སྤུ་ལ་ཁྱུང་ནག་དགོན་ནས་བོན་གཤེན་རིག་སློབ་འདུས་སྡེའི་སློབ་ཐོན་གྱི་མཛད་སྒོ་སྤེལ་བ།

༧དཔལ་གཤེན་བསྟན་སྤུ་ལ་ཁྱུང་ནག་དགོན་གཡུང་དྲུང་བསྟན་འཕེལ་གླིང་དུ་བོན་གཤེན་རིག་སློབ་འདུས་སྡེའི་སློབ་ཐོན་གྱི་མཛད་སྒོ་སྤེལ་བའི་བྱུང་རབས་རགས་བསྡུས།

མཐའ་བཞི་རྒྱ་གྲོལ་ཀུན་བཟང་དགོངས་པའི་མཛོད། །

རིག་སྟོང་དཀྱིལ་འཁོར་ཀུན་ཀྱང་བདག་ཞལ་མཇལ། །

རྩལ་སྣང་རོལ་པའི་ཆོ་འཕྲུལ་སྐུ་གསུང་ཐུགས།།

ཞིང་འདིར་གཤེགས་ཤིག་མཁན་ཆེན་དམ་པ་རྒྱལ།།

རྒྱལ་བའི་བཀའ་འཁོར་ཀུན་གྱི་མངའ་བདག་རྗེ།།

སྲིད་གསུམ་འགྲོ་ཀུན་ཡོངས་ཀྱི་དཔལ་གཅིག་པུ།།

རྒྱལ་བསྟན་ས་སྟེང་བཀང་པའི་བྱེད་པོ་བ།།

རྟག་ཏུ་བཞུགས་ཤིག་ཡོངས་འཛིན་བླ་མ་ཀྱེེ།།

　　ཞེས་གདུང་ཤུགས་དྲག་པོའི་གསོལ་འདེབས་ཀྱིས་མདུན་བསུས་ཏེ་༧དཔལ་གཤེན་བསྟན་སྤུ་ལ་ཁྱུང་ནག་དགོན་གཡུང་དྲུང་བསྟན་འཕེལ་གླིང་དུ་བོན་གཤེན་རིག་སློབ་འདུས་སྡེའི་སློབ་ཐོན་པའི་བྱུང་རབས་ནི། དང་པོ་སྤྱི་ལོ་༢༠༡༠སྤྱི་ཟླ་༡༡པའི་ཚེས་༢༠ཉིན་དཔོན་གསས་བླ་མ་མདོ་སྔགས་བཤད་སྒྲུབ་ཉི་མ་རིན་པོ་ཆེ་མཆོག་གིས་བོན་གཤེན་རྣམས་ལ་དམིགས་ཏེ། སྔོན་འགྲོ་དང་དངོས་གཞི། གྱེར་དབྱངས་འཕྲིན་ལས། འབུད་རྡུང་དཀྲོལ་གསུམ། བརྡ་དག་སྙན་ངག གསང་སྔགས་ཀྱི་ལམ་རིམ་སོགས་སློབ་གཉེར་གནང་སའི་ཁོར་ཡུག་བོན་གཤེན་རིག་སློབ་འདུས་སྡེའི་སློབ་གཉེར་བཙུག དེ་ནས་བོན་གཤེན་རྣམས་ཀྱི་སྒྲིག་གཞི་ལའང་ལུགས་གཉིས་གང་ལ་འགལ་བའི་ཚུལ་མིན་གྱི་སྤྱོད་པ་རྒྱན་འཇོག་གི་རིགས་དང་། འཕྲོད་བསྟེན་ལ་གནོད་ཚབས་བས་ཐ་མག་དང་ཆང་རག