གཤེན་བསྟན་གཡུང་དྲུང་བོན་གྱི་གཞི་ལམ་འབྲས་བུའི་རྣམ་བཞག་པར་དུ་བསྐྲུན་པ།

   དེབ་འདི་ནི་རབ་བྱུང་བཅུ་པའི་ཆུ་སྟག་༡༦༦༢་ལོར་འཁྲུང་པའི། མཁས་དབང་དགེ་གྲགས་ཀྱིས་མཛད་པ། གཤེན་བསྟན་གཡུང་དྲུང་བོན་གྱི་མདོ་སྔགས་རྫོགས་གསུམ་གྱི། གཞི་ལམ་འབྲས་བུའི། སྨོན་ལམ་དེ་ཉིད་གཞིར་བཞག་ནས། གཤེན་བསྟན་གཡུང་དྲུང་བོན་གྱི་གཞི་ལམ་འབྲས་བུའི་རྣམ་བཞག་སྟེ། གཞིའི་ལྟ་བ་ཇི་ལྟར་གཏན་ལ་དབབ་ལུགས་བཀའ་ཡི་འཁོར་ལོ་ཞེས་པར་བཀོད་ཡོད། ། ལམ་ཐེག་པ་རིམ་དགུ་དང་སྒོ་བཞི་མཛོད་ལྔ། མདོ་སྔགས་རྫོགས་གསུམ་བཅས་ཀྱི་ལྟ་སྒོམ་སྤྱོད་པ་ཇི་ལྟར་ཡིན་པ་ལུང་གི་འཁོར་ལོར་བཀོད་ཡོད་ལ། དེའང་སངས་རྒྱས་གཤེན་རབ་མི་བོས། བོན་གྱི་འཁོར་ལོ་རིམ་པ་གསུམ་བསྐོར་གནང་བ་དང་རྗེས་སུ་མཐུན་པར། ལུང་གི་འཁོར་ལོར་ནང་གསེས་འཁོར་ལོ་གསུམ་དུ་དབྱེས་ཡོད། ། འཁོར་ལོ་དང་པོར། ཕྱི་སྤོང་ལམ་འདུལ་བ་མདོ་ཡིས། གཞིའི་ལྟ་བ་ཇི་ལྟར་གཏན་ལ་དབབ་ལུགས་དང་། ལམ་ལྟ་སྒོམ་སྤྱོད་པ་ཇི་ལྟར་ཉམས་སུ་ལེན་ཚུལ། འབྲས་བུ་ཅི་ལྟར་ཐོབ་ཚུལ་བཅས་བཀོད་ཡོད། །  འཁོར་ལོ་གཉིས་པར། ནང་བསྒྱུར་ལམ་གསང་བ་སྔགས་ཀྱིས། གཞིའི་ལྟ་བ་ཇི་ལྟར་གཏན་ལ་དབབ་ལུགས་དང་། ལམ་ཏིང་འཛིན་རྣམ་གསུམ། བསྐྱེད་རྫོགས་གཉིས་ཀྱིས་སྒོ་ནས་བསྙེན་སྒྲུབ་ལས་གསུམ་ཇི་ལྟར་ཉམས་སུ་ལེན་ཚུལ། འབྲས་བུ་རིག་འཛིན་རྣམ་བཞི་ཅི་ལྟར་གྲུབ་ཚུལ་བཅས་བཀོད་ཡོད། །   འཁོར་ལོ་གསུམ་པར། རྫོགས་པ་ཆེན་པོས། གཞི་ལྟ་བ་ཅི་ལྟར་གཏན་ལ་དབབ་ལུགས། ལམ་ཁྲིགས་ཆོད་དང་ཐོད་རྒལ་ཇི་ལྟར་ཉམས་སུ་ལེན་ལུགས། འབྲས་བུ་ཚེ་གཅིག་ལུས་གཅིག་ལ་འཇའ་ལུས་འོད་སྐུར་ཇི་ལྟར་གྲུབ་ཚུལ་བཅས། མདོ་སྔགས་རྫོགས་གསུམ་གྱི་གཞུང་ཆེན་ཁག་ནས་ཇི་ལྟར་འབྱུང་བ་ལྟར་བཀོད་ཡོད།། འཇུག་ཏུ་མཐར་ཐུག་གི་འབྲས་བུ་ཇི་འདྲ་ཞིག་ཐོབ་ཚུལ་རིག་པའི་འཁོར་ལོ་ཞེས་པ་བཅས། ། སངས་རྒྱས་གཤེན་རབ་མི་བོའི་བཀའ་ལུང་ཁག་གཞིར་བཞག ། ད་རུང་བཞེད་པ་མི་མཐུན་པའི་རིགས་དང་། གལ་གནད་ཁག་ལ། འཕགས་མཆོག་སེམས་དཔའི་བཀའ་བརྟེན་ཁག་གིས། གསལ་ཁ་གཏོད་གང་ཐུབ་བྱས་ཡོད་ལ། རང་གི་རིག་པས་དཔྱད་གླེང་གང་དཔོགས་དང་། སློབ་དཔོན་གྱིས་ཞལ་ཁྲིད་མན་ངག་རྣམས་རྩལ་དུ་སྟོན་ནས། བསེད་བཀྲོལ་གང་ཐུབ་ཐུབ་བྱས་ཡོད། ། དེབ་འདིའི་སྤྱི་ཁོགས་དབུབས་ལུགས་ནི། སྤྱིར་གཡུང་དྲུང་བོན་ལུགས་ཀྱི་གཞི་དང་ལམ་དང་། འབྲས་བུ་བཅས་སྡེ་ཚན་ཆེན་པོ་གསུམ་དུ་ཕྱེས་ཤིང་། དེ་ཡང་བོན་ལུགས་ཀྱི་ལྟ་བའི་རྨང་གཞི་རྫོགས་པ་ཆེན་པོའི་གཞིའི་ཁོགས་ཇི་ལྟར་དབབ་ཚུལ། སེམས་ཀློང་མན་ངག་སྡེ་གསུམ་གྱི་གཞུང་སོ་སོར་ནས་ཇི་ལྟར་བསྟན་པ་ལྟར་བཀོད་ཡོད་ལ།  ལམ་མདོ་སྔགས་རྫོགས་གསུམ་སོ་སོས་སྤོང་བསྒྱུར་གྲོལ་གསུམ་གྱི་སྒོ་ནས་སྒྲུབ་པས།   བོན་སྒོ་ཕྱི་ནང་གསུམ་སོ་སོར་མཐར་ཐུག་གི་འབྲས་བུ་ཇི་ལྟར་ཐོབ་ཚུལ་བཅས་རིམ་པར། སངས་རྒྱས་ཀྱི་བཀའ་དང་བཀའ་བརྟེན་ཁག་ལས། ཇི་ལྟར་བསྟན་པ་རྣམས་མདོར་བསྡུས་ནས་བཀོད་ཡོད། དེའང་མདོའི་གཞི་ལམ་འབྲས་བུའི་རྣམ་བཞག་བསྟན་ཞོར། སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེའི་ཞལ་སྔ་ནས། ཐེག་འགྲེལ་མེ་ལོང་དགུ་བསྐོར་གྱི་དཔེ་ཁྲིད་ཐོབ་སྐབས་ཟིན་བྲིས་ཁག་གཞིར་བཞག་ནས། བོན་ལུགས་དབུ་མའི་ལྟ་བའི་སྐོར་གླེང་སློང་བྱས་ཡོད།  དེའང་དུས་རབ་བཅུ་གསུམ་པ་ཡན་དུ། བོན་རང་ལུགས་ཀྱི་དབུ་མའི་ལྟ་བར། དོན་དམ་བདེན་པ་བློ་འདས་ཡིན་པར་བཞེད་སྲོལ་ཞིག་དང་།  ཡང་འགའ་ཞིག་གིས་དབུ་མའི་ལྟ་བ་སྟོང་ལྟ་མེད་དགག་རྐྱང་པར་འདོད་ཚུལ་དང་།  འགའ་ཞིག་གིས་བདེན་གཉིས་དབུ་མའི་ལྟ་བ་དོན་དམ་བློའི་བཟུང་བྱ་ཡིན་པར་འདོད་མཁན་བཅས་ལ།  སངས་རྒྱས་ཀྱི་བཀའ་དང་བཀའ་བརྟེན་ལས། ལུང་འདྲེན་དང་བཅས་བུ་མའི་ལྟ་བ་དོན་དམ་ཞེས་པ། བློས་བཟུང་བྱ་ཡིན་མིན་དང་། བློ་འདས་ཡིན་མིན་བཅས། ཐེག་རིམ་གཡུང་དྲུང་སེམས་དཔའ་སྤྲོས་མེད་པའི་ལུགས་ལྟར་བགྲོ་གླེང་གིས་ཚུལ་དུ་ཅུང་ཙམ་མོལ་ཡོད། །  