དཔལ་གཤེན་བསྟན་ཀླུ་ཕུག་དགོན་ཆེན་དུ་«གངས་ལྗོངས་ཤེས་རིག་དཔྱད་རྩོམ་བགྲོ་གླེང་»སྐབས་དང་པོ་དངོས་སུ་འཚོགས་པ

   འབྱུང་ལྡན་ཟླ་ཐིག་རྩེ་མོའི་ནང་ཚན། ཀུན་ལྡན་ཞེས་པ་ལྕགས་ཕོ་བྱི་ལོའི་སྟོན་ཟླ་ར་བའི་དཀར་ཕྱོགས་རྒྱལ་བ་གསུམ་པའི་ཉིན་ཏེ། རེས་གཟའ་ཟླ་བ་དང་རེས་གྲོགས་ཟླ་སྐར་གྲོ་བཞིན་དང་འཕྲད་པའི་འགྲུབ་སྦྱོར། སྤྱི་ལོ་༢༠༢༠ལོའི་སྤྱི་ཟླ་༨པའི་ཚེས་༣༡ཉིན་ཞོགས་པ་ཆུ་ཚོད་བརྒྱད་དང་ཕྱེད་ཀའི་ཐོག  ཁམས་སྟོད་བོན་གྱི་གྲྭ་ས་ཆེན་མོ་དཔལ་གཤེན་བསྟན་ཀླུ་ཕུག་དགོན་གཡུང་དྲུང་བདེ་ཆེན་གླིང་གི་བཤད་སྒྲུབ་འདུས་སྡེ་དབུ་ཚུགས་ནས་ལོ་ངོ་ཧྲིལ་པོ་བཅུ་བཞི་འཁོར་བའི་རྗེས་དྲན་རྟེན་འབྲེལ་གྱི་མཛད་སྒོ་བསྡུས་ཤིང་། དེ་རྗེས་ཀླུ་དགོན་གྱི་ལོ་དེབ་«གངས་ལྗོངས་ཤེས་རིག་»འགྲེམ་སྤེལ་ཞུས་ནས་ལོ་ངོ་བཅུ་འཁོར་བ་དང་བསྟུན། ཕྱོགས་སོ་སོ་ནས་ཕེབས་པའི་དམར་སེར་ངུར་སྨྲིག་མདངས་ཀྱིས་མཛེས་པ། དགེ་འདུན་འདུས་པ་རྒྱ་མཚོ་བརྒྱ་ཕྲག་གྲངས། གདན་འཛོམས་ཀྱིས་«གངས་ལྗོངས་ཤེས་རིག་དཔྱད་རྩོམ་བགྲོ་གླེང་»སྐབས་དང་པོ་དངོས་སུ་དབུ་ཚུགས།

   ཐོག་མར་ཐེངས་འདིའི་བགྲོ་གླེང་གཙོ་སྐྱོང་བས་ཚོགས་འདུའི་དབུ་ཕུབས་གནང་བ་དང་ལོ་དེབ་«གངས་ལྗོངས་ཤེས་རིག་»གི་སྐོར་ནས་ངོ་སྤྲོད་མཛད། དེ་རྗེས་སྔོན་འགྲོའི་གསུང་བཤད་གོ་རིམ་དང་པོ། སྐྱབས་རྗེ་དཔོན་སློབ་རིན་པོ་ཆེ་ཤེས་རབ་གཡུང་དྲུང་གཙུག་ཕུད་མཆོག་གིས་«གངས་ལྗོངས་ཤེས་རིག་»ཅེས་པའི་བརྡ་ཆད་དང་འབྲེལ་བའི་ལོ་རྒྱུས་རྒྱབ་ལྗོངས་ངོ་སྤྲོད་སོགས་བཀའ་སློབ་ཟབ་རྒྱས་བསྩལ་མཛད་པ་དང་། གོ་རིམ་གཉིས་པ་དྲུག་ཅུའི་དགོན་རི་ཁྲོད་གཉིས་ཀྱི་དགེ་རྒན་ཆེན་མོ། རྒྱལ་བ་སྨན་རིའི་དགེ་བཤེས་ཨ་ཀྲོང་ཤེས་རབ་ལྷུན་གྲུབ་མཆོག་ནས་འདི་ལྟ་བུའི་དཔྱད་རྩོམ་བགྲོ་གླེང་ལ་དོན་སྙིང་ཆེ་ཚུལ་བཀའ་སློབ་གནང་ཞིང་། གོ་རིམ་གསུམ་པ་རང་དགོན་གྱི་ཀྲུའུ་རེན་དྲི་མེད་ལྷུན་གྲུབ་མཆོག་དང་གོ་རིམ་བཞི་པ་རང་དགོན་གྱི་བཤད་སྒྲུབ་འདུས་སྡེའི་བླ་མ་རིན་པོ་ཆེ་ཞུ་བླ་དགེ་བཤེས་གཡུང་དྲུང་རྒྱ་མཚོ་བཅས་ཀྱིས་རིམ་པས་སྔོན་འགྲོའི་གསུང་བཤད་གནང་སྟེ།

