ཞུ་བཀྲ་ཤིས་བྱམས་མའི་ཉམས་མགུར།

ཞུ་བཀྲ་ཤིས་བྱམས་མའི་ཉམས་མགུར་ཞེས་བྱ་བ་བཞུགས་སོ།།

     ཨེ་མ་ཧོ། སྐྱབས་བླ་མ་ཡི་དམ་མཁའ་འགྲོ་གསུམ།། མི་འབྲལ་སྤྱི་བོའི་གཙུག་ཏུ་བཞུགས།། འབྲལ་མེད་ཐུགས་རྗེས་རྒྱུན་དུ་བཟུང་།། ང་ཡི་དྲིན་ཅན་རྩ་བའི་བླ་མ་ནི།། ཞུ་སྟོན་རྒྱལ་མཚན་ཉི་མ་ཡིན།། མི་འབྲལ་རྟག་ཏུ་གསོལ་བ་འདེབས།། འབྲལ་མེད་ཐུགས་རྗེས་རྒྱུན་དུ་བཟུང་།། དས་རང་ངོ་རང་གིས་མ་ཤེས་དུས།། ཕ་བླ་མ་མེད་པའི་གོང་རོལ་དུ།། སངས་རྒྱས་བྱ་བའི་མིང་མ་གྲུབ།། དེ་ཕྱིར་བླ་མ་གཙོར་ཆེའོ།། ཚུར་གསོན་དང་འགྲོ་བ་སེམས་ཅན་རྣམས།། ང་རང་བཀྲ་ཤིས་བྱམས་མ་ཡིན།། ཕ་ཚན་གྱི་ཁེ་གྲགས་དེ་དང་གཅིག། མི་དམངས་ཀྱི་འཚོགས་དཔོན་དེ་དང་གཉིས།། གཉན་འདུས་ཀྱི་གཤོལ་འདེབས་དེ་དང་གསུམ།། འབང་གི་ག་དལ་དེ་དང་བཞི།། རྗེ་ཡི་ཆེ་ཆུས་དེ་དང་ལྔ།། རུས་ཀྱི་ཤགས་འདེབས་དེ་དང་དྲུག། དེ་རྣམས་མཉམ་པ་ཉིད་དུ་བཞག། དས་རོ་གཅིག་ངང་དུ་བསྡད་པ་ལ།། ཕོ་མ་ཚར་ཟེར་བའི་མིང་གཅིག་ཐོགས།། དས་སེར་སྣ་ཅན་གྱི་སྦྱིན་པ་དེ།། གཡོག་ཁུངས་ཚུད་པའི་གཡོག་པོ་འདྲ།། ང་རྒྱལ་ཅན་གྱི་སྙན་གྲགས་དེ།། གཅན་གཟན་གྲ་ལོ་རྒྱས་པ་འདྲ།། ཕ་ཞིང་ཡུལ་མཁར་གྱི་བདག་པོ་དེ།། བྱིས་པས་འཇའ་ཚོན་དེད་པ་འདྲ།། རྩ་བའི་བླ་མའི་ཐུགས་དཀྲུག་དང་།། དྲིན་ཅན་ཕ་མའི་སེམས་འགལ་གཉིས།། དེ་གཉིས་སྡིག་པ་དོ་མཉམ་ཡིན།། ངན་སྔགས་མཁན་གྱི་སྔགས་པ་དང་།། སྐྱེ་བརྒྱ་གཅོད་པའི་བཤན་པ་གཉིས།། དེ་གཉིས་སྡིག་པ་དོ་མཉམ་ཡིན།། དེ་མཚམས་ལེའུ་དང་པོའོ།།
     དས་འབྲུག་དང་གློག་དང་སྤྲིན་དང་གསུམ།། བྱུང་ཡང་ནམ་མཁའི་ངང་ལས་བྱུང་།། ཐིམ་ཡང་ནམ་མཁའི་ངང་ལ་ཐིམ།། གནས་པ་འགྱུ་བ་རིག་པ་གསུམ།། བྱུང་ཡང་ཀུན་གཞིའི་ཀློང་ནས་བྱུང་།། ཐིམ་ཡང་ཀུན་གཞིའི་ཀློང་ན་ཐིམ།། རང་རིག་རང་རྩལ་རང་གྲོལ་གསུམ།། བྱུང་ཡང་རིག་པ་རང་ལས་བྱུང་།། ཐིམ་ཡང་རིག་པ་རང་ལ་ཐིམ།། དས་སྔོན་བསུ་རྗེས་སྤྱོད་མེད་པ་དེ།། སྔ་བསམ་ཕྱི་བློ་བྲལ་བ་ཡིན།། རྐྱེན་གྱི་ཚོར་བ་རྣམ་དྲུག་དེ།། མིག་གིས་གཟུགས་རྣམས་མཐོང་བ་དེ།། ཀུན་གཞིའི་རྩལ་ལས་བྱུང་བ་ཡིན།། རྣ་བས་སྒྲ་རྣམས་གོ་བ་དེ།། ཀུན་གཞིའི་རྩལ་ལས་བྱུང་བ་ཡིན།། སྣ་ཡིས་དྲི་རྣམས་ཚོར་བ་དེ།། ཀུན་གཞིའི་རྩལ་ལས་བྱུང་བ་ཡིན། ལྕེ་ཡིས་རོ་རྣམས་མྱོང་བ་དེ། ཀུན་གཞིའི་རྩལ་ལས་བྱུང་བ་ཡིན།། ལུས་ཀྱི་རེག་བྱ་འཇམ་རྩུབ་དེ།། ཀུན་གཞིའི་རྩལ་ལས་བྱུང་བ་ཡིན།། ཡིད་ཀྱི་དྲན་རྟོག་གང་ཤར་དེ།། ཕྱི་སྣོད་ནང་བཅུད་འདུས་བྱས་དང་།། ཡུལ་དང་སྣང་ས་བོན་དང་གསུམ།། ཀུན་གཞིའི་རྩལ་ལས་བྱུང་བ་ཡིན།། རྩལ་ཞེས་བྱ་བ་གསལ་བ་ཡིན།། གསལ་བའི་ངོ་བོ་སྟོང་པ་ཡིན།། དེ་བཞིན་མཚན་མ་ཀུན་ཀྱང་སྟོང་།། གསལ་སྟོང་དབྱེར་མེད་དོན་རྟོགས་ན།། ཐམས་ཅད་ཀུན་གཞིའི་ཀློང་རྫོགས་ཤིང་།། གཉིས་འཛིན་མཐའ་དང་བྲལ་བས་ན།། བོན་སྐུ་སྤྲོས་དང་བྲལ་བའོ།། སངས་རྒྱས་ལག་ཏུ་འོང་བའོ།། དེ་མཚམས་ལེའུ་གཉིས་པའོ།།
     དས་འདྲེན་སྟོན་མཛད་པའི་བླ་མ་སོགས།། ཕྱི་འདུལ་བའི་སྡོམ་པ་སྲུང་མི་རྣམས།། སེམས་ངོ་བོ་མ་རྟོགས་ང་བོ་འཆང་།། རང་ཆེ་ས་དང་རུས་རིགས་ཀྱི་རུ་ཏྲ་འཛིན།། གཤིན་རྒྱུ་ཆས་མང་པོ་གྲམ་ལྟར་བཀྲམ།། གསུང་སྙན་མོའི་གླུ་དབྱངས་ཚངས་སེ་ཚང་།། གསོན་འདི་གཏད་ཀྱི་དོ་མ་གང་གྲགས་ཟ།། གཤིན་ཚེ་འདས་ཀྱི་རྣམ་ཤེས་བར་དོར་འཁྱམས།། སེམས་འཆར་མེད་ཀྱི་ཚུལ་ཁྲིམས་མ་སྲུང་ན།། མཚོ་སྔོན་མོ་ནང་གི་ངང་པ་དེ་དང་མཚུངས།། ནང་གསང་བ་སྔགས་ཀྱི་བླ་མ་རྣམས།། གཞི་སྙིང་རྗེ་ཆེན་པོ་མི་དྲན་ཞིང་།། སེམས་ཞེ་ངམ་གྱི་བསྒྲལ་སྲེག་འཕང་གསུམ་བྱེད།། ཡིད་མ་དག་པ་འཐུར་བུའི་སྲོག་ལ་འབགས།། སྤྱིར་མ་གྱུར་ཕ་མ་ཡིན་པ་ལ།། རང་བུ་རྒྱུད་བསད་དང་ཁྱད་ཅི་ཡོད།། ནང་གསང་སེམས་ཟུང་དུ་མ་འབྲེལ་ཞིང་།། གསང་སྔགས་པ་གསང་སེམས་མེད་པ་དེ།། མི་གསོད་ཀྱི་བཤན་པ་དེ་དང་མཚུངས།། གསང་གྲོལ་ལམ་གྱི་རང་འདྲའི་གྲུབ་ཐོབ་སོགས།། སེམས་ཡེ་ནས་དགག་སྒྲུབ་མེད་པ་ལ།། རྟག་པ་དང་ཆད་པའི་མཐར་མ་ལྷུང་།། མུ་བཞི་དང་མཐའ་བརྒྱད་མ་བྲལ་ན།། སེམས་གང་ཤར་གྱི་བྱ་སྤྱོད་ཅི་བྱས་ཀྱང་།། དོན་ཀུན་བཟང་དང་འབྲལ་མེད་ག་ལ་ཡོད།། མཐའ་མ་ཆོད་ན་དེ་དོན་ག་ལ་རྟོགས།། དོན་རོ་གཅིག་ངང་ལ་མ་ཞོག་ཅིང་།། གསང་གྲུབ་ཐོབ་ཡིན་ཟེར་རིག་པ་མ་ཟིན་ན།། གཞན་མགོ་སྐོར་གྱི་ལོག་བསླུ་མཁན་དང་འདྲ།། དེ་མཚམས་ལེའུ་གསུམ་པའོ།།
     དས་ཡང་དག་དོན་དེ་མ་རྟོགས་ན།། ཞེ་སྡང་ཅན་དེ་དགྲ་ལ་ཆགས།། འདོད་ཆགས་ཅན་དེ་རྒྱུ་ལ་ཆགས།། བརྩེ་དུང་ཅན་དེ་གྲོགས་ལ་ཆགས།། བག་ཆགས་ཀུན་གཞི་ཟད་པ་ན།། མཚན་མའི་ཕོ་རྟགས་ལང་མི་སྲིད།། ཡང་ད་རེས་ལན་གཅིག་འཆི་བའི་དུས་བྱུང་ཚེ།། དཔའ་བོས་རལ་ཁ་སྐྱེ་ས་མེད།། འཛངས་མའི་ནོར་གྱིས་བསླུ་ས་མེད།། མཛེས་མས་ཆུ་ཁྲུས་བྱེད་ས་མེད།། མཁས་པས་ལྕེ་བདེ་བཤད་ས་མེད།། དས་ཤི་བའི་དུས་ལ་བབ་པའི་ཚེ།། མགྲོན་ཕྱི་མའི་བར་མ་སྡུག་བསྔལ་ཆེ།། བར་མའི་ནང་མ་སྡུག་བསྔལ་ཆེ།། མཚོན་ཆེན་དང་ཡུལ་ཆེན་འཕྲད་པ་བཞིན།། ཐར་ཐབས་མེད་པ་ཡིད་རེ་མུག། མཐོ་ཤར་ཆེན་གང་མ་མན་ཆད་དང་།། དམའ་སྤྲང་མོ་གཡོག་བཟུང་ཡན་ཆད་དུ།། འཆི་བ་མེད་པའི་མི་གཅིག་མེད།། མེད་བསམ་ན་རང་སེམས་ཀུན་བཟང་བསྒོམ།། བསྒོམ་དེ་ལ་འཆི་བ་ཡེ་ནས་མེད།། དེ་མ་རྟོགས་ལུས་སེམས་བྲལ་དུས་སུ།། ལུས་འབྱུང་གཞིའི་དབྱར་ལེན་བྱེད་པའི་དུས།། རྒྱུ་རང་གྲོལ་གྱི་སྤྱི་རྒྱ་མ་ཆོད་ན།། སེམས་འཁྲུལ་སྣང་གི་ངོ་བོ་དེ་བཟུང་ཚེ།། ལས་སྡུག་བསྔལ་ཚད་ལ་བཟུང་དུ་མེད།། དུས་དེ་དུས་རིགས་ལྔའི་ལྷ་ཚོགས་མཁྱེན།། དས་ཤི་ནས་ཞེ་དགུ་མ་རྫོགས་བར།། རྒྱུ་རིགས་དྲུག་ལ་ཉིན་རེ་ལན་དགུ་འགྲིམ།། སེམས་མ་བུ་རྩལ་གསུམ་མ་རྟོགས་ན།། ལས་སྡུག་བསྔལ་ཚད་ལ་བཟུང་དུ་མེད།། དུས་དེ་དུས་འདུལ་བ་གཤེན་དྲུག་མཁྱེན།། དས་དགུན་ཞག་ཞེ་དགུ་རྫོགས་པའི་དུས།། སྔོན་ལས་ཀྱི་རླུང་གིས་རྒྱབ་ནས་འདེད།། ཡིད་མ་རིག་མུན་པས་མདུན་ནས་བསུ།། སྟོང་སྲིད་པའི་མངའ་བདག་ཆེན་པོ་ཞེས།། ལས་དགེ་སྡིག་ཤན་འབྱེད་རྒྱལ་པོ་ཞེས།། ལས་མ་དག་གཤིན་རྗེ་ཆོས་རྒྱལ་མཐོང་།། ལས་དག་པས་གཙོ་མཆོག་མཁའ་འགྱིང་མཐོང་།། དེ་གནས་འགྱུར་ཀུན་སྣང་ཁྱབ་པ་འགྱུར།། དེ་དག་དང་མ་དག་དབྱེ་བ་ཡིན།། འཁོར་ཁྲག་འཐུང་ཁྲོ་བོ་འབུམ་གྱིས་བསྐོར།། ལྷ་དེ་མདུན་དབང་མེད་པུས་བཙུགས་དགོས།། ལས་དག་པ་ཞིག་པོ་ང་འདྲ་སོ།། ལྷ་གཙོ་མཆོག་དང་འབྲལ་བ་ཡེ་ནས་མེད།། དེ་མེད་ནས་ཆོས་རྒྱལ་ངང་མཉམ་ཡིན།། ལས་མ་དག་པ་ཡི་སེམས་ཅན་རྣམས། ལུས་ཤིང་ལོ་དཀྲུག་དཀྲུག་བྱེད་དགོས་འདུག། དུས་དེ་དུས་རག་ཤ་སྤྱི་འདུལ་མཁྱེན།། ལྷ་བདག་ཕྱོགས་མིན་ཏེ་རྣམ་སྤྲུལ་ཡིན།། འཁོར་ལས་མཁན་ཨ་བ་གླང་མགོ་དེ།། བདག་གྲོལ་བས་གསལ་བ་རང་བྱུང་ཡིན།། འགྲོ་མ་གྲོལ་ཨ་བ་གླང་མགོ་ཡིན།། འཁོར་ལས་མཁན་རག་ཤ་ཕག་མགོ་ཡིན།། བདག་གྲོལ་བ་དགེ་ལྷ་གར་ཕྱུག་ཡིན།། འགྲོ་མ་གྲོལ་རག་ཤ་ཕག་མགོ་ཡིན།། འཁོར་ལས་མཁན་དར་མ་སྤྲེལ་མགོ་དེ།། བདག་གྲོལ་བས་བྱེ་བྲག་དངོས་མེད་ཡིན།། འགྲོ་མ་གྲོལ་དར་མ་སྤྲེལ་མགོ་ཡིན།། འཁོར་ལས་མཁན་སེང་གེ་རབ་བརྟན་དེ།། བདག་གྲོལ་བས་དགའ་བ་དོན་འགྲུབ་ཡིན།། འགྲོ་མ་གྲོལ་སེང་གེ་རབ་བརྟན་ཡིན།། སེམས་སྐྱེ་ཤི་མེད་པ་མ་ཤེས་ན།། ལུས་སྲོག་སྙིང་དུམ་བུ་སྟོང་དུ་གཏུབ།། དུས་དེ་དུས་རང་སེམས་ཀུན་བཟང་མཁྱེན།། ལས་དགེ་སྡིག་གི་དབྱེ་ཤན་བྱེད་པའི་དུས།། མེ་ལོང་ཡིག་ཆུང་རྒྱ་མ་དང་།། ལས་ཀྱི་བུ་ཆུང་དཀར་ནག་གིས།། རྩིས་ཀྱི་རྡེའུ་བགྲང་པའི་དུས།། ཆོས་དཀར་པོའི་རྒྱལ་ཁ་མཐོ་བ་ནས།། ལམ་དཀར་པོའི་ལམ་ལ་ཞུགས་ནས་སུ།། ཐར་པའི་བདེ་གནས་ཐོབ་པའོ།། འགྲོ་དེ་འདྲ་མཐོང་ཚེ་དགའ་བ་ལ།། སྡིག་ནག་པོའི་ངོ་སོ་མཐོ་བ་རྣམས།། དམྱལ་ཁམས་བཅོ་བརྒྱད་ཀྱི་གནས་སུ་འཁྲིད།། ངན་སོང་གསུམ་གྱི་གནས་སུ་སྦྱང་།། འགྲོ་དེ་དག་མཐོང་ཚེ་སྐྱེ་ཤ་ཟིན།། ལས་མ་དག་གི་འགྲོ་རྣམས་སྙིང་རེ་རྗེ།། ཕ་དྲིན་ཆེན་རྩ་བའི་བླ་མ་མཁྱེན།། འགྲོ་དེ་རྣམས་བདག་གི་གདུལ་བྱར་ཤོག། དེ་མཚམས་ལེའུ་བཞི་བའོ།། 
