བོན་གྱི་འདུས་སྡེ་ཉང་སྟོད་སྟག་པ་ཁ་ཆེར། བོན་གྱི་འདུས་སྡེ་གཡས་རུ་དབེན་ས་ཁ། བོན་གྱི་རྩ་བའི་གྲྭ་ས་ཡ་བཞི། གཤེན་གྱི་གདན་ས་ཁྲི་བརྟན་ནོར་བུ་རྩེ།
དེ་རྗེས་དུས་རབས་བཅུ་བཞི་པའི་མཇུག་ཏུ་གཤེན་ཉི་མས་དགུང་ལོ་སུམ་བཅུའི་ཐོག་ཕྱག་བཏབ་པ་གཤེན་གྱི་གདན་ས་ཁྲི་བརྟན་ནོར་བུ་རྩེ་ཡིན། 
 ཞུ་ཡི་གདན་ས་དབང་ལྡན་ལྷུན་གྲུབ་སྒང་།
དབང་ལྡན་ཞུ་ཡས་ལེགས་པོས་སྤྱི་ལོ་༡༡༩༠ལོར་བཏབས་པའི་ཞུ་ཡི་གདན་ས་དབང་ལྡན་ལྷུན་གྲུབ་སྒང་།
 རྨེའུ་གདན་ས་དཔལ་ལྡན་བཟང་པོ་རི།
སྤྱི་ལོ་༡༠༩༦ལོར་རྨེའུ་མཁས་པ་ཚུལ་ཁྲིམས་དཔལ་ཆེན་གྱིས་ཕྱག་བཏབས་པ་རྨེའུ་གདན་ས་དཔལ་ལྡན་བཟང་པོ་རི་བཅས་བོན་བཤད་པའི་རྒྱུན་སྐྱོང་ཞིང་གབ་མཛོད་ས་གསུམ་གཙོ་བོ་རྩལ་དུ་བཏོན་ནས་བསྟན་པ་འཛིན་སྐྱོང་སྤེལ་གསུམ་བདག་ཉིད་ཅན་ཏེ་གཞན་འདྲིང་མི་འཇོག་པའི་གཟི་དཔལ་འབར་ཡོད་པ་ལོ་རྒྱུས་དག་ལ་གཟིགས་ན་མཁྱེན་ནུས།
སྤ་ཡི་གདན་ས་ལ་ཕུག
སྤྱི་ལོ་༡༢༣༤ཡི་གཡས་གཡོན་ལ་སྤ་སྟོན་རྒྱལ་བ་ཤེས་རབ་ཀྱི་ཕྱག་བཏབ་ཟེར་ལ་འགའ་ཞིག་ཏུ་དཔལ་ལྡན་བཟང་པོས་བཏབ་ཞེས་གསུངས་པ་ཡོད་ལ་དེར་འཆད་ཉན་སྒོམ་སྒྲུབ་སྡེ་དར་ཞིང་རྒྱས་པར་གྱུར།
བོན་གྱི་གྲྭ་ས་གོང་མ་གཙང་སྨན་རི་དགོན།
བོན་གྱི་གྲྭ་ས་གོང་འོག་བར་གསུམ་ལས་གྲྭ་ས་གོང་མ་གཙང་བཀྲ་ཤིས་སྨན་རི་དགོན་ནི། རྒྱལ་བ་གཉིས་པ་མཉམ་མེད་ཆེན་པོའི་བཏབས་རྒྱལ་བ་གཉིས་པ་རྗེ་བཙུན་མཉམ་མེད་ཤེས་རབ་རྒྱལ་མཚན་ནི་རབ་བྱུང་དྲུག་པའི་མེ་སྤྲེལ་ཕྱི་ལོར་༡༣༥༦ལོར་གངས་ཅན་བོད་ཀྱིཤར་ཕྱོགས་རྒྱལ་རོང་ཆུ་ཆེན་རབ་བརྟན་རྒྱལ་པོའི་མངའ་ཁོངས་སུ་སྐུ་འཁྲུངས། ཁོང་གི་ཐོས་བསམ་སྒོམ་གསུམ། འཆད་རྩོད་རྩོམ་གསུམ། ཐོས་སྒོམ་ཉམས་ལེན་མཐར་ཕྱིན་པར་མཛད་རྗེས། གཡས་རུ་དབེན་སའི་གླིང་གཞིའི་ནང་ཚན་གླིང་ཟུར་པའི་མཁན་པོ་ཡང་མཛད། སྤྱི་ལོ་༡༤༠༥ལོར་གཙང་གི་ཐོབ་རྒྱལ་རི་ལ་བོན་གྱི་གྲྭ་ས་གོང་མ་གཤེན་བསྟན་བཀྲ་ཤིས་སྨན་རིའི་དགོན་སྡེ་བཏབས། གྲྭ་ཚང་གླིང་སྟོད། གླིང་སྨད། གླིང་སྐད། གླིང་ཟུར་བཞིར་གྱེས་ཤིང་འཆད་ཉན་གྱི་སྡེ་བཙུགས་པ་དང་། རྨད་བྱུང་སུམ་ལྡན་དགེ་འདུན་ལྔ་བརྒྱ་ལྷག་རྒྱུན་བཞུགས་ཀྱིས་དགོན་སྡེ་འཛིན་སྐྱོང་དང་འཆད་ཉན་དང་། བསྙེན་སྒྲུབ་ཀྱི་ལམ་སྲོལ་ཉམས་མེད་རྒྱུན་བསྐྱངས་གནང་བ་རྗེའི་འཕྲུལ་སྒྲོན་རྣམ་ལྔ་སོགས་གསུང་འབུམ་རྗེས་བཞག་གནང་ནས་མཐར་བོན་འཆད་ངང་༡༥༡༥ལོར་དགོངས་པ་བོན་དབྱིངས་སུ་གཟིགས། ༡༡༩༨ལོར་གཡས་རུ་དབེན་སའི་སྟོན་པ་བརྒྱད་པ་འགྲོ་མགོན་བློ་གྲོས་རྒྱལ་མཚན་སྐུ་འཁྲུངས་ནས་ཁོང་གི་མཛད་པའི་<ཚད་མ་ཀུན་བཏུས། ><མཛོད་འགྲེལ། >སོགས་མདོ་སྔགས་ཀྱི་གཞུང་ལུགས་ལ་ཉམས་ལེན་སྤྱན་དཀྱུས་མཁའ་ལྟར་ཡངས་ཞིང་ཡོངས་གྲགས་བོན་གྱི་སྤྱན་ལྡན་ཆེན་མོ་ཞེས་གཡས་རུ་དབེན་ས་ཁའི་ཡིག་ཆའི་བདག་པོར་གྱུར་མཐར་༡༢༦༣ལོར་དགོངས་པ་བོན་དབྱིངས་སུ་གཟིགས།ཁྱད་པར་བྲུ་ཡི་གདུང་རྒྱུད་ཉམས་ནས་བཟུང་བྲུ་ཡི་སྟོན་པ་རྣམས་ཀྱི་བསྟན་པའི་རིང་ལུགས་རྒྱུན་སྐྱོང་མཛད་པོ་༧རྣམ་འདྲེན་གཉིས་པ་མཉམ་མེད་ཤེས་རབ་རྒྱལ་མཚན་སྐུ་འཁྲུངས་ནས་གོང་གི་གཡས་རུའི་གཞུང་ཆེན་རྣམས་ལ་འགྲེལ་དང་ཕྱག་ལེན་བཏབས་པའི་ནང་ནས་རྗེའི་འཕྲུལ་སྒྲོན་རྣམ་ལྔ་ཞེས།   <ཚད་མ་རྣམ་འབྱེད་གྱི་སྒྲོན་མེ་གཞུང་འགྲེལ་གཉིས། ><ས་ལམ་རྣམ་འབྱེད་འཕྲུལ་གྱི་སྒྲོན་མེའི་གཞུང་འགྲེལ་གཉིས།  ><མཛོད་འགྲེལ་འཕྲུལ་གྱི་སྒྲོན་མེ།  ><འདུལ་འགྲེལ་འཕྲུལ་གྱི་སྒྲོན་མེ།  ><གསང་དོན་རྣམ་འབྱེད་འཕྲུལ་གྱི་སྒྲོན་མེ་>བཅས་མཛད་ཅིང་བཤད་རྒྱུན་དང་སྒྲུབ་སྡེ་ཟུང་འབྲེལ་གྱི་འདུས་པ་རྒྱ་ཆེན་བྱུང་ཞིང་དངོས་སློབ་ཡོངས་ཀྱི་ཐུ་བོ་སྒོ་རིགས་རིན་ཆེན་རྒྱལ་མཚན།  