ཚུལ་མིན་གྱི་གྱོན་ཆས་རིགས་གྱོན་ན་མི་མཛེས་པ་དང་། གྲོང་ཆོག་ཏུ་ཕེབས་སྐབས་སུ་མོ་ཁྲིམས་གཏན་སྲུང་དང་འདོན་ཆོག་གསུང་པའི་སྐབས་སུ་ཁ་པར་གཏོང་ལེན་སོགས་འཇིག་རྟེན་གྱི་མིག་དགྲར་འགྲོ་བའི་བྱ་སྤྱོད་རིགས་གཏན་ནས་འཛེམ་དགོས་པ་དང་། གཞང་ཡང་སྤྱི་རིམ་དང་ལས་བཞིའི་སྲེག་ཆོག་གི་སྐབས་སུའང་དམར་ཟས་མཆོད་མི་ཉན་པའི་བླངས་བྱ་གནང་བ་བཅས། ༧སྐྱབས་རྗེ་ཡོངས་འཛིན་རིན་པོ་ཆེ་མཆོག་ལ་རང་གི་བོན་གཤེན་རྣམས་གསོ་སྐྱོང་བྱེད་ལུགས་ཀྱི་སྙན་ཞུ་དང་སྦྲགས་ཏེ་བོན་པོ་སྤྱི་ལ་གསང་སྔགས་པའི་ཁྲིམས་དང་། ཆས་གོས་ཀྱི་ཐད་ལ་ཤིན་ཏུ་དགོས་གལ་ཆེ་བ་ཞུས་དོན་བཞིན་༧སྐྱབས་རྗེ་ཡོངས་འཛིན་རིན་པོ་ཆེ་མཆོག་གིས་བསྟོད་བསྔགས་ཀྱི་མེ་ཏོག་འཐོར་ཞིང་། གཤམ་གསལ་སྔགས་འཆང་གི་ཆས་སྐོར་དང་བཅའ་གཞི་ཞེས་པའི་དཔྱད་རྩོམ་འདི་ཉིད་བཀའ་དྲིན་བསྩལ་གནང་མཛད་པ་སྟེ། ༼སྔར་གྱི་སྲོལ་དང་བསྟུན་པའི་སྔགས་འཆང་གི་ཆས་སྐོར་དང་བཅའ་གཞི།༽ བླ་མ་དང་ཡིད་དམ་དབྱེར་མེད་པའི་སྐྱབས་ཡུལ་རྣམས་ལ་ཕྱག་འཚལ་ལོ། །སྔགས་འཆང་བའི་ཆས་གོས་དང་། སྒྲིགས་ཁྲིམས། བློ་སྦྱོང་གི་སྐོར་བཅས་གསུམ། དང་པོ་ཆས་གོས་ཀྱི་སྐོར་ནི། སྔར་སྲོལ་གྱི་དཔེ་རྒྱུད་ཁུངས་ལྡན་འགའ་དང་བསྟུན། ཀུན་མཐུན་གྱི་མིག་དགྲར་མ་སོང་བའི་སྐབས་དང་བསྟུན། ལུས་ཀྱི་གོས་དབྱར་སྲབ་དགུན་འཐུག་གང་ལྟར་ཡང་ཕྱུ་བ་ཕྱི་གཡོག་སྔོན་པོ་ཅན་དང་། སྐེད་རགས་དམར་པོ། དགུན་གོས་ནང་ཚང་དུ་དབྱི་ལྤགས། ལུགས་ལྤགས་སོགས་གང་ཡིན་པའི་ཕྱི་གཡོག་སྔོན་པོ། སྟོད་འབོག་དམར་པོའམ་སྔོན་པོ། གཅན་གཟན་སོགས་ཀྱི་གོང་སླག་ཅེས་གོང་བའི་ཕྱི་རྒྱན་ནོ།། ༼མཆན། ཡུལ་དུས་འཚམས་པར་དགོས་སྟབས་པགས་རིགས་ཀྱི་རྒྱན་གྱི་ཚབ་ཏུ་གོས་ཆེན་སོགས་གང་འོས་གནང་རྒྱུ།༽

