གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་ཆེན་གསུམ་འཚོགས་པའི་ཉིན་བཞི་བ།
[ཟླ་ཚེས། 2018-09-22 21:05:13][རྩོམ་པ་པོ། ཚོགས་འདུའི་གསར་འགྱུར་འགན་འཛིན་ཚན་ཁག][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
གཡུང་དྲུང་བོན་མཉམ་འབྲེལ་ལྷན་ཚོགས་སྐབས་གཉིས་པའི་རྒྱས་འཛོམས་ཚོགས་ཆེན་ཐེངས་གཉིས་པ་དང་། གཡུང་དྲུང་བོན་གཡས་རུའི་འཆད་རྩོད་ཆེན་མོ་ཐེངས་གཉིས་པ། ཞང་བོད་ཤེས་རིག་གཞུང་བརྒྱའི་བགྲོ་གླེང་ཆེན་མོ་ཐེངས་གཉིས་པ་བཅས་ཚོགས་ཆེན་གསུམ་འཚོགས་པ།
ཚེས་༡༣ ཉིན་གྱི་ཞོགས་པའི་ཆུ་ཚོད་༩ སྟེང་། ༡༽ འཆད་རྩོད་ར་བ་ཆེན་མོའི་ནང་རྩོད་པ་བ་ཀུན་དམིགས་བསལ་དམ་བཅའ་འཚོགས།
༢༽ མཉམ་འབྲེལ་ལྷན་ཚོགས་ཀྱི་ཚོགས་ཞུགས་མི་སྣ་ལྷན་རྒྱས་ཞང་བོད་རིག་གནས་སྒྱུ་རྩལ་འགྲེམ་སྟོན་གཙོས་པའི་སྡེ་ཚན་སོ་སོའི་ལས་ཀའི་གྲུབ་འབྲས་ཁག་ལ་ཞིབ་དཔྱད་རྒྱུས་ལོན་གནང་བར་ཕེབས་པ།
སྡེ་ཚན་སོ་སོའི་འགན་འཛིན་རྣམ་པས་ཚོགས་ཞུགས་པ་རྣམས་ལ་རང་རང་གི་བྱ་བའི་བརྒྱུད་རིམ་མཚམས་སྦྱོར་གནང་བ་སོགས་ཐེངས་འདིའི་ལས་དོན་ཁག་ཚགས་སུ་ཚུད་པ་མཛད།
ཚོགས་འདུའི་གསར་འགྱུར་འགན་འཛིན་ཚན་ཁག་གིས། སྡེ་ཚན་སོ་སོའི་འགན་གཙོ་རྣམས་ལ་གནས་ཚུལ་བཅར་འདྲི་བྱས།
ཆུ་ཚོད་༡༡སྟེང་། ༡༽ འཆད་རྩོད་ར་བ་ཆེན་མོའི་ནང་རྩོད་པ་བ་ཀུན་གླིང་ཚན་དམ་བཅའ་འཚོགས། ༢༽གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་ཞུགས་མི་སྣ་ལྷན་རྒྱས་ཞང་བོད་རིག་གནས་སྒྱུ་རྩལ་འགྲེམ་སྟོན་གཙོས་པའི་སྡེ་ཚན་སོ་སོའི་ལས་ཀའི་གྲུབ་འབྲས་ཁག་ལ་ཞིབ་དཔྱད་རྒྱུས་ལོན་གནང་བར་ཕེབས་པ། སྡེ་ཚན་སོ་སོའི་འགན་འཛིན་རྣམ་པས་ཚོགས་ཞུགས་པ་རྣམས་ལ་རང་རང་གི་བྱ་བའི་བརྒྱུད་རིམ་མཚམས་སྦྱོར་གནང་བ་སོགས་ཐེངས་འདིའི་ལས་དོན་ཁག་ཚགས་སུ་ཚུད་པ་གནང་།
ཕྱི་དྲོ་ཆུ་ཚོད་༡:༣༠ སྟེང་། གཡུང་དྲུང་བོན་མཉམ་འབྲེལ་ལྷན་ཚོགས། ཞང་བོད་ཤེས་རིག་གཞུང་བརྒྱའི་བགྲོ་གླེང་ཆེན་མོ་འཚོགས། མཉམ་འབྲེལ་ལྷན་ཚོགས་ཀྱི་དྲུང་ཡིག་པ། བཙུན་མ་གཡུང་དྲུང་བཟང་མོས་མདོ་འཛིན་བྱས་ཏེ། རྒྱ་ཤོད་དགེ་བཤེས་ཤེས་རབ་རྒྱ་མཚོས་འོལ་མོ་ལུང་རིང་གི་ས་ཁྲ་འཚོལ་ཞིབ་དང་འབྲེལ་བའི་བགྲོ་གླེང་བྱས། ཁྱུང་པོ་སྟེང་ཆེན་དགོན་པའི་རྒྱལ་སྲས་སེམས་དཔས། ཁྱུང་ཡུལ་དུ་དར་ཁྱབ་ཆེ་བའི་དབུ་མེད་ལུགས་ཀྱི་ལོ་རྒྱུས་དང་དེ་དག་གི་གཟུགས་འགྱུར་ལ་དཔྱད་པ་ཞེས་པའི་བགྲོ་གླེང་བྱས། བྱང་དང་ར་བ་བསྟན་འཛིན་ཤེས་རྒྱལ་གྱིས། རྟ་སྒོ་དང་ར་དང་འབྲེལ་བའི་ཞང་ཞུང་གི་གནའ་ཤུལ་ངོ་སྤྲོད་དང་སྐྱིད་གསུམ་བླ་བྲང་གླེང་བ་ཞེས་པའི་སྐོར་ནས་བགྲོ་གླེང་བྱས། རྟོགས་ལྡན་དགོན་པའི་བྱང་ཚེ་འབར་གྱིས། ལས་ལམ་གྱི་སྐོར་རགས་ཙམ་གླེང་བ་ཞེས་པའི་སྐོར་ནས་བགྲོ་གླེང་བྱས། སྣང་ཞིག་དགོན་པའི་གཡུ་ཚེ་རིང་ཐར་གྱིས། བླ་མེད་རྫོགས་པ་ཆེན་པོའི་ལུགས་ཀྱི་བྱང་ཆུབ་སེམས་ལ་རགས་ཙམ་དཔྱད་པ་ཞེས་པའི་སྐོར་ནས་བགྲོ་གླེང་བྱས། རྟོགས་ལྡན་ཀུན་གྲོལ་རྒྱ་མཚོས། རྫོགས་པ་ཆེན་པོའི་གཞི་ལམ་འབྲས་གསུམ་སྐོར་གླེང་བ་བཅས་དྲི་བ་དྲིས་ཀྱི་ནང་དོན་ཕུན་སུམ་ཚོགས་པའི་བགྲོ་གླེང་བྱས།
ཆུ་ཚོད་༣:༣༠ སྟེང་། ༡༽ འཆད་རྩོད་ར་བ་ཆེན་མོའི་ནང་རྩོད་པ་བ་ཀུན་འཆད་ར་འཚོགས།
༢༽ གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་ཞུགས་མི་སྣ་ལྷན་རྒྱས་མུ་མཐུད་ནས་ཞང་བོད་ཤེས་རིག་གཞུང་བརྒྱའི་བགྲོ་གླེང་ཆེན་མོ་འཚོགས།མཉམ་འབྲེལ་ལྷན་ཚོགས་ཀྱི་དྲུང་ཡིག་པ་ཤེས་རབ་གྲགས་པས་མདོ་འཛིན་བྱས་ཏེ། བགྲོ་གླེང་གནང་མཁན། གདན་ཞུའི་ཆེད་མཁས་པ། དགའ་མལ་དགོན་པའི་སྒྲུབ་སློབ་ཤེས་རབ་ལྷུན་གྲུབ་ཀྱིས། མདོས་གཞུང་ལས་བསྟན་པའི་ལག་ལེན་དང་ནམ་རྒྱང་སོགས་ཀྱི་ངོ་སྤྲོད་གནད་བསྡུས་ཞེས་པའི་སྐོར་ནས་བགྲོ་གླེང་གནང་། ཧོར་ཚང་ནོར་བུ་གཡུལ་རྒྱལ་གྱིས་ལྡོང་མདོ་ལུགས་ཀྱི་ལྷ་བྲིས་བྱུང་རིམ་སྐོར་གྱི་ངོ་སྤྲོད་བགྲོ་གླེང་བྱས། ཆུང་རྒྱུད་ཚེ་དབང་རྣམ་རྒྱལ་གྱིས་ཁྱུང་པོའི་ཡིག་གཟུགས་ཀྱི་ལོ་རྒྱུས་དང་འབྲེལ་བའི་ཁྱུང་བྲིས་ཀྱི་ཁྱད་ཆོས་བཅས་ཀྱི་སྐོར་ལ་བགྲོ་གླེང་བྱས། སྦྲ་ཆེན་སྦྱིན་པས། ཞང་བོད་མར་ཚོན་སྒྱུ་རྩལ་སྐོར་ནས་བགྲོ་གླེང་བྱས།
༣༽ མཚན་འཛིན་ཚོགས་གཙོ་ཚུལ་ཆེན་ཐེག་མཆོག་བསྟན་པའི་ཉི་མ་མཆོག་གིས་རྒྱ་ཆེའི་དད་ལྡན་མང་ཚོགས་ལ་ས་ལེ་འོད་ཀྱི་གོ་དོན་དང་ཕན་ཡོན་སྐོར་འཆད་ཁྲིད་གནང་བ།
ཆུ་ཚོད་༦:༣༠སྟེང་། ༡༽ རྩོད་པ་བ་ཀུན་ས་ལམ་གླིང་ཚན་དམ་བཅའ་ཆེན་མོ་འཚོགས། ༢༽ གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་ཚོགས་ཞུགས་མི་སྣ་ལྷན་རྒྱས་གླིང་ཚན་དམ་བཅའ་ཆེན་མོར་མཉམ་ཞུགས་གནང་བ།
ཚོགས་འདུའི་གསར་འགྱུར་འགན་འཛིན་ཚན་ཁག་གིས་ཚོགས་འདུའི་གནས་ཚུལ་ཟིན་ཐོར་འགོད་པ། པར་ལེན་དང་བརྙན་ཕབ། ནངས་དགོང་དང་ངལ་གསོའི་བར་གསེང་རྣམས་སུ་མི་སྣ་གལ་ཆེན་དག་ལ་བཅར་འདྲི་བྱེད་པའི་བྱ་བར་འབད་ནས། ཉིན་རེ་རེའི་གནས་ཚུལ་བོད་རྒྱ་ཡིག་རིགས་གཉིས་ཐོག་ནས་ཧི་མ་ལ་ཡའི་བོན་དྲ་བ་དང་གངས་ལྗོངས་བོན་དྲ་བར་བཀོད་པ་བཅས་ཉིན་བཞི་བའི་གནས་ཚུལ་རགས་རིམ་ཙམ་མོ།།
