རྟག་བརྟན་གཡུང་དྲུང་གི་རང་སྒྲ།

འཛམ་གླིང་བོན་གྱི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་མཆོག་གི་མནྜལ་བརྟན་བཞུགས་སུ་ཕུལ་བའི་ཤིས་ཚིག

སྲིད་པ་གསུམ་གྱི་དཔལ་དང་མགོན་གྱུར་པའི།།
མ་ལུས་བོན་འབངས་ཡོངས་ཀྱི་ལས་ཀྱི་ཡབ།།
མ་བགོས་སྤྱི་ལ་བཞག་པའི་ནོར་བུ་མཆོག།
ལུང་རྟོགས་བསྟན་པའི་ཉི་མ་ཁྱེད་ཉིད་དྲན།།

མ་གྱུར་འགྲོ་བའི་གསོས་སུ་བཞེངས་པའི་ལྷ།།
བསྟན་འཛིན་སྐྱེས་ཆེན་གྲངས་ལས་འདས་ན་ཡང་།།
གཡུང་དྲུང་བསྟན་ལ་བཀའ་དྲིན་ཟླ་བྲལ་བ།།
ཞྭ་དཀར་བསྟན་པའི་གཙུག་རྒྱན་ཁྱེད་ཉིད་དྲན།།

----སྨན་རིའི་བཤད་སྒྲུབ་མཁན་པོ་ཉི་མ་དོན་གྲུབ་རིན་པོ་ཆེ།

གང་སྐུའི་དཀྱིལ་འཁོར་ཀུན་གསལ་ཐིག་ལེའི་ངོས།།
གང་གསུང་ཚངས་དབྱངས་འོད་སྣང་ཁི་ཁར་རྩེན།།
གང་ཐུགས་འཁྲུལ་མེད་མཁྱེན་བརྩེ་རབ་འཁྱུད་པའི།།
གང་ཁྱེད་བདེ་ཆེན་རྒྱན་དུ་རྟག་བརྟན་ཤོག།

དད་གསུམ་ནོར་བུ་རྒྱལ་མཚན་རྩེ་རུ་མཆོད།།
དམ་ཅན་རྒྱ་མཚོའི་སྲུང་སྐྱོབས་གྲིབ་བཞིན་འཁོར།།
བོན་གཤེན་སྨོན་པའི་དར་ཆེན་སྐྱེ་འགྲོའི་གསོས།།
རྒྱལ་བ་ཁྱེད་ཞབས་བསྐལ་བརྒྱར་བརྟན་འགྱུར་ཅིག།

______དགེ་བཤེས་བསྟན་འཛིན་དབང་རྒྱལ་རིན་པོ་ཆེ།

ལུ༵ང་རྟོག༵ས་མཛོད་ཀྱི་བོན་སྡེ་མ་ལུས་ཀུན།།
བསྟ༵ན་པ༵འི་གཞི་མ་བསླབ་གསུམ་རྣམ་པར་དག།
ཉི༵་མ༵འི་འོད་སྣང་ཅི་བཞིན་འགྲོ་བའི་ཁམས།།
གང་ལ་གང་འདུལ་མཛད་ལ་གསོལ་བ་འདེབས།།

རྒྱལ་བ་ཀུན་འདུས་སྙིགས་དུས་འདྲེན་པ་གཙོ།།
རྒྱལ་བའི་འཕྲིན་ལས་ཟད་མེད་བདག་བཞེས་པ།།
རྒྱལ་བ་གཉིས་པ་མཉམ་མེད་བླ་མ་ཡི།།
རྒྱལ་བའི་རྒྱལ་ཚབ་སྐུ་ཚེ་བསྐལ་བརྒྱར་བརྟན།།

------མཁན་བླ་མ་ཚེ་རིང་།

རྒྱལ་ཀུན་སྤྱི་གཟུགས་བྱིན་རླབས་འབྱུང་བའི་གཞི།།
བསྟན་པའི་གཙོ་བོ་དཔལ་ལྡན་བླ་མའི་ཞབས།།
གང་སྐུ་འགྱུར་མེད་གཡུང་དྲུང་རྟག་བརྟན་ཏུ།།
གསོལ་བ་སྙིང་ནས་འདེབས་སོ་བྱིན་གྱིས་རློབས།།

འཁོར་བ་མ་སྟོང་བར་དུ་བདག་སོགས་བློར།།
འབྲལ་མེད་སྤྱི་གཙུག་བདེ་ཆེན་འཁོར་ལོ་རུ།།
བཞུགས་ནས་བསམ་མཐའ་ཡས་པའི་འགྲོ་དོན་དུ།།
བསྐལ་སྲིད་གནས་པ་དེ་སྲིད་མགོན་གྱུར་ཅིག།

----ཞུ་བླ་ཡོན་ཏན་རྒྱ་མཚོ།

རྒྱལ་ཀུན་མཁྱེན་བརྩེའི་ཡེ་ཤེས་རང་གཟུགས་གར།།
རྒྱལ་བ་གཉིས་པ་སྨན་རིའི་ཁྲི་འཛིན་རྗེ།།
ལུང་རྟོགས་བསྟན་པའི་ཉི་མའི་ཞབས་པད་མོར།།
སྒོ་གསུམ་གུས་པ་ཆེན་པོས་ཕྱག་གིས་འདུད།།

གང་ཞིག་རྩེ་གཅིག་མོས་པའི་ཡིད་བྱེད་ན།།
དེ་ཡི་མདུན་དུ་གཤེན་རབ་མངོན་སུམ་དུ།།
བཞུགས་ཞེས་ཟབ་མོ་ལུང་དུ་བསྟན་པ་བཞིན།།
ཡུལ་གྱིས་བསྐལ་ཡང་སོ་སོའི་མདུན་མཁར་བཞུགས།།

----མཁན་རིག་འཛིན་དབང་རྒྱལ།

སྲིད་ཞིའི་རྣམ་འདྲེན་འཕྲུལ་ངག་བོན་དབྱིངས་ལས།།
ལུང་རྟོགས་བསྟན་པའི་ཉི་མའི་འོད་སྟོང་འཛུམ།།
ལྔ་སྙིགས་དུས་ཀྱི་སྒྲིབ་མུན་བསལ་མཛད་པའི།།
སྟོང་ཁམས་སྲིད་པའི་སྒྲོན་མེ་སྨན་རི་བ།།

མཚན་དཔེའི་གཟུགས་སྐུ་གཡུང་དྲུང་གཤིས་སུ་བརྟན།།
འགག་མེད་རང་གྲོལ་ཚངས་པའི་གསུང་དབྱངས་སྒྲོག།
སྤྲོས་བྲལ་ཐུགས་ཉིད་མཁའ་ལྟར་ལྷུན་གྱིས་གྲུབ།།
བསྟན་འགྲོའི་གཙུག་རྒྱན་བསྐལ་བརྒྱར་ཞབས་བརྟན་གསོལ།།

----དགེ་བཤེས་སྨོན་ལམ་མཐར་ཕྱིན།

སྐྱབས་གནས་མཁས་བཙུན་བྱེ་བའི་གཙུག་གི་ནོར།།
དྲིན་ཅན་ཕ་མ་བུ་སློབ་ཡོངས་ཀྱི་མགོན།།
རྩ་བའི་དོན་དམ་སྟོན་མཁས་དཔོན་གསས་མཆོག།
བླ་མ་ཁྱེད་ལ་སྙིང་ནས་གུས་འདུད་དོ།།

ལུང་རྟོགས་བཅུ་ཕྲག་གནས་ལ་མངའ་སྙེམས་པའི།།
བསྟན་པའི་བདག་པོ་རྒྱལ་བ་སྨན་རི་བ།།
ཉི་མ་སྤྲིན་བྲལ་ངང་ཚུལ་ཀུན་འཕྲོ་ཞིང་།།
སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུ།།

--------སྐལ་བཟང་ནོར་བུ།

གྱེར་དམངས་གཙུག་གི་རྒྱན་བྱོན་གུས་ཕྱག་ཡུལ།།
བསྟན་པའི་མེ་རོ་བསྒྲོན་པ་བསྔགས་བསྟོད་ཡུལ།།
རྗེས་བཟུང་མུས་སྐྱོང་སྐྱབས་འཇུག་དྲིན་གཟོའི་ཡུལ།།
འཚོ་གཞེས་བསྟན་འགྲོའི་དོན་འཁྱོངས་ཤིས་པའི་ཡུལ།།

བོན་འབངས་གཡུང་དྲུང་ལྷ་སྡེའི་མགོན་སྐལ་ཁྱེད།།
སངས་རྒྱས་གཡུང་དྲུང་བསྟན་པའི་དོན་འཕེར་སླད།།
ལྷ་མཆོག་གཡུང་དྲུང་ཚེ་དཔག་མེད་པའི་སྐུར།།
མི་ཤིགས་གཡུང་དྲུང་བརྟན་པར་བཞུགས་སུ་གསོལ།།

-----ཆོས་འཁོར་ཚང་རིན་པོ་ཆེ།

གནའ་བོའི་བླ་རི་མཐོན་པོའི་བང་རིམ་ཁྲོད།།
ཡེ་ཤེས་གསེར་གྱི་ཐུར་མས་རིམ་གྱིས་ཉུག།
མེས་པོའི་ཞལ་ངད་འཐུལ་བའི་ནོར་བུ་ཞིག།
ཕྱི་རབས་དད་པའི་གཡང་དུ་ཁྱེད་ཀྱིས་རྙེད།།

བཀྲེས་སྐོམ་ངལ་བས་དུབ་པའི་འགྲོ་བ་རྣམས།།
འདོད་དགུའི་རྒྱ་མཚོའི་ཀློང་དུ་ཁྲིད་པ་དང་།།
ཟད་མེད་རིག་པའི་གཏེར་ལ་ལོངས་སྤྱོད་པ།།
བགྲེས་སོང་སེམས་དཔའ་ཆེན་པོའི་སྐུ་དྲིན་ཡིན།།

----བྱ་འཕུར་དགེ་བཤེས་ལྷུན་གྲུབ་རྒྱ་མཚོ།

གང་གི་མོས་པའི་འགྲོ་བའི་དོན་ལ་བྱོན།།
རྒྱལ་བསྟན་འཛིན་པའི་ཐུགས་རྗེ་འོད་ཟེར་བཞིན།།
དབང་ལུང་རྒྱུད་པའི་མན་ངག་བདག་ཉིད་པ།།
སྐྱབས་མཆོག་རྒྱལ་བ་སྨན་རི་ཁྱེད་ལ་བསྟོད།།

བགྲངས་བྱ་དུ་མའི་མཛད་འཕྲིན་ཆུ་རྒྱུན་ལས།།
བསྟན་པའི་ས་བོན་འབྲས་བུ་མེ་ཏོག་བཞད།།
སྐལ་བཟང་བརྟན་བཞུགས་དུས་བཟང་རྟེན་འབྲེལ་ཉིན།།
ཟབ་རྒྱས་མཆོད་པའི་ཞིང་གྱུར་ཨེ་མ་ཧོ།།

----ཡང་སྟོན་དགེ་བཤེས་བསྟན་འཛིན། 

འདི་ཕྱི་ཕན་བདེ་མ་ལུས་འབྱུང་བའི་གཞི།།
ཞྭ་དཀར་བསྟན་པའི་སྲོག་ཤིང་སྨན་རི་བ།།
སྐུ་ཚེ་མི་ཤིག་གཡུང་དྲུང་རྟག་བརྟན་ཞིང་།།
ཐུགས་བཞེད་བདེན་དོན་གང་ཡོད་འགྲུབ་པར་སྨོན།།

འགྲོ་ཁམས་བརྩེ་བས་སྐྱོང་ལ་མི་ངལ་ཞིང་།།
རྒྱལ་བསྟན་འཛིན་སྐྱོང་སྤེལ་ལ་མི་ཞུམ་བའི།།
ཡབ་རྗེ་བླ་མའི་མཛད་བཟང་འོད་པོ་ཆེ།།
སྲིད་མཚོ་མ་སྟོངས་བར་དུ་བརྟན་པར་སྨོན།།

-----དོལ་པོ་དགེ་བཤེས་ཕུན་ཚོགས་ཉི་མ། 

གནམ་གྱི་ལྷ་ལས་སྐྱེ་དགུའི་མགོན་དུ་གཤེགས།།
དོགས་ཀྱི་གཞི་ལ་བསྟན་པའི་མེ་རོ་གསོས།།
བར་གྱི་གླིང་བཞིར་འགྲོ་བློའི་མུན་པ་སེལ།།
ལུང་རྟོགས་བསྟན་པའི་ཉི་རི་གཙུག་ན་རྒྱལ།།

དུས་ངན་སྨག་ལ་ཐུགས་སྤོབས་སྒྲོན་ཆེན་སྤར།།
བསྟན་པའི་རྒྱན་དུ་ཕྱོགས་མཐའི་བུ་སློབ་སྐྱོང་།།
གྱེར་བསྟན་འབངས་ལ་བཀའ་དྲིན་ཟླ་མེད་རྗེ།།
གྱེར་སྤུངས་རྩ་བའི་བླ་མའི་ཞབས་བརྟན་གསོལ།།

-----ཉི་ཟླ་འོད་ཟེར་རྒྱལ་མཚན། ཡོ་རོབས།

འཇའ་ཚོན་ཤར་དང་མེ་ཏོག་འཐོར་བ་སོགས།།
ངོ་མཚར་ལྟས་གྱི་འཁྲུངས་རབས་མེད་ན་ཡང་།།
སྐུ་ཚེའི་མཛད་པ་གཞན་དོན་ལ་བསྟིམས་པའི།།
རྣམ་ཐར་གསེར་གྱི་ཕྲེང་བ་ཁྱོད་ཀྱིས་འཆང་།།

ཕ་ལྟར་བརྩེ་བའི་གཏམ་དང་བསླབ་བྱས་བསྐྱངས།།
མ་ལྟར་འཚོ་བའི་ཟས་དང་གོས་གྱིས་བསྐྱངས།།
རྒྱལ་བའི་དགོངས་པ་ལག་ཏུ་ལེན་པའི་ཁྱོད།།
རིགས་ཅན་སློབ་བུའི་མགོན་ཏུ་བརྟན་བཞུགས་མཛོད།།

----སྣང་རྒྱལ་ཤེར་དགེ།

འགྲོ་བའི་ལས་དང་བསོད་ནམས་ལྷུན་པོའི་རྩེར།།
རྒྱལ་སྲས་དཔའ་བོའི་ཚུལ་འཛིན་སྨན་རི་བའི།།
ལུང་རྟོགས་བསྟན་པའི་ཉི་མ་མངོན་འཆར་ནས།།
འགྲོ་ཁམས་བདེ་བར་མཛད་ལ་མནྜལ་འབུལ།།

གོ་ལའི་ཤར་ནུབ་ཡུལ་གྲུའི་མཐའ་མཚམས་ཀྱི།།
འགྲོ་བློ་མུན་པའི་སྨག་རུམ་བསལ་མཛད་ཕྱིར།།
རྒྱལ་གཤེན་བསྟན་པའི་ཉི་མ་རྟག་འཆར་བའི།།
བརྟན་བཞུགས་ཤིས་ཚིག་ཚོམ་བུའི་མཎྜལ་འབུལ།།

---དགེ་བཤེས་ཚེ་དབང་རྒྱལ་མཚན།

ལུ༵ང་རིག་བྱེ་བའི་མཛོད་ལ་མངའ་བརྙེས་ཤིང་།།
མདོ་རྒྱུད་རྟོག༵ས་པའི་མཚན་དཔེའི་རིས་སུ་བཀྲ།།
རྒྱལ་གཤེན་བསྟ༵ན་པ༵འི་མངའ་བདག་སྨན་རི་བའི།།
གདུང་འཚོབ་ཉི༵་མ༵འི་སྙིང་པོར་གསོལ་བ་འདེབས།།

གསལ་བརྟན་ཚད་དགུས་དག་པ་འབྱམས་སུ་ཡས།།
ཡན་ལག་བཞི་ལྡན་བཟླས་སྔགས་ཚད་དུ་ཕྱིན།།
ཕུང་ཁམས་སྐྱེ་མཆེད་གཡུང་དྲུང་སྐུར་གྲུབ་པས།།
མཚུངས་མེད་བླ་མའི་སྐུ་ཚེ་བསྐལ་བརྒྱར་གསོལ།།

-----ཚུལ་ཁྲིམས་བསྟན་པ་འབྲུག་གྲགས།

ལུ༵ང་རིགས་སྨྲ་ལ་འགྲན་བྲལ་མཁས་བརྒྱའི་མགོན།།
རྟོག༵ས་པ་ཀློང་བརྡོལ་ལྟ་བའི་ཁྱུང་ཆེན་རླབས།།
བསྟ༵ན་པ༵འི་ཞིང་མཆོག་འབུམ་ཕྲག་ཁྲི་ཡི་གཉེན།།
ཉི༵་མ༵་འབུམ་གྱི་དཔལ་འཕྲོག་སྨན་རི་བ།།

ཟུར་ཕུད་ལྔ་བའི་དཔལ་ལ་ཅོ་འདྲི་ཞིང་།།
རབ་འབྱམས་རྒྱ་མཚོའི་མགོན་གྱི་བརྩེ་བ་ཅན།།
ཀློང་དགུའི་ཡི་དམ་ནུས་མཐུའི་བདག་ཉིད་གང་།།
གངས་རིའི་མགོན་གྱིས་འགྲོ་རྣམས་རྟག་ཏུ་སྐྱོངས།།

----མཁར་ནག་སྐལ་བཟང་རྒྱ་མཚོ།

ཕྱི་ནང་བོན་འབངས་ཡོངས་ཀྱི་གཙུག་གི་རྒྱན།།
ལུང་དང་རྟོགས་པའི་པད་ཚལ་བཞད་པའི་གཉེན།།
གཡུང་དྲུང་བསྟན་པའི་ཉི་མ་འོད་པོ་ཆེ།།
བསླབ་གསུམ་དབང་ཕྱུག་རྒྱལ་བ་སྨན་རི་བ།།

ཁྱེད་སྐུ་འགྱུར་མེད་གཡུང་དྲུང་ཁམས་སུ་བརྟན།།
ཁྱེད་གསུང་འགག་མེད་ལུང་རིག་ཚངས་དབྱངས་སྙན།།
ཁྱེད་ཐུགས་སྒྲིབ་མེད་མཁྱེན་བརྩེའི་ཡེ་ཤེས་གསལ།།
མགོན་ཁྱེད་ཞབས་པད་གཡུང་དྲུང་བརྟན་བཞུགས་གསོལ།།

