ཡེ་ཤེས་གཏེར་གྱི་ཕུང་པོ།

མདོ་སྨད་སྨྲ་སེང་རྣམ་གསུམ་གྱི་ཡ་གྱལ་ཡོངས་ཀྱི་དགེ་བའི་བཤེས་གཉེན་ཆེན་མོ༧རྗེ་བཙུན་ནམ་མཁའ་ཚུལ་ཁྲིམས་རིན་པོ་ཆེ་དགོངས་པ་བོན་དབྱིངས་སུ་བསྡུས་པའི་ཚུལ་བསྟན་པ་ལ་གདུང་སེམས་ཆེན་པོས་མྱ་ངན་ཞུ་བ།

　　རྩེ་ཞིག་ཚང་ཤེས་རབ་བསྟན་པའི་ཟླ་བ།

　　ཀ་དག་བོན་སྐུའི་སྟོན་པ་ཀུན་ཏུ་བཟང་།།

　　ཁ་དོག་གསལ་རྫོགས་ལོངས་སྐུ་སྨྲ་བའི་སེང་།།

　　ག་ཤེད་དབྱིངས་བཞུགས་སྤྲུལ་བའི་སྐུ་མཆོག་མཚན།།

　　ང་ཡི་བཤེས་གཉེན་ནམ་མཁའ་ཚུལ་ཁྲིམས་རྗེ།།

　　ཅ་དག་ཁྲིམས་ལྡན་བྱེ་བའི་འཁོར་ཚོགས་ཁྲོད།།

　　ཆ་བྱད་སྨ་ར་དཀར་པོའི་དྲང་སྲོང་ཚུལ།།

　　ཇ་མདོག་ངུར་སྨྲིག་གར་གྱིས་སྐུར་བཞེངས་ཏེ།།

　　ཉ་གང་འབུམ་ཕྲག་ཟླ་བའི་དཔལ་གྱིས་རྒྱུ།།

　　ཏ་ཐཱ་ག་ཏའི་གསུང་རབ་འཛིན་མའི་ཁྱོན།།

　　ཐ་ཚིག་མ་ལྷོད་མིའུ་ཐུང་གོམ་གཅིག་གིས།།

　　ད་གོང་གཞལ་ལ་ཤེས་རབ་ལྷ་ཡི་ཐུགས།།

　　ན་ཆུང་སྐབས་ནས་རྫོགས་པའི་སྤྲིངས་ཡིག་ལྡིར།།

　　པ་ལོ་བཅད་པའི་སྡོམ་བརྩོན་ཁྱུ་མཆོག་སྟེ།།

　　ཕར་ཕྱིན་དཀའ་གནད་འགྲེལ་ལ་ཉི་དབང་དངོས།།

　　བ་དཀར་འོ་མཚོ་འཕྱུར་འདྲའི་གཞུང་བརྒྱའི་མཛོད།།

　　མ་ལུས་མགྲིན་པར་བསྐྱིལ་བའི་བཤེས་གཉེན་དྲན།།

　　ཙ་རི་ཙ་གོང་གནས་ཆེན་གངས་ལྗོངས་ན།།

　　ཚ་རོང་མཉམ་མེད་བླ་མར་ཅོ་འདྲི་ཞིང་།།

　　ཛ་ཡའི་རིང་ལུགས་འཆད་རྩོད་རྩོམ་པ་ཡིས།།

　　ཝ་ལེར་གསལ་མཛད་མགོན་ཁྱེད་གཤེགས་པས་ཕངས།།

　　ཞྭ་དཀར་གྱེར་བསྟན་མདོ་སྔགས་རྫོགས་གསུམ་གྱི།།

　　ཟ་མ་ཏོག་གི་བང་མཛོད་ནོར་བུའི་དབྱིག།

　　འ་ཅག་གདུལ་བྱའི་བཀྲེས་པ་རབ་སྐོང་ཕྱིར།།

　　ཡ་མཚན་ཕངས་མེད་སྩོལ་བའི་དེད་དཔོན་དྲན།།

　　ར་བ་གངས་རིའི་བསྟན་འཛིན་གདོང་ལྔའི་ཚོགས།།

　　ལ་གོར་རིམ་གྱིས་ཕེབས་པ་བཟོད་དཀའ་ཡང་།།

　　ཤ་ཚུགས་སྐུ་ཚེ་མཐར་ཕྱིན་མཛད་བཟང་གིས།།

　　ས་སྟེང་ཤིས་པར་བསམ་ཚེ་དབུགས་དབྱུང་འཐོབ།།

　　ཧ་ཅང་དུས་ཐུང་མི་ཚེ་གློགས་ཞགས་ཁྲོད།།

　　ཧ་ལམ་ཕྱག་རྗེས་འཛིན་མས་ཐེག་དཀའ་ཙམ།།

　　ཨ་ཧོ་བཞག་ལ་སྨོན་ལམ་མཐུ་བཙན་པ།།

　　བཀུར་འོས་མགོན་རྣམས་རྟག་ཏུ་ནུབ་མེད་ཡིན།།

　　དེ་ལྟར་མི་ལོ་དགུ་བཅུའི་སྐུ་ཚེ་བསྟན་དོན་དུ་ཉིན་གཅིག་གི་བགྱི་བ་ལྟར་ཐོས་བསམ་ཉམས་བཞེས་དང་།འཆད་ཉན་བཤད་སྒྲུབ་འབའ་ཞིག་གི་ལས་ལ་བསྟིམས་གནང་མཛད་པའི་ཐུགས་སྟོབས་འགྲན་ཟླ་མེད་པ་སྟེ།ཡོངས་ཀྱི་དགེ་བའི་བཤེས་གཉེན་ཆེན་མོ་༧རྗེ་བཙུན་ནམ་མཁའ་ཚུལ་ཁྲིམས་རིན་པོ་ཆེ་མཆོག་གི་དགོངས་པ་གཞན་དོན་དུ་གཤེགས་པ་དྲ་ལམ་ནས་མཐོང་ཚེ།སློབ་འབངས་ཡོངས་ཀྱི་གྲལ་མཐའ་བ་རྩེ་ཞིག་ཚང་ཤེས་རབ་བསྟན་པའི་ཟླ་བར་འབོད་པ་དེས་གདུང་སེམས་ཆེན་པོས་འཕྲལ་མར་སྦྱར་བ་འདིས་ཀྱང་།འགྲོ་རྣམས་གནས་སྐབས་ཀུན་ཏུ་ཐེག་པ་མཆོག་གི་དགེ་བའི་མགོན་དང་མི་འབྲལ་བའི་རྒྱུ་རུ་གྱུར་ཅིག་གུ།

༢༠༡༩/༥/༡/