   དངོས་གཞིའི་དཔྱད་རྩོམ་བགྲོ་གླེང་ཚོགས་ཆུང་གསུམ་དུ་བགོས་པའི་ཚོགས་ཆུང་དང་པོ་དངོས་སུ་འགོ་ཚུགས་ནས། སྐར་མ་བཅུ་ཡི་རིང་བགྲོ་གླེང་དང་སྐར་མ་བཅུ་ཡི་ནང་ཚ་ཚ་འུར་འུར་གྱི་སྒོ་ནས་དྲི་བ་དྲི་ལན་མཛད་དེ་དགེ་བཤེས་རྣམ་པ་གསུམ་གྱིས་བགྲོ་གླེང་གནང་། ཉིན་གུང་ཆུ་ཚོད་བཅུ་གཉིས་ནས་གཉིས་པ་ཕྱེད་ཀའི་བར་གུང་ཟས་བཞེས་པ་དང་ངལ་གསོ་གནང་ཞིང་། ཆུ་ཚོད་གཉིས་པ་ཕྱེད་ཀའི་སྟེང་སླར་ཡང་ཚོགས་ཆུང་གཉིས་པ་དབུ་ཚུགས་ཏེ་སྔར་བཞིན་བགྲོ་གླེང་བ་རྣམ་པ་ལྔ་ཡིས་བགྲོ་གླེང་དང་དྲི་བ་དྲི་ལན་མཛད། དེ་རྗེས་ཕྱི་དྲོའི་གསོལ་ཇ་བཞེས་ནས་ཆུ་ཚོད་དྲུག་པ་ཕྱེད་ཀའི་སྟེང་སྐྱར་དུ་ཚོགས་ཆུང་གསུམ་པའི་བགྲོ་གླེང་དབུ་ཚུགས་ཏེ། བགྲོ་གླེང་བ་རྣམ་པ་བཞི་ཡིས་སྔར་བཞིན་བགྲོ་གླེང་དང་དྲི་བ་དྲི་ལན་མཛད་ཅིང་།

   ཐེངས་འདིའི་དཔྱད་རྩོམ་བགྲོ་གླེང་བ་ཕལ་ཆེ་བ་ནི་དགེ་བཤེས་དང་དགོན་གྱི་བཤད་སྒྲུབ་དགེ་རྒན་ཆེན་མོ་ཡིན་ཞིང་། བགྲོ་གླེང་དཔྱད་རྩོམ་ཡང་གཞུང་ཆེན་བཀའ་པོད་ཁག་དང་འབྲེལ་བའི་དཀའ་གནད་དང་ལོ་རྒྱུས་སོགས་ཀྱིས་གྲུབ་ཡོད། མཐར་དཔལ་གཤེན་བསྟན་ཀླུ་ཕུག་དགོན་གཡུང་དྲུང་བདེ་ཆེན་གླིང་གི་བཤད་སྒྲུབ་འདུས་སྡེའི་ཚོགས་གཙོ་མཐའ་ཡས་རྒྱ་མཚོ་མཆོག་ནས་ཐེངས་འདིའི་དཔྱད་རྩོམ་བགྲོ་གླེང་གི་མཐའ་མའི་མཇུག་བསྡུ་གནང་སྟེ། འགོ་བཀྲ་ཤིས་ཤིང་མཇུག་དོན་འགྲུབ་པའི་སྒོ་ནས་«གངས་ལྗོངས་ཤེས་རིག་དཔྱད་རྩོམ་བགྲོ་གླེང་»སྐབས་དང་པོ་ཡོངས་སུ་ཞལ་རྒྱས་པར་མཛད་དོ།།

ཞེས་«གངས་ལྗོངས་ཤེས་རིག་དཔྱད་རྩོམ་བགྲོ་གླེང་»སྐབས་དང་པོའི་གོ་སྒྲིག་ཚོགས་ཆུང་ནས།
སྤྱི་ལོ་༢༠༢༠ཉིན་ཟླ་བ་༩པའི་ཚེས་༡ཉིན།