----སྤུ་རྒྱལ་དགེ་བཤེས་ཉི་མ་རྒྱལ་མཚན།

བོན་འདི་རིག་གནས་གྱི་མ་ཡུམ་ལགས།།
གང་གི་གསལ་བྱེད་སངས་རྒྱས་གཤེན་རབ་བྱོན།།
དེ་ཡི་གདུང་སོབ་རྒྱལ་བ་སྨན་རི་བ།།
བསྟན་པའི་བདག་ཉིད་རྒྱལ་བ་སྨན་རི་བ།།

སྐྱེ་འགྲོའི་མགོན་དང་སྐྱབས་ཡུལ་མཆོག་གྱུར་པ།།
གསང་བ་གསུམ་གྱི་མཛད་པའི་འཕྲིན་ལས་གང་།།
མཁའ་མཉམ་ཀློང་བརྡོལ་བསྐལ་པའི་བར་དུ་ཡང་།།
རྟག་བརྟན་ཐེར་ཟུག་འོང་པའི་དོན་སྨིན་སྩོལ།།

----ཁྲི་བློ་རྩེ།

གྲུབ་མཐའི་ཆགས་སྡང་རྒོད་པའི་འཇིག་རྟེན་འདིར།།
ཞྭ་དཀར་བསྟན་པའི་དམུ་ཐག་ཕྲ་མོའི་སྲོག།
འགག་ལ་ཉེ་བའི་མེ་རོ་སླར་གསོས་པའི།།
དཔའ་བོ་ཁྱེད་ལ་དུངས་ཤིང་སྙིང་ནས་གུས།།

སྐོམ་པ་ཆུ་ལ་འཕྲེང་བའི་སློབ་བུ་ཚོར།།
ཤེས་རིག་ཡོན་ཏན་སྦྱོངས་པའི་ཆ་རྐྱེན་སོགས།།
གང་ལ་གང་འདོད་སྟེར་བའི་བཀའ་དྲིན་དེ།།
མི་ཚེར་བརྗོད་ཀྱང་ཟད་པ་ག་ལ་ནུས།།

----རྔ་བ་འཇམ་མེ།

ལྷན་སྐྱེས་རིག་པའི་འོད་སྣང་ཕྱོགས་ཀུན་ཁྱབ།།
མ་རིག་མུན་པའི་ཚོགས་ཀུན་རྒྱང་དུ་བསྒྲད།།
འཛིན་མའི་ཁྱོན་ལ་བསྟན་པའི་སྒྲོན་མེ་སྤར།།
ཁྱེད་ནི་ས་ཆེན་འགྲོ་བའི་གཙུག་གི་ནོར།།

སྐུ་ཡི་དཀྱིལ་འཁོར་རི་བཞིན་བརྟན་པར་ཤོག།
གསུང་གི་བདུད་རྩིས་གཞན་རྒྱུད་སྨིན་པར་ཤོག།
ཐུགས་རྗེ་ཆེན་པོས་འགྲོ་ཀུན་ཟིན་པར་ཤོག།
སྐུ་གསུང་ཐུགས་ཀྱི་འཕྲིན་ལས་རྒྱས་པར་ཤོག།

----དགེ་བཤེས་གཡུང་དྲུང་བསམ་གཏན།

མར་ཞི་མེས་པོའི་ཁྲི་ལ་རླབས་ཀྱིས་བྱོན།།
བདུད་ཀྱི་མཚོན་ཆ་ཆར་བའི་ཟོལ་གྱིས་བབས།།
བཟོད་པའི་གོ་གྱོན་རྒྱལ་ཁམས་ཧྲིལ་གྱིས་བསྐོར།།
ཕ་རྒོད་བླ་མ་གང་ཁྱོད་ཁྱད་དུ་འཕགས།།

མཉམ་མེད་རྒྱལ་བའི་གདུང་འཚོབ་སྨན་རི་བ།།
རྒྱལ་བསྟན་ཕྱོགས་མེད་སྤེལ་བའི་ཐུགས་སྟོབས་ཀྱིས།།
འཛམ་གླིང་གྱེར་བསྟན་སྐྱོང་བའི་འཕྲིན་ལས་ཅན།།
སྐུ་ཚེ་གཡུང་དྲུང་ཁྲི་ལ་བརྟན་བཞུགས་མཛོད།།

----ཁྲི་གཡུང་དྲུང་།

ལུང་རྟོགས་བསྟན་པའི་ཉི་མ་སྨན་རི་བ།།
གཤེན་རབ་བསྟན་པའི་བླ་སྲོག་སྨན་རི་བ།།
ཞང་བོད་མཁས་གྲུབ་ཞལ་ཚབ་སྨན་རི་བ།།
བསྟན་འགྲོ་སྤྱི་ཡི་གཙུག་ནོར་སྨན་རི་བ།།

འཛམ་གླིང་བོན་འཁོར་བསྐོར་བའི་ཐུགས་བསྐྱེད་ཅན།།
གཤེན་བསྟན་གཉེན་འཕྲང་སྐྱོབས་པའི་སྐུ་དྲིན་ཅན།།
གཞེས་བྱེས་བོན་འབངས་ཡོངས་ཀྱི་མིག་དང་སྙིང་།།
སྨན་རི་བ་ལགས་སྐུ་ཚེ་རྟག་བརྟན་ཤོག།

----གདོང་བཙུན་རྒྱ་ཐར།

གཡུང་དྲུང་ལྷ་ཡིས་བརྐྱངས་པའི་དམུ་ཐག་ཅིག།
བསིལ་ལྡན་གངས་ལ་ལྷུང་བའི་སྙན་གྲགས་ཀྱིས།།
མཐའ་ཀླས་འཇིག་རྟེན་གསལ་བའི་སྒྱུ་འཕྲུལ་གར།།
ལུང་རྟོགས་བསྟན་པའི་ཉི་མ་ཞབས་བརྟན་ཤོག།

གཤེན་རབ་མི་བོའི་ཐུགས་བསྐྱེད་འོ་མའི་མཚོ།།
གཡས་སུ་འཁྱིལ་བའི་སྨན་རིའི་ཆོས་གྲྭ་སོགས།།
བོན་བསྟན་བཤད་སྒྲུབ་གཟེགས་མ་འབུམ་འགྱེད་པའི།།
མངའ་བདག་ཁྲི་འཛིན་ཞབས་པད་བརྟན་གྱུར་ཅིག།

----- ཀླུ་སྨྱོན་ཧེ་རུ་ཀ

ཤར་ཁོག་ལྗོངས་ལྡོང་ཚང་གི་བླ་མ་ཐར༎
མང་དུ་ཐོས་པ་ཤེས་རབ་རྣམ་པར་དག།
སངས་རྒྱས་བསྟན་པ་འཛིན་པའི་སྐྱེས་བུ་སྟེ༎
ལུང་དང་རྟོགས་པའི་བསྟན་པའི་ཉི་མ་རྒྱལ༎

གཞིས་བྱེས་གཉིས་སུ་ཕན་པའི་གྲུ་ཆར་ཅན༎
འདི་ཕྱི་གཉིས་སུ་དགེ་བའི་ལམ་བཟང་ཅན༎
བསྟན་སྲིད་གཉིས་ལ་ཆེ་བའི་མཛད་པ་ཅན༎
སྨན་རིའི་ཁྲི་འཛིན་ཆེན་པོ་ཞབས་བརྟན་ཤོག།

----ཆབ་བྲག་ཕོ་ཉ།

སྙིགས་མའི་དུས་འདིར་རྒྱལ་བསྟན་རིན་པོ་ཆེ།།
ཕྱོགས་དང་ཕྱོགས་བཅུར་སྤེལ་བར་རབ་མཁས་པའི།།
མཉམ་མེད་རྒྱལ་བ་གཉིས་པའི་གདུང་འཚོབ་ལ།།
སྒོ་གསུམ་མི་ཕྱེད་དད་པས་ཕྱག་འཚལ་ལོ།།

ལུང་རྟོགས་བཤེན་བསྟན་གསེར་གྱི་རི་བོ་ལ།།
བཤད་དང་སྒྲུབ་པའི་ཉི་མ་འདྲེན་མཛད་པའི།།
སྣང་གཤེན་ཐེག་པའི་རྒྱབ་ཚབ་སྨན་རི་བ།།
གཡུང་དྲུང་ཁམས་སུ་བཞུགས་པར་གསོལ་བ་འདེབས།།

-----སྙན་བཟང་གཡུང་དྲུང་ཚེ་རིང་། ཧྥ་རིན་སི།

ལུང་རྟོགས་འོད་ཟེར་རྣོན་པོའི་རྩེ་དགའ་ཡིས།།
བསྟན་པའི་པད་ཚལ་རྟག་ཏུ་རྒྱས་མཛད་ཅིང་།།
ཕྱི་ནང་སྨག་རུམ་མ་ལུས་འཇོམས་བྱེད་པའི།།
ཉི་མའི་ཉི་མ་ཁྱེད་ཉིད་རྒྱལ་གྱུར་ཅིག།

ཞྭ་དཀར་རང་ལུགས་གཙང་མ་ཁ་བའི་ནོར།།
བསྲེ་ལྷད་དྲི་མའི་ཚོན་གྱིས་མ་སྦགས་པར།།
ཐར་འདོད་འགྲོ་བའི་དཔྱིད་དུ་འཇོ་མཛད་པ།།
བརྩེ་བའི་མགོན་ཁྱེད་ཞབས་པད་བརྟན་པར་ཤོག།

----ཁྱུང་བཟང་། རེབ་གོང་།

བརྩེ་ཆེན་ཉི་མ་འབར་བའི་གདེངས་ཀ་ནས།།
རྨད་བྱུང་འཕྲིན་ལས་འོད་འབུམ་གཡོ་བའི་གཟིས།།
གདུལ་བྱ་གླིང་བཞིའི་མུན་པ་དྲུངས་འབྱིན་པའི།།
རྣམ་འདྲེན་རྟ་བདུན་དབང་པོ་དུས་ཀུན་རྒྱལ།།

སྙིགས་མ་ལྔ་བདོའི་རྒུད་པ་གསོ་བའི་གཉེན།།
མཚན་དཔེའི་སྐུ་མཆོག་ཡིད་བཞིན་དབང་གི་རྒྱལ།།
འགྲོ་ཁམས་དད་པའི་རྒྱལ་མཚན་རྩེར་མཆོད་པའི།།
བསྐལ་བཟང་ནམ་ཡང་ཉམས་པ་མེད་གྱུར་ཅིག།

----སྙན་བཟང་སུམ་སྐྱེས།

རང་བྱུང་འགལ་རྐྱེན་མང་བའི་བོད་ཡུལ་འདིར།།
ཐོག་མའི་ཤེས་རིག་སྒྲོན་མེ་འདེགས་པ་པོ།།
ཞྭ་དཀར་གཡུང་དྲུང་བོན་གྱི་བཀའ་དྲིན་ནི།།
མགོ་ནག་བོད་ལ་མཚོན་ན་ཤིན་ཏུ་ལྕི།།

རྨད་བྱུང་བསྟན་པ་དེ་ཉིད་འཛིན་པ་ལ།།
ཟླ་བྲལ་སྨན་རིའི་ཁྲི་འཛིན་སོ་གསུམ་པ།།
ལུང་རྟོགས་བསྟན་པའི་ཉི་མ་རིན་པོ་ཆེ།།
སྐུ་ཚེ་བརྟན་ཅིང་མཛད་འཕྲིན་རྒྱས་གྱུར་ཅིག།

----ཆབ་མདོ་ཤེས་རབ།

གངས་ཀྱི་རྨུ་ཐག་རིང་མོའི་སྣེ་ཞིག་ན།།
གཟི་འོད་ལམ་ལམ་འཚེར་བའི་མདངས་ཤིག་གིས།།
མེས་པོའི་རྣམ་ཤེས་འགུགས་པའི་གླུ་དབྱངས་ཅན།།

ལུང་རྟོགས་བསྟན་པའི་ཉི་མ་ཞབས་བརྟན་ཤོག།

ཁྱེད་ནི་གངས་དཀར་ཏི་སེའི་བླ་སྲོག་སྟེ།།
གཤེན་བསྟན་མེ་རོ་གསོ་བའི་སྒྲོན་མེ་ཉིད།།
སྲིད་པའི་སྨག་ཆེན་འཇོམས་པའི་རྟེན་འབྲེལ་དུ།།
མགོ་ནག་བོད་མིའི་དཔལ་དུ་རྟག་བརྟན་ཤོག། 

----ལྷ་ཆབ་སྦྱིན་པ། ཨོ་གླིང་སེ་ནའེ་རུ། 

བསྐལ་བའི་རི་མོ་ས་ལ་ཆགས་པའི་ཚེ།།
མ་གྱུར་སེམས་ཅན་དོན་དུ་ང་འགྲོ་ཞེས།།
ཐོག་མར་ཕེབས་པ་གཤེན་རབ་ཐུ་བོ་ཆེ།།
དེའི་སྲས་ལུང་རྟོགས་བསྟན་པའི་ཉི་མར་འདུད།།

རྨོངས་པའི་ནད་སེད་སྨན་གྱི་རི་བོ་ཆེ།།
དྲི་མེད་ལུང་རྟོགས་བསྟན་པའི་ཟ་མ་ཏོག།
དམིགས་མེད་བརྩེ་བའི་ཉི་མ་དྲོད་པོ་ཆེ།།
མ་གྱུར་འགྲོ་བའི་དོན་དུ་ད་དུང་བཞུགས།།

---- གསལ་ལེ་རྒྱལ། ཧྥ་རན་སུ། 

ས་ལ་སྨིན་པ་ཁྱེད་གསེར་གྱི་རི་བོ་ཞིག་ལགས།།
ངས་བལ་དཀར་གྱི་རྨུ་ཐག་ཁྱེད་ལ་འཐེན་གྱིན་ཡོད།།
ས་ལ་འདལ་བ་ཁྱོད་གཡུ་ཡི་མཚོ་ཆེན་ཞིག་ཡིན།།
ངས་འབྲུ་དྲུག་གི་མཚོ་གཏེར་ཁྱེད་ལ་རྒྱག་གིན་ཡོད།།

བརྟན་བཞུགས་ནི་ཆོ་ག་ཞིག་འདོན་པ་ཙམ་མིན་པར།།
ལྷག་བསམ་དང་རེ་སྨོན་ཡོད་ཚད་འབུལ་བ་དེ་རེད།།
ངས་ཀྱང་བསྟན་པའི་དཔལ་ཁྱེད་བརྟན་པོར་བཞུགས་པ་ལ།།
རེ་བའི་འབོད་བརྡ་གཏོང་འདོད་ཀྱེ་སྐྱེས་བུ་དམ་པ།།

----ཤེད་བུ། 

རྨུ་ཐག་མཁའ་རུ་འཐེན་པའི་ཡབ་མེས་ཀྱི།།
རིགས་ལས་མཆེད་པའི་གངས་ཀྱི་འོད་ཐིག་སྟེ།།
ཐེག་པ་རིམ་དགུའི་མཐར་སོན་གཤེན་གྱི་སྲས།།
རྨད་བྱུང་སེམས་དཔའ་ཆེན་པོ་གཙུག་ན་རྒྱལ།།

ཟབ་ཆོས་མི་བྲིན་ཟང་ཟིང་བྲིན་པའི་དུས།།
སྲོག་བསྡོས་མེས་པོའི་བསྟན་པའི་མེ་བོ་ཆེ།།
ཐབས་ཀྱིས་སྤར་མཁས་བཙན་པོའི་སྙིང་ཁམས་ཅན།།
གཤེན་སྟོན་ཐུགས་ཀྱི་སྲས་མཆོག་ཨེ་མ་རྨད།།

---རྨ་དུག་ལྕེ། 

བརྩེ་ཆེན་འོ་མའི་མཚོ་ལས་ལེགས་འཁྲུངས་པའི།།
མཁྱེན་རབ་པད་མོ་དེ་ཉིད་གཟིགས་དབང་མགོན།།
ལུང་དང་རྟོགས་པའི་བསྟན་པ་ཉིན་བྱེད་སྣང་།།
ཞབས་པད་བསྐལ་བརྒྱར་བརྟན་པའི་གསོལ་བ་འདེབས།།

རིས་མེད་འགྲོ་ལ་ཚད་མེད་ཐུགས་རྗེས་གཟིགས།།
ཐེག་ཆེན་བོན་གྱིས་འཁོར་བ་དོང་ནས་སྤྲུགས།།
རྒྱལ་ཀུན་སྤྱི་གཟུགས་བསྟན་པའི་ཉི་མ་རྗེ།།
ཕན་བདེའི་འོད་སྣང་ས་གསུམ་ཁྱབ་པར་ཤོག།

----རྫ་པ་ཚེ་རིང་འགྱུར་མེད། 

གངས་ཀྱི་ཟིལ་བ་ཁུར་བའི་ཆུ་ཤེལ་ཞིག།
མེས་པོའི་ཤེས་རབ་རྩལ་གྱི་ནམ་མཁའ་ལས།།
གཡའ་དག་རང་བྱུང་མཛེས་པའི་རྒྱན་དུ་འཁྲུངས།།
རྨད་བྱུང་མཛད་པས་རིག་པའི་སྡེ་ཆེན་བསྐྱངས།།

སྣང་བྱེད་ཉི་མའི་དཀྱིལ་འཁོར་ཡངས་པོ་་ལས།།
བྱམས་བརྩེ་འོད་ཀྱི་གཟི་མདངས་ཕྱོགས་སུ་འཕྲོ།།
མཛད་འཕྲིན་གསེར་གྱི་ཁུར་ཆེན་བཞེས་གྱུར་པ།།
ཉི་ཟླའི་འོད་ཁྱིམ་རྟག་ཏུ་སྐྱོང་བར་མཛོད།།

----གཟུངས་ཕྱུག་སྐྱིད། ཨོ་གླིང་། 

ལུ༵ང་རྟོག༵ས་ཟབ་མོའི་རྒྱུད་ལུ༷ང་དགོངས་རྟོག༷ས་བརྙེས།།
བསྟ༵ན་པ༵འི་མེས་པོ་གཤེན་བསྟ༷ན་འཛིན་པ༷འི་བདག།
ཉི༵་མ༵་ལྟར་ཁྱབ་བརྩེ་བས་སེམ་ཉི༷་མུན།།
མ༷་ལུས་བསལ་མཛད་རྗེ་མཆོག་སྨན་རི་བ།། 

