སོག་ལྕགས་ཟམ་གཡུང་དྲུང་གླིང་དགོན་སྐོར་གླེང་བ།

      དབང་ལྡན་ཞི་ཡི་གདན་ས་བར་མ་རུ་གྲགས་པའི་ལྕགས་ཟམ་གཡུང་དྲུང་གླིང་དགོན་དེ་ཉིད་ཐོག་མར་བླ་དཔོན་དམ་པ་སུ་ཞིག་གིས་དུས་རབས་གང་ཞིག་གི་ནང་ཕྱག་བཏབ་ཡོད་མེད་ཞིབ་གསལ་ཞུ་མི་ཤེས་ཀྱང་<<ནག་ཆུའི་ལོ་རྒྱུས་རིག་དེབ་ནང་>>ལས། “ཁྱུང་ནག་ཀླུ་རྒྱལ་”ཟེར་བ་ཞིག་གིས། “སོག་གཡུང་དྲུང་གླིང་དགོན་ཕྱག་བཏབ་”ཅེས་གསལ་བ་ལས་ཞིབ་ཕྲའི་ཁྱུང་ནག་ཀླུ་རྒྱལ་ཞེས་པའི་ལོ་རྒྱུས་ཁ་གསལ་ཅན་ཞིག་ད་ང་བར་དུ་མ་མཐོང་ཡང་<<ཁྱུང་རབས་ལོ་རྒྱུས་གསེར་གྱི་མེ་ལོང་>>ནང་དུ་དུས་རབས་བདུན་པའི་ནང་སྐོར་ཙམ་ལ་བྱུང་བའི་“ཁྱུང་པོ་གྱེར་ཆེན་ཟླ་མེད་”དང་“ར་སངས་ཁྲེ་ནེ་ཁོད་”གཉིས་ཀྱི་སྲས་རྒྱུད་“ཚེ་དཔུང་ཟླ་བ་རྒྱལ་མཚན་”མདུས་ནས་རྫོག་ཆེན་སྙན་རྒྱུད་ཞུས་པའི་ཁྱུང་པོ་ར་སངས་“ཀླུ་རྒྱལ་”ཞེས་པ་ཞིག་གསལ་འདུག་པས་དེ་ཉིད་ཡིན་མིན་དཔྱད་གཞི་ཙམ་བཏོན་བ་ལས་མཐའ་གཅིག་ཏུ་མ་ངེས། མདོར་ན་<<ནག་ཆུའི་ལོ་རྒྱུས་རིག་དེབ་>>བཞེད་དགོངས་ལྟར་བཀོད་ན། ཁྱུང་པོའི་གདུང་ལས་འཁྲུངས་པའི་ཀླུ་རྒྱལ་དེ་ཉིད་“སྲས་མུ་ལ་ཏི་རོ། དེའི་སྲས་ཁོད་རྩལ་ཧུར་མིན། དེའི་སྲས་ཟླ་རི་ཨ་ཀག། དེའི་སྲས་གུ་ར་ཏ་ཀྲ། དེའི་སྲས་ལྷུན་འགྲུབ་འཕྲིན་ལས། (ལྷུན་འགྲུབ་འཕྲིན་ལས་ཀྱིས་གཟུ་བོན་དགོན་ཞེས་པ་ཕྱག་བཏབ་ཅེས། ) དེའི་སྲས་མུ་རི་ཧ་ར། དེའི་སྲས་ཁྱུང་དཔོན་དགེ་དང་དཔོན་དབུས་གཉིས་”ཟེར་བ་དང་། ཡང་ཁྱུང་རབས་གཞན་སོགས་ལས་ཁྱུང་པོ་སྟོང་ཐར་གྱི་སྲས་ལ་དཔོན་དགེ་དཔོན་དབུས་ཟེར་བ་བཞེད་ཚུལ་གཉིས་ཡོད། གོང་གསལ་ཁྱུང་པོའི་བླ་རབས་རྣམས་ཀྱིས་རིམ་བཞིན་གདན་ས་བསྐྱངས་བའི། དགོན་དེ་ཉིད་དུས་རབས་བཅུ་གཉིས་པའི་ནང་དར་རྒྱས་ཆེ་བའི་སྐབས་གྲྭ་ཚང་གླིང་བཞི་དང་། འདུས་གྲྭ་སྟོང་ཕྲག་གཉིས་ལྷག་ཙམ་ཡོད་ལུག་དང་ཚོགས་གདུང་ཡང་གླིང་བཞིར་གཏོང་དགོས་པར་གྲགས་ཀྱང་དུས་རབས་འགྱུར་ལྡོག་གི་ཁྲོད་དུ་དགོན