བོན་གྱི་ཡིག་ཆ་འགའ་དང་བོན་མིའི་བསམ་བློ་ལ་འོལ་མོ་ལུང་རིང་དུ། ས་ཐོབ་སེམས་དཔའ་མ་གཏོགས་སེམས་ཅན་ཕལ་པ་རྣམས་ཀྱི་དབང་པོའི་མཐོང་ཡུལ་དུ་མ་གྱུར་བའི་ངོས་འཛིན་ཡོད་པ་མ་ཟད། འབེལ་གཏམ་ལུང་གི་སྙིང་པོ་ལས་ཀྱང་‘‘ས་སྟེང་འདིར་བརྟགས་ཏེ་བཙལ་ན་བླུན་’’3 ཞེས་གསུངས། ལྟ་བ་དེ་ལྟར་ཁུར་བ་ནི། སྟོན་པའི་རྣམ་ཐར་གཟེར་མིག་4དང་མདོ་འདུས་སོགས་ལས་འོལ་མོ་ལུང་རིང་སྐྱེ་འགག་གི་མཐའ་དང་བྲལ་བར་བསྟན་ཞིང་འཇིག་རྟེན་འདི་མེ་ཡི་འཇིག་པས་སྟོང་སྐབས་འོལ་མོ་ལུང་རིང་གནམ་ལ་འཕགས་ནས་བདེ་པ་ཅན་གྱི་ཞིང་ཁམས་ཤིག་ཏུ་ཐིམ་འགྲོ་བར་གསུང་པའི་དོན་ནོ། །དེས་ན་བོན་པོའི་སྤྱི་ཚོགས་ཁྲོད་དུ་འོལ་མོ་ལུང་རིང་འཇིག་རྟེན་འདིར་ཡོད་མེད་ལ་དོ་སྣང་མི་བྱེད། ཡིན་ན་ལས། དད་པའི་ཤན་ཤུགས་ཀྱིས་དངོས་པོ་ཞིག་དེ་ལྟར་སྐྱེ་འགག་མཐའ་ལས་བྲལ་བར་འདོད་པ་བོན་པོ་ཁོ་ནའི་ལྟ་བ་མ་ཡིན་པར། སངས་རྒྱས་ཆོས་ལུགས་ཀྱི་ནང་དུ་ཡང་འཇིག་རྟེན་འདི་འཇིག་སྐབས་རྡོ་རྗེ་གདན་མཁའ་དབྱིངས་སུ་འཕགས་ཤིང་འཇིག་མི་ཐུབ་པར་སྨྲས་ཡོད། ལྟ་བ་དེ་དག་ནི། དད་པ་དག་སྣང་གི་སྒོ་ནས་བཤད་པ་ཞིག་ཏུ་འཁུམས།  མཐའ་གླིང་ནི་ཡུལ་ཆེན་བཅུ་དྲུག་ཡོད་ལ། གདུང་རྒྱུད་རྒྱལ་པོ་དྲུག་གི་མངའ་ཁོངས་ཡིན། གླིང་དེ་དག་གི་མཐའ་ནས་མཚོ་དང་མཚེའུ་གངས་རི་དང་སྤང་ལྗོངས་ཉམས་དགའ་ཡིད་འོང་ལྡན་པའི་ཡུལ་གྲུ་ཆགས་པར་གསལ། བར་གླིང་བཅུ་གཉིས་ཀྱི་ནང་ཚན་གྲོང་ཁྱེར་བཞི་པ་རྒྱ་ལག་འོད་མ་ཞེས་པ་དེར་ཀོང་ཙེ་འཕྲུལ་གྱི་རྒྱལ་པོ་བཞུགས། རྒྱ་ལག་འོད་མ་གླིང་གི་མཐའ་སྐོར་དུ་མི་ཁྱུད་བདལ་པའི་རྒྱ་མཚོ་འཁྱིལ། མུ་ཁྱུད་བདལ་པའི་མཚོ་གླིང་དུ་ཀོང་ཙེ་འཕྲུལ་གྱིས་གསས་ཁང་དཀར་ནག་བཀྲ་གསལ་བཞེངས་ནས། གསས་ཁང་དེ་ནི་སྟོན་པ་གཤེན་རབ་ཀྱི་གསུང་སྒོ་བཞི་མཛོད་ལྔ་རྗེས་བཞག་མཛད་པའི་གནས་སུ་གྱུར། རྒྱ་ཀོང་ཙེ་འཕྲུལ་རྒྱལ་ནི། སྟོན་པ་གཤེན་རབ་ཀྱི་སློབ་བུ་དང་། ཡོན་བདག་ཆེན་པོར་ཞིག་ཏུ་མཆིས། བོན་གྱི་དཔེ་གཞུང་ལྟར་ན་མུ་ཁྱུད་བདལ་པ་ནི་འོལ་མོ་གླིང་གི་ནུབ་ཕྱོགས་སུ་ཡིན་པར་བཤད་ལ། འོལ་མོ་ལུང་རིང་ནི་མཐའ་ཡི་དུར་ཁྲོད་བརྒྱད་དང་། མུ་ཁྱུད་བདལ་པའི་མཚོ། དབལ་སོ་གངས་ཀྱི་ཕྲེང་བས་ཁོར་ཡུག་ཏུ་བསྐོར་བར་གྲགས། སྟོན་པ་ཀོང་ཡུལ་དུ་ཞལ་བཅགས་སྐབས་མདའ་ལམ་བརྒྱུད་ནས་ཕེབས་པར་གསུང་ལ་ཡུལ་འོལ་མོ་གླིང་ནས་བོད་ཀྱི་ཀོང་ཡུལ་དུ་ཉིན་དགུའི་རིང་བྱོན་པར་གསུངས། ལར་འདིར་ཟིན་བྲིས་བཀོད་འདོད་པ་ཤིག་ལ། རིག་གཞུང་ཞིབ་འཇུག་ལམ་ནས་བསམ་གཞིགས་བྱས་ན། འོལ་མོ་ལུང་རིང་དང་བོད་ཀྱི་ཀོང་ཡུལ་གཉིས་བར་མི་རྐང་ལམ་ཉིན་དགུ་སོང་ན་སླེབས་བར་བསྟན།
    གཞན་ཡང་སྐབས་དེར་ཆུ་བོ་ཆེན་པོ་བཞིའི་འགྲམ་དུ་གཙོ་བོར་བདུད་གཉེན་ཀླུ་སོགས་ཀྱིས་གནས་བཅས་ཡོད་དེ། ཤར་ཕྱོགས་གསས་རྗེ་ཧོས་ཀྱི་གླིང་། ཆུ་བོ་ན་ར་ཛཱ་རའི་འགྲམ་དུ། ཧོས་རྒྱལ་ཡིད་བཞིན་འབྱུང་གནས་དང་། མུ་ཟ་ལེགས་བཙུན་གཉིས་ལ་ཧོར་རྗེ་དང་བ་ཡིད་རིང་བྱ་བ་བྱུང་། ཧོས་དང་བ་ཡིད་རིང་གིས་ཕྱྭ་བཟང་འགུ་ལིང་མ་ཏི་བཙུན་མོར་བླངས། འཁོར་མངའ་ལྡེ་ལོངས་སྤྱོད་ཕུན་སུམ་ཚོགས་ཤིང་། ཧོས་དང་བ་ཡིད་རིང་གིས་ཡབ་ཡིད་བཞིན་འབྱུང་གནས་ཀྱི་བཀའ་ལྟར་ཚོགས་བསགས་མཆོད་འབུལ་གྱི་ཞིང་དུ་སྟོན་པ་གཤེན་རབ་སྤྱན་དྲངས་སུ་སོང་། དང་བ་ཡིད་རིང་གིས་སྟོན་པ་ལ་ལྷ་ཕྱག་མང་དུ་བཙལ་བའི་རྗེས་སུ། སྟོན་པས་ཁོང་གི་སློབ་བུ་མཚན་ལྡན་ཆེ་བཞིའི་ནང་ཚན་ཡིད་ཀྱི་ཁྱེའུ་ཆུང་ངམ་གཡུང་དྲུང་གཙུག་གཤེན་རྒྱལ་བ་ཧོས་དང་བ་ཡིད་རིང་གི་མཆོད་གནས་སུ་བཏང་པར་ཐག་བཅད། གཡུང་དྲུང་གཙུག་གཤེན་རྒྱལ་བ་ཧོས་དང་བ་ཡིད་རིང་གི་ཡུལ་དུ་ཕེབས་ཤིང་ཡུལ་དེའི་ནུབ་ཕྱོགས་བྲག་དཀར་ཕུག་པའི་ནང་དུ་བཞུགས་ནས་རྒྱལ་བློན་འབངས་ཀུན་ལ་བོན་གསུངས། འདིའི་སྐོར་གཏམ་རྒྱུད་མང་དུ་མཆེད་རྒྱུད་ཡོད་མོད་ཀྱང་། འདིར་བསྟན་བྱ་གཙོ་བོ་མིན་པས། ཟུར་འཕྲོས་ཙམ་བརྗོད་པ་ལས་མང་དུ་མ་བྲིས་སོ།།    