གློ་བུར་དུ་རྡོལ་བའི་ས་ཡོམ་ཞིག

ཟབ་མོ་སྟོང་བ་ཉིད་ཀྱི་འཕྲུལ་མཛོད་ལས།།

རབ་འབྱམས་ཤེས་བྱའི་གཏེར་ཆེན་རྡོལ་བ་རྣམས།།

ཇི་བཞིན་སྒྲོག་མཛད་རྒྱལ་བའི་གདུང་སོབ་སྟེ།།

སྨན་རིའི་ཡེ་གཤེན་རིམ་བྱོན་སྤྱི་བོར་བཞུགས།།

དཀར་ནག་རྒྱ་དང་ཞང་བོད་སྟག་གཟིག་སོགས།།

སྤྲུལ་སྐུ་མང་པོས་ཡུལ་ཆེན་འདུལ་མཛད་ཅིང་།།

ཁྱད་པར་བོད་དུ་རྒྱལ་བ་གཉིས་པ་ཞེས།།

ཤེས་རབ་རྒྱལ་མཚན་ཞབས་ལ་ལྷག་པར་འདུད།།

ཆགས་སྡང་བདུད་ཀྱི་མགོ་བོ་བཀོག་ནས་སུ།།

གྲུབ་མཐའ་ཀུན་ལ་སྒྲོ་འདོགས་ལེགས་པོར་བཅད།།

ཕར་ཕྱིན་སྡེ་ལ་ཤིང་རྟའི་སྲོལ་འབྱེད་བཞིན།།

ཚད་མའི་སྐྱེ་བུ་ཉི་མ་བསྟན་འཛིན་མཁྱེན།།

ཚོར་བའི་གཡུལ་ལས་རྣམ་པར་རྒྱལ་ནས་སུ།།

འཕགས་བོད་གཉིས་ལ་ཤེས་རབ་རྩལ་སྦྱོང་ནས།།

མདོ་འབུམ་རྒྱུད་མཛོད་གཤགས་པའི་སྟ་མོ་སྟེ།།

དཔོན་སློབ་སྨྲ་བའི་སེང་གེར་གྲངས་མེད་བསྟོད།།

དེ་དག་ཀུན་གྱི་དགོངས་པ་གཅིག་བསྡུས་ནས།།

སྟོང་གསུམ་ཁ་ལོ་གྱེན་དུ་བསྒྱུར་མཛད་མཁན།།

བཀའ་ཡི་གཏོ་སྒྲོམ་རྒྱལ་བ་སྨན་རི་བ།།

ལུང་རྟོགས་བསྟན་པའི་ཉི་མ་བདག་ལ་དགོངས།།

བདག་ཀྱང་ཁྱེད་ཀྱི་རྗེས་སུ་འབྲེང་འདོད་ཀྱང་།།

འདོད་ཆགས་དབང་གིས་མགོ་བོ་འདམ་ལ་འབྱར།།

དགེ་བྱེད་བསམ་པ་སྣང་བས་བཅོམ་ལ་ཤོར།།

སྦྱིན་པའི་ཚོགས་ཆེན་རབ་རྫོགས་ཁྱེད་ལ་མཐོལ།།

ཞེ་སྡང་དབང་གིས་ཡིད་དུ་མ་འོང་སྟེ།།

སྒྱུ་མའི་ཡུལ་ལ་ཁོང་ཁྲོའི་མེ་འབར་ནས།།

བསྐལ་བར་བསགས་པའི་དགེ་བ་ཚིག་ལ་ཤོར།།

བྱམས་པ་ཆེན་པོའི་ཞལ་མཐོང་ཁྱེད་ལ་བཤགས།།

གཏི་མུག་རྡུལ་མཚོན་སྙིང་ལ་ཞུགས་ནས་སུ།།

བོན་གྱི་གནས་ལ་ཤེས་རབ་རྩལ་སྦྱོང་ཡང་།།

གཉིད་ཀྱི་གཡུལ་ལས་ནམ་ཡང་རྒྱལ་མ་མྱོང་།།

མུན་པའི་དགྲ་འཇོམས་འོད་སྟོང་ཅན་ལ་བཟོད།།

ང་རྒྱལ་རླུང་འཚུབ་སྲོག་རྩལ་ཞུགས་ནས་སུ།།

དགེ་སློབ་ཀུན་ལ་སྒྲོ་སྐུར་རྒྱུན་མ་ཆོད།།

སྡིག་ལས་ཚབ་ཆེན་འདི་འདྲ་བསགས་ཤོར་བ།།

ང་རྒྱལ་རྒྱང་འཕེན་ཁྱེད་ལ་མཐོལ་ལོ་བཤགས།།

ཕྲག་དོག་ས་ཆེན་སེམས་ལ་གཡོ་བ་ཡིས།།

རང་གཞན་མི་བདེ་ཚིག་ཚོགས་སྤུངས་ནས་སུ།།

རྣམ་དག་འདུལ་བའི་གཞུང་ལ་རྒྱབ་གཏད་འདི།།

ཁྲི་གཙུག་རྒྱལ་བ་དངོས་བྱོན་ཁྱེད་ལ་མཐོལ།།

མདོར་ན་མ་རིག་བདུད་ཀྱི་རྒྱལ་པོ་ཡིས།།

མངགས་པའི་འཇིགས་རུང་དམག་དཔོན་དུག་ལྔ་དང་།།

དམག་ཕྲན་ཉོན་མོངས་བརྒྱད་ཁྲིས་ཅི་བྱས་ལས།།

མཐའ་དག་སྤྱི་འབྱིན་རྒྱལ་པོ་ཁྱེད་ལ་མཐོལ།།

འདུལ་བ་ཁྲིམས་ཀྱི་མཁན་རྒྱུད་འཐུད་ནས་སུ།།

"བདག་ཉིད་བཙུན་པས་གཞན་རྒྱུད་འདུབ་བ་ཡི།།"

