སྟོད་ལུང་འབྲི་ལུང་དགོན་ལ་རི་བསང་རླུང་རྟའི་གནས་ཚུལ།
[ཟླ་ཚེས། 2014-04-14 13:42:37][རྩོམ་པ་པོ། དགེ་བཤེས་བསྟན་འཛིན་འབྲུག་གྲགས།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
སྤྱི་ལོ་༢༠༡༤ལོའི་ཟླ ༤ ཚེས་ ༡༣ ཉིན་རྒྱལ་སྤྱིའི་གཡུང་དྲུང་བོན་མཉམ་འབྲེལ་མཐུན་ཚོགས་ཀྱི་མཚན་འཛིན་མི་སྣ་དང་ཀུན་མཁྱེན་ཤར་རྫ་འཇའ་ལུས་པའི་གདན་སའི་མཁན་པོ་རིག་འཛིན་དབང་རྒྱལ་མཆོག་འདི་ལོར་ཀོང་པོའི་རྟ་ལོ་བསྐོར་ཆེན་དང་འབྲེལ་གནས་བསྐོར་ཕྱོགས་ཕེབས་དུས་འདིར་ད་ལན་བོད་ལྗོངས་ལྷ་སར་ཕེབས་འབྱོར་སྐབས་ལྷ་སར་བཞུགས་པའི་བོན་གྱི་དད་ལྡན་མང་ཚོགས་རྣམས་ཀྱིས་ཕེབས་བསུ་དང་། ཁོང་གིས་ཀྱང་ཉིན་མང་པོར་དད་ལྡན་མང་ཚོགས་རྣམས་ལ་མཇལ་ཁ་བྱིན་རླབས་དང་། དབང་ལུང་མན་ངག སྔོན་འགྲོ་དངོས་གཞིའི་འཆད་ཁྲིད་སོགས་བཀའ་དྲིན་བསྩལ། དེ་ནས་བོད་ལྗོངས་ནང་བསྟན་སློབ་གླིང་དུ་བཞུགས་པའི་སྟག་ཞིག་སྤྲུལ་སྐུ་ཡེ་ཤེས་ཉི་མ་མཆོག་གིས་གཙོ་བོའི་འགན་ཁུར་འོག་ལྷ་སར་ཡོད་པའི་བོད་ལྗོངས་ནང་བསྟན་སློབ་གླིང་དུ་བཞུགས་པའི་བླ་སྤྲུལ་རྣམ་པ་དང་། འགོ་བ་དགེ་བཤེས་བསྟན་འཛིན་འབྲུག་གྲགས། བྱ་བཏང་སྤྲུལ་སྐུ་ཤེས་རབ་བློ་གྲོས། དགེ་བཤེས་ཕུན་ཚོགས་བློ་གྲོས་སོགས་བླ་གྲྭ་དུ་མ་དང་། གཞན་ཡང་ཧོར་སྦྲ་ཆེན་རྫོང་དང་ཁམས་ཕྱོགས་ཀྱི་བོན་པོའི་དད་ལྡན་མང་ཚོགས་དུ་མ་ཞིག་སྟོད་ལུང་འབྲི་ལུང་དགོན་ཤུལ་ལ་བསང་གསོལ་རླུང་རྟ་གནང་སྟེ། ཞོགས་པ་སྔ་མོ་ནས་སྐྱ་སེར་ལྷན་རྒྱས་རྣམས་ལྷ་ས་ནས་རིམ་བཞིན་ཐོན་ཏེ་འབྲི་ལུང་དགོན་དུ་འབྱོར་ནས་ཐོག་མར་བླ་གྲྭ་རྣམས་སྲིད་རྒྱལ་ལྷ་ཁང་དུ་ལྷ་བསང་རྒྱས་པ་བཏང་ཞིང་། དེ་རྗེས་དད་ལྡན་མང་ཚོགས་རྣམས་ཀྱིས་ཀི་བསྭོ་ལྷ་འབོད་ཀྱིས་དར་ཚོན་སྣ་ལྔ་ལས་གྲུབ་པའི་དར་ལྕོག་ཀླུང་རྟ་དགོན་ཤུལ་དང་རི་གསེབ་ཀུན་ལ་བཙུགས་ཤིང་། དེ་ནས་ཤོག་བུ་དཀར་སེར་དམར་ལྗང་སྣ་ཚོགས་ལས་གྲུབ་པའི་ཀླུང་རྟ་གཏོར་ཏེ་བར་སྣང་དང་ས་གཞིར་ཁྱབ་པ་ཞིག་གཏོར་ཞིང་། དེ་ནས་བླ་གྲྭ་རྣམས་དང་མང་ཚོགས་ཚང་མ་ཕྲེང་བསྟར་གྱི་ཚུལ་དུ་བསྐོར་ཏེ་ལྷ་རྒྱལ་དང་སངས་རྒྱས་ཀྱི་བསྟན་པ་སྨོན་ལམ་སྐྱ་སེར་ཚང་མས་མགྲིན་གཅིག་ཏུ་བསྟོད་དབྱངས་རྣམ་པར་ལས་རྒྱལ་བ་ཞིག་གསུངས་སོ།
ལྷ་རི་སྐུ་བླ་སྟོད་ལྷ་ཟེ་ཟེའི་པང་དུ་ཆགས་པའི་སྟོད་ལུང་འབྲི་ལུང་དགོན་པའི་གནའ་ཤུལ་གྱི་རྣམ་པ།
སྟོད་ལུང་འབྲི་ལུང་དགོན་པའི་ཚོགས་ཁང་ཆེན་མོའི་ཞིག་ཤུལ་ཟུར་གཅིག
སྟོད་ལུང་འབྲི་ལུང་དགོན་པའི་ཚོགས་ཁང་གི་རྡོ་བརྩིགས་ཀྱི་རྣམ་པ།
ད་ལན་མཇལ་བསྐོར་བ་རྣམས་སྟོད་ལུང་འབྲི་ལུང་དགོན་པའི་ཞིག་ཤུལ་ཐོག་མར་འབྱོར་བའི་ཕེབས་འཁོར་ཁག
སྟོད་ལུང་འབྲི་ལུང་དགོན་པར་མཇལ་བསྐོར་བ་རྣམས་བསང་དང་རླུང་རྟ་རྣམས་གྲ་སྒྲིག་གནང་བཞིན་པ།
སྟོད་ལུང་འབྲི་ལུང་དགོན་པའི་སྲིད་རྒྱལ་ལྷ་ཁང་ནང་བླ་གྲྭ་རྣམས་ཀྱི་བསང་གསོལ་རྒྱས་པ་གསུངས་སའི་སྒོ་ར་ནང་།
མཇལ་བསྐོར་བ་རྣམས་ཀྱིས་སྟོད་ལུང་འབྲི་ལུང་དགོན་པའི་གནའ་ཤུལ་གང་སར་རླུང་རྟ་བཙུགས་པ།
མཇལ་བསྐོར་བ་རྣམས་ཀྱིས་སྟོད་ལུང་འབྲི་ལུང་དགོན་པའི་གནའ་ཤུལ་གང་སར་རླུང་རྟ་བཙུགས་པའི་ཉམས་གྱི་རྣམ་པ།
མཇལ་བསྐོར་བ་རྣམས་ཀྱིས་སྟོད་ལུང་འབྲི་ལུང་དགོན་པའི་གནའ་ཤུལ་གང་སར་རླུང་རྟ་བཙུགས་པའི་ལྷོ་ངོས་ཀྱི་ཉམས།
མཇལ་བསྐོར་བ་རྣམས་ཀྱིས་སྟོད་ལུང་འབྲི་ལུང་དགོན་པར་བསྐོར་བསྐྱོད་གནང་བཞིན་པ།
མཇལ་བསྐོར་བ་རྣམས་ཀྱིས་སྟོད་ལུང་འབྲི་ལུང་དགོན་པར་མཐའ་བསྐོར་བསྐྱོད་བཞིན་པ།
མཇལ་བསྐོར་བ་རྣམས་ཉིན་གུང་གི་གསོལ་ཚིགས་མཆོད་པའི་སྐབས།
བླ་སྤྲུལ་རྣམ་པས་མཇལ་བསྐོར་བ་རྣམས་ལ་རང་ཚུགས་མ་ཤོར་བའི་སྒོ་ནས་རང་བསྟན་རང་སྐྱོང་གི་ལེགས་ཉེས་བླང་དོར་གྱི་བཀའ་སློབ་གནང་བའི་སྐབས།
མཁས་པ་གཡུ་གཤེན་གྱིས་བྲག་ལ་ཞབས་རྗེས་བཞག་པ།
དེ་ནས་ས་གནས་འདི་སྤྱིར་རྗེའི་མགུར་ལྷ་བཅུ་གསུམ་གྱི་ནང་ཚན་དང་། སྒོས་སུ་བོན་གྱི་འདུ་གནས་སོ་བདུན་གྱི་ནང་ཚན། ཁྱད་པར་དུ་ཞང་སྟོན་དམ་པ་ཚུལ་ཤེས་ཀྱི་གདན་ས་ཁྱད་པར་ཅན་བཅས་ཁྱད་བོན་གསུམ་ལྡན་གྱི་གནས་མཆོག་གལ་ཆེན་འདིའི་ངོ་སྤྲོད་མདོར་བསྡུས་ཞིག་ཞུས་ན། ཐོག་མར་སྟོད་ལུང་འབྲི་ལུང་དགོན་འདི་ལོ་རྒྱུས་རིང་བའི་དབང་དུ་བྱས་ན་གཉའ་ཁྲི་བཙན་པོའི་（བོན་གྱི་ལོ་རྒྱུས་ལྟར་ན་སྤྱི་ལོའི་སྔོན་༡༡༣༦ལོར་བོད་རྗེར་མཚན་གསོལ།）དུས་ནས་ད་བར་མི་ལོ་སུམ་སྟོང་ལྷག་གི་ལོ་རྒྱུས་ལྡན་ཚུལ་བོན་གྱི་ལོ་རྒྱུས་ཙམ་དུ་མ་ཟད། ཁྱད་པར་དུ་ལོ་རྒྱུས་སྨྲ་བའི་དབང་པོ་མཁས་དབང་དུང་དཀར་བློ་བཟང་འཕྲིན་ལས་མཆོག་གི་ཚིག་མཛོད་ཆེན་མོ་ལས།“ཞང་སྟོན་མཆོད་ཁང་།སྟོད་ལུང་བདེ་ཆེན་རྫོང་གནས་ཆུང་གྲོང་རྡལ་ཁོངས་ཞང་སྟོན་གྲོང་ཚོའི་ལྷོ་ངོས་རི་ལྡེབས་སུ་མཆོད་ཁང་ཞེས་པའི་གྱང་རོ་ཆེན་པོ་ཞིག་ཡོད་པ་དེ་ནི་གནའ་དུས་གཉའ་ཁྲི་བཙན་པོའི་སྐུ་དུས་སུ་བྱུང་བའི་བོན་གྱི་ཤེས་པ་ཅན་བཅུ་གཉིས་གྲས་མཁས་པ་སྨེའུས་(རྨེའུས)ཕྱག་བཏབ་པའི་སྟོད་ལུང་ཞང་སྟོན་འཕགས་པའི་གདན་ས་ཞེས་པ་དེ་ཡིན།དེ་གར་བོན་མདོ་དང་སྔགས་ཀྱི་བསྟན་པའི་གནས་གཞི་བཟུང་ནས་དར་བ་མཛད།གྲི་གུམ་བཙན་པོས་བོན་བསྣུབས་སྐབས་སྨེའུ་(རྨེའུ)སྟོན་གྱིམ་བུ་ཐེལ་རྒྱལ་གྱིས་བོན་གྱི་རིག་གཞུང་གི་རྩ་བ་བཀའ་བོན་སྒོ་བཞི་སྲུང་སྐྱོབ་གནང་སྟེ་རྒྱལ་སྲས་སྤུ་དེ་གུང་རྒྱལ་གྱི་རིང་ལ་བོན་གྱི་རིག་གཞུང་གོང་འཕེལ་བཏང་།སྲོང་བཙན་སྒམ་པོའི་སྐབས་ཞང་ཞུང་སྨེའུ་(རྨེའུ)སྟོན་གྱི་གདུང་རྒྱུད་ནས་ཇི་སྲིད་བར་ལྷ་ས་གཙུག་ལག་ཁང་གི་སྟེང་དུ་སྲིད་པའི་རྒྱལ་མོའི་བསྐང་གསོ་གཏོང་དགོས་པའི་བཀའ་གཏན་གསེར་ཡིག་བསྩལ་བ་སོགས་གཟིགས་མཐོང་ཚད་མེད་གནང་།བཙན་པོ་ཁྲི་སྲོང་ལྡེ་བཙན་གྱིས་བོན་བསྣུབས་སྟབས་སྨེའུ་(རྨེའུ)སྟོན་གྱི་རྒྱུད་པ་མཁས་པ་གཡུ་གཤེན་གྱིས་བྲག་ལ་ཞབས་རྗེས་བཞག་པ་སོགས་རྫུ་འཕྲུལ་བསྟན་པས་ཁྲི་སྲོང་ལྡེ་བཙན་ངོ་མཚར་སྐྱེས་ཏེ་སྔར་གྱི་བཀའ་གཏན་སོར་གནས་བྱུང་། བསྟན་པ་ཕྱི་དར་གྱི་སྐབས་བོན་ཆོས་གཉིས་ཀ་དར་བས་ལྷ་ས་གཙུག་ལག་ཁང་དུ་སྲིད་རྒྱལ་གསོལ་མཆོད་བསྐྱར་གསོ་བྱུང་། དགའ་ལྡན་ཕོ་བྲང་པའི་དབང་བསྒྱུར་སྐབས་ལྷ་སའི་གཙུག་ལག་ཁང་གི་བླ་བྲང་སྟེང་དུ་སྤ་མའི་ཕུང་གསོག་ཆེན་པོ་ཞིག་ཡོད་པ་དེར་ལོ་ལྟར་བོད་ཟླ་བཅུ་པའི་ནང་སྤ་མ་ཁ་གསོས་རྒྱག་པ་དང་འབྲེལ་སྲིད་པའི་རྒྱལ་མོ་གསོལ་མཆོད་དང་།གཡང་སྐྱབས་ཉིན་གསུམ་བྱེད་མི་ཞང་སྟོན་ཁུལ་ནས་ཞང་སྟོན་སྨེའུའི་(རྨེའུའི)གདུང་རྒྱུད་གཅིག་ཡོང་དགོས་པར་བླ་བྲང་ཕྱག་མཛོད་ནས་གཏོང་སྒོ་ལེན་རྒྱུ་ཡོད།ཞང་སྟོན་འཕགས་པའི་གདན་ས་ཞེས་པ་དེ་སོག་པོས་གཏོར་སྐད་ཀྱིས་དགོན་ཤུལ་གྱང་རོ་ཡིན་ཡང་།སྲིད་རྒྱལ་གྱི་མགོན་ཁང་ཞིག་དང་མཁས་པ་གཡུ་གཤེན་གྱིས་བྲག་ལ་ཞབས་རྗེས་བཞག་པ་དེ་ད་ལྟ་ཡོད།”ཅེས་འབྲི་ལུང་དགོན་གྱི་ལོ་རྒྱུས་སྐོར་ཚིག་ཉུང་དོན་འདུས་ཀྱི་ཚུལ་དུ་གསལ་བཤད་གནང་ཡོད་པ་དེ་ལྟར་རེད། དེ་ནས་བོན་གྱི་ལོ་རྒྱུས་ཁག་ནང་།འབྲི་ལུང་དགོན་གནས་འདི་ལོ་རྒྱུས་རིང་ཚུལ་དང་ས་གནད་གལ་ཆེ་ཚུལ་ནི།ས་གནས་འདི་བོད་རྒྱལ་གཉའ་ཁྲི་བཙན་པོའི་ཡར་སྔོན་ཙམ་ནས་ལོ་རྒྱུས་ཀྱི་འབྲེལ་བ་ལྡན་ལ་དེ་བས་ཀྱང་གཉའ་ཁྲིའི་སྐབས་སུ་ལོ་རྒྱུས་ལྡན་པ་དང་།གཉའ་ཁྲི་ཡབ་སྲས་ཀྱི་དུས་ནས་རྗེའི་མགུར་ལྷ་བཅུ་གསུམ་ཞེས་མི་རིགས་ཀྱི་སྐུ་བླ་དང་གཙུག་གི་ལྷར་ངོས་འཛིན་བྱེད་ནས་ལོ་ལྟར་ལོ་དུས་ཀྱི་གསོལ་བསྟོད་དང་།ཟླ་དུས་ཀྱི་མཆོད་པའི་སྐབས་སུ་སྔ་བཅོལ་ལས་ཀྱི་གཏང་རག་དང་།ད་བཅོལ་ལས་ཀྱི་བསྐུལ་མ།ཕྱི་བཅོལ་ལས་ཀྱི་ནན་ཏན་གསོལ་བའི་སྲོལ་རྒྱུན་དེའི་དམིགས་ཡུལ་ནི།ཆེ་བ་རྒྱལ་ཁམས་ནས་ཆུང་བ་མི་སྒེར་དང་།མཐོ་བ་རྒྱལ་པོ་ནས་དམའ་བ་མང་ཚོགས་བར་མདོར་ན་རྒྱལ་ཁམས་དང་།རྗེ་འབངས་ཀུན་ཞི་བདེ་མཉམ་གནས་དང་།དཔལ་གྲགས་ལོངས་སྤྱོད་ཕུན་ཚོགས་ཀྱི་དམིགས་ཡུལ་ལ་བསམ་ནས་ཡུལ་ལྷར་མཆོད་བསྟོད་གནང་སྲོལ་དེ་བོད་མི་རིགས་ཀྱིས་སྔར་ནས་གལ་པོ་ཆེ་ལ་ནན་ཏན་དུ་འཛིན་པའི་སྲོལ་རྒྱུན་དེ་སྔར་སྲོལ་ད་གནས་སུ་བྱུང་ཐུབ་ཡོད་པ་རེད།དེས་ན་སྟོད་ལུང་འབྲི་ལུང་དགོན་པ་གནས་ས་ནི་རྗེའི་མགུར་ལྷ་བཅུ་གསུམ་གྱི་ནང་ཚན་སྟོད་ལྷ་ཟེ་བའམ་སྟོད་ལྷ་ཟེ་ཟེའི་རི་ཁུག་ལ་གནས་ཡོད།བོན་གྱི་དཔེ་རྙིང་མིའུ་རིགས་བཞི་ལྷ་སེལ་ལྷ་མཆོད་རྒྱས་པ་ལས་སྟོད་ལྷ་ཟེ་བ་ཞེས་འཁོད་ལ། ལྷ་རྒོད་དྲག་བདར་ཟེར་བའི་དཔེ་རྙིང་ནང་། “བསྭོ་ཡུལ་ནི་སྟོད་ལུང་རལ་གསུམ་ན། སྟོད་ལྷ་ཟེ་ཟེ་གཉན་པོ་བསྭོ། སྐུལ་དར་དཀར་བེར་ཆེན་གསོལ། ཆིབས་སུ་འབྲོང་བུ་དར་མ་ཅིབ། ཕྱག་ན་ལྕགས་མདའ་འོད་ཆེན་བསྣམས། སྟོད་རྗེ་གཉན་གྱི་ལྷ་རུ་འབོད།”ཞེས་གསལ་ལ།དེང་འབྲི་ལུང་དགོན་་པའི་ཡུལ་མི་རྣམས་ཀྱིས་འབོད་སྲོལ་ལ་ཁོང་ཚོའི་རྒྱབ་རི་སྐུ་ལྷ་བསེར་བསེར་དང་། ལ་ལས་ཐང་ལྷ་བསེར་བསེར། ལ་ལས་སྟོད་ལྷ་ཟེ་ཟེ་སོགས་འབོད་སྲོལ་ཁ་ཤས་འདུག་ཀྱང་དོན་དངོས་སྔར་གྱི་ཡིག་རྙིང་རྣམས་ལས་གསལ་བ་ལྟར་སྟོད་ལྷ་ཟེ་ཟེ་དེ་དོན་ལ་གནས་ཤིང་།གཞན་དག་དེའི་སྒྲ་ཟུར་ཆགས་པར་མངོན། ཁྱད་པར་དུ་འབྲི་ལུང་དགོན་གནས་འདི་བོན་གྱི་འདུ་གནས་སོ་བདུན་ནང་ཚན་དབུས་རུ་ན་བཅུ་གསུམ་ཡོད་པའི་འདུས་གནས་བཅུ་པ་དེ། “སྟོད་རོལ་ལུང་གསུམ་”ཟེར་བའི་གནས་དེ་ཡིན་ལ། འདུ་གནས་འདིའི་