མངའ་རིས་པ་བསོད་ནམས་རྒྱལ་མཚན་དང་གདུང་རྒྱུད་སྡེ་དྲུག་ནང་ནས་སློབ་མ་དུ་མ་ཞིག་སྟོད་སྨད་བར་གསུམ་ཀུན་ཏུ་མཁས་གྲུབ་རྣལ་འབྱོར་མང་ལ་ཧྲག་པོ་བྱོན་ཡོད་པ་གསལ།
བོན་གྱི་གྲྭ་ས་འོག་མ་རབ་ལེགས་གཡུང་དྲུང་གླིང་།
དུས་རབས་བཅུ་དགུའི་ནང་གོང་གི་སྨན་རི་མཁན་རབས་ནང་སྨན་རིའི་མཁན་རབས་ཉེར་གཉིས་པ་བསོད་ནམས་བློ་གྲོས་དང་། མདོ་སྨད་སྣང་ཞིག་གི་གདུང་ལས་འཁྲུངས་པའི་༧སྐྱབས་མགོན་ཟླ་བ་རྒྱལ་མཚན་གཉིས་ཀྱི་དུས་སུ་སྣང་སྟོན་ཟླ་བ་རྒྱལ་མཚན་གྱིས་སྤྱི་ལོ་༡༨༣༤ལོར་གཙང་འོ་ཡུག་གི་མདར་རབ་ལེགས་གཡུང་དྲུང་གླིང་ཞེས་དགོན་སྡེ་ཕྱག་བཏབས། བོན་གྱི་གྲྭ་ས་འོག་མ་ཡིན་ལ་སྨན་རིའི་མཁན་རབས་ཉེར་གསུམ་པ་ཉི་མ་བསྟན་འཛིན་༧ཡོངས་འཛིན་དཔོན་སློབ་ཏུ་གདན་དྲངས་ནས་ན་གཞོན་གྲྭ་བཙུན་བཅུ་གསུམ་གྲྭ་ས་གོང་མ་སྨན་རི་ནས་མར་གདན་དྲངས་ཏེ་བཤད་གྲྭ་བཙུགས་པ་དང་། བཤད་གྲྭའི་བཅའ་སྒྲིག་གསར་དུ་བཏོད་ནས་གྲྭ་ས་འོག་མ་ཞེས་སྙན་གྲགས་ཀུན་ལ་ཁྱབ།
བོན་གྱི་གྲྭ་ས་བར་མ་མཁར་སྣ།
གྲྭ་ས་བར་མ་ནི་སྤྱི་ལོ་༡༨༧༣ལོར་འགྲོ་མགོན་ཤེས་རབ་གཡུང་དྲུང་མཆོག་གིས་གཡས་རུ་བོན་གྱི་འདུ་གནས་བརྒྱད་ཀྱི་ཁོངས་བཏོགས་བྲུད་ཀྱི་མཁར་སྡོང་རུ་གདན་ས་བཏབས།  གོང་གི་དེ་གསུམ་ལ་ཕྱི་དར་བོན་གྱི་གྲྭ་ས་གོང་འོག་བར་གསུམ་ཞེས་མཚན་གསོལ།   དུས་རབས་བཅུ་དགུ་པའི་ནང་སྨན་རིའི་མཁན་ཆེན་ཁྲི་ཐོག་སོ་གཅིག་པ་ཉི་མ་དབང་རྒྱལ་དང་།  ཡོངས་འཛིན་སངས་རྒྱས་བསྟན་འཛིན་ཟུང་གིས་དཔལ་ལྡན་སྨན་གྱི་རི་བོར་བཤད་སྒྲུབ་སླར་གསོས་མཛད་ནས་འདུས་ཚོགས་རྒྱས།  སྐབས་དེར་མཁས་གྲུབ་བསྟན་འཛིན་རྣམ་དག་དང་། མཁར་སྣའི་རྒྱལ་ཚབ་ཡོན་ཏན་ལྷུན་གྲུབ།  