མཛད་བཟང་གསེར་གྱི་འོད་རླབས།

   འདི་ཟླའི་ཚེས་དགུ་ཉིན་༧རག་བླ་ལུང་རིག་ཀུན་གསལ་སྙིང་པོའི་སྟོན་འཁོར་རྣམས་ཁྱུང་པོ་སྟེང་ཆེན་དུ་ཕེབས་ཏེ་སྨོན་རྒྱལ་སྐྱེ་ཕྲེང་བདུན་པ་ནམ་མཁའ་དབང་ལྡན་རིན་པོ་ཆེ་དང་སྨོན་སྲས་རང་གྲོལ་ཉི་མ་རྒྱལ་མཚན་བཅས་སྨོན་རྒྱལ་རྣམ་ཚང་གིས་དགའ་དད་སྤྲོ་གསུམ་གྱི་ངང་ནས་སྨོན་རྒྱལ་དཔྱད་བུའི་སྨན་རྩིས་ཁང་དུ་སྣེ་ལེན་ཟབ་རྒྱས་ཞུས།

ཕྱིར་ཉིན་ཚེས་བཅུ་ཉིན་སྔ་དྲོ་ཆེད་ལས་མཁས་དབང་ཚོ་དང་ལྷན་དུ་ཁྱུང་རིག་གནས་དཔྱད་གླེང་ཚོགས་འདུར་ཕེབས།

   ཕྱི་དྲོ་ཕྱག་ཚོད་བཞི་པའི་ཐོག་སྨོན་རྒྱལ་དཔྱད་བུའི་སྨན་རྩིས་ཁང་དུ་༧ཐེག་ཆེན་སངས་རྒྱས་གཡུང་དྲུང་བོན་གྱི་རྒྱལ་བའི་བཀའ་འགྱུར་ཆེན་མོའི་བོན་སྦྱིན་རྟེན་བཞག་གི་མཛད་སྒོ་དབུ་ཚུགས།

   མཛད་སྒོའི་སྐབས་སུ་ཚོགས་ཞུགས་མི་སྣ་ཆེད་ལས་མཁས་དབང་ཐུབ་བསྟན་ཕུན་ཚོགས་དང་བན་ཤུལ་དཔལ་མཁར་རྒྱལ་མཁས་དབང་དོན་གྲུབ་ལྷ་རྒྱལ་སོགས་རྒྱལ་ཡོངས་ས་གནས་སོ་སོ་ནས་ཕེབ་པའི་མཁས་དབང་རྣམས་དང་དེ་བཞིན་སྟེང་ཆེན་རྫོང་ཁོངས་ན་ཡོད་པའི་བོན་གྱི་དགོན་རི་ཁྲོད་བཞི་བཅུ་ཙམ་ཞིག་གི་འཐུས་མི་བཅས་ཚོགས་འདུར་ཞུགས་ཡོད།

ཐོག་མར་རག་ཤི་དགེ་བཤེས་ཡོན་ཏན་བཟང་པོ་ནས་རྟེན་འབྲེལ་གྱི་ཁ་གཡང་དང་སྦྲགས་ཏེ་ཚོགས་འདུ་གཙོ་སྐྱོང་གནང་།

   དེ་རྗེས་སྨོན་རྒྱལ་སྤྲུལ་སྐུ་རང་གྲོལ་ཉི་མ་རྒྱལ་མཚན་མཆོག་ནས་དེ་རིང་ངེད་སྨོན་རྒྱལ་དཔྱད་བུའི་སྨན་རྩིས་ཁང་དུ་ཐེག་ཆེན་གཡུང་དྲུང་བོན་གྱི་བཀའ་འགྱུར་ཆེན་མོའི་རྟེན་བཞག་གི་མཛད་སྒོ་ཆེན་པོ་འདི་འདྲ་ཞིག་གཉེར་རྒྱུ་བྱུང་བ་འདི་ནི་རྟེན་འབྲེལ་བཟང་པོ་ཞིག་ཡིན་པ་དང་ལྷག་ཏུ་མ་ཡིག་སོར་བཞག་གི་སྟེང་ནས་པར་སྐྲུན་གནང་བའི་བཀའ་འགྱུར་འདི་ནི་བོད་མི་རིགས་རང་གི་རྩ་ཆེའི་ནོར་བུ་ཞིག་ཡིན་པའི་སྐོར་སོགས་མདོར་ན་མཆོག་སྤྲུལ་ཀུན་གསལ་སྙིང་པོའི་མཛད་བཟང་ལ་བསྔགས་བརྗོད་དང་འབྲེལ་བའི་སྒོ་ནས་བཀའ་སློབ་ཟབ་རྒྱས་གནང་།

    དེ་རྗེས་བསྟན་པའི་སྦྱིན་བདག་ཆེན་མོ་རག་བླ་ལུང་རིག་ཀུན་གསལ་སྙིང་པོ་མཆོག་ནས་ཚོགས་བཞུགས་མི་སྣ་ཡོངས་ལ་མཚམས་འདྲིའི་ཁ་གཡང་དང་འབྲེལ་ཏེ་དེ་རིང་ཐེག་ཆེན་གཡུང་དྲུང་བོན་གྱི་བཀའ་འགྱུར་ཆེན་མོ་ཁྱུང་ཡུལ་གྱི་དགོན་རི་ཁྲོད་རྣམས་ལ་རྟེན་བཞག་ཕུལ་རྒྱུའི་གོ་སྐབས་བྱུང་བར་དགའ་པོ་བྱུང་།

   ལྷག་ཏུ་བྱ་བ་འདི་ནི་༧སྐྱབས་རྗེ་མཁན་སློབ་གཤེན་གསུམ་གྱི་དགོངས་བཞེད་དང་གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་བཀའ་དགོངས་ཇི་བཞིན་ཕྲན་རང་ཉིད་ནས་ཐོག་མར་ལས་འགོ་བཙུགས་པ་ནས་བཟུང་གཡུང་དྲུང་བོན་གྱི་དགོན་སྡེ་རི་ཁྲོད་ཀུན་ལ་རྒྱལ་བའི་བཀའ་རིན་པོ་ཆེ་ཆ་ཚང་རེ་རྟེན་བཞག་འབུལ་ཐུབ་ན་ཅི་མ་རུང་སྙམ་པའི་སེམས་འདུན་ཡོད་པ་བཞིན་འདི་ལོ་དངོས་སུ་ལེགས་གྲུབ་བྱུང་བར་དཔེ་དགའ་པོ་བྱུང་། ལྷག་ཏུ་བོད་ཀྱི་བླ་སྤྲུལ་དགེ་བཤེས་རྣམ་པས་རང་ཉིད་གནས་སའི་ལུང་པ་ཆུང་ཆུང་ཞིག་དང་།

   ཡང་ན་རང་ཉིད་གནས་སའི་དགོན་པ་ཆུང་ཆུང་ཞིག་ཙམ་མ་ཡིན་པར་བསྟན་པ་སྤྱི་དང་མི་རིགས་སྤྱི་ཡི་ཁེ་ཕན་ལ་གཟིགས་ཏེ་ཐུགས་མཐུན་དམ་གཙང་གི་སྒོ་ནས་གཅིག་ཕན་གཅིག་གྲོགས་དགོས་ཚུལ་གྱི་སྐོར་ནས་བཀའ་སློབ་ཟབ་རྒྱས་གནང་།

དེར་བཞུགས་ཀྱི་དབུ་ཁྲིད་དང་ཆེད་ལས་མཁས་དབང་དགོན་སྡེའི་འཐུས་མི་ཚང་མས་དགའ་བསུའི་ཐལ་སྒྲ་བསྒྲགས་ནས་བསྔགས་བརྗོད་ངག་གི་མེ་ཏོག་འཐོར།

