ཁྱུང་ཡུལ་དགེ་བཤེས་བགྲོ་གླེང་ཆེན་མོའི་རིག་གཞུང་ཆེད་དེབ་གསུམ་པ་འགྲེམ་སྤེལ་གནང་།

   ཁྱུང་ཡུལ་དགེ་བཤེས་བགྲོ་གླེང་ཆེན་མོ་ཞེས་པའི་མཚན་གྱི་སྙན་པ་དཀར་པོ་དེ་ཉིད་ཐོག་མར་སྤུ་རྒྱལ་གངས་ཀྱི་འདབས་རོལ་ནས་འཁྲུངས་ཤིང་ཡ་གླིང་གི་སྒང་ཟེ་འདིར་མཆེད་མུས་དང་། དཀར་ནག་སེར་གསུམ་གྱི་འོད་མདངས་འཚེར་བའི་བོན་གྱི་འཁོར་ལོའི་ཚོགས་རྟགས་འདིས་འཛམ་གླིང་དྲྭ་རྒྱའི་འཇིག་རྟེན་ནམ་ས་ཆེན་གོ་ལ་འདི་ལན་གཅིག་བསྐོར་དུས། ཞང་བོད་ཤེས་རིག་ལ་དུང་བ་ཟབ་ཅིང་མེས་པོའི་ཕ་ཆོས་ལ་དད་འདུན་ལྷད་མེད་མངའ་བའི་མཁྱེན་ལྡན་པ་མང་པོའི་མིག་གི་ལོངས་སྤྱོད་དང་རྣ་བའི་རྒྱན་དུ་གྱུར་ཅིང་གསལ་འཚེར་འོད་དུ་འབར་བའི་ལོ་རྒྱུས་ཀྱི་ལེའུ་གསར་པ་ཞིག་འཇིག་རྟེན་མི་ཡུལ་དུ་བསྐྲུན་ནས་ད་ལན་དཔྱད་དེབ་ཐེངས་གསུམ་པ་འདི་ཉིད་དཔར་སྐྲུན་འགྲེམ་སྤེལ་ཞུ་རྒྱུ་བྱུང་བ་རེད། འདི་ནི་ངེད《ཁྱུང་ཡུལ་དགེ་བཤེས་བགྲོ་གླེང་ཆེན་མོ》སྐབས་དང་པོའི་གོ་སྒྲིག་ལྷན་ཚོགས་ཀྱི་ངོས་ནས་བཤད་ན་ལས་དོན་གལ་ཆེན་ཞིག་ལེགས་པར་གྲུབ་པའི་གདེང་ཚོད་རྙེད་བཞིན་ཡོད། སྤྱིར་བྱ་བ་འདི་ནི་ལས་མེད་ཀྱི་ལས་ཀ་ཞིག་དང་དགོས་མེད་ཀྱི་བསྐྱར་བཟོ་ལྟ་བུ་མ་ཡིན་པར་འཕྲལ་ཕུགས་རྒྱང་གསུམ་ལ་གཏད་པའི་དམིགས་འབེན་ནི་སྤྱིར་ན་ཡུལ་གངས་ཅན་པའི་སྐད་ཡིག་རིག་གཞུང་ནོམ་པ་ཅན་འདི་མི་རིགས་ཀྱི་སེམས་ཁམས་ནས་ནམ་ཡང་གྱེས་བྲལ་དུ་མི་འགྲོ་བའི་ཆེད་དང་། སྒོས་སུ་སྟོན་མཆོག་རྫོགས་པའི་སངས་རྒྱས༧རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱིས་རྗེས་བཞག་གནང་བའི་གདུལ་བྱ་སེམས་ཅན་གྱི་རྒྱུད་ལ་ཞི་བདེ་སྐྲུན་བྱེད་ཀྱི་ཐབས་ཁྱད་པར་ཅན་ལུང་རྟོགས་ཀྱི་བསྟན་པ་རིན་པོ་ཆེའི་སྙིང་དོན་ངོ་མ་དེ་འཆད་རྩོད་རྩོམ་གསུམ་དང་ཐོས་བསམ་སྒོམ་གསུམ་གྱི་ལམ་ནས་འཛིན་སྐྱོང་སྤེལ་གསུམ་དང་ཉམས་སུ་ལེན་དགོས་པ་ཉག་གཅིག་ཡིན་པ་ལས།  ཤེས་རབ་ཀྱི་རྨིང་སྟོང་པའི་གང་ཟག་སུ་ཞིག་གིས་དབྱར་ཁ་ཆར་དང་དགུན་དྲག་རླུང་ལ་མ་འཛེམ་པར་ལུས་སྲོག་ལྟོས་མེད་ཀྱིས་འབད་རྩོལ་ཁོ་ནར་ལྷུར་ལེན་ཅི་ལྟར་བྱས་ཀྱང་ཐར་པ་དང་བྱང་ཆུབ་སྒྲུབ་པའི་ལམ་འབྲས་དང་རྒྱང་ཐག་དེ་ཙམ་ཉེ་མི་ནུས་ཏེ།  《 མདོ་ཕྲན་》ལས། ཉན་པ་མེད་པས་བཤད་པ་མེད། བཤད་ཉན་མེད་པས་གོ་བ་མེད། གོ་བ་མེད་པས་སྒྲུབ་པ་མེད། སྒྲུབ་པ་མེད་པས་བྱང་ཆུབ་ཐོབ་པར་ག་ལ་འགྱུར།  དཔེར་ན་ཏ་ལའི་མགོ་བཅད་བཞིན། ཞེས་སོ། །དེས་ན་ཁྱུང་ཡུལ་དགེ་བཤེས་བགྲོ་གླེང་ཆེན་མོ་འདི་ལ་ཐོས་བསམ་སྒོམ་གསུམ་གྱི་དོན་ཡོངས་སུ་ལྡན་པ་སྟེ།