ཡོག་ཅན་སྐམ་ཚང་སྦྲ་ཚང་གི་སྦྲ་ནག་ལན་གསུམ་མ་ལེགས་གྲུབ་ཀྱི་བཤད་པ་མདོར་བསྡུས།

[ཟླ་ཚེས། 2022-07-24 20:43:49][རྩོམ་པ་པོ། སྐམ་ཚང་མཉམ་ཉིད་བྱམས་མ།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

ཨེ་མ་ཧོ།    བསྐལ་ཆེན་སྟོན་པ་གཤེན་རབ་མི་བོ་དང་། །
སྙིགས་མའི་འདུལ་དཔོན་དྲན་པ་ཡབ་སྲས་གསུམ། །
མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན། །
སྐྱབས་གནས་དཀོན་མཆོག་གསུམ་གྱི་ཤིས་པ་རྩོལ། །
 
རྒྱལ་བའི་རྒྱལ་ཚབ་རིན་ཆེན་རྒྱལ་མཚན་དང་། །
མཁས་པའི་དབང་པོ་ཉི་མ་བསྟན་འཛིན་རྗེ། །
སོ་བརྒྱད་མཁན་པོ་ཉི་མ་རྒྱལ་མཚན་གཙོས། །
སྐམ་ཚང་བླ་བརྒྱུད་གོང་མ་ལ་ཕྱག་འཚལ། །
 
   སྟོད་མངའ་རིས་སྐོར་གསུམ། བར་དབུས་གཙང་རུ་བཞི།    སྨད་མདོ་ཁམས་སྒང་དྲུག་ལས།  ཟལ་མོའི་སྒང་བརྒྱུད།  ཆེན་པོ་ཧོར་གྱི་གདན་ས།  སྦྲ་ཆེན་སྨན་ལྗོངས་དགའ་བའི་ཡུལ་གྲུ།    ས་པད་མ་འདབས་བརྒྱད་ཀྱི་གདན་སྟེང་།  གནམ་འཁོར་ལོ་རྩིབས་བརྒྱད་ཀྱི་དབུ་གདུག་ཕུབ།   བར་དུ་དཔལ་ལྡན་ཀླུ་ཕུག་དགོན་གྱི་འདུ་སྡེ་ཆགས།    གཡུང་དྲུང་བོན་གྱི་མཛད་པ་འཕེལ་བའི་ཡུལ་གྱི་ཆ་ཤས་ལས།   ད་ལན་སྐམ་ཚང་སྦྲ་ཚང་གི་སྦྲ་ནག་ལན་གསུམ་པ་ཉམས་གསོ་ལེགས་པར་གྲུབ་པ་ལ་དགའ་སྤྲོའི་བཏང་རག་ཚུལ་དུ་བྱུང་ཁུངས་ངོ་སྤྲོད་ཕྲན་ཙམ་འབུལ་རྒྱུ།  ཐོག་མར་སྒོའམ་སྐམ་གྱི་གདུང་རབས་ལོ་རྒྱུས་མི་ལོ་སྟོང་ཕྲག་གོང་གི་ལོ་རྒྱུས་ཡོད་པའི་བླ་རབས་ཁག་རེ་རེ་བཞིན་རྒྱས་པ་ལོ་རྒྱུས་ནང་འབྱུང་བ་ཡིན་པས་འདིར་མི་ཞུ།