　　དེ་ཡང་ཁོག་སྟོད་དུ་གོན་རྒྱུའི་ཕུ་ཐུང་ཅན་བབ་རིང་ཙམ་ཡོད་པ་ཕྱར་བུ་ཡང་ཟེར། དེ་ཡི་སྟེང་དུ་དར་གྱི་གོང་ཁྱུད་ཅེས་གཟན་མདོག་དམར་པོ་ཞིག་གོ། འབོལ་ལྷམ་ཞེས་ཡུལ་ལུགས་ཀྱི་ལྷམ་ཡུ་བ་ཅན། ལྷམ་སྒྲོགས་དམར་པོ། མཐིལ་བརྩེགས་ཡོད་པ་དང་། ཞྭ་དཀར་མོ་རྩེ་རྒྱལ། འཚོགས་གྲལ་དུ་ཕྱམ་ཙེ་ཞེས་ཟླ་གམ་ལྟ་བུའི་སུལ་མ་མེད་པའི་དམར་པོ་དང་སྨུག་མདོག་གང་རུང་གཡང་ལུགས་སུ་གོན་རྒྱུའོ།། སྐྲ་ནི་གཙུག་ཏུ་བཅིང་པའམ་ལྷས་མ་གང་རུང་། གཉིས་པ་བོན་ལ་སྤྱོད་པ་སྤྱི་ཡི་སྒྲིག་ཁྲིམས་ནི། སངས་རྒྱས་ཀྱི་གསུང་ལ་མཉན་ཞིང་བརྩི་བཀུར་ཞུ་དགོས་པས། ལུས་ཀྱིས་ཕྱག་དང་སྐོར་བ། ངག་གིས་སྙིང་པོ་རྣམ་གསུམ་བགྲང་བ། སེམས་ཀྱིས་སྐྱབས་སེམས་དང་། སྡིག་བཅུ་སོགས་ལ་འབག་ཤོར་དོག་དགོས་ཤིང་། ཁྱད་པར་དུ་དགེ་ཚོགས་བསགས་པའི་དུས་ཆེན་སོགས་དང་། ཞེ་དགུ་བཟུང་བ། སྟོན་རིམ་བྱེད་པ་སོགས་ལ་དམིགས་ཏེ་དུད་འགྲོ་བསད་ནས་ཤ་ཁྲག་ཟས་སྟོན་བྱེད་པ་སོགས་ཤིན་ཏུ་མི་རུང་སྟེ། གཡུང་དྲུང་བོན་དང་འགལ་བ་ཁོ་ན་ཡིན་གཤིས་དེ་རིགས་སྤང་དགོས་རྒྱུ། གང་ཟག་གི་ངོས་ནས་ཡིག་ཆ་ཀློག་འདོན་ཤེས་ཙམ་ནས་དཀོར་ལ་རྔམ་པ་དང་། རིགས་རུས་བཟང་ངན་གང་ལྟར་ཡང་བོན་མཐུན་གྱི་སྡོམ་པ་སྣ་གཅིག་མི་བསྲུངས་པའི་ཁར། གྲོང་ཆོག་སོགས་ལ་རྔ་ཆུང་ཁུར། ཟིན་བྲིས་སོགས་པོད་ཆུང་གལ་ཏའི་ནང་དུ་བཅུག་ནས་ཡུལ་གྲོང་མྱུལ། ཤ་ཆང་དང་ཟས་བཟང་ངན་གཏམ། སྲོད་ལ་བྱི་ཕོ་འགྲོ་བསྐྱོད། བྱི་ཕྲུག་དུ་མའི་འབྲས་བུ་ཅན། ཤ་ཆང་གི་ལས་དང་ལོག་གཡེམ་ལ་བག་མེད་དུ་སྤྱོད་པའི་རིགས་མཆོད་ཡུལ་དུ་བཀུར་བ་དང་། བསྙེན་བཀུར་བྱེད་པ་རྣམས་ལེ་འུའི་དད་རྫས་ཆུད་ཟོས་སུ་འགྲོ་བས་གཟབ་དགོས། གསུམ་པ་བློ་སྦྱང་གི་སྐོར། ཐོག་མར་བླ་མ་མཚན་ཉིད་དང་ལྡན་པ་ཞིག་ལ་བསྟེན། ཨ་སྙན་རྫོགས་གསུམ། མ་རྒྱུད་ཐར་ལམ། དྲང་དོན་མུན་སེལ་སྒྲོམ་མ་སོགས་གང་རུང་གི་གཞུང་དང་བསྟུན་ཏེ། ཁྲིད་རིམ་གྱི་ཚིག་ལ་གོ་རྟོགས་ཡོད་པ། དོན་ལ་མྱོང་བ་ཡོད་པ། བསགས་སྦྱོང་འབུམ་དགུའི་གྲངས་ཚད་ལོན་པ་ཞིག་བྱེད། དེ་ནས་རང་གི་གཞུང་ལུགས་རྒྱུད་སྡེ་བཞི་ཡི་རྣམ་བཞག་ལ་ལེགས་པར་ཞིབ་ཏུ་བསླབ། དེ་རྣམས་ཀྱི་སྤྱི་དོན་ཞིག་གོ་བའི་རྗེས་སུ་སྒྲུབ་པ་པོ་རང་གི་བློ་དང་ནུས་པ་ལ་བསྟུན་ཏེ་གཞུང་བཞིན་ཡིད་དམ་གང་ཡིན་དེ་ཡི་ཁྲིད་རིམ་ལྟར་ཚོགས་ལམ་དང་། སྦྱོར་ལམ། མཐོང་ལམ། སྒོམ་ལམ། མཐར་ཕྱིན་པའི་ལམ་བཅས་ཀྱི་རྣམ་བཞག་ལ་མ་རྨོངས་པར་ལག་ལེན་རྒྱུད་ལ་ཁེལ་བར་བྱེད། དེ་དང་མཐུན་པའི་དམ་སྡོམ་རྣམས་ཀྱང་ཤིན་ཏུ་དམ་པར་བསྲུང་བར་བྱེད། དེ་ལྟར་གྱི་ལྟ་སྒོམ་སྤྱོད་པར་མི་ཚེ་འཁྱོལ་བར་བྱེད་པའི་སྔགས་འཆང་གཡུང་དྲུང་གི་བོན་རིན་པོ་ཆེ་འཛིན་པའི་སྐྱེས་མཆོག་སྔར་གྱི་གསང་གྲུབ་མཁས་དབང་མི་བཞི། ལོ་པཎ་གཤེན་བརྒྱད། བླ་ཆེན་དྲན་པ་ནམ་མཁའ། ཚེ་དབང་རིག་འཛིན། སྙ་ཆེན་ལི་ཤུ་སྟག་རིང་སོགས་ཀྱི་རྗེས་འཛིན་གདུང་འཚོབ་ཏུ་འོས་པའི་ཚོགས་སོ།། ཁྱེད་རྣམ་པས་སྔགས་དགོན་བདུད་འདུལ་སྔགས་གླིང་ཞིག་བཞེངས་གྲུབ་ན་ནང་བཅུད་དུ་འདི་བཞིན་གྱི་བཅའ་གཞི་འགྲུབ་པའི་སྨོན་ལམ་ཡིན། ཕྱི་དུས་ཡང་སྟོན་ཤེས་རབ་རྒྱལ་མཚན་ནས་སྔགས་ཆས་འདི་འདྲ། བླ་རྒྱུད་རྣམ་ཐར་ལས། རྒྱལ་གཤེན་རིག་མཛོད་དེབ་དང་པོ། སྤྱི་ཨང་༥༦ནས། ནམ་སྨད་བོན་པོ་སྔགས་པའི་ཆ་བྱད་ཅན། རལ་པ་སིལ་མ་ཐོར་ཅོག་ཏུ་བཅིངས་པ། ལ་ལ་རོ་སྟོད་ཉི་ལེ་བྱས་པ། སྨང་ར་རྒྱ་ཞོལ་ལེ་བ། ཤ་ལ་འཇོལ་ཤག་དཀར་མོ་གྱོན་པ། ནང་འཇམ་དཀར་པོ་ཞིག