ལྟོས་བཅས་གདུལ་བྱའི་དབང་དུ་གྱུར་བ་ཡི།།
དྲང་ངེས་ཐབས་ཀྱིས་གཞལ་བའི་འཕྲིན་ལས་ཉིད།།
ཟླུམ་གཟུགས་སྲིད་པའི་རྩེ་རུ་འཕྱོ་བ་ཡི།།
རྣམ་པར་ཐར་བ་དད་པའི་ཞིང་ན་མཛེས།།

------ཤོ་ཁྲི་རྒྱལ།

བསྟན་པའི་མངའ་བདག་ཕྱོགས་བཅུའི་རྒྱལ་བ་དང་།།
བསྟན་པའི་སྙིང་པོ་ཐེག་ཆེན་གཡུང་དྲུང་བོན།།
བསྟན་འཛིན་གཤེན་རབ་སེམས་དཔའི་ཚོགས་བཅས་ཀྱི།།
མཁྱེན་བརྩེ་གཅིག་བསྡུས་བླ་མར་གསོལ་བ་འདེབས།།

རྒྱལ་བསྟན་ཡོངས་འཛིན་མངའ་བདག་སྨན་རི་བའི།།
གསང་གསུམ་འགྱུར་མེད་གཡུང་དྲུང་གཏམས་པའི་ཁྲིར།།
བརྟན་ནས་བདག་སོགས་བསྟན་འགྲོའི་དོན་ཕྱིར་དུ།།
བསྐལ་བརྒྱའི་བར་དུ་འཕྲིན་ལས་རྒྱུན་ཁྱབ་ཤོག།

---རིན་སྤུངས་ཚུལ་བསྟན། 

མཚན་དཔེ་མེ་ཏོག་གངས་ཅན་ལྗོངས་སུ་བཞད།།
མདོ་སྔགས་གཞུང་བཟང་ཧི་མ་ཅལ་ནས་འགྲེམ།།
བོན་བསྟན་རིང་ལུགས་འཛམ་གླིང་ཧྲིལ་བོར་སྤེལ།།
རྒྱལ་ཀུན་སྤྱི་གཟིགས་རྗེ་གཅིག་སྨན་རི་བ།།

ལུ༵ང་རྟོག༵ས་ཉི་ཟླའི་གཟི་མདངས་སུ་འཁྱུད་པ།།
བསྟ༵ན་པ༵འི་སྙིང་པོ་འཕྲུལ་ངག་བོན་གྱི་མགོན།།
སྙིགས་དུས་འགྲོ་འདྲེན་ཉི༵་མ༵་གཞོན་ནུའི་དཔལ།།
ཞབས་པད་བསྐལ་བརྒྱར་བརྟན་པར་གུས་ཕྱག་བརྩེགས།། 

---ཁྲི་བསོད་བསྟན།

འཛམ་གླིང་གོ་ལ་ཟླུམ་པོའི་ཡང་རྩེ་ནས།།
སྨག་རུམ་འཇོམས་པའི་གསེར་གྱི་ཉི་མ་ཞིག།
ཉིན་སྲིབ་མེད་པར་འཕྲོས་པའི་བསྐལ་པ་ལ།།
སེམས་ཀྱི་དད་པས་གུས་ཕྱག་ལན་བརྒྱར་ཞུ།།

མཚན་དཔེ་རྣམ་པར་གྲོལ་བའི་མཚར་སྡུག་སྐུ༷།།
ཚངས་དབྱངས་མཐར་ཕྱིན་འགག་མེད་རང་སྒྲའི་གསུ༷ང་།།
རྒྱལ་བསྟན་གསུང་རབ་འཛད་མེད་རྒྱ་མཚོའི་ཐུ༷གས།།
ལུང་རྟོགས་བསྟན་པའི་ཉི་མ་བསྐལ་བརྒྱར་བཞུགས།།

----མང་རའི་འབུམ་བྱམས་རྒྱལ།

མཁྱེན་རབ་ལུ༵ང་རིགས་གསེར་གྱི་ཐུར་མ་ཡིས།།
སྤངས་རྟོག༵ས་ཡོན་ཏན་འོ་མཚོ་བསྲུབས་པ་ན།།
བསྟ༵ན་པའི་སྙིང་ནོར་ལེགས་བཤད་གཡས་འཁྱིལ་དུང་།།
སྙིགས་དུས་རྒུད་མུན་སེལ་བའི་ཉི༵་མ༵་ཆེ།།

གཅེས་འཛིན་རྨོངས་ཞེན་བདུད་ཀྱི་ཞགས་ཐག་གིས།།
བཅིངས་པའི་ཉོན་མོངས་དུག་གི་མདུད་པའི་རྒྱ།།
ཐབས་ཤེས་སོར་མོའི་གར་གྱི་ཕྱག་རྒྱ་ཡིས།།
དུམ་བུར་བཅད་པའི་གཟི་བྱིན་སྲིད་ན་འབར།།

----ཁྲི་སྲས་དྲུག་འགྱུར།

རྣམ་འདྲེན་སྟོབས་བཅུ་མངའ་བའི་སྤྱན་སྔ་རུ།།
རླབས་ཆེན་ཐུཊ་བསྐྱེད་གཞན་དང་མི་མཚུངས་པར།།
གཤེན་བསྟན་སྤེལ་ལ་ཟླ་མེད་སྨན་རི་བ།།
ཚེ་རབས་ཀུན་ཏུ་རྟག་བརྟན་བཞུགས་གསོལ་ཞུ།།

ཐུགས་བརྩེ་དྲོན་མོ་བསླབ་བྱ་འོ་མའི་རྒྱུན།།
རིས་མེད་ལྟ་སྤྱོད་གཞན་དུ་མི་གཡོ་ཞིང་།།
མི་འགྱུར་ལྷུན་བརྩེཊ་གཡུང་དྲུང་སེམས་དཔའ་ཁོང་།།
དུས་གསུམ་ཀུན་ཏུ་འཛུམ་ཞལ་རྟག་འཆར་ཤོག།

---- ཁྲི་ཕུན་ཚོགས།

ལྟ་བ་ཡས་ཕུབ་བླ་མེད་རྫོགས་ཆེན་གྱི།།
གཞི་སྟོང་རྩ་བྲལ་སྤྲོས་བྲལ་ཡེ་གྲོལ་རྟོགས།།
སྒོམ་པ་བཅར་ཕོག་མ་བཅོས་བློ་འདས་ངང་།།
རྩལ་ཤར་སྙིང་རྗེའི་རང་གཟུགས་རང་སར་གྲོལ།།

སྤྱོད་པ་མས་འཛེགས་ཚུལ་ཁྲིམས་རྣམ་པར་དག།
ཐབས་མཆོག་ཕ་རོལ་ཕྱིན་བཅུའི་ལམ་ལ་འཛེགས།།
འབྲས་བུ་སྐུ་གསུམ་རྟོགས་གྲོལ་དུས་མཉམ་སྟེ།།
མདོ་སྔགས་ཀུན་གྱི་མདོ་འཛིན་ཁྲི་འཛིན་མཆོག།

----ཨར་ལྟ་བླ་མ།

རྟག་གཟིགས་ཞང་བོད་དཀར་ནག་བྲུ་ཤའི་ཡུལ།།
རྒྱལ་དང་རྒྱལ་སྲས་ལོ་པཎ་གྲུབ་ཆེན་གྱི།།
ཐུགས་ཀྱི་ཉིང་བཅུད་ལུང་དང་རྟོགས་པའི་བོན།།
མི་ནུབ་མཁའ་དབྱིངས་སྒྲེང་མཛད་དར་ཆེན་ཉིད།

ཕྱིན་ནང་བོན་འབངས་ཁྲི་ཕྲག་དུ་མ་ཡིས།།
མ་གྲོས་སྙིང་ནས་བཀའ་དྲིན་རྗེས་དྲན་ཕྱིར།།
བརྟན་བཞུགས་རྒྱས་འབུལ་ཞུས་པའི་བྱིན་མཐུ་ཡིས།།
ཞབས་པད་གཡུང་དྲུང་ཁྲི་རུ་རྟག་བརྟན་སྨོན།།

----ཨ་ཀྲོང་དགེ་བཤེས་སེམས་དཔའ་རྒྱལ་མཚན།

གཟིགས་དགོངས་ཚད་ལྔས་བསྟན་འགྲོའི་དོན་དུ་བཞད།།
རྒྱལ་འཕགས་གོང་མའི་ཐུགས་བཅུད་རྫོགས་པ་བླངས།།
བོན་བསྟན་མེ་རོ་སླར་ཡང་སྤར་བའི་ཕྱིར།།
རྒྱལ་བ་གཉིས་པའི་ཞལ་ཚབ་ཁྲི་རུ་བྱོན།།

བཤད་སྒྲུབ་བསྟན་པའི་བ་དན་མཁའ་རུ་བསྒྲེངས།།
བཤེས་གཉེན་བརྒྱ་ཕྲག་བསྟན་འགྲོའི་དོན་དུ་བསྐྲུན།།
སྲིད་པའི་ཞིང་འདིར་བསྟན་པ་རྗེས་བཞག་མཛད།།
མཛད་པ་མཐར་ཕྱིན་གསེར་གྱི་སྨན་རི་བ།།

-----དགེ་བཤེས་ཤེས་རབ་ཕུན་ཚོགས།

བསྐལ་སྟོང་སངས་རྒྱས་ཀུན་གྱི་ཞལ་ཚབ་དངོས།།
གཞིས་བྱེས་བོན་འབངས་ཡོངས་ཀྱི་གཙུག་གི་ནོར།།
བསྟན་པའི་མངའ་བདག་ངུར་སྨྲིག་རྣམ་རོལ་བ།།
དཔལ་ལྡན་བླ་མའི་ཞབས་ལ་གསོལ་བ་འདེབས།།

ཁྱེད་ཀྱི་གསང་གསུམ་མཛད་འཕྲིན་ཆ་རེ་ཡིས།།
བསྟན་འགྲོའི་རྒུད་པ་ཡོངས་སུ་སེལ་ནུས་ན།།
ཉམ་ཐག་འགྲོ་རྣམས་བརྩེ་བས་ཉེར་གཟིགས་ཏེ།།
ཞབས་པད་གཡུང་དྲུང་ཁམས་སུ་བརྟན་བཞུགས་གསོལ།།

----དགེ་བཤེས་ཤེས་རབ་དབང་རྒྱལ།

རྒྱལ་བའི་གདུང་སོབ་མཁན་ཆེན་དམ་པ་ཡིས།།
རྒྱལ་བསྟན་འཛིན་སྐྱོང་སྤེལ་བའི་ལམ་བཟང་ལ།།
རྒྱལ་སྲས་སྤྱོད་པའི་ལག་ལེན་མངོན་གསལ་བས།།
རྒྱལ་བ་མཆོག་ལ་གུས་ཕྱག་སྙིང་ནས་ཞུ།།

མཉམ་རྗེས་ཟུང་འཇུག་རྟོག་བྲལ་ཡེ་ཤེས་ཀྱིས།།
མཁྱེན་བརྩེའི་དཔལ་འབར་དྲི་བྲལ་དབྱིངས་ལ་བཀོད།།
དོན་གཉིས་ཕུལ་ཕྱིན་བྱམས་བརྩེའི་བདག་ཉིད་ཅན།།
སྐུ་ཚེ་མི་འགྱུར་བསྐལ་བརྒྱར་བརྟན་བཞུཊ་གསོལ།།

-----གཤེན་ཡ་ངལ་ཁྲི་རྒྱལ།

ལུང་རྟོགས་གཤེན་བསྟ༵ན་ལྷ་ལམ་བདལ་པའི་ངོགས།།
རབ་དཀར་མཚན་དཔེའི་ཉི་གཞོན་ཝ་ལེར་གསལ།།
མཛད་བཟང་འོད་འབུམ་ཕྱི་ནང་ཐམས་ཅད་ཁྱབ།།
ཨེ་མ་རྗེ་བཙུན་མཆོག་གི་ཡོན་ཏན་དྲན།།

གཡུང་དྲུང་སྐུ་ནི་རབ་མཛེས་ལྷུན་པོར་བརྗིད།།
ཚངས་པའི་གསུང་དབྱངས་འཕྲུལ་ངག་བོན་སྦྱིན་འགྱེད།།
བརྩེ་ཆེན་ཐུགས་ཉིད་འཁྲུལ་མེད་ཝ་ལེར་གཟིགས།།
འ་ཅག་ཨ་བསོད་དཔལ་དུ་རྟག་བཞུགས་ཤོག།

-----ལུང་དཀར་དགེ་མིང་པ་བསྟན་འཛིན་འགྱུར་མེད།

སྲིད་པའི་རྩེ་ན་གཤེན་གྱི་བ་དན་མཐོ།།
འཛམ་གླིང་ཁྱོན་ན་ཁྱེད་ཀྱི་མཛད་འཕྲིན་རྒྱས།།
འདིར་སྣང་ཀློང་ན་སྐུ་ཡི་གཟི་བརྗིད་འབར།།
སྨན་རི་ཆེན་པོའི་སྐུ་ཚེ་རྟག་བརྟན་ཤོག།

དབང་བཞིའི་ཆུ་བོ་རིས་མེད་འགྲོ་ལ་བསྩལ།།
ལས་བཞིའི་འཕྲིན་ལས་ཐོགས་མེད་ངང་གིས་བསྐོར།།
སྐུ་བཞིའི་བདག་ཉིད་དམ་པ་འགྲོ་བའི་མགོན།།
འགྱུར་མེད་གཡུང་དྲུང་ཁྲི་ལ་རྟག་བཞུགས་ཤོག།

-----ལྷ་བུ་བློ་བཟང་།

སྐུ་མཆོག་གསེར་གྱི་ལྷུན་པོ་ཤར་ནས་བཞད།།
བོན་བསྟན་འདུ་གནས་ཆེན་པོ་ལྷོ་རུ་བཙུགས།།
མདོ་རྒྱུད་བོན་གྱི་གདམས་ངག་བསྩལ་བ་ཡིས།།
བསྟན་འཛིན་སེང་འབྲུག་ལྟ་བུ་མང་དུ་བྱོན།།

གང་དེའི་ཐུགས་ཀྱི་འོད་ཟེར་ཆེན་པོ་དེ།།
འཛམ་གླིང་ཡུལ་གྲུ་ཀུན་ལ་ཁྱབ་ཀྱིན་པས།།
བཀའ་དྲིན་བླ་ལྷག་དྲན་པའི་བརྟན་བཞུགས་ཞིག།
བོན་འབངས་ཡོངས་ཀྱིས་འབུལ་བ་ཨེ་མ་ཧོ།།

----བྱ་འཕུར་དགེ་བཤེས་ཤེས་བྱ་རབ་གསལ།

རྒྱལ་སྲས་སེམས་དཔའི་རྣམ་སྤྲུལ་མི་དབང་རྗེ།།
རྒྱལ་བསྟན་འཛིན་སྐྱོང་སྤེལ་བའི་འཕྲིན་ལས་ཅན།།
རྒྱལ་བ་གཉིས་པའི་རྒྱལ་ཚབ་སྨན་རི་བ།།
རྒྱལ་མཚན་མི་ནུབ་གཡུལ་ལས་རྒྱལ་གྱུར་ཅིག།

རྒྱུད་གསུམ་ཀུན་འདུས་མཉམ་མེད་བླ་མའི་ཐུགས།།
བསླབ་གསུམ་བསྟན་པའི་བདག་ཉིད་སྨན་རི་བའི།།
གསང་གསུམ་མཛད་པའི་འཕྲིན་ལས་ཆ་ཤས་ཙམ།།
བཟང་གསུམ་འཛོམས་པའི་དུས་ཚིགས་འདི་ལ་ཕུལ།།

-----ཨ་ཀྲོང་རིན་ཆེན་རྒྱལ་མཚན།

རྒྱལ་བ་ཀུན་གྱི་སྙིང་རྗེའི་རང་གཟུགས་གར།།
རྒྱལ་སྲས་སེམས་དཔའི་སྐུ་རུ་མངོན་ཤར་བ།།
རྒྱལ་བ་གཉིས་པའི་ཞལ་ཚབ་སྨན་རི་བ།།
རྒྱལ་བསྟན་འགྲོ་བའི་མགོན་དུ་བརྟན་བཞུགས་གསོལ།།

ཁྱེད་སྐུ་འགྱུར་མེད་གཡུང་དྲུང་ལྷུན་པོའི་དཔལ།།
མཛད་འཕྲིན་ཉི་ཟླའི་འོད་ཕུང་རབ་འཁྱུད་དེ།།
ཞྭ་དཀར་གཡུང་དྲུང་བསྟན་པའི་དཔལ་མགོན་དུ།།
སྐུ་ཚེ་བསྐལ་བརྒྱར་བཞུགས་པའི་གསོལ་འདེབས་ཞུ།།

-----ཁྱུང་ཁྲི་ལྡེ།

འཛམ་གླིང་བོན་གྱི་གཙུག་རྒྱན་མཉམ་མེད་པའི།།
ཁྲི་འཛིན་སོ་གསུམ་རྒྱལ་བ་སྨན་རི་བས།།
རྒྱ་གར་འཕགས་པའི་ཡུལ་ནས་འགོ་བརྩམས་ཏེ།།
འཛམ་གླིང་ཁག་གི་ཡུལ་གྲུ་ཀུན་ཏུ་ནི།།

འཕྲུལ་ངག་བོན་གྱི་བསྟན་པའི་རྒྱལ་མཚན་ཆེ།།
མི་ནུབ་མཁར་རུ་མཐོན་པོར་སྒྲེང་མཁས་པོ།།
མཆོག་གི་བླ་མེད་མཛད་འཕྲིན་ངོ་མཚར་བ།།
ཁ་བའི་ལྗོངས་སུ་སྙིང་ནས་དྲན་པས་ཕུལ།།

-----ཐེ་བོ་ལེགས་བཤད་རྒྱ་མཚོ།

ལུང་རྟོགས་ཡོན་ཏན་ཀུན་ཁྱབ་ནམ་མཁའི་མཛོད།།
བསྟན་པའི་མངའ་བདག་ཁྱུང་སྔོན་སྐྱེས་དྲངས་པའི།།
རྣམ་འདྲེན་ཉི་མའི་འཁོར་ལོ་ཚེ་ཡི་མགོན།།
ལྷ་མིའི་གཙུག་རྒྱན་མཁན་ཆེན་རྒྱལ་གྱུར་ཅིག།

མཁའ་ཁྱབ་བསྟན་དང་འགྲོ་བའི་ཕན་བདེའི་སྲོག།
ཐུགས་བསྐྱེད་ཟབ་མོའི་ཉེར་ལེན་ལ་རག་ཕྱིར།།
ཇི་སྲིད་འཁོར་བ་མ་སྟོང་དེ་སྲིད་དུ།།
མི་འགྱུར་གཡུང་དྲུང་ཁྲི་ལ་བརྟན་བཞུགས་གསོལ།།

-----དུང་དཀར་བ་དཔལ་འབྱོར་ཉི་མ།

དམུ་རྒྱལ་རལ་པ་ཅན་ཞིག་གཤེགས་པའི་ཤུལ།།
སྤུངས་སོའི་བརྡ་ཆད་སྦར་གང་ལྷག་མའི་ཧྲག།
རིམ་དགུའི་མཛད་རྗེས་ཁ་ཡིག་གབ་པའི་དབུས།།
འོད་ཀྱི་ན་རོ་ཐོགས་པའི་མཁན་ཆེན་འཕགས།།

བསྐལ་པའི་ཆོ་རབས་བཀླགས་པའི་མགྲོན་པོ་ཞིག།
ཏི་སེའི་པྲོག་ཞུ་གཡར་ཏེ་གངས་རི་བརྒལ།།
ས་ཆེན་ཆིབས་སུ་བསྒྱུར་པའི་བང་འགྲོས་ཀྱིས།།
རྨིག་རྗེས་གཡུང་དྲུང་དགུ་ཡི་འོད་ཐིགས་ཟགས།།

-----གཟི་མིག་དགུ་པ།

རྒྱལ་ཀུན་སྙིང་རྗེའི་རང་གཟུགས་སྲིད་ཞིའི་མིག།
རྒྱལ་བའི་མཛད་པ་ཇི་བཞིན་སྐྱོང་བའི་དཔལ།།
རྒྱལ་བ་གཉིས་པའི་རྒྱལ་ཚབ་གདོང་ལྔའི་དབང་།།

རྒྱལ་བསྟན་ཀེ་ལ་ཤ་ཡི་རྩེ་ན་བརྗིད།།

རྣམ་མང་འགྲོ་ལ་བརྩེ་བའི་མ་མ་མཆོག།
རྣམ་ཀུན་ཁྱེད་ཞབས་རྟག་ཏུ་བརྟན་པའི་ཕྱིར།།
རྣམ་དག་དྲི་མེད་རྗེས་དྲན་བརྟན་བཞུགས་མཆོག།
རྣམ་མང་འགྲོ་བས་བཏེགས་འདི་ངོ་མཚར་རྨད།།

-----རྟོགས་གྲྭ་ཚུལ་ཁྲིམས་འོད་ཟེར། 

རྣམ་འདྲེན་གཤེན་གྱི་བསྟན་པའི་གཉེར་དཔོན་དུ།།
རྒྱལ་བའི་རྒྱལ་ཚབ་ལུང་རྟོགས་བོན་གྱི་མཛོད།།
ཕྱོགས་བཅུར་སྤེལ་བའི་ཉི་མ་འོད་པོ་ཆེ།།
བསླབ་གསུམ་པད་དཀར་འདབ་མའི་ལང་ཚོ་མཛེས།།

ཟབ་དགུའི་བདག་ཉིད་ཕྱི་ནང་ལུང་གི་སྙིང་།།
ཆེ་དགུའི་གཙུག་རྒྱན་དྲིན་ཅན་བླ་མ་རྗེ།།
སྐྱེ་དགུའི་མགོན་དུ་དུས་གསུམ་འགྱུར་མེད་པར།།
མི་འགྱུར་གཡུང་དྲུང་ཁྲི་ལ་བརྟན་བཞུགས་ཞུ།།

----ཁྱུང་མུ་ཝེར།

གྱེར་གྱི་ཀ་ཆེན་རྒྱལ་བ་སྨན་རི་བའི།།
ཕྱི་ནང་གསང་གསུམ་མཛད་འཕྲིན་ས་སྟེང་ཁྱབ།།
འགྲོ་དྲུག་སེམས་ཅན་ཡོངས་ཀྱི་མགོན་སྐྱབ་ཏུ།།
ནུབ་མེད་སྲིད་མཐའི་བར་ཏུ་བརྟན་འགྱུར་ཅིག།

སྐུ་ཚེ་མི་འགྱུར་གཡུང་དྲུང་བཞིན་དུ་བརྟན།།
གསུང་གི་བདུད་རྩི་སྦྲང་ཆར་ཇི་བཞིན་འཇོ།།
ཐུགས་ཀྱི་དགོངས་པས་འགྲོ་ཁམས་ཡོངས་ལ་གཟིགས།།
དམ་པའི་མཛད་འཕྲིན་སྲིད་གསུམ་ཁྱབ་པར་སྨོན།།

---- ལྷ་གཡག་དར་མ།

གཤེན་བསྟན་རིས་མེད་ཕྱོགས་སུ་ཁྱབ་པ་དང་།།
འགྲོ་དྲུག་ཉོན་མོངས་སྨག་ལས་དགྲོལ་མཛད་ཕྱིར།།
གཡུང་དྲུང་སེམས་དཔའ་ལུང་རྟོགས་བསྟན་པའི་རྗེ།།
ཐུགས་རྗེ་ཉི་མའི་ཚན་ཁ་རྟག་འཆར་ཤོག།

གངས་ལྗོངས་བསྟན་འགྲོའི་ཕུན་ཚོགས་གཡང་བཅུད་ནོམས།།
མཐའ་དམག་དཔུང་གིས་བཅོམ་བརླགས་བཙན་གྱིས་ཁྱེར།།
སེམས་དཔའ་ཆེན་པོའི་སྙིང་རྗེ་བདུད་རྩིའི་ཆར།།
ཡུལ་འཁྱར་མགོན་མེད་གསོས་སུ་རྟག་འབབ་ཤོག།

-----ཀླུ་ཚང་ཁྱུང་སྲས་སམ་རྒྱ་ཐར།

ལུང་དང་རིགས་པའི་གཡུ་རལ་གནམ་དུ་གསིག།
མ་རྟོགས་རི་སྐྱེས་ཚོགས་ལ་འཇིགས་པ་བྱིན།།
གཤེན་བསྟན་ཁྲི་འཕང་འདེགས་པའི་སེང་གེ་ཁྱོད།།
ངེས་དོན་སྨྲ་བའི་ཉི་མར་ཞབས་བརྟན་ཤོག།

ལམ་གོལ་མྱ་ངམ་ཐང་ན་འགྲོ་འདིའི་ཁྱུ།།
ཚ་གཅུན་དྲག་པོས་གདུང་བ་སྙིང་རེ་རྗེ།།
སྐྱབས་གཅིག་ཙན་དན་ལྗོན་པ་རྟག་བཞུགས་ནས།།
ཐུགས་རྗེ་གྲིབ་བསིལ་སྣུམ་པོས་དབུགས་དབྱུངས་མཛོད།།

-----ཚོགས་གཙོ་ཟུར་བ་བསྟན་པའི་དངོས་གྲུབ།

དུས་འགྱུར་མུན་གླིང་ཁྲོད་ནས་འཕགས་ཡུལ་བྱོན།།
བརྩེ་ཆེན་ཐུགས་ཀྱིས་དུས་གསུམ་གཟིགས་པ་འདིས།།
འཕགས་ཡུལ་སྨན་རིའི་དགོན་ཆེན་ཕྱག་འདེབས་མཛད།།
ཞྭ་དཀར་བསྟན་པ་སྤེལ་བའི་ངོ་མཚར་རྨད།།

གངས་ཅན་ཁ་བའི་ཆོས་བརྒྱུད་དཔུང་རྡང་སྦྲེལ།།
བརྩེ་ཆེན་ཐུགས་ཀྱིས་བསྐྱངས་པས་བསྟན་པ་འདི།།
བསིལ་ལྡན་ཁ་བ་རི་བོའི་གཙུག་གི་རྒྱན།།
ཞྭ་དཀར་བསྟན་པ་སྤེལ་བའི་ངོ་མཚར་རྨད།།

-----བཅུད་པར་རྫ་སྐྱེས། ཨོ་གླིང་།

སྲིད་པའི་ཁྱེའུ་ཁྱེད་ཉིད་འོད་ཀྱིས་བལྟམས།།
དགུ་བཅུའི་ལང་ཚོ་དེ་ཡང་འོད་ཀྱིས་འབར།།
དཔེ་བྱད་འོད་ཀྱིས་མཚོན་པའི་སྨན་རི་བ།།
འཛམ་གླིང་འོད་ཀྱིས་འགེང་བཞིན་ཞབས་པད་བརྟན།།

བོད་གཞུང་པོད་ཏི་སྔོན་པོ་ཕྱག་གིས་བཏེགས།།
བོད་གོས་པད་ལོ་སྔོན་པོས་ས་ཆེན་གཞལ།།
ས་ལམ་སྔོན་པོས་མཚོན་པའི་སྨན་རི་བ།།
དབུ་ལོ་སྔོན་པོས་མཛེས་ཤིང་ཞབས་པད་བརྟན།།

----ལྡོང་སྐལ་བཟང་།

 རྒྱ་ཆེན་ཐུགས་ཀློང་ཆུ་གཏེར་འཇིངས་ཡངས་སུ།།
འགག་མེད་གསུང་དབྱངས་མཐོན་པོའི་གདངས་འགྲོས་ལས།།
སྐུ་ཤ་པདྨོའི་ལང་ཚོ་བཞད་པའི་དཔལ།།
གདན་ས་སྨན་རིའི་སྐྱབས་རྗེ་བཞུགས་གསོལ་འདེབས།།

རིང་ལུགས་འཁྲུལ་མེད་བོན་བསྟན་ནོར་བུའི་མཛོད།།
བདག་གིར་ལེགས་བཞེས་གྲུབ་མཐའ་བྱེ་བའི་མགོན།།
བསྟན་པའི་སྙིང་པོ་རྒྱལ་བ་སྨན་རི་བ།།
ཁྲི་འཛིན་ཆེན་མོའི་ལྷ་སྐུ་བཞུགས་གསོལ་འདེབས།།

-----ས་ཁའི་བློ་ལྡན།

སངས་རྒྱས་བསྟན་པ་འབྱུང་གནས་བོན་གྱི་མཆོག།
སྟོན་པ་གཤེན་གྱི་རྒྱུད་འཛིན་བོན་སྒོ་བ།།
སངས་རྒྱས་གཡུང་དྲུང་བོན་གྱི་བསྟན་བདག་རྗེ།།
རྗེ་བཙུན་བླ་མ་སྨན་གྱི་རིན་པོ་ཆེ།།

འགྲོ་བའི་མགོན་པོ་སྟོན་པ་བླ་ན་མེད།།
གསང་གསུམ་མི་ཟད་རྒྱ་མཚོ་ཆུ་ཡི་གཏེར།།
རྒྱལ་བ་གཉིས་པའི་རྒྱལ་ཚབ་སྨན་རི་བ།།
བདག་ཅག་སྲིད་ཞིའི་མགོན་ཏུ་རྟག་འཆར་ཤོག།

-----དགེ་བཤེས་ཚུལ་ཁྲིམས་འབྱུང་གནས།

གཡས་རུའི་སྟོན་པ་བཅོ་བརྒྱད་ཐུགས་ཀྱི་དགོངས།།
རྨེའུ་ཡི་སྨྲ་སེང་བཅུ་གསུམ་གསུང་གི་བཅུད།།
ལུང་རྟོགས་བསྟན་པའི་སྲོག་ཤིང་སྨན་རི་བ།།
སྐུ་ཚེ་བསྐལ་བརྒྱར་བརྟན་པའི་གསོལ་བ་འདེབས།།

ཕྱོགས་མེད་རྒྱལ་ཁབ་ཐམས་ཅད་དབང་དུ་སྡུད།།
རིས་མེད་འགྲོ་བ་ཡོད་ཚད་བྱམས་ཀྱིས་སྐྱོང་།།
འཛམ་གླིང་ཞི་བདེ་བསྐྲུན་མཁན་འོད་པོ་ཆེ།།
སྨན་རིའི་མཁན་ཆེན་སྐུ་ཚེ་ཁྲི་ལོ་ཤོག།

-----ཉག་གཡུ་འབྲུག

མ་གཅིག་བདེ་འགྲོ་སྲིད་པའི་ལུང་རིང་གིས།།
བོན་བསྟན་ས་གསུམ་འགེངས་བའི་སྡོང་བསྡེབས་སུ།།
སྨན་གྱི་རི་ནས་གསང་བའི་གཤང་དཀྲོལ་བ།།
མཚན་བརྗོད་དཀའ་བའི་བླ་མར་གསོལ་བ་འདེབས།།

ལུགས་གཉིས་སྲིད་པའི་ལུང་རྟོགས་མཛོད་ཀྱི་སྒོ།།
མཆོག་གསུམ་བསྟན་པའི་རྒྱལ་མཚན་མངོན་པར་མཐོ།།
གསང་གསུམ་ཉི་མའི་འོད་འབུམ་གང་དེ་ཉིད།།
རྟག་བརྟན་ལྷ་ཡིས་མགོན་དུ་བསྲུང་གྱུར་ཅིག།

----སྟོང་སྲས་ལྷ་བུ།

རྒྱལ་བསྟན་འཇིགས་ལ་ཉེ་བའི་དུས་དེ་ན།།
རྒྱལ་བསྟན་མེ་རོ་རྒྱ་དཀར་ཡུལ་དུ་སྤེལ།།
རྒྱལ་བསྟན་སྐྱོང་བའི་རྒྱལ་བ་གཉིས་པ་ཡི།།
རྒྱལ་བསྟན་འཛིན་པའི་ཁྲི་རབས་སོ་གསུམ་པ།།
རྒྱལ་བསྟན་མགོན་དུ་འགྱུར་མེད་རྟག་བརྟན་ཤོག།

མདོ་སྨད་ཟིང་ཆུའི་ཡུལ་དུ་སྐུ་བལྟམས་ཤིང་།།
སྟོད་ཕྱོགས་སྨན་གྱི་ཁྲི་ལ་མངའ་གསོལ་ཏེ།།
རྒྱལ་གཤེན་བོན་སྒྲ་འཛམ་གླིང་སྒྲོགས་པ་ཡི།།
ལུང་རྟོགས་བསྟན་པའི་ཉི་མའི་མཚན་ཅན་བ།།
མ་གྱུར་སྐྱེ་འགྲོ་བའི་མགོན་དུ་བཞུགས་སུ་གསོལ།།

-----ཞང་ཞུང་ལྷ་རིས་པ་ཨ་སྣང་པེ།

རྒྱལ་གཤེན་འཕྲུལ་ངག་ཞྭ་དཀར་གཡུང་དྲུང་བོན།།
རྒྱལ་བསྟན་རིན་ཆེན་གསལ་མཛད་མཁས་གྲུབ་རྗེ།།
རྒྱལ་བ་གཉིས་པའི་གདུང་འཚོབ་སྨན་རི་བ།།
རྒྱལ་ཀུན་སྤྱི་གཟུགས་ཁྱེད་ལ་གསོལ་བ་འདེབས།།

གང་ཁྱེད་གཟུགས་སྐུ་མི་འཇིགས་སེང་གེའི་ཁྲིར།།
ནམ་ཡང་མི་འགྱུར་གཡུང་དྲུང་ལྷུན་པོའི་ཁམས།།
བསྐལ་བརྒྱར་བར་དུ་ཞབས་པད་རབ་བརྟན་ནས།།
མཛད་པའི་འཕྲིན་ལས་ནམ་མཁའི་མཐར་ཁྱབ་ཤོག།

-----སྤྲུལ་མིང་པ་གཡུང་དྲུང་བསྐལ་བཟང་།

ལུང་རྟོགས་བཤད་སྒྲུབ་སྲོལ་འཛིན་གཡུང་དྲུང་བོན།།
མདོ་སྔགས་རྫོགས་གསུམ་དབང་འབྱོར་གཡུང་དྲུང་བོན།།
མ་ཉམས་གོང་འཕེལ་སྤེལ་མཁན་སྨན་རི་བ།།
ལུང་རྟོགས་བསྟན་པའི་ཉི་མ་རྟག་འཆར་ཤོག།

བསྟན་པའི་བདག་པོ་རྒྱལ་བ་སྨན་རི་བའི།།
བསྟན་པ་བྲུ་ཡི་རིང་ལུགས་རྒྱུད་གསུམ་བཟུང་།།
བསྟན་པའི་བ་དན་མཁའ་ཁྱབ་འགྲེང་བྱེད་པུ།།
གཙུག་རྒྱན་མཁན་པོ་བསྟན་པའི་ཉི་མ་བསྟོད།།

----- སྤྲུལ་སྐུ་དབང་རྒྱལ་ཚེ་རིང་།

རབ་འབྱམས་མཐའ་ཡས་གོ་ལའི་དབུ་རྩེ་ན། །
མངོན་པར་འཕགས་པའི་གངས་སེང་མི་ཡི་གཟུགས།།
དངོས་བྱོན་དུས་གསུམ་རྒྱལ་བའི་ལྷ་སྲས་ཚབ།།
འགྲོ་བའི་དེད་དཔོན་སྐྱབས་རྗེ་སྨན་རི་བ།།

མི་འགྱུར་གསེར་གྱི་ཁྲི་ལ་རབ་འགྱིང་བས།།
གདུལ་བྱ་དུས་ཀུན་སྐྱོང་མཛད་དམུ་རྒྱལ་སྲས།།
འཕྲིན་ལས་རྣམ་བཞིས་མི་ནུབ་རྒྱས་མཛད་པའི།།
ལུང་རྟོགས་བསྟན་པའི་ཉི་མ་རྟག་བརྟན་ཤོག།

-----དམུ་རིགས་བསྟན་འཛིན་དབང་གྲགས།

རྗེ་གཅིག་མཉམ་མེད་ཆེན་པོའི་དགོངས་ཆར་ཅི།།
འདྲེན་མཆོག་འཆད་ཉན་སྒོམ་པའི་སྡེ་གསུམ་སྐྱོང་།།
འཛམ་གླིང་ཁྱོན་ཀུན་གཤེན་བསྟན་ཁྱབ་མཛད་པའི།།
གངས་ལྗོངས་སོག་ཁའི་ཞིང་དུ་མངའ་ན་མོ།།