འཁོར་བའི་འདམ་ན་ཤེལ་གྱི་མཆོད་རྟེན་གྱིས།།

བདག་གི་རྒྱུད་ལ་ཁྲིམས་ཆེན་རྫོགས་པར་མཛོད།།

ལྷ་དང་བོན་ཉིད་སྒོམ་པ་མཐར་ཕྱིན་ཏེ།།

གསང་བ་སྔགས་ཀྱི་ལྟ་སྤྱོད་ཐེག་ནས་སུ།།

ཚེ་འདས་སྒྲིབ་སྦྱོང་འགྲོ་དོན་མཐར་ཕྱིན་ཀྱེ།།

བདག་ལ་ས་ལམ་ཡོན་ཏན་རྫོགས་པར་མཛོད།།

མ་བརྩལ་ལྷུན་གྲུབ་ཐིག་ལེ་ཉག་ཅིག་ལས།།

ཀུན་ཏུ་བཟང་པོའི་སྤྱོད་པ་མཐར་ཕྱིན་ཏེ།།

གཡུང་དྲུང་ཐིག་ལེའི་ས་ལ་མངའ་མཛད་མཁན།།

བདག་ལ་ཀུན་བཟང་ལྟ་སྤྱོད་འཕོ་བར་མཛོད།།

ཀ་སྡེ་བཅུ་བོར་འགྲན་གྱི་ཟླ་བྲལ་བ།།

རྒྱལ་བ་གཉིས་པའི་བཀའ་དྲིན་ཇི་བཞིན་དུ།།

མདོ་སྔགས་ཟུང་འབྲེལ་གཡུང་དྲུང་བོན་བསྟན་འདི།།

ས་སྒང་ཁྱོན་ལ་སྒྲོག་མཛད་སྨན་རི་བ།།

ནད་དང་དུག་སེལ་སྨན་གྱི་རི་བོ་ན།།

མཚན་ཉིད་སྡེ་ཡི་རྒྱ་སྒོ་རབ་ཕྱེས་ཏེ།།

ཐེག་དགུ་གྲུབ་མཐའ་བརྙན་བཞིན་བསྟན་མཛད་པ།།

ཤིང་རྟ་ཆེན་མོ་ཇི་བཞིན་སྨན་རི་བ།།

དཀར་ནག་བཀྲ་གསལ་སྲིན་གྱིས་སྣུབ་དུས་བཞིན།།

བོན་གྱི་གླེགས་བམ་བདུད་ཀྱིས་བརླག་ཙམ་ན།།

རྣམ་པར་རྒྱལ་བ་ཇི་བཞིན་བྱོན་ནས་སུ།།

བོན་གྱི་བསྟན་སྲུང་མཛད་པའི་སྨན་རི་བ།།

སེམས་ཅན་དོན་ལ་ལུས་སྲོག་གཏོང་བ་ཡི།།

སེམས་དཔའ་ཆེན་པོའི་སྐྱེ་བ་བཞེས་ནས་སུ།།

སྐུ་ཚེ་རེ་རེར་འགྲོ་དོན་རྫོགས་པའི་མཐར།།

རྟག་འཛིན་དྲུང་ནས་འབྱིན་མཁན་སྨན་རི་བ།།

དེ་བཞིན་སྐབས་འདིའི་འགྲོ་དོན་རྫོགས་ནས་སུ།།

སླར་ཡང་སེམས་ཅན་འདྲེན་དུ་གཤེགས་པ་འདི།།

བློ་དམན་བདག་འདྲ་ལྟ་བ་དམན་པ་ཡི།།

སེམས་ལ་རྒྱུགས་པའི་ས་ཡམས་ཆེན་པོ་ཞིག།

སེང་ཆེན་གངས་ལ་མཆོང་བའི་རྩལ་ཤུགས་ཀྱིས།།

སྟོང་གསུམ་འཇིག་རྟེན་དུས་གཅིག་གཡོ་བ་འདི།།

ཞིང་གཞན་གནས་པའི་སེམས་ཅན་སྐལ་ལྡན་གྱུར།།

འོན་ཀྱང་ལྷོ་རྒྱལ་འཛམ་གླིང་ལས་རེ་ངན།།

ཉི་མ་རི་རབ་ཕག་ཏུ་ཡིབ་ཉིན་དེར།།

འཛམ་གླིང་བཤུམ་པའི་ངུ་སྒྲ་གཅིག་འདུས་ནས།།

སྟོང་གསུམ་སྒྲ་ཚོགས་ཟིལ་གྱིས་གནན་པ་ཡིས།།

ཤར་གླིང་སོགས་ཀྱང་གདུང་སེམས་སྐྱེད་པར་བྱས།།

སེམས་ལ་མུན་པ་འཚུབ་པའི་བར་སྐབས་སུ།།

སྙིང་ཆུང་བྲག་ལ་རྡེབ་པའི་གནས་ཚུལ་དེས།།

ལམ་མཁན་མེད་པའི་ལོང་བ་ཁྱུ་བཞིན་གྱི།།

ལས་ངན་ང་ཚོ་འཁོར་བར་ལྷག་ཏུ་སྐྲག།

སྟོན་པ་གཤེན་རབ་མྱ་ངན་འདས་དུས་སུ།།

སེང་གེ་ཉལ་སྟངས་ཚུལ་དུ་བཞུགས་པ་ཡིས།།

རང་རང་སྡེ་བཞིན་སྤང་བླངས་གཙོ་ཚུལ་གྱི།།

བརྡ་ཡི་ཞལ་ཆེན་འཁོར་ལ་བཞག་སྟེ་སོང་།།

རྒྱལ་བ་གཉིས་པ་ཞིང་ལ་ཕེབས་དུས་སུ།།

བོན་འཆད་ངང་དུ་འདས་པའི་ཚུལ་བསྟན་ཏེ།།

འཆད་རྩོད་རྩོམ་ལ་བརྩོན་པ་དགོས་ཚུལ་གྱི།།

བརྡ་ཡི་ཞལ་ཆེན་འཁོར་ལ་གནང་སྟེ་སོང་།།

དེ་བཞིན་རྒྱལ་བ་སྨན་རི་ཁྱེད་ཉིད་ཀྱང་།།

ཉམས་ལེན་ངང་དུ་འདས་པའི་ཚུལ་མཛད་ནས།།

སྙིགས་མའི་དུས་ལ་ཉམས་ལེན་གལ་ཆེན་གྱི།།

བརྡ་ཡི་ཞལ་ཆེན་འཁོར་ལ་བསྩལ་ཏེ་ཕེབས།།

བདག་ནི་མགོ་དང་རྐང་ལག་ཅུང་གཟེར་དུས།།