གང་ནས་བརྗེད་ཐོ་བསྟར་པའི་ཁྲོད་གཙོ་ཆེར་ཤོས་ནི་དུས་རབས་བཅུ་གཅིག་ཚུན་ཆད་ཀྱི་བཤད་སྟངས་ཤིག་ཏུ་གྱུར་ཡོད། སྤྱིར་བཏང་འོལ་མོ་ལུང་རིང་ཞང་ཞུང་གི་ས་ཁོངས་སུ་ངོས་འཛིན་བྱེད་ན། འཇིག་རྟེན་འདིར་ཕར་བརྒལ་བ་ཞིག་ཏུ་འཚོལ་ས་མེད་པའི་རྣམ་པ་ཞིག་ཏུ་གྱུར། བོན་པོའི་དཔེ་རྒྱུན་འགའ་ཞིག་ནང་དུ་འོལ་མོ་ལུང་རིང་ནི་སྐྱེ་བོ་ཕལ་པའི་སྣང་ཡུལ་ལས་འདས་ཤིང་། དད་པའི་ཡུལ་ཁྱད་པར་ཅན་ཞིག་ཏུ་འདོད་པ་སྟེ།‘‘ལུས་ངན་འཁོར་བའི་ལུས་སུ་མི་སྐྱེ་ཞིང་། འོལ་མོ་ལུང་རིང་གནས་སུ་སྐྱེ་བར་ཤོག’’ ཅེས་སྨོན་ལམ་འདེབས་པས། བོན་པོ་ཁ་གཅིག་གིས་འཛམ་གླིང་འདིར་འོལ་མོ་ལུང་རིང་ཡོད་པར་ངོས་འཛིན་ཐུབ་ཅིང་མེད།
མ་ཟད་སྟོན་པ་གཤེན་རབ་ཀྱི་འཁྲུངས་གཞིས་རི་ཆུ་ལུང་གསུམ་གྱི་རྣམ་པ་ཞིག་ཏུ་གྲུབ་ཡོད་པ་ཁོ་ཚོའི་སེམས་ལ་མི་འཆར།  བོན་པོས་འོལ་གླིང་དུ་སྐྱེ་བའི་སྨོན་ལམ་འདེབས་པ་ནི། གལ་ཏེ་ལས་དབང་གིས་སྐྱེ་བ་ལེན་ནའང་། འོལ་གླིང་དུ་དལ་བརྒྱད་འབྱོར་བཅུ་ལྡན་པའི་མི་ལུས་དང་། འཕྲུལ་ངག་ལྡན་པའི་སྣོད་དུ་རུང་བའི་རེ་སྨོན་ཡིན། དེ་བཞིན་བོན་པོ་ཚེ་དབང་རིག་འཛིན་གྱིས་རྫིའུ་རིག་པ་རང་ཤར་ལ་སྙན་དུ་རྒྱུད་པའི་‘‘སྨོན་ལམ་དོན་འདུས་རིན་ཆེན་ཕྲེང་བ་’’ལས། མཐའ་འཁོབ་ཕམ་ལྟུང་གནས་ངན་ཀུན་སྤངས་ནས། ལྷོ་རྒྱལ་འཛམ་གླིང་དབུས་སུ་སྐྱེ་བར་ཤོག ཅེས་པ་དེ་དག་དམིགས་སྟངས་གཅིག་མཚུངས་རེད། དེ་མིན་འོལ་མོ་ལུང་རིང་དུ་ལུས་བླངས་པ་ཙམ་དང་། ལྷོ་རྒྱལ་འཛམ་གླིང་དབུས་སུ་སྐྱེ་བ་བཞེད་པ་ཙམ་གྱིས་མཐར་ཐུག་མངོན་པར་རྫོགས་པའི་སངས་རྒྱས་ཐོབ་མེད་པ་ཅི་སྨོས།
