གོང་གསལ་ལྟར“ཚངས”དང་“ཚང”ཞེས་ས་མཐའ་ཡོད་མེད་བཞེད་པ་གཉིས་པོ་གང་ཞིག་འཐད་མིན་སོགས་ལ་མ་གཞི་སྙིང་པོ་དེ་དག་ཞང་སྐད་ཡིན་པར་གཞིར་བཅས། རང་ཉིད་གཞི་རྩའི་ཞང་སྐད་ལ་རྨོངས་པའི་དབང་གིས་འདི་རིགས་ལ་ཚད་ལྡན་གྱི་དཔྱད་བརྗོད་བྱེད་པའི་ཆ་རྐྱེན་མ་ལྡན་ཡང་།  དཔྱད་གཞི་དེ་དག་མཇལ་བ་ལ་བརྟེན་རང་གི་བློ་ངོར་ཤར་ཚོད་ཙམ་ནི།  དྲུང་རམས་པའི་འགྲེལ་ཚུལ“ཚངས”ལ་ས་མཐའ་ཡོད་དགོས་ཞེས་པ་གཅིག་པུ་ཙམ་མ་ཡིན་པར་སྐབས་དེའི་སྙིང་པོ་ཆ་ཚང་ལ་འགྲེལ་བཤད་གནང་འདུག་པས་སྤྱི་ཡོངས་ནས་གོ་བ་ལེན་སྟབས་གསལ་པོར་བྱུང་བ་ནི་གོང་འཁོད་ལྟར་ཡིན་པས་ཀུན་གྱིས་མཁྱེན་སླ་ཞིང་།  ཡོངས་འཛིན་རིན་པོ་ཆེས“ཚང”ལ་ས་མཐའ་མེད་པར་བཞེད་པ་དེའི་བརྒྱུད་རིམ་ཁྲོད་ཧོར་བ་དྲུང་རམས་པ་དང་སྐྱང་སྤྲུལ་དྲི་མེད་འོད་ཟེར་སོགས་ཀྱི་བཞེད་ཚུལ་ལ་དཔྱད་གཞིར་གནང་མིན་དང་། གཞན་སྐུ་གསུམ་མེ་ལྷའི་སྙིང་པོ་ཆ་ཚང་ལ་འགྲེལ་བཤད་མཛད་པའི་ཐོག་ནས་གོ་དོན་གང་ཞིག་ལ་ངོས་འཛིན་གནང་མིན་སྐོར་དེ་སྔོན་རང་གིས་མཐོང་ཐོས་གང་ཡང་མ་བྱུང་བས་འདིར་ཡང་དེའི་སྐོར་རྒྱས་བཤད་བྱེད་ཐབས་མ་བྱུང་བས་དེ་ཙམ་དུ་ལུས་ཡོད།         ཀུན་རིག་ལས་བཞིའི་སྦྱིན་སྲེག་སོགས་ཀྱི་དྲི་མཆོད་སྨོན་ལམ་སྐབས་སུ་མཁོ་བའི་སྨོན་ལམ་ཤིང་རིང་ངམ་སྨོན་ཤིང་ངོས་སུ་འབྲི་རྒྱུའི་སྙིང་པོ།  ཨཱོྃ་ཨ་དཀར་ལམ་པ་ཁྲི་མུན་སངས་སྭཱཧཱ།   ནག་པོ་ཞི་ཞི་མལ་མལ་སྨར་སྭཱཧཱ། རྣྲི་ཨ་དཀར་གཤའ་ཡ་ནི་སྨར་སྭཱཧཱ། ཞེས་པ་འདི་ཉིད་སྐྱང་སྤྲུལ་ནམ་མཁའ་རྒྱལ་མཚན༼༡༧༧༠-༡༨༣༢༽དང་།  མཁན་ཉི་མ་བསྟན་འཛིན༼༡༨༡༣-༡༨༦༢༽སོགས་ཀྱིས་བཞེད་འདུག་པ་ལྟར།  ང་ཚོའི་ས་ཆར་ཡོངས་སུ་གྲགས་པ་ཞིག་ཀྱང་ཡིན་པས་སྤྱིར་ན་འདི་ལ་དཔྱད་ཞིབ་དང་གསལ་བཤད་སོགས་གང་ཡང་མི་དགོས་པ་ལྟ་བུར་སྣང་མོད། སྙིང་པོ་འདིའི་བྱུང་ཁུངས་དང་ནང་དོན་སྐོར་ལ་བསམ་ཚེ་ཅུང་ཟད་རྟོགས་དཀའ་བ་ཞིག་ཡིན།  དེ་ཡང་སྙིང་པོ་དེའི་དོན་གྱི་ཐད་ལ་སྐྱང་སྤྲུལ་དྲི་མེད་འོད་ཟེར་རིན་པོ་ཆེས༼༡༩༣༥-༽འགྲེལ་པ་ཞིག་མཛད་འདུག་པ་ནི་ཁོང་གིས་བརྩམས་གནང་བའི«སྦྱིན་སྲེག་གི་རྣམ་བཤད་ཀུན་བཏུས་ལུང་གི་རྒྱན་ཕྲེང»ཞེས་པ་ལས། “ ༡ ཨཱོྃ་ཨ་དཀར་ལམ་པ་ཁྲི་མུན་སངས་སྭཱཧཱ།  ༢ ནག་པོ་ཞི་ཞི་མལ་མལ་སྨར་སྭཱཧཱ། ༣ ནྲི་ཨ་དཀར་གཤའ་ཡ་ནི་སྨར་སྭཱཧཱ། ཞེས་པའི་སྔགས་དེ་གསུམ་གྱི་ནང་དོན་རགས་རིམ་ཙམ་དད་མོས་སྐྱེ་ཕྱིར་བྲི་ན། དང་པོ་ནི། མ་རིག་མུན་པ་སངས་ནས་རིག་པ་ཤར་བར་གྱུར་ཅིག ཅེས་དང་། གཉིས་པ་ནི། འགལ་རྐྱེན་བར་ཆོད་ཐམས་ཅད་ཞི་ནས་བདེ་ལེགས་སུ་གྱུར་ཅིག ཅེས་དང་། གསུམ་པ་ནི། བདག་ཅག་རྣམས་ཀྱི་སྡིག་སྒྲིག་བྱང་ཞིང་དག་པར་གྱུར་ཅིག ཅེས་པ་ལྟ་བུ་ཕལ་ཆེར་ཡིན་ནམ་སྙམ།” ཞེས་གསུངས་ཤིང་ཁོང་གིས་སྔགས་ཚིག་རེ་རེ་བཞིན་མ་ཡིན་པར་སྤྱི་སྡོམ་སྡེ་ཚན་གསུམ་དུ་ཕྱེས་ཤིང་དེ་རེ་རེའི་དོན་མཉམ་དུ་འགྲེལ་བཤད་གནང་བ་དེ་རེད།   ཡང་རང་ངོས་ནས་སྙིང་པོ་འདི་ཉིད་བཀའ་དང་བཀའ་བརྟེན་གང་ཞིག་ནས་བྱུང་བར་_{དྲེལ་དམར་རྒྱུད་འགྲེལ་ཞིག་ཏུ་སྔགས་ཚན་དང་པོ་དེ་ཡོད་པ་དང་། གཞན་ཡི་དམ་གྱི་སྒྲུབ་གཞུང་ཞིག་ཏུ་ཡོད་སྐད་ཙམ་ཐོས་མོད་དཔེ་ཆ་དངོས་མ་མཇལ་བས་ད་ལན་འདིར་བཀོད་མེད།} ད་སྔོན་ཁ་གསལ་ཅན་མཐོང་ཐོས་མ་བྱུང་ཞིང་།  སྤྱང་སྤྲུལ་དྲི་མེད་འོད་ཟེར་མཆོག་ལ་དེའི་སྐོར་བཀའ་འདྲི་ཞུས་པར་ཁོང་གིས་འགྲེལ་པ་དེ་ནི་དོན་ལ་གནས་མིན་ཇི་ལྟར་ཡང་བསམ་ཚོད་ཀྱིས་མཛད་པར་གསུངས་པས་དེ་སྔོན་གསལ་ཁ་ཅན་གྱི་འགྲེལ་པ་ཞིག་ཁོང་གིས་ཀྱང་མཇལ་མེད་ཚོད་རེད་འདུག་ལ། སྙིང་པོའི་བྱུང་ཁུངས་ནི་འདི་ཞེས་གཟིགས་མ་མྱོང་གསུང་གནང་བྱུང་།  དེ་ལྟར་སྐུ་གསུམ་མེ་ལྷ་དང་།   སྨོན་ལམ་ཤིང་རིང་གཉིས་ཀྱི་སྙིང་པོའི་འཕྲོས་དོན་ཙམ་གླེང་བ་འདི་ལ་དམིགས་བསལ་ལུང་དང་རིགས་པ་གསར་པའི་དཔྱད་བརྗོད་གང་ཡང་མེད་མོད།  དེ་སྔོན་མཐོང་ཐོས་བྱུང་རིགས་རྣམས་ཕྱོགས་བསྡུས་དཔྱད་གཞིར་བཀོད་པ་ཡིན་ལ། ཕྱོགས་གཞན་ཞིག་ནི་ང་ཚོའི་ཁོར་ཡུག་ཏུ་འདི་གཉིས་ལྟོས་བཅས་ཀྱིས་རྒྱུ་ཚེགས་གྲགས་པ་གསུམ་ཀ་ཅུང་ཆེ་བའི་གྲལ་ཞིག་ཡིན་པའི་ཁར། དེང་ཆར་ཕྱོགས་ཀུན་ནས་མཁས་བླུན་མང་པོས་དཔྱད་ཞིབ་གནངས་དང་གནང་མུས་ལ། གཞི་རྩའི་དཔྱད་འབྲས་ཆེད་རྩོམ་རིགས་མཐོང་དཀོན་པ་བཅས་ལ་ཉི་མ་མེ་གྲོགས་དང་ཆར་པ་ཆུ་གྲོགས་ཀྱི་དཔེ་ལྟར་དོན་གཉེར་ཅན་ཚོའི་དཔྱད་གཞིར་དམིགས་ཏེ་བྲིས་པ་ཡིན་པས་ད་དུང་ཚིག་དོན་གཉིས་ཆ་ནས་ཁ་གསལ་ཁུངས་ཆོད་ཀྱི་དཔྱད་ཞིབ་ཡོང་བའི་རེ་སྨོན་དང་བཅས་ད་ལན་རྩོམ་ཐུང་འདི་གྲུབ་པར་བྱས་སོ། །༢༠༢༠་༤་༥

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།