ཤར་བ་གཙོ་ཚང་དགོན་ནས་གདུང་མཆོད་འཚོགས་པ།

   དེ་ཡང་མདོ་སྨད་འཕགས་པ་རྣམ་གསུམ་གྱི་ནང་གསེས་གཙོ་འཕགས་ཟླ་བ་རྒྱལ་མཚན་གྱི་གདན་ས་ཟིང་ཆུ་རྫོང་གཙོ་ཚང་དགོན་སྨིན་གྲོལ་བསྟན་རྒྱས་གླིང་ནས་ ༧ སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ཆེན་པོ་ ༧ མཁན་ཆེན་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དགོངས་པ་བོན་དབྱིངས་སུ་སྐུ་གཤེགས་པའི་གདུང་མཆོད་འཚོགས་པ་སྟེ།

 གཙོ་ཚང་དགོན་པའི་སྐྱ་སེར་ཡོངས་དང་ཁྱད་པར་དུ་དགའ་མལ་དགོན་ཆེན་གྱི་མཁན་ཆེན་རིན་པོ་ཆེ་གཙོས་པའི་རིན་སྤུངས་དགོན་པའི་བླ་གྲྭ་ཡོངས་ཆེད་ཕེབས་གནང་སྟེ་གཙོ་ཚང་དགོན་པའི་འཚོགས་ཁང་ནས་ཀུན་བཟང་བླ་མའི་མཆོད་པའི་སྒོ་ནས་ཕྱི་ནང་གསང་བའི་མཆོད་སྤྲིན་ཕུལ་ཏེ་དགོངས་རྫོགས་འཚོགས་པ་དང་དད་ལྡན་མང་ཚོགས་ནས་དགོན་པའི་འཁྱམས་རའི་ནང་ནས་མར་མེ་མཆོད་པ་ཕུལ་བ་དང་སྐྱབས་རྗེ་མཆོག་གི་གསོལ་འདེབས་དང་མ་ཏྲི་འདོན་དབྱངས་གནང་བ་དང་སྐོར་བ་སོགས་མཛད་དེ་གདུང་མཆོད་ཕུལ་བ་མཛད།