སྐྱོ་གདུང་མཆོད་པའི་སྒྲ་དབྱངས།

སྐུ་གསུམ་ཀློང་ནས་འགྲོ་བའི་མགོན་ཅིག་པུ།།

དུས་ངན་སྙིགས་མ་བསྐལ་པའི་ཁུག་སོ་ན།།

འཛམ་གླིང་མི་ཡི་སྐྱབས་གནས་སྨན་རི་བ།།

རྗེ་གཅིག་ལུང་རྟོགས་བསྟན་པའི་ཉི་མ་མཁྱེན།།

གཤེན་རབ་བོན་གྱི་བསྟན་པའི་མངའ་བདག་རྗེ།།

སྒོ་བཞི་མཛོད་ལྔ་ཐེག་པ་རིམ་དགུ་སོགས།།

ཕྱོགས་མཐའ་ཀུན་ཏུ་འཕྲུལ་ངག་བོན་སྒྲ་སྒྲོགས།།

མཁྱེན་བརྩེའི་བདག་ཉིད་ཁྱེད་ཀྱིས་བྱིན་གྱིས་རློབས།།

སྟོན་པའི་སྒྲོན་མེ་དུས་མཐར་ནུབ་ལ་ཉེ།།

བསྟན་པའི་སྲོག་ཤིང་འཛིན་པའི་སྨན་རི་བ།།

ཞང་ཞུང་བོན་གྱི་བསྟན་པའི་མངའ་བདག་སྟེ།།

ལུང་རྟོགས་བསྟན་པའི་ཉི་མ་གུས་པས་གསོལ།།

རྣམ་དག་འདུལ་ཁྲིམས་བཅོ་ལྔའི་ཉ་ཆེན་རྒྱས།།

རིམ་གཉིས་ཟབ་མོའི་ལམ་བཟང་མངོན་གྱུར་པའི།།

བླ་མེད་ལྟ་བའི་དགོངས་པ་ཐུགས་ནས་གསལ།།

དབྱིངས་རིག་མ་བུ་འདྲེས་ལ་ཕྱག་འཚལ་ལོ།།

ཞྭ་དཀར་བསྟན་པའི་གཙུག་རྒྱན་སྨན་རི་བ།།

རྒྱལ་བ་གཉིས་པའི་ཁྲི་འཛིན་སོ་གསུམ་པ།།

བདག་སོགས་འགྲོ་བའི་བསོད་སྐལ་མ་ཐེག་ནས།།

ལན་ཅིག་འགྲོ་བའི་དོན་ཆེན་གཞན་ལ་དགོངས།།

ཁྱེད་སྐུ་གསེར་གྱི་ཉི་མ་ནུབ་རིར་ཡིབ།།

གསུང་གསང་ལན་ཅིག་ཐོས་པའི་སྐལ་དབེན་ཡང་།།

ཐུགས་རྗེས་འགྲོ་ལ་གཟིགས་པའི་མཁྱེན་བརྩེ་ཅན།།

ཤུལ་ལུས་དྭ་ཕྲུག་འཁྱམས་པོར་དགོངས་ཤིག་ཀྱེ།།

ཡ་ཐོག་རིག་པའི་འབྱུང་གནས་སྨན་རི་བ།།

གཟུགས་སྐུའི་བཀོད་པ་བོན་དབྱིངས་ཐིམ་དང་ལྷན།།

ཡར་ལུང་སོག་ཁའི་གཟི་བརྗིད་གང་ནས་བརྩལ།།

ཕྱོགས་མེད་དྭ་ཕྲུག་ཁྲི་འབུམ་སྐྱོ་བས་གདུང་།།

སྐུ་མཆོག་མི་གཡོ་ཆ་ལུགས་ལྔ་ལྡན་ངང་།།

ཐུགས་ཀྱི་དགོངས་པ་ཀ་དག་བོན་དབྱིངས་ལ།།

གཟིམས་པའི་ཚུལ་ཅན་སྐྱབས་རྗེ་སྨན་རི་བ།།

བདག་སོགས་འགྲོ་ལ་ཐུགས་ཀྱིས་བྱིན་ཆེན་ཕོབས།།

ཕྱོགས་མེད་འགྲོ་ལ་བོན་གྱི་ཆར་ཆེན་འབེབ།།

བསྟན་པའི་ཀ་ཆེན་སྲིད་པ་གསུམ་ལ་འཛུག།

འཛམ་པའི་གླིང་ན་མུན་སེལ་སྒྲོན་མེ་ཞིག།

སྐྱབས་ཀྱི་དང་པོ་བླ་མ་དཀོན་མཆོག་མཁྱེན།།

    སྐྱོ་གདུང་མཆོད་པའི་སྒྲ་དབྱངས་ཞེས་བྱ་བ་འདི་ནི་སྤྱི་ལོ་༢༠༡༧/༩/༡༤ཕྱི་དྲོའི་ཆུ་ཚོད་དྲུག་དང་སྐར་མ་༢༥སྟེང་འཛམ་གླིང་བོན་འབངས་ཡོངས་རྫོགས་ཀྱི་དབུ་ཁྲིད་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་བོན་གྱི་གདན་ས་ཆེན་པོ་༧དཔལ་གཤེན་བསྟན་སྨན་རི་གླིང་གི་བླ་བྲང་དུ་ཐུགས་དམ་གཡོ་བ་མེད་པའི་ངང་ནས་དགོངས་པ་བོན་དབྱིངས་སུ་ཐིམ་སོང་བའི་གནས་ཚུལ་འདི་ཐོས་ནས་སྐྱོ་གདུང་ངང་དུ་ཤར་རྫ་འཇའ་ལུས་པའི་གདན་ས་དགེ་ཐང་བཤད་སྒྲུབ་པད་མ་རྒྱས་པའི་དགའ་ཚལ་ནས༢༠༡༧/༩/༡༧ནུབ་མོ་ཕྱྭ་སྲས་ནག་པོས་གསོལ་བ་སྙིང་ནས་བཏབ་པའོ།།