བཟོད་མེད་ཀྱི་དྲན་གདུང་།

གངས་རིའི་ཞིང་ནས་གསེར་གྱི་ཁྱུང་ཆེན་ཅིག།།

གནམ་འོག་འདིར་ན་མ་བཞུགས་མཁའ་མཐའ་ལ།།

ཡོངས་སུ་བརྒལ་ཏེ་གདོད་མའི་རྒྱལ་ས་རུ།།

བདེ་བར་གཤེགས་པའི་ངང་དུ་མངོན་པར་ཐིམ།།

འགྲོ་མང་གདུལ་བྱ་སྐྱབས་འོག་གུར་ཁང་ནས།།

ཐུགས་རྗེས་ལེགས་མཛད་ཁྱབ་པའི་དྭ་ཕྲུག་ཀུན།།

བཟོད་པར་མེད་པའི་སེམས་ཀྱི་ན་ཟུག་གིས།།

དྲན་པའི་ངང་ནས་སྐྱོ་བའི་ངུ་སྐད་སྒྲོག།

ཁྱེད་ཀྱིས་མཛད་པའི་འཕྲིན་ལས་མ་ལུས་པ།།

ཞིང་འདིར་རྗེས་སུ་བཞག་པའི་རྒྱལ་བསྟན་ལ།།

རླབས་ཆེན་དཔག་ཏུ་མེད་པའི་ཚ་ཟེར་གྱིས།།

ལེགས་པར་སྐྲུན་པའི་འོད་སྣང་ཕྱོགས་ཀུན་ཁྱབ།།

མེས་པོའི་ཤུལ་དུ་བཞག་པའི་རིག་གཞུང་དག།

སྐྱོར་བའི་སྤོབས་པ་རབ་ལྡན་མི་ཡི་སེང་།།

ཤེས་བྱའི་དཀྱིལ་འཁོར་མངོན་པར་བཀྲ་བ་གྱིས།།

བཤད་དང་སྒྲུབ་པའི་བསྟན་འགྲོའི་ཁུར་ཆེན་བཞེས།།

མུན་པ་སྟུག་པོ་ཞིག་གི་སྒྲིབ་སར་ནས།།

ལུང་དང་རིག་པའི་གད་རྒྱངས་དྲག་པོ་ཡིས།།

ས་ཆེན་གསུམ་གྱི་ལོག་སྨྲ་མ་ལུས་པ།།

ཝ་སྐྱེས་ཚོགས་ཀུན་ཕྱོགས་ལས་རྣམ་པ་རྒྱལ།།

མགོན་ཁྱེད་ལྷག་བསམ་རྣམ་པར་དག་པ་ཡིས།།

ཞིང་འདིར་གཡོ་པའི་སྐྱ་རེངས་ལས་དྲངས་ནས།།

འཆད་རྩོད་རྩོམ་གསུམ་རྒྱས་པའི་ཉི་མོ་གསལ།།

མཁས་དང་གྲུབ་པའི་དཔལ་ཡོན་མཆོག་ལ་མངའ།།

མི་འཇིགས་སྟོབས་བཅུའི་མངའ་བདག་ལྷུན་ལ་རྫོགས།།

དྲི་མེད་བསླབ་གསུམ་གཡུ་རལ་རྒྱས་པའི་གཉེན།།

གཞན་ཕན་ལྷག་བསམ་རྩེ་དགའ་བཟང་བོ་ཡིས།།

འགྲོ་ཀུན་ཐར་བའི་ལམ་ལ་འགོད་མཛད་རྗེ།།

སྙིགས་མའི་བསྐལ་ཁུག་གསོལ་བའི་དཔའ་བོ་དེ།།

གསང་གསུམ་གཉུག་མའི་གཤིས་ཀྱི་རང་ལུགས་སུ།།

ཀ་དག་དགོངས་པ་ཞི་བའི་ཚུལ་མཛད་ནས།།

ཡིད་ཅན་འགྲོ་ཀུན་ཡལ་བར་མ་འདོར་ཤོག།

མ་བཞུགས་དམ་པ་གང་ཉིད་གཤེགས་པའི་ཤུལ།།

སྡུག་བསྔལ་དུ་མ་བརྩེགས་པའི་མུན་པ་འཐིབ།།

མགོན་མེད་དྭ་ཕྲུག་གདུང་བའི་མྱ་ངན་གྱིས།།

བཅོས་མིན་སྙིང་ནས་དྲན་པའི་སྨྲེ་ངག་འདོན།།

____________གངས་སྨྱུག་དཀར་པོས།