གསང་སྔགས་ཀྱི་གཞི་ལམ་འབྲས་བུའི་རྣམ་བཞག་དང་སྒྲུབ་ཐབས་འཕྲིན་ལས་བསྟན་ཞོར། གསང་སྔགས་འཆང་བ་རྣམས་གསང་སྔགས་ཀྱི་སྒྲུབ་པར་ཞུགས་དུས། ཚིག་དོན་ཟུང་འབྲེལ་དང་། ལྟ་སྤྱོད་ཟུང་འབྲེལ་ཇི་ལྟར་དགོས་ཚུལ། སྦྱང་བྱ་སྦྱོང་བྱེད་ཇི་ལྟར་སྦྱོང་ཚུལ་སོགས། བཀའ་དང་ལུང་ལས་ཇི་ལྟར་འབྱུང་བ་ཁག་གཞིར་བཞག་ནས།  དེ་ལ་རང་གིས་རིག་པས་དཔྱད་དེ། གསལ་ཁ་གཏོད་གང་ཐུབ་བྱས་ཏེ་གླེང་ཡོད།། རྫོགས་པ་ཆེན་པོའི་སེམས་ཀློང་མན་ངག་སྡེ་གསུམ་གྱི། གཞི་ལམ་འབྲས་བུའི་རྣམ་བཞག་བསྟན་ཞོར་དུ། རྫོགས་པ་ཆེན་པོའི་གནས་ལུགས་ངོ་སྤྲོད་གདབ་ལུགས་དང་། གནས་ལུགས་ཀྱི་ངོ་བོ་སྐྱོང་ཚུལ་སོགས། སྟོད་གྲྭ་ས་གོང་འོག་གི་བཞེད་སྲོལ་ཇི་ལྟར་ཡིན་པ། སྨན་རིའི་ཡོངས་འཛིན་དཔོན་སློབ། བསྟན་འཛིན་རྣམ་དག་རིན་པོ་ཆེ་མཆོག་གི་དྲུང་ནས་བཀའ་རྒྱུད་སྐོར་བཞིའི་ཞལ་ཁྲིད་ཐོབ་སྐབས། ཇི་ལྟར་ཐོས་པ་བཞིན་གླེང་ཡོད་ལ། ། དེ་བཞིན་རིན་པོ་ཆེའི་གསུང་རྩོམ་ཁག་ཏུ་ཁ་གསལ་འཁོད་པ་འགའ་ཡང་ལུང་འདྲེན་ཞུས་ཡོད། ། བར་ཁྱུང་ཡུལ་མེ་སྟོན་གོང་འོག་གིས། ཨ་ཁྲིད་ཐུན་མཚམས་བཅོ་ལྔ་པའི་ཁྲིད་རྒྱུན་ལྟར།  གནས་ལུགས་ཇི་ལྟར་ངོ་སྤྲོད་ཚུལ་དང་གནས་ལུགས་ཀྱི་ངོ་བོ་སྐྱོང་ཚུལ་རྣམས། མེ་སྟོན་ལྷུན་གྲུབ་རྒྱལ་མཚན་མཆོག་དང་དབུ་མཛད་གཡུང་དྲུང་དབང་གྲགས་དྲུང་ནས། རང་གི་ཐོས་པས་ཞལ་ཁྲིད་ཐོབ་པ་ལྟར་གླེང་ཡོད།། དེ་བཞིན་སྨད་ཤར་རྫ་འཇའ་ལུས་པས། གནས་ལུགས་ཅི་ལྟར་ངོ་སྤྲོད་ཚུལ་དང་། གནས་ལུགས་ཀྱི་ངོ་བོ་ཇི་ལྟར་སྐྱོང་ཚུལ་རྣམས། ཁྲ་དགོན་མཁན། སྐལ་བཟང་གཡུང་དྲུང་དང་། རྩེ་དྲུག་སྒྲུབ་མཁན། འབྲུག་པ་གཙུག་ཕུད། ཁྱུང་ནག་བསམ་གཏན་གླིང་གི་བླ་མ། མཐའ་ཞུ་པད་མ་ཀུན་ལེགས། རྣལ་འབྱོར་བོན་དབྱིངས་རང་གྲོལ། ཚེ་མཚམས་པ་ཚུལ་ཁྲིམས་ཡེ་ཤེས་རིན་པོ་ཆེ་སོགས་ཀྱི་དྲུང་ནས། ཞལ་ཁྲིད་མན་ངག་ཐོབ་པ་རྣམས་ཇི་བཞིན་གླེང་ཡོད།། མདོར་ན་སྟོད་སྨད་བར་གསུམ་གྱི་རྫོགས་པ་ཆེན་པོའི། གནས་ལུགས་ངོ་སྤྲོད་གདབ་ཚུལ་དང་། གནས་ལུགས་ཀྱི་ངོ་བོ་སྐྱོང་ཚུལ་རྣམས། ཆུ་ནང་དུ་ཆུ་བླུགས་པ་ཅི་བཞིན་རོ་གཅིག་ཡིན་མིན་དང་། ཁྱད་པར་ཡོད་མེད་སོགས་གསལ་བར་བསྟན་ཡོད། །   