ཙོག་པུར་ཙམ་ཡང་འདུག་པ་མི་ནུས་ན།།

སྲོག་རྩལ་ཆད་ཀྱང་དེ་ལྟར་བཞུགས་པ་ནི།།

ནང་པའི་སྐྱེས་ཆེན་མིན་ན་སུ་ཡིས་ནུས།།

དེས་ན་བདག་དང་དམིགས་ཡུལ་གཅིག་པ་ཡི།།

བོན་འབངས་ཡོངས་ཀྱིས་སོམ་ཉི་ཅི་ལ་དགོས།།

མྱ་ངན་ངུ་སྒྲ་འབྱིན་ཡང་གོ་མི་ཆོད།།

ད་ནི་ཞལ་ཆེན་བཞིན་དུ་སྒྲུབ་ལ་ཤོག།

འདི་ལྟར་སྦྱར་བར་བསོད་ནམས་ཅི་མཆིས་པ།།

སྔོན་ཆད་རྒྱལ་བ་སྲས་ཀྱི་མཛད་པ་བཞིན།།

སྨན་རིའི་གདུལ་བྱ་སེམས་ཅན་ཡོངས་ལ་བསྔོ།།

ཀུན་ཀྱང་སྨན་རིའི་རྗེས་སུ་ཟིན་གྱུར་ཅིག།

བདག་ཀྱང་ཚེ་འདིའི་གཟུགས་ཕུང་མ་དོར་བར།།

རྒྱལ་བ་སྨན་རི་མཁན་ཆེན་ཇི་བཞིན་དུ།།

བསྟན་འགྲོའི་དོན་ལ་ལུས་སྲོག་རབ་གཏོང་ནས།།

གཡུང་དྲུང་སེམས་དཔའི་སྤྱོད་ལ་གནས་པར་ཤོག།

འཆི་ཁར་སྨན་རི་བླ་མ་ཇི་བཞིན་དུ།།

ཆ་ལུགས་ལྔ་ལྡན་ངང་དུ་གཤེགས་པ་དང་།།

ལྷ་བུ་པད་མ་ཕ་དང་འཕྲད་པ་བཞིན།།

བདག་གིས་སྨན་རི་བླ་མའི་ཞལ་མཇལ་ཤོག།

   ཅེས་རྫ་སྟེང་ཆེན་དགོན་གྱི་གྲལ་མཐའ་འཛིན་པ་ཀླད་ཆུང་ཤར་བྲམ་ཟེའམ་འོད་གསལ་ཟླ་བ་རུ་འབོད་པ་དེས་ཡབ་རྗེ་སྨན་རི་བ་ལུང་རྟོགས་བསྟན་པའི་ཉི་མ་སེམས་ཅན་གཞན་གྱི་འགྲོ་དོན་ཕེབས་པ་ལ་ཡིད་ཀྱི་སྐྱོ་བ་ཅུང་ཙམ་སངས་ནས་བསམ་བློ་ཟིན་ཙམ་གྱི་ཉིན་ཏེ་སྤྱི་ལོ་2017/9/22ཉིན་ཁྱུང་པོ་ཀོ་རྒྱལ་དགོན་དཔལ་བཤད་སྒྲུབ་འདུས་སྡེ་ཆེན་མོའི་གཡས་ཟུར་གྱི་རང་ཤག་སེམས་ཉིད་དོན་མཐོང་དུ་སྦྱར་བའོ།།