ཤེས་རིག་གི་འབྱུང་ཁུངས་ཞང་ཞུང་དུ་བསྐྱོད་པ།

ད་ལོ་2024.7.1ཉིན་སྟོད་ཀྱི་གནས་མཆོག་རི་བོ་གངས་ཅན་ཏི་ཙེ་ལ་གནས་མཇལ་དུ་སོང་བའི་རེག་ཟིག

གླེང་གཞི།

　　དཔེ་ཀློག་གི་ཁྲོད་དང་ཨམ་ཆོག་ཏུ་ཡོང་བའི་ཞང་ཞུང་ནི་ལན་རེ་ཧ་ཅང་ཆེ་ལ་གོ་ལ་ཧྲིལ་བོ་ཞང་ཞུང་ཡིན་པའི་སྣང་བ་བྱུང་ལ་སྐབས་རེར་ཤིན་ཏུ་ཆུང་ལ་ཏུན་ཧོང་ཡིན་རྙིང་ན་གསལ་ཞིང་སད་མ་ཀར་གྱི་མགུར་གླུའི་ཁྲོད་ན་བསྐྱོམས་པའི་ཁྱུང་ལུང་ནི་དངུལ་མཁར་ཞིག་ཅེས་པ་ལྟ་བུ་ཆུང་བར་གནས་པ་ཞིག་སྣང་ན་ཡང་འདི་ནི་འཆར་ཡན་ཙམ། རང་ཉིད་ཀྱི་རིག་པ་གྲོལ་ཚུལ་ལས་ཞང་ཞུང་གི་ཤེས་རིག་གིས་ཁྱབ་ཚུལ་ཐམས་ཅད་ཞང་ཞུང་མིན་ལ་བྱ་རུ་ཐོགས་པའི་རྒྱལ་པོ་དེས་དབང་དུ་བསྡུས་ཚད་ཞང་ཞུང་དུ་བརྩི་ག་ལ་ནུས། ང་ཡི་ཞང་ཞུང་ནི་མིའི་རིགས་ཀྱི་ཤེས་རིག་གི་འབྱུང་ཁུངས་སྟེ་ད་ལྟའི་བཤད་སྟངས་ལས་མངའ་རིས་སྐོར་གསུམ་ཡིན། འདི་ནི་ང་ཁོ་ནའི་བསམ་ཚུལ་ཙམ་མོ། །

རེ་བ་དང་བཅས་ཞང་ཞུང་དུ་བསྐྱོད་པ།

　　ང་རང་ཉིད་སྟོད་ཀྱི་ཞང་ཞུང་སྟེ་མངའ་རིས་སུ་འགྲོ་བའི་ཉི་མ་ནི་སྤྱི་ལོ༢༠༢༤ལོའི་ཟླ་༧པའི་ཚེས་༡དང་ཨ་མདོའི་རྒྱ་རྩིས་ཀྱི་ཟླ་༥བའི་ཚེས༢༦ཡིན། དེ་དུས་ནངས་སྔ་མོ་ནས་མལ་ལས་ལངས་ཏེ་ལྷ་བསང་བཏང་ཞིང་མཇལ་སྐོར་བདེ་ལེགས་སུ་གྲུབ་པར་སྐྱབས་འཇུག་ཞུས་རྗེས་རང་དགོན་བོན་བརྒྱ་དགོན་སྨན་རི་བཤད་སྒྲུབ་སྨིན་གྲོལ་གླིང་ནས་ལམ་ལ་ཆས་པ་ཡིན། ཡར་གྱི་རྩེ་གཞུང་བརྒྱུད་དེ་འབའ་རྫོང་ལ་ཐོན་ཁའི་ལམ་གྱི་སུམ་མདོ་ནས་རང་གི་དབུས་ལ་འགྲོ་རོགས་འཚོ་བྱེད་གཞོན་ནུ་འབྲུག་རྒྱལ་དང་མཉམ་འཛོམས་བྱུང་། དེ་ནས་མགོ་ལོག་བརྒྱུད་དེ་མདོ་སྨད་ཀྱི་གངས་རྒན་ཨ་མྱེས་རྨ་ཆེན་གངས་རི་ལ་བོན་བསྐོར་གྱི་ཚུལ་དུ་བསྐོར་བ་དང་གནས་མཇལ། གནས་བསྟོད་བཅས་གྲུབ་རྗེས་ཡེ་ཤུལ་ཁུལ་དུ་བསྐྱོད་ཅིང་དགོང་མོ་ཞག་འདུག་བྱས། ཚེས་གཉིས་ཉིན་ལམ་ཆས་ཅུང་ཙམ་སྒྲིག་ནས་ངལ་གསོས། ཚེས་གསུམ་ཉིན་རྫ་སྟོད་དང་བོད་ལྗོངས་ནག་ཆུའི་ས་ཕྱོགས་སྦྲ་ཆེན་བོན་གྱི་ཡུལ་ཁམས་ལ་རྒྱང་མཇལ་དང་། སོག་རྫོང་། ནག་ཆུ། གཉན་ཆེན་ཐང་ལྷ། བསམ་གཏན་གངས་བཟང་སོགས་རིམ་པར་བརྒྱུད་ནས་སྟོད་ཀྱི་ཉི་མ་ལྷ་ས་ལ་ཐོན་ནས་ཞག་བསྡོད་བྱས། ཚེས་བཞི་ཉིན་ནངས་སྔ་མོར་མལ་ལས་ལངས་ཏེ་ཇོ་བོ་ཡིད་བཞིན་ནོར་བུ་ལ་མཇལ་ཁ་ཞུས་ཤིང་ཕྱི་དྲོ་ཕོ་བྲང་པོ་ཏ་ལ་དང་ལྷ་སའི་གླིང་ལ་འཆམ་འཆམ་བྱས། ཚེས་ལྔ་ཉིན་ལྷ་སའི་རྟེན་མཛོད་ཁང་དུ་སོང་ནས་རང་གིས་རིག་ན་འདོད་པའི་བོད་ལྗོངས་གནའ་ཤུལ་སོགས་ནས་ཐོན་པའི་རིག་དངོས་སྐོར་ཞིག་ལ་མྱོང་རྟོགས་བྱེད་ཐུབ་པ་བྱུང་། ཚེས་དྲུག་ཉིན་གཞི་ནས་།ཞང་ཞུང་མངའ་རིས་སུ་བསྐྱོད་འགོ་ཚུགས་ཏེ་གཙང་ཆུའི་ཕར་ཀ་ན་གསེར་འོད་ལམ་ལམ་འཕྲོ་བའི་བོན་གྱི་གདན་ས་གཡུང་དྲུང་གླིང་ལ་རྒྱང་མཇལ་དང་གཙང་། ལྷ་རྩེ། དིང་རི། ས་དགའ་རྫོང་ལ་ཅུང་མ་ཐོན་པའི་ལམ་ཁའི་རི་བོ་རྣམས་ནི་ཧ་ཅང་མཐོ་ལ་རེས་འཁོར་ཡང་རི་རྩེ་བརྒྱུད་ནས་བགྲོད་བཞིན་ཡོད་པས་མགོ་བོ་ན་བ་དང་དབུགས་ཀྱི་རྒྱུ་བ་ཡང་དུས་རྒྱུན་གྱི་སྣང་ཚུལ་ལས་ལྡོག་སྟེ་མི་བདེ་བར་གྱུར། ཉེ་འཁོར་གྱི་སོག་པོ་ཚོ་དང་རྒྱ་མི་རྣམས་ལ་དྲིས་ན་ཁོ་ཚོའི་ལུས་ཀྱང་དེ་འདྲ་བདེ་བོ་མི་འདུག་པར་བཤད། གང་ལྟར་ང་ཚོ་ས་དགའ་རྫོང་ལ་ཐོན་ནས་ཞག་འདུག་བྱས། ཚེས་བདུན་ཉིན་འབྲོང་པ་བརྒྱུད་ནས་ཉིན་གུང་ཡོལ་ཙམ་ལ་གཞི་ནས་སྤུ་ཧྲེང་གངས་ཀྱིས་བསྐོར་བའི་ཡུལ་ལམ་ཞང་ཞུང་བོན་གྱི་ལྟེ་བ། སྲིད་པ་བོན་གྱི་བླ་རི། རི་བོ་གངས་ཅན་ཏི་ཙེ་ཡི་དྲུང་དུ་འབྱོར། ཉིན་དེར་ཆར་བ་འབབ་བཞིན་ཡོད་ལ་རི་བོ་དང་ས་གཞི་ཀུན་སྨུག་པས་བཟུང་བས་ཐག་རིང་པོ་ཞིག་དང་རི་བོ་གངས་ཅན་ཏི་ཙེ་སོགས་མིག་གི་ལོངས་སྤྱོད་དུ་གྱུར་མ་ཐུབ་ན་ཡང་། སེམས་སུ་རང་ཉིད་ལྷ་ཡི་ཡུལ་ལམ་དག་པའི་ཞིང་མཆོག་སྟེ་འོལ་མོ་ལུང་རིང་དུ་ཐོན་པ་ལྟ་བུའི་དགའ་བྲོད་ཀྱི་ཚོར་བ་དེ་སྨྲ་བརྗོད་ཀྱི་ཡུལ་ལས་འདས། ཕྱི་དྲོ་བསྐོར་ལམ་བཙལ་བ་དང་ངལ་གསོས། དགུང་མོ་ཉལ་ཁར་དབུགས་རྔུབ་པ་དང་བླ་མ་དཀོན་མཆོག་ལ་གསོལ་བ་རྩེ་གཅིག་ཏུ་བཏབ་ནས་ཉལ།