དེ་བཞིན་སངས་རྒྱས་ཀྱི་བཀའ་དང་བཀའ་བརྟེན་ལ་དཔེར་བལྟ་བྱས་པ་དང་། བླ་མ་དང་སློབ་དཔོན་དེ་དག་གིས་ཞལ་ཁྲིད་ཀྱིས་བཀའ་དྲིན་ལས། རང་གིས་སྔོན་མ་ཞིག་ནས་གནས་ལུགས་ཀྱི་དོན་མ་ནོར་བ་རྟོགས་ཤིང་། གནས་ལུགས་ཀྱི་ངོ་བོ་སྐྱོང་བར། ངེས་ཤེས་ཡིད་ཆེས་ཇི་ལྟར་སྐྱེས་པ་སོགས། གནས་ལུགས་ཀྱི་ངོ་བོ་སྐྱོང་ཚུལ་ཞིབ་ཕྲར་གླེང་ཡོད།། ལར། གཤེན་བསྟན་གཡུང་དྲུང་བོན་གྱི་བཀའ་དང་བཀའ་བརྟེན་གྱི་གཞུང་ཆེན་ཁག་གི་ཡང་བཅུད་སྙིང་པོ་རྣམས། ཕྱོགས་གཅིག་ཏུ་བཀོད་ནས། རིག་པས་རྩལ་དུ་བཏོན་ནས་དཔྱད་གླེང་བྱས་པས་མཐུ་སྟོབས་ནུས་བྱིན་རླབས་བཅས་ཀྱིས། ། ད་ལྟ་དང་མ་འོང་པར། སངས་རྒྱས་གཤེན་རབ་མི་བོའི་རིང་ལུགས་དྲི་མ་མེད་པ། དབུ་མ་སྤྲོས་བྲལ་གྱི་ལྟ་བ་ཡང་དག་པ་རྟོགས་པའི་རྒྱུ་དང་། གསང་སྔགས་འཆང་བ་རྣམས། ཚེ་འདི་དང་ཕྱི་མར་གྲུབ་པའི་རྟགས་མཚན་རེ་ཐོན་པའི་རྐྱེན།  ནགས་ཚལ་མཚོ་གླིང་བྲག་ཕུག་སྐྱིལ་བུ་སོགས་སུ། གནས་ལུགས་ཐིག་ལེ་ཉག་གཅིག་ཉམས་ལེན་མཛད་མཁན། རྣལ་འབྱོར་ཕོ་མོ་རྣམས། གནས་ལུགས་ཀྱི་ངོ་བོ་མ་ནོར་བ་ངོ་འཕྲོད་པའི་གྲོགས་སུ་གྱུར་སྟེ། གནས་ལུགས་རིག་པའི་ཡེ་ཤེས་རྒྱུད་ལ་འཆར་ཞིང་། ཡེངས་མེད་བརྩོན་འགྲུས་དྲག་པོས་ཉམས་སུ་བླངས་པས་རྒྱུ་རྐྱེན་རྟེན་འབྲེལ་ལས། རྣལ་འབྱོར་འཁྲུལ་ཞིག་ཕོ་མོ་ས་ཡི་རྡུལ་གྲངས་ལས་འདས་པར་འཕེལ་ནས། དེ་དག་ཐམས་ཅད་ཚེ་གཅིག་ལུས་གཅིག་ལ་བློ་ཟད་བོན་ཟད་སྟེ། འཇའ་ལུས་འོད་སྐུར་འགྲུབ་པ་དང་། །  