མ་གཞི་ས་རྡོ་རི་བྲག་ལས་གྲུབ་ན་དད་པའི་ཞིང་དུ་གྱུར་པའང་ལོས་ཆོག ས་རྡོ་རིག་བྲག་གངས་རི་སོགས་ལས་གྲུབ་པའི་གནས་བོད་ཀྱི་གངས་ཏི་སེ་དང་། ཁ་བ་དཀར་པོ། ཀོང་པོ་བོན་རི་སོགས་ཡིན་པ་ལ། དད་ཡུལ་དུ་གྱུར་པའང་ཡིན། གང་ལྟར་འོལ་མོ་ལུང་རིང་གི་རི་ཆུ་ལུང་གསུམ་ཐད་ནས་བརྗོད་ནའང་འདྲ། ཡུལ་གྱི་ས་གཤིས་སྐོར་ནས་འཚོལ་ཞིབ་བྱས་ན་འདྲ། ལོ་རྒྱུས་རིམ་པར་རྒྱུད་ཅིང་དཔྱད་ན་འདྲ། འོལ་མོ་ལུང་རིང་གི་དབུས་རི་གཡུང་དྲུང་དགུ་བརྩེགས་དང་། ཕྱོགས་བཞི་ནས་ཆུ་བོ་ཆེན་པོ་བཞི་འབབ་ལུགས་ནི། བོད་ཀྱི་གངས་ཏི་སེའི་ཕྱོགས་བཞི་ནས་ཆུ་ཆེན་བཞི་འབབ་སྟངས་དང་གཅིག་མཚུངས་རེད། གཞན་ཡང་བོན་གྱི་བསྟན་འབྱུང་ཁག་ཏུ་བོད་ཀྱི་གངས་རིན་པོ་ཆེ་ནི་འཛམ་བུ་གླིང་གི་ལྟེ་གནས་གལ་ཆེན་ཞིག་ཡིན་པར་མ་ཟད། གཡུང་དྲུང་བོན་གྱི་བསྟན་པའི་འབྱུང་ཁུངས་ཀྱི་ཡུལ་ངོ་མ་དེ་ཡིན་པར་བཞེད་ལ། གཡུང་དྲུང་བོན་གྱི་བསྟན་པའི་སྲོལ་འབྱེད་ནི་སྟོན་པ་གཤེན་རབ་མི་བོ་ཆེ་ཡིན་པར་སྨོས་ཅི། དེས་ན་བོན་ལུགས་སྲོལ་རྒྱུན་གྱི་ལྟ་བ་གཙོ་བཟུང་ཐོག་མི་མཐུད་ཞིབ་འཇུག་བྱེད་རྒྱུའི་རེ་བ་ཡོད་ལ། ལོ་རྒྱུས་གདེང་འཇོག་ཆེ་ཞིང་། རིན་ཐང་ལྡན་པའི་འབྲས་བུ་གཡུལ་དུ་ཟ་བ་ཞིག་ཏུ་སྨིན་བའི་ཡིད་ཆེས་ཀྱང་ཡོད། ཅེས་བོད་ཤར་ཕྱོགས་ཀྱི་སློབ་གཉེར་བ་ཚངས་སྲས་པས། ༢༠༢༠ ༡༠ ༡༡ སློབ་གླིང་བདུན་ཕྲག་ངལ་གསོའི་ཉིན་སྔར་དམ་བཅའི་དགོང་མོར་རྫོགས་པར་བྲིས།
བརྗེད་ཐོའི་དཔེ་ཀློག
1དྲང་རྗེ་བཙུན་པས་གཏེར་ནས་བཏོན་བར་གྲགས་པའི་གཤེན་རབ་ཀྱི་རྣམ་ཐར། ‘‘མདོ་གཟེར་མིག’’ལེའུ་བརྒྱད་པ། གཤེན་རབ་ཀྱི་སྲས་སྤྲུལ་པའི་སྐོར། ཤོག་གྲངས་༡༨༤ཡིག་འཕྲེང་༡༠པར་གསལ། ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་། ༡༩༩༡ལོའི་ཟླ་བ་༦པར་པར་ཐེངས་དང་པོ།
2བདེ་ཁང་བསོད་ནམས་ཆོས་རྒྱལ་གྱིས་བསྒྱུར་བའི་མཁར་རྨེའུ་བསམ་གཏན་གྱི་‘‘མདའ་དང་འཕང་།’’སྟོད་ཆ། ཤོག་ངོས་༢༣༠ཚིག་འཕྲེང་༦པར་གསལ། ཀྲུང་གོའི་བོད་རིག་པ་དཔེ་སྐྲུན་ཁང་།