　　ཚེས་བརྒྱད་ཉིན་གྱི་སྔ་མོ་ནས་མཁས་གྲུབ་བྱེ་བའི་གཙུག་རྒྱན་སྐྱབས་རྗེ་བླ་མ་ཐམས་ཅད་མཁྱེན་པ་༧ཡོངས་གྲགས་སུ་མཁས་དབང་བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་མཆོག་གི་སྐུ་ཡི་གདུང་རྟེན་དང་སྐུ་པར་དད་པའི་འདྲེན་མཆོག རང་ཉིད་ཀྱི་ཞལ་འདོན་ཐར་བའི་ལམ་འདྲེན། རྨོ་རྨོ་དང་ཨ་མ་ཡི་རུས་ཐལ། ཕ་མ་ཟུང་གི་སྐུ་པར་སོགས་འཁུར་ནས་གངས་མདུན་ནས་བོན་བསྐོར་གྱི་ཚུལ་དུ་འགྲོ་འགོ་བརྩམས། འཕྲང་སེར་འཕྲང་དམར་དང་ཤར་ལྷོའི་ཕྱག་འཚལ་སྒང་། དེ་ནས་མཁའ་འགྲོ་བྲོ་ར་དང་མཁའ་འགྲོའི་ཞབས་རྗེས་སོགས་བརྒྱུད་ནས་འགྲོ་དུས་བླ་མ་དཀོན་མཆོག་གི་ཐུགས་རྗེ་བྱིན་རླབས་ཀྱི་མཐུ་ལས་ས་མཐོ་ཡི་གདུང་བ། ལུས་ཀྱི་ངལ་དུབ་སོགས་ཡོངས་སུ་སངས་པར་བྱས། དེ་ནས་ཏི་ཙེ་ཤར་ལྷོ་མི་འགྱུར་བའི་སྟོན་པའི་མཆོག་གྱུར་གཤེན་རབ་མཆོག་གི་ཞབས་རྗེས་དང་། དུར་ཁྲོད། དེ་ནས་རྫུ་འཕྲུལ་ཕུག་ལ་མཇལ། མདུན་གྱི་རི་བོ་ཁྱུང་ཆེན་ལྡིང་བ་དང་ཡེ་ཤེས་ཁྱུང་གི་ཕོ་བྲང་། བདེ་གཤེགས་མཆོད་བརྒྱད་བཅས་ལ་མཇལ། དེ་ནས་བདེ་གཤེགས་སྨན་ལྷའི་ཕོ་བྲང་དང་བྱང་ཤར་མི་འགྱུར་བའི་ཞབས་རྗེས་ལ་མཇལ། དེ་ནས་མཐོ་རིས་ལ་དང་ཁྲུས་ཀྱི་རྫིང་བུ། ཡུམ་ཆེན་བྱམས་མའི་ལྷ་ཚོགས་ཀྱི་ཞིང་བཀོད། མཐོ་རིས་གནས་ནས་ཁ་བཏོན་དགེ་སྦྱོར་དང་འབྲེལ་དྲིན་ཆེན་ཕ་མའི་ཐོགས་དྲངས་ཁམས་གསུམ་འགྲོ་བ་རིགས་དྲུག་ཕན་བཏགས་མ་བཏགས་ཀྱི་སེམས་ཅན་ཐམས་ཅད་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པ་ལ་སྦྱོར་དངོས་རྗེས་གསུམ་གྱི་དགེ་བ་ཡང་དག་པར་བྱས།