་འདི་རེ་ཞིག་དར་བ་དང་རེ་ཞིག་རྒུད་པ་སོགས་ཅི་རིགས་ཤིག་བྱུང་ཡོད། དེ་ཡང་དར་རྒུན་བྱུང་རྐྱེན་སོག་དམག་གིས་བརླག་པར་བྱུང་རབས་གཤོད་སྲོལ་དེར་སོག་དམག་བོད་ལ་གནོད་འཚེ་ཚབས་ཆེན་ཐེངས་གསུམ་བྱུང་མྱོང་ནའང་དགོན་འདིར་རྩ་བརླག་གཏོང་མཁན་སོག་དམག་སུ་ཡིན་མིན་སོགས་ལ་དགོངས་བཞེད་མི་མཐུན་པ་འགའ་ཞིག་ཡོད་པ་སྟེ། ལ་ལས་སོག་པོ་དོར་རྟ་ནག་པོས་གཏོར་ཚུལ་དང་། ལ་ལས་སོག་པོ་གུ་ཤྲི་བསྟན་འཛིན་ཆོས་རྒྱལ་གྱིས་གཏོར་ཞེས་པ་དང་། ལ་ལས་ཇུན་གར་དམག་གིས་གཏོར་ཟེར་བ་སོགས་ཅུང་མི་མཐུན་ལ། དེ་དག་གི་བར་ལོ་རབས་དུ་མའི་ཁྱད་པར་ཆེ་བས་གནད་དོན་དེ་སོགས་ལ་ལོ་རྒྱུས་མང་པོ་ཞིག་ལ་འབྲེལ་བ་ངེས་ཅན་ཡོད་པའི་ཆ་ནས་དཔྱད་པ་ནན་པོ་ཞིག་དགོས་པ་གལ་ཆེ། ལར་ལོ་རྒྱུས་ཐོག་སོག་པོའི་དམག་གིས་བོད་ལ་གཏོར་བཅམ་འཕྲོག་གསུམ་དང་། བསད་རྨས་བསྲེགས་གསུམ་གྱི་བྱ་ངན་ཐེངས་མང་སྤེལ་ཡོད་ཀྱང་། གཙོ་བོའི་དམག་ཤུགས་ཆེ་ཤོས་ཐེངས་གསུམ་ཙམ་སྤེལ་ཡོད་པ་གོང་སྨྲ་གསུམ་དེ་ཡིན་པ་རེད། དེར་བརྟེན་ཁོ་བོས་དགོན་དེ་ཉིད་སོག་པོས་ཐེངས་གཉིས་གཏོར་བར་ངོས་འཛིན་གྱི་ཡོད་ལ་དང་པོ་ནི་དཔལ་ཚུལ་བསྟན་འབྱུང་ནང་འཁོད་“ཁྱུང་དཔོན་དགེ་”དང་“དཔོན་དབུས་”རྣམ་གཉིས་སོག་གཡུང་དྲུང་གླིང་གི་བསྟན་བདག་གནང་བའི་བཞེས་མཐུན་ལྟར་གྱི་དུས་སྐབས་ཧོར་གོ་གདན་རྒྱལ་པོའི་དམག་དཔོན་དོར་རྟ་ནག་པོའི་དམག་དཔུང་བོད་དུ་ལྷག་པའི་དུས་སྐབས་ཆགས་འཇིག་ཐེངས་གཅིག་སོང་བའི་རྒྱུ་མཚན་ཆེ་བར་མཐོང་། གང་ཡིན་ཞེས་ན་རྒྱ་བོད་དེབ་ཐེར་ཁག་དང་ལྷག་པར་དུ་སྤྱི་ལོ་༡༨༤༨ལོར་དབང་ཆེན་སྐྱབས་ཀྱིས་བརྩམ་པའི་<<དེབ་ཐེར་མེས་པོའི་ཞལ་ལུང་>>ཞེས་པའི་ནང་ཧོར་དམག་གིས་“སྤྱི་ལོ་༡༢༣༤ལོར་ཅིན་”དམག་ཕམ་པར་བཟོས་ཏེ་“རྒྱལ་ཡོངས་ཀྱི་བྱང་རྒྱུད་གཅིག་བསྡུས་བྱས།” ཞེས་དང་།  