་རབས་དམག་འཁྲུག་གཡུལ་འགྱེད་སྡིག་བསགས་བཤགས།།
མ་རབས་ལྐོག་གཡོ་ཇུས་ངན་སྡིག་བསགས་བཤགས།།
མ་རབས་གཡོ་བསྐོར་བློ་ངན་སྡིག་བསགས་བཤགས།།
མ་རབས་སྣ་དགུ་བསམ་ངན་སྡིག་བསགས་བཤགས།།
མ་རབས་ཁོག་ནག་སྤྱོད་ངན་སྡིག་བསགས་བཤགས།།
མ་རབས་ཡིད་སྒོམ་ཞེ་ངན་སྡིག་བསགས་བཤགས།།
མ་རབས་ཁྲམ་སེམས་ལས་ངན་སྡིག་བསགས་བཤགས།།
མ་རབས་བཟའ་བར་ལྐོག་ལས་སྡིག་བསགས་བཤགས།།
མ་རབས་སངས་རྒྱས་བསྟན་བཤིགས་པ་བཤགས།།
མ་རབས་སེམས་ཅན་སྡུག་བསྔལ་གཏོངས་བ་བཤགས།།
མ་རྒན་སེམས་ཅན་ཤ་ཟོས་ཁྲག་འཐུང་བཤགས།།
མ་འབྲི་སེམས་ཅན་དྲིན་ལན་ལོག་འཇལ་བཤགས།།
མ་ཟས་འབྲུ་རིགས་སོ་ནམ་སྡིག་བསགས་བཤགས།།
མ་རྩ་དབྱར་རྩྭ་དགུན་འབུའི་སྡིག་བསགས་བཤགས།།
མ་ཤེས་ཞིང་པས་འབུ་སྲིན་ལན་ཆགས་བཤགས།།
མ་མིན་འབྲོག་པས་བཤས་ཉོས་བཤས་བཙོང་བཤགས།།
མ་གནང་བླ་མའི་དཀོར་ལ་རློམ་པ་བཤགས།།
མ་ཞུ་ཤི་གསོན་དཀོར་ནག་ལན་ཆགས་བཤགས།།
མ་ཡིད་སྡིག་པ་ཆེ་ཆུང་ཅི་བགྱིས་བཤགས།།
མ་དྲན་ཁས་བླང་ཉམས་ལེན་མ་བྱས་བཤགས།།
མ་ཚོར་རྨོན་པས་དགེ་སྡིག་མ་ཤེས་བཤགས།།
མ་བསྐུལ་དོན་ལེན་མི་ཚེའི་སྡིག་བསགས་བཤགས།།
མ་ཤེས་འདི་ཕྱི་གདམ་ཀ་མ་ཤེས་བཤགས།།
མ་ཤེས་དགེ་སྡིག་བླང་དོར་མ་ཤེས་བཤགས།།
མ་ཤེས་ལས་དང་རྒྱུ་འབྲས་མ་ཤེས་བཤགས།།
མ་ཤེས་བདེ་སྡུག་གཞི་རྩ་མ་ཤེས་བཤགས།།
མ་ཤེས་དུས་གསུམ་སྡིག་བཅུ་མ་ཤེས་བཤགས།།
མ་ཤེས་སྒོ་གསུམ་དགེ་བཅུ་མ་ཤེས་བཤགས།།
མ་ཤེས་མཆོག་གསུམ་ཚོགས་ཞིང་མ་ཤེས་བཤགས།།
མ་ཤེས་སྟོང་གསུམ་མཆོད་རྫས་མ་ཤེས་བཤགས།།
མ་ཤེས་སྲིད་གསུམ་མཆོད་འབུལ་མ་ཤེས་བཤགས།།
མ་ཤེས་ཁམས་གསུམ་ཚོགས་བསགས་མ་ཤེས་བཤགས།།
