ཁྱུང་ཡུལ་ནས་«པ་ཏ་པོ་ལི»ཞེས་པའི་སྤྱི་དེབ་དང་པོ་འགྲེམ་སྤེལ་བྱས།

འགྲེམ་བརྡ།

      ངེས་དོན་སེམས་ཀྱི་མོས་པ་ཡི་གེ་ལ་ཕྱོགས་ཤིང་། དལ་ཁོམ་ངག་གི་འདུ་བྱེད་རྩོམ་རིག་ཀློག་པར་སྤྲོ་བའི་ཀློག་པ་པོ་རྣམས་གསོན་དང་། ང་ཚོས་ན་ནིང་གི་འཆར་གཞི་དེ་ད་ལོ་འགྲུབ་ཅིང་སང་ཕོད་ཀྱི་དབུ་ཁྱུད་བྲིས་པའི་༼པ་ཏ་པོ་ལི༽ཞེས་པའི་དུས་དེབ་འདོན་ཐེངས་དང་པོ་སྟེ། དཀའ་ཚེགས་ཀྱི་ལ་མོ་ཐོལ་གྱིས་བརྒལ་ཞིང་འབད་བརྩོན་གྱི་ལོ་ཟླ་རིག་པས་བསུས་ནས་དངོས་སུ་སྤྱི་ཚོགས་ཐོག་ཏུ་སླེབས་ཐུབ་པ་བྱུང་ལ་མི་རིང་བར་ཁྱུང་ཡུལ་གཙོས་པའི་ས་ཕྱོགས་སོ་སོར་དགྲམ་རྒྱུ་ཡིན། ཟུར་ཞུ་ཞིག་ལ་གྲོགས་པོ་གང་མང་ཞིག་གིས་རྩོམ་ཡིག་གི་སྦྱིན་པ་གང་མང་ཞིག་གནངས་བྱུང་བས་ཁྱེད་རྣམ་པ་ཐུགས་རྗེ་ཆེ།

      ལོ་དེབ་ཀྱི་སྒྲིག་གཞི་དང་ཤོག་གྲངས་ལའང་ཚོད་འཛིན་དགོས་ཕྱིར་རྩོམ་ཡིག་མང་པོ་ཞིག་འགོད་ཐབས་བྲལ་ལ་བཀོད་ཟིན་པའི་རྩོམ་འགའ་ལ་བཅད་བཏུབ་མི་ཉུང་བ་ཞིག་བྱེད་དགོས་བྱུང་བས་དགོངས་པ་མ་འཚོམ་ཟེར་ནས་ཞུ་དགོས་བྱུང་། རྗེས་སོར་ཡང་དེ་བཞིན་ལོ་དེབ་ཀྱི་ཁ་ཕྱོགས་ནི་རྒྱུན་ཤེས་གཙོས་པའི་རྩོམ་ཡིག་གང་མང་ཞིག་བསྩལ་རོགས་ཞུ་བ་ཡིན། འདི་ནི་ང་ཚོ་ཁོམ་དྲགས་ནས་ཅི་བྱེད་མ་རྙེད་ནས་ཁ་རྩེད་ལག་རྩེད་བརྩེས་པ་མིན་ལ། དཔལ་འབྱོར་འབེལ་དྲགས་ནས་རྒྱུ་རྩེད་བརྩེས་པའང་དེ་བས་མིན། འདི་ནི་ང་ཚོས་ཤ་རུས་པའི་གཏིང་གི་སྐད་ཆ་དག་རེ་རེ་བཞིན་རྔུལ་ཆུ་དང་ལྷན་དུ་ཕྱིར་ཕྱུང་ནས། བསམ་གཞིག་གི་སྣེ་མོ་སྨྱུ་གུ་ལ་བཏག་ཏེ། སྤྱི་ཚོགས་ཀྱི་འགན་འཁྲི་དང་དུ་བླངས་ནས། རྒྱུན་ཤེས་དང་བསླབ་བྱ་བླང་དོར་གྱི་གལ་གནད་སོགས་རེ་རེ་བཞིན་དུ་མཛུབ་གུས་རི་སྟོན་གྱིས་ཁྱེད་ཚོ་ལ་ཕན་སེམས་དང་། ཕ་མྱེས་ཀྱིས་སྤྲད་པའི་རང་ཡུལ་དྲོན་མོ་འདིར་ལྷག་བསམ་གྱི་ལེགས་སྐྱེས་ཤིག་དང་རང་ཉིད་ཀྱིས་སྦྲང་དཀར་རྩམ་པ་ཟོས་པའི་ཟས་རིན་གྱི་དོད་པོ་ཡང་ཡིན། ང་ཚོས་ང་ཚོ་ལ་ཡིད་ཆེས་ཡོད་ལ་སྤོབས་པ་ཡང་། མུ་མཐུད་ནས་རྩོམ་རིག་གི་གླིང་ཀ་ནས་མི་སྐད་རྒྱག་བཞིན་མདུན་དུ་གོམ་པ་རེ་རེ་བྱེད་ནས་འགྲོ་འཆར་ཡོད་པས་ཁྱེད་ཚོས་གསན་འཇུག་མ་ལོག་དང་མུ་ནས་མུ་རུ་ཡོད་ཨ།

«པ་ཏ་པོ་ལི»ཞེས་པའི་ལོ་དེབ་ཀྱི་ཕྱི་ཤོག

«པ་ཏ་པོ་ལི»ཞེས་པའི་ལོ་དེབ་ཀྱི་ནང་ཤོག

གཟའ་ཕུར་བགྲོ་གླེང་ཚང་གི་དགེ་སློབ་ཚོའི་ལྷན་འཛོམས།

གཟའ་ཕུར་བགྲོ་གླེང་ཚང་གི་ཚོགས་ཞུགས་པ་འགའི་སེམས་ཚོར་དང་ལག་རྗེས།