　　འདིའི་ས་བབ་མཐོ་ཚད་ལ་རྨི་༥༦༤༨ཡོད་ལ་སྐོར་ལམ་ནས་འདི་ལས་མཐོ་བ་ཞིག་མེད། དེ་ནས་སྡིག་པའི་ལས་ལ་བཤགས་སྦྱང་དང་ཕ་མའི་དྲིན་ལན་འཇལ་ས་ནས་དྲིན་ཆེན་ཡབ་ཡུམ་ཟུང་གི་དྲིན་ལན་གཞལ་མཐའ་མེད་པ་ཞིག་ཡིད་ལ་ངང་གིས་འཁོར་ཞིང་སྐྱོ་བ་དང་ངུ་ངག་ལྷན་དུ་འདྲེས་པའི་སྦྱོར་ལ་བརྟེན་ཏེ་སྨོན་ལམ་འཁོར་བ་ཀུན་འདྲེན་བདེ་བའི་དཔལ་དུ་བསྩལ། གྱད་མིས་བཏེགས་པའི་ཕ་བོང་ལ་རྔམ་བརྗིད་ལྡན་ཞིང་ལས་ཀྱི་མེ་ལོང་གསལ་བར་གནས་པས་རང་སེམས་བདེ་ཞིང་འོལ་མོའི་གླིང་གི་འོད་ཟེར་དེ་སེམས་སུ་ཐོབ་པའི་སྤྲོ་བས་བརྟས། མ་ཏྲིའི་བཟླས་སྔགས་ལས་དུར་ཁྲོད་བརྒྱུད་ནས་འབྲི་ར་ཕུག་ལ་མཇལ་ནས་མདུན་ཕྱོགས་ཀྱི་མགྲོན་ཁང་ཆེ་བ་དེ་ནས་ངལ་གསོ་བྱས། དགོང་ཁ་དེར་སྨུག་པ་དང་སྤྲིན་པ་ཕྱོགས་ནས་ཕྱོགས་སུ་བསྐྱོད་དེ་གནམ་ངོ་དྭངས་ཤིང་གངས་རིའི་རྒྱབ་གཟུགས་ཀྱང་ཧ་ཅང་གསལ་བས་ལེ་དབར་སྟོང་ཕྲག་གི་དཀའ་སྡུག་དེ་གཞི་ནས་སངས། མི་ཚེ་འདིར་རྒྱལ་བ་ཞི་ཁྲོའི་ལྷ་ཚོགས་ཀྱི་ཞིང་མཆོག རྒྱལ་བ་གཤེན་རབ་མི་བོས་བྱིན་གྱིས་རླབས་པའི་གནས་མཆོག རྫོགས་པའི་སངས་རྒྱས་རྒྱལ་བ་གཤེན་རབ་མཆོག་གི་སྐུ་ཡི་རྟེན་མཆོག་འདི་ལ་མཇལ་བའི་སྐལ་བ་ལྡན་པ་འདི་ནི་བསོད་ནམས་བཟང་པོ་ཞིག་ཏུ་སྨིན་པ་སེམས་སུ་ཤར་ནས་གངས་མཇལ་མཛད།

　　ཚེས་དགུའི་ཉིན་འགྲོ་དལ་བའི་ངང་ནས་ཏི་ཙེ་གངས་ཀྱི་ནུབ་བྱང་མི་འགྱུར་བའི་བཀའ་རྟགས་ཞབས་རྗེས་ལ་མཇལ་བར་མ་ཟད་གེ་ཁོད་ལྷ་ཚོགས་ཀྱི་ཞིང་བཀོད་དང་གེ་ཁོད་རང་བྱོན་གྱི་ལྷ་སྐུ་ལ་མཇལ། དེ་ནས་ཆོས་སྐུ་དགོན་གྱི་ཐད་ཀ་ནས་གངས་མཇལ་བྱས་ཏེ་སྨོན་ལམ་གྱིས་མཐའ་བརྩན་པར་བྱས། བོན་གྱི་སྒྲུབ་ཕུག་དང་བོན་གྱི་མཆོད་རྟེན་སོགས་ལ་མཇལ། དུར་ཁྲོད་ནས་བསྔོ་བས་རྒྱས་བཏབ་ཅིང་སྐོར་ལམ་བརྒྱུད་ནས་བསྐོར་བ་ཡོངས་འགྲུབ་བྱས་ཏེ་དར་ཆེན་དུ་ངལ་གསོ་མཛད།

　　ཚེས་བཅུའི་ཉིན་ནངས་སྔ་མོ་ཆུ་ཚོད་བཞིའི་སྟེང་བསྐོར་བ་འགྲོ་བའི་འགོ་བརྩམས་ནས་དགོང་ཁའི་ཆུ་ཚོད་བརྒྱད་ཀྱི་སྟེང་ཕྱིར་དར་ཆེན་གྱི་གནས་མལ་དུ་ཐོན། ཉིན་དེར་གོམ་པ་ཁྲི་བདུན་དང་སུམ་སྟོང་ལྷག་གིས་སྐོར་བ་གཅིག་གྲུབ་པར་བྱས་ནས་ངལ་གསོ་མཛད། བསྐོར་བའི་ཆ་ནས་བོན་བསྐོར་ཚུལ་དུ་འགྲོ་མཁན་གྱི་བོན་པོ་མང་ལ་བན་བསྐོར་གྱི་ཚུལ་འགྲོ་བའི་བནྡེ་ཡང་མང་པོ་འདུག མི་རིགས་ཀྱི་ཆ་ནས་བོད་རྒྱ་སོག་གསུམ་དང་ཕྱི་གླིང་གི་མི་ཡང་དཀར་པོ་དང་ནག་པོ། སེར་པོ་སོགས་འཛོམས་ཡོད། བསྐོར་བ་འགྲོ་སྟངས་ཀྱི་ཆ་ནས་ཕྱག་འཚལ་བ་དང་། རྐང་ཐང་ལ་འགྲོ་བ། རྟ་ལ་བྱོན་ནས་འགྲོ་བ། རྐང་རྗེན་ལ་རྐང་ཐང་དུ་འགྲོ་བ་སོགས་མང་པོ་ཡོད། དེ་ནི་རང་རང་གི་དད་པ་དང་བརྩོན་འགྲུས། སྙིང་སྟོབས་ཀྱི་ཁྱད་པར་ལས་མ་འདས། ལོ་ཚོད་ཀྱི་ཆ་ནས་ལོ་ན་ཧ་ཅང་རྒན་པ་དང་དར་མ། གཞོན་པ། བྱིས་པ་སོགས་ཅི་མང་ཡོད། ད་སྐབས་སྐོར་བ་བྱེད་མཁན་སུ་ཡིན་ན་གཅིག་གཅིག་ལ་གུས་བཀུར་དང་བརྩི་འཇོག་གནང་བ་ཧ་ཅང་ཆེ། ཕན་ཡོན་རྒྱ་ཆེ་བ་ནི་དཀར་ཆག་ལས་གསལ་བ་ལྟར་ན་དགེ་བ་གང་བྱས་ཀྱང་དུང་ཕྱུར་བཅོ་བརྒྱད་ཀྱི་འགྱུར་ཡོད་ལ། དུས་བཟང་ལ་དེ་ལས་ལྡབ་འགྱུར་དང་ཁྱད་པར་རྟ་ལོ་ལ་དེ་ལས་འབུམ་འགྱུར། གངས་བསྐོར་ལ་གོམ་པ་བརྒྱབ་ཚེ་ངན་སོང་ལ་རྡོག་པས་ཕུད་ནའང་མི་འགྲོ་ཞེས་གསུངས་ཡོད། ཚེས་བཅུ་གཅིག་ཉིན་ངལ་གསོ་བྱས།

　　ཚེས་བཅུ་གཉིས་ཉིན་ནངས་སྔ་མོ་ཆུ་ཚོད་བཞིའི་སྟེང་བསྐོར་བ་འགྲོ་བའི་འགོ་བརྩམས་ནས་དགོང་ཁའི་ཆུ་ཚོད་བརྒྱད་ཀྱི་སྟེང་བསྐོར་བ་ཡོངས་སུ་གྲུབ་ནས་སྨོན་ལམ་དང་བསྔོ་བས་རྒྱས་བཏབ་མཛད། ཅུང་ཙམ་ནས་ཉེ་བོའམ་ཡོན་བདག་སྤུ་ཧྲེང་རྫོང་ཐོག་ན་ཡོད་པའི་དཀར་འབུམ་དང་བཟང་འབུམ་རྒྱལ་གཉིས་ཀྱིས་རླངས་འཁོར་བསྐོར་ནས་བསུ་བར་ཡོང་སྟེ་ངེད་ཚོ་ལྷན་ཅིག་སྤུ་ཧྲེང་རྫོང་ལ་སོང་ནས་ངེད་གཉིས་ལ་སྣེ་ལེན་གང་ལེགས་བྱས། ཚེས་བཅུ་གསུམ་ཉིན་ཉེ་བོ་དཀར་འབུམ་གྱིས་སྣེ་ཤན་བྱས་ནས་འཁོར་ཆགས་དགོན་གྱི་ཇོ་བོ་དང་ལྡེབས་བྲིས་ལ་མཇལ། ལྡེབས་བྲིས་ལ་སྔ་ཕྱི་གཉིས་དང་ཇོ་བོའི་སྐུ་གཟུགས་བཞེངས་སྟངས་དེ་དང་འཇར་མན་ན་ཡོད་པའི་མདོ་གཟེར་མིག་གི་མཆོད་ལྷ་འབྲི་སྟངས་གཉིས་ཀ་ཅུང་འདྲ་བོའི་ཚུལ་དུ་གནས། དེ་ནས་སྤུ་ཧྲེང་སྟག་ལྷ་མཁར་སོགས་སུ་བསྐྱོད་ནས་ཕྱི་དྲོ་ཁོང་བཟའ་ཟླ་གཉིས་ཀྱིས་སྣེ་ལེན་གཟབ་རྒྱས་མཛད་ནས་ངལ་གསོས། ཚེས་བཅུ་བཞིའི་ཉིན་སྔོ་མོ་ནས་ཕུ་བོ་དཀར་འབུམ་དང་ངེད་གསུམ་སྤུ་ཧྲེང་རྫོང་དང་གྱེས་ཏེ་སྟག་རི་ཁྲ་བོ། མ་མོ་སྟག་རི་རོང་གི་བླ་མཚོ་མུ་ལེ་མཚོ། མ་ཕམ་གཡུ་མཚོ། སྟོན་པ་གཤེན་རབ་མི་བོ་མཆོག་གིས་མདོ་ཁྲི་རྗེ་ལུང་བསྟན་གསུངས་སའི་གནས་ཕུན་སུམ་ཚོགས་པ་གངས་རིའི་མདུན་གྱི་ད་ལྟའི་རྒྱང་གྲགས་དགོན་པ། སྤོས་རི་ངད་ལྡན་སོགས་ལ་མཇལ་ནས་སྒར་རྫོང་གི་ཕྱོགས་སུ་བསྐྱོད་དེ་ཁྱུང་ལུང་དངུལ་མཁར་དང་། དམུ་གཤེན་དྲན་པ་ནམ་མཁའི་སྒྲུབ་ཕུག གུར་གྱམ་དགོན། དམུ་གཤེན་མཆོག་གི་གཡུང་དྲུང་རིས་ཅན་གྱི་སྐུ་མཆོག རྟེན་མཆོག་མང་པོ་ལ་མཇལ། བླ་མ་ཚུལ་ཁྲིམས་ཕུན་ཚོགས་ཀྱིས་རོགས་རམ་ཁྲོད་དཔྱད་གཞི་ལ་རིན་ཐང་ཧ་ཅང་ཆེ་བའི་གུར་གྱམ་བང་སོ་ནས་ཐོན་པའི་གསེར་ཞལ་དང་དངོས་པོ་མང་པོ། མཁར་ཤུལ་ནས་ཐོན་པའི་དངོས་མིན་སྣ་ཚོགས། བྱ་རི་གཙུག་ལྡན་སོགས་ལ་མཇལ་བའི་སྐལ་བ་ལྡན་པ་ནི་བསོད་ནམས་ཀྱི་དཔལ་དུ་འཁུམ།

