གཞན་ཕན་སྒྱུ་མའི་མགུར་དབྱངས།

༄༅།།རང་སྐྱོན་ངོས་ཟིན་གྱི་ཚུལ་དུ་སྨྲས་པ་གཞན་ཕན་སྒྱུ་མའི་མགུར་དབྱངས།

ཀྱེ་ཧོ་རིག་པ་ཀློང་དུ་མངོན་གྱུར་བ།།
སྣང་སྟོན་ནམ་མཁའི་མཚན་ཅན་ཉིད།།
འབྲལ་མེད་སྤྱི་བོའི་རྒྱན་དུ་བཞུགས།།
བྱིན་རླབས་ཉམས་རྟོགས་ཆར་བཞིན་ཕོབས།།
བཀའ་དྲིན་གསུམ་དང་ལྡན་པ་ཡི།།
མཚུངས་མེད་རྩ་བའི་བླ་མ་རྗེ།།
མུ་ལ་མ་ཏི་སྙིང་དབུས་བཞུགས།།
བློ་ཁ་བོན་ལ་བསྒྱུར་དུ་གསོལ།།
བླུན་རྒན་བསྟན་འཛིན་དབང་རྒྱལ་ངས།།
རང་སྐྱོན་རང་ལ་རྔན་དུ་བགྲང་།།
དམ་པའི་གསུང་བཞིན་མི་སྒྲུབ་པར།།
བླ་མ་བསྟེན་ནོ་ཞེས་པ་རྫུན།།
དགེ་སྦྱོར་བག་ཙམ་མི་སྒྲུབ་པར།།
དལ་འབྱོར་རྙེད་དཀའ་ཟེར་བ་རྫུན།།
འཆི་བ་ཡིད་ལ་མེད་དྲན་པར།།
མི་རྟག་ཁ་ནས་བཤད་པ་རྫུན།།
ཆགས་ཞེན་ཅུང་ཙམ་མི་ཞི་བར།།
འཁོར་བའི་ཉེས་དམིགས་ཤེས་པ་རྫུན།།
སྡིག་པ་ཅུང་ཙམ་མི་སྤངས་པར།།
ལས་འབྲས་ཤེས་སོ་ཟེར་བ་རྫུན།།
འགྱོད་པ་སྙིང་ནས་མེད་བཞིན་དུ།།
སྟོབས་བཞིའི་བཤགས་སྡོམ་བྱེད་པ་རྫུན།།
དད་པ་མོས་གུས་ཡེ་མེད་པར།།
ཁ་ནས་སྐྱབས་སུ་མཆི་ཟེར་རྫུན།།
གཞན་ཕན་བག་ཙམ་མེད་བཞིན་དུ།།
བྱང་ཆུབ་སེམས་མཆོག་བསྐྱེད་ཟེར་རྫུན།།
སེར་སྣའི་དྲི་མས་གོས་པ་ཡི།།
ཚོགས་བསགས་མཎྜལ་ཕུལ་ཟེར་རྫུན།།
མོས་གུས་གདུང་བ་མེད་བཞིན་དུ།།
བླ་མའི་རྣལ་འབྱོར་སྒོམ་ཞེས་རྫུན།
སྡིག་བཅུ་ཙམ་ཡང་མི་སྤང་བར།།
སོ་ཐར་སྡོམ་པ་སྲུང་བ་རྫུན།།
ཚིག་རྩུབ་ཙམ་ཡང་མི་བཟོད་པར།།
བྱང་སེམས་སྡོམ་པ་སྲུང་ཞེས་རྫུན།།
རྩ་བའི་བླ་མའི་དམ་ཚིག་ཙམ།།
མ་སྲུང་སྔགས་སྡོམ་སྲུང་ཞེས་རྫུན།།
དམ་པ་གསུམ་དང་མ་འབྲེལ་བའི།།
དགེ་བས་སངས་རྒྱས་ཐོབ་པ་རྫུན།།
གནས་ལུགས་རང་གིས་མ་མཐོང་བར།།
གཞན་ལ་གསལ་འདེབས་བྱེད་པ་རྫུན།།
ཚིག་གི་སྒྲོ་འདོགས་མ་ཆོད་ཀྱང་།།
དོན་གྱི་གནད་རྣམས་ཤེས་ཟེར་རྫུན།།
