མིའི་རིགས་ཀྱི་སྤྱི་ཚོགས་ལ་ཚན་རྩལ་རིག་གནས་ཀྱི་རླབས་རྒྱུན་དྲག་ཏུ་ལྡང་ཞིང་ཤེད་ཀྱིས་འཕྱོ་བའི་དུས་རབས་ཉེར་གཅིག་པའི་དཀྱོག་མཚམས་འདིར། ས་སྒང་གོ་ལ་ཧྲིལ་བོ་དྲྭ་བའི་ཁེབས་མ་གཅིག་གིས་ཡོངས་སུ་བཀླུབས་ཟིན་པས་ཆབ་དཔལ་རིག་གསུམ་གྱི་མ་ལག་ཡོད་ཚད་འཛམ་གླིང་རང་བཞིན་ཅན་གྱི་འཁོར་ཕྱོགས་ལ་བསྐྱོད་དང་སྐྱོད་བཞིན་ཡོད་པས་ན།
ངེད་གནའ་བོའི་རིག་གནས་ཁྱབ་སྤེལ་ཚད་ཡོད་སྤྱི་གཉེར་ཁང་གིས་གཙོ་སྒྲུབ་བྱས་པའི་བློ་འབྱེད་དྲ་བས་ངོས་དང་ཟུར་གཉིས་ནས་བརྡ་འཕྲིན་རིག་གནས་ཀྱི་སྟོང་ཆ་ཞིག་གི་ཁ་བསྐང་ཕྱིར་དྲ་ལམ་སློབ་གསོའི་ལས་རིགས་ལ་འབད་པ་བརྒྱ་བྱས་ཤིང་། དྲ་བའི་སྤྱོད་སྒོ་མེད་པ་ནས་ཡོད་པ་དང་། ཡོད་པ་ནས་འཐུས་ཚང་གི་ཕྱོགས་སུ་བསྐྱོད་དེ། སྤྱིར་འཆད་ཁྲིད་བྱེད་སྟངས་དེ་ཡང་རྣམ་པ་མི་འདྲ་བའི་སྒོ་ནས་གསར་བསྒྱུར་བྱས་ཤིང་། བོད་ཀྱི་རིག་གནས་འདྲ་མིན་སྣ་ཚོགས་སྒྲ་དང་བརྙན་གཟུགས་ཀྱི་ལམ་ནས་འཆད་ཁྲིད་གནང་བར་མ་ཟད། འཆད་ཁྲིད་པའང་། དགེ་རྒན་གྱི་གོ་གནས་ཡོད་པ་ཙམ་མ་ཡིན་པར། རིག་གཞུང་ཆེད་མཁས་པ་དང་། ལོ་རྒྱུས་ཉམས་ཞིབ་པ་། རིགས་གཅིག་རྐང་འཛིན་པ་སོགས་དམིགས་བསལ་གྱིས་གདན་འདྲེན་ཞུས་ནས། དྲ་ལམ་ཐད་གཏོང་དང་བཅར་འདྲིའི་ལམ་ནས་འཛམ་གླིང་རིག་གནས་ཀྱི་མ་ལག་ཡོངས་རྫོགས་ཁྱེད་ཅག་ལྟ་མཁན་རྣམ་པ་དང་། གསན་མཁན་ཡོངས་ལ་ཞབས་ཕྱིའི་རྣམ་པ་ཅི་ནུས་ཀྱི་ཐད་ལ་ཤ་ཟད་རུས་ཐུག་གིས་འབད་ངེས་ཡིན་པས་མ་ཚད། གྲུབ་མཐའ་རིས་མེད་ཀྱི་སྒོ་ནས་དགོན་སྡེའི་མཁས་པ་ཚོར་ཞལ་ཁྲིད་ཀྱི་ལེ་ཚན་རེ་ཆེད་བསྒྲིགས་བྱས་ཏེ། རང་རང་གི་གྲུབ་མཐའ་སོ་སོའི་བྱུང་རིམ་དང་། སྒོས་སུ་གྲུབ་མཐའ་རང་གི་ཐུན་མོང་མ་ཡིན་པའི་ལྟ་བ་དང་གྲུབ་མཐའི་ཡིག་ཆའི་སྐོར་ནས་འཆད་ཁྲིད་བྱ་རྒྱུ་ཡིན།
དེ་ཡང་ངེད་བློ་འབྱེད་དྲ་ལམ་སློབ་གསོའི་རིགས་ཚན་གྱི་ཕྱོགས་ནས་ཀྱང་། མང་པོ་ཡོད་ལ། དཔེར་ན། ཚད་མ་རིག་པ་དང་། སྒྲ་རིག་པ། གསོ་བ་རིག་པ། བཟོ་རིག་པ། དཔལ་འབྱོར་རིག་པ། ཡིག་གཟུགས་འབྲི་ཐབས་སོགས་མདོར་ན། བོད་ཀྱི་རིག་གནས་གཙོས་རྒྱལ་སྤྱིའི་རང་བཞིན་གྱི་རིག་གནས་སོགས་ནང་འདྲེན་དང་དེང་རབས་གཙོ་རྒྱུགས་རིག་གནས་དག་དངོས་ཤུགས་གཉིས་ཀ་ནས་ཁྱབ་སྤེལ་བྱས་ཏེ། འཛམ་གླིང་རང་བཞིན་ཅན་དུ་བསྐྱོད་ཅི་ཐུབ་བྱ་ངེས་ཀྱི་ལས་བྱ་འདི་ལ། རྣམ་པ་ལྷན་རྒྱས་ཀྱིས་དགེ་འདོན་སྐྱོན་སེལ་གྱི་འབོད་བསྐུལ་དང་མི་འབྲལ་བའི་འོག ཕྱོགས་སོ་སོ་ནས་དུས་དང་དུས་སུ་སྨན་ངེས་པའི་རྒྱབ་སྐྱོར་མཛུབ་སྟོན་མི་ཆུང་བའི་རེ་འབོད་ཡང་ཡང་ཞུ་བཞིན་ཡོད་པ་ཡིན་ནོ།།