ཐ་སྙད་འབྲི་ཚུལ་ལ་སྟོད་རོས་དང་། སྟོད་རལ།སྟོད་རོལ་ཞེས་འབྲི་ཚུལ་ཁ་ཤས་བྱུང་ཡོད་ཀྱང་བོན་གྱི་གནའ་བོ་ཡིག་རྙིང་ནང་སྟོད་རོལ་ལུང་གསུམ་ཞེས་འཁོད་ཡོད་པས་དེ་ལྟར་བཞག་ན་ལེགས། དེ་ནི་བོན་གྱི་ལོ་རྒྱུས་ཁག་ནང་“སྟོད་རོལ་ལུང་གསུམ་ནི་སྟོད་ལུང་ནང་ལ་ཡོད།” ཅེས་གསལ་བ་ལྟར་“སྟོད་རོལ་ལུང་གསུམ་”ཞེས་པའི་གོ་དོན་ནི། སྟོད༵་ནི་སྟོད་ལུང་དང་། རོལ༵་ནི་ངོས་སམ་ཕྱོགས་ལ་ཟེར་ཏེ། དཔེར་ན། ཕ་རོལ་ནི་ཕར་ངོས་སམ་ཕར་ཕྱོགས་དང་། ཚུ་རོལ་ལ་ཚུར་ངོས་སམ་ཚུར་ཕྱོགས་ཟེར་བ་ལྟར་སྟོད་རོལ་ནི་སྟོད་ལུང་གི་ཕྱོགས་ལ་གོ། ལུང༵་གསུ༵མ་ཞེས་པ་ནི། སྟོད་ལུང་དང་། འབྲི་ལུང་། སྐྱོར་མོ་ལུང་། （དེང་སྟོད་ལུང་བདེ་ཆེན་རྫོང་སྦྱར་རགས་ཤང་སྦྱར་རགས་གྲོང་ཚོའི་ནང་དུ་ཡོད་པའི་སྐྱོར་མོ་ལུང་དགོན་པའམ་སྦྱར་རགས་དགོན་པ་ཡོད་ས་དེ་ཡིན།）དང་གསུམ་གྱི་ས་དམིགས་ཀྱི་གནད་གསུམ་འཛིན་པའི་རྒྱུ་མཚན་གྱིས་དེ་ལྟར་ཟེར་བའོ། དེར་བརྟེན་འབྲི་ལུང་དགོན་གནས་འདི་མི་ལོ་སུམ་སྟོང་ཡར་སྔོན་ན་བོན་གྱི་འདུ་གནས་གལ་ཆེན་ཞིག་ཏུ་གྱུར་ཚུལ་དེ་ལྟར་དང་། བོན་གྱི་འདུལ་བསྟན་སྔ་དར་སྐབས་སུ་ཡང་། ལྷ་སའི་ཁུལ་འདིར་བོན་གྱི་གནས་སྡེ་མང་པོ་འཕེལ་བའི་ལོ་རྒྱུས་ཡོད་སྟབས་སྐབས་དེར་འདུལ་བའི་གནས་སྡེར་ཆགས་ཡོད་སྲིད། བོད་རྒྱལ་དིང་ཁྲི་བཙན་པོའི་སྐུ་སྨད་ཙམ་ནས་སེམས་ཅན་གྱི་ལས་དབང་དང་། དུས་ཀྱི་རྐྱེན་པས་བོན་གྱི་འདུལ་བསྟན་ནང་འཁྲུགས་བྱུང་སྟེ་མི་ལོ་གཅིག་སྟོང་བརྒྱད་བརྒྱ་ལྷག་ཙམ་གྱི་དུས་ཡུན་ལ་བོན་གྱི་སྔགས་སེམས་བསྟན་པ་ཁོ་ན་དར་བ་ལས་འདུལ་བསྟན་ནུབ་པར་གྱུར་ལ། བོད་རྒྱལ་རིམ་བྱོན་གྱིས་བོན་གྱི་འདུལ་བསྟན་བསྣུབས་པའི་ལོ་རྒྱུས་ཀྱང་མེད་ལ། བོན་གྱི་ལོ་རྒྱུས་ལྟར་ན། བོད་རྒྱལ་དིང་ཁྲི་བཙན་པོ་སྤྱི་ལོའི་སྔོན་༩༦༧་ལོར་འཁྲུངས་ལ། སྤྱི་ལོ་༨༨༨ལོར་མུ་ཟི་གསལ་བཟང་འགོག་པར་བཞེངས་ཏེ་བོན་གྱི་འདུལ་བསྟན་ཕྱི་དར་དབུ་ཚུགས་པའི་དུས་བར་མི་ལོ་༡༨༥༥རིང་ལ། སྟོད་ལུང་འབྲི་ལུང་དགོན་འདི་འདུལ་དགོན་གྱི་གནས་བབས་མེད་ཀྱང་སྤྱིའི་བོན་སྤྱོད་མོ་རྩིས་གཏོ་དཔྱད་སོགས་འཇིག་རྟེན་ཕན་བདེ་སྒྲུབ་པའི་གྲོང་གི་འདུར་བོན་དང་། ཁྱད་པར་དུ་བསྙེན་སྒྲུབ་ལས་གསུམ་ལ་བརྩོན་པའི་ཞྭ་དཀར་གསང་