གངས་རིག་གཏེར་གྱི་སྒེར་དེབ་ང་སུ་རེད་ཅེས་པ་འགྲེམ་སྤེལ་གནང་བ།
[ཟླ་ཚེས། 2022-03-05 10:17:38][རྩོམ་པ་པོ། གངས་རིག་གཏེར།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
དཔེ་འཕྲིན།
སྙན་ངག་ནི་བཙན་གྱིས་བཙིར་ནས་ཡོང་བ་ཞིག་མིན་ལ། སྙན་ངག་ནི་ལྷོད་ཀྱིས་འཐེན་ནས་ཡོང་བ་ཞིག་ཀྱང་མིན། དོན་དམ་དུ་སྙན་ངག་ནི་དགའ་སྐྱོ་ཆགས་སྡང་གིས་གཡོ་སྐྱོམ་དང་བཙོ་སྦྱང་བྱས་ནས་ཡོང་བ་ཞིག་ཡིན་པས། ངའི་སྙན་ངག་ལ་ཁྲག་དྲི་བྲོ་སྲིད་ལ། ངའི་སྙན་ངག་ལ་སེར་ཆེན་མེ་ཏོག་ལྟ་བུའི་མཛེས་པའང་ཡོད་སྲིད། དེ་བས་ངའི་སྙན་ངག་ལ་མཚན་ཉིད་མེད་ཅིང་ངའི་སྙན་ངག་ལ་འགྲེལ་བཤད་མེད། རེད་དེ། ང་རང་ནི། ལས་དབང་ཞིག་གིས་སྙན་ངག་ལ་དགའ་་ཞིང་སྟེས་དབང་ཞིག་གིས་སྙན་ངག་འབྲི་བའི་ལམ་ལ་བུད་པ་ནས། བྲེད་སྔངས་དང་སུན་སྣང་མེད་པར། སྙན་ངག་ལ་འཐམ་ནས་ཡོང་བ་ཞིག་ཡིན་པས། ངའི་དགའ་སྐྱོ་ཆགས་སྡང་གི་ཚོར་འདུ་ཡོད་ཚད་སྙན་ངག་ལ་ཐིམ་ཞིང་། སྙན་ངག་གིས་ང་ལ་སྐྱིད་དུས་སྐྱིད་རོགས་དང་སྡུག་དུས་སྡུག་རོགས་བྱས་ནས་ཡོང་བས། ང་ལ་མཚོན་ན་སྙན་ངག་ནི་ཆེས་བཟང་བའི་གྲོགས་པོ་ཞིག་ཡིན་ཟེར་ན་ཆོག གང་ལྟར། སྙན་ངག་གི་ཆེད་དུ། རང་གི་རང་ཚོད་ཀྱིས་དཀའ་ཁག་དང་འགལ་རྐྱེན་ལ་མགོ་བོ་སྒུར་མྱོང་མེད་ལ། ཞེ་སྣང་མེད་པར་སྙན་ངག་འབྲི་བར་རྒྱུན་སྐྱོང་གནངས་ཏེ། ལོ་འདི་དག་ལ་བྲིས་པའི་རང་མོས་སྙན་ངག་སྐོར་ཞིག་ད་རེབ་ལྷན་ཏུ་བཏུས་ཏེ་ཉིན་འགའི་མཚམས་ནས་བདག་གི་སྙན་དེབ་གསར་པ༼ང་སུ་རེད༽ཅེས་པ་ཁ་བ་གངས་རིས་བསྐོར་བའི་བསིལ་མོ་ལྗོངས་ཀྱི་ཀློག་པ་པོ་ཡོངས་ལ་ལེགས་སྐྱེས་ཀྱི་ཚབ་ཏུ་དངོས་སུ་འགྲེམ་སྤེལ་བྱེད་འཆར་ཡིན་པས་གུས་པའི་སྙན་ངག་ལ་སྙིང་ནས་གཅེས་གཅེས་དང་སེམས་ཀྱིས་མྱོང་རོལ་བྱེད་འདོད་མཁན་དག་གིས། ཐུགས་དགོངས་པས་དམའ་གཟིགས་ཤིག་བྱ་རྒྱུ་དང་། ལྷག་པར་དུ་གློ་བ་དགའ་བ་དག་གིས་ཐུགས་ཁུར་ཟབ་བཞེས་གནང་བར་ཐུགས་རྗེ་མ་ཆུང་ཞེས་གངས་རིག་གཏེར་དུ་འབོད་པས་དཔེ་འཕྲིན་ཚུལ་དུ་སྦྱར་བའོོ།།
