མཛད་སྒོའི་ཐོག་ཏུ་ཁྱུང་ཡུལ་གྱི་དགོན་པ་ཁག་གི་དབུ་བླ་དང་འཐུས་ཚབ་མི་སྣ། བླ་སྤྲུལ་མཁས་དབང་དགེ་བའི་བཤེས་གཉེན་རྣམ་པ། སྤྱི་ཚོགས་ཐོག་གི་མི་སྣ་གྲགས་ཅན་རྣམས་མཉམ་ཞུགས་ཀྱིས།   སྤྱི་ལོ་2024ལོའི་ཟླ་བ9པའི་ཚེས་28ཉིན་གྱི་ཞོགས་པར་ཁྱུང་ཡུལ་གྱི་དགོན་སྡེ་ཁག་གི་བླ་སྤྲུལ་དགེ་བའི་བཤེས་གཉེན་རྣམས་དུང་གླིང་སྤོས་དར་རོལ་མོས་སྣ་དྲངས་ཤིང་སེར་ཕྲེང་བསྒྲིགས་ནས་ག་ཤེལ་དགོན་གྱི་གསས་ཁང་སྐལ་བཟང་འགྲོ་འདྲེན་ནང་དུ་གདན་དྲངས།     དེ་མཚམས་མདོ་འཛིན་པ་དགེ་བཤེས་དྲང་སྲོང་རྒྱལ་མཚན་གྱིས་མཛད་སྒོའི་དབུ་འཛུགས་གཏམ་བཤད་གྲུབ་མཚམས། དཔལ་ལྡན་ག་ཤེལ་དགོན་གྱི་ཁྲི་འཛིན་བླ་མ་ཁྲི་གཙུག་བསྟན་པའི་རྒྱལ་མཚན་མཆོག་དང་། ཤེལ་སྲས་གཡུང་དྲུང་འབྲུག་གྲགས་བསྟན་པའི་རྒྱལ་མཚན་རྣམ་གཉིས་ཀྱིས་སྣང་གསལ་སྒྲོན་མེ་སྤར་ཏེ་གསུང་འབུམ་དབུ་འབྱེད་ཀྱི་ཆོ་ག་གནངས་བ་དང་། མཉམ་དུ་འདུས་མང་ཡོངས་ཀྱིས་ཞི་བ་གཡུང་དྲུང་ཡོངས་རྫོགས་ཀྱི་སྤྱན་དབྱེའི་ཆོ་ག་དབྱངས་སུ་གྱེར། སྒང་རུ་དར་རྒྱས་དགོན་གྱི་མཁན་པོ་དབྲ་ཁྱུང་དགེ་བཤེས་སྐལ་བཟང་ནོར་བུ་མཆོག་དང་། ཁྱུང་པོ་སྟེང་ཆེན་དགོན་གྱི་དཔོན་སློབ་དགེ་བཤེས་རྒྱལ་བ་བསྟན་འཛིན། དཔལ་ལྡན་ག་ཤེལ་དགོན་གྱི་མཁན་པོ་དགེ་བཤེས་བསྟན་འཛིན་ཡེ་ཤེས། ཀོ་རྒྱལ་དགོན་གྱི་དཔོན་སློབ་དགེ་བཤེས་ཡོན་ཏན་ཕུན་ཚོགས་རྣམ་པ་བཞིས་གསུང་འབུམ་གྱི་ཞལ་ཁེབ་ཕྱེས་གནང་མཛད། དེ་མཚམས་འབྲིང་རྒྱུད་དགེ་བཤེས་གཡུང་དྲུང་འཕྲིན་ལས་ཀྱིས་མདོ་འཛིན་མཛད་ཅིང་། དགེ་བཤེས་བསྟན་འཛིན་ཡེ་ཤེས་མཆོག་གིས་ག་ཤེལ་ཁྲི་ཆེན་གྱི་གསུང་འབུམ་གྱི་ཁྱད་ཆོས་དང་ནང་དོན་སྐོར་ནས་ངོ་སྤྲོད་མཛད་པ་དང་། དེ་རྗེས་ལྡོང་སྐལ་བཟང་གིས་གསུང་འབུམ་དཔར་བསྐྲུན་དང་རྩོམ་སྒྲིག་གི་ལས་ཀའི་བརྒྱུད་རིམ་སྐོར་ངོ་སྤྲོད་བྱས། དེ་ནས་དགེ་བཤེས་དྲང་སྲོང་རྒྱལ་མཚན་གྱིས་ག་ཤེལ་ཁྲི་ཆེན་གྱི་རྣམ་ཐར་དང་འབྲེལ་ཏེ་མཛད་པ་འཕྲིན་ལས་ཀྱི་སྐོར་ངོ་སྤྲོད་བྱས་རྗེས་རིམ་བཞིན། དབྲ་ཁྱུང་མཁན་པོ་དགེ་བཤེས་སྐལ་བཟང་ནོར་བུ། དཔོན་སློབ་རྒྱལ་བ་བསྟན་འཛིན། མཁན་པོ་བསྟན་འཛིན་སྐལ་བཟང་། དཔོན་སློབ་ཡོན་ཏན་ཕུན་ཚོགས། མཁན་པོ་ཚུལ་ཁྲིམས་མཐར་ཕྱིན། དཔོན་སློབ་ཀུན་བཟང་རྒྱལ་མཚན། སྣང་དགོན་བཤད་སྒྲུབ་སློབ་གླིང་གི་དགེ་རྒན་ཆེན་མོ་དགེ་བཤེས་ཚུལ་ཁྲིམས་གཙུག་ཕུད། དགེ་བཤེས་བློ་གྲོས་རབ་རྒྱས། མཁན་པོ་བསྟན་འཛིན་རྣམ་རྒྱལ། ཞུ་ཚང་དགེ་བཤེས་སྐལ་བཟང་རྒྱལ་མཚན། དགེ་བཤེས་གཡུང་དྲུང་ཚུལ་ཁྲིམས། དགེ་བཤེས་ཡེ་ཤེས་གོང་འཕེལ། ཨ་ལྕགས་གཡུང་དྲུང་བསྟན་འཛིན་བཅས་ཀྱིས་མཛད་སྒོ་དང་འབྲེལ་ཏེ་བཀའ་སློབ་དང་གསུང་བཤད་ཟབ་རྒྱས་གནངས། དེ་ནས་ཤེལ་སྲས་གཡུང་དྲུང་འབྲུག་གྲགས་དང་མཁན་པོ་བསྟན་འཛིན་ཡེ་ཤེས་གཉིས་ཀྱིས་གསུང་འབུམ་སྒྲིག་ཞུ་དང་པར་བསྐྲུན་སྐབས་ཀྱི་ལས་ཀའི་ཕྱག་རོགས་གནངས་མཁན་རྣམས་ལ་ཐུགས་རྗེ་ལེགས་གསོལ་གྱི་གཟེངས་རྟགས་བསྩལ།. ཞུ་ཚང་དགེ་བཤེས་སྐལ་བཟང་རྒྱལ་མཚན་མཆོག་གིས་མཇུག་བསྡུའི་གཏམ་བཤད་མཛད་ཅིང་། དེ་རྗེས་ཀུན་གྱིས་གཡུང་དྲུང་བསྟན་པ་རྒྱས་པའི་སྨོན་ལམ་དབྱངས་སུ་གྱེར་ནས་མཛད་སྒོ་མཇུག་གྲུབ།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།