ཁོད་སྤུངས་དར་རྒྱས་དགོན་དུ་རྒྱལ་བ་གཉིས་པ་མཉམ་མེད་ཆེན་པོའི་དུས་ཆེན་འཚོགས་པ།

བདེ་ཆེན་རྒྱལ་པོ་ཀུན་བཟང་རྒྱལ་བ་འདུས།།
མི་བརྗེད་གཟུངས་ལྡན་ཤེས་རབ་སྨྲ་བའི་སེང་།།
འཛམ་གླིང་བོན་གྱི་གཙུག་རྒྱན་མཉམ་མེད་པ།།
ཤེས་རབ་རྒྱལ་མཚན་ཞབས་ལ་གསོལ་བ་འདེབས།།

   གཟི་རྩ་སྡེ་དགུ་རྫོང་ཁོད་སྤུངས་གཡུང་དྲུང་དར་རྒྱས་དགོན་པའི་རྒྱལ་བ་གཉིས་པ་མཉམ་མེད་ཆེན་པོའི་དུས་མཆོད་ནི་༢༠༡༦ལོ་བོད་ཟླ་དང་པོ་ཚེས་ལྔ་ཉིན་འཚོགས་བྱུང་། 

   བོད་ཟླ་༡ཚེས་༥ཉིན་རྗེ་རིན་པོ་ཆེའི་དུས་ཆེན་ཉིན་ལ། མདོ་དབུས་ཁམས་གསུམ་གྱི་བོན་འབངས་ཡོངས་ཀྱིས་རྗེ་རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་གྱི་དུས་ཆེན་འཚོགས་པ་བཞིན། ངེད་གཟི་རྩའི་ཁོད་སྤུངས་གཡུང་དྲུང་དར་རྒྱས་དགོན་པས་ཀྱང་རྗེ་མཉམ་མེད་པའི་་དུས་ཆེན་འདི་འཚོགས་ཀི་ཡོད་ལ། ཚེས་གསུམ་ནས་འགོ་བཙུགས་ནས་ཉིན་གཉིས་རིང་མདོ་གཡུང་དྲུང་ཀློང་རྒྱས་ཆོ་གི་གཞུང་བསྲང་།

   ཚེས་ལྔའི་ཉིན་རྒྱལ་བ་གཉིས་པ་མཉམ་མེད་ཆེན་པོའི་གསར་བཟོ་གོས་སྐུ་ཆེན་མོའི་ཞལ་ཐང་བཤམ་པ་དང་མཚན་མོའི་སྒྲོན་མེ་ཁྲི་འབུམ་གྱི་མཆོད་པ་བྱས།

   དུས་ཆེན་གྱི་ཉིན་འདི་ལ་དགེ་རྩ་ཆེ་ཆུང་གང་དང་གང་བགྱིས་ན་དགེ་བ་ཁྲི་འགྱུར་འབུམ་འགྱུར་དུ་འགྲོ་བས། ཚེ་འདིར་རྐྱེན་བར་ཆོད་ཞི་ཞིང་། ནད་གདོན་ཞི་བ་དང་མོ་ངན་ཐན་ལྟས་ངན་པ་ཐམས་ཅད་ཟློགས་པར་འགྱུར་བ་དང་།

   དེར་མ་ཟད། སྨོན་ལམ་བཏབས་ཅིང་དངོས་གྲུབ་ཞུ་ན། ཟས་འདོད་པ་ལ་ཟས། གོས་འདོད་པ་ལ་གོས། མཆོག་ཐུན་དངོས་གྲུབ་གང་ཞུས་ཡང་ཐེ་ཚོམ་མེད་པར་ཐོབ་ནས། ཚེ་ཕྱི་མ་ལ་ཡང་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པར་ཐེ་ཚོམ་མེད་དོ། །