《ཞང་ཞུང་ལྷ་རིས་སྒྱུ་རྩལ་གཅེས་བསྒྲིགས》ཞེས་པ་འདི་ལ་ཕུན་སུམ་ཚོགས་པ་ལྔའི་གྲངས་ལྡན་དུ་ཐུན་མོང་མ་ཡིན་པའི་ཁྱད་ཆོས་ལྔ་དང་ལྡན་ཏེ། གཅིག དེབ་འདི་ནི་བོན་གྱི་ལྷ་རིས་སྒྱུ་རྩལ་གཅེས་བསྒྲིགས་པའི་ཁྱད་ཆོས་ལྡན་ཏེ། གནའ་དང་དེང་རབས་ཀྱི་ཞལ་ཐང་རིགས་ཚང་བ་དང་། བོན་གསར་རྙིང་གཉིས་ཀྱི་ཞལ་ཐང་རིགས་ཚང་བ། མདོ་དབུས་ཁམས་གསུམ་གྱི་ལྷ་རིས་མི་འདྲ་བའི་ཞལ་ཐང་རིགས་ཚང་བ། མདོ་སྔགས་རྫོགས་གསུམ་རིག་གནས་བཅས་ཀྱི་ཞལ་ཐང་རིགས་ཚང་བ། ཆོས་ལུགས་དང་དམངས་ཁྲོད་སྒྱུ་རྩལ་གྱི་ཞལ་ཐང་རིགས་ཚང་བར་བཅས་སོ།། གཉིས། ཡབ་མེས་ཀྱི་ཞལ་ཐང་རིག་གཞུང་ངོས་འཛིན་ཐུབ་པའི་ཁྱད་ཆོས་དང་ལྡན་ཏེ། གཙོ་སྒྲིག་པ་རྣམས་བོད་ལྗོངས་དང་། སི་ཁྲོན། མཚོ་སྔོན། ཀན་སུའུ། ཡུན་ནན་སོགས་བོད་འབྲེལ་ས་ཁུལ་གྱི་ཁྱིམ་ཚང་དང་། དགོན་པ། རི་ཁྲོད། གསས་ཁང་། མཚམས་ཁང་། བླ་བྲང་། བཤམས་སྟོན་ཁང་། རིག་རྫས་བསྡུ་ཉར་བྱེད་མཁན་སོགས་ལ་ཡོད་པའི་ཞལ་ཐང་རྣམས་མི་ལོ་བཅུ་གསུམ་ཙམ་གྱི་རིང་ལ་རྒྱུད་རིམ་དང་ལྡན་པའི་སྒོ་ནས་འཚོལ་སྡུད་བྱས་པའི་ཞལ་ཐང་རྙིང་བ་ཆིག་སྟོང་སུམ་བརྒྱ་ལྷག་ཡོད་པ་ལས་ཞལ་ཐང་རྙིང་བ་སྤུས་ཀ་ཆེས་ལེགས་ཤོས་དང་། གནའ་རིས་ཀྱི་ཁྱད་ཆོས་ཡོད་པ། བོད་ཀྱི་སྲོལ་རྒྱུན་གྱི་ཞལ་ཐང་རྙིང་བ་རྣམས་གཞིར་བཞག་པའི་སྟེང་། དེང་སང་ལྷ་བཟོ་སྐད་གྲགས་ཅན་རྣམས་ཀྱིས་བྲིས་པའི་ཞལ་ཐང་རྩ་ཆེན་འགའ་ཁ་སྣོན་བརྒྱབ་ཡོད། དེབ་འདིའི་ནང་དུ་ཞལ་ཐང་ཁྱོན་བསྡོམས༣༠༠ལྷག་ཙམ་ལེགས་སྒྲིག་བྱས་ཡོད། གསུམ། དཔྱད་གཞིའི་རིན་ཐང་གི་ཁྱད་ཆོས་དང་ལྡན་ཏེ།《ཞང་ཞུང་ལྷ་རིས་སྒྱུ་རྩལ་གཅེས་བསྒྲིགས》ནི་ད་ཕན་བོན་བསྟན་གྱི་ཞལ་ཐང་དེབ་གཟུགས་དཔེ་སྐྲུན་བྱས་པ་ལས་རིགས་མང་བ་དང་ཤོང་རྒྱ་ཆེས་ཆེ་ཤོས་སུ་གྱུར་ཡོད་དེ། མདོ་དབུས་ཁམས་གསུམ་ན་ཡོད་པའི་གསར་རྙིང་གི་ཞལ་ཐང་དང་། བོན་གསར་རྙིང་གི་ཞལ་ཐང་། དུས་འགྱུར་གསར་རྙིང་གི་ཞལ་ཐང་། འབྲི་མཁན་མི་འདྲ་བའི་ཞལ་ཐང་སོགས་ཞལ་ཐང་རིགས་མི་འདྲ་བ་མང་པོ་ཡོད་པས་གནའ་རབས་རིག་གནས་ཀྱི་རྒྱབ་ལྗོངས་དང་། མི་རིགས་ཀྱི་ཁྱད་ཆོས། སྲོལ་རྒྱུན་གྱི་རིག་གནས་སོགས་མཚོན་ཐུབ་པར་མ་ཟད། ཞལ་ཐང་ལོ་རྒྱུས་དང་། སྒྱུ་རྩལ། ཆོ་ག  