བརྟན་བཞུགས་གསོལ་འདེབས་གསལ་འཚེར་ནོར་ཕྲེང་།

དད་གསུམ་འོ་མཚོའི་ཀློང་ནས་རྙེད་པའི་བརྟན་བཞུགས་གསོལ་འདེབས་གསལ་འཚེར་ནོར་བུའི་ཕྲེང་བ་བཞུགས་སོ།།

མཚན་དཔེས་རབ་བརྒྱན་མཛེས་ཞལ་ཡིད་འོང་སྐུ།།

ཇི་ལྟའི་ཟབ་གནད་འཆད་རྩོད་ལྷག་ལྷའི་གསུང་།།

ཇི་སྙེད་དངོས་ཀུན་ཝ་ལེར་ཤར་བའི་ཐུགས།།

ཨེ་མ་ཕ་གཅིག་དཔལ་ལྡན་བླ་མ་མཁྱེན།།

༼དབྱངས་གསལ་སོ་བཞི་མིང་གཞིར་ཚང་བའི་ཚིགས་བཅད་དོ༽

དགེ༷་ལེ༷གས་བྱེ་བས་རབ་བསྐྲུན་མཚར་སྡུག་སྐུ།།

ཚངས་སྲས་ངག་རིག་ལྷུན༷་གྲུབ༷་སྙན་རྒུའི་གསུང་།།

གདུལ་བྱ་རྒྱ་༷མཚོ་༷རྗེས་འཛིན་བརྩེ་ཆེན་ཐུགས།།

རིགས་ཀུན་འདུས་ཞལ་ཇི་སྲིད་བསྐལ་བར་བཞུགས།།

གང་སྐུ་འགྱུར༷་མེད༷་གཡུང་དྲུང་ཁམས་ལས་༷གྲུབ།།

འགག་མེད་གསུང་རབ་༷མཁས་དགུའི་རྒྱན་དུ་མཆེད།།

ལོག་ལྟའི་བྲག་རི་མཁྱེན་རྩལ་༷ཐོག་གིས་གཏོར།།

གཤེན་བསྟན་རྒྱན་གཅིག་བསྟན་འགྲོའི་དཔལ་དུ་བཞུགས།།

དམ་པ་ཁྱུང་༷གི་འོ་མཚོ་ཡངས་པ་ལས།།

དྲི་མས་ཡོངས་བཏང་སྐུ་མཆོག་འོད་དཀར་༷ཅན།།

ལྷ་མིའི་ཞིང་ཁམས་ཀུནྡའི་མཁའ་དབྱིངས་ཀྱི།།

རྒྱན་དུ་བྱོན་པས་འགྱུར་༷མེད་༷བརྟན་བཞུགས་ཀྱེ།།

སྙིགས་མའི་རང་མདངས་སྤྲིན་ནག་འཕྱུར་དྲགས་པས།།

གཤེན་བསྟན་ཉི་གཞོན་ཡོངས་སུ་བསྒྲིབས་པའི་ཚེ།།

ཐུགས་རྗེའི་འཐོར་རླུང་དྲག་པོས་གཏོར་བའི་ཤུགས།།

ཁྱོད་མིན་གཞན་ལ་འོས་པའི་སྐབས་ཡོད་དམ།།

ཆེན་པོའི་ཆེན་པོར་རློམ་པ་མང་ན་ཡང་།།

བཅུ་གཉིས་བདག་པོའི་དྲུང་དུ་མེ་ཁྱེར་བཞིན།།

ཁྱོད་ཀྱི་མཁྱེན་བརྩེ་ནུས་པའི་ཡོན་ཏན་གྱི།།

དོ་ཟླར་འོས་པ་སྲིད་འདིར་ཅང་ཡོད་དམ།།

ཁྱོད་ཀྱི་ཡེ་ཤེས་ཟེགས་མའི་ཆ་རེར་ཡང་།།

མཁྱེན་པའི་འོད་ཕུང་བྱེ་བའི་སྟོབས་རྫོགས་ཕྱིར།།

ཆེ་རྒུའི་རལ་བའི་གདན་དུ་ངལ་གསོས་ཏེ།།

མི་འཇིགས་གདོང་ལྔའི་ཁྲི་ལ་མི་འགྱིང་ངམ།།

མི་མཇེད་འཇིག་རྟེན་འདི་ཡི་རྣམ་འདྲེན་དུ།།

གཤེན་རབ་རྒྱལ་བ་ཁོ་ནས་ཁས་འཆེས་བཞིན།།

སྙིང་རྗེའི་གཞན་དབང་གྱུར་པའི་ཐུགས་སྟོབས་ཀྱིས།།

སྙིགས་མའི་ཁ་ལོ་གྱེན་དུ་མི་བསྒྱུར་རམ།།

མགོན་ཁྱོད་འཆད་རྩོད་ངག་གི་འཁོར་ལོའི་མཆོག།

