རྩེ་ཞིག་ཚང་ཤེས་རབ་བསྟན་པའི་ཟླ་བ་མཆོག་གིས་གནང་བའི་རྗེས་དྲན།

རྗེས་དྲན་དད་པའི་རང་མདངས།

ཀ་གདུང་ལྟ་བུའི་ནུས་པ་ཆེར་ཐོན་པའི།།

ཁ་བའི་ལྗོངས་ཀྱི་སྐྱེས་ཆེན་དུ་མའི་ཁྲོད།།

ག་ན་བཞུགས་ཀྱང་བསྟན་འགྲོར་རབ་བརྩེ་བ།།

ང་ཡི་མཁན་ཆེན་ཤེས་རབ་མཐར་ཕྱིན་མཆོག །

ཅ་དག་འདུལ་བའི་བཅས་མཚམས་མཆོག་ཏུ་གཙང་།།

ཆ་འགྲིག་རིམ་གཉིས་ཟབ་མོའི་དགོངས་རྟོགས་བརླིང་།།

ཇ་ཐུན་རེ་བཞིན་རྫོགས་ཆེན་གནས་ལུགས་བསྐྱངས།།

ཉ་ཟླའི་དཔལ་འབར་ཁྱེད་སྐུ་གཤེགས་པ་ཕངས།།

ཏ་ལེ་འདབ་བཞིན་སེམས་བསྐྱེད་བློ་སྟོབས་ཡངས།།

ཐ་ཚིག་མ་ལྷོད་ངེས་འབྱུང་རྩ་བ་བརྟན།།

ད་དུང་རྟག་ཆད་ལས་འདས་ལྟ་སྒོམ་ཅན།།

ན་ཡོལ་དྲང་སྲོང་ཆེན་པོ་བཞུད་པས་སྐྱོ།།

པ་སངས་མདངས་ལྟར་བསྡུ་དངོས་རྣམ་བཞིས་བརྒྱན།།

ཕ་རོལ་ཕྱིན་དྲུག་ལམ་གྱི་གཞུང་ཤིང་བརྗིད།།

བ་སྤུའི་གྲངས་འཛིན་ཚོགས་གཉིས་རིན་ཆེན་བསྡུད།།

མ་སྨད་འགྲོ་བའི་བཤེས་གཉེན་གང་དུ་ཕེབས།།

ཙ་རི་གནས་ཆེན་ཁག་ལ་ཉམས་རྟོགས་སྤར།།

ཚ་གྲང་ཁྱད་བསད་སྒོམ་སྒྲུབ་རྒྱལ་མཚན་བཙུགས།།

ཛ་ཡའི་བསྟན་པ་འཆད་ཉན་རླབས་ཀྱིས་བསྐྱངས།།

ཝ་ལེར་བསམ་ན་བཀའ་དྲིན་གཞལ་མཐའ་བྲལ།།

ཞ་འཐེང་སྐྱོན་བྲལ་ས་བཅུའི་བང་རིམ་བརྒལ།།

ཟ་ཟིར་མ་ཡིན་ལམ་ལྔ་མངོན་དུ་མཛད།།

འ་འུར་བྲལ་བའི་སྐུ་གསུམ་དགོངས་པ་བརྙེས།།

ཡ་མཚན་བླ་མ་སྲིད་ཞིའི་ཏོག་ཏུ་མཆོད།།

ར་བ་གངས་རིའི་མི་མཆོག་རེ་རེའི་བཞིན།།

ལ་ལུང་གང་ནས་རིམ་བཞིན་ཕེབས་པ་འདིས།།

ཤ་ལུ་ཁྲག་དར་གཞོན་སྐྱེས་ཡོད་སྲིད་ཚེ།།

ས་ལྟར་བརྗིད་པའི་སྤྱི་འགན་ཡོད་རབས་སྟོན།།

ཧ་ཅང་ཐག་རིང་རྒྱ་མཚོའི་འགྲམ་རྒྱུད་ནས།།

ཧ་ལས་གཏམ་གྱིས་ཡིད་སེམས་གདུང་དང་ལྷན།།

ཨ་ཆད་འུ་ཐུག་ངག་གི་རྗེས་དྲན་གཏམ།།

ཨ་མདོ་རྩེ་ཞིག་གདུང་གི་ཟླ་བས་ཕུལ།།

                ༢༠༡༩ / ༡ / ༡༨ / ཉིན་ལ།