སྟག་བྲོའི་མཁན་པོ་མེ་ཉག་བ་བཅས་བྱོན།  དེ་ནས་བཟུང་སློབ་དཔོན་བསྟན་འཛིན་རྣམ་དག་མཆོག་དཔལ་ལྡན་སྨན་རིའི་འདུས་སྡེའི་སློབ་དཔོན་གྱི་མངའ་གསོལ་བྱས་ནས་རྒྱུན་བཞུགས་འདུས་གྲྭ་བརྒྱད་བཅུའི་སྐོར་ལ་སྔར་སྲོལ་བཞིན་བཤད་ཁྲིད་ཀྱི་རྒྱུན་བསྐྱངས་ཞིང་ཕྱི་ནང་གི་བསྟན་དང་བསྟན་པ་ཀུན་ལ་མཛད་པ་ཆེན་པོ་བསྐྱངས།  དུས་དེར་སློབ་མའི་ཁྱུ་མཆོག་སྨན་རི་ཁྲི་འཛིན་སོ་གཉིས་པ་ཤེས་རབ་བློ་གྲོས་དང་།  སྨན་རིའི་དཔོན་སློབ་གསུམ་པ་རྒྱ་རོང་བ་ཚུལ་ཁྲིམས་དབང་ལྡན།  ཚ་རོང་སྤྲུལ་སྐུ་སྦྱིན་པ་རྒྱལ་མཚན་སོགས་བླ་སྤྲུལ་དགེན་འདུན་མང་ལ་ཧྲག་པ་བྱོན་ཡོད། གོང་ཞུས་དག་གཙོ་བོ་བཤད་སྒྲུབ་གཉིས་ལས་བཤད་རྒྱུད་དམིགས་སུ་བཀར་ནས་ཡོངས་འཛིན་གོང་མའི་གསུང་འབུམ་དང་ལོ་རྒྱུས་རིམ་བྱུང་གི་ལོ་རྒྱུས་སོགས་ལ་གཞི་འཛིན་ནས་ད་སྐབས་བོན་གྱི་འཆད་རྩོད་ཀྱི་འདུས་གྲྭ་ཇེ་ཆེར་སུ་སོང་བའི་སྐབས་དང་བསྟུན་ནས་ངེས་པར་མཁྱེན་དགོས་པའི་གནད་ཅིག་ཡིན་པར་སྙམས་ནས་བྲིས་ཡོད། མདོར་ན་གཡས་རུའི་འཆད་རྩོད་ཀྱི་གབ་མཛོད་ས་གསུམ་སོགས་ཀྱི་འགྲེལ་དང་དེ་འཆད་རྒྱུན་འཛིན་པའི་མཁས་གྲུབ་སོགས་ལ་ཉམས་ཞིབ་དང་ལྟ་སྤྱོད་སོགས་ཉམས་མེད་འཛིན་པོ་རང་ཅག་ལ་བཀའ་དྲིན་ཆེ་བའི་༧སྐྱབས་རྗེ་མཁན་སློབ་གཤེན་གསུམ་གཙོས་དཔོན་གསས་བླ་མ་གོང་རྣམས་ཀྱིས་བཀའ་དྲིན་ལ་བརྟེན་ནས་འཛམ་གླིང་ཡུལ་གྲུ་གང་སར་གཡུང་དྲུང་བོན་གྱི་བཤད་སྒྲུབ་ཀྱི་འདུས་སྡེ་བཤད་རྒྱུན་དང་སྒྲུབ་རྒྱུད་གཉིས་ཀ་ཉམས་པ་སླར་གསོ་དང་མི་ཉམས་གོང་འཕེལ་གྱི་རླབས་ཆེན་གྱི་མཛད་འཕྲིན་དག་ཕྱོགས་ནས་ཕྱོགས་སུ་འཕེལ་བར་གྱུར་ཡོད་པའོ།།    