   སྐམ་ཚང་ཡོག་ཅན་ནང་དུ་ག་དུས་བྱུང་པ་རེད་ཟེར་ན།དུས་རབས་བཅོ་བརྒྱད་པའི་ནང་བོན་བསྟན་སྤྱི་ལ་བཀའ་དྲིན་ཆེན་བའི་སྨན་རི་མཁན་ཆེན་སྐམ་ཚང་ཉི་མ་བསྟན་འཛིན་གྱི་མཆེད་ཟླ་སྒོ་རིགས་སྔགས་འཆང་། ཞང་སྐད་དུ་ཁྲོ་ཏ་ཝེར་ཞི་འམ་སྒོ་རྒྱལ་ཁྲོ་རྒྱལ་བཀྲ་ཤིས་ལ་སྲས་གཅིག་ཡོད་པ་བསྟན་འཛིན་གཙུག་ཕུད་ཀྱི་དུས་མ་མཆོག་སྲིད་པ་རྒྱལ་མོའི་ལུང་བསྟན་ལྟར་སྟོད་ཕྱོགས་ཧོར་གྱི་ཡུལ་དུ་འགྲོ་དོན་ཕེབས་པར་དགོངས་ནས་ཧོར་གྱི་རྒྱལ་པོའི་མངའ་ཁོངས་ཆགས་བཏབས་ནས་ས་ཆ་ཡོག་ཆེན་ཞེས་པར་སྐམ་ཚང་སྦྲ་ཚང་ཞེས་པའི་ལོ་རྒྱུས་དེ་ནས་བྱུང་། ད་བར་མི་ལོ་༢༠༠ལྷག་ཙམ་གྱི་ལོ་རྒྱུས་ལྡན་ཡོད།  སྐམ་ཚང་སྦྲ་ཚང་གནས་འདིར་ཆགས་བཏབས་ནས་ས་ཆ་འདིར།  ཧོར་རྒྱལ་པའི་དབུ་བླ་བོན་དགོན་སོ་བརྒྱད་ཀྱི་མཁན་པོ་སྐམ་ཉི་མ་རྒྱལ་མཚན་ས་ཆ་འདིར་སྐུ་འཁྲུངས་པ་མ་ཟད་སྐམ་ཚང་སྦ་སྤྲུལ་སྐལ་བཟང་ཉི་མ།  སྐམ་ཚང་གཤེན་སྤྲུལ་ཐུགས་རྗེ་ཉི་མ། ཧོར་སྲས་གཡུང་དྲུང་རྒྱལ་བ་སོགས་སྐྱེས་ཆེན་དུ་མ་ཞིག་ས་ཆ་འདིར་སྐུ་འཁྲུངས་གཞིས་གལ་ཆེན་ཞིག་ཏུ་གྱུར།  ལོ་རྒྱུས་རིམ་བྱུང་ནང་སྐམ་ཚང་སྦྲ་ཚང་གི་སྦྲ་ནག་ལན་གསུམ་མ་ཞེས་པའི་སྦྲ་ཞིག་ཡོད་པ་དེ་ནི་སྐམ་ཚང་བསྟན་འཛིན་གཙུག་ཕུད་ཀྱི་དུས་ནས་བྱུང་པ་ཞིག་ཡིན་ལ།

