《བོན་གྱི་འདུ་གནས་སོ་བདུན་གྱི་གནའ་ཤུལ་དཔྱད་ཞིབ་ཀྱི་གཏམ་སྲིད་པའི་རྡོ་རིང》ཞེས་པ་འགྲེམ་སྤེལ་བྱས།

《བོན་གྱི་འདུ་གནས་སོ་བདུན་གྱི་གནའ་ཤུལ་དཔྱད་ཞིབ་ཀྱི་གཏམ་སྲིད་པའི་རྡོ་རིང》ཞེས་པ་པར་སྐྲུན་འགྲེམ་སྤེལ་བྱས།

　　《བོན་གྱི་འདུ་གནས་སོ་བདུན་གྱི་གནའ་ཤུལ་དཔྱད་ཞིབ་ཀྱི་གཏམ་སྲིད་པའི་རྡོ་རིང》ཞེས་པའི་རྩོམ་དེབ་དེ་ཉེ་ཆར་བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་གིས་དངོས་སུ་དཔར་སྐྲུན་འགྲེམས་སྤེལ་གནང་འདུག རྩོམ་དེབ་དེ་ནི་དོན་གྲུབ་ལྷ་རྒྱལ་དང་བསམ་གཏན་འགྱུར་མེད་རྣམ་གཉིས་ཀྱིས་གསར་དུ་བརྩམས་པའི་ཞིབ་འཇུག་རང་བཞིན་ལྡན་པའི་རྩོམ་དེབ་ཞིག་རེད། བོན་གྱི་འདུ་གནས་སོ་བདུན་ཞེས་པ་དེ་གཡུང་དྲུང་བོན་དེ་ཉིད་སྟོད་ཞང་ཞུང་ཡུལ་ནས་བར་དབུས་གཙང་ཁུལ་དུ་དར་བའི་སྐབས་སུ་ནུས་པ་ཆེན་པོ་ཐོན་པའི་རིག་གནས་དར་སྤེལ་གྱི་མཚོན་རྟགས་གལ་ཆེན་ཡིན་པ་དང་དེ་ནི་གཡུང་དྲུང་བོན་གྱི་ལོ་རྒྱུས་འཕེལ་རིམ་ཁྲོད་དུ་ལམ་རྟགས་རྡོ་རིང་ལྟ་བུ་ཆགས་ཡོད། དེ་ནི་གཡུང་དྲུང་བོན་གྱི་ལོ་རྒྱུས་ཙམ་མ་ཡིན་པར་བོད་མཐོ་སྒང་ཧྲིལ་པོའི་གནའ་བོའི་རིག་གནས་ལོ་རྒྱུས་ཀྱི་ངོས་ནས་བཤད་ནའང་གལ་འགངས་ཤིན་ཏུ་ཆེ་བའི་གནས་བབ་བཟུང་ཡོད། ལྷག་པར་དུ་སྤུ་རྒྱལ་བོད་ཀྱི་གནའ་བོའི་ཤེས་རིག་ལོ་རྒྱུས་རྟོག་ཞིབ་བྱེད་དགོས་ན་བོན་གྱི་འདུ་གནས་སོ་བདུན་གྱི་བྱུང་འཕེལ་ལ་རྒྱུས་མངའ་ཕྲན་ཙམ་མེད་ན་གཡག་ཞ་རས་རྩྭ་ཟོས་པ་ལྟ་བུ་ཕྱོགས་གཅིག་ལས་མཐོང་མི་ཐུབ་པས་སྐྱོན་ཆ་ཆེན་པོ་ཡོད་པ་ནི་གསལ་པོ་རེད གངས་ཅན་བོད་ཀྱི་ལོ་རྒྱུས་ཡིག་ཚང་གྲངས་ལས་འདས་པ་ཡོད་རུང་བོན་གྱི་འདུ་གནས་སྐོར་གྱི་གནས་ཚུལ་གཡུང་དྲུང་བོན་གྱི་ལོ་རྒྱུས་ཡིག་ཚང་ཕུད་གཞན་དག་ནང་དུ་ཡིག་འབྲུ་ཙམ་ཡང་བྲིས་པ་མེད། དེར་བརྟེན་བོན་གྱི་འདུ་གནས་སྐོར་གྱི་ལོ་རྒྱུས་དེ་ཡུན་རིང་ཞིག་ཏུ་ལྐོག་གྱུར་གྱི་གནས་སུ་གྱར་ཡོད།

