ཁྱུང་པོ་སེར་ཚ་ཚྭ་ནེ་རི་ཁྲོད་ཀྱིས་རྒྱལ་བ་སྨན་རི་བའི་གདུང་མཆོད་ཞུས།

འགྲོ་བ་ལྷ་དང་བཅས་པའི་མཆོད་སྡོང་ཞྭ་དཀར་བསྟན་པའི་བདག་པོ་༧ སྐྱབས་རྗེ་རྒྱལ་བ་སྨན་རི་བ་ལུང་རྟོགས་བསྟན་པའི་ཉི་མ་དཔལ་བཟང་པོའི་གཟུགས་སྐུའི་བཀོད་པ་སྟོང་དབྱིངས་ཀུན་ཏུ་བཟང་པོའི་ཐུགས་ཀར་བསྡུས་པའི་གདུང་རྟེན་མཆོད་འབུལ་དུ།  འདི་ག་ཚྭ་ནེ་གཟུངས་སྒྲུབ་རི་ཁྲོད་དུ་མཚམས་བླ་དཀར་རིལ་མཆོག་གིས་ཐུགས་བཀོད་འོག   སྒྲུབ་གྲྭ་བ་རྣམས་དང་རི་སུལ་གྱི་སྒོམ་གྲྭ་བ།  གཞན་ཀློག་གྲྭའི་བྱིས་པ་ཐུན་མོང་གིས་རྗེ་བླ་མ་དགོངས་པ་བོན་དབྱིངས་སུ་བསྡུས་པའི་ཉིན་དེའི་དགོང་མོར་ཚེ་དབང་སྨོན་ལམ་དང་བོན་སྐུ་སྨོན་ལམ་རྗེ་བླ་མའི་གསོལ་འདེབས་སོགས་མགྲིན་དབྱངས་གཅིག་སྒྱུར་གྱིས་མྱ་ངན་གདུང་མཆོད་ཞུས་པ་མ་ཟད།  བོད་ཟླ་བརྒྱད་པའི་གནམ་གང་ཉིན་བདེེར་གཤེགས་སྨོན་ལམ་མཐའ་ཡས་ཀྱི་དཀྱིལ་འཁོར་ཞལ་ཕྱེས་ཏེ་དཀོན་མཆོག་རྒྱལ་བ་རྒྱས་པའི་མཆོད་པ་ཟབ་རྒྱས་སུ་བཏེག་པའོ།།