རྩོམ་དེབ་《ཐོས་བསམ་གྱི་སྙིང་བཅུད་གསེར་གྱི་ཐིགས་པ།》འགྲེམ་སྤེལ་གནང་བ།
[ཟླ་ཚེས། 2020-01-03 13:54:52][རྩོམ་པ་པོ། རག་ཤི་དགེ་བཤེས་ཡོན་ཏན་བཟང་པོས་བརྩམས།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]
རག་ཤི་དགེ་བཤེས་ཡོན་ཏན་བཟང་པོའི་རྩོམ་དེབ་གསར་པ་《ཐོས་བསམ་གྱི་སྙིང་བཅུད་གསེར་གྱི་ཐིགས་པ།》འགྲེམ་སྤེལ་གནང་བ།
གླེང་གཞིའི་གཏམ།
དེ་ཡང་མཐོ་སྒང་ཁ་བ་གངས་ལྗོངས་དག་པའི་ཞིང་མཆོག་སྲིད་པའི་ཞང་ཞུང་སྨར་གྱི་ཡུལ་ནས་སྐུ་འཁྲུངས་པའི་རྣམ་མཁྱེན་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱིས་གངས་ཅན་བོད་པ་ཚང་གི་རིག་གཞུང་འདི་ཉིད་སྲོལ་གཏོད་གནང་ནས་ད་ལྟའི་བར་དུ། ལོ་རབས་ལོ་ཡི་ཕྲེང་བ་བགྲང་བྱ་སྟོང་ཚོ་བཅོ་བརྒྱད་ལྷག་ཙམ་གྱི་ལོ་རྒྱུས་ལྡན་ཡོད། གསེར་འོད་ནོར་བུ་འོད་འབར་ལས། ཐམས་ཅད་གང་ཡང་མི་རྟག་པས། འཇིག་རྟེན་ཁམས་སུ་དར་རྒུད་ཡོད། ཉི་ཟླ་ཀུན་ལ་འཆར་ནུབ་སྲིད། སངས་རྒྱས་ཀུན་ལ་འདས་གྲོངས་ཡོད། བཟང་ངན་ལས་ལ་རྒྱུ་འབྲས་ཡོད། ཅེས་གསུངས་པ་ནང་བཞིན། དུས་ཡུན་རིང་པོ་དེ་དག་གི་ནང་ནས་བོད་པ་རང་ཉིད་ཀྱི་ཆོས་དང་རིག་གཞུང་འདི་ཉིད་ཀྱང་། དར་རྒུད་འགྱུར་བ་ཆུ་ཡི་གཉེར་མ་དང་དཔྱིད་ཀྱི་གནམ་ངོ་ཇི་བཞིན་འཕེལ་འགྲིབ་མང་པོ་བྱུང་ཡོད། འོན་ཀྱང་སངས་རྒྱས་ཀྱི་ཐུགས་རྗེ་དང་སེམས་ཅན་གྱི་བསོད་ནམས་ལ་བརྟེན་ནས་མི་རིགས་རང་ཉིད་ཀྱི་ཆོས་དང་རིག་གཞུང་གི་རྩ་བ་རྒྱལ་བའི་བཀའ་འགྱུར་ཆེན་མོ་པོ་ཏི་བརྒྱ་དང་བདུན་ཅུ་དོན་བརྒྱད་ལྷག་ཙམ་ད་ལྟ་དངོས་སུ་བཞུགས་ཡོད་པ་དེ་ནི། དབུགས་ལྡན་སྐྱེ་འགྲོ་ཡོངས་ཀྱི་བསོད་ནམས་དང་། གངས་ཅན་བོད་པ་ཚང་གི་གཟི་བརྗིད་ཅིག་ཡིན། རིག་གཞུང་དེ་ནི་བོད་པ་རང་གི་རྣམ་དཔྱོད་ཀྱི་རྩལ་ལས་བསྐྲུན་ཞིང་། བོད་རང་ས་རང་ཡུལ་ནས་དར་བའི་རིག་གཞུང་ཞིག་ཡིན་པས། བོད་མི་སྤྱི་བོ་གནམ་བསྟན་ཚང་མས་རང