གཉན་རོང་ཆབ་མདོ་དགོན་གྱི་ལོ་དེབ་​​​​​​​《གཏམ་ཚོགས་གསལ་བའི་བང་མཛོད》ཅེས་པ་འགྲེམ་སྤེལ་བྱས།

གཉན་རོང་ཨ་གྲགས་ཆབ་མདོ་དགོན་གྱི་ལོ་དེབ་《གཏམ་ཚོགས་གསལ་བའི་བང་མཛོད》ཅེས་པ་འགྲེམ་སྤེལ་བྱས།　

སྔོན་གླེང་ཁུ་བྱུག་མགྲིན་གླུ།

　　འཛམ་གླིང་གི་ཡང་རྩེར་ཕ་གཞིས་དྲོད་མོའི་མེ་ཆེན་རབ་ཏུ་འབར་བའི་ཡུལ་གྲུ། གཟི་བརྗིད་ཀྱི་རང་མདངས་མ་ཉམས་ཞིང་ལོ་ངོ་ཁྲི་ཕྲག་གི་ལོ་རྒྱུས་ཀྱི་དྲི་བཟང་མ་ཡལ་བ་ལྷང་ངེར་གསལ་བའི་འོད་ཟེར་སྟོང་ལྡན། གྲུབ་མཐའ་ཀུན་གྱི་ཨ་མ་དབྱིངས་ཀྱི་ཡུམ་ཆེན་ས་ཏྲིག་ཨེར་སངས། གཞན་ལ་མ་རེ་མ་རྐུས་རང་ཚུགས་བརྟན་ཞིང་ས་སྐྱེས་རྡོ་སྐྱེས་ཀྱི་བཅུ་ཕྲག་རིག་པའི་ཤེས་བྱ། གནས་ཀྱི་རྒྱལ་པོ་གངས་དཀར་ཏི་སེ་ལས་སྤམ་མཐོ་ཞིང་རྒྱ་མཚོ་ལས་གཏིང་ཟབ་པའི་ཞང་བོད་རིགས་གཞུང་། མ་བཅོས་མ་བསླད་པའི་གསེར་ཞུན་ལྷད་མེད་ཡིན་པ་ལས། གྲུབ་མཐའི་འཐེན་འཁྱེར་དང་སྒེར་དོན་དབང་གིས་རང་རེའི་ཡབ་མེས་རིག་གཞུང་དག་ཡོད་ཚད་གཞན་ལ་བཅོལ་ཏེ། ལྟ་བ་ངན་པའི་དུག་ཆུ་ལྷུང་ལྷུང་དུ་བཞུར་བ་དང་ཆགས་སྡང་གི་སྨྱོ་ཆུ་ངར་མོ་དམངས་ལ་བླུད་ནས་རྒྱལ་འབངས་ཕུང་ལ་སྦྱོར་བའི་ཝ་སྐྱེས་དེ་བས་མིན། རྒྱལ་བ་གཤེན་རབ་མི་བོ་ཆེས་བཀའ་ཐེག་པ་རིམ་དགུ། རྒྱུད་ལུང་མན་ངག སྒོ་བཞི་མཛོད་ལྔ། ཕྱི་ནང་གསང་གསུམ། དྲང་དོན་ངེས་དོན་སོགས་བཀའ་རྒྱ་ཆེ་བ་ལུང་གྲངས་མང་བ། མདོ་སྡགས་རྫོགས་གསུམ། ལྟ་སྒོམ་སྤྱོད་གསུམ་གྱི་ཉམས་ལེན་ཟབ་མོ་རྒྱུད་ལ་སྦྱར་ཏེ། སྡུག་སྡིག་པ་བ་མོ་ཞུ་བ་ལྟར་སངས་ཞིང་མཐར་ཐུག་བདེ་ཆེན་བགྲོད་སའི་འབྲས་བཟང་བསྐྲུན། དེ་ནས་བཟུང་ཏེ་ཞང་ཞུང་གི་རྒྱལ་པོ་བྱ་རུ་ཅན་བཅོ་བརྒྱད་དང་ད་ལྟའི་བར་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་འདི་ཉིད་མ་ཉམས་པར་གནས་ཡོད་པ་ནི་རང་གཞན་ཀུན་གྱི་བསོད་ནམས་ལས་གཞན་མ་འཆིས། སླར་མཐོ་སྒང་གི་དྲི་གཞོན་ལྷ་མོ་དང་མཉམ་དུ་ཞང་བོད་རིག་གཞུང་ལ་འབད་འབུང་ལྷོད་མེད་དུ་སྐྱོང་བཞིན་པའི་ད་ལན་གཉན་རོང་ཨ་གྲགས་ཆབ་མདོ་དགོན་གྱི་ལོ་དེབ་《གཏམ་ཚོགས་གསལ་བའི་བང་མཛོད》 འདོན་ཐེངས་དྲུག་པ་འདིས། ཞང་བོད་རིག་གཞུང་ལ་གོམ་སྟབས་དང་གནའ་བོའི་ཡུལ་སྲོལ་གོམས་གཤིས་བརྩི་འཇོག་གི་བྱ་ཐབས་ལ་དམིགས་ཏེ། ལོ་རྒྱུས་དང་། དཔྱད་རྩོམ། ཤེས་རིག སློབ་གསོ། སྙན་རྩོམ། འོས་སྦྱོར། དམངས་ཁྲོད། གསར་གནས་བཅས་ཀྱི་ཞང་བོད་ཤེས་བྱ་བཅུ་ཕྲག་རིག་པའི་གནས་ལ་སྒྱུ་རྩལ་ངོམ་སའི་གར་སྟེགས་ཞིག་ཡིན་ལ། དྲང་བརྗོད་ཀྱི་བདེན་དོན་འཚོལ་ས་དང་རིག་པའི་འཕུལ་བསྐྱོད་ཡངས་པ་དག་བྱང་ཚད་འཐོར་འདེགས་ཡོང་བའི་ལམ་བུ་འདི་བསྐྲུན་པ་ལགས། རྩོམ་རིགས་ཀྱི་ཁ་ཕྱོགས་ནི་ཞང་བོད་ཤེས་རིག་གི་འགྲོས་དང་བསྟུན་གང་ཐུབ་དགོས་པ་ལས་གྲུབ་མཐའི་ཕྱོགས་ཞེན་དང་དོན་མེད་རྩོམ་རྙོག་ཁྲིམས་ལུགས་དང་མི་མཐུན་པའི་རིགས་རྣམས་ལ་འདིར་འགོད་ཀྱི་མེད་པས་སྨྱུག་ཐོག་པ་ཀུན་གྱིས་དེ་ལུགས་མཛད་པར་འཚལ། རྩོམ་གྱི་འགོ་འཇུག་བར་གསུམ་ལ་སྒྲིགས་སྟངས་དང་དག་ནོར་གྱི་སྐྱོན་ཆ་མི་ཉུང་བ་ཡོད་སྲིད་པས། བློ་གྲོས་ཀྱི་མཁྱེན་བརྒྱ་རབ་ཏུ་རྒྱས་པའི་གཟིགས་པ་པོ་རྣམས་ལ་གཟོད་གསོལ་དང་ནུབ་མེད་བསྟན་དོན་འཕེལ་བའི་སྨོན་ལམ་གྱི་རྒྱས་གདབ་བོ།།