དེའི་རྗེས་ཙམ་“བོད་ཡུལ་གྱི་ཁྲལ་འཇལ་ལ་ངོ་རྒོལ་བྱེད་པའི་གྱེན་ལྡོག་ཕྲན་བུ་བྱུང་བར་བརྟེན། སྤྱི་ལོ་༡༢༤༠ལོར། གོ་ཏན་རྒྱལ་པོས་(དམག་)དཔོན་ཧོར་ཏོར་རྟ་ནག་པོ་དང་། ཅོ་དར་མ། རྒྱལ་སྨན་རྣམས་ཀྱི་རྗེས་ལ་རྟ་དམག་བཅས་བོད་དུ་བཏང་། མདོ་སྟོད་སྨད་དང་། སོག་ཆུ་ཁ་སོགས་ལ་དམག་བརྒྱབ་པས། དེ་སྐབས་སོག་ཆུ་ཁར་དམག་སྒར་རུ་བའི་གཞིས་བཟུང་ཕྱིར་ཕྱིས་སུ་ཡུན་རིང་བསྡད་པའི་སོག་སྡེ་བྱུང་། བོད་དམག་ཧ་ཅང་མང་པོ་བསད་” ཅེས་པ་དང་། ཡང་ <<གཅུང་རབས་འབེལ་གཏམ་>>ཞེས་པའི་ནང་གསལ་“རབ་བྱུང་གསུམ་པའི་ལྕགས་བྱི་༡༢༤༠ལོར་ཧོར་གོ་དན་རྒྱལ་པོའི་དམག་དཔུང་ཁྲི་གསུམ། དམག་དཔོན་དོར་རྟ་ནག་པོ་ཞེས་པས་མཐོང་ཚད་བསད་པས་གོ་ཚད་སྐྲག།   སྡིག་ལ་རྔམ་པོ་ཆེ་བྱེད་པའི་མི་བསྲུན་པ་དེ་དང་ལི་བྱི་ཏ་སོགས་སྔ་རྗེས་སུ་བཏང་སྟེ། ཧོར་དམག་གིས་བོད་ཀྱི་ས་མཚམས་ནས་འགོ་བཟུང་། འཐབ་པ་རྣམས་བསད། བྲོས་པ་རྣམས་དེད། ལུས་པ་རྣམས་མངའ་འོག་བསྡུས་ནས་སྡུག་གྱོང་མནར་གཅོད་ཚད་མེད་ཀྱི་ངང་ནས། མདོ་སྟོད་ (ཁྱུང་)དཔོན་དབུས་སོགས་བོད་མི་འཐབ་པ་རྣམས་བསད། ཁྱུང་དབུས་ཤེས་རབ་རྒྱལ་མཚན་སོགས་བྲོས་པ་རྣམས་དེད། ཁྱུང་ཨ་བླ་ནང་ཆེན་གྲགས་པ་རྣམས་བྲན་དུ་བཀོལ་ནས། ཁྱུང་པོའི་སྐུ་མཁར་ལྷ་རྩེ་རྫོང་དུ་ཨོ་ལོད་ཐཱ་ཇི་སོགས་ས་སྲུང་དམག་གཏན་སྡོད་བྱས་ནས། དཀར་ཤོད་དམ་གཅུང་པ་རུ་གཟུ་རྫོང་མདོའི་རྫོང་དང་། གཟུ་རླངས་མདོའི་ལྷ་ཁང་། ལྕང་མདོའི་ལྷ་ཁང་། པུ་ལེ་(སྤུ་ལ་)ཁའི་ལྷ་ཁང་སོགས་བོན་དགོན་དང་། རྙིང་མ་བའི་དགོན་སོགས་མེར་བསྲེགས་ནས་དབུས་སུ་དམག་དཔུང་བཏེགས་ཏེ། རྭ་སྒྲེང་དུ་སེར་མོ་ལྔ་བརྒྱ་བསད། རྒྱལ་ལྷ་ཁང་གི་གླིང་ལོག་ཀྱང་དེ་དུས་བྱུང་སྟེ། སོག་སྟོང་སོགས་སྐྱ་སེར་ལྔ་བརྒྱ་བཀུམས་ནས། ཤར་དཀོན་པོ་ནས། ནུབ་བལ་པོ། ལྷོ་མོན་ཚུན་ཆོད་དུ་བཙན་མཁར་སུམ་ཅུ་སོ་དགུ་གཏོར་ནས་བྲན་དུ་བཀོལ་” ཞེས་བརྗོད་པ་ལྟར་ཧོར་གོ་དན་རྒྱལ་པོའི་དམག་དཔོན་དོར་རྟ་ནག་པོས་སྣེ་ཁྲིད་པའི་སོག་དམག་བོད་དུ་གཅོད་སྐབས། འདི་ཁུལ་ཁྱུང་དཔོན་དབུས་དང་ཁྱུང་དབུས་ཤེས་རབ་རྒྱལ་མཚན། ཁྱུང་ཨ་བླ་ནང་ཆེན་གྲགས་པ། ཁྱུང་པོའི་སྐུ་མཁར་ལྷ་རྩེ་རྫོང་དུ་ཨོ་ལོད་ཐཱ་ཇི་སོགས་ས་སྲུང་དམག་གཏན་སྡོད་བྱས་ནས་བོད་མི་རྣམས་བསད་དེད་དང་བྲན་བཀོལ་མཁར་རྫོང་བདག་གཟུང་བྱས་པ་སོགས་གསལ་བ་དང་། ཡང་ཧོར་གྱི་རྒྱལ་རབས་ཡིག་ཆ་ལས་ཐོར་པ་སྐྱ་བདུན་ཞེས་རྟ་པ་བདུན་བྱུང་ནས་ཡུལ་འདིར་གཞིས་ཆགས་ཞེས་བཤད་སྲོལ་གཉིས་སུ་བྱུང་བས་ཤེས་ལྡན་དག་གིས་དཔྱད་པར་བྱོས། མདོར་ན་ཧོར་དམག་འདི་ཁུལ་བྱུང་བའི་རྒྱུ་རྐྱེན་ནི་<<ཁྱུང་རབས་སོགས་>>ལས་སྔོན་ཚེ་ཞང་ཞུང་སྟོང་རྒྱུང་མཐུ་ཆེན་གནམ་མཚོའི་དོ་གླིང་དུ་སྒྲུབ་པ་བཞུགས་སྐབས་མཚོ་ལ་གནས་པའི་ཀླུ་བདུད་ཕྲག་དོག་སྐྱེས་ཏེ་མཚོ་འཚུར་བ་དང་མཚོ་ཐོག་ཏུ་བུད་པ་སོགས་ཆོ་འཕྲུལ་བསྟན་པ་དང་། དེ་ཚེ་སྟོང་རྒྱུང་གིས་ཕུར་པ་བཏབ་ནས་བསྒྲལ་བའི་འཆི་ཁ་ལ་ངས་ཁྱོད་སྲོག་ལན་ཐེངས་གསུམ་རྙོགས་ཟེར་ནས་དམོད་ངན་བོས་ནས་ཤི། དེའི་རྒྱུ་འབྲས་དང་འབྲེལ་བར། སྟོང་རྒྱུང་ཀླུ་སྲིན་བསྒྲལ་བའི་རྣམ་ཤེས་སོག་པོའི་མི་ཆེན་དོར་རྟ་དང་ཡེ་དོར་གཉིས་སུ་སྐྱེས། ཁྱུང་དཔོན་དགེ་དང་དཔོན་དབུས་གཉིས་སྟོང་རྒྱུང་གི་སྤྲུལ་པ་དང་། ཀླུ་བདུད་ཀྱིས་རྣམ་ཤེས་ནི་ཧོར་གྱི་མི་ཆེན་དོར་རྟ་དང་ཡེ་དོར་གཉིས་སུ་སྐྱེས་ཞེས་གསལ་བ་མ་ཚད་“སྟོང་རྒྱུང་རྒྱ་གར་ཡུལ་དུ་འདས། སྤྲུལ་པ་བོད་ཡུལ་སྐུ་གཉིས་འཁྲུངས་”པ་དང་“ཁྱུང་དཔོན་དགེ་དང་དཔོན་དབུས་གཉིས་ཡིན་”ཞེས་པ་དང་། ཡང་<<དབྱར་གྱི་ལྡེ་མིག་འབྲིང་པོ་>>ལས། “ཁྱུང་པོ་དགེ་བའི་མཚན་ཅན་འབྱུང་། སྟོང་རྒྱུང་མཐུ་ཆེན་སྤྲུལ་པ་ཡིན་”ཞེས་དང་། ཡང་<<སྲིད་པ་རྒྱུད་ཀྱི་ཁ་བྱང་>>ལས་“ངའི་མཆོག་གི་སྤྲུལ་པ་ལས། ཁྱུང་པོ་དཔོན་དགེ་བྱ་བ་འབྱུང་། བསྐྱེད་རྫོགས་ས་ལམ་དོན་རྟོགས་ཅིང་། གྲུབ་རྟགས་དུ་རུ་ཁ་ལ་སྟོན་”ཞེས་སོགས་གསལ་བའི་སྟོང་རྒྱུང་སྤྲུལ་པ་ཁྱུང་དཔོན་དགེ་དང་དཔོན་དབུས་གཉིས་ཡིན་པ་དང་ཀླུ་སྲིན་རྣམ་ཤེས་དོར་རྟ་དང་ཡེ་དོར་གཉིས་སོགས་སྐྱེས་བ་བླངས་པ་གསལ་ཞིང་ཀླུ་བདུད་བསྒྲལ་བའི་འཆི་ཁ་དམོད་ངན་སྲོག་ལན་ཐེངས་གསུམ་རྙོགས་ཞེས་བོས་པའི་རྒྱུ་འབྲས་དང་འབྲེལ། འཕྲལ་རྐྱེན་ནི་<<ཁྱུང་རབས་གསེར་སྒམ་མ་>>ལས། ཁྱུང་ཨ་བླ་རབས་བྱུང་བཞི་པའི་“མེ་གླང་༡༢༡༧ལོར་སྐུ་འཁྲུངས་པའི་དགུང་ལོ་དྲུག་ཐོག་ཧོར་གོ་ལྡན་རྒྱལ་པོའི་དམག་དཔོན་དོར་རྟ་དང་ཡེ་དོར་གཉིས་ཀྱིས་སྣེ་ཕྲིད་པའི་དམག་དཔུང་བོད་དུ་གཅོད་སྐབས། ཁྱུང་པོས་སྔོན་དུས་མདོ་སྨད་ནས་ཡར་ཁྲིད་པའི་མི་སྡེ་ཁྲོམ་ཚང་ཤོག་ཁའི་ཨ་རྡི་བྱ་བས་ཁྱུང་པོའི་ཁྱི་བརྡུང་། ཁྱུང་པོའི་གྲྭ་པས་སྤྲང་པོ་བརྡུང་བས་ཕྱིས་སྤྲང་པོ་ཁོས་སོག་པོའི་གསེར་ཡིག་དང་དངུལ་བྲེ། ཁྱི་བཅས་བརྐུས་ནས་ཁྱུང་པོའི་རྟ་རེའི་ནང་དུ་སྦས།  ཁོ་རང་ལོགས་སུ་བྲོས་ནས་སོག་པོ་ལ་གསེར་ཡིག་སོགས་ཁྱུང་པོའི་བརྐུས་འདུག་ཅེས་བཤད་པས། སོག་པོས་སྔོན་ནས་ལས་འབྲེལ་ཡོད་པ་མ་ཚད་དེའི་གོང་དུ་སོག་པོས་ཁྱུང་པོའི་མངའ་ཁུལ་གྱི་ཞིང་འབྲོག་ཐོན་རྫས་རྟ་ནོར་མི་རྒྱུ་སོགས་ལ་ཁྲལ་འུ་ལག་ཤུགས་ཆེན་བཀོལ་བ། ཁ་ཤས་མ་འབྱོར་བས་ཁོང་ཁྲོ་ལངས་ནས་ཁྱུང་པོའི་མངའ་ཐང་ཆེན་པོ་ཡོད་པ་དེ་རྩ་མེད་བཟོ་འདོད་སྔར་ནས་ངན་སེམས་ཡོད་པས་དེ་ལ་བསྙད་ནས་སོག་པོའི་དམག་གིས་ཁྱུང་པོའི་མཐའ་བསྐོར་བས། ཁྱུང་པོས་ཞི་ཐབས་ཀྱི་གྲོས་དང་ཞུ་བ་བཤགས་པ་ལ་སོགས་བྱས་ཀྱང་གང་ལའང་ངོ་མ་བལྟས། དེ་ནས་ཁྱུང་རབས་<<གསེར་སྒམ་མ་>>དང་<<ཁྱུང་པོ་རྒོད་ཚང་པའི་གདུང་རབས་>>གཉིས་མཐུན་པར་“ཧོར་དམག་རྣམས་ཀྱིས་ཁྱུང་དཔོན་དབུས་དང་དཔོན་དགེ་གཉིས་དབུས་ཀྱི་བྱི་ལུང་མདའ་ནས་བཟུང་ཞིང་བྱང་རིལ་དུ་སྐུ་བགྲང་”(ཞེས་བརྗོད་པའི་ས་ཆ་ངོས་འཛིན་དཔྱད་ཁུལ་བྱས་པ་ནི་“དབུས་ཀྱི་བྱེ་ལུང་”ཞེས་པ་ནི་ཁྱུང་པོ་བསོད་འབར་ཉམས་ལེན་བཞུགས་གནས་རྒོད་ཚང་ཞེས་པའི་དེང་དྲུག་ཅུ་ཚོ་པའི་སར་བྱེ་ལུང་ཞེས་བརྗོད་པའི་ལུང་ཁ་ཤར་དུ་བཏད་པའི་ཡོངས་ཤིང་རྒྱ་ཆེ་བའི