དེ་རྗེས་སྤ་དགོན་དགེ་བཤེས་ཡོན་ཏན་བཟང་པོ་ནས་ཐེག་ཆེན་གཡུང་དྲུང་བོན་གྱི་བཀའ་འགྱུར་ཆེན་མོ་འདི་ཉིད་ལས་འགོ་བཙུགས་པ་ནས་བཟུངས་མཐར་མཇུག་མ་གྲུབ་གྱི་བར་དུ་མཆོག་སྤྲུལ་ཀུན་གསལ་རིན་པོ་ཆེའི་དགོངས་བཞེད་བཞིན་རག་དགོན་གཡུང་དྲུང་གྱེར་བསྟན་གླིང་གི་རྒྱལ་བའི་བཀའ་བསྟན་དཔེ་རྙིང་འཚོལ་བསྡུའི་ལས་སྒྲུབ་ཚོགས་པས་དཀའ་བརྒྱ་འབད་སྟོང་གི་ངང་ནས་ཕྱག་ལས་སྐྱོང་ཕྱོགས་ཀྱི་སྐོར་ནས་གསལ་བཤད་དང་འབྲེལ་བའི་སྒོ་ནས་གཏམ་བཤད་སྤེལ།

   དེ་རྗེས་ཚོགས་བཞུགས་རྣམ་པས་ཀུན་གསལ་རིན་པོ་ཆེ་ལ་ཁ་བཏགས་ཕུལ། ཀུན་གསལ་རིན་པོ་ཆེ་ནས་ཆེད་ལས་མཁས་དབང་རྣམས་ལ་བཀའ་འགྱུར་གྱི་དཀར་ཆག་རེ་དང་ཤིས་སྨོན་གྱི་དེབ་རེ་གནང་།

   ཁྱུང་ཡུལ་གྱི་བོན་དགོན་རྣམས་ལ་དེབ་གྲངས་ཉིན་བརྒྱ་ལས་གྲུབ་པའི་བཀའ་འགྱུར་ཆ་ཚང་རེ་རྟེན་བཞག་ཕུལ།

རྒྱལ་བའི་བཀའ་འགྱུར་ཆེན་མོ་རྟེན་བཞག་གི་མཛད་སྒོའི་སྐབས་སུ་རྟེན་འབྲེལ་གྱི་བརྡ་རྟགས་ནམ་མཁའ་ནས་འཇའ་ཤར།

རྟེན་བཞག་འབུལ་ཡུལ་ནི།  

སྟེང་ཆེན་རྫོང་རིག་གནས་ཅུས། རྫོང་སྨན་རྩིས་ཁང་།  སྨོན་རྒྱལ་དཔྱད་བུའི་སྨན་རྩིས་ཁང་།

གཡུ་མཚོ་དགོན། ག་ཤེལ་དགོན། ཞུ་ཚང་དགོན། མཁར་སྤུངས་དགོན། ལྕང་རི་རི་ཁྲོད། མར་ཁུ་དགོན།   དར་རྒྱས་དགོན། 

རེ་ནེ་དགོན། རི་དམར་དགོན།  དངུལ་ཕུག་རི་ཁྲོད། མར་རྫོང་དགོན། བྱ་ཟེ་དགོན། སྒར་ཁང་དགོན། གཡུ་བཀྲ་ལྷ་སྟེང་དགོན།

ཚ་ནེ་རི་ཁྲོད།  འབོ་ཐ་དགོན། རུ་ཐ་དགོན། གཡམ་ཐ་དགོན། དམུ་ཐ་དགོན།  རྡོང་རྫོང་རི་ཁྲོད།  དཀར་ལེགས་དགོན།  སྟེང་ཆེན་དགོན། རི་ཁྲོད་དགོན།  སྨོན་རྒྱལ་བླ་བྲང་། ཀོ་དགོན། གཡུང་དྲུང་དཔལ་རི།  ནག་རུ་བསམ་གཏན་གླིང་།  རྩེ་དྲུག་དགོན། ཝ་དགེ་དགོན། སྦྲ་ཧོ་དགོན། བདལ་གཤིས་བོན་དགོན། མོའོ་ཡས་དགོན། བེ་སྒོ་དགོན།  རྒྱ་སྒོ་དགོན།  གནམ་གཏིང་དགོན། ལྗང་ཤོད་བོན་དགོན་བཅས་ཡིན།