ཚད་ལྡན་གྱི་ཡིག་ཆ། པར་རིས་རིག་པ་སོགས་ཕྱོགས་མང་པོའི་ཐད་ནས་སྣ་མང་རིག་གནས་སྔོག་འདོན་བྱས་པའི་རིན་ཐང་ཡོད། བཞི། ཐུན་མོང་ཁས་བླང་རུང་བའི་ཁྱད་ཆོས་ཡོད་དེ།《ཞང་ཞུང་ལྷ་རིས་སྒྱུ་རྩལ་གཅེས་བསྒྲིགས》ནང་གི་ཞལ་ཐང་ཚང་མ་ནི་སྟོན་པ་གཤེན་རབ་མི་བོས་གསུངས་པའི་མདོ་དྲི་མེད་གཟི་བརྗིད་ལས་རྒྱལ་བུ་རྒྱལ་སར་བཏོན་པའི་མདོ་ལ་ཁུངས་བཅོལ་ནས་བྲིས་ཡོད་པ་དང་། འདི་ཡི་གོ་རིམ་བསྒྲིགས་སྟངས་སོགས་ནི་བོན་གྱི་སྣ་མང་ཆོ་ག་དང་། ཚད་ལྡན་གྱི་ཡིག་ཚོགས། མཁས་པའི་ཞལ་རྒྱུན་སོགས་ལ་གཞིར་བཅོལ་ནས་བསྒྲིགས་ཡོད། གཙོ་བོ་གསུང་རབ་དང་མཐུན་པའི་སྒོ་ནས་གོ་རིམ་བསྒྲིགས་པ་འདིས། རིག་པའི་གནས་ལྔ། སྤང་ལམ་འདུལ་བ་མདོ། བསྒྱུར་ལམ་གསང་བ་སྔགས། གྲོལ་ལམ་རྫོགས་པ་ཆེན་པོ་སོགས་ཀྱི་བླ་རབས་དང་ལྷ་རབས་སོགས་དུས་རབས་རིམ་བྱུང་གི་རྒྱུད་འཛིན་གསལ་བོར་བསྟན་པ་དང་། བོན་རྙིང་མ་དང་བོན་གསར་མ་གཉིས་ལ་ཆོ་ག་མང་བ་དང་། ཆོ་ག་ཆ་ཚང་བ་ཞིག་མངོན་འགྱུར་བྱུང་ཡོད་པར་བསྟན་ཐུབ།ལྔ།བོན་ལུགས་རྒྱུན་འཛིན་རྣལ་མར་བྱས་པའི་ཁྱད་ཆོས་ཡོད་དེ།《ཞང་ཞུང་ལྷ་རིས་སྒྱུ་རྩལ་གཅེས་བསྒྲིགས》ནང་དུ་བཀོད་པའི་ཞལ་ཐང་ཐམས་ཅད་ནི་སྟོན་པའི་ཞལ་ལས་གསུངས་པའི་བཀའ་དང་། རྗེས་འཇུག་མཁས་པ་དག་གིས་གསུངས་པའི་བཀའ་བརྟེན་གཉིས་ལ་ཁུངས་བཅོལ་ནས་ལྷ་རིས་དང་གཟུགས་བརྙན། ཆག་ཚད་དང་ཐིག་ཚད། ཚོན་མདོག་དང་སྒྱུ་རྩལ་སོགས་བོན་རང་ལུགས་ཀྱི་གསོན་ཉམས་དང་ལྡན་ཞིང་རང་རང་གི་ཁྱད་ཆོས་ལྟར་འབྲི་བཞེངས་བྱས་འདུག ཞལ་ཐང་ཐད་ལ་སྒྱུ་རྩལ་རང་བཞིན་དང་། དམིགས་བསལ་རང་བཞིན། ས་ཁོངས་རང་བཞིན། སྣ་མང་རང་བཞིན། ཆ་ཚང་རང་བཞིན་བཅས་ཁྱད་ཆོས་འབུར་དུ་དོད་པ་བཅས་ཀྱི་དེབ་འདིས་གནའ་བོའི་བོན་གྱི་ཤེས་རིག་དང་དེང་གི་བསམ་པའི་དཔལ་ཡོན་གཉིས་ཀ་ལ་ཕན་ནུས་ཡོད་སྲིད་པ་ཡིན་ནོ།།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།