་གི་མེས་པོའི་ཆོས་དང་རིག་གཞུང་འདི་དག་ལ་ཐོས་བསམ་སློབ་སྦྱོང་དང་། མ་ཉམས་གོང་འཕེལ་ཉམས་པ་སླར་གསོ་བྱེད་རྒྱུའི་འོས་འགན་ཡོད། རྒྱུ་མཚན་དེ་ལ་བརྟེན་ནས་ཕྲན་རང་ཉིད་ཀྱིས་མི་ལོ་ཉི་ཤུ་ལྷག་ཙམ་གྱི་རིང་ལ་མེས་པོའི་ཆོས་དང་རིག་གཞུང་ལ་ཐོས་བསམ་ཡུན་རིང་བྱས་པའི་ལག་རྗེས་སུ། མེ་ཏོག་ཆུང་ཡང་ལྷ་རྫས་ཞེས་པའི་དཔེ་ལྟར། ༼ཐོས་བསམ་གྱི་སྙིང་བཅུད་གསེར་གྱི་ཐིགས་པ།༽ཞེས་པའི་དེབ་ཆུང་འདི་ཉིད་དཔར་བསྐྲུན་དང་འགྲིམ་སྤེལ་ཞུས་ཡོད། དེབ་འདིའི་ནང་དུ་གཙོ་བོའི་བརྗོད་བྱ་ནི། ལོ་རྒྱུས་དང་། དཔྱད་བརྗོད། སློབ་གསོ་དང་སྙན་རྩོམ་བཅས་རྣམ་པ་བཞིའི་སྒོ་ནས་བཤད་ཡོད། དང་པོ་ལོ་རྒྱུས་ཀྱི་སྐོར་ནི། སྟོན་པ་གཤེན་རབ་ནས་གཡུང་དྲུང་བོན་གྱི་བསྟན་པའི་བྱུང་རིམ་དང་། སྟོན་པ་ཤྭཀྱ་ཐུབ་པ་ནས་དམ་པའི་ཆོས་ཀྱི་བསྟན་པའི་བྱུང་རིམ། དེ་བཞིན་རང་དགོན་གྱི་ལོ་རྒྱུས་དང་བསྟན་ལ་མཛད་རྗེས་ཆེ་བའི་བླ་ཆེན་གྱི་མཛད་རྣམ་བཅས་བྲིས་ཡོད། གཉིས་པ་དཔྱད་བརྗོད་ནི། གསང་སྔགས་བསྙེན་སྒྲུབ་ལས་གསུམ་གྱི་སྐོར་དང་། མདོ་སྔགས་ཀྱི་གཞུང་ལས་བཤད་པའི་བླ་ཚེ་སྲོག་གསུམ་གྱི་སྐོར། དེ་བཞིན་བོན་སྒོ་བཞི་མཛོད་ལྔའི་ནང་ཚན་འཕན་ཡུལ་གྱི་བོན་སྒོ་ནས་གསུངས་པའི་མཆོད་པ་རྣམ་ལྔའི་ཕན་ཡོན་དང་། མན་ངག་རྫོང་འཕྲང་སོགས་གཞིར་བཟུང་སྟེ་ཕྲེང་བའི་རྣམ་བཤད་བཅས་བྲིས་ཡོད། གསུམ་པ་སློབ་གསོ་དང་སྙན་རྩོམ་གྱི་སྐོར་ནི། གྲུབ་མཐའ་རིས་མེད་བྱེད་དགོས་པའི་སྐོར་དང་། དོན་གྱི་གྲོགས་པོ། ཕྲག་དོག་གི་འཇིག་རྟེན། རྫུན་ཞྭ་ལ་མཁས་པའི་བོད་པ། སེམས་ལ་ཉར་དགོས་པའི་དོན་ཚན་དགུ་སོགས་ཀྱི་སྐོར་ནས་བྲིས་ཡོད། སྤྱིར་ཤེས་བྱ་རིག་པའི་གནས་ལ་མཐའ་མེད་པས་ཕྲན་གྱི་དེབ་ཆུང་འདི་ལའང་རྒྱ་ཆེའི་ཀློག་པ་པོ་རྣམ་པའི་སེམས་ཁམས་མཐུན་པ་དང་མི་མཐུན་པ་མང་པོ་ཞིག་ཡོང་སྲིད་པ་དང་། ལྷག་ཏུ་རྩོམ་སྒྲིག་གི་དུས་ཡུན་ཐུང་བའི་རྐྱེན་གྱིས་ཡི་གེ་དག་ནོར་ཆད་ལྷག་སོགས། མདོར་ན་འགལ་དང་ནོར་བའི་ཆ་ཐམས་ཅད་རྒྱ་ཆེའི་ཀློག་པ་པོ་རྣམ་པའི་སྤྱན་སྔར་མཐོལ་བཤགས་བཟོད་གསོལ་ཞུ་བ་དང་།