སེམས་དཔའ་ཉེར་ལྔའི་ཡ་གྱལ་ཁྱུང་པོ་རབ་འབྱམས་པ་གསང་བདག་སེམས་དཔའ་ནམ་མཁའ་གྲགས་པའི་སྐུ་སྲས་སྨོན་རྒྱལ་གདུང་རབས་༡༨༨པ་ལྗོངས་སྲིད་གྲོས་ཨུ་ཡོན།ཆབ་མདོ་གྲོང་ཁྱེར་བོད་ལུགས་གསོ་རིག་སློབ་ཚོགས་རྒྱུན་ལས་ལས་འཛིན། སྨོན་རྒྱལ་དཔྱད་བུ་སྨན་རྩིས་ཁང་གི་ཡོན་ཀྲང་༧སྨོན་རྒྱལ་བླ་བྲང་གི་བསྟན་པའི་བདག་པོ་སྨོན་རྒྱལ་ཀུན་གྲོལ་སྐྱེ་ཕྲེང་བདུན་པ་ནམ་མཁའ་དབང་ལྡན་རིན་པོ་ཆེ་མཆོག་གི་ཕྱི་ནང་གསང་གསུམ་གྱི་མཛད་པ་བསམ་གྱི་མི་ཁྱབ་ཡང་དེ་སྔོན་སངས་རྒྱས་གཡུང་དྲུང་བོན་གྱི་བསྟན་པའི་དོན་དུ་སྤྱི་ལོ་༡༩༩༩ལོར་བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་གི་གནའ་དཔེ་སྲུང་སྐྱོབ་གི་ཆོག་མཆན་ཡོད་པའི་མཁའ་འགྲོ་མཁའ་སྤྱོད་དབང་མོའི་དང་ཉག་རོང་གི་ལྷག་བསམ་ཅན་གྱི་མི་སྣ་འགའི་རིག་གསར་ཁྲོད་སྲུང་སྐྱོབ་ཐུབ་པའི་སངས་རྒྱས་གཡུང་དྲུང་བོན་གྱི་རྒྱལ་བའི་བཀའ་འགྱུར་རིན་པོ་ཆེ་ཆ་ཚང་ཚར་གཅིག་བཞུགས་ཡོད་པ་དེ་ཉིད་འགྲོ་བ་མིའི་རིགས་ཀྱི་གཅེས་ནོར་ཡིན་པའི་ཕྱིར་བོན་གྱི་ཕྱི་དར་གཏེར་ཆེན་གསང་བདག་དཔའ་བོ་ཧུྃཿ ཆེན་འགྲོ་འདུལ་གླིང་པའི་སྲས་ཞང་རྒན་དམ་པ་ཀུན་གྲོལ་ལྷ་སྲས་མི་ཕམ་ཚོགས་གཉིས་རྣམ་རྒྱལ་རིན་པོ་ཆེའི་གཙོ་འཛིན་གནང་བ་དང་སྨོན་རྒྱལ་ནམ་མཁའ་དབང་ལྡན་རིན་པོ་ཆེའི་གཡས་གཞོག་གཡོན་འདེགས་ཀྱི་དཔར་སྐྲུན་སྐབས་མི་ལོ་དྲུག་རིང་རྒྱ་ནག་ཁྲིན་ཏུ་རུ་དཔེ་རྙིང་དཔར་སྐྲུན་གྱི་ལས་དོན་ལ་སྐུ་ངལ་ཚད་མེད་གནང་རྗེས་རྒྱལ་བའི་བཀའ་རིན་པོ་ཆེ་ཡངས་པའི་འཇིགས་རྟེན་ཁམས་སུ་རྗེས་བཞག་དར་སྤེལ་གྱི་དཔར་སྐྲུན་གྱི་ཕྱག་རོགས་གཙོ་བོ་མཛད།  