དེ་སྟེང་ན་ཕོད་ཁ་སྔོན་པོ་ཞིག ཕྱི་གོས་ཕྱུ་བ་ཕྱི་གཡོག་སྔོན་པོ་ཅན། དེ་སྟེང་ན་ཅམ་སེ་དམར་པོ་ཞིག་གོན། ༼གཟན་ལྟ་བུ།༽ རྐེད་པ་ལྕགས་ཕུར་གཅིག་གཟེར་བ་ཞིག་མཇལ་དུ་མཚན་ལྟས་སུ་བྱུང་། དེ་ནས་སང་ཉི་དྲོས་ལ། ཉེ་གནས་ན་རེ། འུ་ལ་གདོང་སྐྱ་ནས་ཡོང་བའི་བོན་པོ་ཞིག་མཇལ་ཞུ་ཡིན་གདའ་ཞུས་པས། ཅི་འདྲ་ཞིག་འདུག་གསུང་པས། ན་བཟའ་དང་སྔགས་པའི་ཆ་བྱད་འདི་འདྲ་གདའ་ཞུས་པས། མདང་གི་མཚན་ལམ་དུ་བྱུང་བ་དེར་འདུག་གསུངས། མཇལ་བས་ཆོག་གསུང་ནས་མཇལ་ལོ།། ཞེས་སོ།། དགེ་བསྙེན་པའི་ཚུལ་གོས་ཀྱི་ཚུལ་ལ། སྔགས་ཆས་སམ་སེར་ཆས་གོན་པ་ལ། ཐ་ན་དགེ་བསྙེན་གྱི་སྡོམ་པ་བསྲུང་བ་ཞིག་དགོས་པས་དེ་ཡི་གོས་ཀྱི་ཚུལ་ལ། མདོ་དྲི་མེད་གཟི་བརྗིད་པོད་གསུམ་པའི་ནང་། དགེ་བསྙེན་ཐེག་པའི་མདོ་ལྟར། ཕྱི་ཡི་ཚུལ་གོས་ལྔ། ནང་གི་གཏན་ཁྲིམས་ལྔ། བར་གྱི་སྤྱོད་ལམ་ལྔ་དང་མཐུན་པར་བྱ་ཞིང་། ཐེག་པ་ལ་འཇུག་སྟེ། དང་པོ་ཕྱི་གོས་ལྔ་ནི། སྟོད་གོས་དང་། སྨད་ཤམ་དང་། ཆག་ནན་དང་། རྨད་འོག་དང་། རྨད་གོས་ཕྱར་བུ་དང་ལྔའོ།། ནང་གི་ཁྲིམས་ལྔ་ནི། ཞེ་སྡང་དབང་གིས་སྲོག་གཅོད་པ། འདོད་ཆགས་དབང་གིས་མ་བྱིན་པ་ལེན་པ་དང་། གཏི་མུག་དབང་གིས་རྒྱུ་འབྲས་མི་བརྩི་བར་ཐོབ་རྫོབ་ཏུ་སྤྱོད་པ་དང་། ང་རྒྱལ་དབང་གིས་དྲེགས་པའི་ལས་བགྱི་བ་དང་། ཕྲག་དོག་དབང་གིས་ཚིག་རྩུབ་མོ་དང་། ངག་འཁྱལ་སྨྲ་བ་དང་། རྫུན་དང་། ཕྲ་མ་སྨྲ་བ་དང་ལྔ་སྤང་བའི་བླང་བ་ནི་དེ་ལས་བཟློག་པ་སྟེ། ཡོན་ཏན་གྱི་ཚོགས་དཔག་ཏུ་མེད་པའོ།། བར་གྱི་སྤྱོད་ཚུལ་ལྔ་ནི། དག་པའི་ཁྲུས་བགྱི་བ་དང་། ཕྱག་སྐོར་དང་མོས་འདུན་སྤྱོད་པ་དང་། སྐུ་གདུང་གི་སྭཙྪ་གདབ་པ་དང་། རྣམ་དག་གི་ཆབ་གཏོར་གཏོང་བ་དང་། ཚོགས་གསོག་པའི་ཡན་ལག་ལ་མཆོད་པ་འབུལ་བ་ལྔའོ།། གོས་ལྔ་ཡི་སྟོད་གོས་དང་སྨད་ཤམ་གཉིས་གྲྭ་ཆས་དང་འདྲ་བ་ལ། ཆག་ནན་ཞེས་སེར་ལྷམ་སྙམས། རྨད་འོག་ནི་རྒྱས་བསྡུས་ཙམ་ལ་གཟན་ལྟ་བུའོ།། རྨད་གོས་ཕྱར་བུ་ཞེས་སྟོད་གོས་རིང་པོ་དེའོ།། བསྟན་རྣམ་པས། ཅེས་པའི་ཟབ་གདམས་ཁྱད་པར་ཅན་འདི་ཉིད་གཞི་བྱས་ཏེ། སྔོན་འགྲོ་དངོས་གཞི་བསགས་སྦྱོང་ཆ་ཚང་གྲུབ་བའི་འདིར་འཁོད་ཀྱི་བོན་གཤེན་རྣམས་ལ་ སྤྱི་ལོ་༢༠༡༠་དང་༡༡་པའི་ནང་དུ་སྐྱབས་རྗེ་མདོ་སྔགས་བཤད་གྲུབ་ཉི་མ་རིན་པོ་ཆེས་བཀའ་འགྲེལ་དང་ཐེག་འགྲེལ་སྦྲག་མར་ཟབ་ཁྲིད་གནང་། སྤྱི་ལོ་༢༠༡༢་ལོར་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རི་དགོན་གྱི་བཤད་སྒྲུབ་འདུས་སྡེའི་མཁན་ཟུར་གཤེན་བསྟན་རབ་གསལ་རིན་པོ་ཆེས་དབལ་གསས་སྐུ་གསུང་ཐུགས་ཀྱི་སྒྲུབ་ཐབས་ཀྱི་འགྲེལ་བ་གསལ་བྱེད་འཕྲུལ་གྱི་ལྡེ་མིག་གི་ཁྲིད་གདམས་ཟབ་རྒྱས་གནང་བ་དང་། དེ་བཞིན་སྤྱི་ལོ་༢༠༡༣་དང་༡༤་གཉིས་ལ་ལྷ་གཉེན་ཤེལ་སྒོང་གི་ཟབ་ཁྲིད་གནད་སྨིན་སྟོང་གསུམ་གསེར་གྱི་བཀང་བ་ལས་ལྷག་པའི་བཀའ་དྲིན་བསྩལ་གནང་མཛད་པ་དང་། དེ་མཚམས་སུ་བོན་གཤེན་རྣམས་དབལ་གསས་ཞི་ཁྲོའི་སྒྲུབ་པར་ཞུགས་ཏེ་འཕྲོ་འདུ་ཏིང་འཛིན་ཟབ་མོའི་གཞི་གཏིང་། གྲགས་སྟོང་འཛབ་དབྱངས་ཀྱི་གཞུང་སྲོང་ནས་བསྙེན་ཆེན་གྱི་ཚད་ལོན་པ་བསྐྱལ། སྤྱི་ལོ་༢༠༡༥་ལོར་རྩ་རླུང་དང་བཅུད་ལེན་ཞག་བརྒྱ་བཞུགས། བོན་གཤེན་འགའ་ཞིག་སྤྱི་ལོ་༢༠༡༦་ལོར་མུན་མཚམས་བཞི་བཅུ་ཞེ་དགུར་བཞུགས་པ་དང་།

