《སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》བཀླགས་པའི་བསྙེལ་ཟིན་ནོར་བུའི་ཐང་མ་ཞེས་པ་འགྲེམ་སྤེལ་བྱས།

༄༅། །ཀྲུང་ཧྭའི་བཀའ་བསྟན་ཆེན་མོ་ལས《སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》བཀླགས་པའི་བསྙེལ་ཟིན་ནོར་བུའི་ཐང་མ།
སྔོན་གླེང་།

　　ཟབ་གསལ་མཁྱེན་གཉིས་ཏི་སེ་ལས་འོངས་པའི། །གདུལ་བྱ་རྨོངས་པའི་སྐོམ་གདུང་སེལ་བའི་གཉེན། །མདོ་འབུམ་རྒྱུད་མཛོད་ཁ་འབབ་རྣམ་བཞིའི་ཀླུང་། །འབྱུང་གནས་སངས་རྒྱས་གཤེན་རབ་མི་བོར་འདུད། །མ་འོངས་དུས་སུ་སངས་རྒྱས་ཡི་གེའི་གཟུགས། །འབྱོན་པར་གསུངས་པའི་ལུང་བསྟན་མངོན་གྱུར་པ། །བཀའ་འགྱུར་ཆེན་མོའི་མཚན་གྱི་ཅོད་པན་ཅན། །དལ་འབྱོར་སྐབས་ཅན་ཀློག་པའི་སྲི་ཞུས་མཆོད། །ཏོག་དབྱིབས་བཀག་རྒྱའི་རྐྱེན་ངན་གྲོགས་ཤར་དང་། །དྲིན་ཆེན་གོང་མའི་ཐུགས་དགོངས་རྫོགས་པའི་ཆེད། །འབྲེལ་ཐོགས་གསོན་གཤིན་ཡོངས་ཀྱི་དགེ་བའི་སྡོང་། །རང་བློ་ཤེས་བྱའི་གནས་ལ་གོམས་པའི་སླད། །《གཡུང་དྲུང་བོན་གྱི་བཀའ་འགྱུར་ཆེན་མོ》སྟེ། །དེབ་ཕྲེང་བརྒྱ་དང་བརྒྱད་ཀྱི་བདག་ཉིད་ཅན། །ཉ་ཆེན་བཅོ་ལྔར་རྟེན་འབྲེལ་དབུ་བཟུང་སྟེ། །མཐར་ཆགས་བཀླག་པའི་གཡར་དམ་སེམས་སུ་བཅས། །སྤྱིར་ན་སྦྱོར་དངོས་རྗེས་གསུམ་ཚང་བ་དང་། །སྒོས་སུ་བརྗོད་དོན་གོ་རྟོགས་ཡོང་བའི་ཆེད། །ཡང་ཁྱད་གལ་གནད་བསྙེལ་ཟིན་འབྲི་བ་སྟེ། །ཚིག་དོན་ཟུང་འབྲེལ་ལས་ཤིག་གྲུབ་ན་སྙམ། །དཀར་ཕྱོགས་ལྷ་མི་གཤེན་གྱི་མཐུན་འགྱུར་དང་། །གཤིས་ཀྱི་ཡིན་ལུགས་བདེན་པའི་བྱིན་མཐུ་ཡིས། །རྣམ་དཀར་ལས་ལ་བར་ཆད་མི་འབྱུང་ཞིང་། །ཐོག་མཐའ་བར་གསུམ་དགེ་བའི་ཤིས་པ་སྩོལ། །

　　དེ་ལྟར་སྐབས་ཀྱི་ཟིན་ཐོ་འདི་ཉིད་འབྲི་བའི་རྒྱུ་རྐྱེན་དང་དགོས་པ་སོགས་ཚིགས་སུ་བཅད་པ་འགའ་ཡིས་མདུན་དགེ་བར་བསུས་ཏེ། ཀྲུང་ཧྭའི་བཀའ་བསྟན་ཆེན་མོ་ལས《སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》འདི་ཉིད་རྒྱུན་ལྡན་འཚོ་བའི་ཞ་ཞོར་དུ་རིམ་པར་མཐར་ཆགས་སུ་བཀླགས་པའི་སྐལ་བཟང་མངོན་དུ་གྱུར་པའི་ཚེ་ན། གཙོ་བོ་ཀློག་པ་པོ་རང་ལ་ལྟོས་པའི་དགོས་མཁོའམ་དཔྱད་གཞི་གལ་ཆེའི་རིགས་གང་མཇལ་བ་རྣམས་བརྗེད་ཐོ་དང་རྗེས་སོར་མཁོ་སྐབས་འཚོལ་བདེའི་ཆེད་ཟུར་གསལ་དུ་འབྲི་བ་ལ། སྤྱིའི་དེབ་གྲངས་གང་ཡིན་དང་། བཀའ་གང་ཡིན་གྱི་མཚན། ཤོག་ངོས་ཀྱི་ཨང་གྲངས། སྐབས་དེར་བསྟན་པའི་ལུང་ཚིག་དངོས་སམ་ཡང་ན་དེ་འབྲེལ་གནད་བསྡུས་ཀྱི་གསལ་བཤད་བཅས་རིམ་བཞིན་དགོད་པར་བྱའོ། །