དེ་ལ་བརྟེན་ནས་སངས་རྒྱས་ཀྱི་བསྟན་པ་དར་ཞིང་རྒྱས་ནས། མཁའ་མཉམས་སེམས་ཅན་ཐམས་ཅད་སངས་རྒྱས་ཐོབ་པའི་རྒྱུ་རུ་འགྱུར་བར་སྨོན། ། དེ་བཞིན་གཤེན་བསྟན་གཡུང་དྲུང་བོན་ལ་རྒྱུས་མངའ་དེ་ཙམ་མེད་མཁན་དང་། གཡུང་དྲུང་བོན་གྱི་གཞུང་ཆེན་ཁག་ལ་གཟིགས་རྟོགས་མི་ཐུབ་པ་ཚོས། དཔེ་ཆ་འདི་ལས། གཡུང་དྲུང་བོན་གྱི་བསྟན་པ། བོན་སྒོ་བརྒྱད་ཁྲི་བཞི་སྟོང་། གསས་མཁར་སུམ་བརྒྱ་དྲུག་བཅུ། ལྷོ་བྱང་དབུས་གསུམ་གྱི་ཐེག་པ་རིམ་དགུ །བོན་སྒོ་བཞི་མཛོད་ལྔ།། མདོ་སྔགས་རྫོགས་གསུམ། དབུ་མ་བདེན་གཉིས། ། གནས་ལུགས་ཐིག་ལེ་ཉག་གཅིག་ཅེས་པ་རྣམས། གང་དང་གང་ཡིན་པ་ཟུར་ཙམ་ཤེས་རྟོགས་འབྱུང་ངེས་ལ། གཤེན་བསྟན་གཡུང་དྲུང་བོན་གྱི་གཞི་ལམ་འབྲས་བུའི་རྣམ་བཞག་ཇི་ལྟར་ཡིན་པ་རགས་ཙམ་རྟོགས་ཐུབ། དེ་བཞིན་གཡུང་དྲུང་བོན་པོ་རྣམས་ཀྱིས། གཞིའི་ལྟ་བ་ཇི་འདྲ་ཞིག་རྟོགས་པ་དང་། ལམ་སྒོམ་པ་ཇི་འདྲ་ཞིག་ཉམས་སུ་ལེན་པ།  འབྲས་བུ་སངས་རྒྱས་ཇི་ལྟར་ཐོབ་པ་བཅས་རྒྱུས་ལོན་ངེས་ཡིན།།  ཞེས་རྩོམ་བསྒྲིགས་པས་བོད་ཆུ་སྟག་ལོའི་ཧོར་ཟླ་ལྔ་པའི་ཚེས་དྲུག་ཉིན་བཏེགས་སོ།། ཐ་ཚན་མུ་ཙུག་སྨར་རོ། ། དགེའོ། ། བཀྲ་ཤིས་སོ། །

དེབ་འདི་གཉིས་བླུ་དགོས་ན། ལྷ་སའི་དཔེ་ཁང་ཁག་དྲུག་ཙམ་ཡོད་འདུག་སྟེ། ལྷ་སའི་གངས་ལྗོངས་དཔེ་ཀློག་ཁང་། ས་གནས་བར་བསྐོར་ཁྲོམ་རའི་ཐོག་བརྩེག་ཁར། འབྲེལ་གནས་ཁ་པར་ཨང་གྲངས།  17808913375  
ལྷ་སའི་ལྔ་རིག་དཔེ་ཁང་། ས་གནས་བར་བསྐོར་གྱི་ཤར་ཕྱོགས་སུ། འབྲེལ་གནས་ཁ་པར་ཨང་གྲངས། 15348986780
ལྷ་སའི་དགེ་ལེགས་དཔེ་ཁང་ས་གནས་བར་བསྐོར་གྱི་ལྷོ་ནུབ་ཀླུ་སྒུག་ལ་འགྲོ་སའི་ལམ། འབྲེལ་གནས་ཁ་པར། 13889096991
ལྷ་སའི་དཔལ་བརྩེགས་དཔེ་ཁང་། ས་གནས་ཅང་སུའུ་ལམ་མ་བུ་བདེ་སྲུང་སྨན་ཁང་གི་ཁ་སྤྲོད།  འབྲེལ་གནས་ཁ་པར་ཨང་གྲངས།15348908363          
དེ་བཞིན་ལྷ་སའི་འབྲོག་དཔེ་ཁང་། ཀརྨ་ཀུན་བཟང་དཔེ་ཁང་། སྤྲེལ་སྨྱུག་དཔེ་ཁང་བཅས་སུ་ཡོད་འདུག་མོད། བོད་དབུས་ཁམས་གསུམ་གང་སར་སྐུར་དགོས་ན། འབྲེལ་གནས་ཁ་པར་ཨང་གྲངས་18589153761འདི་ལ་འབྲེལ་བའམ།
ཡང་ན་འོག་གི་བཤེར་རིས་འདིའི་ཐོག་ལ་འབྲེལ་བ་གནང་དང་ས་གནས་གང་སར་སྐུར་ཐུབ།