་ས་ཆ་དེར་མཚེར་རྒན་དོན་ལ་ཏིག། ཐལ་རྒན་དགུང་ལ་འཚུལ་ཞེས་པའི་དཔེ་ལྟར་ཡོད་འདུག་པས་དེར་ཡིན་པ་རེད། “མདའ་”ཞེས་པའི་ས་ཆ་དེ་ནི་གོང་གི་བྱེ་ལུང་ལུང་པའི་ལུང་མདོ་དང་ཆུ་མདོ་ནས་རིམ་པར་རྒྱུད་པའི་མདོ་འམ་མདའ་ལ་སོག་གཡུང་དྲུང་གླིང་ཆགས་པའི་ས་ཆ་གཡས་གཡོན་དུ་བླ་མ་ཁྱུང་དབུས་རྣམ་གཉིས་འཛིན་བཟུང་བྱས་ཡོད་པ་རེད། “བྱང་རི་”ཞེས་པའི་ས་ཆ་ནི་གཡུང་དྲུང་གླིང་དགོན་ནས་ཡིས་གཞུང་དུ་འགྲོ་བའི་ལམ་བར་“བྱང་རི་འགུལ་”ཞེས་བརྗོད་པའི་ས་དེར་ཡིན་པར་སྙམ། (ས་ཆ་དེ་ནི་གུས་པས་དེ་སྔོན་ཧེ་མ་ལ་ཡིས་དྲྭ་རྒྱ་ནང་ལ་གཡུང་དྲུང་གླིང་གི་ལོ་རྒྱུས་ཞིག་བླུག་པས་དེ་ཡང་ཅུང་ནོར་བ་འདྲ།) སྐབས་དེར་ཧོར་དམག་རྣམས་ཀྱིས་དཔོན་དབུས་སྐེ་མཚོན་གྱིས་བཅད་ཀྱང་མ་ཆོད་ཅིང་། དཔོན་དགེ་ཁོང་གིས་ཕྱག་གཡས་ཀྱི་སྲིན་མཛུག་ལ་ཚེམས་སོ་རྒྱབ་ནས་རྨར་གཏོང་སྟེ་ཁྲག་ནམ་མཁའ་ལ་མཆོད་ནས་གཡུང་དྲུང་བོན་གྱི་བསྟན་པ་སྣུབས་མིའི་ཐོག། སྲིད་པ་རྒྱལ་མོས་ར་མདའ་ཟློག་ཅེས་གསུངས་ནས་བླ་མ་དེ་གཉིས་ཐུགས་ཞི་བ་དང་དྲག་པོའི་ཚུལ་དུ་ཡོད་པ་ལས། དཔོན་དབུས་ཀྱིས་དེ་རིང་ཐུགས་བསྐྱེད་མ་ལོག་ཐུགས་ཞི་བར་མཛོད། འདི་སྔོན་གྱི་སྲོག་གི་ལན་ཆགས་ཡིན་པས་དགོངས་པ་གློད་ནས་ལུས་སྦྱིན་པ་ཐོན་གསུངས་ནས་དབུ་ཞྭ་གཉིས་ཕྱག་གིས་ཕུད་ནས་ཐང་ལ་བཞག། དགོངས་པ་གློད་པས་དབུ་ཆད་དོ།། དེ་ནས་བོན་སྐྱོང་ཐམས་ཅད་ས་དེར་འདུ་ཚོགས་བྱུང་བའི་དབུས་དཀྱིལ་སྲིད་པ་རྒྱལ་མོ་དབུ་རྒྱ་ཕྱག་སྟོང་མས་ནམ་མཁའ་གང་བ་ཙམ་བྱུང་ནས་ལུང་བསྟན། ཡུལ་དེ་གའི་འོ་བརྒྱད་ལུག་རྫི་ལ་ཁྱོད་ཀྱིས་བྱང་ཕྱོགས་སུ་ཁ་རྒྱུ་ནས་བཅོལ་བསྐུལ་གཡབ་རྡེབ་ཀྱིས་གསུངས་པས། ལུག་རྫིས། ཁྱུང་དཔོན་དགེ་དཔོན་དབུས་ཧོར་གྱིས་དཀྲོངས་། གཡུང་དྲུང་བོན་གྱི་བསྟན་པ་སྣུབས་མིའི་ཐོག། མ་སྲིད་པ་རྒྱལ་མོས་ར་མདའ་ཟློག་ཅེས་བོས་པས། སྲིད་རྒྱལ་གྱིས་སེར་བ་ཐོག་རྒོད་ཕབ་སྟེ་ཧོར་དམག་ཐམས་ཅད་བསད། འོ་