འཛམ་གླིང་གི་ཉི་མ་བཞུད་པས་སྐྱོ་གདུང་།

བསྟན་འཛིན་སྐྱེས་བུས་དབུ་ཡི་ཏོག་ལྟར་བཀུར། །

རིགས་པའི་མངའ་བདག་ཀུན་གྱིས་མཐེ་མོ་བསྒྲེངས། །

ཕྱི་ནང་མཁས་པས་བསྟོད་པའི་མེ་ཏོག་འཐོར། །

ལྷར་བཅས་འགྲོ་བ་ཡོངས་ཀྱི་གཙུག་གི་ནོར། །

མཛད་འཕྲིན་ཉི་མའི་དཀྱིལ་འཁོར་མཁའ་ལ་བསྐྱངས། །

མཛད་རྗེས་འོད་རླབས་དཀར་པོ་སྲིད་གསུམ་བརྡལ། །

སློབ་འབངས་ཆུ་སྐྱེས་དགའ་ཚལ་ཕྱོགས་ཀུན་བསྐྲུན། །

བསྟན་འགྲོའི་བཞེད་དགོངས་དྲི་བསུང་མཁའ་ལ་གཏིབས། །

མེས་པོའི་རིག་མཛོད་སྐྱོང་ལ་མཛད་རྒྱས་ཆེ། །

གྱེར་བསྟན་ཕྱོགས་སུ་སྤེལ་ལ་གྲུབ་འབྲས་སྨིན། །

རིས་མེད་གྲུབ་མཐའ་ཀུན་ལ་བྱང་དུ་ཆུབ། །

ཉམ་ཐག་ཡིད་ཅན་ཀུན་ལ་བརྩེ་བ་ཟབ། །

ཁྱེད་སྐུ་གཤེགས་པས་སྐྱེས་ཆེན་ཀུན་ཀྱང་བཤུམས། །

 གཟུར་གནས་མཁས་དབང་ཐམས་ཅད་གདུང་བས་མནར། །

རིས་མེད་གྲུབ་མཐའ་ཀུན་གྱིས་གཙུག་ཏུ་བཀུར། །

དེ་ཕྱིར་བླ་མ་ཁྱེད་ནི་ཀུན་གྱི་མཆོག །

ཁྱེད་རང་བཞུད་པས་གངས་རིའི་གཟི་མདངས་ཡལ། །

བླ་མ་མེད་པས་གཡུ་མཚོའི་རླབས་ཀྱང་གཟིམས། །

གཟུགས་སྐུ་བསྡུས་པས་ཉི་མའི་དྲོད་རླབས་ཡལ། །

རྗེས་ལུས་དྭ་ཕྲུག་རྣམས་ལ་མགོན་སྐྱབས་བྲལ། །

འཕགས་པའི་ཡུལ་ནས་ཉི་མ་འགྲིབ་མ་ཐག །

ཕྱི་ནང་ཀུན་ལ་མུན་པ་ཡོངས་སུ་འཐིབས།   

ས་སྟེང་ཀུན་ལ་ཆོ་ངེ་སྒྲ་ཡིས་ལྡིར། །

འདི་འདྲའི་སྐྱོ་གདུང་དྲག་པོ་ཐེག་པ་དཀའ། །

ཁྱེད་སྐུ་གསེར་གྱི་ཀ་ཆེན་འགྱེལ་ན་ཡང་། །

མཁྱེན་བརྩེ་ཡེ་ཤེས་ངོ་བོ་འགག་མེད་པས། །

ཕྱོགས་བཅུའི་སློབ་འབངས་དད་པའི་ཨ་ལོང་ཉིད། །

ཐུགས་རྗེའི་ལྕགས་ཀྱུས་ཟིན་པར་བྱིན་གྱིས་རློབས། །

འདི་ནས་འགྲོ་དོན་རྫོགས་པ་ལགས་མོད་ཀྱང་། །

འདི་ནས་ལུས་པའི་དྭ་ཕྲུག་ཉམ་ཐག་རྣམས། །

འདི་ལྟའི་དྲན་གདུང་མུན་ཀློང་འཕྱན་གྱུར་བས། །

འདི་རུ་བརྩེ་གཟིགས་ཉི་མ་མྱུར་ཤར་ཤོག །

ཅེས་པས་དྲན་གདུང་གིས་མནར་ཞིང་སྐྱོ་བས་རྩེས་པའི་ཐ་ཤལ་བ་གཡུང་དྲུང་བསྟན་འཛིན་གྱིས་བྲག་དཀར་བྱ་རྒོད་དགོན་ནས་བྲིས་པས་དགེའོ། །

                             2017/9/24