　　བོན་གྱི་འདུ་གནས་ནི་མི་ལོ་སྟོང་ཕྲག་འདས་ཟིན་པའི་གནའ་བོའི་ཤེས་རིག་གི་ལོ་རྒྱུས་ཤིག་ཡིན་པས་དེང་གི་དུས་སུ་གནའ་ཤུལ་ཙམ་ལས་མེད་པ་མ་ཟད། ཐ་ན་གནའ་ཤུལ་ཙམ་ཡང་རྙེད་རྒྱུ་ཧ་ཅང་དཀོན་པོ་ཡིན་པས་ཞིབ་འཇུག་གི་དཀའ་ཁག་ག་ཚོད་ཡོད་མེད་མཁྱེན་གསལ་རེད། རྩོམ་པ་པོ་རྣམ་གཉིས་ཀྱིས་ལོ་མང་རིང་ངལ་བ་མང་པོ་ཁྱད་དུ་བསད་ནས་འབད་འབུངས་བྱས་པ་བརྒྱུད་དེབ་ཆུང་འདི་ཉིད་དངོས་སུ་ལེགས་གྲུབ་བྱུང་བ་རེད། རྩོམ་དེབ་དེ་ཉིད་ཀྱི་ཁྱད་ཆོས་གཙོ་བོ་ནི་རྩམ་པ་པོས་ལོ་རྒྱུས་ཀྱི་དེབ་ཐེར་མང་པོ་བལྟ་ཀློག་དང་དཔྱད་བསྡུར་ཞིབ་རྒྱས་གནང་བ་མ་ཟད་ཡུལ་དངོས་སུ་ཐེངས་མང་བསྐྱོད་ནས་གནའ་ཤུལ་བཙལ་འཚོལ་གྱི་ངལ་བ་དང་དུ་བླངས་ནས་ལོ་ངོ་སྟོང་ཕྲག་བག་ལ་ཞ་བའི་གནའ་ཤུལ་ངོས་འཛིན་གང་ཐུབ་གནང་ནས་བོད་ཀྱི་ལོ་རྒྱུས་ཞིབ་འཇུག་བྱ་བར་གསོན་ཤུགས་སྦྱིན་ཡོད་པ་མ་ཟད་གནའ་ཤུལ་ཡིན་པར་ངེས་པའི་གནས་རྣམས་དཔར་རིས་ཀྱི་ཚུལ་དུ་དེབ་ཀྱི་ནང་དུ་བཀོད་ཡོད་པས་ཀློག་པ་པོ་རྣམ་པར་རྩོམ་དེབ་ཀྱི་ནང་དོན་གོ་བ་ལེན་ཐུབ་རྒྱུར་སྟབས་བདེའི་ཚོར་སྣང་སྦྱིན་ཡོད།

　　དེས་མ་ཚད་རྩོམ་དེབ་འདིའི་རྗོད་བྱེད་ཚིག་སྦྱོར་གྱི་ཐད་ནས་གོ་བདེ་བ་དང་སྟབས་བདེ་བའི་ལམ་ནས་དྲངས་ཡོད་པས་ཀློག་པ་པོའི་དང་ག་འདྲེན་ཐུབ་པའི་ཁྱད་ཆོས་ཀྱང་ལྡན་ཡོད། རྩོམ་དེབ་འདིའི་སྒྲིག་གཞིའི་ངོས་ནས་བཤད་ན་སྤྱིར་ན་ལེའུ་ཆེན་པོ་གསུམ་གྱིས་བཤད་ཡོད་དེ་ལེའུ་དང་པོ་འདུ་གནས་འབྱུང་བའི་སྤྱི་ཚོགས་རྒྱབ་ལྗོངས་བཤད་པ། དེ་ལ་བོན་དང་གཡུང་དྲུང་བོན་ངོ་སྤྲོད་དང་ལྷག་པར་དུ་བོད་རྒྱལ་གཉིས་པ་མུ་ཁྲི་བཙན་པོའི་དུས་སུ་བོད་ལ་གཡུང་དྲུང་བོན་དར་ནས་བོན་གྱི་གསས་མཁར་དང་འདུ་གནས་རིམ་བཞིན་གྲུབ་པའི་གནས་ཚུལ་ངོ་སྤྲོད་ཞུས་ཡོད། ལེའུ་གཉིས་པའི་ནང་དུ་འདུ་གནས་སྐོར་འཁོད་པའི་ལོ་རྒྱུས་ཡིག་ཚང་ཁག་ཅིག་དཔེ་མཚོན་ཙམ་ངོ་སྤྲོད་ཞུས་པ་དང་དེ་བཞིན་འདུ་གནས་སོ་བདུན་རྣམས་ས་ཆ་དངོས་སུ་གང་འདྲ་ཁྱབ་ཡོད་པའི་སྐོར་ལོ་རྒྱུས་ཡིག་ཚང་ལ་གཞི་བཅོལ་ནས་ངོ་སྤྲོད་ཞུས་ཡོད། ལེའུ་གསུམ་པ་བོན་གྱི་འདུ་གནས་སོ་བདུན་ཞིབ་ཏུ་དཔྱོད་པ་ཞེས་འདུ་གནས་སོ་བདུན་པོ་རེ་རེ་བཞིན་ངོ་སྤྲོད་དང་དཔྱད་ཞིབ་བྱས་ཡོད། ལེའུ་འདིའི་ནང་དུ་འདུ་གནས་རྣམས་ཀྱི་སྤྱིའི་ཁྱད་ཆོས་གང་ཡོད་ཕྱོགས་བཞི་ཡི་ཐད་ནས་གསལ་བཤད་ཞུས་ཡོད་པ་བཅས་སོ།།

　　འབྲེལ་བ་བྱེད་ས། བསམ་གཏན་འགྱུར་མེད།

　　ཁ་པར་ཨང་གྲངས། ༡༣༥༡༨༩༦༦༦༦༦