སྲིད་པའི་མུན་སྒྲོན་འོད་ཆེན་སྙན་འཇེབས་དཔལ།།
སྐྱེ་འགྲོའི་གཙུག་རྒྱན་རྒྱལ་བའི་དགོངས་པ་རྫོགས།།
སྙིགས་མའི་རྒྱལ་བསྟན་སྤེལ་བའི་མགོན་གཅིག་པུ།།
ལུང་རྟོགས་བསྟན་པའི་ཉི་མ་ནུབ་མེད་འཆར།།

-----རྫ་ཚུལ་ཁྲིམས་བསྟན་འཛིན།

གདུལ་བྱ་སྨིན་གྲོལ་ལམ་ལ་འགོད་ཕྱིར་འཆད༵།།
མ་རྟོགས་རྟོག་པའི་མདུད་རྒྱ་དགྲོལ་བར་རྩོད༵།།
མདོར་ན་རྒྱལ་བསྟན་གསལ་བྱེད་དམིགས་ཏེ་རྩོམ༵།།
འཆད་རྩོད་རྩོམ་པས་བསྟན་པའི་མེ་རོ་སློང་།།

མཁས་པའི་ཁྱུ་མཆོག་མཁས་མང་གྲལ་ན་མཛེས།།
བཙུན་པའི་གཙོ་བོ་གཙུག་གི་རྒྱན་དུ་ཆེ།།
བཟང་དགུར་སྤྱོད་པའི་སྙན་པ་སྲིད་རྩེར་འབར།།
དཔལ་ལྡན་སྲིད་སྒྲོན་རྟག་ཏུ་འཆར་བར་ཤོག།

----རྫ་རིན་ཆེན་རྒྱལ་མཚན།

སངས་རྒྱས་བསྟན་པའི་གཙུག་རྒྱན་གཡུང་དྲུང་བོན།།
རིང་ལུགས་དྲི་མེད་འཛིན་པའི་རྒྱལ་སྲས་ཏེ།།
འགྲོ་བའི་དེད་དཔོན་ཆེན་མོ་སྨན་རི་བ།།
སྙིང་དབུས་པད་མའི་རྩེ་ནས་དད་ཕྱག་མཚལ།།

སྙིགས་དུས་བསྟན་པ་ཉམ་ང་བག་ཕྲ་དུས།།
འགྲོ་འདྲེན་གཤེན་རབ་མི་བོ་དངོས་བྱོན་པ།།
མཁན་ཆེན་ལུང་རྟོགས་བསྟན་པའི་ཉི་མ་མཆོག།
སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུ།།

----རི་བླ་དཀོན་མཆོག་བསྟན་འཛིན།

རྒྱལ་ཀུན་མཁྱེན་བརྩེའི་རང་གཟུགས་བླ་མ་རྗེ།།
རྒྱལ་བ་གཉིས་པའི་གདུང་སོབ་སྨན་རི་བ།།
རྒྱལ་བསྟན་མེ་རོ་སྤར་བའི་གཉེན་གཅིག་པུ།།
རྒྱལ་དབང་བསྟན་པའི་ཉི་མ་རྒྱལ་གྱུར་ཅིག།

ལུ༵ང་རྟོག༵ས་བོན་ལ་ཐོས་བསམ་བསྒོམས་པའི་མཐུས།།
བསྟ༵ན་པ༵འི་སྙིང་དོན་རྟོགས་པའི་མགོན་གཅིག་པུ།།
ཉི༵་མ༵་གཞོན་ནུ་བསྟན་དང་འགྲོ་བའི་སླད།།
བསྐལ་པ་ཇི་སྲིད་བར་དུ་བརྟན་བཞུགས་གསོལ།།

------སྡེ་དགེ་གཤེན་བསྟན་དབང་རྒྱལ།

ལྟ་བ་མཐའ་བྲལ་བོན་སྐུ་བདེ་ཆེན་དབྱིངས།།
འགག་མེད་སྣ་ཚོགས་ལྷུན་གྲུབ་རྫོགས་པའི་སྐུ།།
སྙིགས་དུས་འགྲོ་ལ་བྱོན་བའི་སྤྲུལ་པའི་སྐུ།།
སྐུ་གསུམ་བདག་ཉིད་ཁྱེད་ལ་དད་ཕྱག་བརྩེགས།།

སངས་རྒྱས་བསྟན་པའི་དོན་ལ་མཁྱེན་གཟིགས་པའི།།
ལྷག་བསམ་ཀུ་མུད་མེ་ཏོག་འཛུམ་མདངས་ཅན།།
ཁྱད་འཕགས་བསྟན་པའི་བདག་ཉིད་སྐྱབས་ཀྱི་མཆོག།
ལུང་རྟོགས་བསྟན་པའི་ཉི་མ་རྟག་བཞུགས་གསོལ།།

-----ཉག་ཟླ་འོད།

མཆོག་གསུམ་བདེན་པ་ཆེན་པོའི་སྟོབས་ཀྱི་མཐུས།།
གསང་གསུམ་ངོ་བོ་བསྡུས་པའི་རིག་པའི་ཕུལ།།
རྒྱུད་སྡེ་རྒྱ་མཚོའི་དཔལ་གྱི་མཛོད་འཆང་བ།།
བཀའ་དྲིན་མཚུངས་ཟླ་བྲལ་བའི་སྨན་རི་བ།།

ཕྱི་ནང་བོན་གྱི་མངའ་བདག་ཁྲི་ཆེན་རྗེ།།
གཤེན་རབ་བསྟན་པའི་སྲོལ་འཛིན་འགྲོ་བའི་མགོན།།
མཉམ་མེད་བླ་མའི་གདུང་སོབ་ཐུགས་རྗེ་ཅན།།
བཀའ་དྲིན་མཚུངས་ཟླ་བྲལ་བའི་སྨན་རི་བ།།

----ཟླ་བསོད་བློ།

རྒྱལ་གཤེན་བསྟན་པའི་རང་ལུགས་རྨ་མེད་པར།།
འཛིན་སྐྱོང་སྤེལ་བའི་བསྟན་པའི་མངའ་བདག་རྗེ།།
མཉམ་མེད་དངོས་བྱོན་འགྲོ་བའི་སྐྱབས་གཅིག་པུ།།
སྨན་རིའི་ཁྲི་འཛིན་བསྟན་པའི་ཉི་མ་མཆོག།

སྐུ་ནི་མི་འགྱུར་རི་རྒྱལ་ལྷུན་པོ་བརྟན།།
གསུང་ནི་འགག་མེད་སྒྲ་དབྱངས་གདངས་ལྡན་པ།།
ཐུགས་ནི་འཁྲུལ་མེད་ཀུན་བཟང་ངང་ལ་གནས།།
སྨན་རིའི་མཁན་ཆེན་ཞབས་པད་བསྐལ་བརྒྱར་བཞུགས།།

----ཉག་བློ་གྲོས་རབ་གསལ།

འཛིན་མའི་ཕྲེང་ལ་རྒྱུས་པ་རིག་པའི་ཡུལ།།
ཤར་ཕྱོགས་རྒྱལ་བའི་གྲོང་གི་རིན་ཆེན་མིག།
འདི་ཕྱི་མ་ལུས་འཛིན་པ་བྱིན་གྱིས་རློབས།།
རྒྱལ་བ་སྨན་རིའི་ཁྲི་འཛིན་བརྟན་པར་ཤོག།

གང་ག་ཆུ་བོའི་གཞུང་གི་རིན་ཆེན་གཏེར།།
རིག་པའི་འོད་སྣང་རྒྱས་པ་རྒྱལ་བའི་སྐུ།།
གང་གི་འདི་ཕྱི་མཁྱེན་པ་སྨན་རི་བ།།
ཕྱག་གསུམ་གུས་པས་ཁྱེད་ལ་གསོལ་བ་འདེབས།།

---- བྱ་གཞུང་འབྲུག་འབུམ་ཡག

བྱམས་བརྩེའི་འོད་སྣང་དཀར་པོ་མཁའ་ནས་འཛུམ།།
ཕན་བདེའི་མུ་ཏིག་ཕྲེང་བ་ས་གཞིར་བསྟར།།
ཐུགས་རྗེའི་བསིལ་འཇམ་རླུང་བུ་ཁྱོན་ཀུན་རྒྱུ།།
ལུང་རྟོགས་བསྟན་པའི་ཉི་མ་རྟག་བརྟན་ཤོག།

ཉམ་ཐག་མུ་གེ་ཟུག་ངུ་ཅིག་ཅར་བཅོམ།།
བསྟན་པའི་མེ་རོ་བློ་སྤོབས་སྟོང་གིས་སྦར།།
བསྟན་དང་འགྲོ་བའི་སྤྱི་བོའི་མགོན་གྱུར་བའི།།
ལུང་རྟོགས་བསྟན་པའི་ཉི་མ་རྟག་བརྟན་ཤོག།

----དར་ནག རྟོགས་ལྡན་དགོན།

མ་དག་དུག་ལྔའི་འདམ་གྱིས་མ་སླད་ཅིང་།།
མ་རྟོགས་རྨོངས་བའི་སྨག་རུམ་ཀུན་སངས་ནས།།
ལེགས་རྟོགས་རྣམ་དཔྱོད་འབར་བའི་དཔའ་ངར་ཅན།།
ལུང་རྟོགས་གང་མོས་དེར་སྟོན་ཨེ་མ་ཧོ།།

ཕས་རྒོལ་ལོག་ཚོགས་མ་ལུས་སྟོབས་ཀྱིས་གཞོམ།།
ཡིད་གཉིས་ཐེ་ཚོམ་ལྷག་མེད་སོ་སོར་སེལ།།
གཤེན་རབ་བསྟན་པའི་མདའ་དར་བསྒྲེངས་མཁས་པ།།
ནམ་མཁའི་ནོར་བུ་ཅི་བཞིན་རྟག་འཆར་ཤོག།

----དགེ་ལེགས་འགྱུར་མེད།

སྐྱབས་སྐུ་གསུམ་གྱི་བདག་ཉིད་རིན་པོ་ཆེ།།
རྗེ་སྨན་རི་བའི་རྒྱབ་ཚབ་སོ་གསུམ་པ།།
བོན་ཞྭ་དཀར་གྱི་སྐྱབས་མགོན་བརྟན་བཞུགས་ལ།།
སྐུ་ཁྲི་ལོ་བརྟན་པའི་སྨོན་ལམ་ཤིས་ཚིག།

རི་ཧ་མ་ལའི་ལོ་རྒྱུས་ལས་རིང་བ།།
མཚོ་མ་ཕམ་གཡུ་མཚོ་ལས་གཏིང་ཟབ་པའི།།
གྱེར་མི་འགྱུར་གཡུང་དྲུང་གི་ཆག་ཤིང་པོ།།
དུས་རྟག་ཏུ་བོན་འབངས་ལ་གཟིགས་ཤིག་བཞུགས།།

-----ཁམས་རྒྱལ་སྲས།

འཛམ་གླིང་ཉི་མ་སེར་པོ་དགུང་ནས་འཆར།།
སྙིགས་དུས་སེམས་ཅན་རྣམ་ལ་འོད་ཟེར་སྤྲོ།།
མུ་མཐའ་མེད་པ་འཁོར་བའི་འཇིག་རྟེན་ནས།།
གསལ་བའི་སྒྲོན་མེ་མི་ནུབ་ཚེ་འབར་ཅིག།

ལྟ་བ་ཡས་ཕུབ་རྫོགས་པ་ཆེན་པོ་ཉིད།།
སྤྱོད་པ་མས་འཛེགས་ཚུལ་ཁྲིམས་རྣམ་པར་དག།
སྙིང་རྗེ་ཕྱོགས་ཀུན་ཁྱབ་པའི་བདག་ཉིད་པ།།
བསྟན་པའི་ཉི་མ་བསྟན་འཛིན་སྐྱེས་བུར་འདུད།།

-----གཡུང་དྲུང་འགྱུར་མེད། ཁམས་འཇོ་མདའ།

འཇིན་རྟེན་མུན་པའི་སྒྲོན་མེ་སེམས་ཤེས་པ།།
སེམས་ཅན་རྨོངས་པ་བླང་དོར་ཡལ་བའི་མགོན།།
བསིལ་ལྡན་གངས་རི་ཞིང་གི་བློ་ལྡན་ལགས།།
གུས་པས་ཁྱེད་ལ་དད་པའི་སེམས་འཕྲིན་ཡིན།།

སྦྲང་ཆུང་འབུལ་ཕྲག་འཁོར་སའི་དྲི་ཞིང་ལ།།
སྡུག་བསྔལ་ཀུན་ལས་རྒྱལ་བའི་ནད་སྨན་ལྟར།།
རྒྱལ་བ་ལམ་སྟོན་ཡན་ལག་གསལ་རྟོགས་པ།།
འགྲོ་བ་འདྲེན་པའི་སྐྱེས་བུ་ཁྱེད་ཉིད་བསྟོད།།

-----ཀུན་ཤེས། ཁམས་འཇོ་མདའ།

དགོང་ལ་ཉི་ཟླ་བཞིན་དུ་གསལ་ལེ་བ།།
ཡ་ཐོག་ཞང་བོད་ཤེས་རིག་ནོར་བུའི་མཛོད།།
གངས་ལ་ཉི་འོད་ཕོག་པ་ཇི་བཞིན་དུ།།
གསལ་བར་མཛད་པའི་སྔོན་བྱུང་རྣམ་ལ་འདུད།།

ཡང་ཁྱད་རྒྱལ་བ་སྨན་རིའི་རིང་ལུགས་ཞེས།།
ཡོངས་སུ་གྲགས་པ་འདི་ཉིད་འཛིན་སྐྱོང་ལ།།
བཀའ་དྲིན་མཚུངས་མེད་བསྟན་པའི་ཉི་མ་ཡི།།
སྐུ་ལ་འཚེ་མེད་གསུང་དབྱངས་འགག་མེད་ཤོག།

----- གཟུ་བོ། རྔ་བ།

བོན་ཞེས་ཞང་བོད་མྱེས་པོའི་སྙིང་ཡིན་ཀྱང་།།
ལོག་ཅེས་ཀུན་གྱིས་མི་འདོད་བརྙས་བྱེད་སྐབས།།
ང་ཞེས་བོན་འགག་སྔོན་པོའི་གཟི་མདངས་དེས།།
འདུག་ཅེས་ཀུན་སྨོན་ཤོར་ས་སྨན་རི་བ།།

ས་ཆེན་འདི་ལ་དུས་ཀྱི་དཀར་ངོགས་འདིར།།
བསྐལ་ཆེན་སྟོན་དེའི་བསྟན་འཛིན་མི་ཡི་སེང་།།
གྱེར་གྱི་གཙུག་རྒྱན་རྒྱལ་བ་སྨན་རི་བ།།
མི་ཤིགས་གཡུང་དྲུང་ཁྲི་ལ་བརྟན་བཞུགས་ཞུ།།

-----ཁྲི་བརྟན་ནོར་རྩེའི་ཚུལ་ཁྲིམས་དྲི་མེད།

ངུར་སྨྲིག་ཁྱུ་མཆོག་རྒྱལ་བ་སྨན་རི་བ།།
བསླབ་གསུམ་བསྟན་པའི་བདག་ཉིད་སྨན་རི་བ།།
རྒྱལ་ཀུན་ངོ་བོ་རྗེ་བཙུན་སྨན་རི་བ།།
ཁྱེད་སྐུ་མི་འགྱུར་བསྐལ་བརྒྱར་བརྟན་པར་ཤོག།

མེས་པའི་ཞབས་རྒྱས་བསིལ་ལྗོངས་བཞད་པ་ཉིད།།
རྒྱུད་འཛིན་བུ་སློབ་ཁྲི་སྟོང་སྤྱན་དཀྱུས་མིག།
སོ་གསུམ་ཉི་གཞོན་ཞྭ་དཀར་བསྟན་པའི་རྒྱན།།
མི་ཤིགས་གཡུང་དྲུང་ཁྲི་ལ་རྟག་བརྟན་ཤོག།

----- གཡུང་དྲུང་འཇིགས་མེད།

སྨན་ལྗོངས་རྩ་གསུམ་ལྷ་ཡི་དག་ཞིང་ཁམས།།
རི་བོ་ཧི་མ་ལ་ཡའི་ཡང་རྩེ་ན།།
མཁན་རབས་དུ་མའི་སྲོལ་རྒྱུན་འཁྲུལ་མེད་དུ།།
ཆེན་པོའི་གོ་ལ་སྟེང་ནས་རང་སྒྲ་སྒྲོག།

མ་རིག་འགྲོ་བའི་དོན་ལ་རབ་དགོངས་ནས།།
བརྩེ་བ་སྙིང་རྗེ་ཆེན་པོ་ལྷོད་མེད་ངང་།།
རིགས་བརྒྱའི་སྨྲ་དབང་ཆེན་པོའི་ཚུལ་མཛད་དེ།།
འཁོར་བ་མ་སྟོང་བར་དུ་རྟག་བརྟན་ཤོག།

-----འཇོ་མདའ་གཞན་ཕན་དབང་ཕྱུག

གངས་རྒྱལ་ཏེ་སེའི་དབུ་ཡི་ཐོད་འགྱིང་པའི།།
གངས་རིའི་ལྗོངས་འདིར་བླ་མེད་བྱིན་རླབས་སྩོལ།།
གངས་ཅན་བོད་པའི་སེམས་ནས་འདོར་མེད་པ།།
སྐྱབས་གཅིག་བླ་མ་དྲིན་ཆེན་སྨན་རི་བ།།

འཇིན་རྟེན་གསལ་བའི་ཉིན་བྱེད་ཆེན་མོ་སྟེ།།
འགྲོ་ལ་སྙིང་རྗེའི་སྐྱོང་བའི་མངའ་བདག་པོ།།
ཁྱེད་སྐུ་རྟ་བདུན་དབང་པོ་དང་མཚུངས་པས།།
གཏན་དུ་བཞུགས་དགོས་དྲིན་ཆེན་སྨར་རི་བ།།

-----དཔལ་ལྡན་རྣམ་རྒྱལ། སྡེ་དགེ།

དུས་ཀྱི་ཐ་མ་རྩོད་ལྡན་ཤར་བའི་ཚེ།།
རྒྱལ་བསྟན་གསེར་གྱི་ཁྲི་གདུགས་ནུབ་ཏུ་ཕྱོགས།།
གཅེས་སྲོག་མི་འགྱུར་ཐོ་ཡི་རྟེན་དུ་བཙུགས།།
ཉིད་ཀྱི་ཡོད་ཚད་བསྟན་འགྲོའི་དོན་དུ་ཕུལ།།