སྐམ་ཚང་སྦྲ་ཚང་གི་ནང་རྟེན་མཆོད་རྟེན་ཆ་བརྒྱད།

   སྐབས་དེ་དུས་སྦྲ་ནག་ལན་གསུམ་མ་ཞེས་སྐམ་ཚང་གི་དབྱར་རྒུན་མེད་པ་ཕུབ་ནས་སྒོ་ཤིང་སྒོ་ཅན་ཞིག་ཡོད་པ་དང་།  སྒྲུབ་ཁང་དང་སྔགས་རྒྱུན་དེར་བཞུགས་ཡོད་པ་དང་།  སྐམ་ལུགས་ཞེས་པ་འདོན་སྟངས་སྲོལ་དེ་ནས་དར།  སྦྲ་དེའི་ནང་།  རྩ་གསུམ་དང་སྲིད་རྒྱལ་དྲེལ་དམར་བཙན་རྒོད་སོགས་ནམ་ཟླ་དུས་བཞི་ལ་ཚོགས་བརྒྱ་རེ་ཆད་མེད་བྱེད་སྲོལ་ཡོད་འདུག   ད་དུང་འདོན་ཚོགས་སྐོར། གེ་ཁོད་དགུ་གཏོར་ཆེན་མོ། འབུམ། ཁམས་ཆེན།  སོགས་མང་པོ་སྦྲ་དེའི་ནང་འདོན་སྲོལ་ཡོད།  སྟོན་ཁ་དང་དབྱར་ཁ་ཟླ་བ་གཅིག་གཉིས་ཙམ་ཡོག་ཆེན་ས་གནས་སུ།  བོན་ཞུ་མཁན་དང་།  བསྙེན་གནས་བསྙུང་གནས་འདུག་མཁན།  དཔེ་ཁྲིད་ཞུ་མི་བརྒྱ་ཕྲག་ཁ་ཤས་ལོ་ལྟར་འཚོགས་སྲོལ་ཡོད་པའི་སྦྲ་ནག་ལན་གསུམ་པ་ཞེས་པ་ལོ་རྒྱུས་ཐོག་དེ་ལྟར་བྱུང་བ་ལྟར་གནའ་བོའི་སྦྲ་དེ་ཉིད་ཀྱི་ཤིང་སྒོ་ད་ལྟ་དངོས་སུ་བཞུགས།    སྦྲ་ནག་ལེན་གསུམ་མ་ནི་སྲོལ་རྒྱུན་ལོ་རྒྱུས་ཡུན་རིང་ལྡན་པའི་སྦྲ་ཞིག་ཡིན་ལ་མི་ལོ་༢༠༠ཙམ་གྱི་ལོ་རྒྱུས་ཡོད། 
   དུས་རབས་གསར་པའི་ནང་ཀྲུང་གོ་གུང་ཁྲན་ཏང་གི་ཡང་དག་པའི་དབུ་ཁྲིད་འོག།  དགའ་སྐྱིད་བོན་གསུམ་འཛོམས་པའི་དུས་འདིར། རླབས་ཆེན་ཞི་ཅིན་ཕིང་གི་གཙོ་འཛིན་གནང་བའི་འོག་ལ་རྒྱལ་ཡོངས་དང་བོད་ལྗོངས་ཡོངས་ལ་ཀྲུང་ཧྭ་མི་རིགས་ཀྱི་སྲོལ་རྒྱུན་རིགས་གནས་དར་སྤེལ་གཏོང་དགོས་ཞེས་པའི་བཀའ་སློབ་ལ་གཞི་འཛིན་ནས།ཡོག་ཆེན་སྐམ་ཚང་ཉེ་འབྲེལ་རྣམས་ཀྱི་མ་གྲོས་བསམ་པ་གཅིག་མཐུན་གྱི་སྔར་གྱི་སྦྲ་ནག་ལན་གསུམ་པ་ཉམས་གསོ་བྱེད་རྒྱུའི་རེ་འདུན་བཞིན་ཚང་མའི་ཚར་བ་གྲུ་འདེགས་ཀྱི་འབད་བརྩོན་འོག་ད་ལན་དངོས་སུ་སྤྱི་ལོ་༢༠༢༢ལོར་དབྱར་གྱི་དཔལ་ཡོན་རབ་ཏུ་བཞད་པའི་དུས་འདིར།སྐམ་ཚང་སྦྲ་ནག་ལན་གསུམ་མ་དངོས་སུ་ཉམས་གསོ་ལེགས་གྲུབ་བྱུང་བར་བཀྲ་ཤིས་རྟེན་འབྲེལ་ཞུ།