མ་ཤེས་དུག་གསུམ་སྐུ་གསུམ་མ་ཤེས་བཤགས།།
མ་ཤེས་སྐུ་གསུམ་རང་རིག་མ་ཤེས་བཤགས།།
མ་ལུས་ཉོན་མོངས་དུག་ལྔ་གནོང་འགྱོད་བཤགས།།
མ་ལུས་མི་དགེ་བཅུ་པོ་གནོང་འགྱོད་བཤགས།།
མ་ལུས་མཚམས་མེད་ལས་ངན་གནོང་འགྱོད་བཤགས།།
མ་ལུས་ལྗི་བཞི་ལོགས་བརྒྱད་གནོང་འགྱོད་བཤགས།།
མ་ལུས་འཁྲུལ་དགུ་ལོག་ལྟ་གནོང་འགྱོད་བཤགས།།
མ་ལུས་ལོག་འདོད་ལོག་སྡེ་གནང་འགྱོད་བཤགས།།
མ་ལུས་ལོག་པར་གཡེམ་པ་གནོང་འགྱོད་བཤགས།།
མ་ལུས་མདོ་དམ་ཉམས་པ་གནོང་འགྱོད་བཤགས།།
མ་ལུས་སྔགས་དམ་ཉམས་པ་གནོང་འགྱོད་བཤགས།།
མ་ལུས་སེམས་དམ་ཉམས་པ་གནོང་འགྱོད་བཤགས།།
མ་ལུས་བག་ཆགས་སྡིག་སྒྲིབ་གནོང་འགྱོད་བཤགས།།
མ་ལུས་ལན་ཆགས་བུ་ལོན་གནོང་འགྱོད་བཤགས།།
མ་ལུས་མི་གཡོ་མི་འཆབ་གནོང་འགྱོད་བཤགས།།
མ་ལུས་མི་སྦས་མི་གསང་གནོང་འགྱོད་བཤགས།།
མ་ལུས་སྡིག་བསགས་འཇིགས་སྐྲག་གནོང་འགྱོད་བཤགས།།
མ་ལུས་སྡིག་བསགས་སྔངས་འདར་གནོང་འགྱོད་བཤགས།།
མ་ལུས་སྡིག་བསགས་བྲེད་གདོངས་གནོང་འགྱོད་བཤགས།།
མ་ལུས་སྡིག་བསགས་སྨྲ་གདུང་གནོང་འགྱོད་བཤགས།།
བཅུ་དྲུག་སྨོན་ལམ་ནི།།
མ་ལུས་སེམས་ཅན་སྡུག་བསྔལ་ཀུན་ཞི་ཤོག།
མ་ལུས་སེམས་ཅན་བདེ་སྐྱིད་ལྡན་པར་ཤོག།
མ་ལུས་སེམས་ཅན་བདེ་སྡུག་གཉིས་བྲལ་ཤོག།
མ་ལུས་སེམས་ཅན་ཚོགས་གཉིས་རྫོགས་པར་ཤོག།
མ་ལུས་སེམས་ཅན་སྒྲིབ་གཉིས་བྱང་བར་ཤོག།
མ་ལུས་སེམས་ཅན་དོན་གཉིས་འགྲུབ་པར་ཤོག།
མ་ལུས་སེམས་ཅན་སྐུ་གསུམ་སངས་རྒྱས་ཤོག།