སྟེང་ན་མཆོག་གསུམ་ལྷ་ཡིས་ཁྱེད་ཉིད་སྲུང་།།
བར་ན་མཁས་གྲུབ་སྟོང་གིས་ཁྱེད་ཉིད་བཀུར།།
མཐའ་ན་སློབ་འབངས་བྱེ་བས་ཁྱེད་ཉིད་བསྐོར།།
ལུང་རྟོགས་བསྟན་པའི་ཉི་མ་ནུབ་མེད་ཤོག།

-----བོན་བརྒྱ་དགོན་བསྟན་འཛིན་མཆོག་གྲུབ།

རྒྱལ་བ་སྲས་བཅས་བརྩེ་ཆེན་དབྱིངས་རིམ་ནས།།
མདོ་སྔགས་རྫོགས་གསུམ་རྟ་བདུན་དབང་པོའི་འོད།།
མངོན་པར་འདྲེན་མཛད་གཤེན་གྱི་ཞལ་ཚབ་མཆོག།
བསྐལ་བཟང་མགོན་དུ་བཞུགས་ལ་ཤིས་པ་སྩོལ།།

འགྱུར་མེད་སྐུ་ལ་མཚན་དཔེའི་མདངས་འབར་ཞིང་།།
འགག་མེད་གསུང་ལ་ལེགས་བཤད་གཏེར་མངའ་བ།།
འཁྲུལ་མེད་ཐུགས་ལ་མཁྱེན་བརྩེའི་རྩལ་རྫོགས་པ།།
བསྟན་འགྲོའི་མགོན་དུ་རྟག་བཞུགས་གསོལ་བ་འདེབས།།

-----འཕྲིན་ལས་ཉི་མ། བོན་བརྒྱ་དགོན།

ལྗོངས་དེའི་བསོད་ནམས་མཛད་མེད་ཆུ་བོ་བཞིན།།
ཁོང་གི་སྐུ་ཚེ་ཧྲིལ་བོའི་སྤྱན་ཟུང་དེ།།
རིས་མེད་འགྲོ་ལ་རྟག་ཏུ་གཟིགས་གནང་བའི།།
མཆོག་གྱུར་བླ་མ་ཡུལ་དེའི་གཙུག་ཏུ་བཀུར།།

གང་སྐུ་གསེར་གྱི་ཉི་འོད་བཞད་པ་འདི།།
རྐང་གཉིས་མིི་ཡི་མགོན་དུ་ཤར་བ་དེ།།
བསྐལ་བ་ཁྲི་རུ་འཆར་བའི་སྨོན་འདུན་དེ།།
ནམ་ཡང་ནུབ་པ་མེད་པར་རྟག་བརྟན་ཤོག།

-----གཡུ་ཆུང་། རྟོགས་ལྡན་དགོན།

རབ་འབྱམས་ཞིང་དུ་བོན་གྱི་འཁོར་ལོ་བསྐོར།།
རབ་མང་གྲུབ་མཐའི་ཁྲོད་ན་བོན་བསྟན་ཞེས།།
རབ་ཏུ་འབར་བའི་མཚན་སྙན་མངོན་མཐོ་ཞིང་།།
རབ་དཀར་གངས་རིའི་གཏོས་དང་མཉམ་པར་བྱས།།

བོན་བསྟན་གསེར་གྱི་ཉི་གཞོན་འཛུམ་པ་ལ།།
བླ་མ་ཁྱེད་ནི་འདྲེན་པའི་སྐྱ་རེངས་དངོས།།
བོན་འབངས་སྐྱིད་ལ་རོལ་བའི་དུས་དེ་རིང་།།
དཔོན་གསས་ཁྱེད་ཀྱི་སྐུ་དྲིན་ཡང་ཡང་དྲན།།

-----རྟོགས་གྲྭ་ཚེ་དབང་རྒྱལ་མཚན།

གཤེན་རབ་དམུ་ཐག་སྔོན་ཚེ་སྟོད་ནས་མཆེད།།
མཆེད་པའི་འཕྲིན་ལས་འགྲོ་བའི་དཔལ་གཅིག་པུ།།
དེ་ཚེ་ཡ་ཐོག་རྫོགས་ལྡན་བསྐལ་བའི་མཚམས།།
གསུང་རབ་ཐུགས་གསུམ་དད་པའི་རྟེན་དུ་བསྐོས།།

སྐྱབས་རྗེ་ཁྲི་ཆེན་མཚན་དཔེ་སྨད་ནས་བཞད།།
སྙན་པའི་གདུགས་དཀར་གླིང་བཞིར་ཁད་ཀྱིས་ཚེས།།
བསྟན་འགྲོའི་འཁུར་ཆེན་སུབ་མེད་གངས་ལ་དཔར།།
དཔོན་གསས་བླ་མའི་སྐུ་ཚེ་ཡུན་བརྟན་ཤོག།

-----རྟོགས་གྲྭ་ཚུལ་ཁྲིམས་བསྟན་འཛིན།

ལུང་རིག་དབྱར་རྔ་སྒྲོགས་པའི་འདུས་སྡེ་ན།།
རྟོགས་ཆེན་སྟོང་གིས་འགྲན་ཟླ་མི་ཆོད་པའི།།
བསྟ༷ན་པའི་པད་མོ་འདབ་སྟོང་གྲོལ་བའི་གཉེན།།
ཉི་མའི་མཚན་འཆང་གང་དེར་དད་ཕྱག་བརྩེགས།།

གང་སྐུ་མི་འགྱུར་གསེར་གྱི་ལྷུན་པོ་ལ།།
གང་གསུང་དཔག་བསམ་ལྗོན་གྱི་གདམས་ངག་འབུས།།
གང་ཐུགས་འཁྲུལ་བྲལ་ཤིང་འབྲས་གཡུར་དུ་སྨིན།།
གང་ཉིད་གཡོ་མེད་ཁྲི་རུ་བརྟན་བཞུགས་གསོལ།།

----སྤུ་བླ་ནམ་མཁའ་རྒྱལ་མཚན། 

སྤངས་རྟོགས་ཡོན་ཏན་ལྷུན་པོའི་གཏོས་དང་མཉམ།།
རྒྱུན་བཞིའི་འབྲས་བཟང་སྲིད་ན་གཡུར་ཟ་ཞིང་།།
ཟབ་རྒྱས་འཕྲིན་ལས་རྣམ་བཞིའི་འགྲོ་འདྲེན་པ།།
རྒྱལ་བ་སྨན་རི་སྐུ་ཚེ་ཁྲི་ལོར་ཤོག།

ཐུགས་ཀྱི་བཞེད་དགོངས་མུ་མེད་ནམ་མཁའི་ཁྱོན།།
གེགས་མེད་རང་བཞིན་ལྷུན་གྱིས་འགྲུབ་གྱུར་ཞིང་།།
སྐྱེ་དགུའི་གཏན་གྱི་སྐྱབས་གནས་དམ་པ་རུ།།
འགྱུར་མེད་དྲུང་མུའི་སྐུ་རུ་བརྟན་བཞུགས་གསོལ།།

-------ཛ་རོང་ཤེས་རབ་སྐལ་བཟང་། 

བཤེས་གཉེན་བརྒྱ་ཕྲག་བསྟན་འགྲོའི་རྒྱན་དུ་མཛེས།།
ཐོས་བསམ་འཆད་ཉན་ཕན་བདེའི་ཐབས་གཅིག་པུ།།
གོ་ལའི་ཁྱོན་དུ་སྙན་པར་གྲགས་མཛད་པའི།།
གྱེར་བསྟན་སྲོག་གི་ཀ་བ་སྨན་རི་བ།།

སྐྱེ་མེད་ངོ་བོ་སྟོང་ཆའི་ཀློང་དབྱིངས་ནས།།
འགག་མེད་མཚན་བཅས་བོན་གྱི་སྐུར་བསྟན་པའི།།
རིག་འཛིན་སེམས་དཔའི་ཚུལ་བཞེངས་དཔོན་གསས་རྗེ།།
བསྐལ་བརྒྱའི་བར་དུ་བསྟན་དོན་འཚོ་བར་ཞུ།།

-----རག་བཙུན་དྲུང་ཉི།  

དཀའ་གནད་རྫུབས་སུ་བརྡར་ཤའི་ཟེར་མ་བྲན།།
གཟུ་ལུམས་གདུལ་བྱར་རིག་པའི་ངོ་སོ་བསྟན།།
དྭངས་གསལ་སྒྲ་དབྱངས་གཉིད་ཀྱི་སྐྱེ་བོ་དཀྲོགས།།
རིགས་ལམ་འཕྲུལ་གྱི་ཟོར་ཁས་རྨོངས་གདོན་བསྐྲད།།

སྐུ་གཟུགས་འཁྲི་ཤིང་བཞའ་དང་དཔའ་ཆ་ཐང་།།
བློ་གྲོས་འོག་གཞི་མེ་ཏོག་འཇའ་ཚོན་བཀྲག།
ངག་དབང་སྨྲ་བ་འོད་ཀྱི་བྱེ་མར་འཐབ།།
འཕྲིན་ལས་ཆུ་གཏེར་ཆུ་ཡི་ཁ་འཛིན་ཤོག།

-----སྟོང་སྐོར་ལྕགས་འབུམ་རྒྱལ། 

མཁྱེན་གསུམ་རྩལ་རྫོགས་ཡེ་ཤེས་བོན་སྐུའི་ཀློང་༎
རྫོགས་སྐུའི་ཁྱབ་བདལ་རྒྱུ་བའི་བརྟུལ་ཞུགས་འཁུ༎
འོད་ཟེར་སྟོང་ཕྲག་སྤྲུལ་སྐུའི་འགྲོ་དོན་མཛད༎
སྐུ་གསུམ་ངོ་བོ་ཁྲི་འཛིན་ཁྱེད་ལ་གུས༎

རྣམ་འདྲེན་རྒྱལ་བའི་རྒྱལ་ཚབ་དངོས་བྱོན་པ༎
རྣམ་དག་སྡེ་སྣོད་གཞུང་ལུགས་ཕུགས་སུ་ཆུད༎
རྣམ་དཀར་བསྟན་པའི་བདག་ཉིད་འགྲོ་བའི་མགོན༎
རྣམ་གསས་བླ་མའི་སྐུ་ཚེ་བརྟན་བཞུགས་གསོལ༎

-----ཁྲོམ་མེ་ལྷ། 

རྒྱལ་ཀུན་མཁྱེན་བརྩེ་ནུས་སྟོབས་གཅིག་བསྡུས་པ།།
རྣམ་དག་ངུར་སྨྲིག་གར་གྱི་རྣམ་རོལ་པ།།
སྙིགས་དུས་བསྟན་འགྲོའི་རྒྱན་མཆོག་ཁྱེད་གཅིག་པུ།།
འདྲེན་མཛད་ལུང་རྟོགས་བསྟན་པའི་ཉི་མ་མཆོག།

མི་འཇིགས་གདོང་ལྔས་བཏེགས་པའི་གཡུང་དྲུང་ཁྲིར།།
ཞབས་པད་བརྟན་ཅིང་འགྲོ་ལ་བརྩེ་གཟིགས་ནས།།
མི་གཡོ་བསྟན་པའི་རྒྱལ་མཚན་འདེགས་པའི་ཕྱིར།།
བསྐལ་པའི་བར་དུ་བརྟན་པར་བཞུགས་གསོལ་འདེགས།།

-----ཉི་མ་རབ་འབྱམས། བྲག་དབེན་དགོན།

ཞྭ་དཀར་བསྟན་པའི་མངའ་བདག་སྨན་རི་བ།།
གངས་ལྗོངས་རྒྱལ་བསྟན་གསལ་བའི་སྒྲོན་མེ་མཆོག།
མདོ་སྔགས་རིག་པའི་བང་མཛོད་ཕྱོགས་མཐའ་ཁྱབ།།
ཁྲི་འཛིན་སོ་གསུམ་མཆོག་ལ་གུས་ཕྱག་འཚལ།།

ཐེག་རིམ་དགུ་དང་སྒོ་མཛོད་ཕྱི་ནང་གསུམ།།
བསླབ་པ་གསུམ་གྱི་ཉམས་ལེན་ངང་དུ་རྫོགས།།
བྱང་ཆུབ་སེམས་ཀྱིས་མངའ་བདག་འགྲོ་བའི་མགོན།།
སྐུ་ཚེ་བསྐལ་་བརྒྱའི་བར་དུ་བརྟན་བཞུགས་གསོལ།།

-----ཁམས་ཟླ་ཁྱུང་ཚེ་དབང་མཐར་ཕྱིན། 

རྒྱལ་ཀུན་ངོ་བོ་གཅིག་བསྡུས་བོན་གྱི་རྗེ།།
རྒྱལ་བ་གཉིས་པ་མཉམ་མེད་བླ་མའི་དོད།།
སྨན་རིའི་རིམ་བྱོན་ནོར་བུ་དོ་ཤལ་ལས།།
ལུང་རྟོགས་བསྟན་ཉི་གུས་པས་ལན་བརྒྱར་འདུད།།

ལུང་རིག་རྒྱ་མཚོ་མཁའ་དབྱིངས་རབ་འབྱམས་ལས།།
ཉམས་རྟོགས་རིལ་བུ་སྦྲང་ཆར་སིབ་སིབ་འབབས།།
བསྟ༷ན་པའི་པད་ཚལ་སྔར་བས་ཆེས་ཆེར་བརྟས།།
ཉི་མ་དྲོད་ཁོལ་ཡལ་མེད་བསྐལ་བརྒྱར་བརྟན།།

----སེ༔དྲུང་མུ་ཀྱིན་ཀླུང་། 

གཤེན་བསྟན་ཉི་གཞོན་དགུང་དུ་རབ་འདེགས་པའི།།
རྒྱལ་བ་སྨན་རིའི་རིང་ལུགས་འཁྲུལ་མེད་གང་།།
ས་གསུམ་རྒྱན་དུ་འདྲེན་པའི་མཁན་ཆེན་མཆོག།
བསྟན་འགྲོའི་དཔལ་དུ་བསྐལ་བརྒྱར་བརྟན་བཞུགས་གསོལ།།

ལུང་བོན་སྡེ་གསུམ་འོད་བརྒྱས་རྨོངས་མུན་ཆོམ།།
རྟོགས་པ་བསླབ་གསུམ་པདྨོ་ས་སྟེང་ཁྱབ།།
མདོ་སྔགས་རྫོགས་གསུམ་བསྟན་པའི་རྒྱལ་མཚན་སྒྲེང་།།
ངོ་བོ་སྐུ་གསུམ་ཉི་མ་རྟག་འཆར་ཤོག།

-----རེབ་གོང་བ་དོན་གྲུབ་རྒྱལ། 

བདག་གི་མགོན་གྱུར་སྐྱབས་རྗེ་སྨན་རི་བ།།
སྐུ་ཚེ་ཁྲི་ལོར་བརྟན་པའི་རེ་སྨོན་ཞིག།
མདོ་སྨད་བྱང་ཕྱོགས་བོན་བརྒྱ་ཁྱུང་དགོན་ནས།།
དད་པའི་ཕྱག་ཟུང་སྙིང་ཁར་སྦྱར་ཏེ་བཏབས།།

ཁྱེད་སྐུ་ཉི་མའི་འོད་བཞིན་རྒྱས་གྱུར་ཅིག།
ཁྱེད་གསུང་དབྱར་ཁའི་འབྲུག་ལྟར་གྲགས་པར་སྨོན།།
ཁྱེད་ཐུགས་ནམ་མཁའི་ཀློང་ལྟར་ཡངས་པ་ལས།།
ཉམ་ཐག་འགྲོ་བ་སེམས་ཅན་སྐྱོབས་པར་མཛོད།།

-----བོན་བརྒྱ་ཤེས་རབ་བསྟན་འཛིན། 

བསླབ་གསུམ་རྣམ་པར་དག་པའི་བླ་མ་དང་།།
འདུལ་ཁྲིམས་མིག་བཞིན་སྲུང་བའི་དམ་པ་ཉིད།།
བོན་བསྟན་འཛིན་སྐྱོང་སྤེལ་བའི་བདག་ཉིད་མཆོག།
ལུང་རྟོགས་བསྟན་པའི་ཉི་མ་རྟག་བརྟན་ཤོག།

སྐྱབས་སུ་མཆིའོ་བསྟན་པའི་ཉི་མ་ལགས།།
བསྟན་དང་འགྲོ་བའི་དོན་ལ་ཞིང་འདིར་བྱོན།།
མ་འོངས་ལོ་དང་ཟླ་བའི་དུས་ཚོད་ལ།།
ཡུན་དུ་བཞུགས་པའི་སྨོན་ལམ་སྙིང་ནས་འདེབས།།

----རྟོགས་ལྡན་གདོང་བསམ་འགྲུབ། 

མུན་པའི་ཁུག་ཟུར་དེ་ནས་ཤེད་ཀྱིས་བུས།།
ཧི་ལའི་རྫ་མགོ་ཡི་ན་ཞབས་རྗེས་བོར།།
སྐྲ་སེར་མིག་ལྗང་ས་ནས་ཕ་མཁར་བཞེངས།།
གཡུང་དྲུང་ཁ་ཡིག་ཅན་ལ་བཀའ་དྲིན་བསྩལ།།

ཇི་སྲིད་སྐྱེ་དགུ་གནས་པ་དེ་ལྟར་དུ།།
དཀྱིལ་འཁོར་འདོར་ལེན་མེད་པར་ལྷམ་མེར་ངང་།།
དཀར་ནག་སེར་གྱི་སྤྱི་བོ་ཏི་སེ་རུ།།
བཀྲ་ཤིས་དགའ་སྟོན་རྒྱས་པའི་གསོལ་བ་འདེབས།། 

-----ཡབ་གཞིས་ཤེས་རབ་མཐར་ཕྱིན། 

སྐྱེས་ནས་ཁྱེད་འོད་རེ་བ་ལས་གྱིས་གྲུབ།།
དྲོད་ཁོལ་ཡལ་དུ་མེད་པ་སྣང་བྱེད་སྐུ།།
ཐམས་ཅད་དྲོད་ཀྱིས་སྐྱོངས་བའི་སྨན་རི་བ།།
པདྨའི་མདངས་བཞིན་མཛེས་པའི་སྨོན་ཚིག་འབུལ།།

སྐྱེས་ནས་དངོས་འཇལ་མ་ཐོབ་ང་ཡི་ལས།།
བསྟན་པའི་ཁུར་ཆེན་འཁུར་བ་ཁྱེད་ཀྱི་ཐུགས།།
དམ་བཅའ་ལྷོད་དུ་མེད་པའི་སྨན་རི་བ།།
སྨོན་ལམ་རྒྱང་ནས་ཕྱག་གསུམ་ཁྱེད་ལ་འབུལ།།

