ཉེ་ཆར། རྒྱལ་ཁབ་མི་རིགས་ཡིག་རིགས་དཔེ་སྐྲུན་རྣམ་གྲངས་མཛོད་ཀྱི་རྣམ་གྲངས་དང་མི་རིགས་ཡིག་རིགས་དཔེ་སྐྲུན་མ་དངུལ་རོགས་སྐྱོར་རྣམ་གྲངས《འབྲུག་ཆུའི་དམངས་ཁྲོད་གནའ་རབས་བོན་གྱི་དཔེ་རྙིང་ཕྱོགས་བསྒྲིགས》ཞེས་པའི་དེབ་ཕྲེང་བཞི་བ (བསྡོམས་པས་དེབ25)དངོས་སུ་དཔེ་སྐྲུན་འགྲེམས་སྤེལ་བྱས། རྣམ་གྲངས་དེ་ནི་ཀན་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས་དང་འབྲུག་ཆུ་རྫོང་གིས་ཚོགས་པ་རྩ་འཛུགས་དང་འཚོལ་བསྡུ་ལེགས་སྒྲིག  ཀན་སུའུ་རིག་གནས་དཔེ་སྐྲུན་ཁང་གིས་ཇུས་འགོད་དཔེ་སྐྲུན་བྱས་པའི་བོད་ཡིག་གནའ་དཔེའི་དཔེ་སྐྲུན་ལས་གྲྭ་ཞིག་རེད། མིག་སྔར། དཔེ་ཚོགས་འདིར་ཁྱོན་བསྡོམས་དེབ་ཕྲེང་བཞི་སྟེ་དེབ་བརྒྱ་ཐམ་པ་པར་སྐྲུན་བྱས་ཡོད།     དེབ་ཕྲེང་བཞི་བའི་ནང་དུ་ཁྱོན་བསྡོམས་བམ་པོ386བསྡུས་ཡོད་པ་དང་། གཙོ་བོ་ནི་སྲིད་པ་བོན་གྱི་དཔེ་རྙིང་ཡིན། དེའི་ནང་དོན་ཐོག་ནས་མཚོ་བོད་ས་མཐོའི་སྔ་དུས་ཀྱི་བོད་ཀྱི་ལོ་རྒྱུས་དང་ཤེས་རིག  སྤྱི་ཚོགས་འཚོ་བ། གནམ་རིག་ས་ཁམས། སྨན་བཅོས་ཚན་རྩལ་བཅས་མཚོན་པ་དང་། གནའ་དཔེ་དེ་དག་ཏུ་བོད་ཀྱི་མེས་པོ་གོང་མ་དག་གི་གནའ་བོའི་དྲན་ཤེས་ཉར་ཚགས་བྱས་ཡོད་པས་ལོ་རྒྱུས་དཔྱད་གཞིའི་རིན་ཐང་དང་རིག་གཞུང་ཞིབ་འཇུག་གི་རིན་ཐང་གལ་ཆེན་ལྡན་ཡོད། དེབ་ཧྲིལ་བོ་ཚོན་ཁྲ་ཅན་གྱི་པར་འདེབས་ཀྱི་རྣམ་པའི་ཐོག་ནས་འབྲུག་ཆུའི་བོན་ཆོས་དཔེ་རྙིང་ལོ་རྒྱུས་ཡུན་རིང་དང་གནའ་བོའི་མཛེས་སྡུག་ལྡན་པའི་གདོད་མའི་རྣམ་པ་དངོས་སུ་བསྐྱར་དུ་མངོན་ཡོད། དཔེ་རྙིང་དེ་དག་ཚང་མ་ས་གནས་དེ་གའི་བོད་རིགས་མང་ཚོགས་ཀྱིས་ཉར་ཚགས་བྱས་ཡོད་པས་ཁྱིམ་རྒྱུད་ནས་རྒྱུན་འཛིན་གྱི་ཁྱད་ཆོས་ལྡན་ཕྱིར་ཉར་ཚགས་ཁྱིམ་ཚང་ཚན་པར་བཟུང་ནས་ལེགས་སྒྲིག་དང་ཕྱོགས་བསྒྲིགས་བྱས། དཔེ་རྙིང་དེ་དག་མང་ཆེ་ཤོས་སུ་གནའ་བོའི་བོད་ཡིག་གི་སྐུང་ཡིག་དང་བོད་ཡིག་བཀས་བཅད་མ་བྱས་གོང་གི་ཐ་སྙད་མང་པོ་ཡོད་ཅིང་། དཀར་ཆག་སྒྲིག་སྐབས་ཚང་མ་ཇི་མ་ཇི་བཞིན་དུ་སོར་འཇོག་བྱས་ནས་དཔེ་རྙིང་གི་རྣམ་པ་མངོན་ཏེ་དཔེ་རྙིང་ཆ་ཚང་གི་གདོད་མའི་རང་བཞིན་དང་ཆ་ཚང་རང་བཞིན་ཁག་ཐེག་བྱས་ཡོད།    འཛམ་གླིང་ཐོག་མཐོང་དཀོན་པའི་དམངས་ཁྲོད་ཀྱི་གནའ་བོའི་བོད་ཡིག་གི་བོན་གྱི་དཔེ་རྙིང་དེ་དག་ནི་བོད་ཀྱི་གནའ་བོའི་ཤེས་རིག་གི་བདེན་དཔང་ཡིན་ལ། བོད་ཀྱི་གནའ་བོའི་སྤྱི་ཚོགས་ལ་ཞིབ་འཇུག་བྱེད་པའི་དཔྱད་གཞིའི་བང་མཛོད་ཅིག་ཀྱང་ཡིན། གནའ་བོའི་བོད་ཡིག་གི་བོན་གྱི་དཔེ་རྙིང་དེ་དག་འཚོལ་བསྡུ་དང་མྱུར་སྐྱོབ། ལེགས་སྒྲིག དཔེ་སྐྲུན།ཞིབ་འཇུག་བཅས་བྱ་རྒྱུ་དེ་མི་རིགས་རིག་གནས་སྲུང་སྐྱོང་དང་རྒྱུན་འཛིན་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཕུན་སུམ་ཚོགས་པར་གཏོང་བ་དང་དར་སྤེལ་གཏོང་རྒྱུར་དོན་སྙིང་ཧ་ཅང་གལ་ཆེན་ལྡན་ཡོད།།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།