　　གང་ནས་འཛོམས་ཀྱང་དེ་ནས་གྱེས་དགོས་པ་ནི་བོན་ཉིད་ཡིན་པས་ཕྱིར་མོན་མཚེར་ཤང་ནས་ངེད་གཉིས་ཁོང་དང་ཁ་གྱེས་ཏེ་མངའ་རིས་ཁུལ་དུ་ཆས། སྤྱིར་ངེད་གཉིས་ལམ་གྱི་ཆ་ནས་མངའ་རིས་ཁུལ་ལ་ཡོང་དགོས་དོན་མེད་མོད་བོད་ལྗོངས་མངའ་རིས་རྩ་མདའ་རྫོང་ཆུ་མདའི་བང་སོ་ནས་རྙེད་པའི་གསེར་ཞལ་དེ་༼མངའ་རིས་དངོས་མང་བཤམས་སྟོན་ཁང་༽ ན་ཡོད་པས་དེའི་ཞིབ་འཇུག་གི་ཆེད་ཡིན། དགོང་མོ་མངའ་རིས་ཁུལ་ནས་ངལ་གསོ་བྱས།

　　ཚེས་བཅུ་བཞི་ཉིན་ནངས་མོ་༼མངའ་རིས་དངོས་མང་བཤམས་སྟོན་ཁང་༽དུ་སོང་ཡང་ཉིན་དེར་གཟའ་ཉི་མ་ཡིན་པས་བཤམས་སྟོན་ཁང་གི་སྒོ་ཕྱེ་མི་འདུག གཟའ་ཟླ་བའི་ཉིན་གྱི་ཆུ་ཚོད་བཅུ་བ་མ་གཏོགས་གསེར་ཞལ་ལ་མཇལ་དཀའ། དེ་ནས་ངེད་གཉིས་རླངས་འཁོར་འབབ་ཚིགས་སུ་སོང་ནས་ཕྱི་ཉིན་གྱི་རེས་འཁོར་འཛིན་བྱང་ཉོས་ནས་ངེད་གཉིས་རྩ་མདའ་རྫོང་གི་གུ་གེ་མཁར་ཤུལ་ལ་མཇལ་བར་སོང་ནས་ལམ་ཁའི་སྒོ་ཆེན་གྱི་ཐེམ་ངོས་སུ་༼ཞང་ཞུང་གི་གནའ་ཉམས་ལྡན་པའི་གུ་གེ་མཁར་གྲོང་གིས་སྐུ་ཉིད་ལ་བསུ་བ་བྱེད་༽ཅེས་པའི་སྒོ་བྱང་ཡི་གེ་དེར་མཐོང་དུས་རང་གི་སེམས་སུ་༼ཞང་ཞུང་༽ཞེས་པའི་མིང་བརྡ་དེ་ཡང་བསྐྱར་གསོན་ཤུགས་རྒྱས་པའི་ཡང་སྙིང་དེ་ཅི་ཡིན་ནམ་སྙམ་པའི་དྲི་བ་ཞིག་དང་། ད་ལྟ་༼མངའ་རིས་༽བསུབ་ནས་༼ཞང་ཞུང་༽བཀོད་སྤྱོད་བྱེད་པ་ནི་ཏི་ཙེ་གངས་འདབས་ཀྱི་རིག་གནས་དེའི་རྒྱབ་ལྗོངས་མཐུག་པ་དང་། ཡང་ན། ཏི་ཙེ་གངས་འདབས་ཀྱི་རིག་གནས་དེའི་ལོ་རྒྱུས་ཀྱི་རྒྱུན་རིང་བས་ཡིན་ནམ་སྙམ་པའི་དྲི་བ་དག་ངང་ངམ་ཤུགས་ཀྱིས་བྱུང་། དེ་ནས་མཁའ་ཤུལ་དང་གུ་གེ་ལྡེབས་བྲིས། མཐོ་ལྡིང་ལྷ་ཁང་སོགས་སུ་མཇལ་ནས་ཕྱིར་ཁུལ་ལ་ཡོང་ནས་ངལ་གསོས།

　　སེམས་སུ་སྐྱོམ་པའི་ཚིག་གི་འཕྲེང་བ་འདི་པར་དང་བཅས་སྐད་འཕྲིན་གྱི་གྲོགས་པོའི་ཚོམས་སུ་བཀོད། མིག་ཆུ་དང་སྐྱོ་ངག་གི་ཁྲོད་ན་འགྲེང་བའི་གུ་གེ་མཁར་ཤུལ/ ཤུགས་རིང་དང་ཉམ་ངའི་ཀློང་ན་བསྐྱོམས་པའི་གུ་གེ་མཁར་ཤུལ/ དེ་ནི/ གསེར་ཁྲིའི་ཡང་སྟེང་ནས་བསྡད་མྱོང་བའི་བླ་མ་དེས་ཁྱོད་རང་རྨེག་མེད་དུ་བཟོས་པ་ཡིན་ནམ/ ཅང་མ་འགོར་བར་རྩོམ་གྲོགས་ས་ཁའི་བློ་ལྡན་གྱིས་གནས་རྙིང་ཞང་ཞུང་མཐིལ་གུ་གེའི་གནའ་མཁར་གྱིས་ཁྱེད་ལ་རེ་ཞིང་སྒུག་ནས་བགྲང་བྱ་ཅི་ཙམ་འགོར་ཨང་ཞེས་ཞབས་མཆན་བཀོད་པ་ལ་རང་གིས་ཀྱང་ཡུན་རིང་ཞེས་བཀོད་ཅིང་ཁོང་གིས་གསོན་ཉམས་ལྡན་པའི་ཚིག་འདི་ལྟར། གུ་གེ/ སྤུ་རྒྱལ་དུས་ཀྱི་ཁྱེད་རང་/ དབོན་སྲས་སྲོང་ངེ་དང་ཆབས་ཅིག/ རྒྱལ་རབས་ཀྱི་མཚན་སྙན་གྲགས་ཤིང་གདུང་རྒྱུད་ཆད་པ/ ལོ་རྒྱུས་ཀྱི་བཤད་སྟངས་ཙམ་ག་ལ་ཡིན/ དེ་ནི/ བོད་དང་སུམ་པའི་སོ་མཚམས/ ཞང་ཞུང་སྨད་ཀྱི་སྟོང་སྡེའི་གྲས་ཡིན་ལ/ གུ་གེའི་རྒྱལ་པོའི་མཁར་ཤུལ་དང་ཁུལ་གཅིག་ཏུ/ ཀྲོང་ངེ་འགྱིང་ངེར་འདུག་པ་ལ་ཨང་/ ཞེས་ཞབས་མཆན་བཀོད། དེའི་ཡང་སྙིང་ན་ལོ་རྒྱུས་ཀྱི་གོད་ཆགས་ཤིག་ངང་ངམ་ཤུགས་ཀྱིས་བྱུང་།

