གོང་ས་སྨན་རི་བ།

གྱེར་བསྟན་འདེགས་པའི་གདུགས་མཆོག་ཡིན།།

མཁྱེན་དཔྱོད་ཉི་མའི་འོད་ཁྱིམ་ཡིན།།

ཐུགས་དཀྱིལ་མུ་མེད་ནམ་མཁའ་ཡིན།།

ཀུན་ཕན་གསེར་གྱི་ས་གཞི་ཡིན།།

ལྷག་བསམ་ཟླ་བའི་རང་མདངས་ཡིན།། 

མཐུན་སྒྲིལ་འགྱུར་མེད་ཨ་ལོང་ཡིན།།

ཞི་བདེ་རྒྱལ་སྲས་ལག་ལེན་ཡིན།།

མཛད་འཕྲིན་འཁོར་ལོ་སྒྱུར་རྒྱལ་ཡིན།།

དགོས་འདོད་འབྱུང་བའི་ནོར་བུ་ཡིན།།

གང་བསམ་དུས་ཐོག་ཆར་བ་ཡིན།།

ཐར་བའི་སྒོ་འབྱེད་ལྡེ་མིག་ཡིན།།

ཕྱི་ནང་གསང་བའི་མངའ་མཛོད་ཡིིན།།

སྒོ་བཞི་མཛོད་ལྔའི་ཕ་མཁར་ཡིན།།

ཐེག་དགུ་བོན་གྱི་གཏེར་བདག་ཡིན།།

ལུང་རིག་སྨྲ་བའི་གློག་ལྕེ་ཡིན།།

མན་ངག་བདུད་རྩིའི་འབྱུང་གནས་ཡིན།།

དབང་ལུང་སྣོད་ཀྱི་དཔོན་གསས་ཡིན།།

འཆད་རྩོད་རྩོམ་པའི་མངའ་དབང་ཡིན།།

ཐོས་བསམ་སྒོམ་པའི་རྒྱལ་མཚན་ཡིན།།

སྲིད་པ་འདི་ཡི་སྒྲོན་མེ་ཡིན།།

བསྐལ་བ་འདི་ཡི་འདྲེན་པ་ཡིན།།

ལྷ་མི་ཡོངས་ཀྱི་གཙུག་རྒྱན་ཡིན།།

རྒྱལ་བ་གཉིས་པའི་ཁྲི་འཛིན་ཡིན།

བོན་འབངས་ཡོངས་ཀྱི་མཆོད་སྡོང་ཡིན།།

ཉམ་ཐག་འགྲོ་བའི་དེད་དཔོན་ཡིན།།

དྭ་ཕྲུག་བྱེ་བའི་ཕ་མ་ཡིན།།

འདི་ཕྱི་བར་མའི་སྐྱབས་གནས་ཡིན།།

ཚེ་རབས་ལས་ཀྱི་ལྷ་སྐལ་ཡིན།།

དུས་དང་བསྟུན་པའི་སྟོན་པ་ཡིན།།

ཚད་མེད་བཞི་ལྡན་སེམས་དཔའ་ཡིན།།

ཚེ་ལ་དབང་ཐོབ་རིག་འཛིན་ཡིན།།

སེམས་ཉིད་རིག་པ་རང་ཤར་ཡིན།།

གཉུག་མའི་ཀློང་གྱུར་རྟོགས་ལྡན་ཡིན།།

བྱ་རྩོལ་བྲལ་བའི་རྣལ་འབྱོར་ཡིན།།

སྟོབས་བཅུ་མངའ་བའི་སངས་རྒྱས་ཡིན།།

རྒྱ་གསུམ་རལ་བའི་ཁྱུང་ཆེན་ཡིན།།

རྩལ་གསུམ་རྫོགས་པའི་སེང་ཕྲུག་ཡིན།།

སྐུ་གསུམ་ཀུན་འདུས་བླ་མ་ཡིན།།

ཁམས་གསུམ་འགྲོ་བའི་སྐྱབས་མགོན་ཡིན།།

ཡེ་གྲོལ་ཐིག་ལེ་ཉག་གཅིག་ཡིན།།

མྱང་འདས་སྒྱུ་མའི་དཔེ་སྟོན་ཡིན།།

ཞིང་གཤེགས་འཕྲིན་ལས་མཐར་ཕྱིན་ཡིན།།