སྔགས་སྒྲུབ་པའི་སྡེ་སོགས་བཤོས་ཀྱི་ལྷ་བོན་དང་། ཚིག་དོན་མ་ལུས་པ་སྙན་ནས་སྙན་དུ་བརྒྱུད་པའི་ཞང་ཞུང་སྙན་བརྒྱུད་གཙོས་རྫོགས་ཆེན་གྱི་གདམས་པ་བཅས་ཡང་དག་པའི་སེམས་བོན་སྐོར་རྣམས་ཉམས་ལེན་དང་། སྒོམ་བསྒྲུབ་བྱེད་པའི་སྔགས་སེམས་ཀྱི་སྲོལ་དར་ལ། བོན་གཤེན་རྣམས་ཀྱིས་ཀྱང་དུས་རྒྱུན་སོ་སོས་བསྙེན་བསྒྲུབ་དང་ཉམས་ལེན་ལ་བརྩོན་ཞིང་། དུས་བཟང་ཚེས་བཟང་དང་། ལོ་ཟླའི་དུས་མཆོད། ཡུལ་སྡེའི་སྤྱི་རིམ་དང་དབང་ལུང་། བསྟན་འགྲོར་སྤྱི་ཕན་གྱི་སྒྲུབ་ཆེན་དང་འཆད་ཉན་སོགས་སྐབས་གཤེན་པོ་ཀུན་འདུ་འཛོམས་གནང་ནས་སོ་སོའི་གནས་ཁང་དང་སྒྲུབ་གནས་ལ་འཚོགས་སྲོལ་བྱུང་ཡོད་པ་ནི། དྲན་པའི་སྒྲ་འགྲེལ་ལས། “བོད་ཀྱི་རྒྱལ་ཁམས་སུ་བོན་མཐའ་རུ་མི་ནུབ་པའི་རྟགས་ལྔ་མཚན་མར་བཙུགས། བོན་གྱི་འདུ་གནས་སུམ་ཅུ་རྩ་བདུན་བཟུང་ནས་གཡུང་དྲུང་གི་བོན་ལ་སྤྱད་པས། གྲུབ་པ་མངོན་དུ་ཐོབ་པའི་གཤེན་དགུ། ཚེའི་དངོས་གྲུབ་དང་། རྫུ་འཕྲུལ་གྱི་ཞབས་དང་། མངོན་ཤེས་ཀྱི་རྩལ་དང་ལྡན་པའི་མཁས་པ་མི་དགུ། འཇིག་རྟེན་གྱི་ལྷ་འདྲེ་དབང་དུ་འདུས་པའི་མཐུ་བོ་ཆེ་མི་དགུ། གཤེན་བཀའ་བློན་སྦག་ཏུ་མཛད་པའི་བོན་ཆེན་བཞི་བཅུ་རྩ་གཉིས། གཞན་ཡང་གཤེན་ཕྲན་ལ་གྲངས་མེད་པ་རྣམས་ཀྱིས། བཤོས་ཀྱི་ལྷ་བོན་དང་། གྲོང་གི་འདུར་བོན། ཡང་དག་སེམས་བོན་དང་གསུམ་ལ་སྤྱོད་ཀྱིན་བོན་དར་བར་གྱུར་རོ།” ཞེས་སོ། མདོར་ན་འབྲི་ལུང་དགོན་གནས་འདི་ལོ་ངོ་སྟོང་ཕྲག་དུ་མའི་རིང་ལ་དུས་བབས་ཀྱི་འགྱུར་ལྡོག་དང་བསྟན་པ་འཕེལ་འགྲིབ་འདྲ་མིན་ཅི་རིགས་ཤིག་བྱུང་ཡོད་ཀྱང་རྩ་བའི་ཆ་ནས་བོན་གྱི་ལོ་རྒྱུས་རང་བཞིན་ལྡན་པ་ད་བར་འབུར་དུ་ཐོན་པའམ་མིག་སྔར་རྣམ་པ་གསལ་པོ་ཞིག་གནས་ཐུབ་པ་དེ་མིའི་ནུས་པས་སྲུང་སྐྱོབ་བྱས་པ་ཞིག་མིན་ལ། དེ་ནི་བོན་གྱི་བསྟན་སྲུང་གཙོ་མོ་སྲིད་པ་རྒྱལ་མོའི་བྱིན་རླབས་ཀྱི་ནུས་མཐུ་ཁོ་ནས་ད་བར་གསོན་ཉམས་ཀྱི་ཚུལ་དུ་གནས་ཐུབ་པ་དེ་ནི་ཆེས་ངོ་མཚར་ལྡན་པའི་ལོ་རྒྱུས་ཀྱི་དཔང་རྟགས་དང་ལྷ་དང་སྲུང་མའི་ནུས་པ་ཡོད་མེད་ཐེ་ཚོམ་ཅན་གྱི་རིགས་ལ་དེ་བས་ཀྱང་བདེན་པ་ར་སྤྲོད་ཐུབ་པའི་དགོན་འདིའི་སྲུང་མ་སྲིད་པའི་རྒྱལ་མོས་མགོན་སྐྱོབས་དང་སྡོང་གྲོགས་མཛད་ནས་ད་བར་ཞང་སྟོན་གྲོང་ཚོའི་དད་ལྡན་མང་ཚོགས་དང་སྲུང་མ་འདི་གཉིས་བར་ཕན་ཚུན་གཅིག་བསྟེན་གཅིག་གྲོགས་ཀྱི་ཚུལ་དུ་ཁ་བྲལ་ཐབས་མེད་པའི་བརྩེ་སེམས་ཟབ་མོ་ཞིག་ལྡན་ཡོད། གང་ཡིན་ཞེ་ན། ཡུལ་འདི་སྔར་བོན་ཆོས་ལ་དད་མཁན་འབའ་ཞིག་ཡིན་ཀྱང་སྤྱི་ཚོགས་ཀྱི་འགྱུར་ལྡོག་ཅི་རིགས་ཀྱི་གནས་ཚུལ་འོག་ཕྱིས་སུ་གྲུབ་མཐའ་གཞན་ཞིག་གི་ངོ་བོ་གྱུར་ཡོད་ཀྱང་ད་བར་ཡུལ་འདིའི་དད་ལྡན་མང་ཚོགས་རྣམས་སྲིད་པ་རྒྱལ་མོར་བསྐང་གསོལ་འཕྲིན་བཅོལ་དང་བོན་ལ་སྐྱབས་སུ་འགྲོ་བའི་གོམས་གཤིས་དེ་ད་དུང་མུ་མཐུད་ལྷག་ཡོད་པ་དེ་ནི་ལོ་རྒྱུས་ཀྱི་བདེན་དཔང་ཞིག་རེད།
འབྲི་ལུང་དགོན་ཕྱག་བཏབ་ཚུལ་སྐོར།
དགོན་གནས་འདི་ཆེས་གནའ་བོའི་དུས་ནས་བོན་གྱི་འདུ་གནས་“སྟོང་རོལ་ལུང་གསུམ་”གྱི་གནས་ཡིན་ཚུལ་དང་། བོད་ཀྱི་ཡུལ་ལྷ་གཞི་བདག་གི་གཙོ་བོ་རྗེའི་མགུར་ལྷ་བཅུ་གསུམ་གྱི་ཡ་གྱལ་སྟོད་ལྷ་ཟེ་ཟེའི་གནས་ཡུལ་ཁྱད་པར་ཅན་དང་། དེ་ནས་བོད་རྒྱལ་གཉའ་ཁྲི་ཡབ་སྲས་ཀྱི་དུས་ནས་བཟུང་། ཕྱིས་དུས་རབས་བཅུ་གཅིག་པར་བྲུ་རྗེ་གཡུང་དྲུང་བླ་མས་དབེན་ས་ཁ་ཕྱག་མ་བཏབ་བར་མི་ལོ་ཉིས་སྟོང་ཉིས་བརྒྱའི་དུས་ཡུན་རིང་ལ་དགོན་གནས་འདིར་གསང་སྔགས་སྒྲུབ་པའི་སྡེ། ཞྭ་དཀར་ལྕང་ལོ་ཅན་གྱིས་སྔགས་ཕྱོགས་ཀྱི་བསྒྲུབ་པ་ཉམས་ལེན་དང་། སེམས་ཕྱོགས་ཀྱི་སྒོམ་པའི་སྡེ་བཅས་འདུ་ཞིང་འཚོགས་ནས་སྔགས་དགོན་གྱི་ལམ་ལུགས་རྒྱུན་ཆད་མེད་པར་གནས་ཡོད་ལ། དེ་ནས་ཕྱིས་བོན་བསྟན་ཕྱི་དར་སྐབས་དགོན་གནས་འདི་སྔར་ཡོད་ཀྱི་སྔགས་དགོན་དེ་ཉིད་རྨང་གཞི་བྱས་ཏེ་ཞང་འབྲི་ལུང་པ་ཆེན་པོའམ་ཞང་སྟོན་དམ་པ་ཚུལ་ཤེས་ཀྱིས་དུས་རབས་བཅུ་གཉིས་པའི་དུས་མགོར་ཙམ་ལ་དགོན་འདིར་རྣམ་དག་འདུལ་བའི་སྡེ་གསར་དུ་བཙུག་ཏེ་སྔར་ཡོད་ཀྱི་སྔགས་དགོན་ལམ་ལུགས་དེ་རིམ་བཞིན་རབ་བྱུང་འདུལ་བའི་ལམ་ལུགས་སུ་བསྒྱུར་ཏེ་རྒྱལ་བ་བྲུ་ཡི་རིང་ལུགས་འཛིན་པའི་འདུལ་དགོན་གསར་པའི་ངོ་བོ་ཞིག་ཏུ་གྱུར་ཡོད། ཞང་དམ་པ་ཚུལ་ཤེས་ཀྱི་རྩ་བའི་བླ་མ་ནི་བྲུ་རྗེ་གཡུང་དྲུང་བླ་མ་ཡིན་ལ། བྲུ་རྗེ་ཁོང་ནི་སྤྱི་ལོ་༡༠༤༠་ལོར་འཁྲུངས། ཁོང་དགུང་ལོ་སོ་གཉིས་ཐོག་སྤྱི་ལོ་༡༠༧༦ལོར་བོན་གྱི་འདུས་སྡེ་ཆེན་མོ་གཡས་རུ་དབེན་ས་ཁ་ཕྱག་བཏབ་མཛད། དུས་རབས་བཅུ་གསུམ་པའི་ནང་བྲུ་རྒྱལ་བ་གཡུང་དྲུང་གིས་མཛད་པའི་རྟོགས་ལྡན་ཉམས་རྒྱུད་ཀྱི་རྣམ་ཐར་རིན་ཆེན་ཕྲེང་བའམ་ཨ་ཁྲིད་བླ་བརྒྱུད་ཀྱི་རྣམ་ཐར་ལས།“ཞང་དམ་པ་ཚུལ་ཤེས་ཆུང་ནས་བྲིས་ཀློག་ལ་མཁས་པར་སྦྱངས། དེ་ནས་ཡར་ཆེར་སྐྱེས་ཏེ་གཡས་རུ་དབེན་ས་ཁར་ཕྱིན་ཏེ། བྲུ་ཤ་རྗེ་བཙུན་ལ་སོགས་མཁས་པ་རྣམས་ཀྱི་ཞལ་འགྲིམ་ཞིང་ཐོས་བསམ་གྱིས་སྒྲོ་འདོགས་ལེགས་པར་བཅད།” ⑨ཅེས་གསལབ་ལྟར་ཞང་དམ་པ་ཚུལ་ཤེས་དང་ཐོག་དབེན་ས་ཁར་ཕྱིན་ནས་བྲུ་ཤ་རྗེ་བཙུན་ནམ་བྲུ་རྗེ་གཡུང་དྲུང་བླ་མར་བླ་མ་བསྟེན་ཚུལ་གསལ་བ་དང་། དེ་རྗེས་དབུས་ཀྱི་མཁན་པོ་ཚུལ་ཁྲིམས་བླ་མ་དང་། ཁྱུང་སྒོམ་ཇོ་གཡུང་། སྐྱེ་མེད་ཇོ་གདུང་སོགས་བླ་མ་དུ་མར་བསྟེན་ནས་དབང་ལུང་མན་ངག་དང་། སྦྱོང་པ་ཉམས་ལེན་ཚུལ་བཞིན་མཛད་ལ། དེ་རྗེས་འབྲི་ལུང་དགོན་དུ་ཕེབས་ཏེ། རྟེན་ཚུལ་ཁྲིམས་རྣམ་དག་འདུལ་བའི་གཞི་འཛིན། སྒོམ་པ་བླ་མེད་རྫོགས་ཆེན་ཉམས་བརྒྱུད་ཀྱི་བཀའ་ཡི་སྙིང་པོ། མན་ངག་དགོངས་ཉམས་ཨ་ཁྲིད་བརྒྱུད་པའི་སྲོལ་བཙུགས་ཏེ་་རྟོགས་ལྡན་ཉམས་རྒྱུད་ཀྱི་བསྟན་པའི་གཞི་འཛིན་ནས་བླ་སློབ་བསམ་གྱིས་མི་ཁྱབ་པ་ལ་ཨ་ཁྲིད་སྒོམ་བསྒྲུབ་ཉམས་ལེན་གྱི་གདམས་པ་རིས་མེད་དུ་བཤད་ཁྲིད་རྒྱ་ཆེར་མཛད་ལ། སྐུ་ཚེའི་སྨད་ཙམ་ན་འབྲི་ལུང་དགོན་པར་རྒྱུན་བཞུགས་མཛད་ནས་བཀའ་རབ་འབྱམས་བོན་གྱི་འཁོར་ལོ་བསྐོར་ཞིང་ཕྱི་རབས་རྣམས་ལ་བསྟན་པ་རྗེས་བཞག་མཛད་དེ། བྲུ་རྒྱལ་བ་གཡུང་དྲུང་གིས་མཛད་པའི་ཨ་ཁྲིད་ཀྱི་བླ་མ་བརྒྱུད་པའི་གསོལ་འདེབས་ལས།“སྟོད་ལུང་འབྲི་ལུང་དགོན་པའི་སྒྲུབ་གནས་སུ། ཞང་སྟོན་དམ་པ་ཚུལ་ཤེས་ལ་གསོལ་བ་འདེབས།”ཞེས་ཨ་ཁྲིད་བླ་མ་བརྒྱུད་པའི་ནང་ནས་མཚན་སྙན་རླུང་ལྟར་འབར་ལ། དེ་བཞིན་ཨ་ཁྲིད་བླ་བརྒྱུད་ཀྱི་རྣམ་ཐར་ལས། “དེ་ནས་སྟོད་ལུང་གི་དགོན་པར་བཞུགས་ཏེ་ཕྱོགས་མཚམས་ཀྱི་བུ་སློབ་དད་པ་ཅན་རྣམས་ལ། བསླབ་པ་ཚུལ་ཁྲིམས་ཀྱི་སྡོམ་པ་དང་། གནས་ལུགས་ཐེག་ཆེན་གྱི་གདམས་པ་བསྟན་ཞིང་འགྲོ་དོན་རྒྱ་ཆེན་པོར་མཛད་དེ། ཕྱིས་ཞང་འབྲི་ལུང་པ་ཆེན་པོར་གྲགས་པ་ལགས་སོ།”ཞེས་དུས་དེ་ནས་བཟུང་ཞང་སྟོན་དམ་པ་ཚུལ་ཤེས་ཀྱི་གདན་སའི་བླ་རབས་རིམ་བྱུང་ལ་ཞང་སྟོན་གྱི་གདན་ས་པ་ཞེས་གྲགས་ནས་དུས་ད་ལྟ་ལའང་ཡུལ་དེ་ཞང་སྟོན་གྲོང་ཚོ་ཞེས་པའི་ཐ་སྙད་དེ་རང་སོར་དུ་གནས་ཡོད་པའོ། །