འདི་བྲིས་རྣམ་དཀར་དགེ་བའི་སྟོབས་ཀྱིས་༧སྐྱབས་རྗེ་མཁན་སློབ་གཤེན་གསུམ་གཙོས་པའི་བསྟན་འཛིན་སྐྱེས་བུ་རྣམ་པའི་སྐུ་ཚེ་ཞབས་པད་ཡུན་དུ་བརྟན་ཞིང་སངས་རྒྱས་ཀྱི་བསྟན་པ་རིན་པོ་ཆེ་འདི་དར་ཞིང་རྒྱས་པ་དང་། ཞིང་ཁམས་གཞན་དུ་གཤེགས་པའི་བདག་གི་དྲིན་ཆེན་མ་ཡུམ་གཙོས་པའི་སྐྱེ་འགྲོ་སེམས་ཅན་ཐམས་ཅད་རྫོགས་བྱང་ཐོབ་པའི་རྒྱུ་རུ་འགྲོ་བའི་རེ་སྨོན་དང་བཅས། བོན་བན་གཉིས་ཀྱི་གཞུང་ལུགས་ལ་ཐོས་བསམ་གྱི་འཚོ་བ་ཡུན་རིང་བསྐྱེད་པའི་རག་ཤི་དགེ་བཤེས་ཡོན་ཏན་བཟང་པོའམ་མིང་གཞན་དུ་རག་བཙུན་གངས་ལྷ་དཀར་པོ་རུ་འབོད་པ་དེས་སྤྱི་ལོ་༢༠༡༩ལོའི་ཟླ་༦ཚེས་༩ཉིན་རིས་མེད་གྲུབ་མཐའི་ལྟེ་གནས། བོད་ལྗོངས་ནང་བསྟན་སློབ་ཆེན་དུ་སྦྱར་བའོ།།
རྩོམ་པ་པོའི་ལོ་རྒྱུས་མདོར་བསྡུས།
མི་ལོ་ཧྲིལ་པོ་བཞིའི་རིང་ལ་བོད་ལྗོངས་ནང་བསྟན་སློབ་ཆེན་དུ་མདོ་སྔགས་ཀྱི་གཞུང་ལུགས་ལ་ཐོས་བསམ་མཉམ་དུ་བྱས་པའི་ཁོང་གི་གྲོགས་མཆོག་མཁན་པོ་ཕུན་ཚོགས་ཚེ་བརྟན་ནས་བྲིས།
དཔེ་དེབ་འགྲེམ་སྤེལ་བྱ་ཡུལ་གྱི་ས་གནས་དང་འབྲེལ་ཡུལ།
དཔེ་བདག་རྩོམ་པ་པོ་འབྲེལ་བ་གནང་ཡུལ། 13618968888
ཟི་ཁྲོན་ས་ཁུལ་འབྲེལ་བ་གནང་ཡུལ།13350089997
བོད་ལྗོངས་ལྷ་སའི་ཁུལ་འབྲེལ་བ་གནང་ཡུལ།13549080866
ནག་ཆུ་ས་ཁུལ་འབྲེལ་བ་གནང་ཡུལ།13638961888
ཉིང་ཁྲི་ས་ཁུལ་འབྲེལ་བ་གནང་ཡུལ།13298906999
ཆབ་མདོ་སྟེང་ཆེན་ས་ཁུལ་འབྲེལ་བ་གནང་ཡུལ།13889050580
གཉན་རོང་ས་ཁུལ་འབྲེལ་བ་གནང་ཡུལ།18076986487
འབྲི་རུ་ས་ཁུལ་འབྲེལ་བ་གནང་ཡུལ།19908959377
ཉི་མ་རྫོང་སོགས་དྭངས་རའི་ས་ཁུལ་འབྲེལ་བ་གནང་ཡུལ།13398083161
སྦྲ་ཆེན་ས་ཁུལ་འབྲེལ་བ་གནང་ཡུལ།13989960999