ནང་དོན་གནད་བསྡུས། ལྷ་ས་གྲོང་ཁྱེར་ཁྲེང་ཀོན་ཆུས་ཚལ་གུང་ཐང་ཤང་དཔལ་ལྡིང་གྲོང་ཚོ་འམ་ཚལ་པ་ཀྲིའི་ལུང་པའི་མི་ཆུང་སྒང་གྲོང་ཚོར་ཡོད་ པའི་ས་གྲུ་བཞི་འདི་ངམ་སྟག་ར་ཀླུ་གོང་གི་བང་སོ་ཡིན་པའི་སྐོར་ལ་རྒྱུ་མཚན་རོབ་ཙམ་ཞུ་བ་ལ། མི་སྣའི་ལོ་རྒྱུས་དང་། ཡུལ་ལུང་གང་དུ་ཡོད་པར་དཔྱད་པ། བང་སོ་བཞེངས་པའི་དགོས་པ། འཐོར་ཞིག་ཏུ་སོང་ཚུལ། མ་འོངས་ཀྱི་རེ་བ་བཅས་ལྔ་ཡི་སྒོ་ནས་འགོད་པ་ལགས་སོ།
བརྡ་ཆད་གཙོ་བོ། སྟག་ར་ཀླུ་གོང་། བང་སོ། རྡོ་རིང་། ས་གྲུ་བཞི།
   དང་པོ། དེ་ཡང་ཡོངས་གྲགས་སུ་ཁོང་གི་མཚན་ལ་ངམ་སྟག་ར་ཀླུ་གོང་ཞེས་འབོད་ཀྱང་། འདིའི་མཚན་ལ་ཡི་གེ་འབྲི་སྲོལ་ མང་དུ་བྱུང་འདུག་སྟེ། ངན་ལམ་སྟག་ར་གླུ་གོང་དང་། བློན་ཏ་ར་ཀླུ་གོང་། ངམ་སྟག་སྒྲ་ཀླུ་གོང་། བློན་སྟག་སྒྲ། ངན་ལམ་ཀླུ་ཁོང་། མ་ཁྲུང་གཡིང་སོགས་ཡོད། ཁོང་ནི་བཙན་པོ་ཁྲི་སྲོང་ལྡེ་བཙན་ཡབ་སྲས་སྐབས་སུ་འཕན་ཡུལ་ངན་ལམ་ཞེས་པའི་རུས་བརྒྱུད་དུ་ཡབ་ཀྱི་མཚན་ལ་ངན་ལམ་ཟླ་གོང་ཟེར་ཞིང་ཧ་ལམ་སྤྱི་ལོ་༧༢༠ཡར་མར་ཙམ་ལ་འཁྲུངས། རྒྱ་བོད་ཆོས་བོན་ལོ་རྒྱུས་ཡིག་རྙིང་དུ་མར་འཁོད་པའི་མི་སྣ་གྲགས་ཅན་ཞིག་ཡིན།
   གཉིས་པ། ལུང་པ་འདིའི་མིང་ལ་དེང་སྐབས་ཀྲི་ཞེས་འབོད་ཀྱང་ཡིག་རྙིང་རྣམས་སུ་ངན་ལམ་སྲི་ཞེས་བྲིས་ཡོད་ལ། ལུང་པ་འདི་བསམ་ཡས་ནས་སྐྱིད་ཤོད་ལྷ་སར་འགྲོ་སའི་ལམ་ཁག་འགའ་ཡོད་པའི་ནང་གི་གཅིག་རེད། ལུང་པ་འདི་ནི་བོད་བཙན་པོའི་  སྐབས་ཀྱི་ངན་ལམ་སྟོང་སྡེའི་ཁུལ་ཡིན། དར་རྒྱས་གསལ་སྒྲོན་ལས་ལྷོ་བལ་གྱི་ཨ་ཙ་ར་མི་གསུམ་གྱི་བྲག་དམར་བསམ་ཡས ་གསེར་མང་པོ་ཡོད་པ་ཐོས། བསམ་ཡས་སུ་ཡོང་ན་ནུབ་མོ་བསྐོར་བ་བྱས་པས། དཀོར་གཉེར་ན་རེ། ཁྱོད་ལྷོ་བལ་གྱི་མི་དད་པ་ཅན་འདུག་པས་མོས་གུས་གྱིས་གསུངས་ནས་སྒོ་བཅད་ནས་སོང་། དེར་སྒྲོ་བ་ཞིག་ལ་ཁྲོ་ཆུས་རྒྱས་བཏབ་པ་ཞིག་འདུག་ནས། བཏེག་པས་ལྕིད་ཆེ་སྟེ། འདི་ནས་གསེར་ཡོད་སྙམ་ནས་ཁྱེར་ནས་བྲོས་སོ། ནུབ་མོ་ཕྱིན་ཅིང་ཉིན་མོ་ནགས་གསེབ་ཏུ་སྡད། དེ་ནས་ངན་ལམ་གྱི་ལུང་པ་སྲི་བྱ་བར་སླེབས་ཏེ། ཁྲོ་ཆུ་ཁོལ་མའི་རྒྱ་བཅག་ནས་སྒྲོ་བ་ཁ་ཕྱེས་པས་(1)ཞེས་དང་། སྟག་སྒྲ་ཀླུ་གོང་གི་བང་སོའི་རྡོ་རིང་སྐོར་གླེང་བ། ཞེས་པའི་མཆན་ཆུང་ལས་ཀྲི་ཞེས་པའི་ཡུལ་འདི་ལ་སྲི་ཞེས་འབོད་པར་གསལ་ཏེ། རྒྱ་བོད་ཡིག་ཚང་མཁས་པ་དགའ་བྱེད་ཆེན་མོའི་དཀར་ཆབ་གདོག་གོ་བྱ་བའི་དབུ་མེད་བྲིས་མའི་དཔེ་རྙིང་ལྡེབ་༡༡༢ན་སྲིའི་རྡོ་རིང་ཞེས་གསལ་བ་དང་རྒྱ་བོད་ཡིག་ཚངས་མཁས་པ་དགའ་བྱེད་ཆེན་མོ་འཛམ་གླིང་གསལ་བའི་མེ་ལོང་ཞེས་བྱ་བའི་དབུ་ཅན་སྤར་མའི་ལྡེབ་༡༤༡ནང་ལའང་སྲིའི་རྡོ་རིང་ཞེས་གསལ་ཡོད་པས་ཤེས་ཐུབ་ལ་ཕྱིས་སུ་དབུས་གཙང་སོགས་ས་ཆ་མང་པོ་ཞིག་གི་ཕལ་སྐད་དུ་སྲ་ལ་ཀྲ་དང་སྲོག་ལ་ཀྲོག་ཞེས་པའི་སྒྲ་ཐོན་པས་ན་སྲི་ཞེས་པའི་སྒྲ་ཀྲི་ལ་འགྱུར་བ་ཡིན་ནོ། (2)ཞེས་བྲིས་ནས་གསལ་བཤད་གནང་འདུག 
   གསུམ་པ། དུས་རབས་བརྒྱད་པའི་བཙན་པོ་ཁྲི་ལྡེ་གཙུག་བཙན་དང་ཁྲི་སྲོང་ཡབ་སྲས་ཀྱི་སྐབས་བློན་པོ་འདི་ཡིས་ཁྲི་སྲོང་ཀྱི་སྐུ་སྲོག་སྐྱོབས་མཁན་དང་ནང་བློན་ཟིང་འཁྲུག་ངོ་ལོག་དག་བཏུལ་བ་ལོ་རྒྱུས་ཐོག་ཙི་ནའི་རྒྱལ་ས་ཁྲང་ཨན་ལེན་མྱོང་ལ་ཧོར་ལ་དམག་དྲངས་སྒོམ་གྲྭ་བཅོམ་ནས་རྟེན་རྫས་སྣང་སུ་ལེན་པའི་དཔའ་རྒོད་ཐབས་རྩལ་གཉིས་ལྡན་ཞིག་རེད། བོད་བཙན་པོའི་རྒྱལ་རབས་ལས། དེ་སྐབས་བོད་སྟོང་སྡེ་གསུམ་གྱི་སྟོང་དཔོན་འབལ་སྟོང་ཙབ་དང་། ལང་མྱེས་ཟིགས་ གཉིས་ཀྱིས། བོད་ཀྱི་ཆབ་སྲིད་ལ་སྲིད་སྒྱུར་བྱ་རྒྱུའི་ལྐོག་གཡོ་གཤམ་པར། བློན་པོ་སྟག་སྒྲ་ཀླུ་ཁོང་གིས་ཤེས་ཏེ། བཙན་པོ་ཁྲི་སྲོང་ ལྡེ་བཙན་སྐུ་སྲོག་སྐྱོབ་ཐུབ་པ་བྱུང་(3)ཞེས་སོགས་བོད་ཀྱི་ལོ་རྒྱུས་མང་པོར་གསལ་བ་མ་ཟད་རྒྱལ་ས་ཁྲང་ཨན་བཅོམ་པའི་ སྐོར། ཐང་ཡིག་རྙིང་མ་ལས་ཐུ་བྷོད་ཀྱི་སྐོར་ལས་ཀོང་ཏེ་ཁྲི་ལོ་དང་པོའི་ཟླ་བཅུ་པར། བྷོད་ཀྱིས་འ་ཞ་དང་ཏང་ཞང་གི་འཇང་པ་བསྡོམས་པས་དམག་ཁྲི་ཚོ་ཉི་ཤུ་ལྷག་ཁྲིད་དེ། ལུང་ཀོང་ཏུའུ་ནས་ཤར་ཕྱོགས་སུ་རྒོལ་བར་འོངས། གོང་མ་ཧྲན་ཀྲིག་ཏུ་ཕེབས། རྒྱལ་ས་ཁྲང་ཨན་ཤོར། བྷོད་ལ་མགོ་བཏགས་པའི་དམག་དཔོན་ཀོ་ཧོས་བྱ་བས་བྷོད་དམག་ཁྲིད་དེ་ཧྲང་ཏུའུ་མཁར་དུ་སླེབས། མཆན་དང་དཔྱད་གཞིའི་ཡིག་ཆ།
(1）བསྟན་པའི་རྣམ་བཤད་དར་རྒྱས་གསལ་བའི་སྒྲོན་མ། སྤ་སྟོན་བསྟན་རྒྱལ་བཟང་པོས་མཛད། ཤོག་ངོས་༣༢༧པར། མི་རིག་དཔེ་ སྐྲུན་ཁང་ནས་སྤྱི་ལོ་༢༠༡༠ལོའི་ཟླ་༩པར་དཔར།
(2)སྟག་སྒྲ་ཀླུ་གོང་གི་བང་སོའི་རྡོ་རིང་སྐོར་གླེང་བ། བསོད་ནམ་དབང་ལྡན་དང་བན་ཤུལ་དཔལ་མཁར་རྒྱལ་གྱིས་བརྩམས། ཤོག་ངོས་༤པར། སྤྱི་ལོ་༢༠༡༤ལོའི་ཟླ་༡༢ཕོ་བྲང་པོ་ཏཱ་ལའི་ལོ་ཕྱེད་དུས་དེབ།
(3)ཏུན་ཧོང་ཡིག་རྙིང་ལས་བྱུང་བ། བོད་བཙན་པོའི་རྒྱལ་རབས། འབྲི་གུང་ཆེ་ཚང་དཀོན་མཆོག་བསྟན་འཛིན་ཀུན་བཟང་ ཕྲིན་ལས་ལྷུན་གྲུབ་ཀྱི་མཛད། ཤོག་ངོས་༤༢༤པར། སྲོང་བཙན་དཔེ་མཛོད་ཁང་སྤྱི་ལོ༢༠༡༠ལོར་སྤེལ།
(4)ཐང་ཡིག་གསར་རྙིང་ལས་བྱུང་བའི་བོད་ཆེན་པོའི་སྲིད་ལུགས། ཤོག་ངོས་༡༨༣པར། མཚོ་སྔོན་མི་རིགས་དཔེ་སྐྲུན་ཁང་ནས་སྤྱི་ལོ་༡༩༨༣ལོར་ཟླ་༨པར་དཔར།