ཆོས་དད་རང་མོས་ཀྱི་སྲིད་བཟང་ཤར་ནས་བཟུང་ཁྱུང་ཡུལ་སྨད་དགོན་དྲུག་གི་ཡ་གྱལ་བེ་དགོན་རབ་བརྟན་གླིང་གི་ཕྱི་ནང་བསྟན་པ་དར་ཞིང་རྒྱས་པར་མཛད་ལ་༢༠༡༧ལོར་དགོན་དེར་ཤར་རྫའི་སྒྲུབ་སྡེ་གསར་ཏུ་གཙུགས་མཛད། སྨོན་རྒྱལ་བླ་བྲང་དུ་ཤར་རྫའི་སྒྲུབ་གྲྭ་ཐེངས་ལྔ་ཙམ་གྱི་སྒྲུབ་ཐོན་བ་སུམ་ཅུ་ལ་ཉེ་བ་གསོ་སྐྱོང་གནང་དང་གནང་མོས་སུ་མཛད་པ་སྐྱོང་། དབལ་འབར་སྟག་ལྷག་ཅན་གྱི་གནས་སྒོ་ཕྱེས་པའི་བཀའ་ཡི་བྱ་ར་མ་གསུམ་གྱི་གནས་རི་གཟི་ཡ་ཀི་དབལ་མོ་འབྲོང་རིར་སྤྱི་ཚང་མཚམས་པ་གཡུང་དྲུང་ཟླ་བ་དང་། ལྷ་སྡོང་མཚམས་པ་ཚུལ་ཁྲིམས་འོད་ཟེར་རྣམ་གཉིས་སྒོམ་གྲར་བཞུགས་སུ་གསོལ་བ་དང་ཁོང་རྣམ་གཉིས་ནས་སྦྱིན་པ་རྣམ་བཞི་ཆགས་མེད་ངང་མཚན་བཅས་མཚན་མེད་ཀྱི་གཞུང་ལ་ཉམས་ལེན་དང་ཞོར་དུ་གནས་སྐོར་བ་ལ་དགེ་སྒྲུབ་སྡིག་སྤོང་གི་བསླབ་བྱ་གནང་བཞིན་པ་བཅས་བཞུགས་ཡོད།   མ་ཚད་སྨོན་རྒྱལ་རིན་པོ་ཆེ་ཁོང་ཉིད་རང་སྐྱོང་ལྗོང་སྲིད་གྲོས་ཨུ་ཡོན་ཀྱི་ཐུགས་འགན་བཞེས་རིང་བོད་ལུགས་གསོ་བ་རིག་པའི་ཁུངས་བོད་རང་སའི་རྣམ་དཔྱོད་ཅན་གྱི་མེས་པོ་དང་རིག་གཞུང་ལ་ཐུག་ཡོད་པ་དེ་དག་རྒྱུད་འཛིན་དགོས་པའི་སྲིད་གཞུང་གོང་རིམ་སྡེ་ཚན་ཁག་ལ་ཡར་ཞུ་ཕུལ་བ་དང་ཁོང་ཉིད་ཀྱིས་བཀའ་བ་བརྒྱ་དང་འབད་པ་སྟོང་ལས་གྲུབ་པའི་བོད་ལུགས་གསོ་བ་རིག་པའི་དར་སྤེལ་གཏོང་ཕྱིར་སྟེང་ཆེན་རྫོང་ཐོགས་ཏུ་སྨོན་རྒྱལ་དཔྱད་བུ་སྨན་རྩིས་ཁང་ཆགས་བཏབས་ནས་བོད་ལུགས་གསོ་རིག་ཕྱི་མོ་འབུམ་གཞིའི་རིག་གཞུང་རྒྱུད་འཛིན། མི་སྣ་གསོ་སྐྱོང་། དམངས་ཕན་དམངས་བདེའི་མཛད་འཕྲིན་རིས་མེད་འགྲོ་བ་ཀུན་ལ་ཕན་བདེའི་འོད་སྣང་ཕྱོགས་མེད་དུ་འཕེལ་དང་འཕེལ་བཞིན་པའོ། །

བཤད་གྲྭའི་ལས་ཐོག་དཔོན་སློབ་དགེ་བཤེས་བརྩོན་འགྲུས་མཐར་ཕྱིན།

སྒྲུབ་གྲྭའི་ལས་ཐོག་མཁན་པོ་དྲང་སྲོང་རྒྱལ་མཚན།

གཟི་ཡ་ཀི་དབལ་མོ་འབྲིང་རིར་བཞུགས་ཡོད་པའི་སྒོམ་གྲྭའི་མཚམས་པ་རྣམ་གཉིས།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།