མཇུག་དོན།

　　དེ་ལྟར་ཀྲུང་ཧྭའི་བཀའ་བསྟན་ཆེན་མོ་ལས《སངས་རྒྱས་གཡུང་དྲུང་བོན་གྱི་བཀའ་འགྱུར་ཆེན་མོ》བཀླགས་པའི་བསྙེལ་ཟིན་ནོར་བུའི་ཐང་མ། ཞེས་པ་འདི་ཉིད་ཇི་ལྟར་འབྲི་བར་བསྐུལ་བའི་ཐོག་མའི་རྒྱུ་རྐྱེན་དང་ཀུན་སློང་སོགས་སྔོན་གླེང་དུ་སོང་ཟིན་པ་ལྟར་ལ། སྤྱིར་ན་དེང་གི་དུས་འདིར་ཚོགས་པའམ་མི་སྒེར་ཅི་རིགས་ཀྱིས་རྒྱལ་བའི་བཀའ་འགྱུར་ཆེན་མོ་འདི་ཉིད་ཚར་གཅིག་གམ་དེ་ལས་མང་བའི་དཔེ་ཀློག་གནང་བའི་ལུགས་སྲོལ་བཟང་པོ་ཞིག་གྲུབ་པའི་བརྒྱུད་རིམ་ནང་། གཞི་རྒྱ་ཆེ་བའི་དཔེ་ཀློག་གི་ལས་གཞི་དེ་དང་འབྲེལ་བར་ཕྱིས་བྱུང་རང་ལུགས་ལྟ་བུའི་མཁས་པ་ག་གེ་མོ་ཞིག་གི་དགོངས་བཞེད་ཅིག་ལ་ཞེན་ཕྱོགས་ཀྱིས་འཇུག་པ་ལྟ་བུ་མ་ཡིན་པར་ཐད་ཀར་དཔྱད་གསུམ་དག་པའི་བཀའ་ཡི་དགོངས་དོན་རང་རྒྱུད་ལ་སྦྱར་ཏེ་ཉམས་སུ་བཞེས་པ་ནི་བཀའ་འགྱུར་བཀླགས་པའི་དགོས་པ་གཙོ་བོ་ཡིན་པ་གཞིར་བཅས། དེ་ལས་ཀྱང་མི་བུ་བྱེ་བྲག་པ་འགའ་ཞིག་གི་བློ་ངོར་བཀའ་ཡི་དགོངས་དོན་ངེས་པ་ཙམ་ཞིག་མ་ཡིན་པར། དཔེ་ཀློག་དེ་དང་དངོས་འབྲེལ་གྱི་གོ་དོན་གལ་ཆེའི་རིགས་ཡིག་ཐོག་ཏུ་ཟིན་བྲིས་དང་དཔྱད་བརྗོད་བཀོད་དེ་སྤྱི་ཚོགས་ཡོངས་ལ་ཁྱབ་སྤེལ་གྱི་མཛད་འཕྲིན་སྐྱོང་བ་ནི། བཀའ་འགྱུར་ཆེན་མོ་གང་ཉིད་མཆོད་ཁྲིར་བཤམས་ཏེ་ཕྱག་དང་བཀུར་སྟི་ཞུ་བའི་རྒྱུན་སྲོལ་ལས་བརྒལ་ཏེ། བཀའ་འགྱུར་ཆེན་མོ་ལ་ཕྱོགས་ཡོངས་ནས་སློབ་གཉེར་དང་གོ་རྟོགས་ཡོང་བའི་ཐབས་མཆོག་སྒོ་འབྱེད་ཀྱི་ལྡེ་མིག་ལྟ་བུར་ཡོང་བར་གདོན་མི་ཟ་བར་སྙམ་མོ། །

　　དེ་ལྟ་བུའི་སྤྱི་ཚོགས་སམ་ཁོར་ཡུག་ཁྲོད་དུ་གོམ་པ་མཉམ་བགྲོད་བྱེད་པའི་ཕྲན་རང་ཉིད་ལ་མཚོན་ནའང་ད་ལན་རྒྱལ་བའི་བཀའ་འགྱུར་ཆེན་མོ་འདི་བཞིན་ཚར་གཅིག་མཐར་ཆགས་སུ་བཀླགས་པའི་བསོད་ནམས་ཀྱི་བགོ་སྐལ་བཟང་པོ་ཞིག་ཐོབ་པ་དང་ལྷན། ནམ་རྒྱུན་གསུང་རབ་ཀྱི་དོན་ལ་སློབ་གཉེར་དང་། ཞིབ་འཇུག འཆད་རྩོམ་སོགས་ལ་ཞུགས་པའི་ཁུར་ལེན་སྐབས་དགོས་པ་སྐབས་སུ་བབ་པའི་བཀའ་དངོས་སུ་ཇི་ལྟར་བཞུགས་པ་རྣམས་ཐད་ཀར་འཚོལ་བའི་དུས་ན། དཔེ་ཚོགས་མང་པོའི་ཁྲོད་ནས་ལམ་སང་རྙེད་མི་ཐུབ་པ་སོགས་ཀྱི་དཀའ་ཁག་གང་མང་ཞིག་ཕྲད་དང་འཕྲད་བཞིན་པའི་ཉམས་མྱོང་ལྟར། ཕྱིས་སུ་དེ་དག་ཅུང་བཙལ་འཚོལ་བདེ་བའི་ཆེད་དུ་གང་ཐུབ་ཅི་ནུས་ཀྱིས་བསྙེལ་ཟིན་འདི་ཉིད་དང་པོ་བཀའ་རིན་པོ་ཆེ་མུ་ཆགས་སུ་ཀློག་མུས་དང་འབྲེལ། གནད་དོན་གང་འབྲི་བར་འདོད་པ་རྣམས་དུས་ཐོག་ཏུ་ཤོག་ངོས་སུ་བྲིས་ཤིང་། དེ་དག་རྗེས་སུ་གློག་གཟུགས་སུ་ལྷན་དུ་བསྒྲིགས། དེ་ཡང་གལ་ཆེའི་ལུང་ཚིག་ཉུང་བ་རྣམས་ཆ་ཚང་དྲངས་པ་དང་། མང་བའི་རིགས་རྣམས་ཡིག་ཚོགས་དབང་གིས་དངོས་སུ་འདྲེན་མ་ཐུབ་རུང་གཞུང་གང་དུ་ཡོད་པ་དེབ་གྲངས་དང་ཤོག་ངོས་ཀྱི་ཨང་རྟགས་བཅས་གསལ་བཤད་ཞུས། ཡང་དོགས་གཞིའམ་དཔྱད་གཞིར་འོས་པ་རྣམས་དེ་མཚུངས་ཀྱི་གསལ་བཤད་དང་། ལུང་ཚིག་དངོས་སུ་དྲངས་པ་རྣམས་བརྡ་འགྲོས་ལ་དོགས་གཞི་ཡོད་རིགས་ཀྱང་མ་ཕྱི་ལྟར་སོར་བཞག་དང་། འགའ་ཤས་ལ་དགོས་དབང་གིས་བསམ་ཚུལ་ཟུར་མཆན་བཏབ་ཡོད། 《འབུམ་ཉི་མ་དགུ་ཤར》ནི། 《བདལ་འབུམ》དང་ཚིག་དོན་འདྲ་བ་དང་། 《སྟག་སླག་ཕུར་པའི་རྒྱུད་དགུ》ཡང་། 《སྤ་གཏེར་ཕུར་པའི་རྒྱུད་དགུ》དང་འདྲ་ཤས་ཆེ་བ་སོགས་འགའ་ཞིག་ལ་གསལ་བཤད་དང་བཅས་ཟིན་བྲིས་ཉུང་ངུ་ལས་བཏབ་མེད། 《རྣམ་དག་འདུལ་བ་རྒྱུད་ཀྱི་འབུམ》དང་། 《མདོ་ཀ་བ་གླིང་དགུ》ལྟ་བུ་འགའ་ཤས་བསྟན་དོན་སྣ་ཁ་མང་བ་དང་། སྤྱིར་གལ་ཆེ་མིན་གང་ལྟར་ཡང་རང་ལ་ལྟོས་ན་དེ་ཙམ་སྤྱོད་སྒོ་མི་ཆེ་བའི་རིགས་རྣམས་ཟིན་བྲིས་ཀྱང་ཉུང་ཙམ་མ་གཏོགས་བཀོད་ཐུབ་མ་སོང་། 