བརྒྱད་ལུག་རྫི་གཙོས་པའི་ཡུལ་མིས་ལུག་གི་རིལ་མས་སྐུ་གདུང་བཞུས་པས་རྟེན་ཞི་ཁྲོ་རྒྱབ་སྤྲོད་བྱུང་ཞེས་ཁྱུང་རབས་སོགས་ལས་གསལ་ཡོད། ཧོར་དམག་ཡུལ་འདིར་བྱུང་སྐབས་ཁྱུང་པོ་རྒྱལ་ཚ་སྤུན་དྲུག་གི་ཆུང་ཤོས་སྟོན་འབར་གྱིས་སྲས་གཡོག་མོ་ཨ་མཚོ་བཟའ་ལ་ནང་ཆེན་གྲགས་པ་རྒྱལ་མཚན་འཁྲུངས། ཁོང་ཁྱུང་པོ་ཚོ་གཅིག་གིས་ཁྱེར་ནས་ནང་ཆེན་ལ་བྲོས། སྟོན་འབར་སྲས་ཁྱུང་པོ་བསོད་ནམས་རྒྱལ་མཚན་དང་བསོད་འབར་སོགས་ཁྱང་པོ་མང་རབས་གཅིག་འབྲི་གུང་གཅུང་རིན་པོ་ཆེ་ལ་སྐྱབས་བཅོལ་བར་བྲོས་པ་དང་། ཧོར་དམག་ཚོ་ཁག་གཅིག་གིས་ཁྱུང་དབུས་རིན་པོ་ཆེ་ཤེས་རབ་རྒྱལ་མཚན་དེད་པས།  ཁྱུང་དབུས་རིན་པོ་ཆེས་རྟ་རྗེ་ལྡིང་ཁྱུང་ལ་བཅིབས་ནས་ལྷོ་རྔུལ་ཆུ་རྒྱུད་ལ་བྲོས་ཏེ་ནགས་ཚལ་གསེབ་ཏུ་བྲག་དཀར་པོ་ཞིག་གི་རྩེར་ཕེབས་པས་སོག་པོའི་དམག་གིས་མ་མཐོང་། གནས་དེར་ཆུ་མེད་ཀྱང་ཁྱུང་དབུས་རིན་པོ་ཆེས་བྲག་ལ་སྦ་ལྕག་གདབ་པའི་ཤུལ་ལས་ཆུ་རྡུལ་བ་དང་། དེར་ཡུན་རིང་བཞུགས་པས་ཁྱུང་དབུས་རྫོང་གྲགས་པ་དང་ས་ཆ་དེའི་གཡས་གཡོན་དུ་བླ་མའི་ཞབས་རྗེས་དང་ཆིབ་རྟའི་རྗེས་སོགས་ཡོད་པ་དེར་ཕྱིས་སུ་ཆོས་པ་རྣམས་ཀྱིས་ཁྱུང་པོའི་རྫོང་མིང་ལ་ཁྱི་རྫོང་དང་། ཞབས་རྗེས་རྣམས་ལ་གེ་སར་མི་རྟའི་ཞབས་རྗེས་ཞེས་པ་སོགས་དེ་ལྟར་འབོད་སྲོལ་གྲགས་པའི་ས་ཆ་དེ་ད་སྐབས་སོག་རྫོང་ཁོངས་སྔར་རལ་གསུམ་མམ་རྡ་ཧེ་འབོད་པའི་སར་ཡོད། སོག་དམག་བོད་དུ་ལྷག་པའི་དུས་ཚོད་ཆོས་འབྱུང་མཁས་པའི་དགའ་སྟོང་ལས་“ཇིང་གིར་རྒྱལ་པོ་དགུང་ལོ་ང་དགུ་ལྕགས་བྱི་”ཞེས་པའི་ལྕགས་བྱི་དེའང་“སྤྱི་ལོ་༡༢༤༠ལོར་”ཁེལ་ཡོད་པ་དང་། ཕྱིས་སུ་བོད་ཀྱི་མཁས་པ་རྣམས་ཀྱིས་དེ་ལྟར་ངོས་འཛིན་བྱེད། མ་ཟད་གུས་པས་ཀྱང་ཧེ་མ་ལ་ཡ་དྲྭ་རྒྱ་ནང་ལ་སོག་གཡུང་དྲུང་གླིང་གི་ལོ་རྒྱུས་ཞིག་བཞག་ཡོད་པ་དེའི་ནང་དེར་མཐུན་ལྟར་དཔྱད་ཡོད། འོན་ཀྱང་དེར་ཅུང་ནོར་བར་སྙམ་རྒྱུ་མཚན་ནི་གུས་པས་སླར་དེའི་ཐད་དུ་དཔེ་ཆ་མང་ཙམ་བལྟ་ཀློག་བྱས་པའི་བརྒྱུད་བོད་སོག་གཉིས་ཀྱི་ཡིག་ཆ་ཁག་ལས་ཇིང་གིར་རྒྱལ་པོ་སྐུ་འཁྲུངས་འདས་ཐད་ཞལ་མི་འཐུན་པ་ཁ་ཤས་ཡོད་ཀྱང་། སོག་པོ་ཁོ་རང་ཚོའི་ལོ་རྒྱུས་ཡིག་ཆ་གསང་བའི་དེབ་ཐེར་ཞེས་པའི་ནང་གསལ་ “ཧོར་ཇིང་གིར་རྒྱལ་པོ་དེ་ཉིད་ཆུ་རྟ་༡༡༦༢ལོར་”སྐུ་འཁྲུངས་པས་དགུང་ལོ་“༥༩”ཐོག་ཅེས་པ་ལོ་རྟགས་“ལྕགས་འབྲུག་སྤྱི་ལོ་༡༢༢༠ལོར་”ཁེལ་ཡོད་པ་དང་། ཁྱུང་རབས་གསེར་སྒམ་མ་ཡི་ནང་ལ་གསལ་བའི་དོར་རྟའི་དམག་སོག་ཆུ་ཁ་སླེབས་པའི་དུས་ཚིགས་ཁྱུང་ཨ་བླ་མེ་གླང་༡༢༡༧ལོར་སྐུ་འཁྲུངས་པའི་དགུང་ལོ་དྲུག་ཆུ་རྟ་༡༢༢༢ལོར་ཡིན་ལུག་གསལ་བ་མ་ཚད་ཁྱུང་པོ་ནང་ཆེན་གྲགས་པ་ལོ་དེའི་སོག་དམག་གིས་ཁྱུང་པོ་གཏོར་བའི་ནངས་མོར་སྐུ་འཁྲུངས་པ་གསལ་བ་སོགས་དབར་བར་ཐག་ཉེ་བས་དེ་ལྟར་དཔྱད་པར་བྱའོ།། （དོར་རྟ་ནག་པོའི་དམག་བོད་ལ་སོང་སྐབས་བོད་ལ་རྒྱ་མོའི་ས་ཚིགས་ཁག་༢༧བཙུགས་ཡོད་པ་དེའི་ནང་རྒྱལ་མོ་ཆེ་བ་གསུམ་གྱི་ནང་ཚན་གཙོ་བོ་གཅིག་དེ་སོག་ཆུ་ཁ་ཡིན་པ་དང་འདོད་མཁན་ཡོད་པ་རེད།）མ་གཞི་ཨ་བླ་“ལོ་དྲུག་”དང་“དགུ་”ཞེས་གཉིས་གང་རུང་སྟེང་“ཧོར་དམག་གིས་ཁྱེར་”ཟེར་བ་དང་། “ལོ་རྒྱུས་ཡིག་རིགས་ཁག་ནང་”གསལ་བའི་དོར་རྟའི་དམག་བོད་དུ་ལྷག་པའི་དུས་ཚིག་ལོ་གཉིས་མ་འགྲིག་བཞིན་དུ་བསྒྲིགས་དགོས་བྱུང་བས་ཟུར་མཁས་རྣམས་ཀྱིས་དཔྱད་ཞིབ་འཚལ། དོར་རྟའི་དམག་དཔུང་བོད་དུ་ཡོང་དུས་མདོ་སྟོད། མདོ་སྨད། སོག་ཆུ་ཁ་རྣམས་སུ་ཁྱུང་པོ་དང་བོད་མི་མཐོང་ཚད་བསད་པའི་སྐབས་སུ་དགོན་འདི་ཐེངས་དང་པོ་གཏོར་བརླག་གི་གནོད་འཚེ་ཕོག་པ་འདྲ། རྒྱུ་མཚན་དགོན་དེའི་བླ་མ་དཔོན་དགེ་དང་དཔོན་དབུས་སྐུ་མཆེད་གཉིས་བཀྲོངས་ནས་བསྟན་པ་ཐེངས་གཅིག་རིམ་བཞིན་ཉམས་ཆགས་སོང་ཡོད་པར་སྙམ།

འདི་ལྟར་འབྲི་བ་པོ་སྒོ་མིང་གླང་རིགས་བསྟན་ཀུན་ནམ་སྒོ་སྤེ་བོན་ནས་༢༠༢༣ལོའི་ཕྱི་ཟླ་༡༢ཚེས་༡༦ཉིན་རང་ཚང་འཕྲང་ངན་སྣ་ཁུག་ཏུ་སུག་བྲིས་སོ། །