གཅིག་པུར་དབེན་སར་མི་སྒོམ་པར།།
ཉམས་རྟོགས་འགའ་རེ་ཤར་ཟེར་རྫུན།།
ཐུན་བཞིའི་ཉམས་ལེན་མི་དགོས་པར།།
ཁོ་བོ་མཚམས་པ་ཡིན་ཟེར་རྫུན།།
བདག་འཛིན་སེར་སྣ་ཇེ་ཆེ་རུ།།
སོང་བཞིན་བདག་མེད་རྟོགས་ཞེས་རྫུན།།
ཆགས་སྡང་རྨོངས་གསུམ་ཇེ་ཆེ་བཞིན།།
ངོ་བོ་སྟོང་བ་ཡིན་ཟེར་རྫུན།།
རྒྱུ་རྫས་ནོར་ལ་ཇེ་དགའ་བཞིན།།
ང་ནི་རྟོགས་ལྡན་ཡིན་ཞེས་རྫུན།།
དགྲ་གདོན་གནད་ལ་དམིགས་བྱས་ནས།།
བཟླས་བརྗོད་ཕྱི་མར་ཕན་ཞེས་རྫུན།།
བྱ་བྱེད་གཞན་ལས་མང་བཞིན་ཏུ།།
བྱ་བ་ཐམས་ཅད་བཏང་ཟེར་རྫུན།།
ཁ་འཇམ་ཁོག་ནས་འཁྱོག་བཞིན་དུ།།
ཞལ་ནས་ཅི་བྱ་ཟེར་བ་རྫུན།།
གཅིག་སོང་རྗེས་ནས་གཤེ་ཞིང་སྨོད།།
མཐོང་ཚེ་གྲོགས་མཆེད་ཟེར་བ་རྫུན།།
ཁ་དཀར་ཁོག་ནས་བརྣག་བཞིན་དུ།།
ང་ནི་དྲང་བོ་ཡིན་ཞེས་རྫུན།།
ཁ་མཁས་དོན་ལ་མི་གནས་པར།།
ང་ནི་བོན་ལ་མཁས་ཞེས་རྫུན།།
ཁྱིམ་ནང་རང་དགར་སྤྱོད་བཞིན་དུ།།
སྒོ་སྲུང་མཚམས་ཐོ་བཙུགས་པ་རྫུན།།
མཁྱེན་མིག་གནམ་ལ་བསྒྱུར་བཞིན་དུ།།
མངོན་ཤེས་མང་པོ་སྨྲ་བ་རྫུན།།
བསྐྱེད་རྫོགས་བག་ཙམ་མེད་བཞིན་དུ།།
ཕགསཿསྒྲས་གདོན་བགེགས་འདུལ་བ་རྫུན།།
ཉམས་མྱོང་རང་ལ་མེད་བཞིན་དུ།།
གཞན་ལ་ཡོད་མདོག་བྱེད་པ་རྫུན།།
རང་སྐྱོན་རང་གིས་མ་ཤེས་པར།།
གཞན་ལ་སྐྱོན་འདོགས་བྱེད་པ་རྫུན།།
བདག་འཛིན་འགོང་པོའི་བྱ་མ་རྟ།།
རྫུན་རྒན་བསྟན་འཛིན་དབང་རྒྱལ་ངས།།
རང་སྐྱོན་རང་ལ་ངེས་པ་ཡིན།།
དེ་འདྲ་བྱེད་ན་བརྗོད་མི་ལོང་།།
རང་གིས་རང་ལ་སེམས་མི་དགའ།།
རང་གིས་རང་ལ་སྐྱུགས་རེ་བྲོ།།
རང་གིས་རང་ལ་ཡ་རེ་ང་།།
དེ་ལས་ལྡོག་པའི་ཉམས་རྟོགས་ཤིག།
མྱུར་དུ་ཤར་ཞིང་སྨིན་གྲོལ་ཐབས།།
དམ་པའི་སྐུ་གསུང་ཐུགས་གསུམ་ནས།།
དབང་བཞིའི་དངོས་གྲུབ་བྱིན་རླབས་ཕོབས།།
སྐལ་དམན་སེམས་ལ་ཞུགས་པར་མཁྱེན།།
ཁྱེད་ཀྱི་རྗེས་སུ་འཇུག་པར་ཞུ།།
ཁྱེད་ཀྱི་རྗེས་སུ་སློབ་པར་ཞུ།།།།