　　འགའ་ཞིག་སྤྱི་ལོ་༢༠༡༧་ལོར་མུན་མཚམས་ཞེ་དགུར་བཞུགས་པ་བཅས་གོ་ལོ་ཐོས་ལོ་ཙམ་མ་ཡིན་པར་། ཞོགས་པ་ཆུ་ཚོད་དགུ་ནས་བཅུའི་བར་ཐུན་སྒོམ་དང་། ཆུ་ཚོད་བཅུ་ནས་བཅུ་གཅིག་བར་བོན་གཤེན་རྣམས་རེས་སྐོར་གྱིས་མི་གཉིས་རེས་ཉིན་རེ་བགྲོ་གླེང་གི་སློབ་དཔོན་མཛད་ནས་དྲི་བ་དྲི་ལན་གནང་སྟེ་ཚིག་དོན་གཉིས་ཀའི་ཆ་ནས་གདར་ཤ་ལེགས་པར་གཅོད་དགོས་པ་མ་ཟད་གོ་བ་ལེན་སྟངས་དང་དགོངས་པ་འགྲེལ་ཚུལ་མ་མཐུན་པ་རྣམས་རྩ་བའི་དགེ་རྒན་གྱི་མདུན་དུ་ཞུ་དག་ལེགས་པོ་གནང་བ་དང་། ཆུ་ཚོད་བཅུ་གཅིག་ནས་ཆུ་ཚོད་དང་པོ་བར་ཉིན་གུང་གསོལ་ཚིགས་དང་ངལ་གསོ་ཡིན། ཆུ་ཚོད་དང་པོ་ནས་གསུམ་པའི་བར་དུ་གསང་སྔགས་གྱི་ལམ་རིམ་ཁག་དགེ་རྒན་སོ་སོས་གཞུང་ཁྲིད་གནང་བའི་དུས་ཚོད་དང་། གཞན་ཡང་དགུན་དུས་སུ་ཞོགས་པ་ཆུ་ཚོད་དྲུག་པ་ནས་དགོང་མོ་ཆུ་ཚོད་བཅུ་གཉིས་བར་དུ་བློ་འཛིན་དང་དཔེ་ཀློག་སོགས་ཀྱི་དུས་འདའ་བ་བྱེད་དགོས་པ་ལས་རྣམ་གཡེང་གིས་དབང་དུ་མི་ཤོར་བའི་སྟངས་འཛིན་སོ་སོའི་འཛིན་དཔོན་གྱིས་འགན་ཁུར་ནན་པོ་གནང་དགོས་པ་བཅས་ཡིན། ཟུར་དུ་རྒྱལ་བ་བྲུ་ཡི་རིང་ལུགས་སྤྱི་འགྲོས་ཉེར་མཁོ་འདོད་འཇོ་ཁྲི་ཤིང་དང་། གེ་ཁོད་གསང་བ་དྲག་ཆེན་གྱི་གྱེར་འཕྲིན། དག་ཡིག་སུམ་ཅུ་པ། ཡིག་གཟུགས་འབྲུ་སྒུར་དང་། ཡིག་དཀར། འཁྱུག་ཡིག་བཅས་རྒན་གཤེན་བསྟན་རབ་གསལ་གྱི་མདུན་ནས་ཟབ་ཁྲིད་རྒྱས་པར་ཐོབ་པ་བཅས་གོང་གི་སྦྱང་བྱའི་གནས་ཆེན་དེ་དག་སློབ་སྦྱོང་གནང་བའི་སྐབས་གོ་ལོ་ཐོས་ལོ་ཙམ་མ་ཡིན་པར་ཐམས་ཅད་ཡིག་ཚད་ཀྱི་ལམ་ནས་རྒྱུགས་སྤྲོད་ལེན་བྱས་པའི་འབྲས་བུ་གཡུར་དུ་ཟ་བ་ཐོབ་པ་དང་། དེང་སྐལ་བཟང་དགེ་བའི་དུས་ཀྱི་ཆར་འདིར་༧དཔལ་གཤེན་བསྟན་སྤུ་ལ་ཁྱུང་ནག་དགོན་གྱི་བླ་བྲང་གི་མདུན་ཞོར་དུ་༧སྐྱབས་རྗེ་དཔོན་གསས་བླ་མ་མདོ་སྔགས་བཤད་སྒྲུབ་ཉི་མ་རིན་པོ་ཆེ་དང་། ༧གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