ས་ཆེན་ཁྱོན་དུ་བདེ་བླག་བསྒྱུར་བའི་མཐུས།།

སྨྲ་ངན་སྟོང་གི་དོན་སྙིང་ལྐོག་མ་རུ།།

འབྱིན་པའི་གཟིགས་མོ་འགྱེད་ལ་མི་སྤྲོའམ།།

དེ་ཕྱིར་ལུང་དང་རིགས་པའི་ཟེར་བརྒྱ་བ།།

དགག་གཞག་སྤོང་བའི་མཁའ་ལ་ལེགས་བྱོན་ཏེ།།

རྨོངས་པའི་ཚང་ཚིང་ཡིབ་པའི་མཚན་མོར་སྤྱོད།།

ལོག་སྨྲའི་བློ་མིག་ལྡོང་ཕྱིར་བཞུགས་སུ་གསོལ།།

ཆགས་སྡང་རྨོངས་པའི་དུག་ཆུ་འཐུང་དྲགས་པས།།

ངན་སོང་དོང་དུ་ལྷུང་བའི་སྐྱེ་འགྲོ་ཀུན།།

ཐུགས་རྗེའི་ལྕགས་ཀྱུས་གྱེན་དུ་འདྲེན་པའི་སླད།།

སྲིད་མཐའི་བར་དུ་བརྟན་བཞུགས་གསོལ་བ་འདེབས།།

ནག་པོའི་རྩ་ལག་མུན་པའི་རྔམས་མཐུག་ཅིང་།།

རང་ལུགས་དྲི་མེད་གནམ་སྟོང་རྗེས་ཞུགས་དུས།།

ཉིད་སྐུ་མི་འགྱུར་རྒྱུ་སྐར་རྒྱལ་པོ་མཆོག།

གཤེན་བསྟན་ས་མོས་བཞད་པའི་གཉེན་དུ་བཞུགས།།

དབང་ལུང་ཁྲིད་གསུམ་སྐྱེ་ལྔའི་དབྱངས་སྙན་གྱིས།།

སྐལ་ལྡན་སྨིན་གྲོལ་མྱ་ངན་མེད་པའི་སར།།

རབ་ཏུ་འགོད་པའི་རྒྱལ་སྲས་དཔའ་བོའི་ཁུར།།

ལེགས་པར་བཞེས་ཏེ་གཡུང་དྲུང་ཁྲིར་བཞུགས་མཛོད།།

སིན་དྷུའི་རྒྱ་མཚོ་འཕྱུར་འདྲའི་ཚངས་སྤྱོད་ཀྱི།།

འདུལ་བའི་སྡེ་དང་དུང་འོད་ལ་འཁུ་བའི།།

གོས་དཀར་ལྕང་ལོ་ཕུར་ཐོགས་ཅན་གྱི་སྡེ།།

མདོ་སྔགས་ཁྲི་འཕང་མཐོན་པོར་བརྟན་བཞུགས་མཛོད།།

རླབས་ཆེན་ཚོགས་གཉིས་མ་དྲོས་ཕང་བ་ལས།།

སྤངས་རྟོགས་ཡོན་ཏན་འཛམ་བུ་པྲིཀྵའི་ལྗོན།།

ལེགས་པར་འཁྲུངས་པའི་རྨད་བྱུང་ལེགས་བྱས་ཀྱི།།

སྣང་བ་དཀར་པོས་ཁྱབ་ཕྱིར་བརྟན་བཞུགས་འབུལ།།

   ཞེས་ལུང་རྟོགས་ཡོན་ཏན་གྱི་ཆ་ལ་ས་གསུམ་ན་འགྲན་ཟླ་དང་བྲལ་བའི་མ་ཧཱ་པཎྚི་ཏ་ཆེན་པོ་སྐྱབས་་རྗེ་བོན་བརྒྱ་རིན་པོ་ཆེ་དོན་གྱི་སླད་དུ་མཚན་ནས་སྨོས་ན༧དགེ་ལེགས་ལྷུན་གྲུབ་རྒྱ་མཚོ་དཔལ་བཟང་པོའི་སྡེ་མཆོག་གི་གཞལ་དཀའི་བཀའ་དྲིན་ཝ་ལེར་དྲན་ནས།གུས་ཕྱག་ལན་མང་དང་བཅས་གང་སྐུ་མི་འགྱུར་གཡུང་དྲུང་གི་ཁྲི་ལ་བརྟན་པར་བཞུགས་པའི་གསོལ་བ་སྙིང་ནས་འདེབས་བཞིན་ཕུལ་བ་ལགས་པས། རེ་བའི་དོན་༷དེ་བཞིན་དུ་འགྲུབ་༷ཅིང་ཕྱོགས་ལས་རྣམ་པར་རྒྱལ་༷བའི་སྨོན་འདུན་དང་བཅས་ཞུ་ཞུ་ཞུ།