3སྨན་རི་བ་བསྟན་འཛིན་རྣམ་དག་གི་གསུང་འབུམ། པོད་གསུམ་པ། ‘‘སྔ་རབས་བོད་ཀྱི་བྱུང་བ་བརྗོད་པའི་འབེལ་གཏམ་ལུང་གི་སྙིང་པོ་ཞེས་བྱ་བ་བཞུགས་སོ།།’’ཤོག་གྲངས་༢༠ཡིག་འཕྲེང་༥པའི་ནང་དུ་ཡོད། ཁྲི་བརྟན་ནོར་བུའི་རྩེའི་དཔེ་མཛོད་ཁང་གིས་བསྡུ་སྒྲིག་དང་དཔར་བསྐྲུན་བྱས། ༢༠༠༥ལོའི་དཔར་ཐེངས་དང་པོ།
4དྲང་རྗེ་བཙུན་པས་གཏེར་ནས་བཏོན་བར་གྲགས་པའི་གཤེན་རབ་ཀྱི་རྣམ་ཐར། ‘‘མདོ་གཟེར་མིག’’  ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་། ༡༩༩༡ལོའི་ཟླ་བ་༦པར་པར་ཐེངས་དང་པོ།
5‘‘མདོ་འདུས་པ་རིན་པ་ཆེའི་རྒྱུད་ཐམས་ཅད་མཁྱེན་པའི་བཀའ་ཚད་ན་བཞུགས་སོ།།’’སྟོན་པ་གཤེན་རབ་ཀྱིས་བརྩམས། བོན་གྱི་ལོ་རྒྱུས་ཡིག་ཚང་ཆེན་མོ། གླེགས་བམ་དང་པོ། མདོ་འདུས་ལེའུ་གཉིས་ཕྱི་སྣོད་འཇིག་རྟེན་ཆགས་ཚུལ་བསྟན་པ། ཤོག་ལྷེ་༨པའི་ཡིག་འཕྲེང་༤པ་དང་༡༤གཉིས་ལ་གསལ། ཀན་སུའུ་རིག་གནས་དཔེ་སྐྲུན་ཁང་།
6‘‘མདོ་འདུས་པ་རིན་པ་ཆེའི་རྒྱུད་ཐམས་ཅད་མཁྱེན་པའི་བཀའ་ཚད་མ་བཞུགས་སོ།།’’ སྟོན་པ་གཤེན་རབ་ཀྱིས་བརྩམས། བོན་གྱི་ལོ་རྒྱུས་ཡིག་ཚང་ཆེན་མོ། གླེགས་བམ་དང་པོ། མདོ་འདུས་ལེའུ་ཉེར་གཉིས་པ། ཞིང་མཆོག་འོལ་མོ་གླིང་གི་བཀོད་པ་བསྟན་པ། ཤོག་ངོས་༨༧ ཚིག་འཕྲེང་༡༡ཏུ་གསལ། ཀན་སུའུ་རིག་གནས་དཔེ་སྐྲུན་ཁང་།
7‘‘གླེང་གཞི་བསྟན་པའི་འབྱུང་ཁུངས་ཞེས་བྱ་བ་བཞུགས་སོ།།’’ བོན་གྱི་ལོ་རྒྱུས་ཡིག་ཚང་ཆེན་མོ། པོད་དྲུག་པ། ཤོག་གྲངས་༡༠པའི་ཡིག་འཕྲེང་༢༣ནས་མཐོང་། ཀན་སུའུ་རིག་གནས་དཔེ་སྐྲུན་ཁང་།
8‘‘གླེང་གཞི་བསྟན་པའི་འབྱུང་ཁུངས་ཞེས་བྱ་བ་བཞུགས་སོ།།’’ བོན་གྱི་ལོ་རྒྱུས་ཡིག་ཚང་ཆེན་མོ།  གླེགས་བམ་དྲུག་པ། ཀན་སུའུ་རིག་གནས་དཔེ་སྐྲུན་ཁང་།  ཤོག་ངོས་༦པའི་ཚིག་འཕྲེང་༢༠ལ་གསལ།
