ཁྱུང་དཀར་རིག་འཛིན་སྨིན་གྲོལ་གླིང་བསྐྱར་བཞེངས་ལེགས་གྲུབ་ཀྱི་མཛད་སྒོ་སྤེལ་བ།

ད་ལོའི་ལུགས་རྙིང་གི་ཟླ༡༠ཚེས༣ཉིན་ནས། རེབ་གོང་སྨད་ཕྱོགས་ཀྱི་བོན་སྡེ་ཆེན་མོ་ཁྱུང་བོ་ཐང་ནས་གསས་ཁང་འགྲུབ་སྟོན་གྱི་མཛད་སྒོ་སྤེལ།

      དེ་ཡང་གསར་དུ་བཞེངས་གྲུབ་བྱུང་བའི་ཁྱུང་བོ་གསས་ཁང་ཁྱུང་དཀར་རིག་འཛིན་སྨིན་གྲོལ་གླིང་འདི་ཉིད་ནི ༡༩༨༤ ལོར་སྐྱབས་རྗེ་བླ་མ་དམ་པ་མཁས་དང་གྲུབ་པའི་དབང་ཕྱུག་ཆེན་མོ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོའི་ཐུགས་ཁུར་མཛུབ་སྟོན་འོག་བཞེངས་པའི་སྔར་ཡོད་གསས་ཁང་གི་ཤུལ་དེ་རང་ནས་གཞི་རྒྱ་ཆེ་རུ་བསྐྱེད་དེ་བསྐྱར་བཞེངས་བྱས་པ་སྟེ། སྤྱི་ལོ ༢༠༡༥ ལོའི་ཟླ ༢ པའི་ཚེས ༡༡ ཉིན་ཤིང་བཟོ་དངོས་སུ་ཐོན་ཏེ་ལེགས་པར་བཞེངས་པའི་མགོ་བརྩམས་པ་དང་། ༢༠༡༦ ལོའི་ཟླ ༡༠ བའི་ཚེས ༣ ཉིན་ལ་གསས་ཁང་དང་བཙན་ཁང་། དམག་དཔོན་ཁང་རྟེན་བརྟེན་པ་དང་བཅས་པ། ས་གཞན་དང་ཚོགས་པ་གཞན་སོགས་ལ་མ་དངུལ་གཅིག་ཀྱང་མ་བསླངས་པར་སྡེ་བ་རང་གི་ཁ་རྒན་གཞོན་སེར་སྐྱ་ཕོ་མོ་ཀུན་གྱིས་རང་མོས་གང་འཛོམས་ལྟར་ཕུལ་བའི་ཞལ་འདེབས་དམངས་སྒོར་ཁྲི ༤༠༠ ལ་ཉེ་བའི་འགྲོ་གྲོན་བཏང་སྟེ་ད་ལྟ་ཡོངས་སུ་གྲུབ་པར་མ་ཟད་དགྱེས་སྟོན་ཀྱང་ཉིན་ལྔ་ལ་བྱས་ཤིང་། ཉིན་དང་པོར་བོན་བརྒྱ་སྨན་རིའི་གླིང་གི་བླ་གྲྭ་ཡོངས་དང་རེབ་གོང་བོན་མང་གིས་མཚོན་པའི་བོན་རྩ་ཁག་མགྲོན་འབོད་སྣེ་ལེན་གཟབ་རྒྱས་ཞུས་པ་དང་། ཉིན་གཉིས་པར་སྤེན་དཀར་ཐང་དགོན་པའི་གྲྭ་བ་ཡོངས་དང་སྨད་པ་སྡེ་བདུན་གྱིས་མཚོན་པའི་ཕྱོགས་ཀྱི་མགྲོན་པོ་རྣམས་དགའ་བས་བསུས། ཉིན་གསུམ་པར་ཡུལ་ཕྱོགས་སོ་སོ་ན་ཡོད་པའི་རང་སྡེའི་ལས་བྱེད་པ་རྣམས་དང་། ཕྱིའི་ཡུལ་སྡེ་དག་ལ་གནས་དང་མག་པར་སོང་བའི་བུ་སྲིང་གཉེན་མི་གང་ཡོད་རྣམས་མགྲོན་འབོད་ཀྱིས་ནང་མི་ལྷན་དུ་འཛོམས་པའི་དགའ་སྟོན་རྩེད་འཇོ་ཡི་དཔལ་ལ་རོལ། ཉིན་བཞི་བ་དང་ལྔ་བར་སྡེ་བ་རང་དུ་བཞུགས་པའི་རྒན་གཞོན་བར་མའི་སྐྱེ་བོ་མཐའ་དག་གདན་ཐོག་གཅིག་ལ་འཛོམས་ཏེ། དགའ་སྟོན་རྩེད་འཇོ་དང་ཇ་ཆང་ལོངས་སྤྱོད་ཀྱི་ཚོགས་ལ་ངོམ་མེད་དུ་རོལ་ཏེ་སེམས་ཀྱི་དགའ་བ་གླུ་རུ་བླངས་ཤིང་ཡིད་ཀྱི་དུངས་པ་གར་གྱིས་མཚོན་པར་བྱས།