-----རེབ་སྐྱིད་ཡར་འཕེལ། 

སྲིད་ཀྱི་མཛད་པས་སྙན་པ་མི་འཚོལ་ཞིང་།།
བོན་གྱི་འཁོར་ལོས་རིས་སུ་མི་བྱེད་པའི།།
གྱེར་གྱི་སྟོན་པ་ཆེན་པོ་སྨན་རི་བ།།
སྐལ་ལྡན་གདུལ་བྱའི་མགོན་དུ་ནམ་ཡང་འོས།།

གངས་སྐྱེས་གཤེན་གྱི་རིག་གཞུང་རླབས་པོ་ཆེ།།
ཁ་བའི་གཅེས་ནོར་མཁྱེན་པའི་ཐུགས་སྟོབས་ཅན།།
ཕ་ཆོས་ཕྱོགས་ཀུན་སྤེལ་མཛད་སྨན་རི་བའི།།
སྐུ་དྲིན་ས་ཡ་དྲུག་གིས་དྲན་ན་འོས།། 

-----བསམ་འགྲུབ་རྒྱ་མཚོ། ཡོ་རོབ།

རབ་འབྱམས་རྒྱལ་བ་མཐའ་ཀླས་འབྱུང་བའི་གཞི།།
རབ་འབྱམས་ཀ་དག་ཁྱབ་བདལ་རོལ་བའི་རྒྱན།།
རབ་འབྱམས་གདུལ་བྱའི་གཙུག་རྒྱན་སྨན་རི་བའི།།
རབ་འབྱམས་འཕྲིན་ལས་རྟག་ཏུ་རྒྱས་པར་ཤོག།

འགྱུར་མེད་སྐུ་ཡི་ལྷུན་པོ་རྨད་དུ་བྱུང་།།
འགག་མེད་གསུང་གི་བདུད་རྩི་ཀུན་ཏུ་སྙོམས།།
འཁྲུལ་མེད་ཐུགས་ཀྱི་མཁྱེན་བརྩེའི་ཟླ་བ་རྒྱས།།
གང་སྐུ་འགྱུར་མེད་བསྐལ་བརྒྱར་བརྟན་གྱུར་ཅིག།

ལེགས་ལྡན་རྒྱ་མཚོ། བོན་བརྒྱ་དགོན། 

ཉེར་གཅིག་ཞང་བོད་རིག་པའི་དཔའ་བོ་ཆེ།།
བདེན་སྟོབས་བསྟན་པའི་ཀ་ཆེན་འདེགས་མཁས་པའི།།
ངུར་སྨྲིག་ཅོད་པན་འཆིང་བའི་སེང་ཆེན་གང་།།
སྨན་རི་མཁན་པོ་སྲིད་ཞིའི་མཐར་ཡང་རྒྱལ།།

ལུང་རྟོགས་བསྟན་པའི་གསལ་བྱེད་འོད་པོ་ཆེ།།
འགྱུར་མེད་གཡུང་དྲུང་ཁྲི་ནས་ཡུན་བཞུགས་ཏེ།།
གངས་ལྗོངས་མེས་པོའི་ཟུངས་ཁྲག་བཅུད་འབར་བར།།
ཉི་མའི་འོད་བཞིན་གདུལ་བྱ་སྐྱོང་བར་ཤོག།

-----སྙན་བཟང་བྱམས་པ། 

རྒྱལ་བའི་ཐུགས་བཅུད་མདོ་སྔགས་རྫོགས་གསུམ་བོན།།
གང་སྐུའི་ཐུགས་ལ་རིན་ཆེན་མཛོད་དུ་བལྟམས།།
དེང་འདིར་གཤེན་བསྟན་སྲིད་པའི་རྩེ་མོ་ལ།།
མཐོན་པོར་བསྒྲེངས་བ་ཁྱོད་ཀྱི་ཁུར་དུ་ལྕི།།

མདོ་སྔགས་བཤད་སྒྲུབ་བསྟན་པའི་སྲོལ་ཆེན་པོར།།
འཆད་རྩོད་རྩོམ་པའི་རིག་པའི་སྒྲོ་འདོགས་བཅད།།
འཛམ་གླིང་ཕྱོགས་ཀུན་སྤེལ་བའི་སྣང་བྱེད་མགོན།།
རྒྱལ་བ་སྨན་རིའི་སྐུ་ཚེ་བརྟན་གྱུར་ཅིག།

-----སྙན་བཟང་པ་མཁར་བྱམས་ཐར།

དུས་རབས་ཕྱེད་ལྷག་བོད་ཀྱི་བསྟན་སྲིད་ཆེད།།
འཁུར་བབ་ཐུགས་འགན་རླབས་ཆེན་སྙིང་སྟོབས་ཀྱིས།།
སྐུ་ངལ་ཁྲི་སྟོང་ཁྱེད་ཉིད་ཁོ་ན་ཡིས།།
མཁས་མཛངས་འཁྲུལ་གྱིས་གཞོམས་ཚུལ་བརྗོད་ལས་འདས།།

དཔའ་བ་བཙན་པོའི་རྒྱུད་པའི་གཟི་མདངས་ལ།།
མཁས་པ་རིག་པའི་ཞིང་གི་རྣམ་དཔྱོད་ཀྱིས།།
གངས་ཅན་གཤེན་བསྟན་ནམ་མཁའ་གར་ཁྱབ་དུ།།
རིགས་པའི་ལམ་ནས་བརྡལ་མཁན་ཁྱོད་ལ་འདུད།།

-----ཤར་ཕྱོགས་ཁུག་རྟའམ་བློ་བཟང་ཆོས་འབྱོར།

ཁྲི་གདུགས་ཉི་མ་ཏི་སེའི་ཤར་ནས་འཛུམ།།
ཁྲི་ཕྲག་གདུལ་བྱ་འཕགས་པའི་ཞིང་ནས་བསྐྱངས།།
ཁྲི་ཐུབ་གཡུང་དྲུང་སྐུ་ཡི་བླ་མ་སྟེ།།
ཁྲི་འཛིན་སོ་གསུམ་སྐུ་ཚེ་ཁྲི་ལོར་ཤོག།

ལུང་གི་བོན་ལ་གཟི་འོད་བཀྲག་མདངས་འཕྲོ།།
རྟོགས་པའི་བསླབ་པར་ཟབ་མོ་ཆུ་གཏེར་ཀློང་།།
མདོ་སྔགས་བསྟན་པའི་འོད་སྣང་འགྲེམས་མཛད་པ།།
སྲིད་པའི་སྒྲོན་མེ་ཉི་མ་རྟག་འཆར་ཤོག།

-----སྙན་བཟང་ཤེས་རབ་དབང་རྒྱལ། 

རྒྱལ་བ་མཉམ་མེད་བསྟན་པ་སྙན་འདྲེན་སྤེལ།།
ཚུལ་ཁྲིམས་དྲི་བཟང་སྐྱེད་ཚལ་དབུས་ནས་ཐུལ།།
ལྟ་སྒོམ་སྤྱོད་གསུམ་ལྷད་མེད་ཉི་མའི་མདངས།།
བཀའ་དྲིན་སུམ་ལྡན་རྒྱལ་བ་སྨན་རི་བ།།

སྐུ་གང་མཚན་དཔེ་འཛམ་གླིང་ཐོག་ནས་ཞེས།།
བསྟན་འགྲོའི་འཕྲིན་ལས་འཕགས་པའི་ཡར་ངོས་མཛད།།
སུམ་ལྡན་བླ་མ་ཁྱེད་ཀྱི་མུན་པ་གསལ།།
གངས་རིའི་ཨ་ཇོ་རྒྱལ་བ་སྨན་རི་བ།།

------ལི་ཟླ་བ་གྲགས་པ། 

དབང་དང་ལུ༵ང་གི་འོད་ཟེར་ཕྱི་ནས་འཕྲོས།།
ཉམས་དང་རྟོག༵ས་པའི་བདེ་དྲོད་ནང་ནས་འབར།།
གཤེན་རབ་བསྟ༵ན་པ༵འི་མངའ་བདག་སྨན་རི་བ།།
གཙུག་གི་ཉི༵་མ༵་གཞོན་ནུ་ཁྱེད་མིན་སུ།།

ཁྱེད་ནི་སྲིད་པ་གསུམ་གྱི་མེས་པོ་ཡིན།།
ཁྱེད་ནི་བསྐལ་པ་དགུ་ཡི་མངའ་བདག་ཡིན།།
ཁྱེད་ནི་འབྱུང་བ་ལྔ་ཡི་སྙིང་ཕུར་ཡིན།།
ཁྱེད་ཀྱི་གསང་གསུམ་འགྱུར་མེད་རྟག་བརྟན་ཤོག།

----ཏི་སེའི་བུ། 

བླ་མ་བཟང་པོ་སྨན་རིའི་ཁྲི་འཛིན་མཆོག།
དུས་ཀྱི་བསྐལ་བ་ནམ་ཞིག་མ་སྟོང་བར།།
བོན་གྱི་བསྟན་པས་འགྲོ་དྲུག་ཡོངས་སྐྱོང་ནས།།
འཇིག་རྟེན་མི་ཡུལ་བོན་བསྟན་རྒྱས་པར་ཤོག།

རྗེ་བཙུན་བླ་མ་སྨན་རིའི་ཁྲི་འཛིན་མཆོག།
ཐུགས་ཀྱི་བྱམས་མདངས་དགུང་སྔོན་ཉི་མ་འདྲ།།
གསུང་གྱི་གདམས་ངག་མུན་པའི་སྒྲོན་མེ་ཡིན།།
དྲིན་ཆེན་བླ་མ་མཇལ་ཡུན་རིང་བ་ཤོག།

-----རྔ་བ་ཀུན་བཟང་། 

བོན་བསྟན་འཆད་རྩོད་རྩོམ་པའི་ཐོས་བསམ་མཁས།།
ཚུལ་བཞིན་ཉམས་སུ་ལེན་མཁན་མཆོག་གྱུར་བ།།
བྱམས་བརྩེ་ཀུན་ལ་ཁྱབ་པའི་བསྟན་འཛིན་ཁྱེད།།
འགྲོ་བ་ཡོངས་ཀྱི་སྐྱབས་གནས་ཁྱེད་གཅིག་པུ།།

རྨོངས་པར་འཐུབ་པའི་འཇིག་རྟེན་མྱི་བོ་རྣམས།།
མུན་པའི་གསལ་ཆ་འབྱེད་མཁན་སྟོན་པའི་སྒྲོན།།
ཤེས་བྱ་ལུང་རིགས་དོན་རྟོགས་ཀུན་མཁྱེན་རྗེ།།
བསྟན་པའི་ཉི་མ་ཁྱེད་ཉིད་གུས་པས་འདུད།།

----རིག་འཛིན་རྒྱ་མཚོ། ཞལ་བཞེས་དགོན། 

མཁྱེན་བརྩེ་སྟོབས་ལྡན་འགྲོ་འདུལ་སྨན་རི་བ།།
འཛམ་གླིང་མཛེས་བྱེད་རབ་འབྱམས་མཁྱེན་པའི་མཆོག།
མཁྱེན་རབ་ལུང་རྟོགས་མཉམ་པའི་ཐུགས་རྗེ་ཅན།།
ལམ་མཆོག་བསྟན་པའི་རིགས་བཟང་ཉི་མར་ཤར།།

རབ་འབྱམས་འགྲོ་བའི་མགོན་པོ་དབང་བསྒྱུར་མཆོག
སྙིགས་མའི་མགོན་དུ་སྐྱེས་བར་སྐུར་བཞེངས་དུས།།
སེམས་ཅན་མ་ལུས་འདྲེན་པའི་འགྲོ་བའི་མགོན།།
སྐུ་ཚེ་བསྐལ་བ་རྒྱ་མཚོར་བཞུགས་སུ་གསོལ།།

------ཉག་རོང་པ་བསྟན་འཛིན་རྒྱལ་པོ། 

བརྩེ་ཆེན་བྱམས་པའི་བདུད་རྩིའི་བོན་གྱི་ཆར།།
གཤེན་བསྟན་པདྨ་དཀར་པོའི་དགའ་ཚལ་དུ།།
འབེབས་མཁས་ལུང་རྟོགས་ཡོན་ཏན་ཀུན་རྫོགས་པའི།།
སྨྲ་དབང་བསྟན་པའི་ཉི་མའི་ཞབས་པད་བརྟན།།

སྲིད་ཞིའི་ཚ་གདུང་སེལ་བ་ནོར་གྱི་ཕུལ།།
གཤེན་བསྟན་གདུགས་དཀར་ཕན་བདེ་གྲིབ་བསིལ་ཅན།།
སྙིགས་མའི་དུས་སུ་མ་ཉམས་གླིང་བཞིའི་མཁར།།
སྒྲེང་མཁས་སྨན་རིའི་དབང་བོར་གསོལ་བ་འདེབས།།

----- རེབ་གོང་པ་གཟི་མིག  

སྐྱེ་མེད་ངོ་བོ་གདོད་དག་སྣང་བའི་སྐུ།།
མ་འགག་རྒྱུན་མེད་བདུད་རྩི་བཀྲ་བའི་གསུང་།།
ཟབ་ཡངས་མཁྱེན་གཏེར་ཆུ་འཛིན་དཀར་པོའི་ཐུགས།།
མ་ངེས་ལྔ་ལྡན་སྤྲུལ་བའི་བླ་མར་རྨད།།

ཞང་བོད་ལུང་རྟོགས་བསྟན་པའི་ཉིན་བྱེད་ཀྱིས།།
ཐོས་བསམ་རིག་པའི་དྲྭ་བ་འོད་འབྱེད་ཞིང་།།
དེང་འདིར་བཀའ་དྲིན་ཟབ་མོ་སླར་དྲན་ནས།།
མི་ཕྱེད་དད་པའི་ཐལ་མོ་སྙིང་ཁར་སྦྱར།།

-----འཆི་མེད་གཡུང་དྲུང་། བོན་བརྒྱ་དགོན།

གཤེན་བསྟན་ཕྱོགས་མཐར་སྤེལ་བའི་སྒྲོན་མེ་མཆོག།
དུག་ལྔའི་གཅོང་ནད་སེལ་བའི་སྨན་མཆོག་རྒྱལ།།
འགྲོ་དྲུག་མགོན་དུ་ཕེབས་པའི་སྐྱབས་གཅིག་པུ།།
ལུང་རྟོགས་བསྟན་པའི་ཉི་མར་གུ་དུན་ཧྲུན།།

ཁྱེད་སྐུ་ལྷུན་པོ་ཉ་གང་ཟླ་བ་བཞིན།།
མི་འགྱུར་གཡུང་དྲུང་ཁྲི་ལ་རྟག་བརྟན་ནས།།
བོན་འབངས་ཡོངས་ཀྱིས་རེ་འབྲས་སྐོང་བའི་ཕྱིར།།
འགྲོ་ཀུན་མ་རྫོགས་བར་དུ་བཞུགས་སུ་གསོལ།།

-----ཁམས་བཙུན་སངས་རྒྱས་བསྟན་འཛིན།

ལུང་རིགས་སྨྲ་བའི་མཁས་པའི་དབང་པོ་མཆོག།
སྡེ་སྣོད་ཀུན་ལ་རྟོགས་པ་མངའ་བརྙེས་ཤིང་།།
བསླབ་གསུམ་བསྟན་པའི་རྒྱུད་འཛིན་ཉི་མ་དེར།།
སྒོ་གསུམ་གུས་པས་འདུད་དོ་ལན་བརྒྱར་བསྟོད།།

སྐུ་ཡི་མཚན་བཟང་ཀུན་མཁྱེན་ཇི་ལྟ་བ།།
གསུང་གི་བོན་སྒྲ་སྟོང་གསུམ་ཡོངས་ཁྱབ་ཅིང་།།
ཐུགས་ཀྱི་སྒོམ་པ་ཏིང་འཛིན་དབང་འབྱོར་བའི།།
གྲུབ་པའི་ཁྱུ་མཆོག་རྟག་ཏུ་རྒྱལ་གྱུར་ཅིག།

-----མཐའ་རུ་ཕྱིན་པ། ཤར་རྫ་རི་ཁྲོད།

 གྲུབ་མཐའི་རྒྱལ་པོ་ལུང་རྟོགས་གཡུང་དྲུང་བོན༎
འཛིན་སྐྱོང་སྤེལ་ལ་འགྲན་པའི་ཟླ་བྲལ་བ༎
སངས་རྒྱས་སྟོང་གི་གདུང་སོབ་ཁྲི་འཛིན་རྗེ༎
བསྟན་པའི་ཉི་མའི་ཞབས་ལ་གསོལ་བ་འདེབས༎

རྒྱལ་གཤེན་བསྟན་པའི་དབུ་འཕང་དར་བ་དང་༎
བདག་སོགས་ཡིད་ཅན་སྐྱབས་མགོན་དཔུང་གཉེན་དུ༎
ཇི་སྲིད་ཉི་ཟླའི་བགྲོད་པ་མ་འགག་པར༎
དེ་སྲིད་ཞབས་པད་ཞིང་འདིར་རྟག་བརྟན་ཤོག།

----ཚ་རོང་བ་ཁྲོ་བླ་རྣམ་རྒྱལ། 

གཡུང་དྲུང་བོན་གྱི་དབུ་ཁྲིད་སྨན་རི་བ།།
རྒྱལ་གཤེན་བསྟན་པའི་མེ་རོ་གསོ་བའི་རྗེ།།
རང་ཅག་བོན་འབངས་ཡོངས་ལ་བཀའ་དྲིན་ཅན།།
ཁྱེད་ལས་ལྷག་པ་སྲིད་པའི་ཁྱོན་འདིར་དཀོན།།

གྱེར་འབངས་ཀུན་གྱི་གཙུག་གི་མགོན་པོ་སྟེ།།
མཉམ་མེད་བླ་མའི་རིང་ལུགས་རྗེས་འཛིན་པ།།
སྐྱབས་རྗེ་སྨན་རིའི་ཁྲི་འཛིན་སོ་གསུམ་མཆོག།
སྐུ་ཚེ་མི་འགྱུར་བསྐལ་བརྒྱའི་བར་དུ་བཞུགས།།

