༢༠༡༩ལོའི་ལོ་དེབ་འཕན་ཆུ་སྔོན་མོའི་རང་སྒྲ་འགྲེམ་སྤེལ་གནང་བ།

    མི་ལོ་སྟོང་ཕྲག་དུ་མའི་སྔོན་ནས་མ་བགོས་སྤྱི་ལ་གནང་བའི་ཕ་ནོར་དམ་པ་སྟེ།  ཞྭ་དཀར་གཡུང་དྲུང་བོན་གྱི་བསྟན་པ་རིན་པོ་ཆེ་རིང་ལུགས་དྲི་མ་མེད་པ་འདི་ཉིད་གངས་ཅན་བོད་པའི་ཤེས་རིག་གི་སྙིང་ནོར་དང་། མི་རིགས་ཡུན་དུ་གསོན་པའི་རིན་ཆེན་སྲོག་གི་རྒྱུན་ཐག་ཉག་ཅིག་ལྟ་བུ་ཡིན་སྟབས།  འདི་ཉིད་འཛིན་སྐྱོང་སྤེལ་གསུམ་བྱེད་པ་ནི་ཕྱི་རབས་བོད་ཀྱི་ཤེས་ཡོན་པའི་ཕྲག་ཏུ་ལྷུང་བའི་ཟློག་མེད་ཀྱི་འོས་འགན་ལྕི་མོ་ཞིག་ལགས་པས་ན། ཕྱི་ནང་རིག་པ་ཀུན་ལ་འཇུག་པའི་རྣམ་དཔྱོད་ཡངས་པའི་བོད་གཞིས་བྱེས་ཀྱི་རྩོམ་པ་པོ་རེ་འགས་གནང་བའི་རྩོམ་རིག་དང་ཤེས་བྱའི་ཚལ་ལ་འཇུག་པར་བརྩོན་པའི་ཐོས་བསམ་བ་རེ་འགའི་བརྩམས་ཆོས་དག་གཞིར་བསྒྲིགས་ཏེ།  ཤེས་རིག་གི་སྙིང་བཅུད་འདུས་ཤིང་ལྟ་ཀློག་གི་སྟབས་ཀ་བདེ་བའི་ལོ་དེབ་འཕན་ཆུ་སྔོན་མོའི་རང་སྒྲ་ཞེས་པའི་དེབ་ཕྲེང་བཞི་བ་འདི་ཉིད་རྒྱ་ཆེའི་ཀློག་པ་པོ་ཡོངས་ཀྱི་སྤྱན་ལམ་དུ་བསྟར་བ་ལགས་སོ།།