     ཨེ་མ་སྐྱེ་བ་གྲངས་མེད་གོང་།། འགྲོ་འོང་མེད་པའི་ཞིང་ཁམས་སུ།། སྐྱེ་ཤི་མེད་པའི་གནས་མཆོག་ཏུ།། མ་འགའ་པ་ཡི་ལམ་དུ་གཤེགས།། གཤེགས་ཤུལ་མེ་ཏོག་འབུམ་ཆར་བབ།། གླིང་མཆོག་འོལ་མོ་ལུང་རིང་གི། ལྷོ་ཤར་བདུད་འདུལ་སྔགས་གླིང་དུ།། མིང་གཡུང་དྲུང་བདུད་འདུལ་ཞེས་པ་ཡིན།། སྤྲང་རང་ནི་དེ་ནས་ད་ལྟའི་བར།། མ་འགྲོ་བ་དྲུག་གི་དོན་ལ་བྱོན།། ཡང་གཅིག་ན་སྟག་གཟིག་འོལ་གླིང་དུ།། མིང་ཨ་ཐང་ཟེར་བའི་གྲུབ་སྨྱོན་ཡིན།། སྤྱིར་བླ་མ་དམ་པའི་བཀའ་གནང་བཞིན།། བོན་རིག་འཛིན་བརྒྱད་ཅུའི་ནང་ཚན་དུ།། དཔལ་ཁྱུང་པོ་གྱེར་ཆེན་ཟླ་མེད་ཡིན།། རྟགས་རྫུ་འཕྲུལ་མཁའ་ལ་བྱ་བཞིན་འཕུར།། ས་རི་བྲག་གང་ལ་ཐོགས་ཆགས་མེད།། ཡང་དུང་ཕྱུར་མང་པོ་བདེ་གནས་འཕང་།། ཡང་གཅིག་ན་ཞུ་སྒོམ་འཁྲུལ་ཞིག་ཡིན།། གནས་སྐྱེ་མཁར་བྲག་ཕུག་ཡང་དབེན་དུ།། ཟས་མཁར་སྒོང་དཀར་པོའི་བཅུད་ལེན་བྱས།། ཞལ་ཨ་དཀར་གསལ་བ་དགུ་འཛབ་བསྒྲངས།། ལྷ་གཤེན་ལྷའི་རང་ཞལ་ལན་གསུམ་མཇལ།། རྟགས་རྫུ་འཕྲུལ་དབང་ཆེན་ཁྲོ་རྒྱལ་གཙོ།། ལྷ་གཙོ་མཆོག་རང་སེམས་གཉིས་མེད་གྱུར།། ཡང་དུང་ཕྱུར་མང་པོའི་འགྲོ་དོན་བྱས།། ཡང་གཅིག་ན་གུ་རུ་རྣོན་རྩེ་ཡིན།། ལས་དག་པས་དབལ་མོས་མ་བཞིན་མགོན།། རྟགས་རྫུ་འཕྲུལ་སྟོང་རི་གཏེར་ནས་སྟོན།། ལས་དེ་དུས་མཐུན་གཏེར་མང་དུ་རྙེད།། ཡང་དུང་ཕྱུར་མང་པོའི་འགྲོ་དོན་བྱས།། དུས་དེ་ནས་བཟུང་ནས་ད་ལྟའི་བར།། རབ་རིབ་ཀྱི་འཁྲུལ་པ་མང་པོ་དྲན།། དེ་དྲན་རྡུང་མགོ་དཀར་ངས་མི་སྨྲ།། དུས་ད་ལྟ་ཧོར་ཡུལ་ས་ཆའི་ཞིང་།། ཡུལ་བྱིན་ཆེན་སོག་གི་གྲུ་ཁུག་ཏུ།། ལོ་ཤིང་ཕོ་ཁྱི་ཡི་ལོ་བདག་འཐོབ།། ང་ཆུང་ནས་དེང་སང་བར་དུ་ཡང་།། སེམས་