ཞང་ཞུང་རིག་གནས་ཞིབ་འཇུག་མཐུན་་ཚོགས་ཀྱི་༢༠༢༤ལོའི་ཚོགས་འདུ་དེ་ཉེ་དུས་ནག་ཆུ་གྲོང་ཁྱེར་དུ་འཚོགས་པ་རེད། ཚོགས་འདུའི་ཐོག་མཐུན་ཚོགས་ཀྱི་སྒྲིག་ཡིག་ལ་གྲོས་ཞིབ་བྱས་ནས་ཐག་བཅད་དེ་སྐབས་དང་པོའི་ལས་འཛིན་ལྷན་ཚོགས་བདམས་ཐོན་བྱུང་བ་དང་དེ་སྔའི་བོད་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་དོན་གྲུབ་ལྷ་རྒྱལ་སྐབས་དང་པོའི་ལས་འཛིན་མཐུན་ཚོགས་ཀྱི་ཚོགས་གཙོར་བདམས་པ་རེད།
ཚོགས་འདུའི་ཐོག་མཐུན་ཚོགས་ཀྱི་ལས་དོན་སྙན་ཞུར་ཞིབ་འཇུག་གྲོས་བསྡུར་བྱས་པ་དང་མཐུན་ཚོགས་འཕེལ་རྒྱས་འགྲོ་རྒྱུར་རྒྱབ་སྐྱོར་བྱེད་མཁན་ཚོགས་པ་དང་མི་སྒེར་ལ་གཟེངས་དར་སྤྲད་པ་རེད། ཚོགས་འདུའི་ཐོག་བཞུགས་མོལ་རྣམ་པའི་ཐོག་ནས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་རྒྱུར་གྲོས་བསྡུར་ལྷུག་གླེང་གནང་བ་རེད།
ཞང་ཞུང་རིག་གནས་ནི་མདོ་དབུས་ས་མཐོ་ནས་ད་བར་འཕེལ་རྒྱས་བྱུང་བའི་སྲོལ་རྒྱུན་རིག་གནས་ཀྱི་གྲས་ཤིག་ཡིན་ལ་ཕུན་སུམ་ཚོགས་པའི་ཀྲུང་ཧྭའི་སྲོལ་རྒྱུན་རིག་གནས་ཀྱི་གྲུབ་ཆ་ཞིག་ཀྱང་ཡིན། ལོ་ངོ་སྟོང་རིང་གི་འཕོ་འགྱུར་བརྒྱུད་ད་ཆ་ནག་ཆུ་གྲོང་ཁྱེར་དེ་ཉིད་ཞང་ཞུང་གི་རིག་གནས་ཕུན་སུམ་ཚོགས་ཤོས་ཀྱི་ས་ཁུལ་གྱི་གྲས་ཤིག་ཏུ་གྱུར་ཡོད། ནག་ཆུ་གྲོང་ཁྱེར་ཞང་ཞུང་རིག་གནས་ཞིབ་འཇུག་ཚོགས་པ་དེ་༢༠༢༢ལོར་དངོས་སུ་བཙུགས་པ་ནས་བཟུང་ཞང་ཞུང་རིག་གནས་སྔོག་འདོན་དང་། འཚོལ་བསྡུ། སྲུང་སྐྱོང་བཅས་བྱ་རྒྱུར་རྨང་གཞིའི་ཚན་ཞིབ་ལས་དོན་ཧུར་ཐག་སྤེལ་ཡོད་པ་རེད།
མ་འོངས་པར་ཞིབ་འཇུག་མཐུན་ཚོགས་དེས་འབྲེལ་ཡོད་སྡེ་ཁག་གི་མཛུབ་ཁྲིད་དང་རོགས་རམ་འོག་ནག་ཆུ་གྲོང་ཁྱེར་གྱི་ཞང་ཞུང་རིག་གནས་བསྔོག་འདོན་དང་།སྲུང་སྐྱོང་།རྒྱུན་འཛིན།འཕེལ་རྒྱས་བཅས་གཏོང་རྒྱུར་སྐུལ་འདེད་གཏོང་རྒྱུ་མ་ཟད། མཐུན་ཚོགས་ཀྱིས་མིག་རྒྱང་རིང་པོའི་སྒོ་ནས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་པ་དང་ཀྲུང་ཧྭ་ཡི་ཕུལ་བྱུང་སྲོལ་རྒྱུན་རིག་གནས་རྒྱུད་འཛིན་བྱེད་པ་དང་འཕེལ་རྒྱས་འགྲོ་རྒྱུར་སྟོབས་ཤུགས་སྐྱེས་སུ་འབུལ་རྒྱུ་རེད།