ཧོར་སྦྲ་ཆེན་སྐམ་ཚང་སྦ་ཚང་བླ་མ་གཡུང་དྲུང་རྒྱལ་མཚན་དང་ཁྱུང་བཟའ་ལྷ་དཔལ་རྣམ་གཉིས།

ལོ་རྒྱུས་ལྡན་པའི་སྐམ་ཚང་སྦྲ་ནག་ལན་གསུམ་མ་ཉམས་གསོའི་སྟོན་མོ།

   མ་ཚད་སྦྲ་ནག་ལན་གསུམ་མ་ཉམས་གསོ་བྱེད་མཁན་གྱི་མགོ་འཛིན།  སྐམ་ཚང་ཚ་བོ་གཡུང་དྲུང་བཀྲ་ཤིས།  ནོར་རྒྱལ་བསོད་བཀྲ།  ནོར་བུ་བཅས་ཀྱི་གཙོ་འགན་བཞེས་ནས་སྦྲ་ནག་ལན་གསུམ་མ་ཉམས་གསོ་བྱེད་མཁན་གྱི་སྐམ་ཚང་ཚ་བོ་ཚ་མོ་དང་ཡོག་ཆེན་གྲོང་ཚོ་དང་པོའི་ཡུལ་སྡེ་ཡོངས་ལ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་བཀའ་དྲིན་མཚོན་བྱེད་ཀྱི་དྲན་རྟེན་སོ་བརྒྱད་མཁན་པོ་ཉི་རྒྱལ་མཚན་སྐུ་པར་དང་མགུལ་དར་རེ་འབུལ་རྒྱུ་ཡོད།   
   དེ་རིང་དངོས་སུ་གདན་འདྲེན་ཞུས་པ་ཧོར་སྤྱི་ཁྱབ་ཚང་གི་སྲས་པོ་སྐམ་ཚང་ཚ་བོ་ཚེ་དབང་དབང་འདུས་མཆོག་ལ་ཐོག་མར་དྲན་རྟེན་ཕྱགས་རྟགས་འབུལ་རྒྱུ། གཉིས་པ་སྐམ་ཚང་གཡུང་དྲུང་ཉི་མ་མཆོག་ལ་དྲན་རྟེན་ཕྱག་རྟགས་ཕུལ།   གསུམ་པ་ཁྱུང་པོ་བླ་མ་ཡེ་གྲོལ་མཆོག་ལ་དྲན་རྟེན་ཕྱག་རྟགས་ཕུལ། བཞི་པ་སྐམ་ཚང་ཚ་བོ་དགེ་བཤེས་ཚུལ་ཁྲིམས་དབང་རྒྱལ་མཆོག་ལ་ཕྱག་རྟགས་ཕུལ། ལྔ་པ་སྨན་པ་དར་བཟང་མཆོག་ལ་ཕྱག་རྟགས་ཕུལ།  དྲུག་པ་སྦྲ་མཁན་ལག་རྩལ་མཁས་ཅན་དཀར་ལྡིས་མཆོག་ལ་ཕྱག་རྟགས་ཕུལ། དེ་རྗེས་ཚ་བོ་ཚ་མོ་རྣམས་ལ་སྦྱིན་བདག་ཆེ་ཆུང་བཞིན་དྲན་རྟན་ཕྱག་རྟགས་ཕུལ།  དེ་རྗེས་སྦྲ་ནག་ཉམས་གསོ་སྐབས་ཀྱི་ལས་ཀ་བྱེད་མཁན་དང་སྦྲ་རེ་དང་རྔ་མ་ཕུལ་མཁན་སོགས་སྐུ་མགྲོན་རྣམས་ལ་ཕྱག་རྟགས་ཕུལ།
 

སྦྲ་ནག་ལན་གསུམ་མ་ཉམས་གསོའི་སྦྱིན་བདག་སྐམ་ཚང་ཚ་བོ་ཚ་མོ་རྣམ་པའི་དྲན་རྟེན།

   མཇུག་ཏུ།  གསེར་འོད་ནོར་བུ་འོད་འབར་ལས་གསུང་པ་ལྟར།  ཀླུ་རིགས་ལོངས་སྤྱོད་ཕུན་སུམ་ཚོགས།  ཀླུ་རྣམས་གཡུང་དྲུང་ཀློང་དུ་གྱུར། དེ་བཞིན་སྒྲུབ་གཤེན་ཡོན་བདག་གིས། བཙན་ཕྱུག་འཕན་དར་ཕྱ་གཡང་སྐྱབས།  བཀྲ་ཤིས་བཙན་ཕྱུག་འཛོམ་པར་ཤོག  འཛོམ་པ་ལྷ་ཡི་ནོར་གཡང་ཤོག  སྤུ་རྒྱལ་བོད་ཀྱི་ཚེ་གཡང་ཤོག  ཨ་བོ་ཧོར་གྱི་བཙན་གཡང་ཤོག སྨུག་པོ་གདོང་གི་རྒྱལ་གཡང་ཤོག  སེ་ཁྱུང་དབྲ་ཡི་བཟང་གཡང་ཤོག ཨ་ལྕགས་འགྲུ་ཡི་དཔའ་གཡང་ཤོག  དམུ་ཚ་སྒ་ཡི་འབྱོར་གཡང་ཤོག  ལྡ་ལྡིང་སྒོ་ཡི་རྒྱལ་གཡང་ཤོག དབལ་ཟླ་གཉིས་ཀྱི་ནོར་གཡང་ཤོག  ཤར་དུ་ཕྱ་ཁུག་གཡང་བླན་ནོ། ཕྱྭ་གཡང་མི་འཆུག་བརྟན་གྱུར་གཅིག    བྱང་དུ་ཕྱ་ཁུག་གཡང་བླན་ནོ། ཕྱྭ་གཡང་མི་འཆུག་བརྟན་གྱུར་གཅིག ནུབ་ཏུ་ཕྱ་ཁུག་གཡང་བླན་ནོ། ཕྱྭ་གཡང་མི་འཆུག་བརྟན་གྱུར་གཅིག ལྷོ་རུ་ཕྱ་ཁུག་གཡང་བླན་ནོ། ཕྱྭ་གཡང་མི་འཆུག་བརྟན་གྱུར་གཅིག ལྷ་ཀླུ་མི་གསུམ་རབ་ཏུ་དགྱེས་པར་ཤོག         ཐུགས་རྗེ་ཆེ།  
 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།