དད་ལྡན་ཀྱི་སློབ་མ་གྲངས་མང་བྱུང་།། ལྷ་ཞི་ཁྲོའི་ཕྱི་ནང་ལྷ་ཚོགས་ཀུན།། མི་ང་གཉིས་སྐད་ཅིག་འབྲལ་མ་མྱོང་།། བོན་སྐྱོང་བའི་དམ་ཅན་སྲུང་མ་རྣམས།། ངས་བྲན་གཡོག་དང་འཁོར་འབང་འདྲ་སྣང་ཡོད།། དེ་ཡོད་པའི་ང་བོ་མ་ཡིན་ཏེ།། སེམས་རང་སྣང་དབང་དུ་འདུས་ཚུལ་ཡིན།། དས་ཕོ་ལོ་བདུན་ཅུ་དོན་བརྒྱད་བར།། སེམས་རོ་མྱོང་གི་འཁྲུལ་སྣང་ཆོད་ཕྱིར་རོ།། དས་མ་འགྱོད་ང་ཡི་བུ་སློབ་ཚོ།། སེམས་ཡེངས་མེད་ངང་ལ་གནས་པར་གྱིས།། དུས་རྒྱུན་དུ་གནའ་སྡིག་དམོད་གསུམ་དང་།། ངག་རྫུན་དང་འཕྲ་མ་དབྱེན་བཅུག་སོགས།། སེམས་གཡོ་རྒྱུ་གཞན་མགོ་བསྐོར་བ་སྤངས།། རབ་བྱུང་ནས་ནམ་ཞིག་མ་ཤི་བར།། འཁོར་ཁྱིམ་ཐབས་དོར་ལ་རི་ཁྲོད་ཟུངས།། ཚུལ་ནང་ཁྲིམས་རང་གི་ཁྲེལ་མེད་དགོས།། དེ་བྱས་ན་ང་གཉིས་འདུ་འབྲལ་མེད།། འབྲིང་རྒྱལ་བའི་བཀའ་ལུང་གོ་རྟོགས་སྒྲུབ།། ལུས་མ་འཇིག་བར་དུ་བྱམས་སེམས་བསྐྱེད།། ཕ་བླ་མ་མིག་སྙིང་སྲོག་བཞིན་བསྒོམ།། དེ་བྱས་ན་ང་གཉིས་འདུ་འབྲལ་མེད།། དས་དབང་པོ་ཐ་མའི་བུ་སློབ་ཚོ།། ནམ་ཡར་ལངས་སྐྱབས་གནས་གསོལ་འདེབས་བརྗོད།། ནུབ་ཕྱི་ཉལ་ཕྱག་དང་བརྩོན་འགྲུས་བསྐྱེད།། དུས་རྒྱུན་དུ་སྙིང་པོ་རྣམ་གསུམ་ཐོན།། གནའ་དམོད་མོ་དུག་བཞིན་འཛེམ་པར་གྱིས།། དེ་བྱས་ན་ང་ཡི་ཐུགས་རྗེས་སྐྱབས།། བདག་རང་ནི་བེམ་རིག་བྲལ་མ་ཐག། གནས་འོག་མིན་གསེར་སྟེང་གནས་མཆོག་ཏུ།། དཔལ་ཀུན་ཏུ་བཟང་དང་དབྱེར་མེད་ཡིན།། དུས་དེ་དུས་རང་རེའི་བུ་སློབ་སོ།། སེམས་ཡེངས་མེད་ངང་ནས་གསོལ་བ་ཐོབས།། ཡིད་ཐེ་ཚོམ་མེད་པར་ང་ཉིད་བསྒོམ།། དེ་བསྒོམ་ན་དེ་ཐོག་འཆི་ནུས་ན།། ཚེ་ཕྱི་མའི་འཇིགས་པ་ང་ཡིས་སྐྱབས།། སེམས་ཐེ་ཚོམ་མ་བྱེད་བུ་སློབ་ཚོ།། དེ་མཚམས་ལེའུ་ལྔ་བའོ།། སྐུ་ལྔའི་བརྡ་མཚོན་ལེའུ་ལྔ།། དུག་ལྔ་ཡེ་ལྔར་བྲལ[གྲོལ]བར་ཤོག། 

2015ལོའི་«ཤེས་རིག་བདུད་རྩིའི་རྒྱ་མཚོ»སྤྱིའི་དེབ་གྲངས་དྲུག་པ་ལས་བཤུས།