༼རྩ་མདའ་རྫོང་གི་ཆུ་མདའི་བང་སོ་ནས་ཐོན་པའི་གསེར་ཞལ་༽བཙལ་བའི་ལས་རིམ།

　　ཚེས་བཅོ་ལྔའི་ནངས་མོ་ནི་ང་ལ་མཚོན་ན་བྲེལ་ཚུབ་ཆེ་བའི་དུས་ཤིག་རེད། ཆུ་ཚོད་བཅུ་བ་ནི་༼མངའ་རིས་དངོས་མང་བཤམས་སྟོན་ཁང་༽གི་སྒོ་ཕྱེ་བ་དང་ལྷ་སའི་རེས་འཁོར་འགྲོ་བའི་དུས་ཚོད་ལ་འཁེལ་ཡོད་པས་ཡིན། གང་ལྟར་རྩ་མདའ་རྫོང་ཆུ་མདའི་བང་སོ་ནས་རྙེད་པའི་གསེར་ཞལ་དེས་ངའི་སེམས་སུ་བག་ཆགས་ཟབ་མོ་ཞིག་བཞག་ཡོད། རྒྱུ་མཚན། འཛམ་བུ་གླིང་གི་ཤར་ནུབ་ཀུན་ན་གསེར་ཞལ་མང་མོད་ངས་མཐོང་བའི་ཁྲོད་ནས་“གཤིན་པོའི་དོ་མའི་རིག་གནས་”རྒྱས་པར་མཚོན་པ་ནི་ཆུ་མདའི་གསེར་ཞལ་ཡིན། དེའི་སྟབས་ཀྱིས་ད་ཐེངས་རིག་ཐབས་བྱེད་དགོས། ཆུ་ཚོད་དགུ་བའི་སྟངས་གྲོགས་པོ་དང་ངེད་གཉིས་རླངས་འཁོར་ས་ཚིགས་སུ་སོང་ནས་ཅ་ལག་དང་འཛིན་བྱང་གྲོགས་པོའི་ལག་ཏུ་བཞག་སྟེ་ཚང་མ་མངགས་བཅོལ་བྱས་ནས་ང་རང་གཞི་ནས་བཤམས་སྟོན་ཁང་དུ་སོང་དུས་ཕྱི་ཡི་སྒོ་ཕྱེ་ན་ཡང་ནང་གི་སྒོ་ཕྱེ་མི་འདུག དེ་ན་ཞབས་ཞུ་བ་ཕོ་གསར་གཉིས་ཡོད་པ་ལ་དྲིས་ཀྱང་ཆུ་ཚོད་བཅུ་བའི་སྟེང་མ་གཏོགས་མི་ཕྱེ་ཟེར། ཞོགས་ཇ་སྟབས་བདེ་ཞིག་འཐུང་ནས་ཡང་བསྐྱར་སོང་ཚེ་ནང་གི་སྒོ་ཆེན་ཡང་ཕྱེ་འདུག མགྲོན་པོ་འགའ་ཡང་ཐོན་ཡོད་ན་ཡང་ངང་སྒུག་བྱས་ཡོད། འགྲམ་གྱི་ཁང་མིག་ཅིག་ནས་ཕོ་གསར་འཛོམ་པོ་ཞིག་གིས་ལག་ཏུ་ཡིག་ཆ་འགའ་བཟུང་ནས་ཚུར་ལ་ཡོང་ནས་ཞབས་ཞུ་བའི་ཁང་མིག་ཏུ་འཛུལ། ཕར་ལྟོས་ཚོད་ལ་ཁོང་ནི་འགོ་ཁྲིད་ཅིག་ལོས་ཡིན་སྙམ་པའི་ཚོར་བ་བྱུང་། རང་ཡང་དེར་སོང་ནས་ཁོ་ལ་ཉམ་ཆུང་ཆུང་གིས་ང་རང་ཨ་མདོའི་མཇལ་བ་ཞིག་ཡིན་པ་དང་། ཆུ་ཚོད་བཅུ་བའི་སྟེང་ལྷ་སའི་རེས་འཁོར་འགྲོ་བཞིན་ཡོད་པ། ཆུ་མདའི་གསེར་ཞལ་ལ་ལྟ་རྒྱུ་ནི་ངའི་རེ་བ་ཉག་ཅིག་ཡིན་པ་རྣམས་ཡར་ཞུ་ཞུས་ཚེ་ཁོས་གུས་ཞབས་ཀྱི་ཚུལ་དུ་ཁྱེད་རང་ཕེབས་ཆོག་ཅེས་ཞབས་ཞུ་བ་ལ་བཤད། ང་རང་སྤྲོ་བས་བརྟས་ནས་ནང་ལ་སོང་ཡང་གསེར་ཞལ་ཁང་བ་གར་ཡོད་མི་ཤེས་པས་ཞབས་ཞུ་བ་ལ་དྲིས་ནས་ཞབས་ཞུ་བས་རོགས་སྒྲུབ་བྱེད་ཀྱང་ཅུང་འགོར་སོང་། བར་སྐབས་སུ་རོགས་པའི་ཁ་པར་ཐོན་ནས་རླངས་འཁོར་འགྲོ་འགོ་བརྩམས་བྱུང་ཟེར། ཏག་ཏག་ཆུ་ཚོད་བཅུ་བ་ལ་ཐོན་འདུག ཁྱོད་སོང་དང་ང་མྱུར་བར་ཐོན་ངེས་ཡིན་ཞེས་བཤད། དེ་ནས་མངའ་རིས་སམ་ཞང་ཞུང་གི་ཅ་ལག་རྙིང་བ་སྐོར་ཞིག་དང་གསེར་ཞལ་སོགས་ལ་ལྟ་རྒྱུའི་གོ་སྐབས་རགས། དེ་ནས་ཕྱི་རོལ་ཏུ་ཡོང་སྟེ་གླ་གཏོང་ཞིག་བཀག་ནས་རེས་འཁོར་གྱི་རྗེས་སྙེག གྲོང་ཁྱེར་ཕྱི་རོལ་གྱི་ལམ་འགྲམ་ཞིག་ནས་རྗེས་ཆོད། རང་བློ་བདེ་བར་གྱུར། སེམས་སུ་ཆུ་མདའི་གསེར་ཞལ་ནི་གུར་གྱམ་བང་སོ་ནས་ཐོན་པའི་གསེར་ཞལ་ལས་ཧ་ཅང་ཆེ་ལ་གསེར་ཞལ་གྱི་མགོ་རྒྱན་དང་བཅས་ཚང་བར་ཡོད་པར་མ་ཟད་མགོ་རྒྱན་སྟེང་གི་གྲིབ་གཟུགས་ནི་“གཤིན་པོའི་དོ་མའི་རིག་གནས་”ཀྱི་ཆ་ཡོངས་སུ་རྫོགས་ཡོད། འདི་ནི་རང་རྒྱལ་གྱི་སྐར་གསུམ་ཕུང་པོའི་གསེར་ཞལ་དང་། སོག་པོ་ནས་ཐོན་པའི་གསེར་ཞལ། གཞན་ནུབ་ཕྱོགས་ན་གནས་པའི་གནའ་བོའི་གྷི་རི་སིའི་གསེར་ཞལ། ཨེ་ཅིབ་ཀྱི་གསེར་ཞལ་རྣམས་ཀྱི་ནང་ནས་རྒྱལ་པོའམ་མཆོག་གྱུར་ཏུ་གནས་ཡོད་པར་སྙམ། བསམ་གཞིག་མང་པོ་ཞིག་གི་ཁྲོད་ནས་དར་ཆེན་ལ་ཐོན་དུས་གངས་ཅན་ཏི་ཙེ་ཡི་ཞལ་བཟང་མཇལ། གསོལ་འདེབས་དང་སྨོན་ལམ་གྱི་ཁྲོད་ནས་བྱིན་རླབས་དང་བཅས་ཞི་ཐིམ་མཛད། དགོང་མོ་ལྷ་རྩེ་ཐོན་ནས་ངལ་གསོ་བྱས།

　　ཚེས་བཅུ་དྲུག་ཉིན་གཙང་བརྒྱུད་ནས་ལྷ་སར་ཉིན་གུང་ཙམ་ལ་སླེབས། ཕྱི་དྲོར་རྟེན་རྫས་འགའ་རེ་སྒྲིག་ནས་འཆམ་འཆམ་བྱས། སྟབས་ལེགས་པ་ཞིག་ལ་བདག་ལ་བཀའ་དྲིན་བླ་ལྷག་ཏུ་ཆེ་བའི་སློབ་དཔོན་དགེ་བའི་བཤེས་གཉེན་ཆེན་མོ་སྒོ་རིགས་མཁན་པོ་ཤེས་རབ་གྲགས་པ་ཚང་ལ་མཇལ་ནས་འཛོམ་པ་ཡག་མོའི་བོད་ཟས་ཁང་ནས་སྤྲོ་དགའི་ངང་བོད་ཟས་ལ་བརྟེན་ནས་ཞལ་བརྡ་མཛད་པའི་སྐལ་བ་ཐོབ། དཔོན་གསས་ཁོང་གིས་འདུག་ཁོམ་ཡོད་ཚེ་ལྷ་སའི་ཕྱོགས་གང་ལ་འགྲོ་ན་སྟབས་བདེ་བའི་སྐུལ་བརྡ་བཏང་ཡང་ཅུང་མ་ཁོམ་པའི་ཚུལ་དེས་གྱེས་ཕྱག་འཇོག་དགོས་བྱུང་།

༼མངའ་རིས། ཞང་ཞུང་བསུབ་ཤུལ་གྱི་མངའ་རིས་༽ཞེས་པའི་སྙན་ངག་ཅིག་གི་ཁ་བྱང་དྲན་ཚུལ།

　　ཚེས་བཅུ་བདུན་ཉིན་གྱི་སྔ་མོར་ལྷ་ས་ནས་ཡེ་ཤུལ་ལ་བསྐྱོད་འགོ་བརྩམས། ལམ་སྐབས་ནས་མཇལ་ཟིན་པ་རྣམས་ལ་ཕྱིར་དྲན་ཞིག་བྱེད་སྐབས་སྟོན་པ་གཤེན་རབ་མྱི་བོའི་སྐུ་རྗེས་མི་ལ་རས་པའི་ཡིན་ཚུལ་དང་། ཡིད་ཀྱི་ཁྱེའུ་ཆུང་ཞབས་རྗེས་ན་རོ་བོན་ཆུང་གི་ཡིན་ཚུལ། ཁྲོ་བོ་འཆི་མེད་བདུད་འདུལ་གྱི་སྐུ་རྟ་མགྲིན་གྱི་སྐུ་ཡིན་ཚུལ། གྱད་ཀྱི་ཕྱག་རྗེས་རྒོད་ཚང་བའི་ཡིན་ཚུལ། དབལ་ཐིམ་མེ་རི་ཕུག་པ་འབྲི་ར་ཕུག་ཡིན་ཚུལ། མཐོ་རིས་ཐེམ་སྐས་སྒྲོལ་མ་ལ་ཡིན་ཚུལ། ག་ལྗང་གཡུ་ལོ་རྫོང་མཁར་ནི་རྒྱང་གྲགས་དགོན་པ་ཡིན་ཚུལ་སོགས་མང་པོ་ཡོད་ལ། རྒོད་ཚང་བའི་ལོ་རྒྱུས་ཡིག་ཚངས་རྙིང་བའི་ནང་དུ་རྒོད་ཚང་བ་གངས་ཏི་ཙེ་ལ་ཕེབས་པ་ལས་ཕྱག་རྗེས་དང་དབུ་རྗེས་ཡོད་པའི་ལོ་རྒྱུས་མི་འདུག མི་ལ་དང་ན་རོ་གཉིས་ཀྱི་གཏམ་རྒྱུད་དེ་ཨ་མ་རི་བོང་དང་ཨ་ཁུ་སྤྱང་ཀིའི་གནའ་གཏམ་ཅི་བཞིན་ལོ་རྒྱུས་ཀྱི་དོན་དངོས་དབེན་པ་མཁས་པ་མང་པོས་བསྒྲུབས་ཡོད་ལ་རང་ཉིད་ཀྱིས་བྲིས་པའི་དཔྱད་རྩོམ་༼མི་ལ་རས་པའི་སྐོར་ལ་ཟུར་ཙམ་དཔྱད་པ་༽ཞེས་པར་ཤིན་ཏུ་གསལ་བས་འདིར་མི་སྤྲོ།

　　དེ་རྣམས་ཡིད་ལ་དྲན་པས་བྱ་གཞུང་དབྱངས་བྷའི་སྙན་ངག་ཅིག་གི་ཁ་བྱང་དེ་ཡིད་ལ་ཝ་ལེར་མངོན་བྱུང་། ༼མངའ་རིས། ཞང་ཞུང་བསུབ་ཤུལ་གྱི་མངའ་རིས་༽ཞེས་པ་དེ་ཡིན་ལ་ཅི་མ་བདེན་སྙམ་པའི་འདོད་བློ་དེ་འགོག་མེད་དུ་ཤར། རྩོམ་དེའི་ཚིག་འགའ་དྲངས་ན། ངས་གཤེན་རབ་མི་བོ་ཆེ་དྲན་བྱུང / ངས་ཞང་ཞུང་དྲན་བྱུང / ནག་སུབ་བཏང་ཚར་བའི་ཤེས་རིག་གི་ལུང་བ་ཞིག་ནས / ནག་སུབ་བཏང་ཚར་བའི་ཤེས་རིག་གི་མི་བོ་ཆེ་ཞིག་དྲན་དུས / རང་ཉིད་ཀྱི་ཤ་ཁྲག་རུས་པའི་གསེང་དང་ཕ་ས་ཕ་ཡུལ་གྱི་བླ་སྲོག་ངོས་ནས / རྩ་ཆེ་བ་ཅི་ཞིག་སྔར་ནས་གོ་རིམ་ལྡན་པའི་ངང་ནས་ནག་སུབ་བཏང་ཚར་བ་ཚོར / ནག་སུབ་གཞན་དག་ཀྱང་གོ་རིམ་ལྡན་པའི་ངང་ནས་བྱུང་དང་འབྱུང་གིན་པ་ཚོར / སྙིང་ཉེ / ནག་སུབ་ཅེས་པའི་འབྱུང་རྩ་ལོ་རྒྱུས་དང་བཅས་པ་ངས་ཤེས་ཡོད / དེ་ལྟར་དུ་བཤད་ཡོད་ལ་ལོ་རྒྱུས་ལ་ཕྱིར་མིག་ཅིག་ལྟོས་ན། སྲོང་བཙན་སྒམ་པོས་ཞང་ཞུང་ནག་བསུབ་བཏང་བའི་གྲོས་འགོ་བཏོན་ཞིང་ལྷ་བླ་མ་ཡེ་ཤེས་འོད་ཀྱིས་"བོན་པོ་ཐམས་ཅད་བསྡུས་ནས་ཁང་བ་གཅིག་ཏུ་བཅུག་ནས་ཧོཾ་༼མེ་༽ལ་གཤེགས་སུ་གསོལ་ལོ། །བོན་དཔེ་འགའ་ཞིག་ཆབ་༼ཆུ་༽ལ་སྦྱངས། འགའ་ཞིག་ཞུགས་༼མེ་༽པར་གསོལ་ལོ། །འགའ་ཞིག་སར་གཞུག་པར་གསོལ་ལོ། །འགའ་ཞིག་དྲི་བཞོན་ལ་སྤྱན་དྲང་བར་བྱའོ། །"ཞེས་བོན་དང་བོན་པོ་འབྱུང་བའི་ཚོགས་ལ་བསྟིམ་པས་ནག་བསུབ་ཏུ་བཏང་། མི་ལ་སོགས་ཀྱིས་སྟོན་པ་གཤེན་རབ་མྱི་བོའི་གནས་རི་དང་ཕྱག་ཞབས་ཀྱི་རྗེས་ལ་སོགས་པ་བཅོས་བསྒྱུར་བྱས་པས་ནག་བསུབ་ཏུ་བཏང་། འདི་ནི་བོན་དང་བོན་པོ་བཅོམ་པ་ཙམ་མ་ཡིན་པར་བོད་གདོད་མའི་ཤེས་རིག་ཅིག་ནག་བསུབ་ཏུ་བཏང་བའི་གོད་ཆགས་རེད།

　　"ཞང་ཞུང་གི་གནའ་ཉམས་ལྡན་པའི་གུ་གེ་མཁར་གྲོང་གིས་སྐུ་ཉིད་ལ་བསུ་བ་བྱེད་"ཅེས་དང་། ཞང་ཞུང་གི་གནའ་ཉམས། མཁའ་དབྱིངས་ཀྱི་མངའ་རིས་"ཞེས་པ་སོགས་ཀྱིས་ང་ཚོ་ལ་སྤྱི་ཚོགས་གསར་བ་ཞིག་ཡོད་པ་དང་བསྔོགས་འདོན་གྱི་ཁྲོད་ནས་ཞང་ཞུང་དང་ཞང་ཞུང་ཤེས་རིག་འཕེལ་རྒྱས་སུ་འགྲོ་བཞིན་པ་ཚོར་ཐུབ་པའི་སྣང་བ་བྱུང་། ཕྱི་དྲོ་ཡེ་ཤུལ་ལ་ཐོན་ནས་ངལ་གསོ་བྱས། ཚེས་བཅོ་བརྒྱད་ཉིན་ཕ་ཡུལ་ལ་འབྱོར། ད་ཐེངས་བསམ་པའི་ངོ་ལ་མངའ་རིས་དང་ལྷོ་ཁ་གཉིས་ལ་འགྲོ་འདོད་པ་ཡིན་མོད་དུས་ཚོད་ཀྱི་རྐྱེན་པས་དེ་ལྟར་དུ་མཇལ་ནས་བསམ་པའི་རྒྱགས་ཕྱེ་མང་དུ་ཐོབ་པ་ནི་བང་མཛོད་ནང་གི་གསེར་དང་མཚུངས་སོ། །

སྤྱི་ལོ༢༠༢༤་༡༡་༨ཉིན་སེ་བོན་ཤེས་རིག་འཚོལ་ཞིབ་གླིང་ནས་བྲིས།