(5))ཐང་ཡིག་གསར་རྙིང་ལས་བྱུང་བའི་བོད་ཆེན་པོའི་སྲིད་ལུགས། ཤོག་ངོས་༥༦པར། མཚོ་སྔོན་མི་རིག་དཔེ་སྐྲུན་ཁང་ནས་སྤྱི་ལོ་༡༩༨༣ལོའི་ཟླ་༨པར་དཔར།
(6)ཏུན་ཧོང་ཡིག་ཚང་།
(7)རྒྱའི་ཡིག་ཚང་དུ་འཁོད་པའི་བོད་དང་འབྲེལ་བའི་ལོ་རྒྱུས། (དེབ་བཞི་པ)། ཐང་གི་ལོ་རྒྱུས་གསར་རྙིང་སོགས་སུ་འཁོད་ པའི་བོད་ཀྱི་སྐོར། འཇམ་དབྱངས་དར་རྒྱས་ཀྱི་བསྒྱུར་མཆན་བཏབ། ཤོག་ངོས༥༨ཀྲུང་གོའི་བོད་རིག་པ་དཔེ་སྐྲུན་ཁང་ནས་སྤྱི་ ལོ་༢༠༡༥ལོའི་ཟླ་༥པར་དཔར།
(8)ཞོལ་རྡོ་རིང་། ཕོ་བྲང་པོ་ཏཱ་ལའི་མདུན་དུ་ཡོད།
(9)མཁས་པའི་དགའ་སྟོན། དཔའ་བོ་གཙུག་ལག་ཕྲེང་བས་མཛད། (སྟོད་ཆ)ཤོག་ངོས་༡༦༧བོད་ལྗོངས་མི་དམངས་དཔེ་ སྐྲུན་ཁང་ནས་ ༢༠༡༤ལོ་དཔར།
(10)པདྨ་བཀའ་ཐང་། ཨོ་རྒྱན་གླིང་པའི་གཏེར་མ། ཤོག་ངོས་༣༡༦ཟི་ཁྲོན་མི་རིགས་དཔེ་སྐྲུན་ཁང་ནས་སྤྱི་ལོ་༢༠༠༦ལོར་ དཔར།
(11)མཆོད་སྡོང་འཛམ་གླིང་རྒྱན་གཅིག་གི་རྟེན་གཙུག་ལག་དང་བཅས་པའི་དཀར་ཆག་ཐར་གླིང་རྒྱ་མཚོར་བགྲོད་པའི་གྲུ་གཟིངས་བྱིན་རླབས་ཡིད་ཀྱི་བང་མཛོད། སྡེ་སྲིད་སངས་རྒྱས་རྒྱ་མཚོས་མཛད། ཤོག་ངོས་༢༣༩དང་༢༤༥པར། མཚོ་སྔོན་མི་ རིགས་དཔེ་སྐྲུན་ཁང་ནས་དཔར།
(12)གུང་ཐང་དཔལ་གྱི་གཙུག་ལག་ཁང་བྱུང་རབས་དང་བཅས་པའི་དཀར་ཆག་འགྲོ་མགོན་ཞལ་ལུང་། འཇོག་རི་ངག་ དབང་བསྟན་འཛིན་གྱི་མཛད། ཤོག་ངོས༤༠ཤིང་དཔར་མ།
མཛངས་ཡོན་ཤེས་ལྡན་གྱི་བོན་བློན་ཆེན་པོ་ངམ་སྟག་ར་ཀླུ་གོང་གི་དངོས་ཡོད་ལོ་རྒྱུས་རགས་ཙམ་བཀོད་པ། མཛད་པ་པོ། རབས་འབྱམས་པ་ཤེས་རབ་རྒྱ་མཚོ། དྲྭ་ལམ།
བློན་ཆེན་པོ་ངན་ལམ་སྟག་སྒྲ་ཀླུ་ཁོང་གི་རྒྱུས་ཅུང་ཟད་ཞིབ་པ། མཛད་པ་པོ། གོ་འཇོ་བསོད་སྟོབས། དྲྭ་ལམ།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།