ཅེས་པ་འདི་ནི་ཚེ་རབས་བསྐལ་པ་འབུམ་ཕྲག་གྲངས་མེད་པ་ནས་ད་ལྟ་འདི་ལ་མ་ཐུག་གི་བར་དུ། ལུས་ངག་ཡིད་ཀྱི་སྒོ་ནས་སྡིག་པ་མི་དགེ་བ་ཅི་བགྱིས་པ་ཐམས་ཅད་གནོང་འགྱོད་དྲག་པོའི་སྒོ་ནས་བཤགས་པ་འདི། ཁས་ལེན་ཆེ་བ་དང་ཉམས་ལེན་ཆུང་བ་དྲན་པས་ཡིད་ལ་མ་འཁོར་བསམ་པས་སེམས་ལ་མ་ཟིན་ཚོར་བས་རིག་པ་མ་གསལ་པའི་སྡིག་པ་གང་བསགས་པ་དེ་དག་ཐམས་ཅད་དང་། ལུས་ཀྱི་སྒྲིབ་པ་རི་རབ་གླིང་དགུ་འདྲ་བ་དང་ངག་གི་སྒྲིབ་པ་སྤུ་གྲི་ངར་ཆེན་འདྲ་བ་དང་ཡིད་ཀྱི་སྒྲིབ་པ་མུན་ནག་གླིང་དགུ་འདྲ་བ་སོགས། གནས་བཞི་མཆོག་གསུམ་མ་ལུས་པའི་སྤྱན་སྔར་དུ་མི་འཆབ་མི་སྦད་མི་གསང་མི་འགབ་པའི་སྒོ་ནས། སྒོ་གསུམ་གཅིག་སྒྲིལ་དུ་བཤགས་པའི་ལེའུ་འདི་ནི་སྤུ་ལ་བ་བཟོ་དྲང་སྲོང་གཡུང་དྲུང་བསྟན་མཆོག་གིས་ཚེ་རབས་ཐོག་མ་མེད་པ་ནས་ད་ལྟའི་བར་དུ། བདག་གཞན་སེམས་ཅན་ཐམས་ཅད་ཀྱིས་ལས་མི་དགེ་བའི་སྡིག་པ་གང་བགྱིས་པ་དེ་དག་བཤགས་པ་འདི་བྲིས་པའོ།།
དགེ་ཚོགས་ཐམས་ཅད་མཁའ་ཁྱབ་སེམས་ཅན་བསྔོ།།
ཉེས་འགལ་ཅི་མཆིས་རང་རིག་དབྱིངས་སུ་བཤགས།།
ཐམས་ཅད་ཀུན་བཟང་ཀློང་དུ་འུབ་ཆུབ་ཤོག།
སརྦ་མངྒ་ལམ།།དགེ་ལེགས་སུ་གྱུར་ཅིག།
༼སྤྱི་ལོ་གཉིས་སྟོང་བརྒྱ་མེད་བཅོ་ལྔ་ལོར་ཁྲི་བརྟན་ནོར་རྩེའི་སྒྲུབ་ཐོན་པ་འཆི་མེད་ལྷུན་གྲུབ་ཀྱིས་སྤུ་ལའི་མཚམས་ཆེན་སྦྱིན་པ་ཚུལ་ཁྲིམས་ཀྱི་ཉམས་མགུར་ལེའུ་ཁ་ཤས་སྨན་རིའི་མཁན་སློབ་དྲུང་དུ་སྤྱན་འབེབ་ཕུལ་ནས་བསྔགས་བརྗོད་སྣང་བ་མ་ཚད་རྟེན་འབྲེལ་གྱི་བརྡ་མཚོན་ཆེད་དུ་མཁན་རིན་པོ་ཆེས་ཕྲེང་བ་དང་མེ་ཏོག་སོགས་ཀྱི་གཟེངས་རྟགས་བསྩལ། །ཉིས་སྟོང་བརྒྱ་མེད་བཅུ་དྲུག་ལོར་ཁྲི་བརྟན་ནོར་རྩེའི་མཚན་ཉིད་པ་ཚུལ་ཁྲིམས་རྒྱ་མཚོས་ལེའུ་ཁ་ཤས་དང་བསྡོམས་ལེའུ་སུམ་བཅུ་ཐམ་པ་དེ་རྒྱལ་བ་སྨན་རིའི་མཁན་པོའི་མདུན་དུ་སྤྱན་འབེབས་ཕུལ་ནས་བསྔགས་བརྗོད་ཚད་མེད་གནང་།༽