9ཤར་རྫ་པས་འོལ་གླིང་ངོས་འཛིན་གྱི་ཚིག་འདི་ནི་མདོ་དྲི་མེད་ལས་དྲངས་བར་ཁོང་གི་ལེགས་བཤད་མཛོད་དུ་གསལ། ཁོ་བོས་ནི། བསྟན་གྲགས་བརྒལ་ལན་དྲང་པོར་བཤད་པ་ལྷ་མི་དགྱེས་པའི་འབེལ་གཏམ་ངོས་༥པ་ནང་ནས་མཐོང་།
10‘‘འབྲུག་པའི་ཆོས་འབྱུང་བསྟན་པའི་པདྨ་རྒྱས་པའི་ཉི་བྱེད།’’ ཤོག་གྲངས། ༡༤༢པའི་ཡིག་འཕྲེང་༥པར་གསལ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།
11‘‘མདོ་འདུས་པ་རིན་པ་ཆེའི་རྒྱུད་ཐམས་ཅད་མཁྱེན་པའི་བཀའ་ཚད་མ་བཞུགས་སོ།།’’ སྟོན་པ་གཤེན་རབ་ཀྱིས་བརྩམས། བོན་གྱི་ལོ་རྒྱུས་ཡིག་ཚང་ཆེན་མོ། གླེགས་བམ་དང་པོ། མདོ་འདུས་ལེའུ་ཉེར་གཉིས་པ། ཞིང་མཆོག་འོལ་མོ་གླིང་གི་བཀོད་པ་བསྟན་པ། ཤོག་ངོས་༩༠ཚིག་འཕྲེང་༢༠ནས་རིམ་པར་གསལ། ཀན་སུའུ་རིག་གནས་དཔེ་སྐྲུན་ཁང་།
12སྲིད་པ་ལས་ཀྱི་གཏིང་ཟློག་གི་རྩ་རྒྱུད་ཀུན་གསལ་ཉི་ཟེར་སྒྲོན་མ་བཞུགས། བྲ་བོ་སྒོམ་ཉག་གིས་གཏེར་བཏོན། བོན་གྱི་ལོ་རྒྱུས་ཡིག་ཚང་ཆེན་མོ། པོད་བཞི་པ། ཤོག་གྲངས་༢༤ཡིག་འཕྲེང་༢༢དང་ཤོག་ངོས་༢༥ཚིག་འཕྲེང་༡༠གཉིས་སུ་གསལ་པོར་བསྟན། ཀན་སུའུ་རིག་གནས་དཔེ་སྐྲུན་ཁང་།
14རྨེའུ་མཁས་པ་དཔལ་ཆེན་གྱི་‘‘ཁམས་འགྲེལ་’’སྟོད་ཆ། སྒོ་བཞི་མཛོད་ལྔའི་ཡང་བཅུད། གླེགས་བམ་༤༠ཤོག་གྲངས་༡༡༨པའི་ཡིག་འཕྲེང་༡༠པར་བྲིས། སི་ཁྲོན་མི་རིགས་དཔེ་སྐྲུན་ཁང་།
15 ཁུ་བྱུག་སྔོན་མོའི་སྒྲ་དབྱངས། དཔེ་ཆ་ལྔ་པ། སྲིད་པ་སྤྱི་མདོས། ཤོག་ངོས་༩༣པའི་ཡིག་འཕྲེང་༩པ་ནས་མཐོང་། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༧ལོའི་ཟླ་༤པར་པར་གཞི་དང་པོ་བསྒྲིགས།
16 བདེ་ཁང་བསོད་ནམས་ཆོས་རྒྱལ་གྱིས་བསྒྱུར་བའི་མཁར་རྨེའུ་བསམ་གཏན་གྱི་‘‘མདའ་དང་འཕང་།’’སྟོད་ཆ། ཤོག་ངོས་༢༣༠ཚིག་འཕྲེང་14པ་ནས་མཐོང་། ཀྲུང་གོའི་བོད་རིག་པ་དཔེ་སྐྲུན་ཁང་།
 
 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།