རི་དགོན་གྱི་བཤད་སྒྲུབ་འདུས་སྡེའི་མཁན་ཟུར་གཤེན་བསྟན་རབ་གསལ་རིན་པོ་ཆེ་དང་། དཔོན་སློབ་རིན་པོ་ཆེ། བཤད་སྒྲུབ་འདུས་སྡེའི་མཁན་རིན་པོ་ཆེ་དང་དགེ་རྒན། བོན་གཤེན་རྣམས་གསང་སྔགས་ཀྱི་ཆས་གོས་གསོལ་ནས་ཚར་དུ་དངར་བའི་རུ་སྟར་སྒྲིག་ཤིང་སྤོས་རྒྱས་སྣ་དྲངས་ཏེ་གསང་སྔགས་བདུད་འདུལ་ལྷ་ཁང་དུ་གདན་ཞུའི་ཞབས་སོར་འཁོད་པ་དང་། ཚོགས་ཆེན་དབུ་མཛད་མཆོག་གིས་འདོན་པ་མཚོ་གཏིང་རྡོ་འཕང་བ་ལྟར་དབུས་ནས་མཐའ་ལ་ཁྱབ་པ་ལྟར་དབུ་འཛུག་གནང་བ་དང་ལྷན་དུ་གྲྭ་མང་གིས་ཚོགས་འདོན་གྱི་བོན་དབྱངས་དབྱར་རྔའི་སྒྲ་དབྱངས་བསྒྲགས་པ་དང་སྟབས་ཅིག་ཏུ་ཡོན་བདག་རྣམས་ཀྱིས་འགྱེད་མང་ཇ་བསོད་ནམས་ཀྱི་མཆོད་པའི་སྤྲིན་ཚོགས་ཡོངས་སུ་ཁྱབ་པར་སྤུངས། དེ་ནས་༧སྐྱབས་རྗེ་མདོ་སྔགས་བཤད་སྒྲུབ་ཉི་མ་རིན་པོ་ཆེས་བོན་གཤེན་སློབ་ཐོན་པ་བདུན་ལ་བྱིན་མདུད་དང་ཕྱག་ཁྱེར་བསྩལ་གནང་མཛད། དེ་ནས་བཀའ་དྲིན་གཞལ་ཟླ་བྲལ་བའི་བླ་རྒན་བསོད་ནམས་ཡེ་ཤེས་རིན་པོ་ཆེ་དབུས་པའི་གནས་ཡོད་ཀྱི་བླ་མ་དགེ་བཤེས་རྣམས་ཀྱིས་སློབ་ཐོན་པ་རྣམས་ལ་མགུར་དར་སྒྲོན། ཡོན་མཆོད་གཉིས་ཀྱིས་ཚོགས་གཉིས་བསགས་པའི་དགེ་ཚོགས་ཐམས་ཅད་ཟད་མེད་དབྱིངས་སུ་ལ་ཟླ་བའི་ཕྱིར་དུ་དཔོན་གསས་བླ་མ་རིན་པོ་ཆེས་བསྔོ་བ་གསུང་ཞིང་། དེ་རྗེས་གྲྭ་མང་གིས་རྗེ་རྒྱལ་བ་སོགས་གྱེར་ནས་ཚོགས་གྲོལ། སྐུ་པར་བསྐྱོན་ཞིང་གྲྭ་མང་དང་དད་ལྡན་མང་ཚོགས་ཀྱིས་སློབ་ཐོན་པ་རྣམས་ལ་བཀྲ་ཤིས་ཀྱི་མགུར་དར་སྒྲོན་ཏེ་མཛད་སྒོ་རྣམ་པར་རྒྱལ་བ་མཇུག་ཡོངས་སུ་གྲུབ་པར་བྱས་སོ།།

གསང་ཆེན་སྔགས་ཀྱི་གཞུང་ལུགས་དམ་པའི་མཐིལ།

རྩ་རླུང་ཐིག་གསུམ་ལུས་སེམས་ལྷ་སྐུར་སྦྱོང་།

རིམ་གཉིས་བསྐྱེད་རྫོགས་སྒྲུབ་པའི་དགེ་ཚོགས་ཀུན།

འགྲོ་ཀུན་བྱང་ཆུབ་ཐོབ་པའི་རྒྱུ་གྱུར་ཅིག།

　　ཞེས་སྤུ་ལ་ཁྱུང་ནག་དགོན་གྱི་ཡིག་ཚང་ནས་༢༠༡༩ཟླ་༨ཚེས་༢ཉིན་སྤེལ།