སྨན་རིའི་གླིང་དུ་གཡུང་དྲུང་བོན་གྱི་བཤད་སྒྲུབ་འདུས་སྡེའི་དབུ་བརྙེས་ནས་མི་ལོ་༣༩འཁོར་བའི་དུས་ཆེན།

གཤེན་གྱི་འབྱུང་ལྡན་སུམ་བརྒྱ་དང་གཅིག་བོད་རྒྱལ་ལོ་སུམ་སྟོང་གཅིག་བརྒྱ་ལྔ་བཅུ་ང་བཞི་(༣༡༥༤)བོད་མེ་བྱ་ལོའི་ཟླ་བ་གཉིས་པའི་ཚེས་པ་བདུན་ཉིན་ཏེ། ཕྱི་ལོ་༢༠༡༧ཟླ་༤པའི་ཚེས་༣ཉིན་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་༧གཡུང་དྲུང་བོན་གྱི་བཤད་སྒྲུབ་འདུས་སྡེའི་དབུ་བརྙེས་ནས་མི་ལོ་༣༩འཁོར་བའི་དུས་ཆེན་མཛད་སྒོ་སྲུང་བརྩི་ཞུས་པ།

དེ་ཡང་གོང་ཚེས་ཉིན་གྱི་ཞོགས་པར་འཁོར་དུས་བདུན་པའི་ཐོག་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གིས་བཤད་སྒྲུབ་འདུས་སྡེའི་དར་ཆེན་སྒྲེང་འཛུགས་དང་རབ་གནས་གནང་བ་དང་། དེ་ནས་གྲྭ་མང་ཡོངས་ནས་བསང་གསོལ་ལྷ་རྒྱལ་འཐེན་པ་དང་༧སྐྱབས་རྗེ་སྨན་རིའི་མཁན་སློབ་རྣམ་པའི་སྐུ་པར་མཐོང་གྲོལ་རིན་པོ་ཆེར་མཇལ་ཁའི་མཛད་རིམ་གྲུབ་རྗེས།

བཤད་སྒྲུབ་འདུས་སྡེའི་ཚོགས་གཙོ་གཞོན་གཉིས་ཀྱིས་ལྷ་རྫས་དྲི་མ་མེད་པའི་སྤོས་དར་གྱིས་སྣེ་དྲངས་ཏེ། མཛད་སྒོའི་ཚོགས་མགོན་དུ་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་གདན་ཞུས་ཀྱིས་གཡུང་དྲུང་བོན་གྱི་བཤད་སྒྲུབ་བསྟན་པའི་དར་ཆེན་མཁའ་དབྱིངས་སུ་སྒྲེང་མཛད་དེ་བོན་གཞིས་སེར་སྐྱ་ཀུན་གྱིས་དགའ་བའི་ཐལ་སྒྲ་ལྡིར་ཞིང་། དེ་ནས་སྐྱ་སེར་ཡོངས་ཀྱིིས་གཡུང་དྲུང་བསྟན་པ་རྒྱས་པའི་སྨོན་ལམ་གསུངས་གནང་ཞིང་། སྨོན་ལམ་གསུངས་གྲུབ་མཚམས་རང་རང་གི་བཞུགས་གྲལ་དུ་འཁོད་པ་བཅས་སྔོན་འགྲོའི་མཛད་རིམ་ཡོངས་སུ་གྲུབ་པ་དང་།

དངོས་གཞིའི་མཛད་རིམ་ཐོག་མར་སྐྱ་སེར་ཡོངས་ལ་རྟེན་འབྲེལ་གྱི་འབྲས་སིལ་དང་གསོལ་ཇ་འདེགས་འབུལ་ཞུས་པ་དང་ཆབས་ཅིག་༧གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་མཆོག་གིས་རྣམ་འདྲེན་རྒྱལ་བའི་དབང་པོ་ནས་བཟུང་ད་བར་གྱི་བཤད་སྒྲུབ་ཀྱི་བསྟན་པ་རིན་པོ་ཆེའི་བྱུང་རབས་དང་ལོ་གཅིག་གི་བཤད་སྒྲུབ་འདུས་སྡེའི་ལས་བསྡོམས་སོགས་ཀྱི་གཏམ་བཤད་གནང་།

དེ་བཞིན་རིམ་པ་ལྟར་ཚོགས་མགོན་དུ་ཞབས་སོར་འཁོད་པའི་༧སྐྱབས་རྗེ་རྒྱལ་བ་སྨན་རིའི་མཁན་སློབས་གཉིས་དང་བཤད་སྒྲུབ་འདུས་སྡེའི་མཁན་པོ་དང་སློབ་དཔོན། དེ་མིན་ཚོགས་སྡེ་ཁག་གི་གནད་ཡོད་ཀྱི་དཔོན་རིགས་རྣམས་ཀྱིས་དུས་ཆེན་དང་འབྲེལ་བའི་གསུང་བཤད་བཀའ་སློབ་བསྩལ།

དེ་རྗེས་ལོ་འཁོར་ཡིག་རྒྱུགས་རྩེ་ཕུད་རྣམས་དང་འཆར་ཅན་གཞུང་རྒྱུགས་རིགས་ཕུད་པའི་འཕར་རྒྱུགས་ལ་རྗེ་རིན་པོ་ཆེའི་ས་ལམ་འཕྲུལ་གྱི་སྒྲོན་མའི་རང་འགྲེལ་དང་འགྲོ་མགོན་ས་ལམ་དང་ཚད་མ་ཀུན་བཏུས། ཕར་ཕྱིན་སྐབས་དང་པོ་སོགས་དམིགས་བསལ་ངག་རྒྱུགས་འབུལ་མཁན་གྱི་བཤད་སྒྲུབ་སློབ་གཉེར་བ་རྣམས་ལ་༧སྐྱབས་རྗེ་སྨན་རིའི་མཁན་སློབ་གཉིས་ཀྱིས་གསོལ་རས་གཟེངས་བསྟོད་ཕྱག་འཁྱེར་བསྩལ་གནང་བ་སོགས་ཀྱི་མཛད་བཟང་བསྐྱངས་བ་དང་།

   མཇུག་མཐར་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་ཤེས་རབ་དབང་རྒྱལ་ལགས་ནས་ཐུགས་རྗེ་ཆེ་ཞུའི་གཏམ་བཤད་གནང་སྟེ་དུས་ཆེན་རྒྱལ་ཁའི་ངང་མཇུག་གྲུབ་ཡོད་པ་བཅས་ཀྱི་གནས་བསྡུས་ཙམ་དུ།