ཁྲི་ཀའི་སེ་བརྒྱ་བོན་མང་ནས་ཡབ་རྗེ་རྩ་བའི་བླ་མར་གདུང་མཆོད་ཕུལ་བ།

༧ རྒྱལ་གཤེན་བསྟན་པ་རི་རྒྱལ་ལྷུན་པོའི་རྩེར། །
བཤད་སྒྲུབ་འཁོར་ལོས་ལུས་ཅན་ཉེར་བཏེགས་ཏེ། །
ཐར་བ་བསིལ་གྲིབ་འཇིག་རྟེན་གསུམ་དུ་ཁྱབ། །
ཚུ༷ལ་ཁྲིམ༷ས་བསྟ༷ན་འཛི༷ན་ཞབས་ལ་གསོལ་བ་འདེབས། །

   སྐུ་ནི་གཤེན་རབ་ཀྱི་ངོ་བོ། གསུང་ནི་བོན་གྱི་སྒྲ་ཚིག ཐུགས་ནི་སངས་རྒྱས་ཀྱི་རང་བཞིན། བླ་མ་བརྒྱུད་པ་ཐམས་ཅད་ཀྱི་རྒྱལ་ཚབ། ཡི་དམ་ཞི་ཁྲོ་ཀུན་འདུས་ཀྱི་བདག་ཉིད། སེམས་ཅན་ཐམས་ཅད་ཀྱི་འདྲེན་སྟོན། བདག་ཅག་གི་རྩ་བའི་བླ་མ་གཙུག་གི་ནོར་བུ། སྨྲ་བའི་སེང་ཆེན་དང་དབྱེར་མ་མཆིས་པ་མཚན་ནས་སྨོས་ན་༧སྐྱབས་རྗེ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་མཆོག་དགོངས་པ་བོན་དབྱིངས་སུ་བསྡུས་པའི་ཚུལ་མཛད་པ་ལ།

     ངེད་སེ་བརྒྱ་བོན་མང་སྔགས་འཆང་རིག་པ་འཛིན་པ་འདུས་སྡེ་སྤྱི་ནས་སྐྱབས་རྗེ་མཆོག་གི་སྐུ་པར་མཐོང་གྲོལ་ཆེན་མོའི་མདུན་དུ་དངོས་འབྱོར་ཡིད་ལས་སྤྲུལ་པའི་མཆོད་པ་བཤམས་ནས། དད་མོས་གུས་པ་ཆེན་པོས་ཚེ་དབང་བླ་མའི་ཚོགས་འཁོར་ཁྲི་ལྷག་རྒྱས་འབུལ་བྱས་ཤིང་། གཞན་བསྔོ་བ་སྨོན་ལམ་སོགས་སྒོ་གསུམ་གུས་པས་གདུང་མཆོད་ཕུལ་བའི་གནས་བསྡུས་ཙམ་མོ།།