----རླུང་བུ་ནས། 

གངས་ཀྱི་རྡུལ་མང་པད་དཀར་འཛུམ་ལ་བབས།།
པད་མའི་འདབ་སྟོང་ཁྱེད་སྐུའི་དཔལ་ལ་གྲོལ།།
རྟེན་འབྱུང་གིས་བསྐྱེད་དབུ་མའི་ཁྱེའུ་དང་།།
ལྷུན་འགྲུབ་རོལ་རྩལ་ལས་ཐོན་མི་བོ་ཟུང་།།

གངས་རིའི་ཕྱི་ནས་སྲུང་བའི་ལྕགས་རི་དང་།།
བོད་མིའི་སེམས་ལ་འབར་བའི་དད་སྟོབས་ཡིན།།
དེ་རིང་ཉི་མའི་འོད་སྣང་མཆོད་མེ་དང་།།
ཟླ་བའི་བསིལ་བ་ཡོན་ཆབ་བཀོལ་ཏེ་འབུལ།།

-----སྦྲུལ་ཞགས། 

སྐུ་ཡི་སྲས་པོ་མི་ཡི་ཚུལ་དུ་བྱོན།།
སྐུ་གསུང་ཐུགས་ཀྱི་ཡོན་ཏན་མཛོད་འཛིན་པ།།
གཡུང་དྲུང་བོན་གྱི་བདག་ཉིད་རིན་པོ་ཆེ།།
ཁྱེད་སྐུའི་མཛད་པ་འཕྲིན་ལས་འོད་ཀྱིས་འཚེར།།

གདོད་མའི་ཆོས་ཀྱི་སྲོག་གི་གཙུག་འཛིན་པ།།
བདུད་དཔུང་མ་ལུས་འཇོམས་མཛད་གསུང་གི་དཔལ།།
ཁམས་གསུམ་འཁོར་བའི་གྲོང་ལ་བྱིན་གྱིས་བརླབས།།
སྐུ་ཚེ་མི་འགྱུར་གཡུང་དྲུང་རབ་བརྟན་ཤོག།

------མ་སྐྱེས་མེ་ཏོག 

དབུ་ལ་ཞྭ་དཀར་ཅོད་པཎ་མཛེས་པར་གསོལ།།
སྐུ་ལ་གོས་སྔོན་ན་བཟའི་རྣམ་པ་བཀླུབས།།
གསུང་ལ་བོན་གྱི་སྒྲ་དབྱངས་ལྷང་ངེ་ལྷང་།།
ཐུགས་ལ་བརྩེ་ཆེན་སྙིང་རྗེའི་འགྲོ་དོན་པ།།

ཕྱི་ན་འདུལ་ཁྲིམས་གཙང་མའི་རྣམ་པ་མཛེས།།
ནང་ན་བྱང་སེམས་བསླབས་པའི་གཤིས་རྒྱུད་གཙང་།།
གསང་བ་ཉམས་དང་རྟོགས་པའི་འཕེལ་ཁ་ཅན།།
འཛམ་གླིང་མཛེས་པའི་གཙུག་རྒྱན་སྨན་རི་བ།།

-----དབྲ་དཀར་གཞན་ཕན་ཤེས་རབ། 

རྟོག་པའི་དྲ་བ་སེལ་ལ་བློ་མངའ་བ།།
བློ་སྦྱོང་ཆོས་ཀྱིས་རང་སེམས་རབ་དུལ་བ།།
གཞན་དོན་འཁུར་དུ་སྤྲོ་བའི་དཀྱེལ་ཡངས་ཀྱེ།།
ཁྲི་འཛིན་ཁྱེད་ཉིད་བསྟན་པའི་གཙིག་གི་རྒྱན།།

འགྲོ་བའི་སྡུག་བསྔལ་སེལ་ལ་མི་ངལ་ཞིང་།།
བདེ་སྐྱིད་ཉི་གསར་འདྲེན་ལ་མཐུ་ལྡན་པ།།
སྐྱེས་ཆེན་ཁྱོད་སྐུ་རི་བརྗིད་ལྷུན་པོ་གང་།།
སྐུ་ཚེ་བསྐལ་བརྒྱར་བཞུགས་ལ་གསོལ་བ་འདེབས།།

-----འདྲེ་རྐང་འཇིབ། ཧྥ་རིན་སི། 

ཕུན་ཚོགས་ལུང་རྟོགས་གསེར་གྱི་རང་མདང་གསལ།།
རྒྱལ་གཤེན་བསྟན་པའི་སྲོག་ཤིང་སྨན་རི་བ།།
མཁྱེན་བརྩེ་ཉི་མ་འབུམ་གྱི་ལང་ཚོ་ཅན།།
དཔོན་གསས་བླ་མའི་སྐུ་གསུང་ཐུགས་ལ་འདུད།།

ལྷར་བཅས་འགྲོ་བའི་དཔུང་གཉེན་དམ་པ་རུ།།
རྒྱལ་འཕགས་གོང་མའི་རྣམ་ཐར་ལྷུར་བཞེས་ཏེ།།
ཞབས་པད་མི་འགྱུར་གཡུང་དྲུང་ཁམས་སུ་བརྟན།།
མཛད་འཕྲིན་སྣང་བས་འགྲོ་ལ་ཁྱབ་པར་ཤོག།

----རྩེ་གཞུང་གཡུང་དྲུང་། 

མཁྱེན་པའི་ངོ་བོ་གནམ་མཁའི་དབྱིངས་ལྟར་རྒྱས།།
ཐུགས་རྗེའི་འོད་ཟེར་འབུམ་གྱིས་མུན་པ་གཞིལ།།
རླབས་ཆེན་མཛད་རྗེས་ས་སྟེང་རྒྱས་མཛད་པའི།།
དཔལ་ལྡན་བླ་མའི་སྐུ་ཚེ་བརྟན་པར་སྨོན།།

སྙིགས་དུས་རྒྱུས་མེད་ས་མཐའི་ཡུལ་ཞིག་ན།།
གཤེན་རབ་བསྟན་པའི་གདན་ས་བཞེངས་མཛད་ནས།།
ས་སྟེང་གདུལ་བྱ་གྲངས་ཡས་སྐྱོང་མཛད་པའི།།
དཔལ་ལྡན་བླ་མའི་སྐུ་ཚེ་བརྟན་པར་སྨོན།།

-----ཁྲི་བཙུན་ཐར་སྐྱིད། 

མཆོག་གསུམ་ཡོན་ཏན་མ་ལུས་གཅིག་ཏུ་བསྡུས།།
བསླབ་གསུམ་ཚུལ་ཁྲིམས་འཁོར་བའི་སྐྱོན་དང་བྲལ།།
རྩ་གསུམ་བདག་ཉིད་འདྲེན་པ་མཚུངས་མེད་ཁྱེད།།
ཁམས་གསུམ་སྐྱེ་དགུའི་སྤྱི་བོར་རྟག་ཏུ་བཞུགས།།

གང་སྐུ་གསེར་ཞལ་ཆུ་སྐྱེས་འདབ་མ་དགོད།།
གཞན་ཕན་ཐུགས་བརྩེ་ཉི་ཟླའི་འོད་མདངས་བཀྲ།།
རྒྱལ་བ་གཉིས་པའི་ཞལ་ཚབ་སྨན་རི་བ།།
བསྐལ་བརྒྱར་གདོང་ལྔའི་ཁྲི་ལ་བརྟན་བཞུགས་མཛོད།།

-----དུང་དཀར་བསམ་གཏན། 

ཀུན་མཁྱེན་དགོངས་དངོས་གཅིག་འཆང་རྗེན་ཉིད་སྟོན།།
མཐའ་དག་རྣམ་དཔྱོད་འཕྲུལ་བློ་སྨྲ་རྩོམ་མཚར།།
མཚར་རྫོགས་ཝ་ལེར་གཞི་དབྱིངས་ཟེར་འོད་ཡོངས།།
རང་ལས་རང་ཤར་གསང་གསུམ་ལྷུན་གྲུབ་ཨ།།

ལུང་རྟོགས་མཛོད་ཆེན་མངའ་བདག་འགྲོ་བའི་མགོན།།
བསྟ༷ན་པའི་སྲོག་ཤིང་འདེགས་པའི་སེམས་དཔའ་ཆེ།།
ཉི་མའི་སྣང་བར་བསྒྲུན་པའི་སྨན་རི་བ།།
བསྐལ་བརྒྱའི་བར་དུ་སྐུ་ཚེ་བརྟན་གྱུར་ཅིག།

----ཁྱུང་དཀར་ཟླ་བ། 

འཆད་རྩོད་རྩོམ་ལ་མངའ་བརྙེས་མཁས་པའི་དཔལ།།
སྒོ་གསུམ་ཉེས་སྤྱོད་སྡོམ་པའི་བཙུན་པ་མཆོག།
གཞན་ཕན་ལྷག་བསམ་གཙང་བའི་བཟང་བོ་ཆེ།།
མཁས་བཙུན་བཟང་བོའི་དཔལ་ལ་གུས་པས་འདུད།།

སྨན་གྱི་རི་ན་ཟླ་མེད་སྟོན་པ་མཆོག།
རྨད་བྱུང་མཁྱེན་དང་བརྩེ་བའི་བདག་ཉིད་ཅན།།
ལུང་རྟོགས་བསྟན་པའི་ཉི་མ་འོད་པོ་ཆེ།།
བོན་འབངས་བྱེ་བའི་ཏོག་ཏུ་རྟག་འཆར་ཤོག། 

------ཕུན་ཚོགས་སྙན་གྲགས།

ཁྱེད་སྐུའི་མཁྱེན་དང་བརྩེ་བའི་མཁའ་དབྱིངས་ལས།།
གཞན་ཕན་ཐུགས་བསྐྱེད་རྟ་བདུན་དབང་པོ་ཡིས།།
གཤེན་བསྟན་གདུལ་བྱ་བསྐྱངས་པའི་ཚ་ཟེར་གྱི།།
བཀའ་དྲིན་ཟབ་མོ་སྙིང་ནས་ཡང་ཡང་དྲན།།

སྲིད་གསུམ་འགྲོ་བའི་དེད་དཔོན་སྨན་རི་བ།།
སྙིགས་མའི་དུས་ཀྱི་ཉམ་ཐག་སེམས་ཅན་རྣམས།།
ཐར་བ་བདེ་ཆེན་ས་ལ་དགོད་ཕྱིར་ཏུ།།
ཞབས་ཟུང་འཁོར་ལོ་རྟག་བརྟན་བཞུགས་རོགས་མཛོད།།

----- དུང་དཀར་ནམ་མཁའ། 

ཨ་ཐུན་བདེ་ཆེན་ཟབ་མོའི་ཐུགས་རྗེ་དེ།།
ཨ་དཀར་བསྟན་པའི་དོན་དུ་རང་བྱོན་ནས།།
ཨ་ཧཱ་གསེར་གྱི་གདམས་པ་སྙན་པའི་ཆར།།
ཨ་བུ་བདག་གིས་བཀའ་དྲིན་རྗེས་སུ་དྲན།།

ཨེ་མ་སྐལ་བཟང་དུས་ཀྱི་ཉིན་མོ་འདིར།།
སྟོང་གསུམ་མཎྜལ་ཟབ་མོའི་ཐུགས་བསྒོམ་ནས།།
ཅི་མཛད་བསྐལ་བར་བརྟན་པའི་དད་རྟེན་དུ།།
ཨ་ཅག་བོན་འབངས་ཡོངས་ནས་རེ་སྨོན་ཞུ།།

-----ཁྲི་ཀ་རིན་ཆེན་བློ་གྲོས། 

འཇིག་རྟེན་རྡུལ་གྱི་ཞིང་ལ་ཚད་འཇལ་ནས།།
ཚོགས་ཞིང་གངས་གཱའི་བྱེ་མར་གྲངས་བཅད་ནས།།
ཞིང་ཁམས་གཞན་ལ་ཕྱོགས་པའི་སྤྱན་ཟུམ་ནས།།
གཟིགས་ཚད་ཏི་སེའི་གངས་ལ་དམིགས་བཟུང་ནས།།
མཚན་དཔེ་ལྗོངས་འདིར་བཞད་པ་ཐུགས་རྗེ་ཆེ།།

གཤེན་བསྟན་རྒས་པའི་ཉི་མ་ནུབ་བཞུད་ཚེ།།
སྨན་གྱི་རི་ནས་གསེར་གྱི་ཞགས་པས་བཟུང་།།
ཉི་ཟླ་ཕྲུགས་གཅིག་བཟུང་བའི་ལྕགས་ཕུར་དེ།།
སླར་ཡང་བོད་ཡུལ་གོང་ཁར་ཚུགས་དང་ལྷན།།
རྒས་ཉམས་གསོས་པས་རྒྱལ་བ་བཀའ་དྲིན་ཆེ།།

-----སྐྱིད་སྲས་དགེ་ལེགས་ཉི་མ།

གཡུང་དྲུང་ལྷ་ཡི་དམུ་ཐག་རིང་མོ་ཞིག།
འཛམ་གླིང་གོ་ལའི་སྟེང་དུ་རྐྱོང་མཁས་པ།།
སྲིད་ན་དཀོན་པའི་དྲང་སྲོང་ཨུ་དུམ་ཝར།།
ཞྭ་དཀར་བསྟན་པའི་གཙུག་རྒྱན་སྨན་རི་བ།།

མདོ་སྨད་ཤར་དུ་སྐུ་ཡི་མཚན་དཔེ་བཞད།།

ནུབ་ཀྱི་འཕགས་ཡུལ་མཛད་འཕྲིན་གོ་ལར་ཁྱབ།།

བཀའ་དྲིན་དྲན་ཕྱིར་གཏང་རག་མནྜལ་གྱི།།

མཆོད་པའི་དགའ་སྟོན་ཨེ་མ་མུ་ཙུག་སྨར།།

------ཁྲི་བདེ་མཆོག

     ཞེས་སངས་རྒྱས་ཀྱི་བསྟན་པ་སྤྱི་དང་ཡང་སྒོས་རང་ཅག་བོན་འབངས་ཡོངས་ལ་བཀའ་དྲིན་རབ་ཏུ་ཆེ་བའི་མཉམ་མེད་རྒྱལ་བའི་གདུང་སོབ་ཆེན་པོ་འཛམ་གླིང་བོན་གྱི་གཙུག་རྒྱན་དཔོན་གསས་རྩ་བའི་བླ་མ་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་གིས་སྐུ་ཚེ་ཧྲིལ་བོར་བསྟན་འགྲོ་སྤྱིའི་ལས་དོན་ལ་དམིགས་ནས་མཛད་འཕྲིན་བླ་མེད་གནང་སྟེ་དགུང་གྲངས་དགུ་བཅུར་ཉེ་བའི་སྐབས་དང་བསྟུན། ཁོང་གི་བཀའ་དྲིན་རྗེས་དྲན་དང་སྐུ་ཚེ་ཡུན་རིང་དུ་འཚོ་ཞིང་གཞེས་པའི་ཕྱིར་བོད་གཞིས་བྱེས་གཉིས་ཀྱི་བོན་འབངས་ཡོངས་ནས་རྣམ་དཀར་བསོད་ནམས་ཀྱི་འཚོགས་བསགས་རླབས་ཆེན་ཞུས་ཤིང་། ད་ལན་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་ཚོགས་སྡེ་ཁག་གིས་བཀའ་དྲིན་གཏང་རག་གི་མནྜལ་བརྟན་བཞུགས་ཀྱི་མཆོད་སྤྲིན་རྒྱ་ཆེན་པོ་ཕུལ་བའི་མཛད་སྒོའི་སྐལ་བཟང་གི་ཉིན་མོ་འདི་ལ། འཛམ་གླིང་ཡུལ་གྲུ་གང་སར་གནས་པའི་བོད་ཀྱི་སྙན་ངག་པ་བརྒྱ་དང་སོ་གསུམ་གྱིས་རིན་པོ་ཆེ་སྐུ་ཚེ་ཡུན་རིང་དུ་བརྟན་པའི་སྨོན་འདུན་ནམ་ཤིས་ཚིག་«རྟག་བརྟན་གཡུང་དྲུང་གི་རང་སྒྲ»ཞེས་ཁ་བྱང་གཞིར་བཞག་ནས་དུས་གཅིག་ལ་མཉམ་འབྲི་གནང་བའི་བཅད་རྩོམ་འདི་ནི། གཅིག་ནས་རྗེ་བླ་མ་མཆོག་རྒྱལ་བ་མཉམ་མེད་ཆེན་པོའི་ཁྲི་འཛིན་སོ་གསུམ་པར་གྱུར་ཡོད་ཕྱིར་གངས་རིའི་ཕྱི་ནང་གི་སྙན་ངག་པ་བརྒྱ་དང་སོ་གསུམ་གྱི་སྙན་ཚིག་ཤོ་ལོ་ཀ་ཟུང་རེ་ཕུལ་ཡོད་ལ། སྙན་ཚིག་འདི་དག་ཀྱང་རྗེ་བླ་མ་མཆོག་དགུང་གྲངས་དགུ་བཅུར་ཉེ་བའི་རྟེན་འབྲེལ་ལ་དམིགས་ནས་ཚེག་བར་དགུ་ཅན་འབའ་ཞིག་གསར་རྩོམ་གནང་པ་སོར་བཞག་བཞིན་བསྒྲིགས་ཡོད་ལ་དུས་ཡུན་ཐུང་བའི་ནང་ཕྱག་རྩོམ་གནང་པས་རྩོམ་ཁ་ཤས་ཤིག་ལ་གཏགས་ནོར་ཤོར་ཡོད་པ་རྣམས་བཅོས་ཡོད། གཞན་ཡང་དམིགས་བསལ་ཞུ་རྒྱུ་ཞིག་ལ་རྩོམ་པ་པོ་དག་གི་མིང་བྱང་མཐོ་དམན་ལ་སོགས་ཀྱིས་སྒྲིག་སྟངས་ཀྱི་གོང་འོག་ནོར་བ་དང་ད་དུང་སྐྱོན་ཆ་དང་ཞན་ཆ་ཡོད་ངེས་པས་ཁྱེད་རྣམས་ལ་ངེད་རྩོམ་སྒྲིག་པ་ཁྲི་བདེ་མཆོག་དང་ཁྲི་ཀ་བ་སྐལ་བཟང་ཉི་མ་གཉིས་ནས་བཟོད་གསོལ་ཞུ་བ་དང་ཆབས་ཅིག་ཐུགས་རྗེ་ཆེ་དང་བཀྲ་ཤིས་བདེ་ལེགས་ཞུའོ་ཞེས་ཕྱི་ལོ་༢༠༡༦ཟླ་༡༡ཚེས༡ཉིན་ལ་གདན་ས་སྨན་རིའི་གླིང་ནས།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།