《མདོ་དྲི་མེད་གཟི་བརྗིད》ལྟ་བུ་གཞུང་གི་མཚན་འགའ་ཤས་ཡོངས་གྲགས་ལྟར་བསྡུས་མཚན་བྲིས་པ་ཕུད། དེ་མིན་ཕལ་ཆེ་བ་རྣམས་མཚན་མ་ཕྱི་ལྟར་སོར་བཞག་བྲིས་ཡོད། འོན་ཏེ་འདིར་ཟིན་ཐོ་བྲིས་པ་རྣམས་ནི་སྐབས་བབ་ཕྲན་གྱིས་མིག་གིས་མཐོང་ཚོད་ཙམ་དང་བློ་ཡིས་དཔོག་ཚོད་ཙམ་ཞིག་ཡིན་པ་ལས། ཟབ་ཅིང་རྒྱ་ཆེ་བའི་བཀའ་འགྱུར་ཕྱོགས་བསྡུས་ཕོན་ཆེན་འདིའི་ནང་དུ་གལ་འགངས་ཆེ་བའི་རིགས་འདི་ཙམ་ལས་མེད་པའམ། ང་ཚོ་ལ་དགོས་མཁོ་འདི་ཙམ་མེད་པ་ཡང་དེ་བས་མིན་ལ། རང་ཉིད་བྱ་བ་འདི་ལ་མཚོན་ན་ལས་དང་པོ་བ་ཡིན་སྟབས་སྤྱི་ཡི་ཁོག་ཕུབ་སྟངས་དང་། གནད་ཀྱི་དམིགས་བཟུང་ཚུལ། ཞིབ་ཀྱི་དཔྱད་པ་བྱེད་ཐབས་སོགས་ཕྱོགས་མང་པོ་ནས་ཆ་རྐྱེན་གྱི་ཁ་སྟབས་སྐྱོ་བའི་དབང་གིས་འདིར་དངོས་སུ་ཟིན་ཐོ་བྲིས་པ་རྣམས་ལའང་གལ་ཆེའི་དཀའ་གནད་མ་ཟིན་པ་དང་། གཞུང་དོན་ཆ་མ་ཚང་བ། དཔྱད་དོན་གནད་ལ་མ་ཟིན་པ། དགོས་མེད་ཀྱི་ཚིག་ཚོགས་མང་བ་སོགས་སྐྱོན་དང་ནོར་བའི་ཆ་གང་མང་མང་ཞིག་ཡོད་པ་ནི་གཟུར་ཐབས་མེད་པའི་ལས་དབང་ལྟ་བུར་ངེས་པས་དེ་དག་ཚེ་རབས་ནས་བསགས་པའི་སྡིག་ལྟུང་དང་བཅས་པ་རྒྱལ་བའི་བཀའ་རིན་པོ་ཆེ་དང་། རྒྱ་ཆེ་བའི་གཟིགས་ཀློག་པ་པོ་ཡོངས་ལ་སྙིང་ཐག་པ་ནས་བཟོད་གསོལ་ཞུ་བ་དང་། རྣམ་པར་དགེ་བའི་ཆ་ཅུང་ཟད་མཆིས་པ་རྣམས་བཀའ་དྲིན་འཁོར་མེད་མཐའ་ཡས་མ་རྣམས་ཞི་བདེ་བྱང་ཆུབ་ཆེན་པོ་ཐོབ་པའི་རྒྱུ་རུ་བསྔོ་བ་དང་བཅས་སོ། ། ། །

　　ཞེས་པ་འདི་ནི་གནས་མཆོག་སྤུ་རྒྱལ་གངས་དཀར་གྱི་ལྷོ་ཞོལ། ཡུལ་སྐྱིད་པོ་སྤ་ཟླ་ལུང་པ་རུ་དལ་བའི་རྟེན་བཟང་རྙེད་པ། སྤ་ཟླ་བསྟན་རྣམ་དུ་འབོད་པ་དེས་རང་གནས་༧ཞུ་ཡི་གདན་ས་གཡུང་དྲུང་སྨིན་གྲོལ་གླིང་སྤུ་རྒྱལ་རིག་སློབ་ཁང་དུ་། བོད་རབ་མཛོད་ཆུ་སྟག་ལོའི་བོད་ཟླ་བཅུ་པའི་ཚེས་བཅོ་ལྔར་དབུ་བཙུགས་ཏེ། རབ་བྱུང་དེའི་ཤིང་འབྲུག་ལོའི་ཟླ་བ་དགུ་པར་མཇུག་ཡོངས་སུ་གྲུབ་པར་བགྱིས་པ་དགེའོ། །